ಆಪ್ಲ್ಯಾ ಪಂದ್ರಾ ವರ್ಸಾಂಚ್ಯಾ ಪ್ರಾಯೆರ್ ಥಾವ್ನ್ ಕೊಂಕ್ಣೆಂತ್ 'ಆನಂದ್' ಲಿಖ್ಣೆ ನಾಂವಾಖಾಲ್ ಬರಂವ್ಚೊ ರಿಚರ್ಡ್ ಆಲ್ವಾರಿಸ್ ಕೊರ್ಡೆಲ್ ಫಿರ್ಗಜೆಚೊ. ತಾಚ್ಯೊ ಸಬಾರ್ ಮಟ್ವ್ಯೊಕಥಾ, ಲೇಖನಾಂ ಆನಿ ವಿನೋದ್ ವಿವಿಧ್ ಕೊಂಕ್ಣಿ ಪತ್ರಾಂನಿ ಫಾಯ್ಸ್ ಜಾಲ್ಯಾತ್. ಕಾಣಿಕ್ ಪತ್ರಾಚೊ ಸಹಸಂಪಾದಕ್ ಜಾವ್ನ್, 'ಕೊರ್ಡೆಲ್ಚೆಂ ಜಯ್ತ್' ಸಂಪಾದಕೀಯ್ ಮಂಡಳೆಚೊ ಸಾಂದೊ ಜಾವ್ನ್ ತಾಣೆ ವಾವ್ರ್ ದಿಲಾ. ವೈ.ಸಿ.ಯಸ್/ವೈ.ಎಸ್.ಎಮ್ ಸಂಚಾಲನಾಚೆಂ ಪತ್ರ್ 'ಯುವತಾರೆ' ಹಾಚೊ ಸಂಪಾದಕ್ ತಶೆಂ 'ದೈವಿಕ್ ಅಮೃತ್' ಪತ್ರಾಚ್ಯಾ ಸಂಪಾದಕೀಯ್ ಮಂಡಳೆಚೊ ಸಾಂದೊ ಜಾವ್ನ್ ಸೆವಾ ದಿತೇ ಆಸಾ. ಮರಿಯೆ ಸಂಗಿ ಸೊಡ್ವಣೆಚೊ ನಿಯಾಳ್, ಫಾಲ್ಯಾಂಕಿತೆಂ?, ಮದರ್ ತೆರೆಸಾ ಜಿಣ್ಯೆ ಕಥಾ - ತಾಚೆ ಪರ್ಗಟ್ ಜಾಲ್ಲೆ ಬೂಕ್. ಭಾಗೆವಂತ್ ಜುವಾಂವ್ ಪಾವ್ಲ್ ದುಸ್ರೊ ನೊವೆನಾಚೊ ಬೂಕ್, ಮೊಲಾಧೀಕ್ ಮೊತಿಯಾಂ ಪುಸ್ತಕ್ ತಶೆಂ ಫಾ| ಆಂಡ್ರೂ ಡಿ' ಸೋಜಾ ಸಂಗಿ ಮೆಳೊನ್ ಮದರ್ ತೆರೆಸಾ ನೊವೆನಾಚೊ ಬೂಕ್ ದೈವಿಕ್ ಅಮೃತ್ ಪ್ರಕಾಶನಾ ಥಾವ್ನ್ ಪರ್ಗಟ್ ಜಾಲ್ಯಾತ್. ಕಾನಡಿ ಭಾಷೆಂತ್ ತಾಣೆ ಬರಯಿಲ್ಲ್ಯಾ 'ಹೊಸಬೆಳಕು' ಬುಕಾಕ್ 'ಶ್ರೀ ದಾಂತಿ ಸ್ಮಾರಕ್ ಸಾಹಿತ್ಯ್ ಪುರಸ್ಕಾರ್' ಲಾಬ್ಲಾ. ಬಾಯ್ಬಲ್ ಆದಾರಿತ್ ನಾಟ್ಕುಳ್ಯಾಂಚೊ 'ಕ್ರಿಸ್ತ ಪ್ರೀತಿ' ಪುಸ್ತಕ್ ಮಂಗಳಜ್ಯೋತಿ ಕೇಂದ್ರಾನ್ ಫಾಯ್ಸ್ ಕೆಲಾ. ವೃತ್ತೆಂತ್ ಶಿಕ್ಷಕ್ ಜಾವ್ನಾಸ್ಚೊ ತೋ ಪ್ರಸ್ತುತ್ ಸೈಂಟ್ ರೇಮಂಡ್ಸ್ ಹೈಸ್ಕೂಲ್, ವಾಮಂಜೂರ್ ಹಾಂಗಾಸರ್ ವಾವುರ್ತಾ. ತಾಚೆ ಭಾವ್ ಲೊರೆನ್ಸ್ ಆಲ್ವಾರೆಸ್ ಆನಿ ವಿಕ್ಟರ್ ಆಲ್ವಾರೆಸ್ ಅನುಕ್ರಮಾನ್ ನವೀನ್ ತಶೆಂ ವಿಜಯ್ ಹ್ಯಾ ಲಿಕ್ಣೆನಾಂವಾಂನಿ ಕೊಂಕ್ಣಿ ತಶೆಂ ಹೆರ್ ಭಾಸಾಂನಿ ಬರಯ್ತಾತ್.
