ಅ|ಮಾ|ದೊ| ಹೆನ್ರಿ ಹಾಂಕಾ ಆಳ್ವಾಸ್ ನುಡಿಸಿರಿ ಪ್ರಶಸ್ತಿ

ಬಳ್ಳಾರಿ ಧರ್ಮ್ ಪ್ರಾಂತ್ಯಾಚೊ ಧರ್ಮಾಧ್ಯಕ್ಷ್, ಕಿನ್ನಿಗೊಳಿಚೊ ಕಳೊ ಅ|ಮಾ|ದೊ| ಹೆನ್ರಿ ಡಿ’ ಸೊಜಾ ಹಾಂಕಾ ಹ್ಯಾ ವರ್ಸಾಚ್ಯಾ ಪ್ರತಿಷ್ಠಿತ್ ಆಳ್ವಾಸ್ ನುಡಿಸಿರಿ ಪ್ರಶಸ್ತಿ ವಿಂಚುನ್ ಕಾಡ್ಲಾಂ. ಹಿ ಪ್ರಶಸ್ತಿ ತಾಂಕಾ ಆಳ್ವಾಸ್ ಶಿಕ್ಪಾ ಪ್ರತಿಷ್ಠಾನಾಚ್ಯಾ ಆಸ್ರ್ಯಾಖಾಲ್ ದಸೆಂಬ್ರಾಚ್ಯಾ 1 ಥಾವ್ನ್ 3 ತಾರಿಕೆ ಪರ್ಯಾಂತ್ ಬಿದ್ರ್ಯಾಂತ್ ಚಲ್ಚ್ಯಾ ಆಳ್ವಾಸ್ ನುಡಿಸಿರಿ ಕಾರ್ಯಾಂತ್, ದಸೆಂಬ್ರಾಚ್ಯಾ 3 ತಾರಿಕೆರ್ ಸಾಂಜೆಚ್ಯಾ 4 ವೊರಾರ್ ಚಲ್ಚ್ಯಾ ಸಮಾರೋಪ್ ಕಾರ್ಯಾಂತ್ ಪ್ರದಾನ್ ಕರ್ತಲೆ ಮ್ಹಣ್ ಕಳಯ್ಲಾಂ. ಪ್ರಶಸ್ತಿ ರುಪಯ್ 25,000 ನಗದ್, ಪ್ರಶಸ್ತಿ ಪತ್ರ್, ಆನಿ ಯಾದಿಸ್ತಿಕಾ ಆಟಾಪುನ್ ಆಸಾ.

ಅ| ಮಾ| ದೊ| ಹೆನ್ರಿ ಡಿ’ಸೊಜಾ ಹಾಂಚೆ ಬರಾಬರ್, ಸುಟ್ಕೆ ಝುಜಾರಿ ಎಚ್. ಎಸ್. ದೊರೆಸ್ವಾಮಿ, ನಿವೃತ್ತ್ ನಿತಿಕರ್ತ್ ಸಂತೋಶ್ ಹೆಗ್ಡೆ, ಶಿಕ್ಪಾ ತಜ್ಞ್ ಪ್ರೊ| ತೇಜಸ್ವಿ ಕಟ್ಟಿಮನಿ, ಸಾಹಿತಿ ಡಾ| ಸಿದ್ದಲಿಂಗ ಪಟ್ಟಣಶೆಟ್ಟಿ, ಚಿಂತ್ಪಿ ಡಾ| ವಿಜಯಾ ದಬ್ಬೆ, ದಲಿತ್ ಕವಿ ಕೆ. ಬಿ. ಸಿದ್ದಯ್ಯ, ಸಾಹಿತಿ ಪ್ರೊ| ಜಿ. ಎಚ್. ಹನ್ನೆರಡುಮಠ, ಇತಿಹಾಸ್ ರಚನಾ ಶಾಸ್ತ್ರ್ ತಜ್ಞ್ ಪ್ರೊ| ಬಿ. ಸುರೇಂದ್ರ ರಾವ್, ಯಕ್ಷಗಾನ ವಿದ್ವಾಂಸ್ ಡಾ| ಎಂ. ಪ್ರಭಾಕರ ಜೋಶಿ, ಉಮ್ಕೊಳ್ ಸಾಂಕೊವ್ ಸರ್ದಾರ್ ಪದ್ಮಶ್ರೀ ಗಿರೀಶ್ ಭಾರದ್ವಾಜ್, ಪತ್ರಕರ್ತ್ ಪದ್ಮರಾಜ ದಂಡಾವತಿ, ಗಾವ್ಪಿಣ್ ರತ್ನಮಾಲಾ ಪ್ರಕಾಶ್, ನಾಟಕಿಸ್ತ್ ಡಾ| ತೋನ್ಸೆ ವಿಜಯಕುಮಾರ್ ಶೆಟ್ಟಿ, ಆನಿ ರಥಶಿಲ್ಪಿ ಲಕ್ಷೀನಾರಾಯಣ ಆಚಾರ್ಯ ಕೋಟ ಹಾಂಕಾಯೀ ಪ್ರಶಸ್ತೆಕ್ ವಿಂಚುನ್ ಕಾಡ್ಲಾಂ.

ಪ್ರಸ್ತುತ್ ಬಳ್ಳಾರಿ ಧರ್ಮ್ ಪ್ರಾಂತಾಚೊ ಧರ್ಮಾಧ್ಯಕ್ಷ್ ಅ| ಮಾ| ದೊ| ಹೆನ್ರಿ ಡಿ’ ಸೊಜಾ ಹೆ ಮುಳಾನ್ ಕಿನ್ನಿಗೋಳಿ ಫಿರ್ಗಜೆಚೆ. 1976 ಮೇಯಾಚೆ 5 ತಾರಿಕೆರ್ ಮಂಗ್ಳುರ್ ದಿಯೆಸೆಜಿಚೊ ಯಾಜಕ್ ಜಾವ್ನ್ ತಾಣಿ ದೀಕ್ಷಾ ಜೊಡ್ಲಿ ಆನಿ ಬಾರ್ಕುರ್ ಫಿರ್ಗಜೆಂತ್ ದೋನ್ ವರ್ಸಾಂ ಸಹಾಯಕ್ ವಿಗಾರ್ ಜಾವ್ನ್ ಸೆವಾ ದಿಲಿ.

1986 ತೆ 1992 ಪರ್ಯಾಂತ್ UNDA OCIC – India ( ಕಥೊಲಿಕ್ ಕಮ್ಯುನಿಕೇಶನ್ ಎಸೊಶಿಯೇಷನ್) ಹಾಚೊ ಅಧ್ಯಕ್ಷ್ ಜಾವ್ನ್ ತಾಣಿ ಸೆವಾ ದಿಲ್ಯಾ. ಆತಾಂ ಹೊ ಸಂಸ್ಥೊ Signis India ಮ್ಹಳ್ಳ್ಯಾ ನಾಂವಾರ್ ವಾವುರ್ತೇ ಆಸುನ್, Signis – Asia ಹ್ಯಾ ಸಂಸ್ಥ್ಯಾಚೊ ಕಾರ್ಯದರ್ಶಿ ಮ್ಹಣುನ್ ತೆ 1989 ತೆ 1995 ಪರ್ಯಾಂತ್ ವಾವುರ್ಲ್ಯಾತ್.

1989 ಥಾವ್ನ್ 2000 ಪರ್ಯಾಂತ್ ತಾಣಿ ಕರ್ನಾಟಕ ಪ್ರಾದೇಶಿಕ್ ಬಿಸ್ಪಾಂಚ್ಯಾ ಕಾವ್ನ್ ಸಿಲಾಚ್ಯಾ, ಪ್ರೊಕ್ಲಮೇಶನ್ ಆನಿ ಕಮ್ಯೂನಿಕೇಶನ್ ಕಮಿಶನ್ ಹಾಂತು ಕಾರ್ಯದರ್ಶಿ ಜಾವ್ನ್ ಸೆವಾ ದಿಲಿ. ಹ್ಯಾಚ್ ಆವ್ಧೆಂತ್, ಆಜ್ ರಾಜ್ಯ್ ತಶೆಂ ರಾಷ್ಟ್ ಮಟ್ಟಾರ್ – ಸಂಗೀತ್, ಕಲಾ ತಶೆಂ ಸಾಹಿತ್ಯಾಕ್ ಮಹತ್ವಾಚಿ ದೆಣ್ಗಿ ದೀವ್ನ್ ಆಸ್ಚೊ ಸಂಸ್ಥೊ ’ಸಂದೇಶ’ ಸ್ಥಾಪನ್ ಕರ್ನ್, ತಾಚೊ ಸ್ಥಾಪಕ್ ನಿರ್ದೇಶಕ್ ಜಾವ್ನ್ ತೆ ವಾವುರ್ಲೆ. ಸಾಂಗಾತಾ 1996 ಪಾಸುನ್ 2000 ಪರ್ಯಾಂತ್ ಸಂದೇಶ ಕಾಲೆಜ್ ಒಫ್ ಫೈನ್ ಆರ್ಟ್ಸ್ ಹಾಚೊ ನಿರ್ದೇಶಕ್ ಜಾವ್ನ್ ಯೀ ತಾಣಿ ಸೆವಾ ದಿಲ್ಯಾ. ಮಂಗ್ಳುರ್ ವಿಶ್ವವಿದ್ಯಾಲಯಾಚ್ಯಾ ಸಿಲೆಬಸ್ ಸಮಿತಿಚೊ ಸಾಂದೊ ಜಾವ್ನ್ ಯೀ ತಾಣಿ ಸೆವಾ ದಿಲ್ಯಾ.

ಕ್ಯಾಥೊಲಿಕ್ ಭಿಷಪ್ ಕಾನ್ಪರೆನ್ಸ್ ಒಫ್ ಇಂಡಿಯಾ, ನ್ಯೂ ಡೆಲ್ಲಿ ಹಾಂಗಾಸರ್ ಸೋಶಿಯಲ್ ಕಮ್ಯೂನಿಕೇಶನ್ ಕಮಿಶನಾಚೊ ಕಾರ್ಯಕಾರಿ ಕಾರ್ಯದರ್ಶಿ ಜಾವ್ನ್ ತಾಣಿ ಸತತ್ ಸಾತ್ ವರ್ಸಾಂ ಸೆವಾ ದಿಲ್ಯಾ.

2008 ಮಾರ್ಚ್ 15 ತಾರಿಕೆರ್ ಪಾಪಾ ಬೆನೆಡಿಕ್ಟ್ ಸೊಳಾವ್ಯಾನ್ ತಾಂಕಾ ಬಳ್ಳಾರಿ ಧರ್ಮ್ ಪ್ರಾಂತ್ಯಾಚೊ ಧರ್ಮಾಧ್ಯಕ್ಷ್ ಜಾವ್ನ್ ನೇಮಕ್ ಕೆಲೊ ಆನಿ ಜೂನ್ 12 ತಾರಿಕೆರ್ ತಾಣಿ ಗೊವ್ಳ್ಯಾಚಿ ದೀಕ್ಷಾ ಜೊಡ್ಲಿ. ಶಿಮೊಗಾ ದಿಯೆಸೆಜಿಚೊ ಆಪೊಸ್ತಲಿಕ್ ಆಡಳ್ತೆದಾರ್ ಜಾವ್ನ್ ಅಕ್ತೋಬರ್ 15, 2012 ಪಾಸುನ್ ಮಾರ್ಚ್ 19, 2014 ಪರ್ಯಾಂತ್ ತಾಣಿ ಸೆವಾ ದಿಲ್ಯಾ.

ಪ್ರಸ್ತುತ್ ತೆ, ಸಿ.ಬಿ.ಸಿ.ಐ ಯುವ ಆಯೋಗ್ ಹಾಚೊ ಅಧ್ಯಕ್ಷ್ ಜಾವ್ನ್, ಸಿ.ಸಿ.ಬಿ.ಐ ಯುವ ಆಯೋಗ್ ಹಾಚೊ ಅಧ್ಯಕ್ಷ್ ಜಾವ್ನ್, ಸಿ.ಬಿ.ಸಿ.ಐ. ಕಮಿಷನ್ ಫೊರ್ ಸೋಶಿಯಲ್ ಕಮ್ಯುನಿಕೇಶನ್ ಹಾಚೊ ಸಾಂದೊ ಜಾವ್ನ್, ಕೆ. ಆರ್. ಸಿ. ಬಿ. ಸಿ ಕಮಿಷನ್ ಫೊರ್ ಸೋಶಿಯಲ್ ಕಮ್ಯುನಿಕೇಶನ್ ಹಾಚೊ ಅಧ್ಯಕ್ಷ್ ಜಾವ್ನ್ ತಶೆಂ ಕೆ. ಆರ್. ಸಿ. ಬಿ. ಸಿ. ಯುವ ಆಯೋಗ್ ಹಾಚೊ ಅಧ್ಯಕ್ಷ್ ಜಾವ್ನ್ ಸೆವಾ ದೀವ್ನ್ ಆಸಾತ್.

ಕಿಟಾಳ್ ಮಂಡಳಿ ಸಮೇಸ್ತ್ ವಾಚ್ಪಿ, ಬರವ್ಪಿ ಆನಿ ಸಲಹಾ ಸಮಿತಿಚ್ಯಾ ತರ್ಫೆನ್ ಅ| ಮಾ| ದೊ| ಹೆನ್ರಿ ಡಿ’ ಸೊಜಾ ತುಮ್ಕಾಂ ರಾಸ್ ರಾಸ್ ಉಲ್ಲಾಸ್ ಪಾಟಯ್ತಾ ಆನಿ ತಾಂಚ್ಯಾ ಸಮಾಜ್ ಮುಖಿ ಮಿಸಾಂವ್ ವಾವ್ರಾಂತ್ ಸರ್ವ್ ಬರೆಂ ಮಾಗ್ತಾ.