ಪ್ರಸ್ತುತ್ ಉಡ್ಪಿ ದಿಯೆಸೆಜಿಚ್ಯಾ ಕೋಟಾ ಫಿರ್ಗಜೆಚೊ ವಿಗಾರ್ ಜಾವ್ನಾಸ್ಚೊ ದೊತೊರ್ ಬಾಪ್ ಅಲ್ಪೋನ್ಸ್ ಡಿ’ಲಿಮಾ ಆದ್ಲ್ಯಾ ಪನ್ನಾಸ್ ವರ್ಸಾಂಥಾವ್ನ್ ನಿರಂತರ್ ಕೊಂಕ್ಣಿ ಸಾಹಿತ್ ಸಂರಚನ್ ಕರುನ್ ಆಸಾ. ಗೂಂಡ್ ಚಿಂತಪ್ ಆಟಂವ್ಚೆ ವಿಷಯ್ ಭೋವ್ ಸೊಂಪ್ಯಾ ಭಾಶೆನ್ ಪ್ರಸ್ತುತ್ ಕರ್ಚ್ಯಾಂತ್ ತೊ ಫಾಮಾದ್. 'ಆಮ್ಚ್ಯಾ ಬಾಪಾ ಸರ್ಗಿಂಚ್ಯಾ', 'ಪ್ರೇರಕಾಂಕ್ ಪ್ರೇರಣ್', 'ಆಲ್ತಡಿಥಾವ್ನ್ ಪಲ್ತಡಿಕ್', 'ಸೈಕಲಾರ್ ಸವಾರಿ', 'ಪಾರಾಕ್ಲಿತ್', 'ಪಾನಾಂ ಪಂದ್ಲಿಂ ಪಾಳಾಂ', 'From Diary of a Parish Priest' ಅಸಲೆ ತಾಚೆ ಪುಸ್ತಕ್ ನವ್ಯಾ ದಿಶೆಚ್ಯಾ ಪವಿತ್ರ್ಸಭೆಚಿ ಬರಿ ಖಬರ್ ಪರ್ಗಟ್ತಾತ್. 02.08.1946 ವೆರ್ ಪಿಯುಸ್ನಗರ್ (ಹಂಗಳೂರ್) ಜನ್ಮಾಲ್ಲ್ಯಾ ತಾಕಾ 8.5.1973 ವೆರ್ ಯಾಜಕೀ ದೀಕ್ಷಾ ಲಾಬ್ಲಿ. ಮೂಡುಬೆಳ್ಳೆ ಆನಿ ಮಿಲಾರ್ ಫಿರ್ಗಜಾಂನಿ ಸಹಾಯಕ್ ವಿಗಾರ್ ಜಾವ್ನ್ ಸೆವಾ ದಿಲ್ಲ್ಯಾ ಉಪ್ರಾಂತ್ ತಾಕಾ ದಿಯೆಸೆಜಿಚ್ಯಾ ದೇವ್ ಆಪೊವ್ಣ್ಯಾ ಕೇಂದ್ರಾಚೊ ನಿರ್ದೇಶಕ್ ನೆಮ್ಲೊ. ತ್ಯಾ ನಂತರ್ ತಾಕಾ ರೊಮಾಂತ್ ಉಂಚ್ಲ್ಯಾ ಶಿಕ್ಪಾಕ್ ಧಾಡ್ಲೊ. ರೊಮಾಥಾವ್ನ್ ಪಾಟಿಂ ಆಯಿಲ್ಲ್ಯಾ ತಾಕಾ ದಿಯೆಸೆಜಿಚ್ಯಾ ಗೊವ್ಳಿಕ್ ಕೇಂದ್ರಾಚೆ ಸ್ಥಾಪಕ್ ನಿರ್ದೇಶಕ್ ಜಾವ್ನ್ ನೆಮ್ಲೆಂ. ತ್ಯಾ ಸಂದರ್ಭಿಂ ಲ್ಹಾನ್ ಕ್ರಿಸ್ತಾಂವ್ ಸಮುದಾಯ್ ದಿಯೆಸೆಜಿಚ್ಯಾ ಕೊನ್ಶ್ಯಾ ಕೊನ್ಶ್ಯಾಂಕ್ ಪಾವೊಂವ್ಕ್ ತಾಣೆ ವ್ಹರ್ತೊ ವಾವ್ರ್ ಕೆಲಾ. ತ್ಯಾ ನಂತರ್ ವಾಮಂಜೂರ್, ಗಂಗೊಳ್ಳಿ, ಕಾರ್ಕೊಳ್ ಆತ್ತೂರ್, ವಿಗಾರ್ ಜಾವ್ನ್ ಉಡ್ಪಿ ದಿಯೆಸೆಜಿಚ್ಯಾ ಮೈನರ್ ಸೆಮಿನರಿಚೊ ರೆಕ್ಟರ್ ಜಾವ್ನ್ ತೊ ವಾವುರ್ಲಾ ಆನಿ ಆತಾಂ ತೊ ಕೋಟಾ ಫಿರ್ಗಜೆಚೊ ವಿಗಾರ್ ಜಾವ್ನ್ ಸೆವಾ ದೀವ್ನ್ ಆಸಾ.
