ಆತಾಂ ಇಜಯ್ ವಸ್ತಿ ಕರುನ್ ಆಸ್ಚೊ ಕವಿ ಆಂಡ್ರ್ಯೂ ಎಲ್. ಡಿಕುನ್ಹಾ ಗಾಂವಾನ್, ಗುರ್ಪುರ್, ಕಿನ್ನಿಕಂಬ್ಳಾಚೊ. ವೃತ್ತೆನ್ ಆರ್ಥಿಕ್ ಸಲಹಾದಾರ್ ಆನಿ ಮಂಗ್ಳುರಾಂತ್ 'ವಿನ್ ವಿನ್ ಫೈನ್ಸಾನ್ಸಿಯಲ್ ಕನ್ಸಲ್ಟೆನ್ಸಿ ಪ್ರೈವೆಟ್ ಲಿಮಿಟೆಡ್ ' ಚಲಯ್ತೆ ಆಸಾ.
ಪಾಟ್ಲ್ಯಾ 35 ವರ್ಸಾಂ ಪಾಸುನ್ ತೋ ಕೊಂಕ್ಣೆಂತ್ ಬರಯ್ತ್ ಆಯ್ಲಾ. ಪಾಟ್ಲ್ಯಾ ತೀನ್ ವರ್ಸಾಂನಿ ತಾಣೆ ಪಾಂಯ್ಶ್ಯಾಂ ವಯ್ರ್ ಕವಿತಾ ಬರಯ್ಲ್ಯಾತ್ ಆನಿ ತಾಚೆ ತೀನ್ ಕವಿತಾ ಜಮೆ ಫಾಯ್ಸ್ ಜಾಲ್ಯಾತ್. ವ್ಹಳೂ ವ್ಹಳು ವ್ಹಾಳ್ ವ್ಹಾಳ್ಯಾ( 2004 - ಆಶಾವಾದಿ ಪ್ರಕಾಶನ್), ಅಂಜುರಾಚೆಂ ಪಾನ್ (2013 - ಕವಿತಾ ಟ್ರಸ್ಟ್ ) ಆನಿ ಆಯೆರಾಚೊ ಬೂಕ್ (2014 - ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ) . ಪನ್ನಾಸಾಂಕ್ ಮಿಕ್ವೊನ್ ಲೇಕನಾಂ ಆನಿ ತೀಸ್ ಮಟ್ವ್ಯೊ ಕಾಣಿಯೊ ತಾಣೆ ಬರಯ್ಲ್ಯಾತ್.
ರಾಕ್ಣೊ ಪತ್ರಾರ್ ಆಂದ್ರುಮಾಮ್ ನಾಂವಾರ್ ತಾಣೆ ಭುರ್ಗ್ಯಾಂಚೊ ಸಂಸಾರ್ ಕೊನ್ಸೊ ಚಲವ್ನ್ ವೆಲಾ. ರಾಕ್ಣೊ, ಆಮ್ಚೊ ಯುವಕ್, ಮಿತ್ರ್ ಪತ್ರಾಂಚ್ಯಾ ಸಂಪಾದಕೀ ಮಂಡಳೆಂತ್ ವಾವ್ರ್ ದಿಲಾ ಆನಿ ಥೊಡೊ ತೇಂಪ್ ಆಮ್ಚೊ ಯುವಕ್ ಪತ್ರಾಚೊ ಕಾರ್ಯಾ ನಿರ್ವಾಹಕ್ ಸಂಪಾದಕ್ ಜಾವ್ನ್ ಪತ್ರ್ ಚಲಯ್ಲಾಂ. ಇಜಯ್ಚೆಂ ಫಿರ್ಗಜ್ ಪತ್ರ್ ’ಇಜಯ್ಚೊ ಕಳೊ’ ಆನಿ mangaloremithr.com ಹ್ಯಾ ಜಾಳಿಜಾಗ್ಯಾಚೊ ಸಂಪಾದಕ್ ಜಾವ್ನ್ ತೋ ವಾವುರ್ಲಾ. ದಾಯ್ಜಿ ಬುಬಯ್ ಬರವ್ಪ್ಯಾಂಚೊ ಎಕ್ತಾರ್ ಹಾಚೊ ಸಾಂದೊ ಆನಿ ಕವಿತಾ ಟ್ರಸ್ಟ್ ಹಾಚೊ ಟ್ರಸ್ಟಿ ಜಾವ್ನ್ ಸೆವಾ ದಿತೇ ಆಸಾ.
