ಸಲೊಮಿ, ಮಿಯಾಪದವ್ ಲಿಕ್ಣೆ ನಾಂವಾಂನ್ ಬರಂವ್ಚಿ ಸಲೊಮಿ ಡಿ’ ಸೋಜಾ ಕಾಸರಗೋಡ್ - ಮಿಯಾಪದವ್ಚಿ. ಇಕ್ರಾ ವರ್ಸಾಂ ಪ್ರಾಯೆರ್ 'ಬಾಲಮಂಗಳ' ಕನ್ನಡ ಪತ್ರಾರ್ ಪಿಂತುರಾಂ ಬರಂವ್ಕ್ ಸುರ್ವಾತ್ಲೆಲ್ಯಾ ತಿಣೆ ಉಪ್ರಾಂತ್ ಮುಂಬಯ್ ಥಾವ್ನ್ ಫಾಯ್ಸ್ ಜಾಂವ್ಚ್ಯಾ 'ದಿವೊ' ಪತ್ರಾರ್ಯೀ ಪಿಂತುರಾಂ ಬರಯ್ಲಿಂ. ಸವ್ಕಾಸ್ ಕವಿತಾ, ಕಾಣಿಯೊ, ವಿಡಂಬನ್ ಲೇಕನಾಂ ಬರಂವ್ಕ್ ಧರ್ಲ್ಲ್ಯಾ ತಿಚಿಂ ಬರ್ಪಾಂ ಉಪ್ರಾಂತ್ ಸರಾಗ್ ಕೊಂಕ್ಣಿಂ ಪತ್ರಾಂನಿ ವ್ಹಾಳೊಂಕ್ ಸುರು ಜಾಲಿಂ.
ಮಂಗ್ಳುರ್ಚ್ಯಾ ಬೆಸೆಂಟ್ ಕೊಲೆಜಿಂತ್ ಪದ್ವೆ ಶಿಕಪ್, ಕಂಪ್ಯೂಟರ್ ಅಪ್ಲಿಕೇಶನಾಂತ್ ಸ್ನಾತಕೋತ್ತರ್ ಶಿಕಪ್ ಆನಿ CTTC ಕರುನ್ ಪ್ರಸ್ತುತ್ ಕಂಪ್ಯೂಟರ್ ಶಿಕ್ಶಕಿ ಜಾವ್ನ್ ವಾವುರ್ನ್ ಆಸಾ. ನಂತೂರ್ - ಮಂಗ್ಳುರ್ಚ್ಯಾ CODP ಸಂಸ್ಥ್ಯಾಂತ್ ಮಟ್ವ್ಯಾ ಆವ್ಧೆಕ್ ಪ್ರೋಜೆಕ್ಟ್ ಕೊ ಓರ್ಡಿನೇಟರ್ ಜಾವ್ನ್ ತಿ ವಾವುರ್ಲ್ಯಾ. ಜೂನಿಯರ್ ಲೀಜನ್, ಭಾರತೀಯ್ ಕಥೊಲಿಕ್ ಯುವ ಸಂಚಾಲನ್, ವಾರಾಡೊ, ಫಿರ್ಗಜ್ ಪತ್ರಾಂನಿ ಸಹಸಂಪಾದಕಿ, ಸಂಪಾದಕೀಯ್ ಮಂಡಳೆಚೊ ಸಾಂದೊ ಜಾವ್ನ್ ತಿಣೆ ಸೆವಾ ದಿಲ್ಯಾ. ಸಿಒಡಿಪಿ ಪುರವಣಿಚಿ ಸಂಪಾದಕಿ ಜಾವ್ನ್ ತಿಣೆ ಸೆವಾ ದಿಲ್ಯಾ.
ಸಾಹಿತ್ಯಾಂತ್ ಕವಿತಾ, ಚಿಕ್ಣಿ ಕತಾ ಆನಿ ವಿಡಂಬನ್ ತಿಚೆ ಆಂವಡ್ಚೆ ವಿಷಯ್. 200 ವಯ್ರ್ ಕವಿತಾ, ಸಾಹಿತ್ ಸ್ಪರ್ಧ್ಯಾಂನಿ ಕಾಣಿಯೊ, ವಿಡಂಬನಾಂ ಆನಿ ಕವಿತೆಂಕ್ ಇನಾಮಾಂ ತಿಣೆ ಜೊಡ್ಲ್ಯಾಂತ್.
