ಕಾನೂನಾಂತ್ ಪದ್ವೆ ಸನದ್ ಜೊಡುನ್, ಪ್ರಸ್ತುತ್ ದುಬಂಯ್ತ್ ಬಹು ರಾಷ್ಟೀಯ್ ಕಂಪ್ಣೆಂತ್ ವಾವ್ರ್ ಕರುನ್ ಆಸ್ಚೊ ಡ್ಯಾರೆಲ್ ಜೀವನ್ ಡಿ’ ಸೊಜಾ ಗಾಂವಾನ್ ವಾಮಂಜೂರ್ ಫಿರ್ಗಜೆಚೊ, ಮಾಲ್ಘಡೊ ಕೊಂಕ್ಣಿ ಸಾಹಿತಿ ಮಾನೆಸ್ತ್ ಡೆವಿಡ್ ಡಿಸೊಜಾ, ವಾಮಂಜೂರ್ ಹಾಚೊ ಪೂತ್. ತಾಚ್ಯಾ ಚಡಾವತ್ ಬರ್ಪಾಂನಿ ಪ್ರಕೃತಿ ಆನಿ ಪರಿಸರಾಕ್ ಸ್ಪಂದನ್ ಕರ್ಚೆಂ ಮನ್ ಆನಿ ದಣ್ಸಾಲ್ಲ್ಯಾಂಚೊ ಆವಾಜ್ ಜಾಂವ್ಚೆಂ ಕಾಳಿಜ್ ಆಸಾ. ದಿಯೆಸೆಜಿಚಿಂ ಯುವ ಸಂಘಟನಾಂ ವೈ.ಸಿ.ಎಸ್ ಆನಿ ಐ.ಸಿ.ವೈ.ಎಮ್ ಹಾಂತು ವೆವೆಗ್ಳ್ಯಾ ಹುದ್ದ್ಯಾಂನಿ ತೊ ವಾವುರ್ಲಾ ಮಾತ್ ನ್ಹಯ್ ಎಕಾ ಆವ್ಧೆಕ್ ಆಮ್ಚೊ ಯುವಕ್ ಪತ್ರಾಚೊ ಸಂಪಾದಕ್ ಜಾವ್ನ್ ತಾಣೆ ಸೆವಾ ದಿಲ್ಯಾ. ಏಕ್ ಬರೊ ಉಲವ್ಪಿ ಜಾವ್ನಾಸ್ಚ್ಯಾ ತಾಣೆ ದಿಯೆಸಿಜಿಚ್ಯಾ ಕೊನ್ಶ್ಯಾ ಕೊನ್ಶ್ಯಾಂನಿ ತರ್ನಾಟ್ಯಾಂ ಖಾತಿರ್ ಮಾಂಡುನ್ ಹಾಡ್ಲೆಲ್ಯಾ ತರ್ಭೆತಿ ಶಿಬಿರಾಂನಿ ಸಂಪನ್ಮೂಳ್ ವೆಕ್ತಿ ಜಾವ್ನ್ ಸೆವಾ ದಿಲ್ಯಾ. ಕಾರ್ಯೆಂ ನಿರ್ವಹಣ್ ಆನಿ ಅಭಿನಯಾಚ್ಯಾ ಶೆತಾಂತೀ ತಾಣೆ ಆಪ್ಲಿಚ್ ಛಾಪ್ ಮಾರ್ಲ್ಯಾ. ಗಲ್ಫಾಕ್ ಪಾವ್ಲ್ಯಾ ಉಪ್ರಾಂತೀ ಜಾಯ್ತ್ಯೊ ಕವಿತಾ ರೂಪಕಾಂ ರುಪಾರ್ ತಾಣೆಂ ಸಾದರ್ ಕೆಲ್ಯಾಂತ್.
