ಹೆಂ ಸವಾಲ್ ಕಾಂಯ್ ಮನ್ಶಾಕುಳಾತಿತ್ಲೆಂಚ್ ಪುರತಾನ್ ಜಾವ್ನ್ ಆಸ್ಯೆತ್.
ಸರ್ವ್ ತತ್ವ್‌ಗ್ಯಾನಾಚಿ ಬುನ್ಯಾದ್ ಹೆಂಚ್ ಸವಾಲ್ ಮ್ಹಣ್ತಾನಾ ಹೆಂ ಸವಾಲ್ ವಿಚಾರ್ಚೊ ಮಾನವ್ ಜಲ್ಮಾಥಾವ್ನ್ಂಚ್ ತತ್ವಗ್ಯಾನಿಂಚ್ಯಾ ವೊಳೆರಿಂತ್ ಯೆತಾ ಮ್ಹಳ್ಳ್ಯಾಂತ್ ನವಾಲ್ ನಾ, ಅತಿಶಯ್ ನಾ.
ಅಶೆಂ ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ ಸವಾಲಾಕ್ ಜಾಪ್ ಮ್ಹಳ್ಳಿ ನಾ ಆಸ್‌ಲ್ಲಿ ತರ್ ಹೊ ಸಂಸಾರ್ ಇತ್ಲಿ ಪ್ರಗತಿ ಕರುಂಕ್ ಸಕ್ತೊ ನಾ. ಪ್ರಗತಿ ಮ್ಹಣ್ತಕೂಚ್ ಮಾನವಾನ್ ಕಿತೆಂ ನಾತ್‌ಲ್ಲ್ಯಾಥಾವ್ನ್ ಕಿತೆಂ ಪುಣಿಂ ರಚ್ಲೆಂ ಮ್ಹಣೊಂಕ್ ಸಾದ್ಯ್ ನಾ. ಪ್ರಗತಿ ಮ್ಹಣ್ತಾನಾ ಸಂಸಾರಾಚ್ಯಾ ಉದ್ಬವಾಥಾವ್ನ್ ಧರುನ್ ಮಾನವ್ ಪ್ರಗತಿ ಕರಿತ್ತ್ ಆಯ್ಲಾ ಮ್ಹಳ್ಯಾರ್ ಉದ್ಬವಾಥಾವ್ನ್ಂಚ್ ಆಸ್‌ಲ್ಲೆ ನೇಮ್, ಸತಾಂ, ರೂಪ್‌ರೇಖಾಂ ತಾಣೆ ಉಗ್ತಡಾಂತ್ ಹಾಡ್ಲ್ಯಾಂತ್ ಆನಿ ಹ್ಯಾ ಸಂಗ್ತಿಂ-ಸತಾಂಚ್ಯಾ ಉಜ್ವಡಾಂತ್ ಮಾನವಾಚಿ ಪ್ರಗತಿ ಆಜ್ ಖರಿಚ್ ಪ್ರಗತಿ ಜಾಂವ್ಕ್ ಪಾವ್ಲ್ಯಾ ಆನಿ ಸಬಾರಾಂಚಿ ಪಾತ್ಯೆಣಿ ಆಸಾ ಕಿ ವಿಗ್ಯಾನಾವರ್ತೆಂ ಹೆರ್ ಕಸಲೆಂಚ್ ನಾ.
ಬರಾಬರ್ ಜಾವ್ಯೆತ್ ಕಿತ್ಯಾಕ್ ಹೊ “ಸೋದ್” ಚಾಲುಚ್ ಆಸಾ ಕಿತ್ಯಾಕ್ ಹ್ಯಾ “ಕಿತ್ಯಾಕ್” ಮ್ಹಳ್ಳ್ಯಾ ಸವಲಾಕ್ ಜರ್ತರ್ ಜಾಪ್ ಮೆಳ್ಳಿ, ಸಂಸಾರ್ ಸ್ತಬ್ದ್ ಜಾತಲೊ ಮ್ಹಳ್ಳಿ ಪಾತ್ಯೆಣಿ ಮ್ಹಜಿ. ರಾಜಾಂವ್ ಕಿತೆಂ? ಕಿತ್ಯಾಕ್ ಮ್ಹಳ್ಳ್ಯಾ ಸವಲಾಕ್ ಜಾಪ್ ಮೆಳ್ಳಿ ತರ್ – ಕಾಲ್ ಕಿತೆಂ, ಆಜ್ ಕಿತೆಂ ಆನಿ ಫಾಲ್ಯಾಂ ಕಿತೆಂ ಮ್ಹಳ್ಳ್ಯಾ ಹ್ಯಾ ಸವಲಾಂಕ್ ಜಾಪಿ ಸೊದ್ಚೆಂ ಪ್ರೇತನ್ ಕೋಣ್ಂಚ್ ಕರಿಶೆನಾಂತ್ ಆನಿ ಶೇಕ್ಸ್‌ಪಿಯೆರಾಚ್ಯಾ ‘ಹ್ಯಾಮ್ಲೆಟ್’ ಹಾಂತ್ಲ್ಯಾ to be or not to be ಮ್ಹಳ್ಳ್ಯಾ ಸವಲಾಕ್ ಕಸಲಿಚ್ ಧಾರ್ ಆಸ್ಚಿ ನಾ.
“ಕಿತ್ಯಾಕ್” ಮ್ಹಳ್ಳೆಂ ಸವಾಲ್ ಆತಾಂಯಿ ಜೀವಂತ್ ಆಸಾ ಆನಿ ಸಂಸಾರ್ ಚಾಲುಚ್ಚ್ ಆಸಾ. ಪುಣ್ ತೊ ನಾಸ್ ಕರ್ಚೆ ವಾಟೆರ್ ಆಮಿಂ ಖಬ್ರೆವಿಣೆಂ ಕರ್ತುಬಾಂ ಕರುನ್ಂಚ್ ಆಸಾಂವ್ ಆನಿ ಕಾಂಯ್ ತರಿ ಸಂದಿಗ್ದ್ ಪರಿಗತ್ ಉದೆಲಿ ತವಳ್ ಆಮ್ಕಾಂ ಜಾಗ್ ಜಾತಾ, ವಾಸ್ತವೀಕತಾ ಸಾಮ್ಕಾರ್ ಯೆತಾ ಆನಿ ಉಚಾಂಬಳ್ ಜಾಲ್ಲ್ಯಾ ಗಾಂಜಿಲ್ ಮುಸಾಂಪರಿಂ ಆಮಿ “ಝೆಂ” ಕರುನ್ ದೆದೆಸ್ಪ್ರಾಯೆನ್ ಹೆಣೆಂ ತೆಣೆಂ ಉಬ್ತಾಂವ್, ಕಮಿಟ್ಯೊ ಕರ‍್ತಾಂವ್, ಧರ್ತಿಮಾಯೆಕ್ ಬಚಾವ್ ಕರ್ಯಾಂ ಮ್ಹಣ್ ರುದಾನ್ ಕರ‍್ತಾಂವ್. ಚಡ್ ಉಣೆ ಅಶೆಂಚ್ ಘಡ್ತಾ ಆಮ್ಚೆರ್ ಉದ್ಕಾಚೊ ತತ್ವಾರ್ ದೆಂವ್ತಾನಾ. ಹಿ ಪರಿಗತ್ ಆಮಿ ಸರ್ವಾಂನಿ ಅಣ್ಬವ್ ಕೆಲ್ಲಿಚ್ ಪುಣ್ ‘ಬೊಟಾಂ’ ಮತ್ರ್ ಹುಲ್ಪಾಲಿಂ ನ್ಹಯ್, ಕೂಡ್ ಸಗ್ಳಿಚ್ ಆಸಾ ಮ್ಹಣ್ ಆಮಿ ಹುಲ್ಪಾಲ್ಲೆ ಉಜ್ಯಾ-ಫೊಡ್ ಲೆಂವಾತ್ತ್ ಬಸ್ತಾಂವ್, ಸ್ವಾರ್ಥ್ ಫುಡ್ಲೆಂ ಸ್ಥಾನ್ ಘೆತಾ, ಆಮ್ಚೊ ಸರ್ಕಾರ್ ಆಸಾ ನ್ಹಯ್, ಆಮ್ಗೆರ್ ಉದಕ್ ಆಸಾ, ಸಾತ್ ಮುಂಡಾಂಚಿ ಬಾಂಯ್ ಆಸಾ, ತೀನ್ ಸಿಂಟೆಕ್ಸ್ ಟಾಂಕಿ ಆಸಾತ್, ಆಮ್ಕಾಂ ಖಂತ್‌ ನಾ.
ನಿಜಾಯ್ಕಿ? ಹಾಂಗಾಸರ್ ‘ಕಿತ್ಯಾಕ್’ ಮ್ಹಳ್ಳ್ಯಾ ಸವಲಾಕ್ ಹಾಂವ್ ಮೆತೆರ್ ಕರಿನಾ. ಸುಕೊನ್, ಪಾಜ್ ದಿಸ್ಚ್ಯಾ ಸಾಂತ್ ಮುಂಡಾಯೆಚ್ಯಾ ಬಾಂಯ್ತ್ ಫಕತ್ ಎಕ್ ಲೊಟೊ ಉದ್ಕಾ ಮೆಳತ್‌ಗಿ ಮ್ಹಣ್ ಬಾಂಯ್ತ್ ದೆಂವಲ್ಲ್ಯಾಂಚ್ಯೊ ತಸ್ವೀರ‍್ಯೊ ದಿಸಾಳ್ಯಾಂನಿ ಚಾಪುನ್ ಯೆತಾತ್ ಪುಣ್ ಹಿ ಪರಿಗತ್ ಆಮ್ಕಾಂ ಶೀದಾನ್ ಶೀದಾ ಲಾಗು ಜಾಯ್ನಾಂತ್ ಜಾಲ್ಲ್ಯಾನ್ ಆಮಿ ಬೇಫಿಕ್ರ್.
ವಿಚಾರ‍್ತಾತ್ ಥೊಡೆ – ಯೆದೆವ್ಹಡ್ ಪ್ರಿತುಮೆಕ್ ಆಮಿ ಕಶೆಂ ಸಂರಕ್ಷಣ್ ದಿಂವ್ಚೆಂ? ಪ್ರಿತುಮಿ ಕಾಂಯ್ ಎಕ್ ಪುಟ್‌ಬೊಲ್?
ಹ್ಯಾಚ್ ಮೇ ಮ್ಹಯ್‌ನ್ಯಾಚ್ಯಾ ಎಕ್ಣೀಸ್ ತಾರಿಕೆರ್ ನೆಮಾಳ್ಯಾಂನಿ ಆಯಿಲ್ಲೆ ಎಕ್ ವಿಗ್ಯಾನಿಕ್ ವದಿ ಹಾಂವೆಂ ವಾಚ್ಲಿ: Man-made “bubble” found around Earth. NASA probes have spotted a man-made barrier around the Earth that prevents high-energy space radiation from reaching the planet, scientist say.
ಹಾಚೆರ್ ಹಾಂವ್ ಕಾಂಯ್ ಟೀಪ್ ದಿಂವ್ಕ್ ಸಕಾನಾಂ ಕಿತ್ಯಾಕ್ ಹಾಂವ್ ವಿಗ್ಯಾನಿಂ ನ್ಹಯ್ ಆನಿ ಹಾಂವೆಂ ಕಿತ್ಲೆಂಯಿ “ಕಿತ್ಯಾಕ್” ಮ್ಹಳ್ಳಿಂ ಸವಲಾ ಕೆಲ್ಯಾರೀ ಹಾಂವ್ ವಿಗ್ಯಾನಿ ಜಾಂವ್ಚೊ ನಾ. ಹಾಂವ್ ಇತ್ಲೆಂಚ್ ಮ್ಹಜ್ಯಾ ಅಲ್ಬ್ಯಾ ಗಿನ್ಯಾನಾನ್ ಸಮ್ಜೊಂಕ್ ಸಕ್ತಾಂ ಕಿ ಸಂಸಾರಾಚ್ಯಾ ರಚನಾ ವೆಳಾರ್ ತೆಂ ರಚನ್ ಕೆಲ್ಲ್ಯಾ ಸಕ್ತೆನ್ ಆಸಾ ಕೆಲ್ಲೊ ಎಕ್ ಬೊಮಾಡೊ (balloon) ಜೊ ಪ್ರಿತುಮೆಕ್ ವಿಕಾಳ್ ಪ್ರದೂಷಣಾಂಥಾವ್ನ್, ವಿಕಿರಣಾಂಥಾವ್ನ್ ರಾಕುನ್ ವರ್ತಾ. ರಚ್ಣಾಚಿ ಹಿ ಸಕತ್ (ಜಾಂವ್ ತೊ ದೇವ್ ಯಾ ದೆಂವ್ಚಾರ್) ಆಪ್ಲ್ಣೆ ರಚ್‌ಲ್ಲ್ಯಾ ಪ್ರಿತುಮೆಕ್ ಅದೃಶ್ ವಾಟಾಂನಿ ಸಾಂಬಾಳ್ಟಾ.
ತರ್ ಹೊ ಬೊಮಾಡೊ ಆಮ್ಕಾಂ ದೊಳ್ಯಾಂಕ್ ಕಿತ್ಯಾಕ್ ದಿಸನಾ ಮ್ಹಳ್ಳೆಂ ‘ಸ್ಟುಪಿಡ್’ ಸವಾಲ್ ವಿಚಾರುನ್ ತ್ಯಾ ಸವಲಾಕ್ ‘ಕಿತ್ಯಾಕ್’ ಮ್ಹಳ್ಳಿ ಶೆಮ್ಟಿ ಕುಡ್ಸುಂಚಿ ನಾಕಾ. ನಯ್ಸರ್ಗಿಕ್ ರಿತಿರ್ ಅಸಲೊ ಬೊಮಾಡೊ ಆಸಾ, ಆಸುಂ. NASA, ಆಪ್ಲೆಂ ಕಾಮ್ ಕರುಂ. ತವಳ್ ಪರ್ಯಾಂತ್ ಆಮಿ ಕಿತೆಂ ಕರ್ಚೆಂ? ಪ್ರಗತಿಚಿ ಮಯ್‌ಮಾ ದೊಳೆ ಸೊಡ್ನ್ ಪಳೆಂವ್ಚಿಂ ಆನಿ ಆಮ್ಚೆ ಹ್ಯೆ ಪ್ರಿತುಮೆಕ್ ವೇಂಗ್ ದೀವ್ನ್ ಸಾಂಬಾಳ್ಚಿ ಕಿತ್ಯಾಕ್ ಮ್ಹಳ್ಯಾರ್ ತಿಚೆಂ ಸಂಸಕ್ಷಣ್ ಕರ್ಚ್ಯಾ ನಿಬಾನ್/ಅಬಿಯಾನಾಂತ್ ಆಮಿ ಕಿತ್ಲೆ ಅತ್ಯಾಚಾರ್ ತಿಚೆರ್ ಚಲಯ್ಲ್ಯಾತ್ ಮ್ಹಳ್ಳ್ಯಾಚೆಂ ಲೇಕ್ ಆಮ್ಕಾಂ ನಾ.
ಪ್ರಿತುಮೆ ಭಂವ್ತಿ ಸಂರಕ್ಷಣಾಚೊ ಬೊಮಾಡೊ ಆಸುಂ ಯಾ ನಾ‌ಆಸುಂ, ಹೊ ಬೊಮಾಡೊ ಕಾಂಯ್ ಆಮ್ಚ್ಯಾ ಸಂಸೊದಾಂನಿ ಕೆಲ್ಲೊ ನ್ಹಯ್. ಎಕ್ ಕಾಳಾರ್ ಬಾಹ್ಯಾಂತರಿಕ್ಷ್ ಆನಿ ತಿಚಿ ನಿಗೂಡಾತಾ ಆಮಿ ಪಯ್ಸ್ ದವರಿಜೆ ಮ್ಹಣ್ ವಿಗ್ಯಾನಿಂಕ್ಂಚ್ (ಗೆಲಿಲಿಯೊ ಆನಿ ಹೆರ್) ಬಹಿಷ್ಕಾರ್ ಘಾಲ್ಲ್ಯಾ ಹ್ಯಾ ಸಂಸಾರಾನ್, 1957 ಇಸ್ವೆಚ್ಯಾ ಒಕ್ಟೋಬರ್ ಚಾರ್ ತಾರಿಕೆರ್ ರಶಿಯಾನ್ “ಸ್ಪುಟ್ನಿಕ್-1” ಕೃತಕ್ ಉಪಗೃಹ್ ಅಂತರಿಕ್ಶಾಕ್ ಉಬಯ್ತಾನಾ ಸಂಸಾರಾರ್, ಚಡ್ ಕರುನ್ ಬಾಹ್ಯಂತರಿಕ್ಷ್ ಸಂಸೊದಾಂಚ್ಯಾ ಪ್ರಯೋಗ್ ಶಾಲಾಂನಿ ಕಸಲೊ ಹಲ್ಲೊಗುಲ್ಲೊ ಉಟ್ಲೊ ಮ್ಹಳ್ಳೆಂ ಜಾಣಾಂ ಜಾಂವ್ಕ್ ಮ್ಹಜೆಂ ತವಳ್ಚೆಂ ನೋವ್ ವರ್ಸಾಂ ಪ್ರಾಯೆಚೆಂ ಗಿನ್ಯಾನಾಕ್ ಸಕತ್ ನಾತ್‌ಲ್ಲಿ ಪುಣ್ ಭಿಂಯಾನ್ ಹಾಂವ್ ಥರ‍್ಲರ‍್ಲೊಂ.
ರಶಿಯಾನ್ ಉಬಯಿಲ್ಲೆ “ಕೃತಕ ಚಂದ್ರ ಸ್ಪುಟ್ನಿಕ್ ಕಿತೆಂ ಕರಿತ್‌ಗಾಯ್. ಸುಡಾಳ್ ಆನಿ ಸ್ವಛ್ ಚಾಂದ್ನೆಂ ಆಸ್‌ಲ್ಲ್ಯಾ ರಾತಿಂನಿ ಪರ್ಯಾಂತ್ ಮುಕಮಳ್ ಉಟವ್ನ್ ಚಂದ್ರಾಕ್ ಪಳೆಂವ್ಚೆಂ ಧಯ್ರ್ ಮ್ಹಾಕಾ ನಾತ್‌ಲ್ಲೆಂ. ಹೆ ಸ್ಪುಟ್ನಿಕ್ ಕಾಂಯ್ ಗಾಡಿಯೆಚೊ ಲಾಂಪ್ಯಾಂವ್ ಆಮ್ಚ್ಯಾ ಚಂದ್ರಾಬರಾಬರ್ ಲಟ್ಕಾವ್ನ್ ಸೊಡ್ಲಾಗಿ ಹ್ಯಾ ರಶಿಯನಾಂನಿ? ಸಾಯ್ಬಿಣಿಚೆ ಲದಿಣೆಂತ್ ತೆಸಾಂವಾಂ (ಯಾ ತೆಂತೆಸಾಂವಾಂ) ಬರಾಬರ್ ‘ಮಾಯೆ, ರಶಿಯಾಕ್ ಬಚಾವ್ ಕರ್’ ಮ್ಹಣ್ ಆಮಿ ದೊಂಪ್ರಾಂ ಧಾಡಾಯಿಲ್ಲೆಂ ಕಾಂಯ್ಚ್ ಉಪ್ಕಾರ್ಲೆಂ ನಾ ಆನಿ ಆಜ್ ಹ್ಯಾ ‘ಕಮ್ಯುನಿಸ್ತ್’ ರಶಿಯಾನ್ ಆಮ್ಚ್ಯಾ ಸೊಬಿತ್ ಸುಂದರ್ ಚಂದ್ರಾ ಭಂವ್ತಿ ತಾಂಚೊನ್ ಚಂದ್ರ್ ಖಿಳಾಯ್ಲಾ…ದೆವಾ ದೆವಾ, ಪ್ರಿತುಮೆಚ್ಯಾ ರಚ್ಣಾರಾ ಖಂಯ್ ಪಾವ್ಲಾಯ್ ತುಂ…
ಹೆಂ ರುದಾನ್ ಥಾಂಬೊಕ್ ಥೊಡಿಂ ವರ್ಸಾಂ ಲಾಗ್ಲಿಂ ಆನಿ ತವಳ್ ಅಮೆರಿಕಾ ಆನಿ ರಶಿಯಾಚೊ space race ಸುರು ಜಾವ್ನ್ ಜಾಲ್ಲೊ ಆನಿ ಬಾಹ್ಯಂತರಿಕ್ಷಾಚ್ಯಾ ಸೊದ್ನಾಂಚೆರ್ ಹಾಂವೆ ಕಾಂಯ್ ತರಿ ಆಸಕ್ತ್ ದಾಕಯ್ಲಿ ತರ್ ಆತಾಂಯಿ ತಿ ಆಸಾ ನಾ ತರ್ “ತೆ ಆಯ್ಲ್ಯಾತ್” ಯೆತೆನಾಂತ್.
ಸ್ಪುಟ್ನಿಕಾಚಿಂ ರೇಡಿಯೊ ಸಿಗ್ನಾಲಾಂ ಎಕ್ವೀಸ್ ದೀಸ್ ಪರ್ಯಾಂತ್ ಭುಮಿಕ್ ಪಾವ್ತಾಲಿಂ ಆನಿ ತ್ಯಾ ಉಪ್ರಾಂತ್ ತಿಂ ನಿಂವ್ಲಿಂ ಕಿತ್ಯಾಕ್ ಬ್ಯಾಟರಿ ಸುಕೊನ್ ಗೆಲ್ಯೊ ಆನಿ 1958 ಜನೆರ್ 4 ತಾರಿಕೆರ್ ಸ್ಪುಟ್ನಿಕ್ ಧರ್ತೆಕ್ ಪಾಟಿಂ ಯೆಂವ್ಚೆವೆಳಿಂ (during reentry) ಭಸ್ಮಾಲೆಂ. ಹ್ಯೆ ಆವ್ದೆಂತ್ ಹ್ಯಾ ಕೃತಕ್ ಚಂದ್ರಾನ್ ಭುಮಿ ಭಂವ್ತಿಂ 1440 ಕಕ್ಷ್ಯೊ ಸಂಪಯಿಲ್ಲ್ಯೊ, ಸತ್ತರ್ ಮಿಲಿಯಾ ಕಿಲೊ ಮೀಟರಾಂಚೆ ಪಯ್ಣ್ ಸಂಪಯಿಲ್ಲೆಂ.
“ಕಿತ್ಯಾಕ್” ಮ್ಹಳ್ಳ್ಯಾ ತಕ್ಲೆನಾಂವಾನ್ ಸುರು ಕೆಲ್ಲೆ ಹೆಂ ವಿಬಿನ್ನ್ ಲೇಖ್ ಹಾಂವ್ ಕಿತ್ಯಾಕ್ ಅಶೆಂ ಸಂಪಯ್ತಾಂ ಮ್ಹಳ್ಳೆಂ ಸವಾಲ್ ಹಾಂಗಾಸರ್ ಉಟ್ಟೆಲೆಂಚ್. ಸ್ಪುಟ್ನಿಕಾ ಉಪ್ರಾಂತ್ ಬಾಹ್ಯಂತರಿಕ್ಷಾಚ್ಯಾ ಸಂಸೊದ್/ಪ್ರಗತಿ/ಜಯ್ತಾಂಕ್ ಥಾಂಬ್‌ಚ್ ನಾ. ಆಮ್ಚೊ ದೇಶ್‌ಯಿ ಹ್ಯಾ ಧಾಂವ್ಣೆಂತ್ ಸೆರ್ವಾಲಾ. ಅಮೆರಿಕಾಚ್ಯಾ ಬಾಹ್ಯಂತರಿಕ್ಷಾಚ್ಯಾ ಸಾಹಸಾಂಚೊ ಫುಡ್ಲೆ ತೀಬ್ ಆಸಾ – ಸುರ‍್ಯಾಕ್‌ಚ್ ಪಯ್ಣ್.
ತೆಂ ಭಸ್ಮಾನಾ ಜಾಂವ್.
ಸಾಮಾನ್ಯಾಂಚೆ ಮತಿಂತ್ ಎಕ್ ಸವಾಲ್ ಉಟ್ಟೆಲೆಂ, ಕಿತ್ಯಾಕ್ ಹೊ ಸಂಸೊದ್, ಕಿತ್ಯಾಕ್ ಹೊ ಇಬಾಡ್, ಕಿತೆಂ ಮೆಳ್ಟಾ ಖಂಯ್ ಆಮಾ ಸಾಮಾನ್ಯಾಂಕ್?
ಪ್ರಿತುಮೆ ಭಂವ್ತಿಂ ಬೊಮಾಡೊ?
ಜೆದ್ನಾಂ, ಮಾನವಾಚೊ ಪಾಟಿಚೊ ಖಣೊ ನೀಟ್ ಜಾಲೊ ಆನಿ ತಾಣೆ ಮಾತೆಂ ಉಕ್ಲೊನ್ ಆಗಸಾಕ್ ಪಳೆಲೆಂ, ಆಗಸಾಚೆ ಅಗಾಧಾಯೆಕ್ ಪಳೆವ್ನ್ ಸವಾಲ್ ಕೆಲೆಂ –
ಕಿತ್ಯಾಕ್, ತವಳ್‌ಥಾವ್ನ್ ಹೊ ಸೋದ್ ಚಾಲು ಆಸಾ ಆನಿ ಆಸ್ತಲೊಚ್.
