ಮೂಳ್ ಸೊದ್ನಾಂ ಆನಿ ಟೀಪ್: ಎರಿಕ್ ಫೊನ್ ಡೆನಿಕೆನ್ | ಭಾಷಾಂತ್ರ್ ಆನಿ ರೂಪಾಂತರಾಚೆಂ ಪ್ರೇತನ್: ಎಡ್ವಿನ್ ಜೆ.ಎಫ್., ಮಂಗ್ಳುರು
ಕೋಣ್ ಹೆ ದೇವ್ ಪುತ್?
ಪುರಾತನ್ ಕಾಳಾಚೆ ಬಳ್ವಂತ್ ವೀರ್ ಆನಿ ನಾಂವಾಡ್ದಿಕ್ ಮನಿಸ್ ಕೋಣ್ ಹೆ?
ಕೋಣ್ ಹೆ ದೇವ್ ಪುತ್? ಕೋಣ್ ಹ್ಯೊ ಮನ್ಶಾಂಚ್ಯೊ ಧುವೊ?
ಹಿಂ ಸವಾಲಾಂ ಘೆವ್ನ್ ಆಮಿಂ ಡೆನಿಕೆನಾಚ್ಯಾ ಸಬಾರ್ ಪ್ರಣಾಲಿಂಕ್ ಶರಣಯ್ಲ್ಯಾರ್ ಆಮ್ಕಾಂ ವಾಚುಂಕ್ ಮೆಳ್ಟಾ ಅಶೆಂ: ಖಂಚಾಗಿ ಎಕಾ ಅನಾದಿ ಕಾಳಾರ್ (ಮಿಲಿಯಾ, ಟ್ರಿಲಿಯಾ ಆನಿ ಭೋವ್‌ಶಾ ತಾಚ್ಯಾಕಿ ಫುಡೆಂ) ನಿರ‍್ಯಾತಿಂನಿ ಭೆಟ್ ದಿಲ್ಲಿ. ಜಶೆಂ ಆತಾಂಚೆ ethnologist (Ethnology:The study of the characteristics of different peoples and the differences and relationships between them.) ವೆವೆಗ್ಳ್ಯಾ ಜನಾಂಗಾಚಿಂ ಲಕ್ಷಣಾಂ-ರಿತಿ ರಿವಾಜಿ, ಭಾವಾರ‍್ಥ್ ಆನಿ ಭಾವಾರ‍್ಥಾಚಿ ಥಿರಾಸಣ್ ಶಿಕ್ತಾತ್ ತಶೆಂಚೆ ‘ಸಯ್ರೆ’ಜಾವ್ನ್ ಆಯಿಲ್ಲ್ಯಾ ಹ್ಯಾ ನಿರ‍್ಯಾತಿಂನಿ ಸಂಸಾರಾರ್ ಫಯ್ಲೊನ್ ಆಸ್‌ಲ್ಲ್ಯಾ ನಿವಾಸಿಂಚೆರ್ ಸೂಕ್ಷ್ಮ್ ಅಧ್ಯಯನ್ ಕೆಲೆಂ, ನವ್ಯೊ ನವ್ಯೊ ಆಲೋಚನ್ಯೊ, ಚಿಂತಪ್ ಆನಿ ವಿಗ್ಯಾನಾಚೆ ಸುಲುಸ್ ವೊಂಪ್ಲೆ ಆನಿ ಎಕಾ ಆಯಿನ್ನ್ ದಿಸಾ ‘ಆಮಿ ಪರತ್ ಯೆತೆಲ್ಯಾಂವ್’ ಮ್ಹಣೊನ್ ನಪಂಯ್ಚ್ ಜಾಲೆ. ಹಾಂಚ್ಯಾ ಯೆಣ್ಯಾಂ ಆನಿ ಜ್ಞಾನಿಕ್ ವಿತರಣಾಂವರ‍್ವಿ ಪ್ರಿತುಮೆರ್ ಕಸಲ್ಯಾಗಿ ಎಕಾಥರಾಚಿ ಜಿಣಿ ಜಿಯೆವ್ನ್ ಆಸ್‌ಲ್ಲ್ಯಾಂ ಮಧೆಂ ವಿಕಾಸ್ ಜಾಲೊ ಆನಿ ಹಾಚೊ ಪರಿಣಾಮ್ ಜಾವ್ನ್ ಹೊ ಸಂಸಾರ್, ತಾಂತ್ಲ್ಯೊ ಜೀವಿ, ತಾಂಚೆ ಚಿಂತಪ್, ತಾಂಚಿ ಸೊದ್ನಾಂ ಆನಿ ವೆಗ್ಯಾನಿಕ್ ಮೋಡ್ ಹ್ಯಾ ಹಂತಾಕ್ ಯೆವುನ್ ಪಾವ್ಲ್ಯಾ ಆನಿ ಪ್ರಗತಿ ಕರಿತ್ತ್ ಆಸಾ. ನ್ಹಯ್ ತರ್ ಮಾಯನ್ ಜನಾಂಗಾನ್ ಹೆಂ ಪಂಚಾಂಗ್ (ಕೆಲೆಂಡರ್) ಕಶೆಂ ತಯಾರ್ ಕೆಲೆಂ? ಹ್ಯಾ ಕೆಲೆಂಡರಾಚೆ ಪಳೆಯುಳಿಕ್ ಲಾಬ್ಲ್ಯಾತ್ ಆನಿ ಹ್ಯಾ ಪಂಚಾಗಾಚೊ ಉಪೇಗ್ ಆಧುನಿಕ್ ಚಿಂತ್ಪಾಚ್ಯಾ ಸಂಸೊಧಕಾಂನಿ ಕೆಲಾ ಆನಿ ಹೆಂ ಪಂಚಾಂಗ್ ‘ವಾಚ್ಲಾಂ’ ಮ್ಹಣ್ತಾನಾ ಡೆನಿಕೆನಾಚಿ ಪ್ರಣಾಲಿ ಖರಿ ಮ್ಹಣ್ ದಿಸ್ತಾ. ಚಡ್ ಕರುನ್ ನಿರ‍್ಯಾತಿಂನಿ ‘ಆಮಿ ಪರತ್ ಯೆತೆಲ್ಯಾಂವ್’ ಮ್ಹಳ್ಳೆ ಭಾಸಾವ್ಣೆಕ್ ಆಮ್ಚ್ಯಾ ಭಾವಾರ‍್ಥಾಕ್ ಗಾಂಚ್ ಘಾಲ್ಚೆಂ ಪ್ರೇತನ್ ಕೆಲ್ಯಾರ್ ಕಸಲೊ ಅರ‍್ಥ್ ಕರ‍್ಯೆತ್ ಮ್ಹಳ್ಳೊ ಅಂದಾಜ್ ಕಾಂಯ್ ಅಪರಿಚಿತ್ ನ್ಹಯ್. ತರಿ ಪುಣ್ ಡೆನಿಕೆನ್ ಆಪುಣ್ ಎಕ್ ಖರೊ ಕಾಥೊಲಿಕ್, ನಿದುಂಕ್ ವೆಚ್ಯಾ ಫುಡೆಂ ಹಾಂವ್ ರಾತಿಚೆಂ ಮಾಗ್ಣೆಂ-ರಜಾರ್ ಚುಕಾನಾಸ್ತಾಂ ಕರ‍್ತಾಂ, ಅಶೆಂ ಮ್ಹಣ್ತಾ!
ಮಾಯನ್ ಕೆಲೆಂಡರ್ ಯಾ ಪಂಚಾಂಗ್ (1510 ಯಾ ಲಾಗ್ಸಾರ್‌ಚ್ಯಾ ಇಸ್ವೆಂನಿ)
ತರಿ ಪುಣ್ ಆಮ್ಚೊ ರಚ್ಣಾರ್ ಎಕ್ ನಿರ‍್ಯಾತಿ ಜಾಂವ್ಕ್ ಪುರೊ ಮ್ಹಳ್ಳೊ ತಾಚೊ ವಾದ್ ಕಸಲ್ಯಾಂ ಬುನ್ಯಾದಿಚೆರ್ ಹೊಂದೊನ್ ಆಸಾ? ಪುರಾತನ್ ತೈಲ್‌ಚಿತ್ರಾಂ, ಮಾಟ್ಯಾಂ-ವಣದಿಂ ವಯ್ಲಿಂ ಪಿಂತುರಾಚೆ ದಾಕ್ಲೆ ದೀವ್ನ್ ಮ್ಹಣ್ತಾ -ಭಾವಾರ‍್ಥಾಕ್ ಲಗ್ತಿ ಜಾಲ್ಲ್ಯಾ ಹ್ಯಾ ಚಿತ್ರಾಂ-ವಿಚಿತ್ರಾಂಚೆರ್ ನಿರ‍್ಯಾತಿಂಚಿ ಅಂತ್ರಳ್ ತಾರ‍್ವಾಂ (ರಥ್‌ಯಂತ್ರಾಂ, UFO) ಖಂಯ್‌ಥಾವ್ನ್ ಆಯ್ಲಿಂ? ದೆಕಿಕ್ ಹಾಂಗಾಸರ್ ಕ್ರಿಸ್ತಾಚೊ ಬಾಪ್ತಿಜ್ಮಾಚೆಂ ಚಿತ್ರ್ ಹೆಂ. 1710 ಇಸ್ವೆಂತ್ ನಾಮ್ನೆಚೊ ಡಚ್ಚ್ ಚಿತ್ರ್‌ಕಾರ್ ಏ‌ಅರ‍್ಟ್ ಡಿ ಘೆಲ್ಡರ್ ಹಾಣೆ ಪಿಂತ್ರಾಯಿಲ್ಲ್ಯಾ ಹ್ಯಾ ಚಿತ್ರಾಂತ್ ಸಾಮಾನ್ಯ್ ಆನಿ ಆಮ್ ಚಿಂತ್ಪಾಚ್ಯಾಂಕ್ ಕಿತೆಂಯಿ ವಿಷೇಸ್ ದಿಸ್ಚೆಂ ನಾ. ಪುಣ್ ಖೊಲಾಯೆನ್ ಪಳೆತಾನಾ ಕ್ರಿಸ್ತಾಚೆರ್ ದೆಂವ್‌ಲ್ಲೊ ದೆವಾಬಾಪಾಚೊ ಸ್ಪಿರಿತ್ (ಪವಿತ್ ಅತ್ಮೊ) ಎಕಾ ಅಂತ್ರಳ್ ತಾರ‍್ವಾಥಾವ್ನ್ ದೆಂವೊನ್ ಯೆತಾ ತಶೆಂ ಪಿಂತ್ರಾಯ್ಲಾ. ಕಿತ್ಯಾಕ್?
ಹ್ಯಾ 1710-ಚ್ಯಾ ಚಿತ್ರಾಂತ್ ಕ್ರಿಸ್ತಾಚ್ಯಾ ಪವಿತ್ ಸ್ನಾನಾ ವೆಳಾರ್ ಎಕಾ (ರಥ್‌ಯಂತ್ರಾಂ, UFO) ಥಾವ್ನ್ ‘ದೆಂವೊನ್’ ಯೆಂವ್ಚಿ ಕುರ‍್ಪಾ
ಕಾರ‍್ಲೊ ಕ್ರಿವೆಲ್ಲಿಚಿ ಕಲಾಕೃತಿ
ತಶೆಂಚ್ 1486 ಇಸ್ವೆಂತ್ ಇತಾಲಿಯನ್ ಚಿತ್ರಕಾರ್ ಕಾರ‍್ಲೊ ಕ್ರಿವೆಲ್ಲಿ ಹಾಚ್ಯಾ ಎಕಾ ಚಿತ್ರಾಂತ್ ಆಂಕ್ವಾರ್ ಮರಿಯೆಕ್ ಇಜ್ಬಿ ಯೆತಾನಾ (ಗಾಬ್ರಿಯೆಲ್ ಭಡ್ವ್ಯಾನ್ ತಿ ಹಾಡ್ತಾನಾ) ಎಕಾ ಅಂತ್ರಳ್‌ತಾರ‍್ವಾಥಾವ್ನ್ ಕುರ‍್ಪೆಚೊ ಕಿರ‍್ಣಾಂ-ಖಾಂಬೊ ದೆಂವೊನ್ ಆಯಿಲ್ಲೊ ಮ್ಹಣ್ ಹೆಂ ಚಿತ್ರ್ ಸುಚಾಯ್ತಾ. ಹೆಂ ಚಿತ್ರ್ ಫಕತ್ ಕ್ರಿವೆಲ್ಲಿಚ್ಯಾ ಈಟಾಳ್ ಚಿಂತ್ಪಾ ಸಕ್ತೆಂತ್ ಉದೆಲ್ಲೆಂ?
ಹೆಂ ಚಿತ್ರ್ ಪಳೆಯಾ – ಎವ್ಕರಿಸ್ತಾಚೊ ದಳ್ಬಾರ್ ►
ಬಾಪ್ ಆನಿ ಪುತ್ರ್ ಸಂಸಾರಾಚೊ ಆನಿ ಪವಿತ್ ಎವ್ಕರಿಸ್ತಾಚೊ ದಳ್ಬಾರ್ ಪಳೆತ್ತ್ ಆಸಾತ್. 1600 ಇಸ್ವೆಂತ್ ಆಸ್ಟ್ರೀಯಾಚಾ ಚಿತ್ರಕಾರ್ ವೆಂಚುರಾ ಸಾಲಿಂಬಿನಿ ಹಾಣೆ ಚಿತ್ರಾಯಿಲ್ಲೆಂ ಹ್ಯಾ ಚಿತ್ರಾಂತ್ ಎವ್ಕರಿಸ್ತಾಚಿ ಕಾಲ್ಸ್ ಮಾತ್ರ್ ನ್ಹಯ್ ಭುಂಯ್‌ಚೊ ಗೋಲ್ ದಿಸುನ್ ಯೆತಾ ಪುಣ್ ಹ್ಯಾ ಗೋಲಾಕ್ ಚಿಡ್ಕಾಲ್ಲಿಂ ತಿಂ ದೋನ್ ಬಯ್ತಾಡಾಂ (antennae) ಕಸಲಿಂ? ಹೆಂ ಚಿತ್ರ್ ಪಿಂತಾಯಿಲ್ಲ್ಯಾ ಸಾಡೆತಿನ್ಶಿಂ + ವರ್ಸಾಂ ಉಪ್ರಾಂತ್ 1957 ಇಸ್ವೆಂತ್ ರಶಿಯಾನ್ ಉಬಯಿಲ್ಲೆಂ ಸ್ಪುಟ್ನಿಕ್ ಅಂತ್ರಳ್‌ಗೃಹಾಚೆಂ ರೂಪ್ ತಶೆಂಚ್ ಆಸ್‌ಲ್ಲೆಂ ಮ್ಹಳ್ಳಿ ಬಾರೀಕ್ ಲಖ್ಷಾ ಡೆನಿಕೆನಾಚಿ!
ಆತಾಂ ಹೆಂ ಚಿತ್ರ್ ಪಳೊವ್ಯಾಂ ►
15-ವ್ಯಾ ಶತಮಾನಾಂತ್ ಚಿತ್ರ್‌ಕಾರ್ ಡೊಮಿನಿಸಿಯೊ ಗಿರ‍್ಲಾಂಡೊ ಹಾಚ್ಯಾ ಕಲಾಕೃತಿಂತ್ ಆಮ್ಕಾಂ ಸೊಭಾಗಿಣ್ ಆಂಕ್ವಾರ್ ಮರಿಯೆಚೆಂ ರುಪ್ಣೆಂ ದಿಸ್ತಾ. ದೊಗಾಂ ಮಾಣ್ಕುಲ್ಯಾಂಚೆರ್ ದೀಷ್ಟ್ ಘಾಲುನ್ ತಿ ಆಸಾ. ಖೊಲಾಯೆನ್ ಪಳೆಯಾ – ಮರಿಯೆಚ್ಯಾ ಮಾತ್ಯಾಚ್ಯಾ ಉಜ್ವ್ಯಾ ಕುಶಿಕ್ ಕಸಲೆಂ ತೆಂ ಉಬೊನ್ ಆಸಾ? ತುಮ್ಚೊ ಅಂದಾಜ್ ಜಾಂವ್ ಖರೊ ಯಾ ಈಟಾಳ್ ಚಿಂತ್ಪಾಂತ್ಲೊ: ತೆಂ ಎಕ್ ಅಂತ್ರಳ್‌ತಾರುಂ ಮ್ಹಣ್ತಾ ಡೆನಿಕೆನ್.
ತರ್, ಹ್ಯಾ ಸಂರಾಂತ್ ಘಡ್‌ಲ್ಲ್ಯಾ ಹರ್ ಎಕಾ ಪ್ರಾಮುಖ್ಯ್ ಭಾವಾರ‍್ಥಿಕ್ ಘಡಿತಾಂವೆಳಿಂ, ಅನಾಹುತಾಂವೆಳಿಂ, ಝುಜಾಂವೆಳಿಂ, ಜಯ್ತಾಂ ಯಾ ನಷ್ಟಾ ಮದೆಂ ಸಂಸಾರ್ ದಗ್ದಾತಾನಾ ಹಿಂ ಅಂತ್ರಳ್ ತಾರ‍್ವಾಂ ದಿಷ್ಟಿಕ್ ಪಡ್ಲ್ಯಾಂತ್ ಮ್ಹಳ್ಳಿ ಲಖ್ಷಾ ಡೆನಿಕೆನಾಚಿ.
