ಕಪಾಲಾಚೊ ಘಾಮ್

ರಚ್ಣಾರಾಚಿಂ ಅಪ್ರತಿಮ್ ರಚ್ಣಾಂ, ಚಿಂತುಂಕ್, ವಿಂಚುಂಕ್ ಆನಿ ಕಾರ‍್ಯಾನ್ ಕರುಂಕ್ ಸಕ್ಚಿಂ ರಚ್ಣಾಂ ತರಿ ಆಮ್ಚೆ ಭಂವ್ತಿಂ ಸಭಾವಿಕ್ ಥರಾನ್ ಬಂದಡ್ ಘಾಲ್ಚ್ಯೊ ಸಂಗ್ತಿ ಆಮ್ಕಾಂ ಖಂಚೆ ರಿತಿರ್ ಅಪ್ರತಿಮ್ ರಚ್ಣಾಂ ಮ್ಹಣ್ ಥಿರಾಯ್ತಾತ್ ಮ್ಹಳ್ಳೆಂ ಸವಾಲ್ ಮ್ಹಾಕಾ ಬುದಿಪ್ರಕಾಸಾಕ್ ಪಾವ್‌ಲ್ಲ್ಯಾ ತವಳ್ ಥಾವ್ನ್ ಮ್ಹಾಕಾ ಪಿನ್ನಿ ಮಾರಿತ್ತ್ ಆಸಾ, ತ್ಯೊ ಪಿನ್ನಿ ಮ್ಹಾಕಾ ದಿಸ್ತಾತ್, ತೊಪ್ತಾತ್ ಪುಣ್ ಜಾಪ್ ಮೆಳಾನಾ. ಹೆಂ ಲೇಖ್ ಬರಂವ್ಚಿ ಶಾಥಿ ಆನಿ ಗಿನ್ಯಾನ್ ಮ್ಹಾಕಾ ರಚ್ಣಾರಾನ್ ದಿಲಾಂ ಪುಣ್ ಜಾಪಿ ಮ್ಹಾಕಾ ಮೆಳಾನಾಂತ್. ಭೋವ್‌ಶಾ ದೆಕುನ್ಂಚ್ ಆಮಿ “ತಾಕಾ” ದೇವ್ ಮ್ಹಣ್ತಾಂವ್ ಆನಿ ಆಮ್ಕಾಂಚ್ ‘ಕಿರ‍್ಕೊಳ್’ ರಚ್ಣಾಂ?

ಪುಣ್ ಹೆಂ ವರ‍್ಗೀಕರಣ್ ಮಾನುನ್ ಘೆಂವ್ಕ್ ಹಾಂವ್ ತಯಾರ್ ನಾ ಆನಿ ಸಬಾರ್ ಚಿಂತ್ಪಿಯಿ ತಯಾರ್ ಆಸ್ಚೆನಾಂತ್.

ಎಕಾ ಫಿರ‍್ಕೆಕ್ ದಾಂಬ್ತಾನಾ ಸಗ್ಳಿ ಪ್ರಿತುಮಿ ನಾಸ್ ಕರುನ್ ಉಡಂವ್ಚೆ ತಸಲಿ ವಿಗ್ಯಾನಿಕ್ ಸಕತ್/ಸೊದ್ನಾಂ ಆಮಿ ಕೆಲ್ಯಾಂತ್; ಚಂದ್ರ್ ಜಾಲೊ, ಗೃಹಾಂ ಜಾಲಿಂ ಆನಿ ಆತಾಂ ಸುರ‍್ಯಾಕ್‌ಚ್ ತೀಬ್ ಜಾವ್ನ್ ಆಮಿಂ ಘೆತ್ಲಾ ಮ್ಹಣ್ತಾನಾ ಆಮಿ ಖಂಚಾ ಮಾಪಾನ್ ‘ಕಿರ‍್ಕೊಳ್’ ಜಾಲ್ಯಾಂವ್? ಹಾಸೊ ಯೆತಾ ಮ್ಹಾಕಾ ಹೆಂ ಸವಾಲ್ ವಿಚಾರ‍್ತಾನಾ-ಆದ್ಲ್ಯಾ ಮ್ಹಯ್‌ನ್ಯಾಂತ್ ಮ್ಹಜಿ ನಾತ್ ಆಪ್ಲೆ ಧಾ ವರ‍್ಸಾಂಚೆ ಪ್ರಾಯೆರ್ ಎಕ್ಲೆಂಚ್ ವಿಮಾನಾಚೆಂ ಪಯ್ಣ್ ಕರುನ್ ಮಂಗ್ಳುರಾಕ್ ಉಬ್ಲೆಂ. ಹೆಂ ಕಾಂಯ್ ವ್ಹಡ್ಲೆಂ ನವೆಸಾಂವ್ ನ್ಹಯ್, ಸಾಹಸ್ ನ್ಹಯ್. ಪುಣ್ ಆಮ್ಕಾಂ ಹೆಂ ಕರ‍್ತುಬ್ ಹೆಮ್ಮ್ಯಾಚೆಂ ಜಾಲೆಂ. ಗಾಂವಾಕ್ ಪಾವ್ಲ್ಯಾ ಉಪ್ರಾಂತ್, ಆಪ್ಣಾಕ್ ಉದ್ಕಾಂತ್ ಉಪ್ಯೆಂವ್ಕ್ ಶಿಕಾಜೆ ಮ್ಹಣಾಲೆಂ. ಬರೆಂ, ತಾಕಾ ಅತ್ಯಾದುನಿಕ್ ಸ್ವಿಮ್ಮಿಂಗ್ ಪೂಲಾಕ್ ದಾಕಲ್ ಕೆಲೆಂ. ತಾಚ್ಯಾ ತರ‍್ಬೆತಿಚ್ಯಾ ಪಯ್ಲೆ ಸಾಂಜೆರ್ ಹಾಂವ್‌ಯಿ ಗೆಲೊಂ. ತರ‍್ಬೆತಿಕ್ ಲಾಗುನ್ ಶಿಕವ್ಪ್ಯಾನ್ ಉದ್ಕಾಂತ್ ದೆಂವ್ಚಿ ಸುಚನಾಂ ದಿತಾನಾ, ಚಲಿ ಭಿಂಯಾನ್ ಸಗ್ಳಿಚ್ ಪಾಂಟ್ರೆಲಿ, ಪಾಟಿಂ ಸರ‍್ಲಿ ಆನಿ ನಿಳೆಲಿ. ವಿಪರ‍್ಯಾಸ್ ಪಳೊವ್ಯಾಂ, ವಿಮಾನಾಚೆರ್ ಯೆಕ್ಲಿ ಆಯಿಲ್ಲೆ ತಿಕಾ ಉದ್ಕಾಚೆಂ ಭೆಂ ದಿಸ್ಲೆಂ.

ಕಿತೆಂ ಸಾಂಗೊಕ್ ಸೊದ್ತಾಂ ಹಾಂವ್? ಕಿತ್ಲೆಶ್ಯೊ ಹಜಾರ್ ಜೀವಿ ಉದ್ಕಾಂತ್ ಜಿಯೆತಾತ್, ಪೆಟೆ-ಮಾಜ್ರಾಂ ಕಸಲಿಚ್ ಭಿರಾಂತ್‌ನಾಸ್ತಾಂ ಉಪ್ಯೆತಾತ್ ಪುಣ್ ಆಮ್ಕಾಂ ಊಂಚ್ ರಚ್ಣಾಂಕ್ ಸಭಾವಿಕ್ ರಿತಿರ್ ಉಪ್ಯೆಂವ್ಕ್ ಕಳಿತ್ ನಾ. ಆಮ್ಕಾಂ ತರ‍್ಬೆತಿ ಜಾಯ್. ಚಡ್ ಕಿತ್ಯಾಕ್ ಬೆಲೆನ್ಸ್ ಶಿಕಾನಾಸ್ತಾಂ ಸೈಕಲ್ ಚಲಂವ್ಕ್ ಕಳಾನಾ. ಆಮ್ಚ್ಯಾ ಚಲಾಕೆಚಿ ಪರಿದಿ ಇತ್ಲಿಚ್? ಲ್ಹಾನ್ ಆಸ್ತಾನಾ, ಸೈಕಲ್ ಪುಣಿ ಚಲಯ್ನಾಕಾ-ರೆ, ಪಿಕ್ನಿಕಾಕ್ ಗೆಲ್ಯಾರ್ ಉದ್ಕಾಂತ್ ದೆಂವನಾಕಾ-ರೆ. ಆತಾಂ ಚಿಂತಾಪ್ ಬದ್ಲಲಾಂ ಪುಣ್ ಸಬಾವಿಕ್ ರಿತಿರ್ ರಚ್ಣಾರಾನ್ ‘ಗೊಡ್ ಬ್ಲೆಸ್’ ಮ್ಹಣ್ ದಿಲ್ಲ್ಯೊ ಪರಿದ್ಯೊ ಉರ‍್ಡೊನ್ ಪಿಂಜ್‌ಲ್ಲೆ ಶಿವಾಯ್ ಆಮಿ ಪರಿಣತ್ ಜಾಂವ್ಕ್ ಸಕಾನಾಂವ್.

ವಿಮಾನಾರ್ ಪಯ್ಣ್ ಕರ‍್ಚೆಂ ಶಾಬಿತ್ ಮ್ಹಣ್ ಸರ‍್ವಾಂಕ್ ಕಳಿತ್ ಆಸ್ಚಿ ಗಜಾಲ್. ಪುಣ್ ಆಮ್ಚ್ಯಾಚ್ ‘ಪಾಕಾಟ್ಯಾಂನಿ’ ಆಮಿಂ ಉಬೊಂಕ್ ಸಕ್ತಾಂವ್? ಕಿತ್ಲೆಂಯಿ ಶಾಬಿತ್-ಸುರಕ್ಷಿತ್-ಆದುನಿಕ್ ವಿಮಾನ್ ವ್ಹಯ್ ತರಿ ತುರ‍್ತ್ ಪರಿಸ್ಥಿಯೆಂತ್ ಕಿತೆಂ ಕರುಂಕ್ ಜಾಯ್ ಮ್ಹಳ್ಳಿಂ ಸುಚನಾಂ ಕಿತ್ಲಿಯಿ ‘ಸೆಕ್ಸಿ’ ಗಗನ್‌ಸಖಿ ದಿತಾ ತರಿ ಆಮ್ಚೆಂ ಕಾಳಿಜ್ ಬಿತರ‍್ಲೆ ಭಿತರ್ ‘ಪುಕುಪುಕು’ ಜಾತಾ ಆನಿ ತ್ಯಾ ಗಗನ್‌ಸಖಿಯೆಚೆಂ ಮುಕಮಳ್ ಪರ‍್ಯಾಂತ್ ಆಮ್ಚ್ಯಾ ಉಡಾಸಾಂತ್ ಉರನಾಂ.

ಹಿ ಪರಿಗತ್ ಆಮ್ಚ್ಯಾ ಅಸ್ಕತ್‌ಕಾಯೆಚಿ ಪರಿದಿ ಕಿತ್ಯಾಕ್ ಆಮ್ಕಾಂ ರಚ್ತಾನಾ ರಚ್ಣಾರಾನ್ ಆಮ್ಕಾಂ ಪಾಕಾಟೆ ದಿಂವ್ಕ್ ನಾಂತ್, ಉಪ್ಯೆಂವ್ಕ್ ಶೆಂಪ್ಟಿಂ ದೀಂವ್ಕ್ ನಾಂತ್ ಯಾ ಉದ್ಕಾ ಪಂದಾಕ್‌ಯಿ ಉಸ್ವಾಸ್ ಸೆಂವ್ಕ್ ಪೊಪಿಸಾಂ ದೀಂವ್ಕ್‌ನಾಂತ್. ಆಮ್ಕಾಂ ಆನಿ ವಾನರಾಂಕ್ ಲಾಗ್ಶಿಲೊ ಸಾಮ್ ಆಸಾ ಆನಿ ಆಮಿ ಕಾಂಯ್ ಮಾಂಕ್ಡಾಂಥಾವ್ನ್ಂಚ್ ಆಯ್ಲ್ಯಾಂವ್ ಕೊಣ್ಣಾ ಮ್ಹಳ್ಳೊ ಜಬ್ಬೊರ್ ದುಬಾವ್ ಆಮ್ಕಾಂ ಜಾತಾ. ತೊ ಡಾರ‍್ವಿನ್ ಗೆಲೊ ಡಬ್ಬ್ಯಾಂತ್ ಪುಣ್ ಆಮ್ಚ್ಯಾಚ್ ರಚ್ಣಾರಾನ್ ಹೊ ಥರ್‌ಭೇದ್ ಕಿತ್ಯಾಕ್ ದಾಕಯ್ಲೊ?

ಆಮ್ಚೆಲಾಗಿಂ ಜಾಪ್ ಆಸಾ?

ತೊ ಎಕಾ ಮಾಂಕ್ಡಾಪರಿಂ ದಿಸ್ತಾ ಮ್ಹಣ್ ಆಮಿ ಹೆರಾಂಚ್ಯೊ ಚೆಷ್ಟಾಯೊ ಕರ‍್ತಾಂವ್ ಪುಣ್ ಎಕಾ ಮಾಂಕ್ಡಾನ್ ರುಕಾಥಾವ್ನ್ ರುಕಾಕ್ ಪಳ್ಟಿ ಲಾಗ್ಮುಡಿ ಘಾಲ್ಚೆಪರಿಂ ಆಮ್ಕಾಂ ಘಾಲುಂಕ್ ಜಾತಾ? ದೆಕುನ್ಂಚ್ ಕೊಣ್ಣಾ ಮಾಂಕ್ಡಾಂನಿ ಕರ‍್ಚೆ ‘ಸ್ಟಂಟ್’ ಮನಿಸ್ ಕರುನ್ ದಾಕಯ್ತಾ ಮ್ಹಣ್ ಪಳೆಂವ್ಕ್ ಆಮಿಂ ಸರ‍್ಕಸಾಕ್ ವೆತಾಂವ್. ಬರಾಬರ್.

ಹ್ಯಾ ಲೇಖನಾಚ್ಯಾ ಮಾತಾಳ್ಯಾಕ್ ರಾಜಾಂವಾಚೊ ಲೇಪ್ ಕಾಡ್ಲ್ಯಾರ್ ಆಮ್ಕಾಂ ಕಾಂಯ್ ಸಮದಾನ್ ಮೆಳತ್ ಪುಣ್ ಹಲ್ಲ್ ನ್ಹಯ್. ವಿಮಾನಾಂಚೊ ಉಲ್ಲೇಕ್ ಹಾಂವೆಂ ಕೆಲೊ. ಅತ್ಯಾದುನಿಕ್ ವಿಮಾನ್ ಜಾವ್ನಾಸಾ ಫಳ್ ಎಕ್ ಅವಿರತ್ ಸಂಸೊದಾಚೊ ಜೊ ಒರ್ವಿಲ್ ಆನಿ ವಿಲ್ಬರ್ ವ್ರಾಯ್ಟ್ ಮ್ಹಳ್ಳ್ಯಾ ದೊಗಾಂ ಭಾಭಾವಾಂನಿ 1905 ಇಸ್ವೆಂತ್ ಯಶ್ವೆನ್ ಆನಿ ಜಯ್ತಾನ್ ಸಂಪಯ್ಲೊ.

Orville and Wilbur Wright Brothers

ಆಮ್ಚಿ ಪ್ರಿತುಮಿ ರಚುನ್ ಯಾ ಮನ್ಶಾಕ್ ರಚುನ್ ಕಿತ್ಲಿಂ ವರ‍್ಸಾಂ ಜಾಲಿಂಗಾಯ್? ಸಬಾರ್ ಅಂದಾಜ್ ಜಾಪಿ ಆಸಾತ್, ಸೊದ್ನಾಂ ಚಲೊನ್ಂಚ್ ಆಸಾತ್ ಪುಣ್ ಮ್ಹಜೆಂ ಸವಾಲ್ ಹೆಂ ಕಿ ಕಿತ್ಲೆಶಾ ಬಿಯಾ ಟ್ರಿಲ್ಲಿಯಾ ವರ‍್ಸಾಂ ಆದಿಂ ಜರ‍್ತರ್ ಪ್ರಿತುಮಿ ರಚ್‌ಲ್ಲಿ, ತಿತ್ಲ್ಯಾಚ್ ಆದಿಂ ಮನಿಸ್‌ಯಿ ರಚ್ಣಾರಾನ್ ರಚ್‌ಲ್ಲೊ ತರ್ ಎಕ್ ಉಬ್ಚೆಂ ಯಂತ್ರ್ ಸೊದುನ್ ಕಾಡುಂಕ್ ಹ್ಯಾ ಉಪ್ರತಿಮ್ ರಚ್ಣಾಕ್ 1905 ಪರ‍್ಯಾಂತ್ ರಾಕೊಂಕ್ ಪಡ್ಲೆಂ? ಮಾನೆಸ್ತ್ ಒರ್ವಿಲ್ ವ್ರಾಯ್ಟಾಚೆಂ ಶಿಕಪ್ ಫಕತ್ ಹೈಸ್ಕೂಲಾಚಿಂ ತೀನ್ ವರ‍್ಸಾಂ, ವಿಲ್ಬರಾಚಿಂ ಫಕತ್ ಚಾರ್ ವರ‍್ಸಾಂ ಮ್ಹಣ್ತಾನಾ ರಚ್ಣಾರಾಚಿಂ ಹೆರ್ ಅಪ್ರತಿಮ್ ರಚ್ಣಾಂ ನಿದುನ್ ಪಡ್‌ಲ್ಲಿಂ?

ಮನ್ಶಾನ್ ಉಬಾಜೆ ತರ್ lighter than air machine ಚಲಾನಾ heavier than air machine-ಂಚ್ ಜಾಯ್ಜೆ ಮ್ಹಣ್ ಮತಿಚೆಂ ‘ಎಪ್ಪಾತಾ’ ಜಾಂವ್ಕ್ ಇತ್ಲಿಂ ಬಿಲಿಯಾ-ಟ್ರಿಲಿಯಾ-ಟ್ರಿಲಿಯಾ ವರ‍್ಸಾಂ ಲಾಗ್ಲಿಂ? ಬುಡ್ಲ್ಯಾ ಖೆರಿತ್ ಉಪ್ಯೆಂವ್ಕ್ ಮನಿಸ್ ಶಿಕನಾ, ಬೆಲೆನ್ಸ್ ಶಿಕ್ಲ್ಯಾ ಶಿವಾಯ್ ಸೈಕಲ್ ಚಲಂವ್ಕ್ ಶಿಕನಾಂ ಮ್ಹಳ್ಳೆಂ ಕಟ್ಟ್ಯಾಂತ್ ರಿಗೊಂಕ್ ಇತ್ಲಿಂ ಬಿಲಿಯಾ-ಟ್ರಿಲಿಯಾ ವರ‍್ಸಾ ಲಾಗ್ಲಿಂ ಮ್ಹಣ್ತಾನಾ-

ಮ್ಹಜ್ಯಾ ಅಲ್ಬ್ಯಾ ಮತಿಕ್ ಎಕ್ ರಾಜಾಂವ್ ಝಳ್ಕತಾ. ಹಾಂಗಾಸರ್ ಹಾಂವ್ ಚುಕೊನ್ ಪಡ್ಲಾಂಯಿ ಜಾವ್ಯೆತ್. ಆಮ್ಚಿ ಪ್ರಗತಿ ಇತ್ಲಿ ಆಸಾ ತಿ ಆಮಿಂಚ್ ಮೆಜುಂಕ್ ಸಕಾನಾಂವ್. ಹರ್‌ಯೆಕೆ ಘಡಿಯೆ ಕಸಲೊ ನ್ಹಯ್ ತರ್ ಕಸಲೊ ಸಂಸೊದ್ ಚಲೊನ್ಂಚ್ ಆಸಾ ಆನಿ ಆಮ್ಚಿ ಇತ್ಲಿ ಪ್ರಗತಿ ಜಾಲ್ಯಾ ಕಿ God Particle-ಲಾ ಪರ‍್ಯಾಂತ್ ಆಮಿಂ ಪಾವ್ಲ್ಯಾಂವ್. ಪುಣ್ ಆಮಿ ರಚ್‌ಲ್ಲೆಂ ಕಾಂಯ್ ನಾ, ಕಿತೆಂಚ್ ನಾತ್‌ಲ್ಲ್ಯಾ ಥಾವ್ನ್ ಕಿತೆಂಯಿ ರಚ್‌ಲ್ಲೆಂ ನಾ. We have not created anything from nothing, we have only discovered what Lord God Created.

ರಚ್ಣಾರಾನ್ಂಚ್ ಮ್ಹಳ್ಳೆಂ ಆಸಾ ನ್ಹಯ್ – by the sweat of thy brow ….Genesis 3:19 ಕಪಾಲಾಚೊ ಘಾಮ್ ವಾರವ್ನ್ ತುಜೆಂ ಪೋಟ್ ತುಂ ಭರ‍್ತೊಲೊಯ್ (ಉತ್ಪತ್ತಿ ಗೃಂಥ್ 3:19).

ಮ್ಹಜ್ಯಾ ರಾಜಾಂವಾ ಪರ‍್ಮಾಣೆಂ ರಚ್ಣಾರಾನ್ ಭುಮಿವಂಯ್ಕುಟಾಂತ್ ಸರ‍್ವ್ ಸಲೀಸ್ ಆನಿ ಸುಗಮ್ ಕರುನ್ ದಿಲ್ಲೆಂ ತೆಂ ಆಮಿ ಹೊಗ್ಡಾಯ್ಲ್ಯಾ ಉಪ್ರಾಂತ್ ಎಕ್ ಸಲೀಸ್ ಜಿಣಿ ರಚ್ಣಾರಾನ್ ಆಮ್ಕಾಂ ದಿಲಿನಾ. ದೆಕುನ್ ಹರ್ ಎಕೆ ವಾಟೆನ್, ಜಾಂವ್ ಉಪ್ಯೆಂವ್ಕ್, ದಿಂಬಿಯಾಂನಿ ವೆಚ್ಯಾ ಬಾಳ್ಶಾನ್ ಚಲೊಂಕ್ ಲಾಗ್ಚೆ ಪರ‍್ಯಾಂತ್ ಆನಿ ಆತಾಂ ಪರ‍್ಯಾಂತ್ ಸುಲಬಾಯೆಚೆಂ ಕಸಲೆಂಚ್ ಆಮ್ಕಾಂ ದಿಲೆಂ ನಾ. ಕಪಾಲಾಚೊ ಘಾಮ್ ಮ್ಹಳ್ಳೊ ಎಕ್ ಶಿರಾಪ್ ನ್ಹಯ್ ಪುಣ್ ಎಕ್ ಪಂಥಾಹ್ವಾನ್ ಮ್ಹಣ್ ಆಮಿಂ ಲೆಕಿಜೆ. ಚಡ್ಡ್ ಪಯ್ಸ್ ವೆಚೆಂ ನಾಕಾ – ಹಾಲಿಂಚ್ ಚಲ್‌ಲ್ಲ್ಯೊ ಶೈಶಣೀಕ್ ಪರೀಕ್ಷಾ ದಾಕ್ಲೆ ಜಾವ್ನ್ ಘೆವ್ಯಾಂ. ಆಮ್ಚ್ಯಾ ವಿದ್ಯಾರ‍್ಥಿಂನಿ ‘ಕಪಾಲಾಚೊ ಘಾಮ್’ ವ್ಹಾರಂವ್ಕ್ ನಾ?

ಎಕ್ ಇಲೆಕ್ಟ್ರಿಕ್ ಬಲ್ಬ್ ಸೊದುನ್ ಕಾಡಿಜೆ ತರ್ ಎಡಿಸನಾನ್ ಕಿತ್ಲೆಶೊ ರಾತಿ ನೀದ್‌ನಾಸ್ತಾಂ ಪಾಶಾರ್ ಕೆಲ್ಯಾತ್?

ಆಜ್ ಆಮಿಂ ಖಂಯ್ಸರ್ ಆಸಾಂವ್? ಭಂವ್ತಿಂ ಪಳೊವ್ಯಾಂ…ಹ್ಯಾ ಪರ‍್ಯಾಂತ್ ಪಾವೊಂಕ್ ಆಮಿ ಕಿತ್ಲೆ ‘ಘಾಮ್’ ವ್ಹರಯ್ಲಾ ಆನಿ ವ್ಹಾರಯ್ತ್ ಆಸಾಂವ್?

ಸರ‍್ವ್ ಸಾಮಾನ್ಯ್ ಉತ್ರಾಂನಿ ಹಾಕಾ ಮ್ಹಣ್ತಾತ್ – ಸಂಸಾರ್, ಅರೆಬಿಕಾಂತ್ “ಹಾದಾ ದುನಿಯಾ” ಆನಿ ಆಮಿಂ ಹ್ಯಾ ಸಂಸಾರಾಚೊ ಮೋಗ್ ಕರ‍್ತಾಂವ್ ಆನಿ ರಚ್ಣಾರಾಕ್ ದುರ‍್ಸಾನಾಂವ್!

►  ಎಡ್ವಿನ್ ಜೆ.ಎಫ್., ಮಂಗ್ಳುರು