ಪ್ರಸ್ತುತ್ ಬೆಂಗ್ಳುರಾಂತ್ ವಸ್ತಿ ಕರುನ್ ಆಸ್ಚೊ ಮುಳಾನ್ ಶಿರ್ವಾಂ ಫಿರ್ಗಜೆಚ್ಯಾ ನಾಯ್ದೊಡ್‌ಚೊ ರವಿ ನೊರೊನ್ಹಾ ವೃತ್ತೆನ್ ಟೆಲಿಕಮ್ಯೂನಿಕೇಶನ್ ಇಂಜಿನಿಯರ್. ದೆಶಾಚ್ಯಾ ನಾಮ್ಣೆಚ್ಯಾ ಟೆಲಿಕಾಂ ಕಂಪ್ಣೆಂನಿ ಕಾಮ್ ಕೆಲ್ಲೊ 23 ವರ್ಸಾಚೊಂ ಅನ್ಭೊಗ್ ತಾಕಾ ಆಸುನ್ ಪ್ರಸ್ತುತ್ ಟಾಟಾ ಕಂಪ್ಣೆಂತ್, ಕರ್ನಾಟಕ - ಕೇರಳ ರಾಜ್ಯಾಂಚೊ ನೋಡಲ್ ಆನಿ ಕಾರ್ಪೊರೇಟ್ ರೆಗ್ಯುಲೇಟರಿ ಎಫೇರ್ಸ್ ಮುಖ್ಯಸ್ಥ್ ಜಾವ್ನ್ ವಾವುರ್ನ್ ಆಸಾ. ಸಾಂಗಾತಾ ರಾಜ್ಯಾಚಾ ಪೊಲಿಸ್ ವಿಭಾಗಾಕ್, ಸಂಘೀನ್ ಅಫ್ರಾದಿ ಪ್ರಕರಣಾಂ ಸುಟಂವ್ಚ್ಯಾಂತ್ ತಾಂತ್ರಿಕ್ ಗಜಾಲಿಂನಿ, ಪ್ರತೇಕ್ ಜಾವ್ನ್, ಅಫ್ರಾದ್ಯಾಂಚಿಂ ಫೊನ್ ಸಂಭಾಶಣಾಂ - ಸಂವಹನಾಂ - ಲಿಪೊನ್ ಬಸ್ಚೊ ಜಾಗೊ ಸೊಧುನ್ ಕಾಡುಂಕ್ ಕುಮಕ್ ಕರುನ್ ಆಯ್ಲಾ ಮಾತ್ ನಯ್, ಶಿಬಂದೆಕ್ ಟೆಲಿಕಮ್ಯೂನಿಕೇಶನ್ ಆನಿ ಹೆರ್ ತಾಂತ್ರಿಕ್ ಗಜಾಲಿಂಚೆರ್ ತರ್ಭೆತಿ ದೀವ್ನ್ ಆಯ್ಲಾ. ರಾಜ್ಯಾಚಾ ಉಂಚ್ಲ್ಯಾ ಕೊಡ್ತಿಂತ್ ಹಜಾರೊಂ ಪ್ರಕರಣಾಂನಿ ಟೆಲಿಕಮ್ಯೂನಿಕೇಶನ್ ತಜ್ಞ್ ಜಾವ್ನ್ ತಾಣೆ ಅಭಿಪ್ರಾಯ್/ ಸಾಕ್ಸ್ ದಿಲ್ಯಾ. ತಾಚ್ಯಾ ಸಸಾಯೆನ್ ರಾಜ್ಯಾಂತ್ ಶೆಂಭರಾಂ ವಯ್ರ್ ಸೆನ್ಸೆಸೇಶನಲ್ ಪ್ರಕರಣಾಂ ಸುಟಂವ್ಕ್ ಪೊಲಿಸಾಂಕ್ ಕುಮಕ್ ಲಾಭ್ಲ್ಯಾ ಆಸುನ್ ಹೆ ಬಾಬ್ತಿನ್ ಪೊಲಿಸ್ ವಿಭಾಗಾಥಾವ್ನ್ ತಾಕಾ ಶಿಫಾರಸ್ ಫಾವೊ ಜಾಲ್ಯಾ. ಹಜಾರಾಂ ಲಾಗಿಂ ಪ್ರಕರಣಾಂನಿ ಕೊಡ್ತಿಂತ್ ತಾಣೆ ಸಾಕ್ಸ್ ದಿಲ್ಯಾ.
