‘ಹಾಂವ್ ಕಿತ್ಯಾಕ್ ಅಶಿಂ, ರಿಚ್ಚರ್ಡ್?’ ಆಪ್ಣಾ ಸಾಮ್ಕಾರ್ ಬಸ್‌ಲ್ಲ್ಯಾ ರಿಚ್ಚರ್ಡಾಕ್ ಸವಾಲ್ ಕೆಲೆಂ ರಮಿನ್. ರಿಚ್ಚರ್ಡಾಚ್ಯಾ ಮುಕಮಳಾರ್ ಕಸಲಿಚ್ ಬದ್ಲಾವಣ್ ಜಾಲಿಂ ನಾ.
‘ಹೆಂ ಎಕ್ ಸವಾಲ್ ಯಾ ತುಂ ಮ್ಹಾಕಾ ಎಕ್ ಕಳವ್ಣಿ ದಿತಾಯ್?’
‘ತುಂ ಕಶೆಂ ಸಮ್ಜತಾಯ್?’
‘ತುಜೆಂ ಹೆ ಎಕ್ ಬಾಳ್ ಸವಾಲ್ ಮ್ಹಣ್ ಹಾಂವ್ ಸಮ್ಜಾತಾಂ!’
‘ಡ್ರಿಂಕ್ ಘೆತಾಯ್?’ ರಮಿನ್ ವಿಚಾರ್ಲೆಂ. ‘ಹಿ ಬೀಚ್ ಕೊಟೆಜ್ ಸುಸಜ್ಜಿತ್ ಆಸಾ.’
‘ಹಾಂವ್ ಸಮ್ಜಾಲೊಂ!’ ಜನೆಲಾಂತ್ಲ್ಯಾನ್ ಭಾಯ್ರ್ ಪಳೆವ್ನ್ ಮ್ಹಳೆಂ ರಿಚ್ಚರ್ಡಾನ್. ‘ದೊದೋನ್ ಸೆಕ್ಯುರಿಟಿ ಗಾರ್ಡ್ಸ್? ಮೆಥ್ಯು ಆಪ್ಲೆ ಧುವೆಚಿ ಬರಿಚ್ಚ್ ಜತನ್ ಘೆತಾ ಮ್ಹಣ್ ಜಾಲೆಂ.’
‘ಹಾಂವ್ ಹಾಂಗಾಸರ್ ಯೆತಾಂ ಆನಿ ತುಕಾಯಿ ಆಪವ್ಣೆಂ ದಿಲಾಂ ಮ್ಹಣ್ ಡೆಡಿ ನೆಣಾಂ!’ ತೆಂ ಆಪ್ಲ್ಯಾ ಕಿಮೊನೊ ಬಿತರ್ ಚಿಕ್ಕೆಸೆ ಹುಳ್ವುಳ್ಳೆಂ. ‘ಹಾಂವ್ ಮ್ಹಜಿ ಜತನ್ ಘೆಂವ್ಕ್ ಸಕ್ತಾಂ’ ತಾಣೆ ಆಪ್ಲ್ಯಾ ಕ್ಲಚ್ ಬೆಗಾಕ್ ಥಾಪುಡ್ಲೆಂ. ‘ಶಾಣೊ ಜಾಶಿ ತರ್ 0.22 ಬೆರೆಟ್ಟಾ ಪಿಸ್ತುಲೆಂತ್ಲೊ ಎಕ್ ಬುಲ್ಲೆಟ್ ತುಜ್ಯಾ ಕಪಾಲಾಂತ್ ರಿಗಂವ್ಕ್ ಸಕ್ತಾಂ!’
ರಿಚ್ಚರ್ಡ್ ಉಗ್ತ್ಯಾನ್ ಹಾಸ್ಲೊ. ‘ಖಂಡಿತ್!’ ತೊ ಮ್ಹಣಾಲೊ ರಮಿಚೆರ್ ದೀಷ್ಟ್ ಚರವ್ನ್. ಮ್ಹಾಕಾ ದುಬಾವಚ್ ನಾ. ಪುಣ್ ಪಿಸ್ತುಲೆಚ್ಯಾ ಬುಲ್ಲೆಟಾಚ್ಯಾಕ್ ಚಡ್ ಮಾರೆಕಾರ್ ಅಸ್ತ್ರಾಂ ತುಜೆ ಲಾಗಿಂ ಆಸಾತ್.’
‘ಹೆಂ ತುಂ ವಿಚಾರ್ತಾಯ್ ಯಾ ಮ್ಹಾಕಾ ಸಾಂಗ್ತಾಯ್?’
‘ಹಾಂವ್ ಶಾಣೊ ಜಾತೊಲೊಂ ಮ್ಹಳ್ಳಿ ಹಮಿದಾರಿ ತುಕಾ ಆಸಾ?’
‘ನಾ ಜಾವ್ಯೆತ್!’ ತೆಂ ಮ್ಹಣಾಲೆಂ ಯೆಕಾಚಾಣೆ ಆಪ್ಲಿ ದೀಷ್ಟ್ ಶೂನ್ಯ್ ಕರುನ್. ‘ಹೆಲೀನಾಚೆ ಎಸ್ಟೇಟಿಂತ್ ದೋನ್ ರಾತಿ ಪಾಶಾರ್ ಕೆಲ್ಯಾ ಉಪ್ರಾಂತ್ ಶಾಣೊ ಜಾಂವ್ಚಿ ಶಾಥಿ ತುಜೆ ಥಂಯ್ ನಾ ಜಾವ್ಯೆತ್.’
‘ರಮಿ!,’ ಮ್ಹಳೆಂ ರಿಚ್ಚರ್ಡಾನ್ ವಿರಾರಾಯ್ ವ್ಯಕ್ತ್ ಕರುನ್. ‘ತುಂವೆಂ ಮ್ಹಾಕಾ ಹಾಂಗಾಸರ್ ಕಿತ್ಯಾಕ್ ಆಪಯ್ಲೊಯ್?’
‘ಮ್ಹಾಕಾ ಥೊಡಿಂ ಸವಾಲಾಂ ಸತಾಯ್ತಾತ್.’
‘ರೆವರೆಂಡ್ ಫ್ರೆಡ್ ಟೇಯ್ಲರಾ ಲಾಗಿಂ ಸುಲೂಸ್ ಲಾಬ್ಲೆನಾಂತ್? ಮಾನಸಿಕ್ ಪ್ರಾಯೆಚ್ಯೊ ಗಡಿ ಉತ್ರಾಲ್ಲೆಂ ತುಂ ಹಿಂ ಬಾಳ್ ಸವಾಲಾಂ ಘೆವ್ನ್ ಆಯ್ಲಾಂಯ್. ಫ್ರೆಡ್ ಟೇಯ್ಲರಾ ಲಾಗಿಂ ಮೆಳಾನಾತ್‌ಲ್ಲೆಂ ಕಸಲೆಂ ಹಾಂವ್ ದೀಂವ್ಕ್ ಸಕಾನ್?’
‘ಫ್ರೆಡ್ ಟೇಯ್ಲರಾಚೆಂ ಭಾಂಡೆಂ ಫೊಡುಂಕ್ ಹಾಂವ್ ಸಕ್ತಾಂ!’
‘ಆನಿ ಕಿತ್ಯಾಕ್? ಕಸಲೆಂ ತರಿ ಫಾರಿಕ್ಪಣ್?’
‘ನಿರಾಶೆಚೆಂ’ ರಮಿನ್ ಜಾಪ್ ದಿಲಿ. ‘ಮ್ಹಾಕಾ ಕಾಂಯ್ ತರಿ ಮಾನಸಿಕ್ ಥಂಡಕ್ ಮೆಳ್ತೆಲಿ ಮ್ಹಣ್ ಹಾಂವ್ ಹ್ಯಾ ಜಮಾತಿಂನಿ ಪ್ರಮುಕ್ ಪಾತ್ರ್ ಹಾಂವೆಂ ಘೆತ್‌ಲ್ಲೊ.’
‘ತುಕಾ ಕಿತೆಂಚ್ ಮೆಳ್ಳೆಂ ನಾ?’
‘ತುಂ ಶೀದಾ ವಿಚಾರ್ತಾಯ್ ತರ್ ಶೀದಾ ಜಾಪ್ ಆಯ್ಕ್ – ಹಾಂವ್ ಫ್ರೆಡ್ ಟೇಯ್ಲರಾ ಸಂಗಿಂ ನಿದುಂಕ್ ನಾ.’
ರಿಚ್ಚರ್ಡಾನ್ ಕಸಲೆಂಚ್ ಪ್ರತಿಕ್ರಿಯೆಂ ದಾಕಯ್ಲೆಂ ನಾ.
‘ತುಂ ಪಾತ್ಯೆತಾಯ್ ತರ್ ಆನಿ ಸತ್ ಆಯ್ಕೊಂಕ್ ಸಕ್ತಾಯ್ ತರ್ – ಹಾಂವ್ ಆಜೂನ್ ನಿಸ್ಕಳ್ ಆಸಾಂ! Goddamnit! I’m still a virgin!’
‘ಹಾಂವ್ ಪಾತ್ಯೆತಾಂ ಯಾ ನಾ, ಹಾಂತುಂ ದೆವಾಕ್ ಮೆತೆರ್ ಕರಿಜೆ ಮ್ಹಳ್ಳಿ ಗರ್ಜ್ ನಾ.’
‘ಮತ್ಲಬ್?’
‘ತುಂ ಆಜೂನ್‌ಯಿ ನಿಸ್ಕಳ್ ಪುಣ್ ಸಗ್ಳೊ ಸಂಸಾರ್ ತುಕಾ ಸದಿಳ್ ಚಲಿ ಮ್ಹಣ್ ಸಮ್ಜಾತಾ ಆನಿ ತುಕಾ ಹೆಂಚ್ ಜಾಯ್.’
‘ಹೆಂ ತುಂ ಸಮ್ಜೊಂಕ್ ಸಕ್ತಾಯ್, ರಿಚ್ಚರ್ಡ್ ಪುಣ್…ಹಾಂವ್ ಹ್ಯಾ ಪ್ರಖ್ಯಾತಿ ಥಂಯ್ ಥಕ್ಲ್ಯಾಂ, ರಿಚ್ಚರ್ಡ್.’
‘ಕಿತ್ಲೊ ಫರಕ್ ತುಜ್ಯಾ ಆನಿ ಈವಾ ಮದೆಂ!’
‘ಕಿತ್ಯಾಕ್ ಮ್ಹಣ್ತಾಯ್?’
‘ಈವಾಕ್‌ಯಿ ಚಡ್ ಉಣೆಂ ಅಸಲಿಚ್ಚ್ ಪ್ರಖ್ಯಾತಿ ಆಸಾ ಪುಣ್ ಪುಣ್ ತೆಂ ಥಕೊಂಕ್ ನಾ!’
ರಮೋನಾ ಹಾಸ್ಲೆಂ. ‘ವಿಸರ್ಲಿಂ ಹಾಂವ್…ಸ್ಕಾಯ್‌ಪಾರ್ಕಾ ಉಪ್ರಾಂತ್ ಮ್ಹಜೊ ಡೆಡಿ ಈವಾಕ್ ಘೆವ್ನ್ ಗೆಲ್ಲೊ. ವಿಚಿತ್ರ್ ದಾದ್ಲೆ ತುಮಿ….ಈವಾಕ್ ಘೆವ್ನ್ ಡೆಡಿ ಗೆಲೊ ಆನಿ ಹೆಲೀನಾ ತುಕಾ ಘೆವ್ನ್ ಎಸ್ಟೇಟಿಕ್ ಗೆಲೆಂ…’
‘ಆನಿ ತುಂವೆಂ ಮ್ಹಾಕಾ ಬೀಚ್ ಕೊಟೆಜಿಕ್ ಆಪಯ್ಲಾಯ್!’ ಮ್ಹಳೆಂ ರಿಚ್ಚರ್ಡಾನ್. ‘Now, I’ll have my Barcardi’
ರಮೋನಾನ್ ಕ್ಯಾಬಿನೆಟ್ ದಾಕಯ್ಲೆಂ. ‘ಮ್ಹಾಕಾ ಎಕ್ ಜಿನ್ನ್ ಆಂಡ್ ಟೊನಿಕ್, ಪ್ಲೀಜ್’
ತಾತಾಂಚಿಂ ಡ್ರಿಂಕ್ಸ್ ಘೆವ್ನ್ ತಿಂ ಬಸ್ಲಿಂ. ಗ್ಲಾಸ್ ಅರ್ವಾಸ್ ಖಾಲಿ ಜಾತಾ ಪರ್ಯಾಂತ್ ತಾಂಚೆ ಮದೆಂ ಉಲವ್ಣೆಂ ಚಲ್ಲೆಂ ನಾ.
‘ದರ್‍ಯಾ ಕಿನಾರೆರ್ ಚಲೊಂಕ್ ಜಾಯ್?’
ಉಪ್ರಾಂತ್ ರಮಿನ್ ವಿಚಾರ್ಲೆಂ. ‘ದರ್ಯೊ ಶಾಂತ್ ಆಸಾ.’
ರಿಚ್ಚರ್ಡಾನ್ ಜಾಪ್ ದಿಲಿ ನಾ. ಡ್ರಿಂಕ್ ಕಾಬಾರ್ ಜಾತಾನ್ ಮುಕ್ಕಾಲ್ ಘಂಟೊ ಉತ್ರಾಲ್ಲೊ. ರಿಚ್ಚರ್ಡ್ ಉಟ್ಲೊ. ‘ಆತಾಂ ವಚ್ಯಾಂ!’ ತಾಣೆ ಹಾತ್ ಮುಕಾರ್ ಹಾಡ್ಲೊ. ರಮಿನ್ ತೊ ಧರ್‍ಲೊ ಆನಿ ರಿಚ್ಚರ್ಡಾನ್ ತಾಕಾ ಉಟಯ್ತಾನಾ ರಮಿ ಕಸ್ಕಸೋನ್ ರಡ್ಲೆಂ ಆನಿ ರಿಚ್ಚರ್ಡಾಚೆ ಪಾಸ್ಳೆಂತ್ ಉಬ್ಲೆಂ. ರಿಚ್ಚರ್ಡಾನ್ ತಾಚೆಂ ಮಾತೆಂ ಪೊಶೆಲೆಂ ಆನಿ ರಸ್ಮ್ಯಾಳ್ಯಾ ಕೆಂಸಾಂಚೊ ಪರ್ಮಳ್ ಘೆತ್ಲೊ.
‘ಹ್ಯೆ ಘಡಿಯೆ,’ ಮ್ಹಳೆಂ ರಮೋನಾನ್. ‘ಹ್ಯೆ ಘಡಿಯೆ ತುಂವೆಂ ಕಿತೆಂ ವಿಚಾರ್ಲ್ಯಾರ್‌ಯಿ ದೀಂವ್ಕ್ ಹಾಂವ್ ಕಬೂಲ್ ಜಾತೆಲಿಂ.’
‘ಫಟಿ!’ ಮ್ಹಳೆಂ ರಿಚ್ಚರ್ಡಾನ್. ‘ನಿಸ್ಕಳ್‌ಪಣಾಚೊ ಸಾಕ್ರಿಫಿಸ್ ಭೆಟಂವ್ಕ್ ತುಂವೆಂ ಮ್ಹಾಕಾ ಹಾಂಗಾಸರ್ ಆಪಂವ್ಕ್‌ನಾಂಯ್. ‘ದೆಕುನ್ ಫಟಿ ಮಾರಿನಾಕಾ.’
‘Will you be my freind?’
‘Yes and a good freind!’ ಮ್ಹಳೆಂ ತಾಣೆ ರಮಿಕ್ ಆರಾವ್ನ್ ಧರುನ್.
ಬೀಚ್ ಕೊಟೆಜಿಥಾವ್ನ್ ಭಾಯ್ರ್ ಯೆತಾನಾ ದಾಟ್ ಉದ್ಕಾಹಬ್ಯಾಂತ್ ಮಿಸ್ಳಾಲ್ಲೆಂ ಮಿಟಾಳೆಂ ವ್ಹಾರೆಂ ತಾಂಕಾಂ ಆದಾಳ್ಳೆಂ. ಲಾರಾಂ, ಚಾಂದ್ನ್ಯಾಚೆಂ ಪ್ರತಿಫಲನ್ ಕರ್ತಾಲಿಂ. ಆಪ್ಲೆಂ ಮಾತೆಂ ಘುಂವ್ಡಾವ್ನ್ ತಾಣೆ ರಮಿಚ್ಯಾ ಕಪಾಲಾಚೊ ಉಮೊ ಘೆತ್ಲೊ.
ಆಗಸಾರ್ ಫಾಂತ್ಯಾಫಾರಾಚಿ ತಾಂಬ್ಸಾಣ್ ಉದೆವ್ನ್ ಯೆತಾನಾ ತಿಂ ಬೀಚ್ ಕೊಟೆಜಿಕ್ ಪಾಟಿಂ ಆಯ್ಲಿಂ. ಫ್ರಿಡ್ಜಾಂತ್ ಆಸ್ಲ್ಲೊ ಪಿಟ್ಜಾ ಭಾಯ್ರ್ ಕಾಡುನ್ ರಮಿನ್ ಮೈಕ್ರೊಂತ್ ಘಾಲುನ್ ಹುನ್ ಕೆಲೊ ಆನಿ ತಾಣಿಂ ರಾತಿಚೆಂ ಜೆವಣ್ ಆನಿ ಸಕಾಳಿಂಚೊ ನಾಸ್ಟೊ ಸಾಂಗಾತಾಚ್ ಕೆಲೊ. ದೊದೋನ್ ಕಪ್ಪಾಂ ಕೊಫಿ ಪಿಯೆಲ್ಯಾ ಉಪ್ರಾಂತ್ ಯೆಕಾಚಾಣೆ ರಿಚ್ಚರ್ಡ್ ಉಟ್ಲೊ. ರಮೋನಾಕ್ ಆರಾವ್ನ್ ಘೆವ್ನ್ ತಾಚ್ಯಾ ಕಪಾಲಾಚೊ ಉಮೊ ಘೆತ್ಲೊ.
ಬೀಚ್ ಕೊಟೆಜಿಚೆಂ ಪ್ರಕರಣ್ ತಿತ್ಲ್ಯಾರ್‌ಚ್ ಸಂಪ್ಲೆಂ ಪುಣ್ ಪೂರ್ಣ್ ಜಾಲೆಂ ನಾ..
ಪುಣ್ ಎಕ್ ಎಕ್ ಸಂಗತ್ ಸ್ಪಷ್ಟ್ ಜಾಯಿತ್ತ್ ಯೆತಾಲಿ ಪುಣ್ ಹ್ಯೆ ಸಂಗ್ತಿಕ್ ಆತಾಂಯಿ ಆಂಗ್ ಲಾಬೊಂಕ್ ನಾತ್‌ಲ್ಲೆಂ. ಪೆಟ್ರೊಸ್ಟೇಟಾಂತ್ ಕಸಲೊಗಿ ವಿಸ್ಪೋಟ್ ಜಾಂವ್ಚ್ಯಾರ್ ಆಸ್ಲ್ಲೊ; ಸರ್ವಾಂಕ್‌ಯಿ ಉಗ್ತಡಾಂಯ್ ಯೆಂವ್ಕ್ ಆಸ್‌ಲ್ಲೀಂ, ಜುಫಾತ್ ಫಾಲ್ಕೆಂ ತಯಾರ್ ಜಾಯಿತ್ತ್ ಯೆತಾಲೆಂ. ಪುಣ್ ದಾರ್ವೆ ವಾತಿಚ್ಯಾ ತುದಿಯೆಕ್ ಉಜೊ ದಿಂವ್ಚೊ ಕೊಣೆ?
ಮೆಥ್ಯು ಲಿಯೊಥಾವ್ನ್ ಧರುನ್, ಜೆರೊಮ್, ಈವಾ, ಹೆಲೀನಾ, ರಿಚ್ಚರ್ಡ್, ಮೌರಿಸ್ ಆನಿ ರೆವರೆಂಡ್ ಫ್ರೆಡ್ ಟೇಯ್ಲರ್ ತ್ಯಾ ವಿಸ್ಪೋಟಾಕ್ ರಾಕೊನ್ ಆಸ್‌ಲ್ಲೆ.
‘ಜಾಂವ್!’ ಮ್ಹಣಾಲೊ ಜೆರೊಮ್. ‘ಹಾಂವೆಂ ಧಾಡ್‌ಲ್ಲೊ ಫೊಟೊಗ್ರಾಫರ್ ಸಲ್ವಾಲೊ ಪುಣ್ ತಾಕಾ ಆಡಾಯ್ಲೊ ಕೊಣೆ ಮ್ಹಣ್ ಹಾಂವ್ ಜಾಣಾಂ ಪುಣ್ ಕಶೆಂ ಆನಿ ಕಿತ್ಯಾಕ್ ಆನಿ ಕೊಣೆ ಹೊ ಘುಟ್ ಪಾಜಾರ್ಲೊ?’
‘ಸವಲಾಂಕ್ ಜಾಪಿ ಜಾಣಾಂ ಆಸುನ್‌ಯಿ ತಿಂ ಸವಲಾಂ ವಿಚಾರ್ಚಿ ತುಜಿ ಪಿಸಾಯ್ ಆದ್ಲಿ, ಜೆರೊಮ್!’ ಮ್ಹಳೆಂ ಮೆಥ್ಯುನ್. ‘ಪರಿಣಾಮ್ ತುಂ ಭೊಗೊನ್ಂಚ್ ಆಯ್ಲಾಯ್. ದೆಕಿಕ್, ಹಾಲಿಂಚ್ ಹಾಂವೆಂ ಫುಟಯಿಲ್ಲಿ ತುಜಿ ಖಾಡ್ಕಿ. ಕಿಂಡೆಲ್ಯಾ ತಿ, ಕಾಂಯ್ ತರಿ ಮರಮ್‌ಪಟ್ಟಿ ಕರ್, ಫಾಲ್ಯಾಂ ಒಫಿಸಾಕ್ ಯೆಂವ್ಕ್ ಆಸಾ.’
‘ಆನಿ ಸಾತ್ ದಿಸಾಂನಿ ಟೇಯ್ಲರಾಚ್ಯಾ ನಿಮಾಣ್ಯಾ ಜಮಾತಿಕ್ ಹಾಜರ್ ಜಾಂವ್ಕ್ ಆಸಾ.’ ಮ್ಹಣಾಲೊ ಜೆರೊಮ್, ಮೆಥ್ಯುಚ್ಯಾ ಉತ್ರಾಂಚೆಂ ಗಮನ್ ಕರಿನಾಸ್ತಾಂ. ‘ಹಾಂಗಾಸರ್, ಯೆದೊಳ್ ಘಡ್‌ಲ್ಲೆಂ ಆನಿ ಚಲಲ್ಲೆಂ ಉಲವ್ಪ್ ಸರ್ವಾಂಕ್ ಕಳಿತ್ ಜಾಲಾಂ ಆಸ್ತೆಲೆಂ. ಪುಣ್ ಅದ್ಯತ್ಯಾಯೊ ಪಯ್ಲ್ಯೊ. ಪ್ರಥಮ್ ಆದ್ಯತ್ಯಾಯ್ ಜಾವ್ನ್ ಆಸಾ ಒಸಿಸ್ ಕಂಪೆನಿ. ಮ್ಹಜೊ ದಿಸ್ಪಟೊ ಗ್ರಾಸ್ ತಿ.’ ತಾಚೊ ತಾಳೊ ಚಿಕ್ಕೆಸೆ ತಗ್ಸಾಲೊ. ‘ಹ್ಯಾ ಒಸಿಸ್ ಕಂಪೆನಿಕ್ ಧಗೊ ಕೆಲಾ, ರಿಚ್ಚರ್ಡಾನ್.’
‘ಪುಣ್ ತಾಣೆ ತಶೆಂ ಕರಿಶೆಂ ಕರುಂಕ್ ಇಂಬು ದಿಲ್ಲೊ ಹಾಂವೆಂಚ್, ಜೆರೊಮ್!’ ಮ್ಹಳೆಂ ಮೆಥ್ಯು. ‘ಹೆಂ ತುಕಾ ಹಾಂವೆಂ ಪಯ್ಲೆಂಚ್ ಸಾಂಗ್ಲಾಂ ತರಿ ತುಂ ಮ್ಹಾಕಾ ಪಾತ್ಯೆನಾಂಯ್. ಮೌರಿಸ್ ಆಗುಸ್ತಿನಾಕ್ ಹಾಂವೆಂ ಕಸೊ ವಾಪರ್ಲೊ ಮ್ಹಳ್ಳೆಂ ತುಕಾ ಹಾಂವೆಂ ಸಾಂಗ್ಲಾಂ.’
‘ಪುಣ್ ತುಕಾ ಕಸಲೊ ಫಾಯ್ದೊ ಜಾಲೊ?’
ಮೆಥ್ಯು ಮಟ್ವೊ ಹಾಸೊ ಹಾಸ್ಲೊ.
‘ಫಾಯ್ದೊ?’ ತಾಣೆ ವಿಚಾರ್ಲೆಂ. ‘ತುಜೆ ತಸಲೆ ಉಂದಿರ್ ಆನಿ ತುಜಿಂ ಚಿವ್ಳಿಂ ಉಗ್ತಡಾಂತ್ ಆಯ್ಲಿಂ. ಹಾಂವೆಂ ಅಸಲೊ ಖ್ಹೆಳ್ ಖ್ಹೆಳೊಂಕ್ ನಾತ್‌ಲ್ಲೊ ತರ್ ಮ್ಹಾಕಾ ಕಳಿತ್ ಜಾತೆಂ ಕಿ ತುಂವೆಂ ಒಸಿಸ್ ಬಿಲ್ಡಿಂಗಾಂತ್ಲ್ಯಾ ಹರ್ ಎಕಾ ಕೆಬಿನಾಚ್ಯೊ ಚಾವಿಯ್ಯೊ ಕರುನ್ ದವರ್ಲ್ಯಾಯ್, ಹರ್ ಎಕ್ ಟೆಲಿಫೋನ್ ಟ್ಯಾಪ್ ಕರುನ್ ದವರ್ಲಾಂಯ್ ಮ್ಹಣ್? ಉಂಡ್ಯಾಚ್ಯಾ ಕಾಪಾಂಚ್ಯಾ ದೋನ್‌ಯಿ ಕುಶಿಂನಿ ದಾಟ್ ದಾಟ್ ಲೊಣಿ ಆಸಾ ಮ್ಹಣ್ ಲೆಂಬೆಲ್ಲೆ, ಎಕ್ ಕೂಸ್ ಲೆಂವೊನ್ ಬೆಫಿಕ್ರೇನ್ ದುಸ್ರಿ ಕೂಸ್‌ಯಿ ಲೆಂವ್ತಾತ್. ಲೊಣಿ ದಾಟ್ ಆಸ್ತಾನಾ ತಾಂತುಂ ಮಿಸ್ಳಾಯಿಲ್ಲೆಂ ಆಫೀಮ್ ತಾಂಚ್ಯಾ ಗಮನಾಕ್ ವಚಾನಾ ಆನಿ ಆಫೀಮ್ ಚಡ್ತಾನಾ ತೆ ಯಾ ತಿಂ, ವೊಂಕ್ತಾತ್.’
‘ತುಕಾ ಫಿಲೊಸೊಫಿ ಮಾರುಂಕ್ ಸುಲಬ್, ಮೆಥ್ಯು ಲಿಯೊ!’ ಮ್ಹಳೆ ಜೆರೊಮಾನ್ ಆಪ್ಲಿ ಕೊಂಡೆಲ್ಲಿ ಖಾಡ್ಕಿ ಮಾಲಿಶ್ ಕರುನ್. ‘ಪುಣ್ ಹಾಂವೆಂ ಖೆಳ್‌ಲ್ಲ್ಯಾ ಖೆಳಾ ವರ್ವಿಂ ಕೋಣ್ ಸರ್ವ್ ಆನಿ ಕಸಲಿಂ ಸರ್ವ್ ಕರ್ತುಬಾಂ ಉಗ್ತಡಾಂತ್ ಆಯ್ಲಿಂ ಮ್ಹಳ್ಳೆಂ ತುಕಾ ಆನಿಕಿ ಗಮೊಂಕ್ ನಾ? ತುಂ ಆನಿಕಿ ರಿಚರ್ಡಾಕ್ ತುಜ್ಯಾ ಮಾಂತಾ ಪಂದಾಕ್ ಲಿಪಯ್ತಾಯ್?’
‘ಜೆರೊಮ್!’ ತಾಳೊ ಕಾಡ್ಲೊ ಮೆಥ್ಯುನ್. ‘ರಿಚರ್ಡಾಕ್ ಮಾಂತಾ ಪಂದಾಕ್ ಲಿಪಯಿಲ್ಲ್ಯಾನ್ ಮಾಂತಾ ಪಂದ್ಲೆ ಕಿತ್ಲೆ ಜಣ್ ಉಸ್ಮಡೋನ್ ಭಾಯ್ರ್ ಯೆತೆಲೆ ಮ್ಹಳ್ಳೆಂ ತುಂ ನೆಣಾಂಯ್. ಹಿ ತುಕಾ ಛೆತಾವ್ಣಿ, ತುಜ್ಯಾ ವೊಂಟಾಂಕ್ ಖಾಡುಂ ಘಾಲುಂಕ್ ಹೊಚ್ಚ್ ವೇಳ್ ಆಯಿನ್ನ್. ವಿಸರ್‍ನಾಕಾ ತುಂ, ಹಾಂವ್ ವರ್ತೊತ್ತಾಂ ಒಸಿಸ್ ಕಂಪೆನಿಚೊ ದೇವ್ ಆನಿ ರಿಂಗ್ ಮಾಸ್ಟರ್’
‘ಪುಣ್ ತುಕಾ ತುಜ್ಯಾ ಮಕ್ಸದಾಚಿ ದೇಗ್ ಮಾತ್ರ್ ಹಾಂವೆಂ ದಾಕಯ್ಲ್ಯಾ!’ ಹಾತಾ ತಾಳು ಉದಾರೆ ಕೆಲ್ಯೊ ಜೆರೊಮಾನ್ ‘ತುಂವೆಂ ಮ್ಹಾಕಾ ಉಲಂವ್ಕ್ ಸೊಡಿಜೆ.’
‘ಆತಾಂ ನ್ಹಯ್, ಹಾಂಗಾಸರ್ ನ್ಹಯ್!’ ಮೆಥ್ಯು ದಾಂತ್ ಚಾಬುನ್ ಧರುನ್ ಹಾಸ್ಲೊ. ‘ಎಕಾ ದೆವಾಚಿ ಆನಿ ರಿಂಗ್ ಮಾಸ್ಟರಾಚಿ ಗೊಮ್ಟಿ ಮುನ್ಕುಟ್ಯಾರ್ ತೊ ಖುದ್ದ್ ದವರ್‍ತಾನಾ ಕಸಲಿ ಕುರಾಡ್ ತೊ ಹಾತಿಂ ಘೆತಾ ಮ್ಹಳ್ಳೆಂ ತುಂ ನೆಣಾಂಯ್.’
‘ತುಂ ಎಕ್ ವಿಕೃತ್ masochist!’ ಮ್ಹಳೆಂ ಜೆರೊಮಾನ್. ‘ತತ್ವಾಂ ಮ್ಹಾಕಾಯಿ ಕಳಿತ್ ಆಸಾತ್.’
‘ತರ್ ತುಜೊ ಗಳೊ ಹಾಂವೆಂ ಆತಾಂಚ್ ಚಿರ್ಡುನ್ ತುಕಾ ಕಾಬಾರ್ ಕರಿಜೆ.’
‘ಡೆಡಿ,’ ಮ್ಹಳೆಂ ರಮಿನ್. ‘ಖರೆಂಚ್ ಸಾಂಗ್ಚೆಂ ತರ್ ಹಾಂಗಾಸರ್ ಚಲ್ಚ್ಯಾ ಕಸಲ್ಯಾಕ್‌ಯಿ ಮ್ಹಾಕಾ ಅರ್ಥ್ ಮೆಳಾನಾ. ಪುಣ್ ಕಾಂಯ್ ನಜೊ. ‘ತುಂವೆಂ ಮ್ಹಾಕಾ ಬೋರ್ಡಿಂಗಾಥಾವ್ನ್ ತುಜ್ಯಾ ಮಜ್ಬೂತ್ ಬೊಂಗ್ಲ್ಯಾಕ್ ಹಾಡ್ತಾನಾ ಆಮ್ಚೆ ಮದೆಂ ಚಲಲ್ಲೆಂ ಉಲವ್ಣೆಂ ಯಾದಿಂತ್ ಆಸಾ, ಡೆಡಿ? ಮ್ಹಜ್ಯಾ ಯಾದಿಂತ್ ಆಸಾ-
“ಮತ್ಲಬ್ ಹಾಂಗಾಸರ್ ನಾ. ತುಜ್ಯಾ ಹ್ಯಾ ಮೃಗಾಲಯಾಂತ್ ಎಕೆಕಾ ನಮುನ್ಯಾಚ್ಯಾ ಮೊನ್ಜಾತಿಕ್ ವಿಂಗಡ್ ವಿಂಗಡ್ ಫಿಚಾರ್ ಕರುಂಕ್ ನಾ. ತುಂ ಜಾಣಾಂಯ್ – ಕೋಣ್ ಕೆದಾಳಾ ಕೊಣಾಕ್ ಆನಿ ಖಂಯ್ ಘಾಸ್ ಮಾರ್ತೊಲೊ. ತರ್ಯಿ ತು೦ ವಗೊ ಆಸಾಯ್. ತುವೆಂ ತುಕಾಚ್ ಅಸಹಾಯಕ್ ಕರುನ್ ದವರ್ಲಾಂಯ್.”
“ಕಾರಣ್ ತುಂ ಜಾಣಾಂಯ್ ರಮಿ?”
“ತುಂಚ್ ನೆಣಾಂ ಆಸ್ಚೆಂ ಕಾರಣ್ ಮ್ಹಾಕಾ ಕಶೆಂ ಕಳಿತ್? ತರ್ಯಿ ತುಕಾ ಆವ್ಕಾಸ್ ಆಸ್ಲ್ಲೊ.”
“ಕೆದಾಳಾ?”
“ವರ್ಸಾಂ ಆದಿಂ, ತುವೆಂ ಮ್ಹಾಕಾ ಪಯಿಲ್ಲೆ ಪಾವ್ಟಿಂ ಮಾದ್ರಿಂಚ್ಯಾ ಬೋರ್ಡಿಂಗಾಂತ್ ಸೊಡ್ಲ್ಲ್ಯಾ ವೆಳಾರ್ ಹಾಂವೆಂ ಏಕ್ ಸವಾಲ್ ವಿಚಾರ್ಲ್ಲೆಂ.”
“ಮ್ಹಜ್ಯಾ ಉಡಾಸಾಂತ್ ಆಸಾ ರಮಿ.”
“ಪುಣ್ ತೆಂ ಸವಾಲ್ ಸವಾಲ್ ಜಾವ್ನ್ಚ್ ಉರ್ಲ್ಲ್ಯಾನ್ ತುಂ ಆತಾಂ ಹೆರಾಂಚೆ ಜಿಣಿಯೆಸಂಗಿಂ ಶತ್ರಂಜ್ ಖೆಳ್ತಾಯ್. ಸಬಾವ್ ಪಾರ್ಕುಂಚಾಂತ್ ತುಂ ಅಪ್ರತಿಮ್. ಒಸಿಸ್ ಕಂಪೆನಿಂತ್ಲೆ ಮನಿಸ್ ಗ್ರಹಾಂ ಆಸ್ಲ್ಲೆಪರಿಂ ಎಕಾಮೆಕಾ ತಾಂಡುನ್ ಧರ್ನ್ ಆಸಾತ್’’
“ಒಸಿಸ್ ಕಂಪೆನಿ ವಿಶಾಂತ್ ತುಂ ಖೂಬ್ ಜಾಣಾಂಯ್?”
“ಸಹಜ್ ಜಾವ್ನ್” ತೆಂ ಮ್ಹಣಾಲೆಂ. “ತುಕಾಚ್ ಹಾಂವ್ ಜಾಣಾಂ ಜಾಲ್ಲ್ಯಾನ್ ”
“ಆದ್ಲೆ ಉಡಾಸ್ಚ್ ತುಜ್ಯಾ ತರ್ಕಾಚೆಂ ಭದ್ರ್ ಕೊಟೆಂ?”
“ಆನಿ ತುಜೆ ಜಿಣ್ಯೆಚಿ ಬುನ್ಯಾದ್ ಕಸ್ಲಿ?” ತೆಂ ಪಾಟಿಂ ಮಾರಿಲಾಗ್ಲೆಂ. “ಹ್ಯಾ ಘರಾಂತ್ ರಿಗ್ತಾನಾ ತುವೆಂ ಮ್ಹಳ್ಳೆಂಯ್ – ತುಂ ಜೀವಂತ್ ಆಸ್ತಾ ಪರ್ಯಾಂತ್ ರಮಿ ಹಾಂವ್ ತುಜ್ಯಾ ಆವಯ್ಕ್ ವಿಸ್ರೊಂಚೊ ನಾ. ತುಜಿ ಒಸಿಸ್ ಕಂಪೆನಿ ಏಕ್ ರಂಗಮಂಚ್ ಜಾವ್ನಾಸಾ-”
“ರಮಿ!”
“ಹೆಂ ಉಲವ್ಣೆಂ ಹಾಂವೆಂ ಪ್ರಾರಂಬ್ ಕೆಲ್ಲೆಂ ನ್ಹಯ್” ತೆಂ ಮ್ಹಣಾಲೆಂ ಆಪ್ಲ್ಯಾ ಎಕಾ ಪಾಂಯಾಚೆರ್ ದುಸ್ರೊ ಚಡವ್ನ್. “ತಶೆಂಚ್ ಮ್ಹಜೆಂ ಜೀವನ್ಯಿ ಹಾಂವೆಂ ಪ್ರಾರಂಬ್ ಕೆಲ್ಲೆಂ ನ್ಹಯ್.”
ಮೆಥ್ಯು ಉಟೊನ್ ಉಬೊ ಜಾಲೊ.
ಸಿಂತಿಮೆಂತಾಂಕ್ ಏಕ್ ಮೋಲ್ ಆಸ್ಲ್ಲೆಂ.
ರಮಿಚ್ಯಾ ಕುಡಾಂತ್ ರಾವೊನ್ಚ್ ತಾಣೆ ಆಪ್ಲೊ ತಾಂಬ್ಲೆರ್ ಖಾಲಿ ಕೆಲೊ.
“ತುಜೆಂ ಜಿವಿತ್ ತುವೆಂ ಪ್ರಾರಂಬ್ ಕೆಲ್ಲೆಂ ನ್ಹಯ್” ತೊ ಮ್ಹಣಾಲೊ ಆಪ್ಲ್ಯಾ ಪಾಯಾಂಚೆ ಗಾಂಟಿಂಚೆರ್ ಧಲೊನ್. “ತುಜ್ಯಾ ಸ್ವತಂತ್ರಾಚೆಂ ಮೋಲ್ ತುಜೆ ಆವಯ್ನ್ ದಿಲಾಂ ಪುಣ್ ತಿಣೆ ದಿಲ್ಲೆಂ ತೆಂ ಮೋಲ್ ತಿಚೊ ಜೀವ್ ವ್ಹರುನ್ ಗೆಲೆಂ. ತೆಂ ಪೂರ್ಣ್ ಜಾತಾನಾ ರಮಿ, ತುಜ್ಯಾ ಸವಾಲಾಚಿ ಜಾಪ್ ತುಕಾ ಮೆಳ್ತೆಲಿ!”
ರಮೋನಾ ಉಬೆಂ ಜಾಲೆಂ.
“ಹಾಂವ್ ರಾಕೊನ್ ಆಸ್ತೆಲಿಂ” ತೆಂ ಮ್ಹಣಾಲೆಂ. “ಹೆಂ ಘರ್ಶಣ್ ಮ್ಹಾಕಾ ಬರೆಂಚ್ ಲಾಗ್ತಾ ಪುಣ್ ತೆಂಚ್ ಸವಾಲ್ ಡೆಡಿ, ಹ್ಯಾ ಸರ್ವಾಚಿ ಗರ್ಜ್ ಆಸ್ಲ್ಲಿ?”
ಮೆಥ್ಯುನ್ ಎಕ್ ಲಾಂಬ್ ಸ್ವಾಸ್ ಸೊಡ್ಲೊ.
‘ಆತಾಂ ತುಂ ರವಂಚ್ ಕಾಡ್ತಾಯ್ ಯಾ ಘಾಯಾಚೆಂ ಖೊವಂಚ್ ಕಾಡ್ತಾಯ್, ರಮಿ?’ ತಾಣೆ ವಿಚಾರ್ಲೆಂ. ಪುಣ್ ತಾಚಿ ದಿಷ್ಟ್ ಜೆರೊಮಾಚೆರ್ ಆಸ್ಲ್ಲಿ.
‘ಹಾಂವ್ ಕಸಲೆಂಯಿ ಕಾಡಿನಾ, ಡೆಡಿ!’ ತಾಣೆ ಮ್ಹಳೆಂ. ‘ಉಟೊನ್ ಯೆವ್ನ್ ಹಾಂವ್ ಕಿತ್ಯಾಕ್ ಹಾಂಗಾಸರ್ ಮೆತೆರ್ ಜಾಲಿಂ ಮ್ಹಳ್ಳೆಂಯಿ ಮ್ಹಾಕಾ ಸಮ್ಜಾನಾ. ತುಂ ಜಾಣಾಂಯ್ ಡೆಡಿ, ಹಾಂವ್ ಕೆನ್ನಾಂಯಿ ತುಜ್ಯಾ ಒಸಿಸ್ ಮೃಗಾಲಯಾಂತ್ ಫಿಟ್ಟ್ ಜಾಲ್ಲಿಂ ನಾ, ಜಾಂವ್ಚಿಂಯಿ ನಾ. ಮ್ಹಜೆಂ ಜಿವಿತ್ ಹಾಂವೆಂ ಪ್ರಾರಂಬ್ ಕೆಲ್ಲೆಂ ನ್ಹಯ್. ಕಿತೆಂಯಿ ಜಾಣಾಂ ಜಾಂವ್ಚ್ಯಾ ಫುಡೆಂಚ್ ಹಾಂವ್ ಜಿವಂತ್ ಆಸಾಂ ಆನಿ ಜಿಯೆತಾಂ ಮ್ಹಳ್ಳೆಂ ಖಚಿತ್ ಕರುನ್ ಘೆತ್ಲಾಂ. ಪುಣ್ ಹಾಂವ್ ಆನಿಕಿ ಸೊದ್ನೆರ್ ಆಸಾಂ!’
‘ಕೋಣ್ ಸೊದ್ನೆರ್ ನಾಂತ್, ರಮಿ?’ ಮೆಥ್ಯುನ್ ವಿಚಾರ್ಲೆಂ. ‘ತೊ ತುಮ್ಚೊ ದಗಾಲ್ಭಾಝಿ ಟೇಯ್ಲರ್ ಸಯ್ತ್ ಸೊದ್ನೆರ್ ಆಸಾ. ತುಮಿ ಸರ್ವಾಂನಿ ಭಕೀಕ್ ಪಡಾಶೆಂ ಕರುನ್ ತೊ ಕಸಲಿಂ ಅಚರ್ಯಿಂ ಕರ್ತಾ ತೆಂ ಪಳೆಯಾ. ತಾಚಿಂ ಅಚರ್ಯಿಂ ಯಶಸ್ವಿ ದಿಸ್ತಾತ್ ಕಿತ್ಯಾಕ್ ಪೆಟ್ರೊಸ್ಟೇಟಾಚಿ ಸಮಾಜ್ ಜಿಣಿಯೆಥಂಯ್ ಶೆಳೆಲ್ಯಾ… ಟೇಯ್ಲರಾ ತಸಲ್ಯಾಂಚಿ ಗರಜ್ ಆಸಾ ಹೆ ಸಮಾಜೆಕ್!’
‘ಪರತ್ ಫಿಲೊಸೊಫಿ, ಮೆಥ್ಯು?’ ಜೆರೊಮಾನ್ ಇಸಾರೊ ಘೆತ್ಲೊ. ‘ರಮೋನಾ ಡಾರ್ಲಿಂಗ್,’ ತಾಣೆ ಮ್ಹಳೆಂ. ‘ತುಂ ಪರ್ತ್ಯಾನ್ ತುಜ್ಯಾ ಬೆಡ್‌ರೂಮಾಕ್ ವಚ್ ಆನಿ ನೀದ್ ಮುಂದರಿಯ್. ಆನಿ ಸಾತ್ ದಿಸಾಂನಿ ಟೇಯ್ಲರಾಚಿ ನಿಮಾಣಿ ಜಮಾತ್ ಆನಿ ಜಾಯ್ತೆಂ ಕಾಮ್ ಆಮ್ಕಾಂ ಕರುಂಕ್ ಆಸಾಂ.’
‘ಬರಾಬರ್!’ ಮ್ಹಳೆಂ ರಮಿನ್. ‘ಹಾಂವ್ ಫ್ರೆಶ್ ಜಾತೆಚ್ ತುಕಾ ಕೊಲ್ ಕರ್ತಾಂ!’
ಹೆಂ ಆಯ್ಕೊನ್ ಮೆಥ್ಯುಚ್ಯಾ ಮುಕಮಳಾರ್ ಉದೆಲ್ಲೆಂ ತತ್ಕಾಲಿಕ್ ಸಮಾದಾನ್ ಜೆರೊಮಾಚ್ಯಾ ದೊಳ್ಯಾಂಕ್ ಸಾಂಪಡ್ಲೆಂ. ರಿಚರ್ಡಾಕ್ ಉಗ್ತಡಾಂತ್ ಹಾಡುಂಕ್ ಯಾ ತಾಚೆರ್ ಪೊಲಿಸ್ ಫಿರ್ಯಾದ್ ಥಾಪುಂಕ್ ಮೆಥ್ಯುಕ್ ನಾಕಾಸ್ಲೆಂ, ಹಾಲಿಂಚ್ ನಾಕಾಸ್ಲೆಂ. ಪುಣ್ ಕಿತ್ಯಾಕ್ ಆನಿ ಕೆದೊಳ್ ಪರ್ಯಾಂತ್?
ರಮೋನಾ ಉಟೊನ್ ಬಿತರ್ ಗೆಲೆಂ.
ಖಾಲಿ ಜಾಲ್ಲಿಂ ಕೊಫಿ ಮಗ್ಗಾಂ ಘೆವ್ನ್ ಚಾರ್ಲ್ಸ್‌ಯಿ ಬಿತರ್ ಗೆಲೊ.
‘ತುಕಾ ಕೆದೊಳ್ ಪರ್ಯಾಂತ್ ಜಾಯ್, ತೆದೊಳ್ ಪರ್ಯಾಂತ್ ವಿಶೆವ್ ಘೆ, ಚಾರ್ಲ್ಸ್!’ ತಾಚೆ ಪಾಟಿಕ್ ಪಳೆವ್ನ್ ಮ್ಹಳೆಂ ಮೆಥ್ಯುನ್. ‘ಮ್ಹಜ್ಯಾ ನಾಸ್ಟ್ಯಾಚಿ ವಿಲೆವಾರಿ ಹಾಂವ್ಂಚ್ ಕರ್ತಾಂ.’
ಚಾರ್ಲ್ಸಾನ್ ಜಾಪ್ ದಿಲಿ ನಾ.
‘ಮ್ಹಾಕಾ ಹಾಂಗಾಸರ್ ಹೆರ್ ಕಸಲೆಂಯಿ ಕಾಮ್ ಆಸಾ?’
‘ತುಕಾ ಜಾಯ್ ತರ್ ಖಾಡ್ಕೆಕ್ ಸಾರಂವ್ಕ್ ಪೆಟ್ರೋಲಿಯುಮ್ ಜೆಲ್ಲಿ ಆಸಾ!’ ಮೆಥ್ಯುನ್ ಮ್ಹಳೆಂ. ‘ತುಕಾ ಹಾಂಗಾಸರ್ ನಾಸ್ಟೊ ಮೆಳ್ಚೊ ನಾ.’
‘ಒಸಿಸಾಂತ್ ಮ್ಹಜಿ ನವ್ಕರಿ ಉರೊನ್ ಆಸ್ತೆಲಿ?’ ವಿಚಾರ್ಲೆಂ ಜೆರೊಮಾನ್. ‘ಸಕಾಳ್ ಜಾಲೊ, ಹಾಂಗಾ ಥಾವ್ನ್ಂಚ್ ಒಸಿಸಾಕ್ ಯೆಂವ್? ಯಾ ತುಜೆ ಗೊಮ್ಟೆರ್ ಕುರಾಡ್ ಪಡ್ಚೆ ವರೇಗ್ ರಾವುಂ?’
‘ತುಂವೆಂ ಸಾಂಗ್‌ಲ್ಲೆಂ ಸತ್ ವ್ಹಯ್ ತರ್,’ ಮ್ಹಳೆಂ ಮೆಥ್ಯುನ್. ‘ರಿಚರ್ಡ್ ಮ್ಹಜೆ ಭಕೀಕ್ ಪಡ್‌ಲ್ಲೊ! My victim. ಸಮ್ಜಾಲೆಂ?’
‘ಸಮ್ಜಾಲೆಂ, ಮೆಥ್ಯು!’ ಆಪ್ಲಿಂ ಉತ್ರಾ ವಿಂಚ್‌ಲಿಂ ಜೆರೊಮಾನ್. ‘ಬರಾಬರ್, ತುಂ ಒಸಿಸಾಂತ್ಲೊ ದೇವ್, ರಿಂಗ್ ಮಾಸ್ಟರ್. ಯೆದೊಳ್ ಪರ್ಯಾಂತ್ ಹಾಂವ್ ತುಜ್ಯಾ ರಿಂಗಾಂತ್ ಚಾಟಿಯೆಚೊ ಆವಾಜ್ ಆಯ್ಕಾತಾನಾ ಧಾಂವೊಂನ್ಂಚ್ ಆಸ್‌ಲ್ಲೊಂ. ಆತಾಂ ಹಾಂವೆಂ ತುಜ್ಯಾ ಮಕ್ಸದಾ ಪರ್ಯಾಂತ್ ತುಕಾ ಹಾಡುನ್ ಹಾಂವೆಂ ಉಬೊ ಕೆಲಾ. ಹೆಂ ಮ್ಹಜೆಂ ಫಾರಿಕ್ಪಣ್ ಮ್ಹ ಸಮಜ್ ಯಾ ಮ್ಹಜ್ಯಾ ವಿಕೃತ್‌ಪಣಾಚೊ ಶಿಖರ್ ಮ್ಹಣ್ ಸಮಜ್. ಪುಣ್ ಒಸಿಸಾಂತ್ಲ್ಯಾ ದೆವಾನ್ ಆಪ್ಲಿ ಗೊಮ್ಟಿ ಮುನ್ಕುಟ್ಯಾರ್ ದವರ್ಲ್ಯಾರಿ ಕುರಾಡ್ ಉಕ್ಲೊನ್ ಘಾಲುಂಕ್ ಕೊಣಾಚಿ ಸಸಾಯ್ ಘೆತಾಯ್ ಮೆಥ್ಯು? ಖಂಡಿತ್ ತುಂ ಲೀಜಾಚ್ಯಾ ಮರ್ಣಾಕ್ ಕಾರಾಣ್ ಜಾಲ್ಲ್ಯಾ ಡೊ| ಫ್ರಾನ್ಸಿಸ್ ಕ್ಲೆಮೆಂಟಾಕ್ ತುಂ ಸೊಡಿಸೊನಾಂಯ್. ತಾಚೆ ಪರ್ಯಾಂತ್ ಪಾವೊಂಕ್ ಆಸ್ಚಿ ವಾಟ್ ಎಕ್‌ಚ್- ರಿಚರ್ಡಾಕ್ ವಿಕ್ರಿತ್‌ಪಣಾಚ್ಯಾ ಅಪ್ರಾದಾಂಚೆರ್ ಆನಿ ಹೆರ್ ಕಸಲೆಯಿ ಅಪ್ರಾದ್ ತುಜ್ಯಾನ್ ಚಿಂತುಂಕ್ ಜಾತಾ ಜಾಲ್ಯಾರ್ ಆರಾವ್ನ್ ಥಾಪ್. ವಿಕ್ರಿತ್‌ಪಣಾಚ್ಯಾ ಅಪ್ರಾದಾಂಚೆಂ ಜಾಳ್ ತುಂವೆಂಚ್ ನ್ಹಯ್ ವೊಳ್ಳಾಂಯ್. ಕಿತ್ಯಾ ಮ್ಹಂ ಮ್ಹಾಕಾ ಆನಿಕೀ ಸಮ್ಜಾಲ್ಲೆಂ ನಾ. ಪುಣ್ ಆಸುಂ. ಸರ್ವಾಂಕ್ ಆಸ್ಚೆಪರಿಂ ಕಸಲೆಂಗಿ ಎಕ್ kink ತುಕಾಯಿ ಆಸಾ ಆಸ್ತೆಲೆಂ. ನಾತ್‌ಲ್ಲೊ ತರ್ ತುಜೆ ಆನಿ ಈವಾ ಮಧೆಂ ಕಿತೆಂ ಚಲ್ಲೆಂ ತೆಂ ಆಜ್ ಪುಣಿ ಸಾಂಗ್ತೊಯ್.’
‘ಆನಿ ವಿಕೃತ್ ಕಾಮುಕ್‌ಪಣಾಕ್ ತಸಲ್ಲಿ ಮೆಳ್ತಿ?’ ವಿಚಾರ್ಲೆಂ ಮೆಥ್ಯುನ್. ‘ಈವಾ ಆನಿ ಮ್ಹಜೆ ಮದೆಂ ಕಿತೆಂ ತರಿ ಚಲ್ಲಾಂ ಮ್ಹಣ್ ಕಿತ್ಯಾಕ್ ಲೆಕ್ತಾಯ್? ಚಡ್ ಮ್ಹಳ್ಯಾರ್ ಕಿತೆಂ ಜಾಲಾಂ ಜಾವ್ಯೆತ್? ತುಂವೆಂ ಆಶೆಲ್ಲೆಂಚ್ ಜಾಲಾಂ ಆಸ್ತೆಲೆಂ.’
‘ಮ್ಹಳ್ಯಾರ್ you really screwed her?’
‘Really, Jerome! She screwed you.’ ಜಾಪ್ ದಿಲಿ ಮೆಥ್ಯುನ್. ‘That makes you happy?’
‘I will kill you, Mathew!’ ಉಟೊನ್ ಮುಕಾರ್ ಆಯ್ಲೊ ಜೆರೊಮ್. ಮೆಥ್ಯು ರಾವ್‌ಲ್ಲೆಕಡ್ಚೊ ಹಾಲ್ಲೊ ನಾ.
‘ನಾ, ಜೆರೊಮ್!’ ತಾಣೆ ಮ್ಹಳೆಂ. ‘ತುಂ ಕೊಣಾಯ್ಚೊಯಿ ಜೀವ್ ಕಾಡಿಸೊನಾಂಯ್ ಕಿತ್ಯಾಕ್ ತುಕಾ ತುಜೆಂ ಮಿಸಾಂವ್ ಆನಿ ಮಕ್ಸದ್ ಪೂರ್ಣ್ ಕರುಂಕ್ ಸರ್ವಾಂಚಿ ಗರ್ಜ್ ಆಸಾ, ಚಡ್ ಕರುನ್ ಮ್ಹಜಿ!’
‘ಆಮ್ಕಾಂ ಯೆಕಾಮೆಕಾಚಿ ಗರ್ಜ್ ಆಸಾ, ಮೆಥ್ಯು!’ ಮ್ಹಳೆಂ ಜೆರೊಮಾನ್. ‘ಉಡಾಸಾಂತ್ ಆಸುಂ! ಹಿ ಎಕ್ ಚೆತಾವ್ಣಿ. ಉಡಾಸಾಂತ್ ಆಸುಂ ಹ್ಯಾ ಸರ್ಕಸಾಂತ್ ಆಸ್ಚ್ಯಾ ಸರ್ವ್ ಖೆಳ್ಘಾಡ್ಯಾಂಚೊ, ಯೆಂವ್ಕ್ ಆಸ್ಚ್ಯಾ ರಾಜಕೀಯ್ ವಿಂಚ್ಣುಕೆಚೊ ಆನಿ ಆನಿಕಿ ಉಗ್ತಡಾಂತ್ ಯೆನಾಶೆಂ ತುಂವೆಂ ಆನಿ ಹಾಂವೆಂ ದಾಂಬೂನ್ ಆನಿ ದಾಂಪೂನ್ ದವರ್‌ಲ್ಲ್ಯಾ ಸತಾಂಚೊ ಘಡಿತಾಂಚೊ. ಉಡಾಸ್ ದವರ್ ಮೆಥ್ಯು, ಆಮಿ ಆಮ್ಚ್ಯಾ ಲಿಬಾಸಾಂ ಬಿತರ್ ಸರ್ವ್ ವಿಣ್ಗೆಚ್. ತುಂವೆಂ ಸಾಂಗ್ಚೆಂ ಸಾರ್ಕೆಂ. ಹಾಂವ್ ಕೊಣಾಯ್ಚೊಯಿ ಜೀವ್ ಕಾಡಿಸೊ ನಾ. ತಿತ್ಲೆಂ ಧಯ್ರ್ ಮ್ಹಾಕಾ ನಾ. ಈವಾ ವಿಶಾಂತ್ ಹಾಂವೆಂ ಆಯ್ಕೊಂಕ್ ಆಶೆಲ್ಲೆಂ ಕಾಂಯ್ ಕಿತೆಂ ಹಾಂವ್ ನೆಣಾಂ ಪುಣ್ ಜಾಣಾಂ ಜಾಲ್ಲೊ ತರಿ ಕಿತೆಂಚ್ ಕರ್ತೊಂ ನಾ.’
ಮೆಥ್ಯು ಹಾಸ್ಲೊ.
‘ಈವಾಕ್ ಭಯ್ಣ್ ಮ್ಹಣ್ಂಚ್ ಲೆಕ್ತೊಯ್!’ ತಾಣೆ ಮ್ಹಳೆಂ, ಸಿಗಾರ್ ವಿಂಚುಂಕ್ ಗೆಲ್ಲೊ ಆಪ್ಲೊ ಹಾತ್ ಪಾಟಿಂ ಹಾಡುನ್. ‘ಉಡಾಸ್ ಕರ್ ಮೌರಿಸ್ ಆಗುಸ್ತಿನಾಚಿಂ favorite ಉತ್ರಾಂ: ಮ್ಹಜಿ ದೋಸ್ತಿ ಸಾಂಬಾಳ್, ಭುರ್ಗ್ಯಾ! ಉಪ್ಕಾರಾಕ್ ಪಡ್ತೆಲಿ. ಆತಾಂ, ಮ್ಹಾಕಾ ಹೆರ್ ವಾಟ್ ದಿಸಾನಾಂ, ಮ್ಹಜ್ಯಾ ರಿಂಗಾಂತ್ ಆಸ್ಚ್ಯಾ ಸರ್ವಾಂಚೆ ಗಲೀಜ್ ಹಾತ್ ಹಾಂವೆಂ ಧರಿಜೆ ಪಡ್ತೆಲೆ.’
‘The great Mathew Leo is defeated ಅಶೆಂ ಮಾಂದ್ತಾಯ್ ತುಂ?’ ವಿಚಾರ್ಲೆಂ ಜೆರೊಮಾನ್. ‘ಫಿಕ್ರ್ ನಾಕಾ, ಮೆಥ್ಯು! ಹಾಂವ್ ಆಸಾಂ ತುಜೆ ಬಗ್ಲೆನ್. ಮ್ಹಾಕಾ ಕಿತೆಂಚ್ ನಾಕಾ. ಮ್ಹಜ್ಯಾ ಹೈಡ್ರೊಸಿಲಾ ಸಾಮ್ಕಾರ್‍ಚೆಂ ಬೇಗ್ ತುಂವೆಂ ಕಾಡ್ಲೆಂಯ್ ಆನಿ ಮ್ಹಾಕಾ ಉಗ್ತಡಾಂತ್ ಹಾಡ್ಲೊಯ್. ಹಾಚೆಂ ದೆವೆಂ ಹಾಂವ್ ಫಾರಿಕ್ ಕರ್ತೊಲೊಂ, ಇಂಚಾನ್ ಇಂಚ್, ಖಿಣಾನ್ ಖಿಣ್. ಅಶೆಂ ಕರುಂಕ್ ಮ್ಹಾಕಾ ಆಡಾಯ್ತಾಲೊ ಕೋಣ್ಂಚ್ ನಾ, ಮೆಥ್ಯು. ತುಂವೆಂ, ತುಜಿಂ ಸರ್ವ್ ತುರುಫಾಂ ಹೊಗ್ಡಾಯ್ಲ್ಯಾಂಯ್. ಆತಾಂ ಪಯ್ಲ್ಯಾನ್ ತುಂ ಕೊಣಾಚೊ ಗಲೀಜ್ ಹಾತ್ ಧರುಂಕ್ ತುಕಾ ಜಾಯ್?’
ಕಿತ್ಲಿಂ ಖಿಣಾಂ, ಮಿನುಟಾಂ, ಘಂಟೆ ಯಾ ಯುಗಾಂ ಪಾಶಾರ್ ಜಾಲಿಂ ತೆಂ ಮೆಥ್ಯುಕ್ ಹಿಸಾಬ್ ನಾತ್‌ಲ್ಲೆಂ.
ತಾಚಿ ಯಾದ್ ಮೂನ್‌ಬೀಮ್ ಇನ್ಸಿಟಿಟ್ಯೂಟಾಕ್ ಪಾಟಿಂ ಗೆಲಿ.
ಲೀಜಾ
ಆಪ್ಲ್ಯಾ ಜಿಣಿಯೆಂತ್ಲಿ ಚಾರಿತ್ರಿಕ್ ಘಡಿ ಹ್ಯಾ ಇನ್ಸ್‌ಟಿಟ್ಯೂಟಾಚ್ಯಾ ರುಕಾ ಪಂದಾಕ್‌ಚ್ ಉದೆಜೆ?
ತಾಚಿ ದೀಷ್ಟ್ ಎಲಿಜಾಚೆರ್ ಚರ್‍ಲಿ, ಜಶೆಂ ಎಕಾ ವಯ್ಜಾನ್ ಪಿಡೇಸ್ತಾಕ್ ಊಬ್ ದಿಂವ್ಚಿ ಮುಲಾಮ್ ಪುಸ್ಚೆಪರಿಂ. ಲೀಜಾಚ್ಯಾ ಪೊಲ್ಯಾಂಚೆರ್ ತಾಂಬ್ಸಾಣ್ ಚರ್‍ಚಿ ಮೆಥ್ಯುಚ್ಯಾ ಗಮನಾಕ್ ಗೆಲಿ. ಆಪ್ಣಾಚ್ಯಾಚ್ ಜಿನೊಸಾಚೆರ್ ಕಸಲೊ ಜಾದೂ ಚಲ್ಲಾ ತೊ ತಾಕಾಚ್ ಕಳಿತ್ ಜಾಲೊ ನಾ.
‘ಸಂಸಾರಾಂತ್ ಮೋಗ್ ಮ್ಹಳ್ಳೊ ಆಸಾತರ್, ತೊ ಆಮಿ ಕರ್ಯೆತ್!’ ತಾಣೆಂ ಮ್ಹಳೆಂ. ‘ಪುಣ್ ಹಾಂವ್ಂಚ್ ನೆಣಾಂ, ಮೋಗ್ ಮ್ಹಳ್ಯಾರ್ ಕಿತೆಂ ತೊ.’
‘ಸೊದಾಪ್ ಕರುಂಕ್ ಸಗ್ಳಿ ಜೀಣ್ ಸಾಮ್ಕಾರ್ ಆಸಾ!’ ಲೀಜಾ ಮ್ಹಳೆಂ, ದೋನ್ ಮೆಟಾಂ ಲಾಗಿಂ ಸರೊನ್. ‘ಆಮಿ ಯೆಕಾಚಾಣೆ ದರ್ವಡ್ ನಾಂವ್ ಮೆಥ್ಯು?’
‘ಇತ್ಲೊ ತೇಂಪ್ ಪಾಟಿಂ ರಾವ್ಲ್ಯಾ ಉಪ್ರಾಂತ್ ಆತಾಂ ದರ್ವಡ್ ಕಸಲೊ, ಲೀಜಾ?’
‘ಮತ್ಲಬ್?’
‘ಇತ್ಲ್ಯಾ ವರ್ಸಾಂ ಥಾವ್ನ್ ಆಮಿ ಯೆಕಾಮೆಕಾ ಬಿಲ್ಕುಲ್ ವಳ್ಕಾನಾಂವ್ ಪುಣ್ ಯೆಕಾಮೆಕಾ ಜಾಣಾಂವ್!’
ಕಸಲೊಗಿ ಎಕ್ ಗುಪ್ತ್ ಸೊಲ್ಲೊ ತಾಂಚೆ ಮದೆಂ ಜಾಲ್ಲೆಪರಿಂ ತಿಂ ಭಾಯ್ರ್ ಆಯ್ಲಿಂ ಆನಿ ಸಾಸಾಂಗಾತಾಚ್ ಮೆಟಾಂ ಕಾಡುಂಕ್ ಲಾಗ್ಲಿಂ. ಕಿತ್ಲೆಂ ಆನಿ ಖಂಯ್ ಪರ್ಯಾಂತ್ ತಿಂ ಚಲ್ಲಿಂ ತೆಂ ತಿಂಚ್ ನೆಣಾಂ ಜಾಲಿಂ. ತಾಂಚೆ ಮದೆಂ ಖಳ್ಮಿತ್ ನಾತ್‌ಲ್ಲೆಂ ಉಲವ್ಣೆಂ ಚಾಲು ಆಸ್ಲ್ಲೆಂ; ವರ್ಸಾಂ ಉಪ್ರಾಂತ್ ಭೆಟ್‌ಲ್ಲ್ಯಾ ದೊಗಾಂಪರಿಂ ತಿಂ ಉಲವ್ನ್ಂಚ್ ಆಸ್‌ಲ್ಲಿಂ, ಚಲ್ತಾಲಿಂ…
“ತುಜೊ ಹಾತ್!’ ಮೆಥ್ಯುನ್ ಉತ್ರಾಂ ಚಾಬ್ಲಿಂ. ‘ಮ್ಹಜ್ಯಾ ಲೀಜಾ ಖಾತಿರ್…ತುಜೊ ಹಾತ್!’ ತಾಣೆ ಆಪ್ಲೊ ಉಜ್ವೊ ಹಾತ್ ಮುಕಾರ್ ಹಾಡ್ಲೊ.
(ಅವಸ್ವರ್ – 85 – ಂತ್ ಮುಂದರ್‍ತಾ)
