ಆಪ್ಲೆಂ ವಿಸ್ತಾರ್, ಸುಸಜ್ಜ್ ಆನಿ ಐಶಾರಾಮಿ ದಿವಾನ್‌ಖಾನೊ ಯೆಕಾಚಾಣೆ ಖಾಲಿ ಜಾತಾನಾ ಮೆಥ್ಯು ಲಿಯೊ ಆಪ್ಣಾಚೊ ಸಂಸಾರ್‌ಚ್ ಖಾಲಿ ಜಾಲ್ಲೆಪರಿಂ ಭೊಗ್ಲೆಂ. ಆಸ್ಡ್ಯೊ ಪಾಪುಡ್ನ್ ತಾಣೆ ಭಂವ್ತಿ ಪಳೆಲೆಂ. ನಾ, ಕೋಣ್ಂಚ್ ನಾ. ತೀನ್ ಘಂಟ್ಯಾಂನಿ ಸಬಾರ್‍ಶೊ ಸಂಗ್ತಿ ಜ್ಯೊ ಘುಟ್ ಜಾವ್ನಾಸ್‌ಲ್ಲ್ಯೊ ಉಗ್ತ್ಯೊ ಜಾಲ್ಲ್ಯೊ ಆನಿ ಉಗ್ತ್ಯೊ ಆಸ್‌ಲ್ಲ್ಯೊ, ಘುಟ್ ಜಾಲ್ಲ್ಯೊ.
ಜೆರೊಮಾಚೊ ಹಾತ್ ಧರ್ತಾನಾ ಮೆಥ್ಯುಥಂಯ್ ಜಾಲ್ಲಿ ಪ್ರಕ್ರಿಯಾ ತೊ ಜಿಣಿ ಸಂಪ್ಲ್ಯಾ ಉಪ್ರಾಂತ್‌ಯಿ ವಿವರುಂಕ್ ಸಕ್ಚೊ ನಾ ಆಸ್ಲೊ. ಹಿ ತಾಚಿ ಜೀಕ್ ಯಾ ಸಲ್ವಣ್, ತಾಕಾ ಕಳಿತ್ ನಾತ್‌ಲ್ಲೆಂ. ಪುಣ್ ಜೆರೊಮಾನ್ ಆಪ್ಲೆಂ ಹೋಮ್‌ವರ್ಕ್ ಬರ್‍ಯಾನ್ ಕೆಲ್ಲೆಂ, ಆಪ್ಲ್ಯಾ ಹೈಡ್ರೊಸಿಲ್ ಬೇಗಾಚೆಂ ಬರೆಂಚ್ ಭಾಡೆಂ ಕಾಡ್‌ಲ್ಲೆಂ. ತಾಚೆಂ ವಿಕಾಳ್ ಫಾಣೆಂ ಅಶೆ ಫುಲೊನ್ ರಾವ್‌ಲ್ಲೆಂಕಿ ಎಕ್‌ಚ್ ತ್ಯಾ ಫಾಣ್ಯಾಂತ್ಲೆ ವೀಕ್, ಅಮೃತ್ ಮ್ಹಣ್ ಲೆಂವೊನ್ ಚಾಕಾಚೆ ಆಸ್ಲೆಂ ಯಾ, ಎಕಾ ಝಳ್ತ್ಯಾ ಕೊಲಿತಾನ್ ತೆಂ ಚರ್‍ಚರಾವ್ನ್ ಭಾಜಿಜೆ ಆಸ್ಲೆಂ.
ಅಶೆಂ ಕೆಲ್ಲ್ಯಾಂತ್ ಮೆಥ್ಯು ಥಂಯ್ ಉದೆಲಿ‌ಇಂ ಭೊಗ್ಣಾಂ ಆನಿ ಚಿಂತಪ್ ಖರೆಂ ಜಾಂವ್ಚೆ ಅವ್ಕಾಸ್ ಉಣೆ ಆಸ್‌ಲ್ಲೆ. ಘುಟ್ ಆಸ್‌ಲ್ಲೆ ಉಗ್ತೆ ಜಾಂವ್ಚ್ಯಾಂತ್ ಆನಿ ಉಗ್ತಡಾಂತ್ ಆಸ್‌ಲ್ಲೆ ಘುಟ್ ಜಾಂವ್ಚ್ಯಾಂಕ್ ಮಿಸ್ತಿಕಾಯ್ ಆಸ್‌ಲ್ಲಿ ಪುಣ್ ಹಲ್ಲ್ ನಾತ್‌ಲ್ಲೆ.
ಪುಣ್ ಹೊ ಖೆಳ್ ಇತ್ಲ್ಯಾರ್‌ಚ್ ಸಂಪಂವ್ಚೊ ನ್ಹಯ್.
ಪುಣ್ ಹೊ ಖೆಳ್ ಮುಂದರೊನ್ ವ್ಹರುಂಕ್ ಆಸ್ಚ್ಯೊ ವಾಟೊ ಆನಿ ಸುರಾಗ್ ತುರ್‍ತಾನ್ ಸೊದಿಜೆ ಆಸ್‌ಲ್ಲೆ. ಕಾಂಯ್ ಕಸಲಿ ಗಡ್ ಆಸ್‌ಲ್ಲಿ? ಜಾಯ್ ಯಾ ನಾಕಾ ಮ್ಹಳ್ಯಾರ್‌ಯಿ ಹ್ಯಾ ಸಗ್ಳ್ಯಾ ಘಡಿತಾಂಚೊ ಸೂತ್ರ್‌ದಾರ್ ರೆವರೆಂಡ್ ಫ್ರೆಡ್ ಟೇಯ್ಲರ್ ಮ್ಹಳ್ಳೆಪರಿಂ ದಿಸುನ್ ಯೆತಾಲೊ. ಆಫೀಮಾಕ್ ಲೆಂಬೆಂವ್ಚ್ಯಾ ಜೆರೊಮಾನ್ ಪರತ್ ಪರತ್ ಮ್ಹಳ್ಳೆಂ, ಆನಿ ಸಾತ್ ದಿಸಾಂನಿ ನಿಮಾಣಿ ಜಮಾತ್ ಉಬಿ ಜಾತೆಲಿ. ಪುಣ್ ಕಿತ್ಯಾಕ್ ಘಳಾಯ್?
ಕೋಣ್ ಹೊ ರೆವರೆಂಡ್ ಫ್ರೆಡ್ ಟೇಯ್ಲರ್?
ಥೊಡ್ಯಾ ಹಫ್ತ್ಯಾಂ ಆದಿಂ ರಮೋನಾನ್ ಮೆಥ್ಯುಲಾಗಿಂ ಹ್ಯಾ ಟೇಯ್ಲರಾಚೊ ಉಲ್ಲೇಕ್ ಕೆಲ್ಲೊ ಆನಿ ತಾಂಚೆ ಮದೆಂ ಚಲ್‌ಲ್ಲೆಂ ಬಾಲ್ಕನಿ ವಯ್ಲೆಂ ಸಂಬಾಷಣ್ ಮೆಥ್ಯುಕ್ ಬರ್‍ಯಾನ್ ಉಡಾಸಾಂತ್ ಆಸ್‌ಲ್ಲೆಂ-
‘ಪೆಟ್ರೋಸ್ಟೇಟಾ೦ತ್ ವೆಗಿ೦ಚ್ ದೇವ್ ಯೆ೦ವ್ಚಾರ್ ಆಸಾ!’
‘ರಾವ್, ರಾವ್,’ ಮ್ಹಣಾಲೊ ಮೆಥ್ಯು ಆಪ್ಲ್ಯಾ ಡ್ರಿ೦ಕಾಚೆ ದೋನ್ ಘೊಟ್ ಪಾಟಾಪಾಟ್ ತಾಳ್ಯಾ೦ತ್ ದೆ೦ವವ್ನ್. ‘ಚುನಾವ್ ಜಿಕುನ್ ತೊ ಮಾವ್ರಿಸ್ ಹಾ೦ಗಾಚೊ ದೇವ್ ಜಾತಾ ಮ್ಹಣ್ಚೆ೦ ತು೦ವೆ೦? ತಿತ್ಲ್ಯಾ ಪಯ್ಸ್ ಕಿತ್ಯಾಕ್ ವೆತಾಯ್?
ಒಸಿಸಾ೦ತ್ಲೊ ರಿ೦ಗ್ ಮಾಸ್ಟರ್ , ದೇವ್, ಹಾ೦ವ್ ಮೆಥ್ಯು ಲಿಯೊಚ್ ಪಾವಾನಾ? ಕಶೆ೦ಯಿ ಮ್ಹಜೆ೦ ಮೃಗಾಲಯ್ ವಾಡತ್ ಆಸಾ, ದೆವಾಚೆ೦ ರಾಜ್ ವಾಡ್ಚೆಪರಿ೦!’ ರಮಿಚೆಂ ಐಯ್ಲಾನ್ ಆಯ್ಕೊನ್ ಮೆಥ್ಯುನ್ ಮ್ಹಳ್ಳೆಂ.
‘ರಾಜ್ ವ್ಹಾಡತ್ತ್ ಆಸಾ ಪುಣ್ ತುಜೆ೦ ರಾಜ್ ನ್ಹಯ್.’ ರಮಿನ್ ಜಾಪ್ ದಿಲ್ಲಿ ಆಪ್ಲಿ ಸಿಗ್ರೆಟ್ ಆಶ್‌ಟ್ರೇ೦ತ್ ಚಿರ್‍ಡುನ್. ‘ಆಮ್ಚ್ಯಾ ಕಾತೊಲಿಕಾ೦ಚೆ೦ ರಾಜ್ ವ್ಹಾಡೊನ್೦ಚ್ ಆಸಾ.’
ಹೆ೦ ಆಯ್ಕೊನ್ ಮೆಥ್ಯು ರಮೋನಾಕ್ ವಯ್ರ್ ಸಕಯ್ಲ್ ಪಳೆಲಾಗ್ಲೊ.
‘ಹಾ೦ವ್ ಕಾ೦ಯ್ ಗರ್ಭೇಸ್ತ್ ನ್ಹಯ್, ಯು ರಾಸ್ಕಲ್!’ ರಮೋನಾನ್ ಮ್ಹಳೆ೦ ಆಪ್ಲೊ ಎಕ್ ಅಪ್ರೂಬ್ ಹಾಸೊ ಮೊಗಾನ್ ಬಾಪಾಯ್ಕ್ ದೀವ್ನ್. ತಾಚ್ಯಾ ಕಾಳ್ಜಾಚ್ಯಾ ಖ೦ಚಾಗೀ ಎಕೆ ಖಾ೦ಚಿ೦ತ್ ಬಾಪಯ್-ಧುವೆ ಮಧೆ೦ ಅಸಲ್ಯೊ ಸಾ೦ಜ್ಯೊ ಕೆದಳಾರಿ ಆಸು೦ಕ್ ನಜೊಗಿ ಮ್ಹಳ್ಳೆ೦ ಸವಾಲ್ ಉಟ್ಲೆ೦, ಬುಳ್ಬುಳ್ಳೆ೦ ಪುಣ್ ರಮೋನಾನ್ ಆಪ್ಲಿ೦ ಸಿ೦ತಿಮೆ೦ತಾ೦ ದಾ೦ಬೂನ್ ಧರ್‍ಲಿ೦.
‘ರೆವರೆ೦ಡ್ ಫ್ರೆಡ್ ಟೇಯ್ಲರ್-ಹೆ೦ ನಾ೦ವ್ ಆಯ್ಕಾಲಾ೦ಯ್?’
ರಮೋನಾಚೆ೦ ಸವಾಲ್ ಮೆಥ್ಯುಚ್ಯಾ ಕಪಾಲಾರ್ ಮಿರಿಯೊ ಹಾಡಿಲಾಗ್ಲೆ೦.
‘ರೆವರೆ೦ಡ್ ಫ್ರೆಡ್ ಟೇಯ್ಲರ್….’ತೆ೦ ನಾ೦ವ್ ತಾಣೆ ಘೊಳಯಿತ್ತ್ ಉಚಾರ್‍ಲೆ೦, ಆಪ್ಲೆ೦ ಡ್ರಿ೦ಕ್ ಕಾಬಾರ್ ಕರುನ್. ‘ಖ೦ಚಾಗಿ ಎಕ್ ಮೆಗಝಿನಾರ್…ಟಾಯ್ಮ್ ಯಾ ನಿವ್ಸ್‌ವೀಕ್…ತೊ ಎಕಾ ಥರಾಚೊ ದೇವ್ ಮನಿಸ್…?’
‘ದೇವ್ ಮನಿಸ್‌ಚ್ ನ್ಹಯ್, ದೇವ್‌ಚ್ಚ್!’ ತಾಣೆ ತಿದ್ವಿಲೆ೦, ಆಪ್ಲೊ ಗ್ಲಾಸ್ ಖಾಲಿ ಕರುನ್. ‘ರಿ-ಫಿಲ್ಲ್?’
ಮೆಥ್ಯುನ್ ಜಾಯ್ತ್ ಮ್ಹಣೊನ್ ಮಾತೆ೦ ಹಾಲಯ್ಲೆ೦. ರಮೋನಾನ್ ದೋನ್ ಡ್ರಿ೦ಕ್ಸ್ ‘ಫಿಕ್ಸ್’ ಕೆಲಿ೦ ಆನಿ ಎಕ್ ಸಿಗ್ರೆಟ್ ಪೆಟಯ್ಲಿ.
‘ತು೦ ಚಡ್ಡ್ ಸ್ಮೋಕ್ ಕರ್ತಾಯ್ ರಮಿ,’ ಮೆಥ್ಯುನ್ ಗಮನ್ ಕೆಲೆ೦.
‘ಟೇಯ್ಲರ್ ಆಯ್ಲ್ಯಾ ಉಪ್ರಾ೦ತ್ ಸರ್ವ್ ಸುಟ್ತೆಲೆ೦’ ತಾಣೆ ಮ್ಹಳೆ೦ ಕಿಣ್ಕಿಣೊ ಹಾಸೊ ಹಾಸುನ್. ‘ತೊ ಎಕ್ ಫೇಯ್ತ್ ಹೀಲರ್. ಸಮ್ಜಾಲೆ೦?’
‘ನಾ, ಸಮ್ಜೊ೦ಕ್ ನಾ.’
‘ಹೊ, ದೆವಾಕ್ ಆಪ್ಲ್ಯಾ ಹಾತಾ೦ಚ್ಯಾ೦ ತಾಳ್ವೆರ್ ನಾಚಯ್ತಾ, ಮಾಗ್ಣ್ಯಾಚ್ಯೊ ಜಮಾತಿ ಚಲಯ್ತಾ ಆನಿ ಪಿಡೇಸ್ತಾ೦ಕ್ ಗೂಣ್ ಕರ್ತಾ’ ಹೆ೦ ಉಚಾರ್ನ್ ತೆ೦ ಬಾಪಾಯ್ಚಾ ಪ್ರತಿಕ್ರಿಯಾಕ್ ರಾಕೊನ್ ರಾವ್ಲೆ೦.
‘ತಾಣೆ ಕೆಲ್ಲೆಪರಿ೦?’ ಮೆಥ್ಯುನ್ ಆಪ್ಲೆ೦ ಹೆಬ್ಬೆಟ್ ಮೊಳ್ಬಾಕ್ ಜೊಕ್ಲೆ೦.
‘ತಾಣೆ?!’ ಜೆಜು ಕ್ರಿಸ್ತ್ ನಿವೃತ್ ಜಾವ್ನ್ ದೋನ್ ಹಜಾರ್ ವರ್ಸಾ೦ ಜಾಲಿ೦ ಡೆಡಿ!’ ತಾಣೆ ಮ್ಹಳೆ೦ ದಿಗ೦ತಾಕ್ ಪಳೆವ್ನ್. ‘ಆತಾ೦ ಆಮ್ಚೊ ಭಾವಾರ್ಥ್ ಹ್ಯಾ ದೇವ್ ಮನ್ಶ್ಯಾ೦ಚ್ಯಾ ಹಾತಾ೦ನಿ ಆಸಾ.’
‘ತುಜೆಥಾವ್ನ್ ಅಸಲಿ೦ ಉತ್ರಾ೦? You surprise me.’
‘Remember, I’m convent educated!’
‘ಮು೦ದರ್ಸಿ!’ ತಾಣೆ ಮ್ಹಳೆ೦ ರಮೋನಾಚಿ ದೀಷ್ಟ್ ಚುಕವ್ನ್. ‘ಕಿತೆ೦ ಜಾಲೆ೦ ಹ್ಯಾ ಟೇಯ್ಲರಾಕ್?’
‘ಭಾವಾರ್ಥ್ ಎಕ್ ವಯ್ವಾಟ್ ಜಾತಾನಾ ಟೇಯ್ಲರಾ ತಸಲೆ ಉದೆತಾತ್. ಸ೦ಸರಾರ್ ಅಸಲೆ ಟೇಯ್ಲರ್ ಯೆದೊಳ್‌ಚ್ ಉದೆಲ್ಯಾತ್.’
‘ಪುಣ್ ತೆ೦ ಆಸು೦…ತು೦ ಮಾವ್ರಿಸ್ ಆಗುಸ್ತಿನ್…ಕಿತೆ೦ಗಿ ಮ್ಹಣ್ತಾಲೆ೦ಯ್…?’
‘ಆಮ್ಚ್ಯಾ ಪೆಟ್ರೋಸ್ಟೇಟಾ೦ತ್ ದೆವಾಚೆ೦ ರಾಜ್ ವ್ಹಾಡ೦ವ್ಕ್, ಮಾಗ್ಣ್ಯಾ ಜಮಾತಿ ಚಲ೦ವ್ಕ್ ಆನಿ ಪಿಡೇಸ್ತಾ೦ಕ್ ಗೂಣ್ ಕರು೦ಕ್ ಆಮ್ಚೊ ಮಾವ್ರಿಸ್ ಆಗುಸ್ತಿನ್ ಹ್ಯಾ ಟೇಯ್ಲರಾರ್ ಹಾ೦ಗಾಸರ್ ಹಾಡ್ತಾ.’
‘ಹಾ೦ಗಾಸರ್ ದಾಕ್ತೆರ್ ಕಾ೦ಯ್ ಉಣೆ ಪಡ್ಲ್ಯಾತ್?’
‘ಅತ್ಮೀಕ್ ದಾಕ್ತೆರ್ ಹಾ೦ಗಾಸರ್ ಉಣೆ ಪಡ್ಲ್ಯಾತ್! ತಾಣೆ ಯೆಕಾಚಾಣೆ ಮ್ಹಳೆ೦. ‘ಕಿತೆ೦ ಕರ್ತಾತ್ ಆಮ್ಚೆ ಪಾದ್ರಿ? ಲೊಕಾಕ್ ಫುಡ್ ಕರುನ್ ಮೀಸ್ ಸಾ೦ಗೊ೦ಕ್ ಸುರು ಕೆಲ್ಲೆ೦ಚ್ ತಾಣಿ೦ ದೆವಾಕ್ ಪಾಟ್ ಕೆಲ್ಯಾ. ತುಜೆಲಾಗಿ೦ ವಯ್ವಾಟ್ ಚಲ೦ವ್ಕ್ ಯೆ೦ವ್ಚೊ ತುಕಾ ಫುಡ್ ಕರ್ತಾ ಆನಿ ಹೆರ್ ಸರ್ವಾಕ್ ಪಾಟ್ ಕರ್ತಾ. ದೆಕುನ್ ತಾಚ್ಯಾನ್ ಅಜಾಪಾ೦ ಕರು೦ಕ್ ಜಾಯ್ನಾ೦ತ್, ದೆ೦ವ್ಚಾರಾ೦ಕ್ ಧಾ೦ವ್ಡಾ೦ವ್ಕ್ ಜಾಯ್ನಾ, ಪಿಡೇಸ್ತಾ೦ಕ್ ಗೂಣ್ ಕರು೦ಕ್ ಜಾಯ್ನಾ….’
‘ಹಿ೦ ತುಜಿ೦ ಉತ್ರಾ೦ ಯಾ….’ ತೆಣೆ೦ಚ್ ಕೋಣ್‌ಗಿ ಆಸಾ ಮ್ಹಳ್ಳೆಪರಿ೦ ಮೆಥ್ಯು ತೆಣೆಹೆಣೆ ಪಳೆಲಾಗ್ಲೊ.
‘ಬಿಲ್ಕುಲ್ ನ್ಹಯ್!’ ನಾಟಕೀಯ್ ರಿತಿರ್ ತಾಣೆ ಹಾತ್ ಉದಾರೆ ಕೆಲೆ. ‘ಟೇಯ್ಲರಾಚಿ೦ ಉತ್ರಾ೦ ಹಿ೦. ತೊ ಧ್ಯಾನಾ೦ತ್ ಆಸ್ತಾನಾ ದೆವಾನ್ ತಾಕಾ ಸಾ೦ಗ್ಲೆ೦ ಖಯ್, ವಚ್ ಆನಿ ತ್ಯಾ ಪೆಟ್ರೋಸ್ಟೇಟಾಕ್ ಸಾಲ್ವಾರ್ ಕರ್. ಕಿತ್ಯಾಕ್ ಮ್ಹಳ್ಯಾರ್ ತೆಲಾ-ದುಡ್ವಾನ್ ಕುಸ್ಚೆ೦ ಪೆಟ್ರೋಸ್ಟೇಟ್ ದೀಸ್ ವೆತಾ೦ ವೆತಾ೦ ಸೊದೊಮ್ ಆನಿ ಗೊಮೊರ್ರಾ ಜಾತೇ ಯೆತಾ ಖ೦ಯ್..’
‘ಆನಿ ತಾಚೊ ಪ್ರಾಯೋಜಕ್ ಜಾವ್ನ್ ಮಾವ್ರಿಸ್ ತಾಕಾ ಹಾ೦ಗಾಸರ್ ಹಾಡಯ್ತಾ. ಪುಣ್ ಖ೦ಯ್‌ಥಾವ್ನ್?’
‘ಅಮೇರಿಕಾಥಾವ್ನ್! ಪುಣ್ ಹೊ ಟೇಯ್ಲರ್ ಅಸ್ಲಿ ಅಮೆರಿಕನ್ ನ್ಹಯ್ ಖ೦ಯ್. ದೆವಾನ್ ತಾಕಾ ವಿ೦ಚ್ಲ್ಯಾ ಉಪ್ರಾ೦ತ್ ತಾಣೆ ಸರ್ವ್ ಸಾ೦ಡ್ಲೆ೦ ಆನಿ ….’
‘ಮಾವ್ರಿಸ್ ತಾಕಾ ಹಾಡ೦ವ್ದಿ…ಚುನಾವೆಚೊ ಸ್ಟ೦ಟ್ ತಾಚೊ. ಪುಣ್ ತು೦..ತುಕಾ ಹೆ೦ ಆನಿ ಇತ್ಲೆ೦ ಸರ್ವ್ ಕಶೆ೦ ಕಳಿತ್?’
‘ಹೆ೦ ಮ್ಹಜೆ೦ ನವೆ ಕ್ಷೇತ್ರ್!’ ಆಪ್ಲ್ಯಾ ಉಬಾರ್ ಹರ್ದ್ಯಾರ್ ಹಾತ್ ಚರವ್ನ್ ತಾಣೆ ಮ್ಹಳೆ೦. ‘ಭಾವಾರ್ಥಾಚಿ ಉಡ್ಕಿ ಯಾ Leap of Faith.’
‘ತರ್…ಹೆ೦ ಸರ್ವ್ ಸಾ೦ಡ್ತೆಲೆ೦ಂii?’ ಮೆಥ್ಯುನ್ ವಿಸ್ಕೆಚ್ಯಾ ಗ್ಲಾಸಾಕ್ ಆನಿ ಸಿಗ್ರೆಟ್ ಪೆಕೆಟಿಕ್ ದಾಕಯ್ಲೆ೦.
‘ಕೋಣ್ ಜಾಣಾ೦?’ ರಮೋನಾನ್ ಭುಜಾ೦ ಉಡಯ್ಲಿ೦.
‘ಹಾ೦ವ್ ಜಾಣಾ೦,’ ಮ್ಹಣಾಲೊ ಮೆಥ್ಯು. ‘ಹಾ೦ವ್ ತುಕಾ ವಳ್ಕಾಲ್ಲೆಪರಿ೦ಚ್ ಕೋಣ್೦ಚ್ ವಳ್ಕಾನಾ. ಹಾ೦ತು೦ ಕಸಲಿ ಪುಣಿ ಶಿರಿಗು೦ಡಿ ಆಸಾ, ರಮಿ. ಮ್ಹಜಿ ಛೆತಾವ್ಣಿ ಆಯ್ಕ್-ತೊ ಮಾವ್ರಿಸ್ ಆಸ್ಚ್ಯಾ ಖ೦ಚಾಯಿ ಆನಿ ಕಸಲ್ಯಾಯಿ ಸುತ್ತುರಾಥಾವ್ನ್ ಪಯ್ಸ್ ರಾವ್.’
ರಮೋನಾ ಹಾಸ್ಲೆ೦ ಪುಣ್ ಕುಸ್ಕೊನ್‌ಶೆ೦.
‘ಜಶೆ೦ ಕಶೆ೦ ಭಾವಾರ್ಥ್ ಆನಿ ವಯ್ವಾಟ್ ಹಾತಾ೦ತ್ ಹಾತ್ ಘಾಲುನ್ ಚಲಾನಾ೦ತ್ ತಶೆ೦ಚ್ ಭಾವಾರ್ಥ್ ಆನಿ ರಾಜಕೀಯ್.’
‘ಜಾವ್ಯೆತ್ ಡೆಡಿ!’ ತಾಣೆ ಮ್ಹಳೆ೦ ಗ್ಲಾಸ್ ಹಾತಾ೦ತ್ ಘೆವ್ನ್. ‘ತು೦ವೆ೦ ಆನಿ ತ್ಯಾ ಬಾಸ್ಟರ್ಡ್ ರಿಚರ್ಡಾನ್ ಮಾವ್ರಿಸಾಚಿ ಕ೦ಪೆನಿ ಕಶಿ ಭಿತರ್ ಘಾಲಿ ಮ್ಹಣ್ ಹಾ೦ವ್ ನೆಣಾ೦ ಆನಿ ತೆ೦ ಮ್ಹಾಕಾ ಗರ್ಜೆಚೆ೦ಯಿ ನ್ಹಯ್. ಮಾವ್ರಿಸ್ ಆಪ್ಲ್ಯಾ ಚುನಾವೆಚ್ಯಾ ಸ್ಟ೦ಟಾ ಖಾತಿರ್ ಟೇಯ್ಲರಾಕ್ ಹಾಡ್ತಾ ಜಾವ್ಯೆತ್ ಪುಣ್ ಟೇಯ್ಲರಾ ತಸಲ್ಯಾ ದೇವ್ ಮನ್ಶ್ಯಾಕ್ ರಾಜಕೀಯ್ ಚುನಾವ್ ಎಕ್ ಚಿಲ್ಲರ್, ಕಿರ್ಕೊಳ್ ಕಾರಾಣ್. ಮ್ಹಾಕಾ ದಿಸ್ತಾ, ಕಸಲೊಗಿ ಗೂ೦ಡ್ ಉದ್ದೇಶ್ ಘೆವ್ನ್ ತೊ ಹಾ೦ಗಾಸರ್ ಯೆತಾ.’ ತಾಣೆ ಲಾ೦ಬ್ ಉಸ್ವಾಸ್ ಸೊಡ್ಲೊ.
‘ಜಾವ್ಯೆತ್!’ ಮ್ಹಳೆ೦ ಮೆಥ್ಯುನ್. ’ತು೦ವೆ೦ ಹೆ೦ ಪತ್ತೇದಾರಿ ಕಾಮ್ ಕೆದಳಾ ಸುರು ಕೆಲೆ೦ಯ್? ಹಾ೦ತು೦ ತುಜಿ ಆಸಕ್ತ್ ಕಸಲಿ, ಉದ್ದೇಶ್ ಕಸಲೊ? ತ್ಯಾ ಲಿಲಿಯನ್ ಜೆನಿಸಾನ್ ಪುಣಿ ತುಜಿ ಕಾನ್ ಫು೦ಕೊ೦ಕ್ ನಾ೦ತ್?’
‘ಲಿಲಿಯನ್ ಜೆನಿಸ್? ಹೆಲೀನಾಚಿ ಆವಯ್? ತಿಕಾ ಆಜೂನ್ ಪರ್ಯಾ೦ತ್ ಹಾ೦ವ್ ಭೆಟೊ೦ಕ್ ನಾ.’
‘ಕೊಣಾಕ್‌ಚ್ ಭೆಟನಾಸ್ತಾ೦ ಕಾಮಾ೦ ಕರ್ಚೆ೦ ಮಾಲು೦ಡ್ ತೆ೦!’
‘ಮಾವ್ರಿಸಾಕ್ ಸಾ೦ಗ್‌ಲ್ಲಿ ಆನಿ ಜೊಕ್ತಿ ಎದ್ರಿ ತಿ,’ ರಮಿನ್ ಮ್ಹಳೆ೦. ‘ಲಿಲಿಯನಾಕ್ ಅಶೆ೦ ದೆಕ್ತಾಯ್ ತರ್ ಹೆಲೀನಾಕ್ ಕಿತ್ಯಾಕ್ ಆಪ್ಲಿ ಖಾಸ್ಕಿ ಸೆಕ್ರೆಟರಿ ಕರುನ್ ಘೆತ್ಲೆ೦ಯ್? ಪೊಲಿಟಿಕ್ಸ್ ಸರ್ವಾ೦ಕ್‌ಯಿ ಜಾಯ್, ಡೆಡಿ!’
‘ತಿ ಸ೦ಗತ್ ವೆಗ್ಳಿ! ತುಕಾ ರಾಜಕೀಯಾಚಿ ಕಿತೆ೦ ಗರ್ಜ್, ದೇವ್ ಮನ್ಶ್ಯಾಚಿ ಕಿತೆ೦ ಗರ್ಜ್?’
‘ಹ್ಯಾ ದೋನ್ ಕ್ಷೇತ್ರಾ೦ನಿ ಹಾ೦ವ್ ಯೆದೊಳ್ ಪ್ರವೇಸ್ ಜಾ೦ವ್ಕ್ ನಾ, ಡೆಡಿ!’ ರಮೋನಾನ್ ಜಾಪ್ ದಿಲಿ. ‘ಎಕ್ ಹಾತ್ ಪಳೊವ್ಯಾ೦ ಮ್ಹಣ್ ಜಾಲೆ೦.’
‘ಮೆತೆರ್ ಜಾ೦ವ್ಚೆ೦ ಆನಿ ಹಾತ್ ಘಾಲ್ಚೊ – ಹ್ಯೊ ದೋನ್ ವೆವೆಗ್ಳ್ಯೊ ಸ೦ಗ್ತಿ. ಹಾ೦ವ್ ಸಾ೦ಗ್ತಾ೦, ರಮಿ, ಪಯ್ಸ್ ರಾವ್.’
‘ತು೦ ಭಿಯೆತಾಯ್ ಯಾ ಮ್ಹಜಿ ಫಿಕ್ರ್ ಕರ್ತಾಯ್?’
‘ತುಕಾ ಕಶೆ೦ ಭೊಗ್ತಾ?’ ಮೆಥ್ಯುನ್ ಮಾತ್ಸೊ ತಾಳೊ ಕಾಡ್ಲೊ. ‘ಯೆದೊಳ್ ಪರ್ಯಾ೦ತ್ ಹಿ ಸಾ೦ಜ್ ಬರ್‍ಯಾನ್ ಚಲೊನ್ ಆಯ್ಲಿ. ಆತಾ೦ ತಿಚ್ಚ್ ತು೦ ಖದ್ವಳಾಯ್ತಾಯ್. ಅಶೆ೦ ತರ್ ಹ್ಯೊ ಸರ್ವ್ ಸ೦ಗ್ತಿ ಮ್ಹಾಕಾ ಕಿತ್ಯಾಕ್ ಸಾ೦ಗ್ಲ್ಯೊಯ್?’
‘ತುಜಿ ಅಭಿಪ್ರಾಯ್ ಯಾ ಪರ್ವಣ್ಗಿ ವಿಚಾರು೦ಕ್ ನ್ಹಯ್.’
‘ತೆ೦ ಹಾ೦ವ್ ಜಾಣಾ೦!’ ಮೆಥ್ಯುಚೊ ತಾಳೊ ಆತಾ೦ ಚಿಕ್ಕೆಸೆ ದಾಟ್ ಜಾಯಿತ್ತ್ ಆಯ್ಲೊ. ‘ತರೀ ಮ್ಹಾಕಾ ಕಿತ್ಯಾಕ್ ಸಾ೦ಗ್ಲ್ಯೊಯ್?’
ರಮೋನಾ ಆಪ್ಲೊ ಗ್ಲಾಸ್ ಘೆವ್ನ್ ಉಬೆ೦ ಜಾಲೆ೦. ತೆವ್ಶಿನ್ ವಚುನ್ ತಾಣೆ ಬಾಪಾಯ್ಚಾ ಖಾ೦ದಾರ್ ಹಾತ್ ದವರ್ಲೊ, ಥೊಡ್ಯಾ ಖಿಣಾ೦ಕ್. ಉಪ್ರಾ೦ತ್ ಬಾಲ್ಕನಿಚ್ಯಾ ಗ್ರಾದಿಲಾಗಿ೦ ವಚುನ್ ತೆ೦ ಭಾಯ್ಲ್ಯಾ ಸ೦ಸಾರಾಕ್ ಪಳೆತ್ ರಾವ್ಲೆ೦. ಗ್ಲಾಸ್ ಖಾಲಿ ಜಾಲ್ಯಾ ಉಪ್ರಾ೦ತ್ – ‘ತುಕಾ ಸಾ೦ಗ್ಯಾ೦ ಮ್ಹಣ್ ಭೊಗ್ಲೆ೦, ಡೆಡಿ. ಇತ್ಲೆ೦ಚ್ ತಾಣೆ ಮ್ಹಳೆ೦.
ತವಳ್ ಮೆಥ್ಯುನ್ ಹ್ಯಾ ಸಂಬಾಷಣಾಕ್ ಮಹತ್ವ್ ದಿಲ್ಲೆಂ ನಾ ಪುಣ್ ತೆಂ ತಾಚೆ ಮತಿಂತ್ ಕಾರ್‍ವಲ್ಲೆಪರಿಂ ಉರ್ಲೆಂ. ತಾಚೆಂ ರಮಿ ಅಸಲೆಂ ತಸಲೆಂ ಅಸಡ್ಡೆಂ ನ್ಹಯ್. She is an intellectual.
ಹೆಂ ಘಡಿತ್ ಘಡೊನ್ ಥೊಡ್ಯಾಚ್ ದಿಸಾಂನಿ ಹೆಲೀನಾನ್ ಫ್ರೆಡ್ ಟೇಯ್ಲರಾಚೊ ಉಲ್ಲೇಕ್ ಕೆಲ್ಲೊ ಪುಣ್ ಭೋವ್ ಮಂದ್ ರಿತಿರ್. ತಾಂಚೆ ಮದೆಂ ಚಲ್‌ಲ್ಲೆಂ ಸಂಭಾಷಣ್‌ಯಿ ಮೆಥ್ಯುಚ್ಯಾ ಉಡಾಸಾಂತ್ ಆಸ್‌ಲ್ಲೆಂ–
‘ತುವೆ೦ಚ್ ತೆ೦ ನಾ೦ವ್ ಪಯ್ಲ್ಯೆಪಾವ್ಟಿ೦ ಆಯ್ಕೊ೦ಚೆ೦ ಮ್ಹಳ್ಳೆಪರಿ೦ ದಿಸ್ತಾ, ಮಿ|ಲಿಯೊ.’
‘ಹಾ೦ವ್ ತಿತ್ಲೊಯಿ ಪಾಟಿ೦ ಪಡ್ಲಾ೦, ತರ್?’ ಅಜಾಪ್ಲೊ ಮೆಥ್ಯು. ‘ಹ್ಯಾ ಮನ್ಶಾವಿಶಿ೦ ತು೦ ಕಿತೆ೦ ಆನಿ ಕಿತ್ಲೆ೦ ಜಾಣಾ೦ಯ್?’
ಹೆಲೀನಾ, ಆಪ್ಲ್ಯಾ ಬೊಟಾ೦ಚ್ಯಾ ನಾಕ್ಷೆ೦ಕ್ ಪಳೆಲಾಗ್ಲೆ೦.
‘ಹೆ೦ ಸವಾಲ್ ತು೦ವೆ೦ ಜೆರೊಮಾಲಾಗಿ೦ ವಿಚಾರ್ಲ್ಲೆ೦ ತರ್ ಬರೆ೦ ಆಸ್‌ಲ್ಲೆ೦ ಮಿ|ಲಿಯೊ!’
‘ಕಿತ್ಯಾಕ್?’
‘ಕಾರಾಣ್ ಸಾ೦ಗ್ಲ್ಯಾರ್ ತು೦ ಪಾತ್ಯೆ೦ವ್ಚೊನಾ೦ಯ್.’
‘ಪ್ರೇತನ್ ಕರ್, ಥೊಡೆ ಪಾವ್ಟಿ೦, ಜಾಯ್ತೆಪಾವ್ಟಿ೦, ಸಯ್ತ್‌ಯಿ ಹಾ೦ವ್ ಭೆ೦ಕ್ರೊ೦ ಜಾ೦ವ್ಕ್ ಸಕ್ತಾ೦!’
‘ಎಕ್‌ಚ್..’ತೆ೦ ಮ್ಹಣಾಲೆ೦ ಆಪ್ಲಿ೦ ಉತ್ರಾ೦ ತುಕೊನ್. ‘ಎಕ್‌ಚ್ ತು೦ ಜಾಣಾ೦ಯ್ ಯಾ ತು೦ ಮ್ಹಾಕಾ ಫಟಯ್ತಾಯ್!’
‘ಬಿಲ್ಕುಲ್ ನಾ!’ ಆಪ್ಲ್ಯಾ ಹರ್ದ್ಯಾರ್ ಹಾತ್ ದವರ್ನ್. I’m aboslutley honest!’
‘ಟೇಯ್ಲರಾಚಿ ಪ್ರಥಮ್ ಮಾಗ್ಣ್ಯಾ ಜಮಾತ್ ಪೆಟ್ರೋಸ್ಟೇಟಾ೦ತ್ ಜಮ್ಚ್ಯಾರ್ ಆಸಾ!’ ತಾಣೆ ಕಳಯ್ಲೆ೦ ಭೋವ್ ನಾಜೂಕಾಯೆನ್ ಆಪ್ಲೊ ಉಜ್ವೊ ಪಾ೦ಯ್ ದಾವ್ಯಾಚೆರ್ ಘಾಲುನ್. ಹೆ೦ ಕರ್ತುಬ್ ಮಾಲಿಸಾಯೆವಿಣೆ ಮೆಥ್ಯುಚ್ಯಾ ಗಮನಾಕ್ ವಚಾನಾಸ್ತಾ೦ ಗೆಲೆ೦ ನಾ. ಆಪ್ಲಿ ಡ್ರೆಸ್ ಸಾರ್ಕಿ ಕರುನ್ ಹೆಲೀನಾನ್ ಕುಡ್ಸಿಲೆ೦. ‘ಆಮ್ಚೊ ಜೆರೊಮ ಲಾಜ್ರಾ ಹ್ಯಾ ಜಮಾತಿಚ್ಯಾ ರಿಸೆಪ್ಶನ್ ಕಮಿಟಿಚೊ ಚೇರ್‌ಮೆನ್.’
‘Bullshit!’ ಮ್ಹಣಾಲೊ ಮೆಥ್ಯು, ಹಾಸ್ಚೆ೦ ಪ್ರೇತನ್ ಕರುನ್. ಪುಣ್ ತಾಚ್ಯಾ ಹರ್ಧ್ಯಾ೦ತ್ ಕಿತೆ೦ಗಿ ‘ಕಲ್ಲ್’ ಜಾಲೆ೦. ‘ಆಮ್ಚೊ ಜೆರೊಮ್ ಆನಿ ಮಾಗ್ಣ್ಯಾ ಜಮಾತ್? ಕೆದಳಾ ಸುರು ಜಾಲೆ೦ ಹೆ೦ ಪಿಶೆ೦ಪಣ್?’
‘ಹಾ೦ವ್ ನಕ್ಖಿ ನೆಣಾ೦ ಪುಣ್ ಹ್ಯಾ ದಿಸಾ೦ನಿ ಒಫಿಸಾ೦ತ್ ತೊ ಆಫೀಮ್ ಖೆಲ್ಲ್ಯಾ ಬೊಕ್ಲಾಪರಿ೦ ಕರ್ತಾ.’
‘ತೆ೦ ಮ್ಹಜ್ಯಾಯಿ ಗಮನಾಕ್ ಆಯ್ಲಾ೦!’ ಮ್ಹಳೆ೦ ಮೆಥ್ಯುನ್ ಆಪ್ಲೆ ದೊಳೆ ಅರ್ವಾಸ್ ದಾ೦ಪುನ್. ಪುಣ್ ಹ್ಯಾ ಪಿಶೆಪಣಾಕ್ ಲಾಗುನ್ ಮ್ಹಣ್ ಹಾ೦ವ್ ನೆಣಾಸ್ಲೊ೦.. ಮಾವ್ರಿಸ್ ಆಗುಸ್ತಿನ್….’
‘ಹಾ೦!’ ಮ್ಹಣಾಲೆ೦ ಹೆಲೀನಾ ತಾಕಾ ದುರ್ಸವ್ಣೆಚೆ೦ ಎಕ್ ಬೋಟ್ ಜೊಕುನ್. ‘ತು೦ ಜಾಣಾ೦ಯ್.’
‘ವ್ಹಯ್‌ಗೀ?’ ವಿಚಾರ್ಲೆ೦ ಮೆಥ್ಯುನ್. ‘ರಮಿನ್ ಥೊಡ್ಯೊ ಸ೦ಗ್ತಿ ಮ್ಹಾಕಾ ಸಾ೦ಗ್ಲ್ಯೊ…. ಮಾವ್ರಿಸ್ ಆಗುಸ್ತಿನ್ ಹ್ಯಾ ಪ್ರೊಗ್ರಾಮಾಚೊ ಸ್ಪೊನ್ಸರ್ ಖ೦ಯ್.’
‘ವ್ಹಯ್!’ ಮಟ್ವ್ಯಾನ್ ಮ್ಹಳೆ೦ ಹೆಲೀನಾನ್. ರಮೋನಾಚೆ೦ ನಾ೦ವ್ ಆಯ್ಕಾತಾನಾ ಹೆಲೀನಾಚೆ೦ ಮುಕಮಳ್ ಸಾವ್ಳೆಲ್ಲೆ೦ ಮೆಥ್ಯುಚ್ಯಾ ಗಮನಾಕ್ ಗೆಲೆ೦.
‘ಕಾ೦ಯ್ ಇಲೆಕ್ಷನ್ ಸ್ಟ೦ಟ್?’
‘ಜಾ೦ವ್ಕ್ ಪುರೊ.’
‘ಎಕೇಕ್ ಪಾವ್ಟಿ೦ ಒಸಿಸಾ ಭಾಯ್ರ್ ಎಕ್ ಸ೦ಸಾರ್ ಆಸಾ ಮ್ಹಳ್ಳೆ೦ ಹಾ೦ವ್ ವಿಸರ್ತಾ೦!’
‘ಎಕೇಕ್ ಪಾವ್ಟಿ೦ ನ್ಹಯ್, ಸರ್, ಸಬಾರ್ ಪಾವ್ಟಿ೦!’ ಹೆ೦ ಆಯ್ಕೊನ್ ಮೆಥ್ಯು ಮಟ್ವ್ಯಾನ್ ಹಾಸ್ಲೊ.
‘ರಮೋನಾಚೆ೦ ನಾ೦ವ್ ಕಾಡ್ಟಾನಾ ತುಜೆ೦ ಮುಕಮಳ್ ಸಾವ್ಳೆಲೆ೦. ಕಿತ್ಯಾಕ್? ತೆ೦ಯಿ ಹ್ಯಾ ಪ೦ಗ್ಡಾನ್ ಸೆರ್ವಾಲಾ೦?’
ಹೆಲೀನಾನ್ ತಾಚೆ ದೊಳೆ ಧರ್ಲೆ.
‘ಫಾಲ್ಯಾ೦ ಹಾ೦ವೆ೦ ಸಾ೦ಗ್ಲೆ೦ ಮ್ಹಣ್ ಜಾ೦ವ್ಕ್ ನಜೊ,’ ತಾಣೆ ಜಾಪ್ ದಿಲಿ, ಚಾಡಿಯ್ಯೊ ಸಾ೦ಗ್ಚ್ಯಾ ಭುರ್ಗ್ಯಾಪರಿ೦.
‘ಮ್ಹಜೆ೦ ರಮಿ ಕಾ೦ಯ್ ಹ್ಯಾ ಪ್ರೊಗ್ರಾಮಾ೦ತ್ ಜೆರೊಮಾಚೆ೦ ಅಸಿಸ್ಟೆ೦ಟ್ ಪುಣಿ ನ್ಹಯ್-ಮೂ?’
‘ನಾ! ಪುಣ್ ಹ್ಯಾ ಮಾಗ್ಣ್ಯಾ ಜಮಾತಿಕ್ ಜಾತಾತಿತ್ಲ್ಯಾ ಯುವಜಣಾ೦ಕ್ ಯೆಕ್ಟಾ೦ಯ್ ಕರು೦ಕ್ ತೆ೦ ಮುಕಾರ್ ಸರ್ಲಾ೦.’
‘ವ೦ಡರ್‌ಫ಼ುಲ್!’ ಉದ್ಗಾರ್ಲೊ ಮೆಥ್ಯು. ‘ಅಶೆ೦ ಕಿತ್ಯಾಕ್ ಘಡ್ತಾ, ಹೆಲೀನಾ?’
‘ಖ೦ಚೆ೦ ಮ್ಹಣ್ತಾಯ್ ತು೦? ಜೆರೊಮ್ ಆನಿ ರಮೋನಾ?’
‘ನ್ಹಯ್ ನ್ಹಯ್! ಹೆ೦ ಸರ್ವ್ ಹೊ ಟೇಯ್ಲರ್….ಆಮ್ಚ್ಯಾ ಸಮಾಜಿಕ್ ಅಸಲ್ಯಾಚಿ ಗರ್ಜ್ ಪಡ್ಲ್ಯಾ?’
‘ಮಾದಕ್ ವಕ್ತಾ೦ಚಿ ವೊಸೊ ಲಾಗ್‌ಲ್ಲ್ಯಾ೦ಕ್ ದಿಸಾನ್ ದೀಸ್ ಡೋಜ್ ಚಡ್ ಕರಿಜೆ ಪಡ್ಟಾ, ಮಿ|ಲೊಯೊ’
‘ಆತಾ೦, ಮ್ಹಣ್ತಾ೦ ಹಾ೦ವ್….ಸಮ್ಜಾಲೆ೦ ನಾ.’
‘ಭಾವಾರ್ಥ್, ಎಕ್ ಆಫೀಮ್ ಮ್ಹಣ್ ಸೆವ್ತೆಲ್ಯಾ೦ಕ್ ಫ್ರೆಡ್ ಟೇಯ್ಲರಾ ತಸಲ್ಯಾ೦ಚಿ ಗರ್ಜ್ ಪಡ್ತಾ.’ ಆಮ್ಚ್ಯಾ ಪಾದ್ರಿ೦ನಿ, ತ್ಯಾ ಮಟ್ಟಾಕ್ ಆಮ್ಚ್ಯಾ ಸರ್ವ್ ಪಾದ್ರಿ-ಮಾದ್ರಿ೦ನಿ ಕೆಲೆ೦ ತರಿ ಕಿತೆಂ? ಬಾ೦ದ್ಪಾ೦ ಉಬಾರ್‍ಲ್ಯಾ೦ತ್, ಶಾಳಾ೦-ಕೊಲೆಜಿ ಉಘಡ್ಲ್ಯಾತ್, ಇಗರ್ಜೊ ಬಾ೦ದ್ಲ್ಯಾತ್…ಪುಣ್ ಅತ್ಮ್ಯಾ೦ ಖಾತಿರ್ ಕಿತೆ೦ಚ್ ಕರು೦ಕ್ ನಾ ಮ್ಹಣ್ ಭಾವಾರ್ಥಿ ಚಿ೦ತಾತ್.’
‘ತು೦ ಕಿತೆ೦ ಚಿ೦ತಾಯ್?’
‘ತೆ೦ ಗರ್ಜೆಚೆ೦ ನ್ಹಯ್!’ ಹೆಲೀನಾನ್ ಜಾಪ್ ದಿಲಿ, ಆಸ್ಡಿ ಪಾಪ್ಡಿನಾಸ್ತಾ೦. ‘ಹ್ಯಾ ಯುಗಾ೦ತ್ ತರೀ ಅಜಾಪಾ೦ ಕೊಣಾಕ್ ನಾಕಾ ಜಾಲ್ಯಾ೦ತ್, ಮಿ|ಲಿಯೊ? ಕೆನ್ಸರ್ ಗೂಣ್ ಜಾ೦ವ್ಚೆ೦, ಪೊಲಿಯೊನ್ ಮುಗ್ಟೆಲೊ ಪಾ೦ಯ್ ನೀಟ್ ಜಾ೦ವ್ಚೊ, ಬ೦ದ್ ಪಡ್‌ಲ್ಲಿ ಜೀಬ್ ಸುಟ್‌ಚಿ… ಹೆ೦ ಸರ್ವ್ ಕೊಣಾಕ್ ನಾಕಾ ಜಾಲಾ೦? ಆಮ್ಚೆ ಪಾದ್ರಿ-ಮಾದ್ರಿ ಹೆ೦ ಕರು೦ಕ್ ಸಕ್ತಾತ್?’
ಮೆಥ್ಯು, ಮಿಶ್ರಿತ್ ಆತುರಾಯೆನ್ ಹೆಲೀನಾಕ್ ಪಳೆತಾಲೊ, ಆಯ್ಕಾತಾಲೊ. ಪುಣ್ ತಾಚೆ ಮತಿ೦ತ್ ಕಸಲಿಗಿ ಅಸ್ಪಷ್ಟ್ ಭಿರಾ೦ತ್ ಉಬ್ಜಾಲ್ಲಿ.
‘ಹೆ೦ ಸರ್ವ್ ಫ್ರೆಡ್ ಟೇಯ್ಲರ್ ಕರು೦ಕ್ ಸಕ್ತಾ?’
‘ಪಳೆಜೆ,’ ಜಾಪ್ ದಿಲಿ ಹೆಲೀನಾನ್.
‘ಮತ್ಲಬ್…ತು೦ಯಿ ಹ್ಯಾ ಜಮಾತಿ೦ಕ್ ವೆತೆಲೆ೦ಯ್?’
ಹೆಲೀನಾನ್ ಆಪ್ಲಿ೦ ಭುಜಾ೦ ಉಡಯ್ಲಿ೦. ‘ಗೆಲ್ಯಾರ್‌ಯಿ ಗೆಲಿ೦!’ ತಾಣೆ ಮ್ಹಳೆ೦.
‘ಗರ್ಜೆನ್ ಯಾ ಮರ್ಜೆನ್?’
‘ಮರ್ಜೆನ್..ಕಿತೆ೦ ಜಾತಾ ಮ್ಹಣ್ ಪಳೆಯಿಲ್ಲ್ಯಾ೦ತ್ ಕಾ೦ಯ್ ವಾಯ್ಟ್ ನಾ.’
‘ಹಾ೦ವ್‌ಯಿ ತುಜೆ ಸ೦ಗಿ೦ ಯೆತೊಲೊ೦ ಮ್ಹಣಾನ್ ತರ್?’
‘ಮೋಸ್ಟ್ ವೆಲ್‌ಕಮ್!’ ತಾಣೆ ಪರತ್ ಭುಜಾ೦ ಉಡಯ್ಲಿ೦.
‘ತುಜ್ಯಾ ಮಾಮ್ಮಿಚಿ೦ ಪ್ರತಿಕ್ರಿಯಾ೦ ಕಸಲಿ೦ ಜಾವ್ನಾಸ್ಯೆತ್?’
‘ಮಾವ್ರಿಸಾಚೊ ಖ್ಹೆಳ್ ನ್ಹಯ್?’ ಫ್ರೆಡ್ ಟೇಯ್ಲರ್ ಎಕ್ ಫಟ್ಕಿರೊ ಪ್ರವಾದಿ ಮ್ಹಣ್ ರುಜು ಕರ್ಚೆ೦ ಪ್ರೇತನ್ ಕರ್ತೆಲಿಚ್.’
‘ಕಿತೆ೦ ಫಾಯ್ದೊ?’ ವಿಚಾರ್ಲೆ೦ ಮೆಥ್ಯುನ್.’ ‘ಸ೦ಸಾರ್ ಆಕೇರ್ ಜಾ೦ವ್ಚೊ ವೇಳ್ ಯೆತಾನಾ ಫಟ್ಕಿರೆ ಪ್ರವಾದಿ ಉಟ್ಟೆಲೆ, ಮ್ಹಜ್ಯಾ ನಾ೦ವಾನ್ ಅಜಾಪಾ೦ ಕರ್ತೆಲೆ೦, ಹಾ೦ವ್ ಹಾ೦ಗಾಸರ್ ಆಸಾ೦, ಥ೦ಯ್ಸರ್ ಆಸಾ೦, ಹ್ಯಾ ಮುಲ್ಯಾ೦ತ್ ಆಸಾ೦, ತ್ಯಾ ಮುಲ್ಯಾ೦ತ್ ಆಸಾ೦ ಮ್ಹಣ್ ಮ್ಹಣ್ತೆಲೆ..ಅಶೆ೦ ಕ್ರಿಸ್ತಾನ್೦ಚ್ ಮ್ಹಳಾ೦ ನ್ಹಯ್?’
ಹೆಲೀನಾ ಹಾಸ್ಲೆ೦. ‘ತು೦ ಹಾಸ್ತಾಯ್!’ ಮೆಥ್ಯುನ್ ಮ್ಹಳೆ೦. ‘ಮ್ಹಜೊ ಬಾಯ್ಬಲ್ ಹಾ೦ವ್ ವಿಸ್ರೊ೦ಕ್ ನಾ.’
‘ತುಜೊ ಬಾಯ್ಬಲ್!’ ಹೆಲೀನಾ ಉದ್ಗಾರ್ಲೆ೦, ಆಪ್ಲೊ ಹಾಸೊ ನಿ೦ವಯ್ನಾಸ್ತಾ೦.
ಮೆಥ್ಯುಯೀ ಹಾಸ್ಲೊ ಪುಣ್ ಮಟ್ವ್ಯಾನ್.
‘ಹರ್ಯೆಕ್ಲ್ಯಾಕ್ ಎಕ್ ನ್ಹಯ್ ತರ್ ಎಕಾ ದಿಸಾ ತಾ೦ಚೊಚ್ ಬಾಯ್ಬಲ್ ಲಿಕ್ಚಿ ಗರ್ಜ್ ಉದೆತಾ, ಹೆಲೀನಾ!’ ಆಪ್ಲ್ಯಾ ಹಾತಾ೦ಚ್ಯಾ ತಾಳ್ವ್ಯಾ೦ಕ್ ಶೂನ್ಯ್ ದಿಷ್ಟಿನ್ ಪಳೆವ್ನ್. ‘ತು೦ ತರ್ನಾಟೆ೦, ಚತುರ್ ಆನಿ ಹುಶಾರ್…ಹ್ಯಾ ಸ೦ಗ್ತಿ೦ ವಿಶಾ೦ತ್ ಚಿ೦ತುನ್ ಬಸು೦ಕ್ ತುಕಾ ವೇಳ್ ನಾ.’
ಹೆಲೀನಾನ್ ಜಾಪ್ ದಿಲಿ ನಾ.
ದಿವಾನ್‌ಖಾನ್ಯಾಂತ್ಲೊ ತೊ ಉಟ್ಲೊ ಆನಿ ಆಪ್ಲ್ಯಾ ಬೆಡ್‌ರೂಮಾಕ್ ವಚುನ್ ತಾಣೆ ಮುಸ್ತಾಯ್ಕಿ ಕಾಡ್ಲಿ (ಜೆರೊಮ್ ಆಯಿಲ್ಲ್ಯಾ ತವಳ್‌ಥಾವ್ನ್ ತೊ ನಾಯ್ಟ್ ಸುಟಾರ್‌ಚ್ ಆಸ್‌ಲ್ಲೊ) ಆನಿ ನ್ಹಾಣಾಚೊ ದಗ್ಲೊ ಘಾಲ್ನ್ ಟೊಯ್ಲೆಟಾಕ್ ಗೆಲೊ. ಊಬ್ ಉದ್ಕಾಚಿ ಸರ್ಬಾರಾಯ್ ಕೆದಳಾಯಿ ಆಸ್ತಾಲಿ. ಹಾತಾಕ್ ಮೆಳ್‌ಲ್ಲೆಂ ದೈನಿಕ್ ಪತ್ರ್ ಟೊಯ್ಲೆಟ್ ಪೇಪರ್ ರ್‍ಯಾಕಾಂತ್ಲೆಂ ಕಾಡುನ್ ತೊ ಕೊಮೆಡಾರ್ ಬಸ್ಲೊ ಪುಣ್ ತಾಚಿ ಮೋತ್ ಇತ್ಲಿ ಗುಸ್ಪಡ್ಲೆಲೆಲಿಕಿ ಪತ್ರ್ ಉಳ್ಟೆಂ ಧರ್‌ಲ್ಲೆಂ ಸಯ್ತ್‌ಯಿ ತಾಚ್ಯಾ ಗಮನಾಕ್ ಗೆಲೆಂ ನಾ. ಕಳಿತ್ ಜಾತಾನಾ ತೊ ಹಾಸ್ಲೊ ಆನಿ ಕೊಮೊಡಾಚೊ ಫ್ಲಶ್ ಭೆಶ್ಟೊಚ್ ವೊಡುನ್ ತೊ ಉಟ್ಲೊ ಆನಿ ದಗ್ಲೊ ಕಾಡ್ನ್ ಉಡವ್ನ್ ಶವರಾ ಪಂದಾಕ್ ರಾವ್ಲೊ. ಊಬ್ ಉದ್ಕಾ-ನ್ಹಾಣಾನ್ ಪ್ರಫುಲ್ಲ್ ಜಾತಾನಾ, ತಾಕಾ ಭೊಗ್ಲೆಂಕಿ ಆಪುಣ್ ಎಕಾ ಸರ್ಕಸಾಂತ್ ನ್ಹಯ್, ಎಕಾ ಪಿಶಾಂಚ್ಯಾ ಸಂಸಾರಾಂತ್ ಆಸಾಂ ಅಶೆಂ. ಪುಣ್ ಹೊ ಸಂಸಾರ್‌ಯಿ ಚಾಲು ಆಸ್‌ಲ್ಲೊ, ಹ್ಯಾ ಸಂಸಾರಾಕ್‌ಯಿ ಚವೀಸ್ ಘಂಟೆ ಆಸ್‌ಲ್ಲೆ, ಸುರ್ಯೊ ಉದೆತಾಲೊ, ಬುಡ್ಟಾಲೊ ಆನಿ ಹ್ಯಾ ಸಂಸಾರಾಂತ್ ಕಿತೆಂ ಸರ್ವ್ ಜಾವ್ನಂಚ್ ಆಸ್‌ಲ್ಲೆಂ. ದೆಕಿಕ್ ತಾಚಿ ಹಿ ಒಸಿಸ್ ಕಂಪೆನಿ. ಸಂಸಾರಾಕ್ ಎಕ್ ಕಕ್ಷಾ ಆಸ್‌ಲ್ಲಿ ಪುಣ್ ಒಸಿಸಾಕ್ ಆಪ್ಲಿಚ್ ಮ್ಹಳ್ಳಿ ಎಕ್ ಕಕ್ಷಾ ಆಸ್‌ಲ್ಲಿ. ತಾಚೆ ಒಸಿಸ್ ಉಜ್ಯಾಕ್ ಘುಂವ್ತಾಲೆಂ ಯಾ ದಾವ್ಯಾಕ್, ತೆಂ ತಾಕಾ ಕಳಿತ್ ನಾತ್‌ಲ್ಲೆಂ. ಖಂಚಾಯಿ ದಿಕೆನ್ ಘುಂವ್ಲ್ಯಾರಿ ತಾಕಾ ಕಳಾನಾತ್‌ಲ್ಲ್ಯೊ ಸಬಾರ್ ಸಂಗ್ತಿ ಘಡೊಂಕ್ ಗೆಲ್ಲ್ಯೊ ಆನಿ ಖಂಡಿತ್ ಘಡೊಂಕ್ ಆಸ್‌ಲ್ಲ್ಯೊ.
ಮೌರಿಸಾಕ್ ವಾಪಾರ್ನ್ ತಾಣೆ ರಿಚರ್ಡಾಕ್ ಪಾಸ್ ಮಾಂಡ್‌ಲ್ಲೊ. ಕಾರಾಣ್ ಆಸ್‌ಲ್ಲೆಂ ಮ್ಹಣ್ಯೆತ್ ತರ್ ತೆಂ ಇತ್ಲೆಂಚ್ – ಎಕೆ ಕೋಶಿಯೆಂತ್ ದೋನ್ ತಲ್ವಾರಿ ರಾವೊಂಕ್ ಸಕಾನಾತ್‌ಲ್ಲ್ಯೊ. ಪರಿಗತ್ ಇತ್ಲಿ ಸಂದಿಗ್ದ್ ಗೀ ರಿಚರ್ಡ್‌ನಾಸ್ತಾಂ ತಾಚ್ಯಾನ್ ಒಸಿಸಾಂತ್ ರಾವೊಂಕ್ ಜಾಯ್ನಾತ್‌ಲ್ಲೆಂ. ತಾಕಾ ಎಕ್ಲೊ ಬಳಿಷ್ಟ್ ಎದ್ರಿ ಜಾಯ್ ಆಸ್‌ಲ್ಲೊಚ್ ಆನಿ ತೊ ಆಪ್ನಾಕ್ ಮೆಳ್ಳಾ ಮ್ಹಳ್ಳೆಂ ತಾಕಾ ಕ್ಯಾಲ್ಕುಲೇಟರ್ ಪ್ರಕರಣಾ ಉಪ್ರಾಂತ್ ಕಳಿತ್ ಜಾಲ್ಲೆಂ.
ಪುಣ್ ಹ್ಯಾ ಪ್ರಕರಣಾಥಾವ್ನ್ ಸುರು ಜಾಲ್ಲಿಂ ಹೆರ್ ಪ್ರಕರಣಾಂ?
ತಾಂಕಾಂ ತೊ ತಯಾರ್ ನಾತ್‌ಲ್ಲೊ.
ಜಶೆಂ ಉದಕ್ ಆಪ್ಣಾಚೆಂಚ್ ಮಟ್ಟ್ ಆನಿ ಥಳ್ ಸೊದ್ತಾ ಆನಿ ಜೊಡ್ತಾ, ಒಸಿಸಾಂತ್ಲಿಂ ಸರ್ವ್ ಜೀವಿ ಎಕೇಕ್ ಕರುನ್ ಎಕೇಕ್ ಕ್ಯಾಲ್ಕ್ಯುಲೆಟರ್ ಪ್ರಕರಣ್ ಉಬಿಂ ಕರುಂಕ್ ಸಕ್ತಾಲಿಂ ಆನಿ ತಾಣಿಂ ತಿಂ ಉಬಿಂ ಕೆಲ್ಲಿಂ.
ಆನಿ ತೊ ಖುದ್ ಮೆಥ್ಯು ಲಿಯೊ, ಒಸಿಸಾಂತ್ಲೊ ದೇವ್ ಆನಿ ರಿಂಗ್‌ಮಾಸ್ಟರ್ ಕಸಲೆಂಗಿ ಎಕ್ ಪ್ರಕರಣ್ ಉಬೆಂ ಕರುನ್ ತಾಂತುಂ ಫಸ್‌ಲ್ಲೊ.
ದೆಕುನ್ಂಚ್ ತಾಣೆ ಜೆರೊಮ್ ಲಾಜ್ರಾಚೊ ಹಾತ್ ಧರ್‌ಲ್ಲೊ.
ಆಪುಣ್ ಮೆಥ್ಯು ಲಿಯೊ ಜಾಲ್ಯಾರ್‌ಯಿ ಆಪ್ಣೆಂ ಉಬೆಂ ಕೆಲ್ಲ್ಯಾ ಪ್ರಕರಣಾಥಾವ್ನ್ ಭಾಯ್ರ್ ಆಯ್ಲ್ಯಾ ಖೆರಿತ್ ಆಪುಣ್ ಮಾನಸಿಕ್ ರಿತಿರ್ ಥಿರ್ ಉರ್ಚೊಂ ನಾ ಮ್ಹಳ್ಳೆಂ ತಾಕಾ ಕಳಿತ್ ಜಾಲ್ಲೆಂ.
ಕಿತೆಂ ಕರುಂ ಆಪುಣ್?
ಸೊರ್ಕೆಲ್ಲ್ಯಾ ಕಾಟಿಕ್ ಧರ್ತೊಲೊಂ ಮ್ಹಣ್ ಶಿಮ್ಟಿ ಧರುಂಕ್ ಗೆಲ್ಯಾರ್ ಜಾತಾ?
ತ್ಯಾ ಜೆರ್ರೊಮಾನ್ ಆಪ್ಲ್ಯಾ ಮೆಲ್ಕಮಾ ಮುಕಾಂತ್ರ್ ರಿಚರ್ಡಾಚೊ ಬಾಪಯ್ ಲೀಜಾಚ್ಯಾ ಮರ್ಣಾಚೊ-ಖುನಿಯೆಚೊ ಕೃತ್ರ್ ಮ್ಹಣ್ ಸೊದುನ್ ಕಾಡ್ಲಾಂ ತರಿ ತೊ ಡೊ|ಫ್ರಾನ್ಸಿಸ್ ಕ್ಲೆಮೆಂಟ್ ಕೋಣ್ ಮ್ಹಣ್ ಕಶೆಂ ಸೊದುನ್ ಕಾಡ್ಚೆಂ? ರಿಚರ್ಡಾಕ್ ನಾನಾಂತೆ ವಾಂದೆ ದೀಂವ್ಕ್ ಮೆಥ್ಯು ಸಕ್ತಾಲೊ ಆನಿ ತಾಕಾ ಟೆಂಡರಾಂಚ್ಯಾ ಶಿರಿಗುಂಡಿಯೆಂತ್ಕ್ಮೆಥ್ಯುನ್ ದೆಂವಯಿಲ್ಲೊ ಒಸಿಸಾಂತ್ ಆಪ್ಣಾವರ್ನಿ ಚಡ್ ಶಾಥಿವಂತ್ ಹೆರ್ ಆಸುಂಕ್ ನಜೊ ಮ್ಹಳ್ಳೆ ಖಾತಿರ್. ಟೆಂಡರ್ ಚುಕೊನ್ ಗೆಲ್ಲ್ಯಾಚಿ ಫಿಕ್ರ್ ತಾಕಾ ನಾತ್‌ಲ್ಲಿ, ಒಸಿಸಾಚಿ ಬುನ್ಯಾದ್ ಘಟ್ ಆಸ್‌ಲ್ಲಿ.
ನ್ಹಾಣ್ ಜಾತೆಚ್ ತೊ ಬಾತ್‌ರೂಮಾಥಾವ್ನ್ ಭಾಯ್ರ್ ಆಯ್ಲೊ ಆನಿ ಸುಸಜ್ಜಿತ್ ಕಿಚನಾಕ್ ವಚುನ್ ತಾಣೆ ಆಪ್ಲೊಚ್ ನಾಸ್ಟೊ ತಯಾರ್ ಕೆಲೊ. ಬಂಗ್ಲ್ಯಾಂತ್ ಚಾರ್ಲ್ಸಾಚಿ ಜಾಗ್ ಯಾ ರಮಿಚಿ ಮಾಗ್ ನಾತ್‌ಲ್ಲಿ.
ನಾಸ್ಟೊ ಜಾತೆಚ್ ತಾಣೆ ಆಪ್ಲೆಂ ಫೋನ್ ಉಕಲ್ಲೆಂ ಆನಿ ಪಾಂಚ್ ಖಿಣಾಂಭರ್ ಪರತ್ ಕಸಲೆಂಗಿ ಚಿಂತಲ್ಲೆಪರಿಂ ಥಾಂಬೊನ್ ತಾಣೆ ಹೆಲೀನಾಚೆಂ ನಂಬರ್ ಲಾಗಯ್ಲೆಂ.
‘ಗುಡ್‌ಮೊರ್ನಿಂಗ್, ಡಾರ್ಲಿಂಗ್!’ ತಾಣೆ ಮ್ಹಳೆಂ.
‘………..!’
‘ವ್ಹಯ್ ಹಾಂವ್ಂಚ್! ಘಾಬರ್‍ನಾಕಾ, ಹಾಂವ್ ತಂದ್ರುಸ್ತ್ ಆಸಾಂ ಪುಣ್ ಮಾತ್ಸೊಂ ಥಕ್ಲಾಂ. ಮ್ಹಾಕಾ ಎಕ್ ನಂಬರ್ ಜಾಯ್….ವ್ಹಯ್….ಆತಾಂಚ್.’
‘……..?’
‘ಮ್ಹಾಕಾ ತೆಲ್ಮಾಚೆಂ ನಂಬರ್ ಜಾಯ್!’
(ಅವಸ್ವರ್ – 86 – ಂತ್ ಮುಂದರ್‍ತಾ)
