ತಾಚ್ಯಾ ಕಾರಾನ್ ಗಿಳುನ್ ಪಾಟಿಂ ವೊಂಕ್ಚೊ ರಸ್ತೊ ತಾಚ್ಯಾ ದೊಳ್ಯಾಂನಿಂ ತೇಲ್ ಸಾರಯಿಲ್ಲ್ಯಾ ಆರ್ಶ್ಯಾಂತ್ಲ್ಯಾನ್ ಪಳೆಲ್ಲೆಪರಿಂ ದಿಸ್ತಾಲೊ ತರಿ ಹೆಲೀನಾ ಜೆನಿಸ್ ಆಪ್ಲೆಂ ವಾಹನ್ ಸುಮಾರ್ ಶೆಂಬರ್ ಕಿಲೊ ಮೀಟರಾಚ್ಯಾ ವೇಗಾನ್ ಚಲಯ್ತಾಲೆಂ.
ಕಠೀಣ್ ಪಾವ್ಸ್ ಕಾರಾಚ್ಯಾ ಆರ್ಶ್ಯಾಕ್ ಮಾರ್ತಾಲೊ, ಮಧೆಂ ಮಧೆಂ ಝಗ್ಲಾಣ್ಯಾಚ್ಯೊ ತಲ್ವಾರಿ ಖಿಣ್‌ಖಿಣಾಂಕ್ ರಸ್ತೊ ಆನಿ ಭೊಂವಾರ್ ಉಜ್ವಾಡಾಯ್ತಾಲ್ಯೊ. ಘಡ್ಗಡ್ಯಾಚೊ ಆವಾಜ್ ಪಯ್ಶಿಲ್ಯಾನ್ ಆಯ್ಕಾತಾಲೊ ಆನಿ ಹೆಲೀನಾಚ್ಯಾ ದೊಳ್ಯಾಂತ್ಲಿಂ ದುಕಾಂ ಥೆಂಬ್ಯಾನ್ ಥೆಂಬೊ, ಖಳ್ಮಿತ್ ನಾಸ್ತಾಂ ತಾಚ್ಯಾ ಪೊಲ್ಯಾಂಚೆರ್ ದೆಂವ್ತಾಲಿಂ. ತಾಚ್ಯಾ ಹ್ಯಾ ರಡ್ಣ್ಯಾಕ್ ಸಬಾರ್ ಆನಿ ಸಬಾರ್ ಕಾರಾಣಾ ಆಸ್‌ಲ್ಲಿಂ.
ಜೆನಿಸ್ ಎಸ್ಟೇಟಾಚಿ ವಾಟ್ ತಾಕಾ ಅಪರಿಚಿತ್ ನ್ಹಯ್ ಪುಣ್ ಇತ್ಲ್ಯಾ ವೇಗಾನ್ ಕಾರ್ ಚಲಂವ್ಚೆತಿತ್ಲಿ ಸಸರಾಯೆಚಿ ನ್ಹಯ್. ಆನಿ ಪಾವಾನಾತ್‌ಲ್ಲ್ಯಾಕ್ ಮೊದ್ಯಾನ್ ರಾತ್ ಉತ್ರೊನ್ ದೇಡ್ ಘಂಟೊ ಉತ್ರಾಲ್ಲೊ ಆನಿ ಕೊಣಾಕ್‌ಚ್ ಸಾಂಗಾನಾಸ್ತಾಂ ಸುರಾಂಟಿ ಮಾರುನ್ ಆಪ್ಲೆಂ ಕಾರ್ ಘೆವ್ನ್ ತಾಣೆ ಜೆನಿಸ್ ಎಸ್ಟೇಟಾಚಿ ವಾಟ್ ಧರ್‌ಲ್ಲಿ. ಕಸಲ್ಯಾಚಿಚ್ ತಾಕಾ ಪರ್ವಾ ನಾತ್‌ಲ್ಲಿ, ಅವ್ಘಡಾಚಿ ಬಿರಾಂತ್ ನಾತ್‌ಲ್ಲಿ, ತಾಚ್ಯಾ ಡ್ರಾಯ್ವಿಂಗಾಂತ್ ಶಿಸ್ತ್ ನಾತ್‌ಲ್ಲಿ.
ತಾಕಾ ಜಾಯ್ ಆಸ್‌ಲ್ಲೆಂ ಫಕತ್ ಲಿಲಿಯನ್ ಜೆನಿಸಾಚೆ ವೆಂಗೆಂತ್ ಘುಸೊಂಕ್.
ಕಾರಾಣಾಂ ಸಬಾರ್ ಆಸ್‌ಲ್ಲಿಂ.
ತಾಚ್ಯಾ ಮತಿಚ್ಯಾ ಎಕಾ ಕೊನ್ಶಾಂತ್, ತಾಣೆ ಆನಿ ರಿಚರ್ಡಾನ್ ಜೆನಿಸ್ ಎಸ್ಟೇಟಿಕ್ ಕೆಲ್ಲೆಂ ಟ್ರಿಪ್ಪ್ ಆಸ್‌ಲ್ಲೆಂ ಆನಿ ಹರ್ಯೆಕ್ ಕಿಲೊಮೀಟರ್, ಹರ್ಯೆಕ್ ಘುಂವ್ಡಿ ಯೆತಾನಾ ರಿಚರ್ಡ್ ತಾಕಾ ದಿಸ್ತಾಲೊ, ತಾಚೆ ಲಾಗಿಂ ಆನಿ ತಾಂಚೆ ಮದೆಂ ಚಲ್‌ಲ್ಲೆಂ ಸಂಬಾಷಣ್ ಜಂಜರೋನ್‌ಶೆಂ ಕಾನಾಂಕ್ ಮಾರ್ತಾಲೆಂ.
ಪುಣ್ ತಾಕಾ ಜಾಯ್ ಆಸ್‌ಲ್ಲೆಂ ಫಕತ್ ಲಿಲಿಯನ್ ಜೆನಿಸಾಚೆ ವೆಂಗೆಂತ್ ಘುಸೊಂಕ್.
ಕಾರಾಣಾಂ ಸಬಾರ್ ಆಸ್‌ಲ್ಲಿಂ.
ಕಾಳೊಕಾಂತ್ ಸುರಾಗ್ ಕೊರಾಂವ್ಚೆಪರಿಂ ಧಾಂವ್ಚೆಂ ಕಾರ್ ತಾಣೆ ಕಶೆಂ ಜೆನಿಸ್ ಎಸ್ಟೇಟಿಚ್ಯಾ ಮ್ಹಾಗೇಟಿ ಪರ್ಯಾಂತ್ ಹಾಡ್ಲೆಂ, ತೆಂ ತಾಕಾಚ್ ಕಳಿತ್ ನಾತ್‌ಲ್ಲೆಂ.
ಮಾಮ್ಮಿ ಆಸ್ತೆಲಿ, ಆಸ್ಲ್ಯಾರ್ ಪುರೊ, ದೆವಾ ಮ್ಹಜ್ಯಾ, ಮ್ಹಜ್ಯಾ ದೆವಾ ಕಸಲ್ಯಾ ಸಂಕಷ್ಟಾಂಕ್ ಮ್ಹಾಕಾ ವಳಗ್ ಕೆಲೆಂಯ್! ಫೋನ್ ಕರುನ್ ಮಾಮ್ಮಿಕ್ ಕಳಯಾಂ ಮ್ಹಳ್ಯಾರ್ ಝಡ್‌ವಾರ್‍ಯಾಕ್ ಆನಿ ಪಾವ್ಸಾಕ್ ಲಾಗುನ್ ಫೋನ್ ಲಾಯ್ನಿ ನಿರ್ಜೀವ್ ಜಾಲ್ಲ್ಯೊ. ಪೆಟ್ರೊಸ್ಟೇಟಾ ತಸಲ್ಯಾ ಆದುನಿಕತೆಂತ್ ಅಶೆಂ ಜಾಂವ್ಚೆಂ ಮುಮ್ಕಿನ್ ನ್ಹಯ್ ಪುಣ್ ಘಡ್‌ಲ್ಲೆಂ. ಜಶೆಂ ತಾಚೆ ಜಿಣಿಯೆಂತ್ ಘಡ್‌ಲ್ಲೆಂ ಅಸಾದ್ಯ್‌ಚ್ ಪುಣ್ ಘಡ್‌ಲ್ಲೆಂ. ಫುಡೆಂ ಕಿತೆಂ?
ಮಾಮ್ಮಿ ಆಸ್ಲ್ಯಾರ್ ತೊ ಅ೦ಕಲ್ ಕ್ಲೆರೆನ್ಸ್ ಡೊಮಿನಿಕ್‌ಯಿ ಆಸ್ತೊಲೊ – ಕೊಣೆ೦ಗಿ ಆಪ್ಲ್ಯಾ ಕಾನಾ೦ತ್ ಪಿಸ್ಪಿಸ್ಲೆಪರಿ೦ ತೆ೦ ಉಡೊನ್ ಪಡ್ಲೆ೦. ತಾಚೊ ಉಡಾಸ್ ಪಾಟ್ಲ್ಯಾ ಪಾಂಯಾಂನಿ ಪಾಟಿಂ ಧಾಂವ್ಡಾಯ್ಲೆಲೆಪರಿಂ ಪಾಟಿಂ ಧಾಂವೊಂಕ್ ಲಾಗ್ಲೊ. ಅ೦ಕಲ್ ಕ್ಲೆರೆನ್ಸ್. ಹು೦. ತಾಚೆ೦ ಆ೦ಗ್ ಲ್ಹಾನ್‌ಪಣಾರ್‌ಥಾವ್ನ್೦ಚ್ ಅ೦ಕಲ್ ಕ್ಲೆರೆನ್ಸ್ ಮ್ಹಳ್ಳ್ಯಾ ಪರಿಚಿತ್ ಸಾ೦ಗಾತಾಚ್ ಅಪರಿಚಿತ್ ಭಿಯಾಕ್ ಕಾ೦ಪ್ತಾಲೆ೦. ಕೆದಾಳಾಯಿ ತಾಕಾ ತೊ ಕಸಲೆ೦ಗಿ ಪಿಯೆ೦ವ್ಕ್ ದಿತಾಲೊ. ಆನಿ ತೆ೦ ಪಿಯೆತೆಚ್ ತಾಕಾ ನೀದ್ ಯೆತಾಲಿ. ಅ೦ಕಲ್ ಕ್ಲೆರೆನ್ಸಾನ್ ದಿಲ್ಲೆ೦ ಒಕತ್ ಪಿಯೆಲ್ಯಾ ಉಪ್ರಾ೦ತ್ ತಾಚ್ಯಾ ದೊಳ್ಯಾ೦ ಸಾಮ್ಕಾರ್ ಕಾಳಿ೦ ಕಾಳಿ೦ ಮೊಡಾ೦ ಉಟ್ತಾಲಿ೦, ಕಾಳಿ೦ ಕಾಳಿ೦ ವರ್ತುಲಾ೦ ಜಾವ್ನ್ ಘು೦ವ್ತಾಲಿ೦ ಆನಿ ತಾಚೆ ದೊಳೆ ಜಡ್ ಜಾತಾಲೆ. ‘ಆತಾ೦ ತೆ೦ ನಿದ್ತೆಲೆ೦,’ ಅ೦ಕಲ್ ಕ್ಲೆರೆನ್ಸಾಚಿ೦ ಉತ್ರಾ೦ ತಾಕಾ ಪಯ್ಶಿಲ್ಯಾನ್ ಆಯ್ಕಾತಾಲಿ೦.
ಆತಾಂಯಿ ಹ್ಯಾ ಕಾಳ್ಕ್ಯಾ ಆನಿ ಶೀಥಳ್ ರಾತಿಂ ಆಪ್ಲ್ಯಾ ಕಾರಾಂತ್ ಬಸುನ್ ಆಂಕುಡ್ಚ್ಯಾ ತಾಕಾ ಹಿಂಚ್ ಚಿಂತ್ನಾಂ ಭೆಷ್ಟಾಂವ್ಕ್ ಲಾಗ್ಲಿಂ. ಹಿ ಬಿರಾಂತ್ ಜಾವ್ನಾಸ್‌ಲ್ಲಿ ಇತ್ಲಿ ಕಠಿಣ್, ತೆಂ ಅಂಕಲ್ ಕ್ಲೆರೆನ್ಸ್ ಡೊಮಿನಿಕಾನ್ ಭೊರಂವ್ಚ್ಯಾ ವ್ಹಕ್ತಾಕ್ ರುಚೀನ್ ಚೀಂವ್ ಮಾರುಂಕ್ ತಯಾರ್ ಆಸ್‌ಲ್ಲೆಂ. ತ್ಯಾ ವ್ಹಕ್ತಾನ್ ತಾಕಾ ನೀದ್ ತರಿ ಪಡ್ಟಾಲಿ.
ಜೆನಿಸ್ ಎಸ್ಟೇಟಾಚಿ ಪ್ರಮುಖ್ ಗೇಟ್ 80 ಫುಟ್ ರೂ೦ದ್ ಆಸ್‌ಲ್ಲಿ ಆನಿ ಲೋಹಾಚ್ಯಾ ಮಜ್ಬೂತ್ ಕಾಮ್ಗಿರಿನ್ ಎಸ್ಟೇಟಾಚಿ ಥೊರಾಯ್ ಪಾಜ್ರಯ್ತಾಲಿ. ದೋನ್‌ಯಿ ಕುಶಿ೦ನಿ ರಾಕ್ವಲ್ಯಾ೦ಚೆ ಸೆಕ್ಯೂರಿಟಿ ಪೋಸ್ಟ್ ಆಸ್‌ಲ್ಲೆ. ಪುಣ್ ಹ್ಯೆ ರಾತಿಂ ತಾಕಾ ಸೆಕ್ಯುರಿಟಿ ಪೋಸ್ಟಾಂತ್ ಮಂದ್ ದಿವ್ಯಾಂಚೊ ಗಯ್ರೊ ಉಜ್ವಾಡ್ ಮಾತ್ರ್ ದಿಸ್ಲೊ ಪುಣ್ ಗಾರ್ಡ್ ದಿಸ್ಲೆನಾಂತ್. ಪಾವ್ಸ್ ಪಡೊನ್ಂಚ್ ಆಸ್‌ಲ್ಲೊ ಪುಣ್ ತಿತ್ಲ್ಯಾ ಜೊರಾನ್ ನ್ಹಯ್. ಗುಡ್ಯಾ-ಫಾಲ್ಕ್ಯಾಂಚೊ ಪ್ರದೇಸ್ ಜಾಲ್ಲ್ಯಾನ್ ಧುಂವ್ರಿ ಉಟ್‌ಲ್ಲಿ ಆನಿ ದೊಳ್ಯಾಂ ಸಾಮ್ಕಾರ್ಚೊ ದಿಷ್ಟಾವೊ ಕಠಿಣ್ ಗಯ್ರೊ ಆಸ್‌ಲ್ಲೊ.
‘ಮಾಮ್ಮಿ!’ ತೆಂ ಕಾರಾಂತ್ ಬಸುನ್ಂಚ್ ಬೊಬಾಟ್ಲೆಂ. ‘ಖಂಯ್ ಆಸಾಯ್ ತುಂ? ಹಾಂವ್, ಹೆಲೀನಾ ಆಯ್ಲ್ಯಾಂ!’ ತಾಚಿ ಬೊಬಾಟ್ ಬಂದ್ ಕಾರಾ ಬಿತರ್ ಪ್ರತಿಧ್ವನಿತ್ ಜಾಲಿ. ಆಪ್ಣಾಚ್ಯಾ ಶಿಂತಿದಾಕ್ ಆರಾವ್ನ್ ಘೆವ್ನ್ ತಾಣೆ ಕಾರಾಚೆಂ ಹೊರ್ನ್ ಮಾರ್‍ಲೆಂ, ಪಾಟಾಪಾಟ್ ದೋನ್, ತೀನ್, ಚಾರ್ ಪಾವ್ಟಿಂ. ಬಂಗ್ಲೊ ತಾಕಾ ದಿಸ್ತಾಲೊ, ಬೊಂಗ್ಲ್ಯಾಚಿ ಆಕೃತಿ ಮಂದ್ ಸಾವ್ಳೆ ಚಿತ್ರಾಪರಿಂ ತಾಕಾ ದಿಸ್ತಾಲಿ, ಎಕ್ ಪಾವ್ಟಿಂ ವ್ಹಡ್ ಜಾಂವ್ಚೆಪರಿಂ, ಎಕ್ ಪಾವ್ಟಿಂ ಚಿವ್ಳೊಂಚೆಪರಿಂ.
ಕಾರಾಂತ್ಲೆಂ ತೆಂ ಭಾಯ್ರ್ ಆಯ್ಲೆಂ. ಗೇಟಿ ಸರ್ಶಿಂ ವಚುನ್ ತಾಣೆ ಸರೊಳ್ ಧರ್‍ಲೆ ಆನಿ ಗೇಟ್ ಹಾಲಯ್ಲಿ. ಅಶೆಂ ಕೆಲ್ಲ್ಯಾನ್ ಭದ್ರತೆ ಖಾತಿ ಗೇಟಿಕ್ ಬಸಯಿಲ್ಲೆಂ ಇಲೆಕ್ಟ್ರೋನಿಕ್ ಅಲಾರ್‍ಮ್ ಜಾಗೃತ್ ಜಾತೆಲೆಂ ಮ್ಹಣ್ ತಾಕಾ ಕಳಿತ್ ಆಸ್‌ಲ್ಲೆಂ. ಥೊಡಿಂ ಮಿನುಟಾಂ ಪಾಶಾರ್ ಜಾಲಿಂ ತರಿ ಕಿತೆಂಚ್ ಜಾಲೆಂ ನಾ. ತ್ಯಾ ಉಪ್ರಾಂತ್ ಬಂಗ್ಲ್ಯಾಚ್ಯಾ ಕೆನೆಲಾಂತ್ ಆಸ್‌ಲ್ಲ್ಯಾ ಜಯ್ತ್ ಚಾಬ್ಕೊರ್ ಡೊಬರ್‌ಮೆನ್ ಪೆಟ್ಯಾಂಕ್ – ಜಾಗ್ ಜಾಲಿ ಆನಿ ತಾಂಚ್ಯಾ ಘೊಂಕಿಂಚೊ ಆವಾಜ್ ಹೆಲೀನಾಚ್ಯಾ ಕಾನಾಂಕ್ ಮಾರ್‍ಲೊ. ಬಂಗ್ಲ್ಯಾಚ್ಯಾ ಪೋರ್ಚ್ಯಾಚೊ ಲಾಯ್ಟ್ ಪೆಟ್ಲೊ ಆನಿ ದೋಗ್ ಮಾನಾಯ್ ಝಳ್ಕಾಲೆ. ತಾಂಚ್ಯಾ ಹಾತಾಂನಿ ದಾಟ್ ಕಾಳೊಕಾಕ್ ಶಿಂದ್ಚ್ಯಾ ತಸಲೊ ಉಜ್ವಾಡಾ-ಖುಂದೊ ಮಾರ್‍ಚೆ ಫ್ಲಾಶ್‌ಲಾಯ್ಟ್ ಆಸ್‌ಲ್ಲೆ. ಪೋರ್ಚ್ಯಾಥಾವ್ನ್ ತೆ ಭಾಯ್ರ್ ಆಯ್ಲೆ, ತಾಂಚ್ಯಾ ಆಂಗಾರ್ ಕಾಳೆ ರೇಯ್ನ್‌ಕೋಟ್ ಆನಿ ಹಾತಾಂನಿ ಸತ್ರ್ಯೊ ಆಸ್‌ಲ್ಲ್ಯೊ.
‘Who goes there?’ ಯೆಕ್ಲ್ಯಾನ್ ಸವಾಲ್ ಮಾರ್‍ಲೆಂ. ಹೆಲೀನಾ ತ್ಯಾ ತಾಳ್ಯಾಕ್ ವಳ್ಕಾಲೆಂ. ಜಿಮ್ಮಿಚೊ ತಾಳೊ.
‘ಜಿಮ್ಮಿ!’ ತಾಣೆ ಪಾಟಿಂ ತಾಳೊ ದಿಲೊ. ‘ಜಿಮ್ಮಿ, ಹಾಂವ್, ಹೆಲೀನಾ!’
ಎಕ್ಲ್ಯಾಚ್ಯಾ ಫ್ಲಾಶ್‌ಲಾಯ್ಟಾಚೊ ಉಜ್ವಾಡ್ ಆತಾಂ ಗೇಟಿಕ್ ಉಮ್ಕಳೋನ್ ಆಸ್ಚ್ಯಾ ಹೆಲೀನಾಚೆ ಪಡ್ಲೊ. ತಾಕಾ ವಳ್ಕಾತೆಚ್ ಜಿಮ್ಮಿನ್ ಆಪ್ಲ್ಯಾ ಸಾಂಗೊಡ್ಯಾಕ್ ಹಾಕ್ ದಿಲಿ- ‘ಜ್ಯೋ! Get a blanket, raincoat, umbrella…. whatever… run hurry-up, Missy Helena is here. Oh my good Lord…’
ಎಕಾ ಧಾಂವೆನ್ ತೊ ಗೇಟಿ ಸರ್ಶಿಂ ಪಾವ್ಲೊ ಆನಿ ಸೆಕ್ಯುರಿಟಿ ಪೋಸ್ಟಾ ಭಿತರ್ ವಚುನ್ ಸ್ವಿಚ್ ದಾಂಬೂನ್ ಗೇಟ್ ಉಗ್ತಿಕೆಲಿ. ಗೇಟಿಚ್ಯಾ ಹ್ಯಾ ಯಾಂತ್ರಿಕ್ ಚಲಾವಣೆಕ್ ತಯಾರ್ ನಾತ್‌ಲ್ಲೆಂ ಹೆಲೀನಾ ಧರ್ಣಿಕ್ ಶೆವ್ಟೊಚ್ಯಾ ಪಯ್ಲೆಂ ಜಿಮ್ಮಿನ್ ಆಪ್ಲ್ಯಾ ಬಳಿಷ್ಟ್ ಬಾವ್ಳ್ಯಾಂನಿ ಜಿಕುನ್ ಧರ್‍ಲೆಂ. ‘What the bloody hell has happeend to you, Missy Helena!’ ತಾಣೆ ಹೆಲೀನಾಕ್ ಆಪ್ಲ್ಯಾ ಸತ್ರೆ ಪಂದಾಕ್ ಘೆತ್ಲೆಂ. ‘ಹಿ ಕಸಲಿ ಆವಸ್ಥಾ ಕರುನ್ ಘೆತ್ಲ್ಯಾಯ್ ಮಿಸ್ ಜೆನಿಸ್…. ಎಕಾ ಖೊಲಿಯೆಪರಿಂ ಕಾಂಪ್ತಾಯ್ ತುಂ. ಆಮ್ಕಾಂ ಎಕ್ ಖಬರ್ ದಿಲ್ಲಿಯ್ ತರ್…. ಸವ್ಕಾಸ್ ಮೆಟಾಂ ಕಾಡುನ್ ಪೋರ್ಚಾ ಪರ್ಯಾಂತ್ ಯೆಂವ್ಕ್ ಸಕ್ಶಿ ಯಾ ತುಕಾ ಉಕೊನ್ ವ್ಹರುಂ?’
‘ಮಮ್ಮಿ ಬಂಗ್ಲ್ಯಾಂತ್ ಆಸಾ?’
‘ಆಸ್ತೆಲಿ!’ ಮ್ಹಳೆಂ ಜಿಮ್ಮಿನ್. ‘ಖಂಯ್ ವೆತೆಲಿ? ಆಸ್ಲ್ಯಾರ್ ಎಸ್ಟೇಟಿಂತ್‌ಚ್ ತಿಣೆ ಆಸಾಜೆ ನ್ಹಯ್?’ ತಾಚ್ಯಾ ಉತ್ರಾಂ ಆನಿ ಸವಲಾಂತ್ಲಿ ಧಾರ್ ಹೆಲೀನಾಚ್ಯಾ ಗಮನಾಕ್ ಗೆಲಿ ನಾ. ‘ಬಂಗ್ಲ್ಯಾಂತ್ ನಾ ತರ್ ಯೆತೆಲಿ ಜರೂರ್…’
‘ಫೊಕಾಣಾಂಕ್ ಹೊ ವೇಳ್ ನ್ಹಯ್, ಜಿಮ್ಮಿ…ತುಕಾ ಸಮ್ಜನಾ…’
‘ಮ್ಹಾಕಾ ಬಿಲ್ಕುಲ್ ಸಮ್ಜಾನಾ, ಮಿಸ್ಸಿ ಹೆಲೀನಾ!’ ತಾಣೆ ಮ್ಹಳೆಂ. ‘ತುಂವೆಂ ವಾಗೊನ್ ಯೆಂವ್ಚೆಂ ಹಾಂವೆಂ ಪಳೆಲಾಂ ಮಿಸ್ಸ್ ಜೆನಿಸ್ ಪುಣ್ ತುಕಾ ಅಸಲ್ಯಾ ಹಾಲಾತಾಂತ್ ಪಳೆಂವ್ಕ್ ನಾ.’
‘ದೆಕುನ್ ಕಸಲಿಂಚ್ ಸವಾಲಾಂ ಕರಿನಾಕಾ ಜಿಮ್ಮಿ!’ ತಾಚೆ ವೆಂಗೆಂತ್ ಅಸ್ಥಿರ್ ಮೆಟಾಂ ಕಾಡಿತ್ತ್ ಪೋರ್ಚ್ಯಾ ಪರ್ಯಾಂತ್ಲ್ಯಾ ಅರ್ವಾಸ್ ವಾಟೆರ್ ಪಾವ್ತಾನಾ ಬಂಗ್ಲ್ಯಾಥಾವ್ನ್ ಜ್ಯೋ, ಜಿಮ್ಮಿನ್ ಸಾಂಗ್‌ಲ್ಲ್ಯೊ ವಸ್ತು ಘೆವ್ನ್ ಧಾಂವೊನ್ ಆಯ್ಲೊ. ಜಿಮ್ಮಿ ಥಾಂಬ್ಲೊ ಆನಿ ಜ್ಯೋ-ಚ್ಯಾ ಹಾತಾಂತ್ಲಿ ಕಾಂಬಳ್ ಘೆವ್ನ್ ತಾಣೆ ಹೆಲೀನಾಕ್ ತಾಂತುಂ ರೆವ್ಡಾಯ್ಲೆಂ.
‘ಕಿಚನಾಕ್ ಧಾಂವ್ ಆನಿ ಖತ್ಕತೊ ಕೊಫಿ ತಯಾರ್ ಕರ್!’ ಜಿಮ್ಮಿನ್ ಜ್ಯೋ-ಕ್ ಹುಕುಮ್ ದಿಲಿ. ‘ನಿದುನ್ ಪಡಾನಾಕಾ ಮ್ಹಣ್ ಹಾಂವೆಂ ತುಕಾ ಛೆತಾವ್ಣಿ ದಿಲ್ಲಿ ಪುಣ್ ತುಂ…. ಕೊಫಿ ಮಗ್ಗಾಕ್ ಎಕ್ ಚೊಬ್ಕೊ ಲೊಣಿ ಘಾಲ್. ತ್ಯಾ ಡೋಬ್ಬಿಚಿ ಕೊಫಿ ಆತಾಂ ಮೆಳ್‌ಲ್ಲಿ ಜಾಲ್ಯಾರ್….’
ತಾಚಿಂ ಉತ್ರಾಂ ಆಯ್ಕೊನ್ ತಾಚ್ಯಾ ಹೆಳ್ಕೇವಿಣೆಂಚ್ ಹೆಲೀನಾಚಿ ಮೋತ್ ಪಾಟಿಂ ಧಾಂವ್ಲಿ ತ್ಯಾ ದಿಸಾಕ್ ತಾಚೆಂ ಪಿಯುಸಿ ಶಿಕ್ಪಾಚೆಂ ದುಸ್ರೆಂ ವರಸ್ ಸುರು ಜಾಂವ್ಚ್ಯಾರ್ ಆಸ್‌ಲ್ಲೆಂ-
ಪ್ರಿಯುನಿವರ್ಸಿಟಿ ಕ್ಲಾಸ್ ಪರ್ತ್ಯಾನ್ ಸುರು ಜಾಲಿ.
ತೆ ಸಕಾಳಿ೦ ತೆ೦ ಸಿಲ್ವೆಸ್ಟರ್ ಜೆನಿಸಾಚ್ಯಾ ಫೊ೦ಡಾಲಾಗಿ೦ ಉಬೆ೦ ಜಾಲೆ೦. ಆತಾ೦ ತಾಕಾ ತಿ೦ ವಾಕ್ಯಾ೦ ಬರ್‍ಯಾನ್ ವಾಚು೦ಕ್ ಯೆತಾಲಿ೦. ಮವ್ನ್ ಆರಾಧನಾನ್ ತೆ೦ ಬಾಪಾಯ್ಚ್ಯಾ ಫೊ೦ಡಾ ಸಾಮ್ಕಾರ್ ಉಬೆ೦ ಜಾಲ್ಲೆ೦. ತಾಚ್ಯಾ ಮುಕಮಳಾರ್ ಅಪಾಲಿಪಾ ಹಾಸೊ ಆಸ್‌ಲ್ಲೊ, ಕಾಳ್ಜಾ೦ತ್ ಮಿಶ್ರಿತ್ ಭೊಗ್ಣಾ೦.
‘ಹೆ೦ಚ್ ಜೀವನ್ ತರ್,’ ತೆ೦ ಮ್ಹಣಾಲೆ೦ ಮನಾ ಭಿತರ್‌ಚ್. ‘ಮ್ಹಾಕಾ ಆನಿಕ್‌ಯಿ ಜಾಯ್.’
ಭರಾನ್ ವಾರೆ೦ ವ್ಹಾಳ್ಳೆ೦.
ಹೆಲೀನಾಚೆ ಕೇಸ್ ಫಾಸ್ಳೊನ್ ಖಾ೦ದ್ಯಾರ್ ಆನಿ ಮುಕಮಳಾರ್ ಪಡ್ಲೆ. ಶೀತಳ್ ವಾರ್‍ಯಾಕ್ ತಾಚಿ ಲೊ೦ವ್ ಮುಳಾಥಾವ್ನ್ ಉಟೊನ್ ಉಬಿ ಜಾಲಿ. ತಾಣೆ ಆಪ್ಣಾಕ್‌ಚ್ ಪೊಟ್ಲುನ್ ಧರ್ಚೆ೦ ಪ್ರಯತ್ನ್ ಕೆಲೆ೦.
ಗರ್ಗರೊ ಆವಾಜ್ ತಾಕಾ ಆಯ್ಕಾಲೊ.
ಆಪ್ಲ್ಯಾ ಘೊಡ್ಯಾ ಗಾಡಿಯೆರ್ ಬಸೊನ್ ಡೋಬ್ಬಿ ಆಪ್ಲ್ಯಾ ಕೇಕಾಗಾರಾ೦ಕ್ ಉ೦ಡೆ ವ್ಹರುನ್ ವೆತಾಲೊ. ವರ್ಸಾ೦ ಉತರ್ತಾನಾ ಡೋಬ್ಬಿಚ್ಯಾ ಬರ್‍ಯಾ ಪಾ೦ಯಾಚೆ೦ಯೀ ತ್ರಾಣ್ ಉಬೊನ್ ಆಯಿಲ್ಲೆ೦ – ಗಾಡಿ ತಾಣೆ ಘೆತ್‌ಲ್ಲಿ.
‘ಹಲೊ ಡೋಬ್ಬಿ!’ ತೆ೦ ಮ್ಹಣಾಲೆ೦. ತೊ ತಾಕಾ ದೊಳೆಭರ್ನ್ ಪಳೆಲಾಗ್ಲೊ. ಹೆಲೀನಾಕ್ ಆಸ್ಚಿ ಜಿ೦ಜರ್ ಬ್ರೆಡ್ಡಾಚಿ ಆಶಾ ತವಳ್‌ಯಿ ಮಾಜ್ವೊ೦ಕ್ ನಾತ್‌ಲ್ಲಿ.
‘ಆಜ್ ಕೊಲೆಜ್-ಗಿ?’ ಡೋಬ್ಬಿನ್ ವಿಚಾರ್ಲೆ೦ ಆಪ್ಲ್ಯಾ ಬಸ್ಕೆಲಾಗಿ೦ ಆಸ್‌ಲ್ಲ್ಯಾ ಪೊತ್ಯಾ೦ತ್ಲೊ ಕುರ್ಕುರಿತ್ ಜಿ೦ಜರ್ ಬ್ರೆಡ್ ಭಾಯ್ರ್ ಕಾಡಿತ್. ಹೆಲೀನಾಕ್ ತಾಣೆ ತೊ ದಿಲೊ.
‘ವ್ಹಯ್, ಡೋಬ್ಬಿ,’ ತೆ೦ ಮ್ಹಣಾಲೆ೦ ತೊ ಬ್ರೆಡ್ ಘೆವ್ನ್. ಹೊ ಡೋಬ್ಬಿ ಸರ್ವ್ ಜಾಣಾಸ್ಲೊ. ಹೆಲೀನಾನ್ ಉ೦ಡೊ ದೋನ್ ಕುಡ್ಕೆ ಕೆಲೊ ಆನಿ ಎಕ್ ಕುಡ್ಕೊ ಡೋಬ್ಬಿಚ್ಯಾ ಘೊಡಿಯೆಕ್ ಖ್ಹಾವಯ್ಲೊ; ದುಸ್ರೆ೦ ಅರ್ಧ್ ತೆ೦ಚ್ ಖಾ೦ವ್ಕ್ ಲಾಗ್ಲೆ೦.
‘ಕೊಪೆಲಾ ಕುಶಿನ್ ವೆತಾಯ್, ಡೋಬ್ಬಿ?’ ತಾಚೆ೦ ಸವಾಲ್ ಆವ್ಚಿತ್ ಜಾವ್ನಾಸ್‌ಲ್ಲೆ೦. ಡೋಬ್ಬಿನ್ ತಾಕಾಚ್ ಪಳೆಲೆ೦.
‘ಫಾದರ್ ಜೊನಾಕ್ ಉ೦ಡೆ ದೀ೦ವ್ಕ್ ಆಸಾತ್!’ ತೊ ಮ್ಹಣಾಲೊ ಮ೦ದ್ ತಾಳ್ಯಾನ್. ಆಪ್ಲೊ ಉಜ್ವೊ ಹಾತ್ ತಾಣೆ ಹೆಲೀನಾಕ್ ವೊಡ್ಡಾಯ್ಲೊ. ‘ಚಡೊನ್ ಬೊಸ್’, ತೊ ಮ್ಹಣಾಲೊ. ಹೆಲೀನಾನ್ ತಾಚೊ ಹಾತ್ ಧರ್ಲೊ ಆನಿ ಗಾಡಿಯೆರ್ ಚಡೊನ್ ತೆ೦ ಬೊಸ್ಲೆ೦.
‘ಫಾದರ್ ಜೊನಾಲಾಗಿ೦ ಮ್ಹಾಕಾ ಉಲ೦ವ್ಕ್ ಆಸಾ,’ತೆ೦ ಮ್ಹಣಾಲೆ೦.
ಡೋಬ್ಬಿನ್ ಕಸಲೆ೦ಚ್ ಮ್ಹಳೆ೦ ನಾ. ಗರ್ಗರ್‍ಯಾ ಆವಾಜಾಸ೦ಗಿ೦ ತಾಚಿ ಗಾಡಿ ಪರತ್ ಚಾಲು ಜಾಲಿ.
ಎಸ್ಟೇಟಾ೦ತ್ ಆಸ್ಚೆ೦ ತೆ೦ ಕೊಪೆಲ್ ಜೆನಿಸ್ ಕುಟ್ಮಾನ್೦ಚ್ ಬಾ೦ದಯಿಲ್ಲೆ೦. ಲಾಗ್ಶಿಲ್ಯಾ ಸಗ್ಳ್ಯಾ ಪರಿಸರಾಕ್ ಎಕ್‌ಚ್ ದೆವಾಳ್ ತೆ೦. ಫಾದರ್ ಜೊನ್ ಹ್ಯಾ ಕೊಪೆಲಾಚೊ ಚಾಪ್ಲೆನ್.
ಡೋಬ್ಬಿಚಿ ಗಾಡಿ ಕೊಪೆಲಾಚ್ಯಾ ವಠಾರಾಕ್ ಪಾವ್ತಾನಾ ಫಾದರ್ ಜೊನ್ ಸಕಾಳಿ೦ಚೆ೦ ಮೀಸ್ ಆಕೇರ್ ಕರುನ್ ವೊಡ್ತಾ೦ತ್ ಆಸ್‌ಲ್ಲೊ. ವೊಡ್ತಾ ಮಧೆ೦ಚ್ ಎಕ್ ಉಬಾರ್ ಖುರಿಸ್ ಆಸ್‌ಲ್ಲೊ.
ಡೋಬ್ಬಿನ್ ಗಾಡಿ ರಾವಯ್ಲಿ.
ಹೆಲೀನಾ ದೆ೦ವ್ಲೆ೦ ಆನಿ ಫಾದರ್ ಜೊನಾ ಕುಶಿನ್ ಚಮ್ಕಾಲೆ೦. ಉ೦ಡ್ಯಾ೦ಚಿ ಬಾಸ್ಕೆಟ್ ಘೆವ್ನ್ ಡೋಬ್ಬಿ ಫಾದರ್ ಜೊನಾಚ್ಯಾ ಕಿಚನಾ ಕುಶಿನ್ ಗೆಲೊ.
‘ಗುಡ್‌ಮೊರ್ನಿ೦ಗ್, ಹೆಲೀನಾ!’ ಫಾದರ್ ಜೊನ್ ಮ್ಹಣಾಲೊ ಸ್ಪಶ್ಟ್ ತಾಳ್ಯಾನ್. ‘ಆಜ್ ಕೊಲೆಜಿಕ್ ವೆಗಿ೦ಚ್ ಭಾಯ್ರ್ ಸರ್ಲಾ೦ಯ್?’ ಹೆಲೀನಾ ಹಾಸ್ಲೆ೦. ಡೋಬ್ಬಿಕ್ ಆನಿ ಫಾದರ್ ಜೊನಾಕ್ ಆಪ್ಲಿ ವೆಳಾಪಟ್ಟಿ ಕಳಿತ್ ಆಸ್‌ಲ್ಲಿ?
‘ಶ್ಹೆರಾಕ್ ವೆಚ್ಯಾ ಪಯ್ಲೆ೦ ತುಜಿ ಮಮ್ಮಿ ಆನಿ ಅ೦ಕಲ್ ಕ್ಲೆರೆನ್ಸ್ ಮಿಸಾಕ್ ಆಯಿಲ್ಲಿ೦!’ ತೊಚ್ ಮು೦ದರೊನ್ ಉಲಯ್ಲೊ.
ಹೆಲೀನಾ ತ್ಯಾ ಖುರ್ಸಾ ಮುಳಾಕ್ ಪಾವ್ಲೆ೦. ತಾಚೆರ್ ಉಮ್ಕಳೋನ್ ಆಸ್ಚ್ಯಾಚೆರ್ ತಾಣೆ ದೀಶ್ಟ್ ಘಾಲಿ. ಮೌನ್ ಅಭಿಮಾನಾ೦ತ್ ತಾಣೆ ಥೊಡಿ೦ ಖಿಣಾ೦ ಪಾಶಾರ್ ಕೆಲಿ೦.
ತಿತ್ಲ್ಯಾರ್ ಡೋಬ್ಬಿ ಭಾಯ್ರ್ ಆಯ್ಲೊ. ‘ಡೋಬ್ಬಿ, ಕಾರ್ ಹಾ೦ಗಾಸರ್ ಧಾಡು೦ಕ್ ಬೊ೦ಗ್ಲ್ಯಾ೦ತ್ಲ್ಯಾ೦ಕ್ ಸಾ೦ಗ್ತಾಯ್?’ ಹೆಲೀನಾನ್ ಮ್ಹಳೆ೦. ಜಾಯ್ತ್ ಮ್ಹಣೊನ್ ಮಾತೆ೦ ಹಾಲವ್ನ್ ಡೋಬ್ಬಿ ಆಪ್ಲೆ ಗಾಡಿಯೆರ್ ಬಸೊನ್ ಗೆಲೊ.
‘ಮ್ಹಾಕಾ ತುಜೆಲಾಗಿ೦ ಉಲ೦ವ್ಕ್ ಆಸಾ, ಫಾದರ್ ಜೊನ್!’ ಹೆಲೀನಾನ್ ಆಪ್ಲೆ೦ ಗುಮಾನ್ ತಾಚೆರ್ ಚರಯ್ಲೆ೦.
‘ಭಿತರ್ ಯಾ?’
‘ನಾಕಾ. ಹಾ೦ಗಾಸರ್ ಉಗ್ತಡಾ೦ತ್ ಬಸ್ಯಾ೦.’ ಖುರ್ಸಾ ಮುಳಾ೦ತ್ ತಿ೦ ಬಸ್ಲಿ೦. ಘು೦ವೊನ್ ಪಾಟಿ೦ ಪಳೆತಾನಾ ಖುರ್ಸಾಚ್ಯಾ ಪೆಡಾಚೆರ್ ಕಾ೦ತಯಿಲ್ಲಿ೦ ಉತ್ರಾ೦ ತಾಕಾ ದಿಸ್ಲಿ೦.
ಹಾ೦ವ್ ತಾನೆಲಾ೦
‘ಹಾಕಾ, ಅಶೆ೦ ಮ್ಹಣ್ಚಿ ಕಿತೆ೦ ಗರ್ಜ್ ಪಡ್ಲಿ ಜಾವ್ಯೆತ್?’ ತೆ೦ ಮ್ಹಣಾಲೆ೦ ದಿಗ೦ತಾಕ್ ಪಳೆವ್ನ್.
‘ತೀನ್ ಘ೦ಟೆ ಖರ್ಕಟ್ಯಾ ವೊತಾಕ್ ಖುರ್ಸಾರ್ ಉಮ್ಕಳ್ಚೆ೦ ಖ್ಹೆಳಾಚೆ೦ ನ್ಹಯ್.’
‘ದೆವಾಚ್ಯಾ ಪುತಾಕ್? ಎಕಾ ಪರಿಪೂರ್ಣ್ ಮನ್ಶ್ಯಾಕ್? ಹ್ಯಾ ವಿಶಾ೦ತ್ ತು೦ವೆ೦ ಕೆದಳಾಯಿ ಚಿ೦ತುನ್ ಪಳೆಲಾ೦ಯ್?’
‘ಪರಿಪೂರ್ಣ್ ಮನಿಸ್?’
‘ಕ್ರಿಸ್ತ್! ದೆವಾಚೊ ಪುತ್ರ್, ಪರಿಪೂರ್ಣ್ ಮನಿಸ್. ತೊಯೀ ತಾನೆಲೊ?’
ಫಾದರ್ ಜೊನಾನ್ ಭುಜಾ೦ ಉಡಯ್ಲಿ೦. ‘ತಾನೆಲೊಚ್ ನ್ಹಯ್, ರಡ್ಚ್ಯಾ ವೆಳಾರ್ ರಡ್ಲೊ ಆನಿ ಹಾಸ್ಚ್ಯಾ ವೆಳಾರ್ ಹಾಸ್ಲೊ.’ ತೊ ಮ್ಹಣಾಲೊ.
‘ಜಶೆ೦ ಆಮಿ೦ಯಿ ತಾನೆತಾ೦ವ್.’
‘ತವಳ್ ಆಫೀಮ್ ಭರ೦ವ್ಕ್ ಆಮಿ ಆಸಾ೦ವ್.’
‘ಮತ್ಲಬ್?’
‘ಭಾವಾಡ್ತ್ ಎಕ್ ಆಫೀಮ್ ಮ್ಹಣ್ ತು೦ ಮ್ಹಜೆಲಾಗಿ೦ ವಾದಾಕ್ ದೆ೦ವ್‌ಲ್ಲೆ೦ಯ್ – ಥೊಡ್ಯಾಚ್ ದಿಸಾ೦ ಆದಿ೦. ಹಾ೦ವ್ ಪಾದ್ರಿ ಕಿತ್ಯಾಕ್ ಜಾಲೊ೦ ಮ್ಹಳ್ಳೆ೦ಯಿ ತು೦ವೆ೦ ವಿಚಾರ್‌ಲ್ಲೆ೦ಯ್.’
‘ಆನಿ ತು೦ವೆ೦ ಜಾಪ್ ದಿಲ್ಲಿನಾ೦ಯ್ – ಯೆದೊಳ್ ಪರ್ಯಾ೦ತ್!’
ಎಕ್ ಶಿರ್‍ಶಿರೊ ಹೆಲೀನಾಚೆ ಕುಡಿಂತ್ಲ್ಯಾಂತ್ ಧಾಂವ್ಲೊ. ‘ಮ್ಹಾಕಾ ಕಸಲ್ಯಾಯಿ ಸರ್‍ಬರಾಯೆಚಿ ಗರಜ್ ನಾ, ಜಿಮ್ಮಿ!’ ಹೆಲೀನಾಚೊ ತಾಳೊ ಖಡ್ಪ್ ಜಾಲೊ. ‘ವಚ್ ಆನಿ ಮಾಮ್ಮಿಕ್ ಉಟಯ್….ತಿ ಬಂಗ್ಲ್ಯಾಂತ್ ಆಸಾ, ವ್ಹಯ್?’
‘ತುಜಿ ಖಂಚೀಯ್ ಹುಕುಮ್ ಮಾಂದ್ಚೆ ಪಯ್ಲೆಂ ಮಿಸ್ಸಿ ಹೆಲೀನಾ,’ ಜಾಪ್ ದಿಲಿ ಜಿಮ್ಮಿನ್. ‘ತುಕಾ ಹ್ಯಾ ಅವಸ್ಥೆಂತ್ ಮಮ್ಮಿಕ್ ಭೆಟೊಂಕ್ ಹಾಂವ್ ಸೊಡಿಸೊಂ ನಾ, ಆನಿ ಹಾಂವೆಂ ಸೊಡ್ಲ್ಯಾರ್ ತಿ ಮ್ಹಾಕಾ ಜಿವೊಚ್ ಹುಲ್ಪಾಯ್ತೆಲಿ. ಮ್ಹಾಕಾಯಿ ಗಣ್ಣೆಂ ಆಸಾ ತುಜೆಂ, ಹ್ಯಾ ಬಂಗ್ಲ್ಯಾಚೆಂ, ಆಮ್ಕಾ ಸಾಂಡುನ್ ಗೆಲ್ಲ್ಯಾ ತುಜ್ಯಾ ಡೆಡಿಚೆಂ….ಹಾಂವ್ ನೆಣಾಂ ಕಸಲೆ ಪರಿಗತಿಂತ್ ತುಂ ಹಾಂಗಾಸರ್ ಹ್ಯೆ ರಾತಿ ಡ್ರಾಯ್ವ್ ಕರುನ್ ಆಯ್ಲಾಂಯ್ ಮ್ಹಣ್. ಪುಣ್ ಅರ್ಗಾಂ ದಿತಾಂ ಹಾಂವ್ ಧನ್ಯಾ ದೆವಾಕ್-ಕಸಲ್ಯಾ ಉದ್ದೇಶಾನ್ ಆಯ್ಲಾಂಯ್ ತರಿ ಸುರಕ್ಷಿತಾಯೆನ್ ಹಾಂಗಾಸರ್ ಪಾವ್ಲಾಂಯ್.’ ತಾಣೆ ಆಗಸಾಕ್ ಹಾತ್ ಜೊಡ್ಲೆ. ‘ತುಂ ಕಸಲ್ಯಾಯಿ ತ್ರಾಸಾಂತ್ ಆಸ್ಲ್ಯಾರಿ ತುಜಿ ಮಾಮ್ಮಿ ತೆ ತ್ರಾಸ್ ಸುಟಯ್ತೆಲಿ
ತಿಂ ಪೊರ್‍ಚಾ ಪಂದಾಕ್ ಪಾವ್ಲಿಂ ಅನಿ ಜ್ಯೋ ಕಿಚನಾಕ್ ಧಾಂವ್ಲೊ. ಡೊಬರ್‌ಮೆನ್ ಪೆಟೆ ಹೆಲೀನಾಚೊ ವಾಸ್ ಯೆತಾನಾ ಗುರ್ರ್ ಕರುನ್ ಥಂಡ್ ಜಾಲೆ ಆನಿ ಕೆನೆಲಾಂತ್ ತಾತಾಂಚ್ಯಾ ಜಾಗ್ಯಾರ್ ವಚುನ್ ನಿದ್ಲೆ. ಹೆಲೀನಾಚೊ ಸ್ವಾಸ್ ಆತಾಂ ಸ್ಥಿಮಿತಾಯೆಕ್ ಯೆತಾಲೊ. ಜಿಮ್ಮಿ ಲಾಗಿಂ ಭಾಸಾಭಾಸ್-ತರ್ಕ್ ಕರುನ್ ಫಾಯ್ದೊ ನಾ ಮ್ಹಳ್ಳೆಂ ತಾಕಾ ಕಳಿತ್ ಆಸ್‌ಲ್ಲೆಂ.
ಪಾವ್ಸ್ ರಾವ್‌ಲ್ಲೊ ಆನಿ ಫಾಂತೆಂ ಚಡ್ ಪಯ್ಸ್ ನಾತ್‌ಲ್ಲೆಂ. ಸುಖಾಳ್ ಆನಿ ವಿಸ್ತಾರ್ ದಿವಾನ್‌ಖಾನ್ಯಾಂತ್ ಯೆತೆಚ್ ಜಿಮ್ಮಿನ್ ಹೀಟರ್ ಚಾಲು ಕೆಲೊ. ‘ಆತಾಂ, ತುಂ ಟೊಯ್ಲೆಟಾಕ್ ವಚ್!’ ತಾಣೆ ಹುಕುಮ್ಂಚ್ ದಿಲಿ. ‘ತತ್ಕಾಲಾಕ್ ಟೊಯ್ಲೆಟ್ ವೊಡ್ರೋಬಾಂತ್ ಆಸ್ಚೊ ದಗ್ಲೊ ವಾಪರ್….ಹೆರ್ ಮುಸ್ತಾಯ್ಕಿ…’
‘I’ll manage Jimmy! Get the coffee please.’ ಹುನೊನಿ ಕೊಫಿ ತಾಕಾ ಕಿತ್ಲ್ಯಾ ಜರೂರತೆನ್ ಜಾಯ್ ಆಸ್‌ಲ್ಲಿ ಮ್ಹಳ್ಳೆಂ ಗಮ್ತಾನಾ ಆಪುಣ್ ಆನಿಕಿ ಜೀವಂತ್ ಆಸಾಂ ಮ್ಹಳ್ಳೆಂ ತಾಕಾ ದಟ್ಟ್ ಜಾಲೆಂ ಪುಣ್ ಆಪುಣ್ ಕಶೆಂ ಕಾರ್ ಚಲವ್ನ್ ಜೆನಿಸ್ ಎಸ್ಟೇಟಿಕ್ ಯೆವ್ನ್ ಪಾವ್ಲಿಂ ಮ್ಹಳ್ಳೆಂ ಮಾತ್ರ್ ಸುಸ್ತೊಂಕ್ ನಾ. ಪುಣ್ ತಾಣೆ ಹಾಂಗಾಸರ್ ಯೆಂವ್ಚಿ ಗರ್ಜ್ ಆನಿ ತುರ್ತ್ ಇತ್ಲೆಂ ದಾಟ್‌ಗೀ, ತೆಂ ಯೆಮ್ಕೊಂಡಾಂತ್ಲ್ಯಾಂನ್‌ಯಿ ಕಾರ್ ಚಲವ್ನ್ ಯೆತೆಂ. ಆತಾಂ ಆಪ್ಲ್ಯಾ ಬಂಗ್ಲ್ಯಾಚ್ಯಾ ಭದ್ರತೆಂತ್ ಆನಿ ಉಬೆಂತ್ ತೆಂ ಆಸ್ತಾನಾ ತಾಕಾ ಪಾಟ್ಲ್ಯಾ ದೋನ್ ದಿಸಾಂನಿ ಘಡ್ಲೆಲೆಂ ಎಕ್ ದುಸ್ವಪಾಣ್, ಅಂಕಲ್ ಕ್ಲೆರನ್ಸಾನ್ ವಕತ್ ದಿತಾನಾ ತಾಚೆರ್ ಯೆಂವ್ಚಿಂ ತಿಂ ಘುಂವ್ಡಿ ಘುಂವ್ಡಿ ಕಾಳಿಂ ಮೊಡಾಂ ತಾಂಚೊಚ್ ಖಯಾಲ್ ತಾಕಾ ಆಯ್ಲೊ.
‘ನಾ, ನಾ, ಆನಿ ಕಾಂಯ್ ಜಾಂವ್ಚೆಂ ನಾ!’ ತೆಂ ಆಪ್ಣಾಕ್‌ಚ್ ಸಾಂಗಾಲಾಗ್ಲೆಂ, ಟೊಯ್ಲೆಟಾಚ್ಯಾ ಶವರಾಂತ್ ನ್ಹಾತಾನಾ. ‘ಆನಿ ಕಾಂಯ್ ಜಾಂವ್ಚೆಂ ನಾ. ಆತಾಂ ಪಳೆಂ, ಟೊಯ್ಲೆಟಾಂತ್ಲೊ ಹೊ ಆರ್‍ಸೊ ಘಾಮೆಲಾ ಹುನ್ ಉದ್ಕಾಚ್ಯಾ ಹಬ್ಯಾಂತ್ ಪುಣ್ ಹೊ ಹಬೊ ವೆಗಿಂಚ್ ನಿತಳ್ತಲೊ ಆನಿ ಫಾಲ್ಯಾಂ ಸಕಾಳಿಂ ಉಟ್ತಾನಾ ಮ್ಹಾಕಾ ಎಕ್ ಮಂದ್ ತಕ್ಲೇಫಡಾಫಡ್ ಆಸ್ತೆಲಿ, ಅಂಕಲ್ ಕ್ಲೆರೆನ್ಸಾಚ್ಯಾ ವಕ್ತಾನ್ ಕಶಿ ಆಪ್ಣಾಕ್ ತಕ್ಲೇಫಡಾಫಡ್ ಯೆತಾಲಿ.. ತಶಿಚ್…..ಆತಾಂ ಮಾಮ್ಮಿ ಆಸಾ ನ್ಹಯ್?
ತೆಂ ಟೊಯ್ಲೆಟಾಂತ್ಲೆಂ ಭಾಯ್ರ್ ಯೆತಾನಾ ಇತ್ಲೆಂ ಘಮ್ಗಮ್ತಾಲೆಂ, ಜಿಮ್ಮಿ ಆನಿ ಜ್ಯೋ ತಾಕಾಚ್ ಪಳೆಂವ್ಕ್ ಪಡ್ಲೆ. ತೆಂ ಚಿಕ್ಕೆಸೆ ಲಜ್ಲೆಂ ಸಹಿತ್.
ಜ್ಯೊ-ನ್ ಮ್ಹಾಗೇಟಿ ಭಾಯ್ರ್ ಆಸ್‌ಲ್ಲೆಂ ಹೆಲೀನಾಚೆಂ ಕಾರ್ ಪೋರ್‍ಚ್ಯಾಂತ್ ಹಾಡುನ್ ರಾವಯಿಲ್ಲೆಂ, ಕಿಚನಾಕ್ ವಚುನ್ ಕೊಫಿ ತಯಾರ್ ಕೆಲ್ಲಿ.
ತಾಣೆ ಹಾಡುನ್ ದಿಲ್ಲಿ ಕೊಫಿ ತಾಣೆ ಇತ್ಲ್ಯಾ ಉತ್ಸುಕತೆನ್ ಘೆತ್ಲಿ ಕಿ –
‘ಮಾಮ್ಮಿಕ್ ಜಾಗಯ್ಲೆಂ?’ ತಾಣೆ ತ್ಯಾ ದೊಗಾಂಯಿ ವಿಚಾರ್‍ಲೆಂ, ಸಗ್ಳಿ ರಾತ್ ಪಯ್ಣ್ ಕರುನ್ ಆಯಿಲ್ಲಿ ಧುವ್ ಜಶೆಂ ವಿಚಾರ್‍ತಾ, ತಶೆಂ.
ಜ್ಯೋ ಆನಿ ಜಿಮ್ಮಿನ್ ಯೆಕಾಮೆಕಾ ಮತ್ಲಾಬಿ ದಿಷ್ಟಿ ಅದಲ್‌ಬದ್ಲಿ ಕರ್ಚ್ಯೊ ತಾಚ್ಯಾ ಗಮನಾಕ್ ಘೆಲ್ಯೊ.
‘ಕಿತೆಂ?’ ಆತಾಂ ಸಣ್ಸಣ್ಲೆಂಚ್. ‘ಮಾಮ್ಮಿ ಬಂಗ್ಲ್ಯಾಂತ್ ಆಸಾ ಆನಿ ಭಲಾಯ್ಕೆಂತ್ ಆಸಾ?’
……
‘ಮಾಮ್ಮಿ,’ ಜಾಪ್ ದಿಲಿ ಜಿಮ್ಮಿನ್. ‘ಮಾಮ್ಮಿ ಎಸ್ಟೇಟಿಂತ್ ಆಸಾ ಪುಣ್ ಬಂಗ್ಲ್ಯಾಂತ್ ನಾ. ಹೆಂ ಆಮಿ ತುಕಾ ಸಾಂಗೊಂಕ್ ನಜೊ ಮಿಸ್ಸಿ ಹೆಲೀನಾ ಪುಣ್ ಸಬಾರ್ ಘುಟ್ ಆಮಿ ಲಿಪ್‌ಯ್ಲ್ಯಾರಿ ಭಾಯ್ರ್ ಉಗ್ಡಾಪೆ ಜಾತಾತ್!’
‘ಕಸಲ್ಯಾ ಹುಮಿಣ್ಯಾಂನಿ ತುಂ ಉಲಯ್ತಾಯ್, ಜಿಮ್ಮಿ?’ ತೆಂ ಕೊಫಿ ಕಪ್ಪ್ ಟೀಪೊಯಾಚೆರ್ ದವರುನ್ ಉಬೆಂ ಜಾಲೆಂ. ಹ್ಯಾ ತಾಚ್ಯಾ ಅಚಾನಕ್ ಕರ್ತುಬಾವರ್ವಿಂ ತಾಕಾ ಎಕ್ ಲಕ್ಣಿ ಆಯ್ಲಿ.
‘ಸಾಂಬಾಳ್ ಮಿಸ್ಸಿ ಹೆಲೀನಾ!’ ಚತ್ರಾಯ್ಲೆಂ ಜಿಮ್ಮಿನ್. ‘ಸಾರ್ಕೆಂ ಹಾಂವ್ ಉಲಯ್ತಾಂ. ಮದಾಮ್ ಜೆನಿಸ್ ಎಸ್ಟೇಂತ್ ಆಸಾ ಪುಣ್ ಬಂಗ್ಲ್ಯಾಂತ್ ನಾ. ಆನಿ ತಿ ಖಂಯ್ ಆಸಾ ಮ್ಹಣ್ ಸಾಂಗ್ಚಿ ಪರ್ವಣ್ಗಿ ಮ್ಹಾಕಾ ನಾ.’
ಆಪ್ಣಾಕ್‌ಚ್ ಆದಾರ್‍ಸುನ್ ಹೆಲೀನಾ ಬಸ್ಲೆಂ.
‘ಕಸಲ್ಯೊ ಹುಮಿಣ್ಯೊ ಘಾಲ್ತಾಯ್, ಜಿಮ್ಮಿ?’ ತಾಚ್ಯಾ ತಾಳ್ಯಾ ಧಾರೆಂತ್ ವಿರರಾಯ್ ಆಸ್‌ಲ್ಲಿ. ‘ಹಾಂವ್ ಕಿತೆಂ ಪಿಕ್‌ನಿಕಾಕ್ ಆಯ್ಲ್ಯಾಂ ಮ್ಹಣ್ ಲೆಕ್ತಾಯ್? ಮಾಮ್ಮಿ ಬಂಗ್ಲ್ಯಾಂತ್ ನಾ ಪುಣ್ ಎಸ್ಟೇಟಿಂತ್ ಆಸಾ ಪುಣ್ ಎಸ್ಟೇಟಿಂತ್ ತಿ ಖಂಯ್ ಆಸಾ ಮ್ಹಣ್ ಸಾಂಗ್ಚಿ ಪರ್ವಣ್ಗಿ ತುಕಾ ನಾ? ಕೊಣೆ ತಿ ಪರ್ವಣ್ಗಿ ರದ್ದ್ ಕೆಲ್ಯಾ?’
ಹ್ಯಾ ಸವಲಾಚೆರ್ ಜಿಮ್ಮಿ ಆನಿ ಜ್ಯೋ ಯೆಕಾಮೆಕಾಚಿಂ ಮುಕಮಳಾಂ ಪಳೆಂವ್ಕ್ ಲಾಗ್ಲೆ.
ಹೆಲೀನಾನ್ ಆಪ್ಲಿ ಕೊಫಿ ಕಾಬಾರ್ ಕೆಲಿ ಆನಿ ಸರಾರಾಂ ತೆಂ ಪಯ್ಲ್ಯಾ ಮಂಜಿಲಾರ್ ಆಸ್ಚ್ಯಾ ಆಪ್ಲ್ಯಾ ಖಾಸ್ಕಿ ರೂಮಾಕ್ ಉಬ್ಲೆಂ. ವಯ್ರ್ ಪಾವ್ತಾನಾ ತಾಕಾ ಹಳ್ಟಾಚಿ ಖರಸ್ ಯೆತಾಲಿ. ಬಿತರ್ ವೆತೆಚ್ ತಾಣೆ ತುರ್ತಾನ್ ಲಿಬಾಸ್ ಬದ್ಲಿಲೊ ಆನಿ ಸಕಯ್ಲ್ ಆಯ್ಲೆಂ. ಜಿಮ್ಮಿ ಆನಿ ಜ್ಯೋ ತಾಕಾ ಖಿಳಾಲ್ಲ್ಯಾ ನದ್ರೆಂನಿ ಪಳೆತಾಲೆ.
‘ಉಡಾಸಾಂತ್ ಆಸುಂ, ಜಿಮ್ಮಿ ಆನಿ ಜ್ಯೋ!’ ತಾಣೆ ಹಳ್ಟಾಚೊ ತಾಳೊ ಕಾಡ್ಲೊ. ‘ಹ್ಯಾ ಬಂಗ್ಲ್ಯಾಚಿ ಆನಿ ಸಗ್ಳ್ಯಾ ಎಸ್ಟೇಟಿಚಿ ಸಮಾಸಮ್ ಹಕ್ಕ್‌ದಾರ್ನ್ ಹಾಂವ್‌ಯಿ ಜಾವ್ನಾಸಾಂ. ಹಾಂಗಾಸರ್ ಕಿತೆಂ ಚಲ್ತಾ ತೆಂ ಹಾಂವ್ ನೆಣಾಂ. ಹೊ ರಾಜಕೀಯಾಚೊ ಖ್ಹೆಳ್ ಜಾಂವ್ಕ್ ಪುರೊ ಪುಣ್ ಮ್ಹಾಕಾ ಪಡೊನ್ ವಚುಂಕ್ ನಾ…..’
‘ತುಜ್ಯಾ ಮ್ಹಾಲಕತ್ವಾಚೆರ್ ದುಬಾವ್ ಆಮಿ ಕರಿನಾಂವ್, ಮಿಸ್ಸ್ ಜೆನಿಸ್!’ ಮ್ಹಣಾಲೊ ಜಿಮ್ಮಿ. ‘ಪುಣ್….’
‘ಪುಣ್ ಕಿತೆಂ? ದುಬಾವ್ ನಾ ತರ್ ಆತಾಂಚ್ ಮ್ಹಾಕಾ ಸಾಂಗ್ ಮಾಮ್ಮಿ ಖಂಯ್ ಆಸಾ ಯಾ ಖಂಯ್ ಗೆಲ್ಯಾ?’
‘ಮಾಮ್ಮಿ, ಮಿಸೆಸ್ ಜೆನಿಸ್ ಎಸ್ಟೆಟೀಂತ್ ಆಸಾ ಆನಿ….ತಿ ಡೋಬ್ಬಿಚ್ಯಾ ಕೊಟೆಜಿಂತ್ ತುಕಾ ಮೆಳ್ಟೆಲಿ!’
ಜಿಮ್ಮಿಚಿ ಜಾಪ್ ಆಯ್ಕೊನ್ ಸಗ್ಳೆಂಚ್ ಘುಸ್ಪಡೀತ್ ಆನಿ ಕಾಲುಬುಲ್ ಜಾಲ್ಲೆಂ ಹೆಲೀನಾ ಹೆಣೆತೆಣೆ ಪಳೆಲಾಗ್ಲೆಂ. ಖಂಯ್ ಆಸಾ ಮ್ಹಜ್ಯಾ ಕಾರಾಚಿ ಚಾವಿ?’
‘ಕಾರಾಚ್ಯಾ ಇಂಜಿನ್ ಸ್ವಿಚಾಂತ್‌ಚ್ ಆಸ್ತೆಲಿ, ಮಿಸ್ ಜೆನಿಸ್!’ ಪಯಿಲ್ಲೆಪಾವ್ಟಿಂ ಉಲಯ್ಲೊ ಜ್ಯೋ. ‘ಪುಣ್ ತುಂ ಹ್ಯಾ ವಗ್ತಾ ಖಂಯ್ ವೆತಾಯ್…’
‘ಅಂಕಲ್ ಕ್ಲೆರೆನ್ಸ್ ಖಂಯ್ ಆಸಾ?’ ಆಪ್ಣೆಂ ಹೆಂ ಸವಾಲ್ ಕಿತ್ಯಾಕ್ ಕೆಲೆಂ ಮ್ಹಳ್ಳೆಂ ರಾಜಾಂವ್‌ಯಿ ತಾಚೆ ಥಂಯ್ ನಾತ್‌ಲ್ಲೆಂ ಪುಣ್ ತೆಂ ಸವಾಲ್ ತಾಚ್ಯಾ ಅಂತರಾತ್ಮಾಂತ್ ಆಸ್‌ಲ್ಲೆಂ, ಖಂಚೊನ್, ನಿದ್ರೇಸ್ತ್ ಜಾವ್ನ್, ಉಟೊಂಕ್ ಸಂದರ್ಬ್ ಯೆಂವ್ಚೆ ಪರ್ಯಾಂತ್. ಆನಿ ಹ್ಯಾ ಸಂದರ್ಬಾರ್ ತಾಕಾ ದೆವಾನ್ಂಚ್ ಆಡಾಯಿಲ್ಲೆಂ ತರಿ ದೇವ್ ಜಿಕ್ತೊ ನಾ.
‘ತುಂ ಥಂಯ್ ವಚಾನಾಕಾ, ಮಿಸ್ ಜೆನಿಸ್!’ ಜಿಮ್ಮಿಚೊ ತಾಳೊ ತಾಕಾ ಪಯ್ಶಿಲ್ಯಾನ್ ಆಯ್ಕಾಲೊ. ತಾಣೆ ಕಾರ್ ಚಾಲು ಕೆಲೆಂ ಆನಿ ಎಸ್ಟೇಟಿಚ್ಯಾ ಬಿತರ್‍ಲ್ಯಾ ರಸ್ತ್ಯಾರ್ ಚಡಯ್ಲೆ. ಥೊಡ್ಯಾಚ್ ಖಿಣಾಂನಿ ತೆಂ ಆಪ್ಲ್ಯಾ ಬಾಪಾಯ್ಚಿ ಸಮಾದಿ ಉತ್ರಾಲೆಂ. ‘ಮ್ಹಾಕಾ ಮಾಫ್ ಕರ್, ಡೆಡಿ!’ ತೆಂ ಪುಸ್ಪುಸ್ಲೆಂ ಕಾರ್ ರಾವಯ್‌ನಾಸ್ತಾಂ. ‘ಮ್ಹಾಕಾ ಮಾಮ್ಮಿಕ್ ಭೆಟೊಂಕ್ ಆಸಾ.’
ಡೋಬ್ಬಿಚ್ಯಾ ಬೇಕರಿಕ್ ಚಿಡ್ಕೊನ್ ಆಸ್ಚಿ ಕೊಟೇಜ್ ಫಿಚಾರ್ ಆಸ್‌ಲ್ಲಿ ಪಳೆವ್ನ್ ತೆಂ ಘುಸ್ಪಡ್ಲೆಂ. ತಾಕಾ ಕಳಿತ್ ಆಸ್ಚೆ ಪರ್ಮಾಣೆ ಕೊಟೇಜಿಚಿಂ ದಾರಾಂ ಕೆದಳಾಯಿ ಉಗ್ತಿಂಚ್ ಆಸ್ತಾಲಿಂ. ಪುಣ್ ಆತಾಂ? ವರ್ಸಾಂ ಆದಿಂ ಡೋಬ್ಬಿ ಲಾಗಿಂ ತಾಣೆ ಎಕ್ ಸವಾಲ್ ಕೆಲ್ಲೆಂ –
‘ತು೦ ಹ್ಯಾ ಕೊಟೇಜಿಕ್ ಬೀಗ್ ಬಿಲ್ಕುಲ್ ಘಾಲಿನಾ೦ಯ್, ಡೋಬ್ಬಿ?’ ಹೆಲೀನಾನ್ ವಿಚಾರ್ಲೆ೦.
‘ಫಿಚಾರ್ ಕೆಲ್ಲಿ೦ ದಾರಾ೦ ಮ್ಹಾಕಾ ಬಿಲ್ಕುಲ್ ಪಸ೦ದ್ ನಾ೦ತ್!’ ತೊ ಮ್ಹಣಾಲೊ. ‘ಹಾ೦ವ್ ಝುಜಾ ಕೈದಿ ಜಾವ್ನಾಸ್‌ಲ್ಲೆ ದೀಸ್ ಉಡಾಸಾ೦ತ್ ಯೆತಾತ್. ಸ೦ಸಾರಾ೦ತ್ ಖ೦ಚೊ ಜಾಗೊ ಕೊಣಾಕ್ ಕೆದಳಾ ಗರ್ಜ್ ಪಡತ್ ಮ್ಹಣ್ ಸಾಗೊ೦ಕ್ ಸಾದ್ಯ್ ನಾ!’
ಹೆಲೀನಾನ್ ಕೊಟೇಜಿಚೆಂ ದಾರ್ ಬಡಯ್ಲೆಂ, ಬಳಾನ್, ಸಬಾರ್ ಪಾವ್ಟಿಂ. ಕೊಲ್ ಬೆಲ್ಲಾಚೊ ಸ್ವಿಚ್ ಖಂಯ್ ಆಸಾ ಮ್ಹಣ್ ತಾಕಾ ಕಳಿತ್ ನಾತ್‌ಲ್ಲೊ.
ದಾರ್ ಉಗ್ತೆಂ ಜಾಲೆಂ ಆನಿ ಬಿತರ್‍ಲ್ಯಾ ಮಂದ್ ಉಜ್ವಾಡಾಂತ್ ಆಪ್ಲ್ಯಾ ಕುಡಿರ್ ಫಕತ್ ಎಕ್ ರಸ್ಮಾಳೊ ದಗ್ಲೊ ರೆವ್ಡಾಯಿಲ್ಲಿ ಲಿಲಿಯನ್ ಜೆನಿಸ್ ತಾಕಾ ದಿಸ್ಲಿ.
‘ಮಾಮ್ಮಿ!’ ಎಕಾ ಆಕೃಂದನಾ ಸಂಗಿಂ ಉಸಲ್ಲೆ ತಾಚೆ ವೋಂಟ್ ತಶೆಚ್ ಧಾಂಪ್ಲೆ. ಲಿಲಿಯನಾಚ್ಯಾ ಖಾಂದಾವಯ್ಲ್ಯಾನ್ ತಾಕಾ ಎಕ್ ಸುಖಾಳ್ ಬೆಡ್ ದಿಸ್ತಾಲೆಂ ಆನಿ ತಾಚೆರ್ ಉದೊರ್‌ಚ್ ಪಡೊನ್ ಆಸ್‌ಲ್ಲೊ ಅಂಕಲ್ ಕ್ಲೆರೆನ್ಸ್!
ಅವಸ್ವರ್ – 91 ► ► ►
