‘ಪವಿತ್ ಅತ್ಮ್ಯಾನ್ ತುಮ್ಕಾಂ ಆಪಯ್ಲಾಂ!’ ಮ್ಹಣಾಲೊ ಟೇಯ್ಲರ್, ಆಪ್ಲೆ ಹಾತ್ ಖುರ್ಸಾ ರುಪಾರ್ ವಿಸ್ತಾರೊನ್. ‘ಪವಿತ್ ಅತ್ಮ್ಯಾನ್ ತುಮ್ಕಾಂ ಆಪಯ್ಲಾಂ’ ತಾಣೆ ಪರ್ತ್ಯಾನ್ ಉಚಾರ್ಲೆಂ. ತಾಚೊ ತಾಳೊ ಬಳಿಷ್ಟ್ ಆನಿ ಮಾಂತ್ರಿಕಾಚ್ಯಾ ತಾಳ್ಯಾಪರಿಂ ಪೊಕೊಳ್ ಜಾವ್ನಾಸ್‌ಲ್ಲೊ.
ಮೆಥ್ಯು ಲಿಯೊ ಮಟ್ವ್ಯಾನ್ ಹಾಸ್ಲೊ ಪುಣ್ ತಾಚೊ ಹಾಸೊ ಥೊಡ್ಯಾ ಆವಾಜಾಚೊಚ್. ‘ಆತಾಂ ಹಾಂವೆಂ ಕಿತೆಂ ಜಾಪ್ ದೀಜೆ, ರೆವರೆಂಡ್?’ ತಾಣೆ ವಿಚಾರ್ಲೆಂ. ‘ಹಾಂವೆಂ ಸಿಗಾರ್ ಸೆವ್ಯೆತ್?’
‘ಹಿ ಬೀಚ್ ಕೊಟೆಜ್ ತುಜಿಚ್ಚ್ ಮ್ಹಣ್ ಹಾಂವ್ ಸಮ್ಜಾತಾಂ.’
‘ಹಾಂಗಾಸರ್, ಪೆಟ್ರೊಸ್ಟೆಟ್ ಸಮಾಜಿಂತ್ ಸಬಾರ್ ಸಂಗ್ತಿ, ಮ್ಹಜ್ಯೊಚ್ಚ್!’ ಮ್ಹಳೆಂ ಮೆಥ್ಯುನ್, ಆಪ್ಲೆಂ ಸಿಗಾರ್ ಪೆಟವ್ನ್. ‘ಹುಂ. ಪವಿತ್ ಅತ್ಮ್ಯಾನ್ ತುಕಾಯಿ ಆಪಯ್ಲಾಂ ಮ್ಹಣಾಜೆ?’ ಮೆಥ್ಯುಚೊ ಹಾಸೊ ಆನಿಕಿ ರುಂದಾಯ್ಲೊ. ‘ತುಕಾ ತುಜೆಂ ಖಾಡ್ ಬರೆಂಚ್ ಸೊಬ್ತಾ. ಕಿತೆಂ, ಖಾಡ್ ಮ್ಹಳ್ಳ್ಯಾ ವಾಡಾವಳಿಕ್ ತುಂ ಎಕ್ ಖುಣ್ ಜಾವ್ನ್ ಲೊಕಾಕ್ ಮಾಂಕೊಡ್ ಕರ್ತಾಯ್?’
‘ಕೋಣ್ ಮಾಂಕೊಡ್ ಜಾಂವ್ಚೆತಿತ್ಲೊ ಅಸ್ಕತ್ ಆಸಾ, ತಾಕಾ ಪವಿತ್ ಅತ್ಮ್ಯಾಚೆಂ ಆಪವ್ಣೆಂ ಲಾಗಾನಾ.’
ಮೆಥ್ಯು ಲಿಯೊನ್ ಆಪ್ಣಾ ಸಾಮ್ಕಾರ್ ಆರಾಮ್ ಬಸ್ಕೆರ್ ಬಸುನ್ ಆಸ್‌ಲ್ಲ್ಯಾ ರೆವರೆಂಡ್ ಫ್ರೆಡ್ ಟೇಯ್ಲರಾಕ್ ಭೋವ್ ವರ್ತ್ಯಾ ಸುಕ್ಷೀಮಾಯೆನ್ ಪಳೆಲೊ ಆನಿ ತುಕ್ಲೊ. ತಾಚ್ಯಾ ತ್ಯಾ ವದನ್‌ಭರ್ ಖಾಡಾ ಪಾಟ್ಲ್ಯಾನ್ ಯಾ ಖಾಡಾಂತ್ ಸಬಾರ್ ಘುಟ್ ಲಿಪೊನ್ ಆಸ್‌ಲ್ಲೆ. ಎಕಾ ಫಲಾಣ್ಯಾ ಟೇಯ್ಲರ್ ಜಮಾತಿ ವೆಳಾರ್ ಆಪ್ಲ್ಯಾ ಕಾರಾಂತ್‌ಚ್ ಬಸುನ್ ತಾಣೆ ಟೇಯ್ಲರಾಕ್ ಪಯ್ಶಿಲ್ಯಾನ್ ಪಳೆಲ್ಲೊ ಪುಣ್ ಲಾಗ್ಸಾರ್‌ಚ್ ಆಸ್‌ಲ್ಲ್ಯಾ ಲೌಡ್‌ಸ್ಪೀಕರಾಥಾವ್ನ್ ತಾಚೊ ತಾಳೊ ಸ್ಪಷ್ಟ್ ಆಯ್ಕಾಲೊ. ತ್ಯಾಚ್ ಖಿಣಾಂನಿ ತಾಕಾ ಕಳಿತ್ ಜಾಲ್ಲೆಂಕೀ ಟೇಯ್ಲರ್ ಅಸ್ಸಲ್ ಬನಾವಟಿ ಮ್ಹಣ್. ಪುಣ್ ತಾಣೆ ಚಡ್ ಗಮನ್ ಕೆಲ್ಲೆಂ ನಾ. ಕಿತ್ಯಾಕ್ ಮ್ಹಳ್ಯಾರ್, ವಿಕೃತ್ ಗೃಹಾಂಪರಿಂ ಟೇಯ್ಲರಾಚೆ ಕಕ್ಷೆರ್ ಘುಂವೊಂಕ್ ಸುರು ಜಾಲ್ಲ್ಯಾ ಹೆರಾಂಚೆರ್ ತಾಚೆಂ ಗಮನ್ ಚಡಿತಾಯೆನ್ ಖಂಚ್‌ಲ್ಲೆಂ. ಕೋಣ್ ಜಾಣಾಂ ಪೆಟ್ರೊಸ್ಟೇಟಾಚ್ಯಾಂಕ್ ಭಾವಾರ್‍ಥಿಕ್ ಭಾಯ್ರಿ ದೀಂವ್ಕ್ ಹೊ ಟೇಯ್ಲರ್‌ಚ್ ಜಾಯ್ ಆಸ್‌ಲ್ಲೊ ಕಿತೆಂಗಿ.
‘ತುಂ ತುಜ್ಯಾ ಖಾಡಾ ಪಾಟ್ಲ್ಯಾನ್ ಲಿಪ್ಲ್ಯಾರಿ ಸಮ್ಜತೆಲ್ಯಾಂಕ್ ತುಂ ಎಕ್ಲೊ ಫಟ್ಕಿರೊ ಪ್ರವಾದಿ ಮ್ಹಣ್ ಸಮ್ಜಾತೆಲ್ಯಾಂಕ್ ಸಮ್ಜಾಲಾಂ’
‘ಮ್ಹಜೊ ಉದ್ದೇಶ್‌ಯಿ ತಸಲೊಚ್ ಆಸಾ. ಪುಣ್…’
‘ಪುಣ್ ಸಮ್ಜಾಲ್ಲೆ ತುಜೆ ಸರ್ಶಿಂ ಯೆದೊಳ್ ಯೆಂವ್ಕ್‌ನಾಂತ್.’
‘ಬರಾಬರ್!’ ಜಾಪ್ ದಿಲಿ ಟೇಯ್ಲರಾನ್. ‘ತುಜ್ಯಾ ಬೀಚ್‌ಕೊಟೆಜಿಂತ್ ಸ್ಕೊಚ್ ಆಸಾ ಮ್ಹಣ್ ಪಾತ್ಯೆತಾಂ?’
‘ಮ್ಹಜೆ ಕೊಟೆಜಿಂತ್ ಸ್ತ್ರೀ ಆನಿ ಜೆರೊಮ್ ಸೊಡ್ಲ್ಯಾರ್ ಹೆರ್ ಸರ್ವ್ ಆಸಾ!’ ಮ್ಹಳೆಂ ಮೆಥ್ಯುನ್. ‘ಕೆಬಿನೆಟ್ ತೆವ್ಶಿನ್ ಆಸಾ.’ ಆಪ್ಲೊ ಆಖ್ಹಾಣೊ ಕೊಕ್ಕೆಂ ಕರುನ್ ತಾಣೆ ದಾಕಯ್ಲೆಂ. ಟೇಯ್ಲರ್ ಉಟ್ತಾನಾ ಮೆಥ್ಯುನ್ ಮ್ಹಳೆಂ. ‘ತುಜೆಂ ದಗಾಲ್ಭಾಜ್‌ಪಣ್ ಕಳಿತ್ ಜಾಲ್ಲೆ ಉಗ್ತಡಾಂತ್ ಆಯಿಲ್ಲೆ ತರ್ ತುಜೆ ಭಾಂಡೆಂ ಫುಟ್ತೆಂ ಆನಿ ತುಜ್ಯಾ ಹ್ಯಾ ದಂದ್ಯಾಕ್, ಆಮಾಲಾಕ್ ಆನಿ ಸ್ತ್ರಿಯಾಂಕ್ ಖಾಡುಂ ಪಡ್ತೆಂ ನ್ಹಯ್?’
‘ದೆಕುನ್ಂಚ್ ಎಕ್ ದೃಶ್ ಹಾಂವೆಂ ಆಸಾ ಕೆಲ್ಲೆಂ ಎಕಾ ಜಮಾತಿ ವೆಳಾರ್. ತುಂ ಹಾಜರ್‌ನಾತ್‌ಲ್ಲೊ ಜಾಯ್ಜೆಯ್.’ ಎಕ್ ಖಡ್ಪ್ ಡ್ರಿಂಕ್ ತಯಾರ್ ಕರುನ್ ಟೇಯ್ಲರ್ ಆಪ್ಲೆ ಬಸ್ಕೆಕ್ ಆಯ್ಲೊ. ‘ತುಂ ಹಾಜರ್ ನಾತ್‌ಲ್ಲೊಯ್ ದೆಕುನ್ ತೆಂ ದೃಶ್, ಹಾಂವೆಂಚ್ ಉಬೆಂ ಕೆಲ್ಲೆಂ ತುಕಾ ವಿವರಿತಾಂ!’ ದಾಡಾಮಾಂ ಅಡ್ಚುನ್ ಮ್ಹಳೆಂ ಟೇಯ್ಲರಾನ್. “ಆಯ್ಕ್!’
ತಿತ್ಲ್ಯಾರ್-
ಆಪ್ಲೆಂಚ್ ರೊದಾಂಕದೆಲ್ ಲೊಟುನ್ ಎಕ್ಲಿ ಪ್ರಾಯ್ವೆಂತ್ ಮುಕಾರ್ ಆಯ್ಲಿ. ತಿಕಾ ಕುಮಕ್ ಕರುಂಕ್ ಆಯಿಲ್ಲ್ಯಾ ಸ್ವಯಂ ಸೇವಕಿಂಕ್ ತಿಣೆ ಪಯ್ಸ್ ಲೊಟ್ಲೆಂ. ‘ರೆವರೆಂಡ್ ಫ್ರೆಡ್ ಟೇಯ್ಲರ್!’ ತಿಣೆ ಕಷ್ಟಾಂನಿ ಆಪ್ಲೊ ತಾಳೊ ಕಾಡ್ಲೊ. ಟೇಯ್ಲರ್ ಪಂದ್ರಾ – ವೀಸ್ ಖಿಣಾಂಕ್ ಸ್ತಬ್ಧ್ ಜಾಲೊ. ಉಬಾರೊನ್ ಆಸ್‌ಲ್ಲೆ ತಾಚೆ ಬಾವ್ಳೆ ಗಳ್ಳೆ. ‘ಫ್ರೆಡ್ ಟೇಯ್ಲರ್!’ ತಿಚೊ ತಾಳೊ ಆತಾಂ ಸ್ಪಶ್ಟ್ ಜಾಲ್ಲೊ.
‘ಕಿತೆಂ ಅಪೇಕ್ಷಿತಾಯ್, ಸ್ತ್ರೀಯೆ?’
‘ಸ್ತ್ರೀಯೆ ಮ್ಹಣ್ತಾಯ್? ಹಾಂವ್ ಮರಿ ಮಗ್ದೆಲಿನ್ಂಚ್ ಜಾಲ್ಲಿಂ ತರೀ ಸ್ತ್ರೀಯೆ ಮ್ಹಣ್ ಮ್ಹಾಕಾ ಉಲೊ ಮಾರುನ್ ಕ್ರಿಸ್ತಾಚೆಂ ನಟನ್ ಆನಿ ಶಾಥಿ ತುಕಾ ನಾ, ಕಪಟ್ಯಾ!’
‘ಮುಂದರ್‍ಸಿ ಸ್ತ್ರೀಯೆ, ಪವಿತ್ ಅತ್ಮೊ ತುಜ್ಯಾ ಸಾಮ್ಕಾರ್ ಆಸಾ,’ ತಾಣೆ ಮ್ಹಳೆಂ ಶಾಂತ್ ತಾಳ್ಯಾನ್. ‘ದಯಾಕರುನ್, ತಿಚ್ಯಾ ವೊಂಟಾಂ ಸಾಮ್ಕಾರ್ ಎಕ್ ಮೈಕ್ ಧರಾ. ತಿಚೊ ತಾಳೊ ಹ್ಯಾ ಸಗ್ಳ್ಯಾ ಜಮಾತಿಕ್ ಆಯ್ಕೊಂದಿ. ಪವಿತ್ ಅತ್ಮೊ ಕೊಣೆಂಯಿ ಉಚಾರಿನಾತ್‌ಲ್ಲೆಂಯಿ ಆಯ್ಕಾತಾ!
ಎಕ್ಲೆ ಸ್ವಯಂ ಸೇವಕಿನ್ ಎಫ್.ಎಮ್. ಮೈಕ್ ತಿಚೆ ಸಾಮ್ಕಾರ್ ಧರ್‍ಲೆಂ.
‘ಹೆಂ ನಾತ್ಲ್ಯಾರ್‌ಯಿ ಮ್ಹಜೊ ತಾಳೊ ತುಜೆಂ ಕಾಳಿಜ್ ಫೊಡುಂಕ್ ಸಕ್ತಾ, ದೆಂವ್ಚಾರಾ!’ ತಿ ಮ್ಹಣಾಲಿ, ರೊದಾಂಚೆಂ ಕದೆಲ್ ಆನಿಕಿ ಮುಕಾರ್ ಲೊಟುನ್ ಹಾಡುನ್. ‘ಕಾನಾಂಕ್ ಗುಡ್ದ್ಯೊ ಚೆಪುನ್ ಕೊಣಾಕ್ ಫಟಯ್ತಾಯ್ ತುಂ? ತುಜೆ ವರ್ವಿ ಸಾದ್ಯ್ ಜಾತಾ ತರ್ ದೇಂವ್ ಆನಿ ಮ್ಹಾಕಾ ಗೂಣ್ ಕರ್.’
ಟೇಯ್ಲರ್ ತಿಕಾಚ್ ಪಳೆತಾಲೊ.
‘ಗೂಣ್ ಕರ್ಚೆಂ ಪವಿತ್ ಅತ್ಮ್ಯಾನ್—‘
‘ತುಕಾ ಆಯ್ಕಾತಾ, ತರ್?’
‘ಪವಿತ್ ಅತ್ಮ್ಯಾಚೆ ಸಕ್ತೆನ್ ಹಾಂವ್ ತುಜಿಂ ಚಿಂತ್ನಾಂಯಿ ವಾಚುಂಕ್ ಸಕ್ತಾಂ, ಸ್ತ್ರೀಯೆ.’
‘ಫಟ್ಕಿರ್‍ಯಾ! ದೋನ್‌ಯಿ ಕಾನಾಂಕ್ ಮೈಕ್ರೋ-ರಿಸೀವರಾ ಬಸಯ್ಲ್ಯಾಂಯ್ ಮ್ಹಣ್ ಕಿತ್ಯಾಕ್ ಸಾಂಗಾನಾಂಯ್?’
‘ಪವಿತ್ ಅತ್ಮ್ಯಾಕ್ ತಾಂತ್ರಿಕತೆಚಿ ಗರ್ಜ್ ನಾ, ಸ್ತ್ರೀಯೆ.’
‘ತುಜೆಂ ನ್ಹೆಸಣ್ ನ್ಹೆಸ್ ಚಲಿಯೆ!’ ರೊದಾಂಚ್ಯಾ ಕದೆಲಾಚೆರ್‌ಚ್ ಘುಂವೊನ್ ತಿಣೆ ತ್ಯಾ ವಿಣ್ಗೆಂ ಜಾಲ್ಲ್ಯಾ ಚಲಿಯೆಕ್ ಹುಕುಮ್ ದಿಲಿ.. ‘ಕಿತ್ಲೆಶಾ ದೊಳ್ಯಾಂನಿ ತುಕಾ ಆನಿಕಿ ವಿಣ್ಗೆಂ ಕರ್ಚೆ ಫುಡೆಂ ಹಾಂಗಾಥಾವ್ನ್ ವಚ್.’
ತ್ಯೆ ಚಲಿಯೆನ್ ಎಕ್ ದೀಷ್ಟ್ ಭಂವ್ತಿಂ ಚರಯ್ಲಿ ಆನಿ ತಿಕಾ ಕಿತೆಂ ಭೊಗ್ಲೆಂಗೀ, ಆಪ್ಲಿಂ ವಸ್ತ್ರಾಂ ಆರಾವ್ನ್ ವಿಂಚುನ್ ತಿ ನಪಂಯ್ಚ್ ಜಾಲಿ.
ರೊದಾಂಚ್ಯಾ ಕದೆಲಾ ವಯ್ಲಿ ಸ್ತ್ರೀ ಹಾಸ್ಲಿ.
‘ಆತಾಂ ಕಿತೆಂ ಮ್ಹಣ್ತಾಯ್, ರೆವರೆಂಡ್ ಫ್ರೆಡ್ ಟೇಯ್ಲರ್?’
ತಿತ್ಲ್ಯಾರ್ ನಿರ್ವಾಹಕ್ ಮದೆಂ ಪಡ್ಲೊ.
‘ನಾ ಪಾತ್ಯೆಣಿ ಆಸ್‌ಲ್ಲಿಂ ಅಸಲಿ ಆತರ್ವಣಾಂ ರೆವೆರೆಂಡಾಕ್ ಕಾಂಯ್ ಪರ್ಕಿ ನ್ಹಯ್. ಅಶೆಂ ಘಡ್ತಾನಾ – ಸಬಾರ್ ಪಾವ್ಟಿಂ ಅಶೆಂ ಘಡ್ಲಾಂ – ತಾಚೆಂ ಸಮಧಾನ್ ಖಂತಿನ್ ಪಿಗಳ್ತಾ ಜಾಲ್ಲ್ಯಾನ್ ತಾಕಾ ಥೊಡ್ಯಾ ವಿಶೆವಾಚಿ ಗರ್ಜ್ ಆಸಾ. ತಾಕಾ ಥೊಡ್ಯಾ ಮಿನುಟಾಂಚೊ ಮಾನಸಿಕ್ ವಿಶೆವ್ ಗರ್ಜ್. ತ್ಯಾ ಮಿನುಟಾಂಕ್ ತೊ ಆಪ್ಲ್ಯಾ ಕೆಬಿನಾಕ್ ವೆತೊಲೊ. ತವಳ್ ಪರ್ಯಾಂತ್ ಭಕ್ತಿಕ್ ಗಿತಾಂ ಆನಿ ಗಾಯಾನಾಂ ಚಾಲು ಆಸ್ತೆಲಿಂ…….
‘ವಿಚಿತ್ರ್ ದಿಸ್ತಾ ಮ್ಹಾಕಾ!’ ಮ್ಹಳೆಂ ಮೆಥ್ಯುನ್. ‘ತುಂ ಸಂಸಾರ್‌ಭರ್ ಲೊಕಾಕ್ ಮಾಂಕೊಡ್ ಕರಿತ್ತ್ ಆಯ್ಲಾಯ್ ಪುಣ್ ತುಜೆಂ ಕಪಟ್ ಉಗ್ತಡಾಕ್ ಆಯಿಲ್ಲೆಂ ನಾ….’
‘ಕೋಣ್ ಮ್ಹಣ್ತಾ ತಶೆಂ?’ ಟೇಯ್ಲರಾನ್ ಸ್ಕೊಚಾಕ್ ಘೊಟ್ ಮಾರ್ಲೊ. ‘ಸಬಾರ್ ಪಾವ್ಟಿಂ ಮ್ಹಾಕಾ ಜಮ್ಯಾನ್ ವಿಣ್ಗೊ ಕೆಲಾ. ಪುಣ್ ಯೆಕ್ಲ್ಯಾಕ್ ವಿಣ್ಗೊ ಕರ್ತಾನಾ ತಾಚೆ ಮಾತ್ರ್ ವಿಶ್ವೆ ಉಗ್ತಡಾಂತ್ ಯೆನಾಂತ್ ಮೆಥ್ಯು ಲಿಯೊ, ಹೆರಾಂಚೆಯಿ ಉಗ್ತಡಾಕ್ ಯೆತಾತ್. ಕಿತೆಂ ಚಿಂತಾಯ್/ ಸಮ್ಜತಾಯ್ ತುಂ?’
‘ಹಾಂವ್ ಕಾಂಯ್ ಸಮ್ಜಾನಾ,’ ಆತಾಂ ಮೆಥ್ಯು ಖುದ್ದ್ ಉಟ್ಲೊ ಆನಿ ಲಾಗ್ಸಾರ್ ಆಸ್‌ಲ್ಲ್ಯಾ ಫ್ರಿಡ್ಜಾಂತ್ಲಿ ಬಿಯರ್ ತಾಣೆ ಭಾಯ್ರ್ ಕಾಡ್ಲಿ. ಹೆಂ ಪಳೆವ್ನ್ ರೆವರೆಂಡ್ ಹಾಸ್ಲೊ. ‘ತುಂ ಭಾರಿಚ್ ಚತ್ರಾಯಿತ್ ಆಸಾಯ್ ನ್ಹಯ್?’
‘ವ್ಹಯ್!’ ಮೆಥ್ಯುನ್ ಜಾಪ್ ದಿಲಿ. ‘ತುಜ್ಯಾ ಆನಿ ಮ್ಹಜ್ಯಾ ಮುಲಾಕತೆಚಿ ತಯಾರಾಯ್ ಕೆಲ್ಯಾ ತುಜ್ಯಾ ದಿಸಿಪ್ಲಾಂನಿ ದೆಕುನ್ ಹಾಂವ್ ಚತ್ರಾಯಿತ್ ಆಸಾಂ.’
‘ತರ್ ಹಾಂವೆಂ ಕಸಲಿ ತಯಾರಿ ಕರಿಜೆ, ಮೆಥ್ಯು?’ ಟೇಯ್ಲರಾನ್ ವಿಚಾರ್ಲೆಂ. ‘ಹಾಂವ್ ಸಂಸಾರ್‌ಭರ್ ಪ್ರಖ್ಯಾತ್ faith healer….’
‘ಬರಾಬರ್ ಪುಣ್ ತುಂಯಿ ಕಸಲ್ಯಾಗಿ ಸೊದ್ನೆರ್ ಆಸಾಯ್!’ ಮೆಥ್ಯುನ್ ತಾಚೆ ದೊಳೆ ಧರ್ಲೆ. ‘ದೆಕುನ್ ತುಂ ಗಾಂಬಾಣ್ ಗಾಂವ್, ದೆಶಾನ್ ದೇಶ್ ಭೊಂವ್ತಾಯ್ ಆನಿ ಸೊದ್ತಾಯ್. ಸಾಂಗ್ ಮ್ಹಾಕಾ, ತುಂವೆಂ ಗೂಣ್ ಕೆಲ್ಲೆ ಪಿಡೇಸ್ತ್ ಆತಾಂ ಖಂಯ್ ಆಸಾತ್? ತುಜೊ ಉಪ್ಕಾರ್ ಭಾವ್ಡುಂಕ್ ತೆ ಪಾಟಿಂ ಆಯ್ಲ್ಯಾತ್? ತುಂವೆಂ ತುಜ್ಯಾ ಸಕತೆಕ್ ಸಾಕ್ಸ್ ಜಾವ್ನ್ ಆಪಂವ್ಚೆ ಸರ್ವ್ ನಕಾರಿ, ಫಟ್ಕಿರೆ ಆನಿ ತುಂವೆಂ ದಿಂವ್ಚ್ಯಾ ನೊಟಾಂಚ್ಯಾ ದಾಟ್ ಅಟ್ಟ್ಯಾಂಕ್ ಖಾಲ್ ಜಾಂವ್ಚೆ ಮ್ಹಣ್ ಸಗ್ಳೊ ಸಂಸಾರ್ ಉಲಯ್ತಾ ತರಿ ತುಂ ತುಜ್ಯೊ ಜಮಾತಿ ಭೋವ್ ಯಶಸ್ವಿ ಥರಾನ್ ಚಲಯ್ತಾಯ್. ಹಾಂವೆಂ ವಾಚ್ಲಾಂ ಪತ್ರಾಂನಿ, ತುಜ್ಯಾ ಪ್ರಥಮ್ ಜಮಾತಿಕ್ ಕ್ರಿಸ್ತ್ ಸೊಡ್ಲ್ಯಾರ್ ಹೆರ್ ಸರ್ವ್ ಆಯಿಲ್ಲೆ ಖಂಯ್!
ಟೇಯ್ಲರ್ ಹಾಸ್ಲೊ.
‘ಚೂಕ್ ಭಾತ್ಮಿ!’ ತಾಣೆ ಮ್ಹಳೆಂ. ‘ಕ್ರಿಸ್ತ್‌ಯಿ ಆಯಿಲ್ಲೊ!’
‘ಪುಣ್ ತುಂವೆಂ ಉಲೊ ದಿಲ್ಲೊಯ್ ಪವಿತ್ ಅತ್ಮ್ಯಾಕ್?’
‘ವ್ಹಯ್, ತೇಗ್ ಜಣ್ ಎಕ್ ದೇವ್ ನ್ಹಯ್?’
‘ಹಾಂವ್ ಕಾಂಯ್ ತಿತ್ಲೊ ವ್ಹಡ್ ಭಾವಾರ್ಥಿ ನ್ಹಯ್!’ ಮೆಥ್ಯುನ್ ಮ್ಹಳೆಂ. ‘ದೆಕುನ್ ತುಜಿ ಮಾಂತ್ರಿಕತಾ ಮ್ಹಜೆರ್ ವಾಪರ್‍ನ್ ತುಜೊ ವೇಳ್ ಪಾಡ್ ಕರಿನಾಕಾ.’
‘ತರ್ ಸಾಂಗ್, ಮ್ಹಾಕಾ ಭೆಟೊಂಕ್ ತುಕಾ ಕಿತ್ಯಾಕ್ ಜಾಯ್ ಆಸ್‌ಲ್ಲೆಂ?’
‘ಮ್ಹಜಿ ಕಥಾ ತುಂ ನೆಣಾಂಯ್,’ ಮೆಥ್ಯುನ್ ಮ್ಹಳೆಂ. ‘ಮ್ಹಜಿಚ್ಚ್ ಕಥಾ ಮ್ಹಾಕಾಚ್ ಪರಿಪೂರ್ಣ್ ಕಳಿತ್ ನಾತ್‌ಲ್ಲಿ ಪುಣ್ ಥೊಡ್ಯಾಚ್ ಘಂಟ್ಯಾಂ ಆದಿಂ ಖಂಯ್‌ಸರ್‌ಗೀ ಥಾವ್ನ್ ಎಕ್ ಗಾಂಚ್ ಯೆವ್ನ್ ಘಡ್ಸಾಲಾ. ಫುಡೆಂ ಕಿತೆಂ ಮ್ಹಳ್ಳೆಂ ಸವಾಲ್ ಮ್ಹಾಕಾ ಧೊಸ್ತಾನಾ ಮ್ಹಾಕಾ ವಿಸಿಸ್ಟ್ ಆಫೀಮಾಚಿ ಗರ್ಜ್ ಪಡತ್. ದೆಕುನ್ ಹಾಂವೆಂ ಎಕ್ ಜುಗಾರ್ ಮಾರ್ಲಿ – ತುಜ್ಯಾ ಸಕತೆಕ್ ತುಕೊನ್ ಪಳೆಂವ್ಚಿ.’
‘ಪುಣ್ ಮ್ಹಾಕಾ ಸಕತ್ ಆಸಾ ಮ್ಹಣ್ ತುಂ ಪಾತ್ಯೆತಾಯ್? ಎಕ್ ಅಪ್ರತಿಮ್, ಚುರುಕ್ ಆನಿ ಡೇರ್‌ಡೆವಿಲ್ ವಯ್ವಾಟಿ ತುಂ ಮ್ಹಜ್ಯಾ ಸಕತೆಕ್ ಕಶಿ ವಾಪರ್ಶಿ? ಖಂಚೊ ಟೆಂಡರ್ ತುಕಾ ಲಾಬಾತ್ ಮ್ಹಳ್ಳೆಂ ಬೊಲ್ಮೆಂ ಹಾಂವೆಂ ತುಕಾ ಸಾಂಗಾಜೆ, ಅಶೆಂ?’
‘ಮ್ಹಜ್ಯಾ ವಿಷಾಂತ್ ತುಂವೆಂ ಜಾಯ್ತಿ ಸೊದ್ನಾಂ ಕೆಲ್ಲ್ಯಾಪರಿಂ ದಿಸ್ತಾತ್, ರೆವರೆಂಡ್!’
‘ಖಂಚಾಯಿ ಎಕಾ ದೇಶಾಥಾವ್ನ್ ಮ್ಹಾಕಾ ಆಪವ್ಣೆಂ ಯೆತಾನಾ ಹಾಂವ್ ದೋನ್ ಸಂಗ್ತಿ ತಜ್ವೀಜ್ ಕರ್ತಾಂ – ಮ್ಹಾಕಾ ಆಪಯಿಲ್ಲೊ ವೆಕ್ತಿ ಕೋಣ್ -ಹಾಂಗಾಸರ್ ಮೌರಿಸ್ ಅಗುಸ್ತಿನ್. ತಾಚೊ ಪಾಟ್ಪೊಡ್ದೊ ಕಸಲೊ? ವಯ್ವಾಟಿ ಆನಿ ರಾಜ್‌ಕಾರಿಣಿ. ಉದ್ದೇಶ್ ಕಸಲೊ ಆಸ್ಯೆತ್. ವಯ್ವಾಟಾಂತ್ ಸಲ್ವಣ್ ಆನಿ ಆಪ್ಲಿ ಕಂಪೆನಿ ಮೆಥ್ಯು ಲಿಯೊ ಮ್ಹಳ್ಳ್ಯಾಚ್ಯಾ ಒಸಿಸ್ ಕಂಪೆನಿಕ್ ವಿಕುನ್ ಸುಟ್ಕಾ ಘೆಂವ್ಚಿ ಮಜ್ಬೂರಿ. ಆನಿ ಕೋಣ್ ಹೊ ಮೆಥ್ಯು ಲಿಯೊ? ಸತ್ ಸಾಂಗ್ತಾಂ, ತುಜೆ ವಿಶಾಂತ್ ಆನಿ ತುಜ್ಯಾ ಕಂಪೆನಿ ವಿಶಾಂತ್ ಚಡ್ ಮಾಹೆತ್ ಆರಾಂವ್ಕ್ ಮ್ಹಜ್ಯಾ ಸಿಸೇರೊ ಯಾ ಹೆರಾಂಕ್ ಜಾಂವ್ ಜಾಲೆಂ ನಾ. ತುಂ ಎಕ್ ನಿಗೂಡ್ ಮನಿಸ್, ವೊಪ್ತಾಂ ಹಾಂವ್. ಆತಾಂ ಮ್ಹಜ್ಯಾ ನಿಮಾಣ್ಯಾ ಜಮಾತಿಕ್ ಫಕತ್ ಎಕ್ ದೀಸ್ ಉರ್‍ಲಾ ಆನಿ ಫಾಟ್ಲ್ಯಾ ಥೊಡ್ಯಾ ಘಂಟ್ಯಾಂನಿ ಸಬಾರ್ ನವೆಸಾಂವಾಂ ಮ್ಹಾಕಾ ಉಗ್ತಿಂ ಜಾಲ್ಯಾಂತ್ – ಕಿತ್ಯಾಕ್ ತಿಂ ಮ್ಹಾಕಾಚ್ಚ್ ಉಗ್ತಿಂ ಕೆಲ್ಯಾಂತ್ ಮ್ಹಳ್ಳ್ಯಾ ಸವಲಾಕ್ ಮ್ಹಜೆಲಾಗಿಂ ಜಾಪ್ ನಾ. ಜಾಪ್ ಸೊದುಂಕ್ ವೇಳ್‌ಯಿ ಆಸ್ಚೆಪರಿಂ ದಿಸನಾ.’
ಮೆಥ್ಯುನ್ ಆಪ್ಲೆಂ ಬಿಯರ್ ಮಗ್ಗ್ ಖಾಲಿ ಕೆಲೆಂ.
‘ತುಂವೆಂ ಆತ್ತಾಂ ಜಾಯ್ರ್ ಕೆಲ್ಲ್ಯಾ ಸವಲಾಕ್ ಕಾಂಯ್ ಜಾಪ್ ಮೆಳತ್ ಮ್ಹಣ್ ತುಂವೆಂ ಮ್ಹಾಕಾ ಭೆಟೊಂಕ್ ಕಬ್ಲಾತ್ ದಿಲಿಯ್ ಯಾ—‘
‘ಯಾ, ಹಾಲಿಂಚ್ ತುಜೆಥಂಯ್ ಘಡ್ಸಾಲ್ಲ್ಯಾ ಗಾಂಚಾಕ್ ಮತ್ಲಬ್ ಯೆಶೆಂ ಕರುಂಕ್ ತುಂವೆಂ ಮ್ಹಾಕಾ ಭೆಟೊಂಕ್ ಅಪೇಕ್ಷಿಲೆಂಯ್?’
ಮೆಥ್ಯು ಆಪ್ಲೆಂ ಮಾತೆಂ ಹಾಲಯ್ಲೆಂ ಆನಿ ತೊ ಹಾಸ್ಲೊ. ‘ಹಾಂವ್ ಎಕ್ ವಿಬಿನ್ನ್ ವ್ಯಕ್ತಿ, ರೆವರೆಂಡ್’ ತಾನೆ ಮ್ಹಳೆಂ. ‘ತುಜ್ಯಾ ತಸಲ್ಯಾ ದೆಂವ್ಚಾರಾಕ್ ಹಾಂವ್ ಕಿತ್ಯಾಕ್ ರೆವರೆಂಡ್ ಮ್ಹಣ್ ಮಾನಾನ್ ಉಲೊ ಮಾರ್ತಾಂ ತೆಂ ಮ್ಹಾಕಾ ಕಳಿತ್ ನಾ.’
‘ದೆಂವ್ಚಾರ್‌ಯಿ ಆಂಜ್ ಜಾವ್ನಾಸ್‌ಲ್ಲೆ ನ್ಹಯ್, ಮೆಥ್ಯು? ತುಜೊ ಬಾಯ್ಬಲ್ ವಿಸರ್ಲೊಯ್ ತುಂ? ಹ್ಯಾಚ್ ದೆಂವ್ಚಾರಾಂನಿ ಕ್ರಿಸ್ತಾಕ್ ಡಾಯ್ರೆಕ್ಟ್ ನಾಡ್ಚೆಂ ಪ್ರೇತನ್ ಕರುಂಕ್ ನಾ?’
‘ಆತಾಂ ಕಿತೆಂ ತುಂ ಕ್ರಿಸ್ತಾಚೆಂ ಮಿಸಾಂವ್ – ದೆಂವ್ಚಾರಾಂಕ್ ಧಾಂವ್ಡಾಂವ್ಚೆಂ ತುಂವೆಂಚ್ ಮಾತೆಂ ಮಾರುನ್ ಘೆತ್ಲಾಂಯ್?’
‘ಮೆಥ್ಯು, ಮೆಥ್ಯು…’ಟೇಯ್ಲರ್ ಮ್ಹಣಾಲೊ ಆಪ್ಲೆಂ ಮಾತೆಂ ಹಾಲವ್ನ್. ‘ದೆಂವ್ಚಾರ್ ಮ್ಹಳ್ಯಾರ್ ಕಿತೆಂ ಮ್ಹಣ್ ಚಿಂತಾತ್ ತುಮಿ? ಸಾತ್ ಶಿಂಗಾಂ ಆಸ್ಚೊ, ಸ್ಟೀಲಾಚಿ ಶಿಮ್ಟಿ ಆಸ್ಚೊ, ಲಾಂಬ್ ಆನಿ ಚೂಪ್ ಕಾನ್ ಆಸ್ಚೊ ಎಕ್ ಭಯಂಕೃತ್ ಮನಿಸ್?’
‘ಸವಾಲ್ ತುಜೆಂ, ಜಾಪ್ ತುಜೆಚ್ಚ್ ಲಾಗಿಂ ಆಸ್ತೆಲಿ, ತುಂ ಕಸೊಯಿ ದೆಂವ್ಚಾರಾಂಕ್ ಧಾಂವ್ಡಾಯ್ತಾಯ್ ನ್ಹಯ್? ಸಬಾರ್ ದೆಂವ್ಚಾರಾಂಕ್ ತುಂವೆಂ ಪಳೆಲಾಂಯ್ ಆಸ್ತೆಲೆಂ.’
‘ಕ್ರಿಸ್ತಾನ್ಂಚ್ ಹಾಂವೆಂ ವರ್ಣಿಲ್ಲ್ಯಾ ತಸಲ್ಯಾ ದೆಂವ್ಚಾಚಾರಾಂಕ್ ಪಳೆಲ್ಲೆಂ ನಾ, ತಾಂಚೆಂ ವಿವರಣ್ ದಿಲ್ಲೆಂ ನಾ. ದೆಂವ್ಚಾರ್ ಮ್ಹಳ್ಯಾರ್ ಎಕಾ ದೃವಾಪರಿಂ. ಖಂಚ್ಯಾ ಆಯ್ದಾನ್ ತಾಕಾ ತುಂ ಘಾಲ್ತಾಯ್, ತ್ಯಾ ಆಯ್ದಾನಾಚೆಂಚ್ ರೂಪ್ ತೊ ಘೆತಾ.’
‘ಮುಂದರ್‍ಸಿ!’ ಆಪವ್ಣೆಂ ದಿಲೆಂ ಮೆಥ್ಯುನ್, ಆತಾಂ ಆಪ್ಲೆ ಬಸ್ಕೆರ್ ಮುಕಾರ್ ಭಾಗ್ವೊನ್ ಬಸುನ್. ‘ವೆರ್ರಿ ಇಂಟ್ರೆಸ್ಟಿಂಗ್.’
‘ತುಕಾ ಜಾಣಾರ್‍ಯಾಕ್ ವೆರ್ರಿ ಇಂಟ್ರೆಸ್ಟಿಂಗ್ ಜಾತಾ ಜಾಲ್ಯಾರ್, ಮ್ಹಜ್ಯಾ ಜಮಾತಿಂಕ್ ಯೆಂವ್ಚ್ಯಾ ಉಣ್ಯಾ ಭಾವಾಡ್ತಾಚ್ಯಾಂಕ್?’
‘ತರಿ ಪುಣ್ ತುಂ ಜಾಯ್ತಿಂ ಶಿಕ್ಣಾಂಯೊ ಘೆತಾಯ್ ನ್ಹಯ್?’
‘ವ್ಹಯ್! ಮ್ಹಜ್ಯಾ ಜಮಾತಿಂಕ್ ಆಯಿಲ್ಲ್ಯಾಂ ಮದೆಂ ಮೆಥ್ಯು ಲಿಯೊ, ರಮೋನಾ, ಲಿಲಿಯನ್ ಜೆನಿಸ್ ಆಸ್ತಿತ್ ತರ್ ಆನಿ ತಿಂ ಮ್ಹಜೆಂ ಭಾಂಡೆಂ ಫೊಡುಂಕ್ ಅಟ್ಟಾಣೆ ಕರ್ತಿತ್ ತರ್?’
‘ಯೆದೊಳ್ ಹೆಂ ಘಡ್ಲೆಂ?’
‘ನಾ ಪುಣ್ ನಿಮಾಣ್ಯಾ ಜಮಾತಿಂತ್ ಕಿತೆಂ ಜಾಯ್ತ್ ಮ್ಹಣ್ ಸಾಂಗೊಂಕ್ ಜಾಯ್ನಾ ನ್ಹಯ್?’
‘ಮ್ಹಜೆರ್ ಕಾಂಯ್ ಶಖ್ ಆಸಾ ದೆಕುನ್ ತುಂ ಹ್ಯಾ ಮುಲಾಕತೆಕ್ ವೊಪ್ಲೊಯ್?’
‘ಆಮಿ ಘುಂವೊನ್ ಘುಂವೊನ್ ತ್ಯಾಚ್ ಕೇಂದ್ರಾಕ್ ಯೆತಾಂವ್, ಮೆಥ್ಯು!’ ಆಪ್ಲಿ ಸ್ಕೊಚ್ ಖಾಲಿ ಕೆಲಿ ಟೇಯ್ಲರಾನ್. ‘ಆತಾಂ ಹೊ ಖ್ಹೆಳ್ ತುಂವೆಂ ಬಂದ್ ಕರಿಜೆ ಆನಿ ಶೀದಾ ಮುಕ್ಯಾಂಶಾಕ್ ಯೆಜೆ. ಹಿ ಭಾವಾರ್ಥಾಚಿ ಉಡ್ಕಿ ಹಾಂವೆಂ ಪೆಟ್ರೋಸ್ಟೆಟಾಂತ್ ಮಾರ್‌ಲ್ಲಿ ಆನಿ ಮಾರಯಿಲ್ಲಿ ಕಾಂಯ್ ಮಾಂತ್ರಿಕಾನ್ ಆಪ್ಲ್ಯಾ ಚೆಪ್ಯಾ ಬಿತರ್‌ಥಾವ್ನ್ ಸಂಸೊ ಭಾಯ್ರ್ ಕಾಡ್ಚೊ ನ್ಹಯ್. ಹಾಂವ್ ಮ್ಹಜ್ಯಾ ವ್ಯಾಪ್ತೆಂತ್ ಬರೊಚ್ ಹೆಳ್ಳಾಂ. ಮ್ಹಾಕಾ ಮ್ಹಜೆ ಜಿಣಿಯೆನ್ ಕಿತ್ಲೆಶೊ ಉಡ್ಕ್ಯೊ ಮಾರಿಶೆಂ ಕೆಲ್ಯಾತ್, ತುಂ ನೆಣಾಂಯ್. ಪುಣ್ ಶಾಣೊ ತುಂ, ಹಾಂವ್ ಕಸಲ್ಯಾಗಿ ಸೊದ್ನೆರ್ ಆಸಾಂ ಮ್ಹಳ್ಳೆಂ ತುಂ ಜಾಣಾಂಯ್ ಕೋಣ್ ಸೊದ್ನೆ ನಾಂತ್? ಕ್ರಿಸ್ತ್ ಸಯ್ತ್ ಸೊದ್ನೆರ್ ಆಯಿಲ್ಲೊ ಆನಿ ತಾಣೆ ಬಾರಾ ಜಣಾಂಕ್ ವಿಂಚ್ಲೆಂ….’
‘ಪುಣ್ ತುಂವೆ ಕಿತ್ಯಾಕ್ ಪವಿತ್ ಅತ್ಮ್ಯಾಕ್ ವಿಂಚ್ಲೊಯ್?’
‘ಕಿತ್ಯಾಕ್ ಮ್ಹಳ್ಯಾರ್ ಕ್ರಿಸ್ತಾನ್ ಪಾಟಿಂ ಸೊಡ್‌ಲ್ಲೊ ತೊಚ್ ನ್ಹಯ್, ಪವಿತ್ ಅತ್ಮೊ?’
‘ವ್ಹಯ್ ಪುಣ್ ತುಕಾ ಕೊಣೆ ಅಧಿಕಾರ್ ದಿಲೊ ಪವಿತ್ ಅತ್ಮ್ಯಾಕ್ ಬಲ್ಸಾಂತ್ ಘೆವ್ನ್ ಭೊಂವೊಂಕ್?’ ವಿಚಾರ್ಲೆಂ ಮೆಥ್ಯುನ್. ‘ಕಸಲೆಂ ಆಸಾ ಚಿಂತಪ್ ಕಾತೊಲಿಕ್ ಪವಿತ್ ಸಭೆಚೆಂ, ಭಾವಾರ್ಥಾಥಾವ್ನ್ ಭಲಾಯ್ಕೆ ವಿಷಾಂತ್? ಕಿತೆಂ ಶಿಕಯ್ತಾ ಕಾತೊಲಿಕ್ ಪವಿತ್ ಸಭಾ faith healing-ಂಗಾಚೆರ್?’
ಟೇಯ್ಲರಾನ್ ಆಪ್ಲ್ಯೊ ಆಸ್ಡ್ಯೊ ಅಶೀರ್ ಕೆಲ್ಯೊ ಆನಿ ತಾಂಚ್ಯಾಂ ಖಾಂಚಿಂತ್ಲ್ಯಾ ಮೆಥ್ಯುಕ್ ದೆಕ್ಲೊ. ‘ತುಂ ಅಸಲಿಂ ವಿಂಚ್ಣಾರ್ ಸವಲಾಂ ವಿಚಾರ್ತಾಯ್‌ಕಿ, ಬರಿಚ್ ತಯಾರಾಯ್ ಕರುನ್ ಆಯ್ಲ್ಯಾ ಕಸೊ ದಿಸ್ತಾಯ್. ಜಾಪಿ ಮ್ಹಜೆಲಾಗಿಂ ಆಸಾತ್; ಸಬಾರ್ ವರ್‍ಸಾಂ ಹಾಂವೆಂ ಭಾವಾರ್‍ಥಾನ್ ಭಲಾಯ್ಕಿ ಪಂಗ್ಡಾಂ ಸಾಂಗಾತಾ ಖರ್ಚಿಲ್ಯಾಂತ್. ನಾಂವಾಂ ತುಂವೆಂ ಆಯ್ಕಾಲ್ಯಾಂಯ್ ಆಸ್ಯೆತ್, ಬೆನ್ನಿ ಹಿನ್ನ್ ಆನಿ ಹೆರ್, ಪಟ್ಟಿ ಲಾಂಬ್ ಆಸಾ. ಕಾತೊಲಿಕ್ ಸಭೆಚೆಂ ಚಿಂತಪ್? ಕಾತೊಲಿಕ್ ಸಭಾ ಭಾವಾರ್‍ಥಾನ್ ಭಲಾಯ್ಕಿ ಮ್ಹಳ್ಳ್ಯಾಚೆರ್ ಸ್ಪಷ್ಟತೇನ್ ಕಸಲೆಂಚ್ ಶಿಕಯ್ನಾ. ಮ್ಹಜ್ಯಾ ಜಮಾತಿಂಕ್ ಯೆತೆಲೆ ಕಾತೊಲಿಕ್ ಯಾಜಕಾಂಚಿ ಪರ್ವಣ್ಗಿ ಘೆವ್ನ್ ಯೆತಾತ್ ಮ್ಹಣ್ ತುಂ ಚಿಂತಾಯ್? ತುಂ ಕಾತೊಲಿಕ್, ವ್ಹಯ್? ತುಂ ಮ್ಹಜ್ಯಾ ಎಕಾ ಜಮಾತಿಕ್ ಯೆವ್ನ್ ಕಾರಾಂತ್ ಬಸ್ಲೊಯ್ ಪುಣ್ ಪರ್ವಣ್ಗಿ ಘೆತ್ಲಿ?’
‘ಆಮಿ ಬಾಳ್-ಉಲವ್ಣೆಂ ಉಲಯ್ತಾಂವ್, ಟೇಯ್ಲರ್!’ ಮ್ಹಳೆಂ ಮೆಥ್ಯುನ್. ‘ಹಾಂವ್ ಕಸಲಿಚ್ ತಯಾರಾಯ್ ಕರುನ್ ಯೆಂವ್ಕ್ ನಾ.’
‘ಮಾಂದ್ಲೆಂ ಪುಣ್ ತುಂ ಆಯ್ಲೊಯ್ ತರಿ ಕಿತ್ಯಾಕ್? ಮ್ಹಾಕಾ ಭೆಟೊಂಕ್ ಕಸಲೆಂ ಕಾರಾಣ್ ತುಜೆಲಾಗಿಂ ಆಸಾ?’
‘ಜೆಂ ಆನಿ ತೆಂಚ್ ಕಾರಾಣ್ ತುಂ ಮ್ಹಾಕಾ ಹಾಂಗಾಸರ್, ಮ್ಹಜ್ಯಾಚ್ ಬೀಚ್ ಕೊಟೆಜಿಂತ್ ಯೆವ್ನ್ ಭೆಟೊಂಕ್ ವೊಪ್ವಾಲ್ಲೆಂ.’
‘ಪರ್ತ್ಯಾನ್, ಕೊಂಬಿ ಪಯ್ಲಿ ಯಾ ತಾಂತಿಂ ಪಯ್ಲೆಂ ಮ್ಹಳ್ಳೊ ವಾದ್?’ ಟೇಯ್ಲರ್ ಹಾಸ್ಲೊ.
‘ಸೊಡ್ಯಾಂ ಹೆ ಒದ್ದುವರಾಂಟ್….ಹಾಂವ್ ಕಸಲ್ಯಾಗಿ ಎಕಾ ಸತಾಚ್ಯಾ ಸೊದ್ನೆರ್ ಆಸಾಂ, ಹಾಲಿಂಚ್ ಮ್ಹಾಕಾ ಎಕ್ ಸುರಾಗ್ ಮೆಳ್ಳಾ ಪುಣ್ ರುಜ್ವಾತ್ ಮೆಳೊಂಕ್ ನಾ. ರುಜ್ವಾತ್ ಮ್ಹಾಕಾ ಗರ್ಜೆಚಿ, ಕ್ರಿಸ್ತಾನ್ ಫಾರಿಕ್ಪಣ್ ಮ್ಹಜೆರ್ ಸೊಡಾ ಮ್ಹಣ್ ತಾಕಿದ್ ದಿಲ್ಯಾ ಜಾಲ್ಯಾರಿ ಮ್ಹಾಕಾ ಮ್ಹಜೆಂ ಫಾರಿಕ್ಪಣ್ ಜಾಯ್. ಹ್ಯಾ ತೀರ್ಪಾಚೆರ್ ಹಾಂವ್ ಕಸೊ ಪಾವ್ಲೊಂ ಮ್ಹಣ್ ಆಯ್ಕೊಂಕ್ ತುಕಾ ಜಾಯ್?’
‘ಹಾಂವ್ ಕಾಂಯ್ ತರಿ ಜಳವ್ ತುಜ್ಯಾ ಫಾರಿಕ್ಪಣಾಕ್ ಘಾಲುಂಕ್ ಸಕ್ತಾಂ ಮ್ಹಳ್ಳಿ ಪಾತ್ಯೆಣಿ ತುಕಾ ಆಸಾ ತರ್, ಬರೆಂ, ಹಾಂವ್ ಆಯ್ಕೊಂಕ್ ತಯಾರ್ ಆಸಾಂ. ಪುಣ್ ಹ್ಯಾ ಕಬ್ಲಾತೇಕ್ ಆನಿ ಮ್ಹಜ್ಯಾ ಜಮಾತಿಂಕ್ ಆನಿ ಜಮಾತಿಂನಿ ಘಡ್ಚ್ಯಾಚ್ ಕಸಲೊಚ್ ಸಂಬಂದ್ ನಾ.’
‘ಕಿತ್ಯಾಕ್ ಹೆಂ ಶರ್ಥ್?’
‘ಕಿತ್ಯಾಕ್ ಮ್ಹಳ್ಯಾರ್ ಹಾಂವ್‌ಯಿ ಸೊದ್ನೆರ್ ಆಸಾಂ!’
‘ತುಜ್ಯಾ ಪವಿತ್ ಅತ್ಮ್ಯಾನ್ ತುಕಾ ಆಪ್ಡೊಂಕ್ ನಾ?’
ರೆವರೆಂಡ್ ಫ್ರೆಡ್ ಟೇಯ್ಲರಾನ್ ಜಾಪ್ ದಿಲಿ ನಾ.
ಆಪ್ಲ್ಯಾ ಸಂಪುರ್ಣ್ ದಿಗಾಯೆಕ್ ತೊ ಉಬೊ ಜಾಲೊ. ‘ಆತಾಂ ತುಂವೆಂ ಸುಟಾವೆಂ ಉಲೊವ್ಯೆತ್.’ ತಾಚ್ಯಾ ಪರಿಪೂರ್ಣ್ ದೀಗಾಯೆಚೆರ್ ಮೆಥ್ಯುನ್ ಬಾರೀಕ್ಸಾಣೆನ್ ದೀಷ್ಟ್ ಚರಯ್ಲಿ. ಕಸಲಿಗಿ ಮಾಂತ್ರಿಕತಾ ಹ್ಯಾ ಟೇಯ್ಲರಾಥಂಯ್ ಆಸ್‌ಲ್ಲಿ ಯಾ ದೆಂವ್ಚಾರ್‌ಚ್ ತಾಚ್ಯಾ ವ್ಯಕ್ತಿತ್ವಾಂತ್ ಆಸ್‌ಲ್ಲೊ ಮ್ಹಳ್ಳೊ ದುಬಾವ್ ಮೆಥ್ಯುಕ್ ಮಾರ್ಲೊ ತರಿ ತೊ ಉಲಯ್ಲೊ ನಾ. ಪುಣ್-
‘ಹಾಂವೆಂ ಸುಟಾವೆಂ ಉಲಯ್ಜೆಯ್ ಮ್ಹಣ್ ತುಂ ಮ್ಹಣ್ತಾಯ್?’ ವಿಚಾರ್ಚೆಂ ವಿಚಾರ್ಲೆಂ ಮೆಥ್ಯುನ್. ‘ಮ್ಹಜೆಲಾಗಿಂ ಸುಟಾವೆಂ ಉಲಯ್ಜೆ ಆಸ್ಚೆಂ ಆಸಾ ಮ್ಹಣ್ ತುಂ ಪಾತ್ಯೆತಾಯ್?’
‘ಪಾತ್ಯೆತಾಂ ಮಾತ್ರ್ ನ್ಹಯ್, ಹಾಂವ್ ಖಚಿತ್ ಜಾಣಾಂ!’ ಕೆಬಿನೆಟಾ ಸರ್ಶಿಂ ವಚುನ್ ಟೇಯ್ಲರಾನ್ ಆನ್ಯೇಕ್ ಸ್ಕೊಚ್ ಘೆತ್ಲಿ. ‘ನಾತರ್ಲ್ಲಿ ತರ್ ತುಂ ಅಶೆಂ ಎಪೊಂಯ್ಟ್‌ಮೆಂಟ್ ಘೆವ್ನ್ ಹಾಂಗಾಸರ್ ಆಸ್ತೊನಾಂಯ್. ತುಜೆಥಂಯ್ ಸುಪ್ತ್ ಆಸ್ಚಿ ಸಂಗತ್ ತುಕಾ ದಣ್ಸಿತಾ ಆನಿ ಹಿ ಸಂಗತ್ ಉಗ್ತ್ಯಾನ್ ಸಾಂಗೊಂಕ್ ಜಾಲ್ಲಿ ತರ್ ತುಂ ಮ್ಹಜ್ಯಾ ಜಮಾತಿಂಕ್ ಯೆತೊಯ್, ತ್ಯೊ ಬನಾವಟಿ ಮ್ಹಣ್ ಕಳೊನ್ ಆಸ್ಲ್ಯಾರೀ.’
ಮೆಥ್ಯುನ್ ಆಪ್ಲಿ ಬಿಯರ್ ಖಾಲಿ ಕೆಲಿ.
‘ಹಾಂವ್ ಬನಾವಟಿ ವ್ಹಯ್ ಆನಿ ಅಶೆಂ ಹಾಂವೆಂ ಜಾಂವ್ಕ್ ಕಾರಾಣಾಂ ಸಬಾರ್ ಆಸಾತ್. ಪುಣ್ ಹಾಂವ್ ಚಲಾಕೆಂಚೊ ಮನಿಸ್!’ ಟೇಯ್ಲರಾನ್ ಮುಂದರಿಲೆಂ. ‘ಮ್ಹಜ್ಯಾ ಹ್ಯಾ ಚಲಾಕೆಂನಿ ಹಾಂವ್ ಮಾನಸಿಕ್ ಬರೆಪಣ್ ಆನಿ ಅಜಾಪಾಂ ಕರುಂಕ್ ಸಕ್ತಾಂ ಆನಿ ಸಕ್ಲಾಂ. ಪುಣ್ ಹಾಂವ್ ಕಿತ್ಯಾಕ್ ಅಸೊಂ, ಹೆಂ ಸವಾಲ್ ಮ್ಹಾಕಾ ಕೊಣೆಂಚ್ ಕೆಲ್ಲೆಂ ನಾ. ಮ್ಹಜೆ ಭಂವ್ತಣಿ – ಹಾಂವ್ ಗೆಲ್ಲ್ಯಾ ಕಡೆನ್ – ದಿಸಿಪಲ್ ಆಂಜ್ಯಾಪರಿಂ ಪಾಕಾಟೆ ಉಸವ್ನ್ ದಾದ್ಲೆ ಆನಿ ಚಲಿಯೊ ಕಿತ್ಯಾಕ್ ಉಬ್ತಾತ್ ಮ್ಹಳ್ಳೆಂ ಹಾಂವ್ ಜಾಣಾಂ. ತಾಂಕಾಂ ಎಕಾ ಥರಾಚೆಂ ಚುಕಾರಿಮಾರ್‌ಪಣ್ – escapism – ತುಕಾಯಿ ಜಾಯ್ ತೆಂಚ್ ಆನಿ ಹಜಾರಾಂನಿ ಮ್ಹಜ್ಯಾ ಜಮಾತಿಂಕ್ ಯೆತೆಲ್ಯಾಂಕ್‌ಯಿ ಜಾಯ್ ತೆಂಚ್. ಆನಿ ತಾಂಚೆರ್ ಹಾಂವ್ ಎಕ್ ಸಾಮಾನ್ಯ್ ಮುಲಾಮ್ ವಾಪರ್‍ತಾಂ. ಗಾಂಟಿಂಚಿ, ಸಂದಾಂಚಿ ದೂಕ್ ಆನಿ ತಕ್ಲೇಫಡಾಫಡ್ ಇತ್ಯಾದಿ ಯೆತ್ ತರ್ ಆಮಿ ಕಸಲ್ಯೊ ಕಸ್ಲ್ಯೊ ಮುಲಾಮ್ಯೊ/ಬಾಮ್ ಸಾರಯ್ತಾಂವ್, ವ್ಹಯ್? ತ್ಯೊ ಸಾರಯ್ತಾನಾ ಹುಲೊಪ್ ಆಸ್ತಾ ಆನಿ ತವಳ್ ಆಮ್ಕಾಂ ಭೊಗ್ತಾ ತಿ ಮುಲಾಮ್/ಬಾಮ್ ಕಾಮ್ ಕರ್ತಾ. ಅಳೆ ಆನಿ ಅಬ್ಳೆ, ಮ್ಹಾಕಾ ಆರಾಮ್ ಮೆಳ್ಳೊಚ್ ಮ್ಹಳ್ಳೆಂ placebo ಭೊಗಾಪ್ ಆಮ್ಚೆಥಂಯ್ ಉದೆತಾ. ಹಾಂವೆಂ, ಮ್ಹಜ್ಯಾ ಜಮಾತಿಂ ವೆಳಾರ್ ಪೇಶ್ ಕರ್ಚಿ ಕಲಾಯಿ ಹಿಚ್ಚ್. ಹಿ ಕಲಾ ಕಸಲ್ಯಾಚ್ ದುಬಾವಾಂವಿಣೆಂ ಯಶಸ್ವಿ ಜಾತಾ. ಕಿತ್ಯಾಕ್ ಮ್ಹಣ್ ತುಂ ವಿಚಾರ್‍ಶಿ?’
‘ವಿಚಾರ್ತಾಂ!’ ಜಾಪ್ ದಿಲಿ ಮೆಥ್ಯುನ್. ಉಟೊನ್ ತಾಣೆ ಆನ್ಯೇಕ್ ಟಿನ್ನ್ ಬಿಯರ್ ಘೆತ್ಲಿ. ‘ಹ್ಯಾ ದುಸ್ರ್ಯಾ ಟಿನ್ನಾನ್ ಮ್ಹಾಕಾ ಆಮಾಲ್ ಚಡತ್ ಮ್ಹಣ್ ತುಂವೆಂ ಅಂದಾಜ್ ಕರ್ಚೊ ನಾಕಾ. ಸಾಂಗ್, ತುಜಿ ಹಿ ಕಲಾ faith healing ಜಾವ್ನ್ ಕಶಿ ಯಶಸ್ವೀ ಜಾತಾ?’
‘ತುಮ್ಚೊ ಕಾತೊಲಿಕಾಂಚೊ ಭಾವಾರ್ಥ್ ಅಸ್ಕತ್ ಜಾಲ್ಲ್ಯಾನ್. ತುಮಿ ಕ್ರಿಸ್ತಾಕ್ ಕುಸ್ ಮಾರುನ್ ಸಾಂತಾಂ-ಸಾಯ್ಬಿಣಿಚ್ಯಾ ಪಾಟ್ಲ್ಯಾನ್ ಧಾಂವ್‌ಲ್ಲ್ಯಾನ್. ಪಿಡೆಂತ್ಲೊ ಪರ್ಯಾರ್ ಮೆಲಾಜೆ ತರ್ ಆಮಿ ಭಾಗೆವಂತ್ ಜಾಗ್ಯಾಂಕ್ ವಚಾಜೆ, ಅಜಾಪಾಂ ಜಾಯ್ಜೆ ತರ್ ಲೂರ್ಡ್ಸ್ ಶಹರಾಕ್ ವಚಾಜೆ ಯಾ ಹೆರ್ ಖಂಚಾಯಿ ಪುಣ್ಯ್ ಕ್ಷೇತ್ರಾಕ್ ವಚಾಜೆ. ಖಂಯ್ ಗೆಲೊ ಕ್ರಿಸ್ತ್?’ ಟೇಯ್ಲರ್ ಥಾಂಬ್ಲೊ.
‘ಖಂಯ್ ಗೆಲೊ ಕ್ರಿಸ್ತ್?’ ತಾಣೆ ಟೇಯ್ಲರಾಕ್ ತಾಚೆಂಚ್ ಸವಾಲ್ ಪಾಟಿಂ ಮಾರ್ಲೆಂ.
‘ಖಂಯ್ ವೆತೊಲೊ ತೊ?’ ಟೇಯ್ಲರಾಚೊ ತಾಳೊ ಜಯ್ತೆವಂತ್ ಕಸೊ ಸಾದ್ಲೊ. ‘ಕ್ರಿಸ್ತ್ ಆಸಾ ಮ್ಹಜ್ಯಾ ತಸಲ್ಯಾ ವೆಭಿಚಾರಿಂ ಥಂಯ್, ಆಮಾಲ್ಯಾಂಥಂಯ್, ದಗಾಲ್ಭಾಜ್ಯಾಂ ಥಂಯ್ ಜೆ ವಿಸಿಸ್ಟ್ ಥರಾಚೆಂ ಆಫೀಮ್ ಕಶ್ಟಾಲ್ಲ್ಯಾಂ ಆನಿ ದಣ್ಸಾಲ್ಲ್ಯಾಂಕ್ ಭರಯ್ತಾತ್. ಹಾಂಚೆ ಥಂಯ್ ಕ್ರಿಸ್ತ್ ಆಸಾ.’
‘ಭಾರಿಚ್ ಘಮಂಡ್ ಆಸಾ ತುಕಾ ತುಜ್ಯಾ ದಗಾಲ್ಭಾಜಿಪಣಾಚೆರ್, ಹಾಂ?’
‘ವ್ಹಯ್! ಕಿತ್ಯಾಕ್ ಮ್ಹಜೆಂ ಜಾವ್ನಾಸಾ ಸರ್ಗಾರಾಜ್!’ ಟೇಯ್ಲರ್ ಹಾಸ್ಲೊ. ‘ಹಾಂವ್ ಅಸೊಂ ಕಿತ್ಯಾಕ್ ಜಾಲೊಂ? ತುಜೊ ಬಾಯ್ಬಲ್ ತುಂ ಜಾಣಾಂಯ್? ಕ್ರಿಸ್ತಾನ್ ಕೊಣಾಕ್ ವೆಂಗೆಂತ್ ಘೆತ್ಲೆ? ಚೊರಾಂಕ್, ಲುಟ್ಕಾರಾಂಕ್, ಸುಂಕ್ ವಸೂಲ್ ಕರ್ತೆಲ್ಯಾಂಕ್ ಆನಿ ಮ್ಹಜ್ಯಾ ಪಯ್ಲ್ಯಾ ಜಮಾತಿಕ್ ಕೋಣ್ ಕಶೆ ಆಯಿಲ್ಲೆ ಮ್ಹಣ್ ತುಕಾ ಸಾಂಗುಂ. ತುಂವೆಂ ತಾಂಕಾಂ ಪಳೆಲಾಂಯ್ ಪುಣ್ ಸಮ್ಜೊಂಕ್‌ನಾಂಯ್. ತುಜಿ ಯಾದ್ ಹಾಂವ್ ಚಾಳ್ಟಾಂ-
ಮಾವ್ರಿಸ್ ಆಗುಸ್ತಿನ್ ಆಪ್ಲ್ಯಾ ಮೊಟಾಯೆಚ್ಯಾ ಫುಗ್ರ್ಯಾ ಗಾಲಾಂಚೆರ್ ನವಿ ತಾಂಬ್ಸಾಣ್ ಘೆವ್ನ್ ಆಸ್‌ಲ್ಲೊ ಆನಿ ಘಡಿಯೆ ಘಡಿಯೆ ಗರ್ಜ್‌ನಾಸ್ತಾಂ ಹಾಸ್ತಾಲೊ. ತಾಚ್ಯಾ ತ್ಯಾ ಹಾಸ್ಯಾಂತ್ ಆತ್ತಾಂಚೆ ಆತಾಂ ಸ್ಪಿರಿತ್‌ಸಾಂತ್‌ಚ್ ನ್ಹಯ್, ದೇವ್‌ಚ್ ದಿಷ್ಟಿಕ್ ಪಡ್ಟಾ ಮ್ಹಳ್ಳಿಂ ಖುಣಾಂ ದಿಸ್ತಾಲಿಂ.
ಜೆರೊಮ್ ಲಾಜ್ರಾ – ತ್ಯಾ ಉಬಾಳಾಂತ್ ತರಿ ತೀನ್ ಪೀಸ್ ಸುಟ್ ನ್ಹೆಸ್‌ಲ್ಲೊ. ತಾಚ್ಯಾ ಕೋಟಾಚ್ಯಾ ದಾವ್ಯೆ ಕುಶಿಕ್ ತಾಂಬ್ಡೆಂ ಕಾರ್ನೇಶನ್ ಆನಿ ಉಜ್ವ್ಯಾಕ್ ಜಮಾತಿಚೊ ಸಂಕೇತ್ ಆಸ್‌ಲ್ಲೊ. ಘಡಿಯೆ ಘಡಿಯೆ ತೊ ಹೆರಾಂಕ್ ಪಳೆತಾಲೊ, ದಾಂತ್ ಖಿರ್ಲೊನ್ ಹಾಸ್ತಾಲೊ. ಕಿತ್ಯಾಕ್ ಲಾಗುನ್, ತೊಚ್ಚ್ ಜಾಣಾಂ.
ರಮೋನಾ ಲಿಯೊ ಮಾತ್ರ್ ಪರಿಪೂರ್ಣ್ ಸ್ಥಿಮಿತಾಯೆಂತ್ ಆಸ್‌ಲ್ಲೆಂ.
ಸ್ವಂಯಸೇವಕಾಂಕ್ ದಿಲ್ಲೆಂ ಸಮವಸ್ತ್ರ್ ತೆಂ ನ್ಹೆಸುಂಕ್ ನಾತ್‌ಲ್ಲೆಂ. ತಾಣೆ ಧವೆ ಸ್ಲ್ಯಾಕ್ಸ್ ಆನಿ ಧವೊಚ್ಚ್ ಬ್ಲಾವ್ಜ್ ಘಾಲ್ಲೊ ವ್ಹಯ್ ಪುಣ್ ಭುಜಾಂಚೆರ್ ದೆಂವಯಿಲ್ಲಿ ನಾವಿಕಾಂಚಿ ನಿಳಿ ಜಾಕೆಟ್ ತಾಚ್ಯಾ ವಿಭಿನ್ನ್ ಸೊಭಾಯೆಕ್ ಎಕ್ ಥಿಕ್ ದಿತಾಲಿ. ಹ್ಯಾ ಜಾಕೆಟಿಂತ್ ತಾಚಿ ತರ್‍ನಿ ಮಾಣ್ಸುಗಿ ಉಟೊನ್ ದಿಸ್ತಾಲಿ ಮಾತ್ರ್ ನ್ಹಯ್, ಜವಾಬ್ದಾರೆಚೆಂ ಎಕ್ ವಾತಾವರಣ್ ತಾಚ್ಯಾ ಉದ್ರಿಕ್ತ್ ವ್ಯಕ್ತಿತ್ವಾಕ್ ದಿತಾಲಿ. ಫುಡೆಂ ಕಿತೆಂ ಯೆಂವ್ಕ್ ಆಸಾ ತರಿ ಹಾಂವ್ ಹಾಂವ್ಂಚ್ ಮ್ಹಳ್ಳೊ ಖಚಿತ್ ಸಂದೇಶ್ ತೆಂ ಭಂವ್ತಿಂ ಆಸ್‌ಲ್ಲ್ಯಾಂಕ್ ಪಾಟಯ್ತಾಲೆಂ.
ಪೆಟ್ರೋಸ್ಟೇಟಾಚೊ ಭಿಸ್ಪ್, ಕಾಥೊಲಿಕ್
ಭಿಸ್ಪ್, ರಾಯ್ಟ್ ರೆವರೆಂಡ್ ದೊತೊರ್ ವೊಲ್ಟರ್ ಸಾಂತುಮಾಯೆರ್ ದೆ ಬಿರಿತೊ ಆಪ್ಲ್ಯಾ ಪರಿಪೂರ್ಣ್ ದಳ್ಬಾರಾನ್ ಆಯಿಲ್ಲೊ.
‘ಆನಿ ತಾಣೆ ಯೆಜಯಿಚ್ಚ್ ಆಸ್‌ಲ್ಲೆಂ!’ ಟೇಯ್ಲರಾನ್ ಆಪ್ಲೆ ವೋಂಟ್ ಚಾಬ್ಲೆ.
‘ಕಸಲ್ಯಾಗಿ ಘಡಿತಾಚೆರ್, ಕರ್ತುಬಾಂಚೆರ್ ತುಂ ಪಸ್ತಾವ್ ಭೊಗ್ತಾಯ್, ಟೇಯ್ಲರ್?’ ನಕ್ಲಿ ಸಂತಾಪಾನ್ ವಿಚಾರ್ಲೆಂ ಮೆಥ್ಯುನ್.
‘ಆಮಿ ಹಾಂಗಾಸರ್ ದೋಗ್‌ಚ್ ಆಸಾಂವ್. ಆಮ್ಚೆಂ ಉಲವ್ಪ್ ರೆಕೊರ್ಡ್ ಜಾತಾ ಜಾಂವ್ಕ್ ಪುರೊ! ಪುಣ್ ಸಾಂಗ್ ಮ್ಹಾಕಾ ತುಂವೆಂ ಯಾ ಹಾಂವೆಂ ಜಿಣಿಯೆಚ್ಯಾ ಪೆಟುಲಾಂನಿ ಲಿಪವ್ನ್ ಜಗವ್ನ್ ದವರ್‍ಲಾಂ ಜಾಯ್ತೆಂ ಪುಣ್ ತಿಂ ಪೆಟುಲಾಂ ಉಗ್ತಿಂ ಕರುಂಕ್‌ನಾಂತ್, ಕಸಲೊಯಿ ಬಾಮ್ ವಾಪರ್‌ಲ್ಲೊ ನಾ. ಪುಣ್ ಆತಾಂ ವೇಳ್ ಆಯ್ಲಾ:ಆಜ್ ಆಮ್ಕಾಂ ಪವಿತ್ ಅತ್ಮ್ಯಾನ್ ಆಪಯ್ಲಾಂ!
(ಅವಸ್ವರ್ – 88 – ಂತ್ ಮುಂದರ್‍ತಾ)
