ತ್ಯೆ ರಾತಿಂ ಪ್ರಿತುಮೆನ್ ಚಲಯಿಲ್ಲ್ಯಾ ಆಕ್ರಮಣಾಚೊ ನಿಮಾಣೊ ಭಾಲೊ ಮ್ಹಣ್ಚೆಪರಿಂ ಝಗ್ಲಾಣ್ಯಾಚಿ ಎಕ್ ತಲ್ವಾರ್ ಫಾಳ್ಳಿ ಆನಿ ಹಾಡಾಂಚೊ ಬೊಂಡು ಕಾಂಪಂವ್ಚೆಪರಿಂ ಘಡ್ಗಡೊ ಫುಟ್ಲೊ. ಹೆಲೀನಾನ್ ಕೊಟೇಜಿಚೆಂ ದಾರ್ ಬಡಯ್ಲೆಂ, ಬಳಾನ್, ಸಬಾರ್ ಪಾವ್ಟಿಂ. ಕೊಲ್ ಬೆಲ್ಲಾಚೊ ಸ್ವಿಚ್ ಖಂಯ್ ಆಸಾ ಮ್ಹಣ್ ತಾಕಾ ಕಳಿತ್ ನಾತ್‌ಲ್ಲೊ.
ದಾರ್ ಉಗ್ತೆಂ ಜಾಲೆಂ ಆನಿ ಬಿತರ್‍ಲ್ಯಾ ಮಂದ್ ಉಜ್ವಾಡಾಂತ್ ಆಪ್ಲ್ಯಾ ಕುಡಿರ್ ಫಕತ್ ಎಕ್ ರಸ್ಮಾಳೊ ದಗ್ಲೊ ರೆವ್ಡಾಯಿಲ್ಲಿ ಲಿಲಿಯನ್ ಜೆನಿಸ್ ತಾಕಾ ದಿಸ್ಲಿ.
‘ಮಾಮ್ಮಿ!’ ಎಕಾ ಆಕೃಂದನಾ ಸಂಗಿಂ ಉಸಲ್ಲೆ ತಾಚೆ ವೋಂಟ್ ತಶೆಚ್ ಧಾಂಪ್ಲೆ. ಲಿಲಿಯನಾಚ್ಯಾ ಖಾಂದಾವಯ್ಲ್ಯಾನ್ ತಾಕಾ ಎಕ್ ಸುಖಾಳ್ ಬೆಡ್ ದಿಸ್ತಾಲೆಂ ಆನಿ ತಾಚೆರ್ ಉದೊರ್‌ಚ್ ಪಡೊನ್ ಆಸ್‌ಲ್ಲೊ ಅಂಕಲ್ ಕ್ಲೆರೆನ್ಸ್!
ಆವಯ್ ಆನಿ ಧುವ್ ಯೆಕಾಮೆಕಾ ಪಳೆತ್ತ್ ಉಬಿಂ ಜಾಲ್ಲಿಂ ಆನಿ ಲಿಲಿಯನಾಕ್ ಯಾ ಹಲೀನಾಕ್ ಕಿತ್ಲಿಂ ಸೆಕುಂದಾಂ, ಕಿತ್ಲಿಂ ಮಿನುಟಾಂ, ಕಿತ್ಲೆ ಘಂಟೆ, ಕಿತ್ಲೆ ದೀಸ್, ಕಿತ್ಲಿಂ ವರ್ಸಾಂ ಪಾಶಾರ್ ಜಾಲೆ ತಾಚೊ ಹಿಸಾಬ್ ನಾತ್‌ಲ್ಲೊ.
‘ಹೆಲೀನಾ!’ ಲಿಲಿಯನಾಚೊ ತಾಳೊ ಹೆಲೀನಾಕ್ ಪಯ್ಶಿಲ್ಯಾನ್ ಆಯ್ಕಾಲೊ. ‘ಹೆಲೀನಾ ತುಂ…. ಹ್ಯಾ ತುಫಾನಿ ರಾತಿಂ ಹಾಂಗಾಸರ್ ಕಿತೆಂ ಕರ್ತಾಯ್? ಕಿತ್ಯಾಕ್ ತುಂ ಹಾಂಗಾಸರ್ ಆಯ್ಲಾಂಯ್? ಕಾರಾಣ್ ಕಿತೆಂ ಹ್ಯಾ ಸರ್ವಾಚೆಂ….ಹಾಂ ಹಾಂ…?’
ಹೆಲೀನಾ ಕಾಂಪ್ತಾಲೆಂ.
‘ತುಕಾ ಬಿತರ್ ಯೆ ಮ್ಹಣ್ ಸಾಂಗೊಂಕ್‌ಯಿ ಮ್ಹಾಕಾ ಜಾಯ್ನಾ…..ಹಾಂವ್….ಆಮಿಂ…’
‘ಹಾಂವೆಂ ಹಾಂಗಾಸರ್ ಯೆಂವ್ಕ್ ನಜೊ ಆಸ್‌ಲ್ಲೆಂ….ಹಾಂವ್….’
‘ಕೊಣ್ ಹ್ಯಾ ಫಾಂತ್ಯಾರ್ ಆಮ್ಕಾಂ….?’ ಅಂಕಲ್ ಕ್ಲೆರೆನ್ಸಾಚೊ ತಾಳೊ. ಆತಾಂ ತೊ ಖಟ್ಲ್ಯಾರ್ ಉಟೊನ್ ಬಸ್‌ಲ್ಲೊ ಆನಿ ತಾಚ್ಯಾ ಆಂಗಾವಯ್ಲಿ ಕಾಂಬಳ್ ನಿಸ್ರೊನ್ ಪೆಂಕ್ಟಾ ಪರ್ಯಾಂತ್ ರಾವಲ್ಲಿ. ಪೆಂಕ್ಟಾ ಸಕಯ್ಲ್ ತೊ ವಿಣ್ಗೊಚ್ ಆಸ್‌ಲ್ಲೊ.
‘ಆಮ್ಚೆಂ ಹೆಲೀನಾ ಆಯ್ಲಾಂ!’ ಪರ್ತ್ಯಾನ್ ಲಿಲಿಯನಾಚೊ ತಾಳೊ ಹೆಲೀನಾಕ್ ಆಯ್ಕಾಲೊ. ‘ಆಂಗಾಕ್ ಕಿತೆಂ ಪುಣಿ ರೆವ್ಡಾವ್ನ್ ಹಾಂಗಾಸರ್ ಯೆ. I think she is in some deep trouble!’
ಕ್ಲೆರೆನ್ಸ್, ಕಸಲೊಗಿ ಲಾಂಬ್ ದಗ್ಲೊ ರೆವ್ಡಾವ್ನ್ ದಾರಾ ಸರ್ಶಿಂ ಆಯ್ಲೊ. ‘ಹೆಲೀನಾ ಆನಿ ಹ್ಯೆ ರಾತಿಂ, ಹ್ಯಾ ಹವ್ಯಾಂತ್……?’
ಕ್ಲೆರೆನ್ಸಾಚೆಂ ಮಾತೆಂ ಲಿಲಿಯನಾಚ್ಯಾ ಖಾಂದಾವಯ್ಲ್ಯಾನ್ ದಿಸ್ತಾನಾ ಹೆಲೀನಾಚಿ ಧಾತ್ ಚುಕ್ಲಿ. ಮತಿರ್ ಕಾಳೊಕ್ ಯೆತಾನಾ ತಾಕಾ ಕ್ಲೆರೆನ್ಸಾಚಿ ಬೋಬ್ ಆಯ್ಕಾಲಿ. ‘She’s passing out, Lilian, take care of her, call somebody!’
‘ಕೊಣಾಕ್ ಆಪಂವ್?’ ಲಿಲಿಯನಾನ್ ಹಾಕ್ ಮಾರ್ಲಿ. ‘ಯೆ, ತುಂಚ್ ಮ್ಹಾಕಾ ಆದಾರ್ ದೀ…. good God my Lord…’
ಹೆಲೀನಾಕ್ ಧಾತ್ ಯೆತಾನಾ ತಾಂಣಿ ತಾಕಾ ಕೊಟೆಜಿಂತ್ಲ್ಯಾ ಮೋವ್ ಖಟ್ಲ್ಯಾರ್ ನಿದಾಯಿಲ್ಲೆಂ. ಕ್ಲೆರೆನ್ಸ್ ಥಂಯ್ಸರ್ ನಾತ್‌ಲ್ಲೊ ತೆಂ ಹೆಲೀನಾಚ್ಯಾ ಗಮನಾಕ್ ಗೆಲೆಂ.
‘ಸಂಯಮ್ ಸಾಂಬಾಳ್, ಡಾರ್ಲಿಂಗ್!’ ಲಿಲಿಯನ್ ಪರಾತ್ತಾಲಿ. ‘ಫಾದರ್ ಜೊನಾಕ್ ಆಪಂವ್ಕ್ ಕ್ಲೆರೆನ್ಸ್ ಗೆಲಾ.’
ಡೋಬ್ಬಿಕ್‌ಯಿ ಎಕ್ ಉತಾರ್ ತೊ ಸಾಂಗ್ತೊಲೊ.’
‘ಹಾಂವೆಂ ಹಾಂಗಾಸರ್ ಯೆಂವ್ಕ್ ನಜೊ ಆಸ್‌ಲ್ಲೆಂ, ಮಮ್ಮಿ!’ ಹೆಲೀನಾನ್ ಆಪ್ಲೆಂ ಮಾತೆಂ ಹಾತಾಂ-ತಾಳ್ವೆನ್ ಆದಾರುನ್ ಧರ್‍ಲೆಂ. ‘ಕಿತೆಂ ಚಲ್ತಾ ಹಾಂಗಾಸರ್? ಹ್ಯಾ ಗಲೀಜ್ ಖ್ಹೆಳಾಂತ್ ತುಮಿಂ ಸರ್ವಾಂಯಿ ಶಾಮೀಲ್ ಆಸಾತ್.’
ಲಿಲಿಯನಾನ್ ಎಕ್ ದೀಗ್ ಸ್ವಾಸ್ ಸೆವ್ಲೊ. ‘ಜೆಂ ಕಿತೆಂ ತುಂವೆಂ ಪಳೆಲೆಂಯ್…. ತೆಂಚ್! ತುಜ್ಯಾ ದೊಳ್ಯಾಂನಿ ಪಳೆಯಿಲ್ಲೆಂ ತೆಂ ಮ್ಹಜ್ಯಾನ್ ಆಳ್ವೊವ್ನ್ ಕಾಡುಂಕ್ ಜಾಯ್ನಾ. ತುಕಾ ಸರ್ವ್ ಆಮಿ ವಿವರಿತಾಂವ್, ವಿವರಿತಾಂವ್. ಪುಣ್ ಸ್ಪಷ್ಟೀಕರಣ್ ದೀನಾಂವ್, ತೆಂ ಆಮ್ಚೆಲಾಗಿಂ ನಾ…. ತುಂ ಕಿತ್ಯಾಕ್ ಆಯ್ಲೆಂಯ್ ಹಾಂಗಾಸರ್?’
‘ಆನಿ ಖಂಯ್ ವೆತಿಂ, ಮಮ್ಮಿ, ಖಂಯ್ ವೆತಿಂ?’
‘ಜಾಲಾಂ ತರಿ ಕಿತೆಂ?’ ವಿಚಾರ್ಲೆಂ ಲಿಲಿಯನಾನ್. ‘ತುಂ ಖಂಚಾ ಕಷ್ಟಾಂತ್, ತ್ರಾಸಾಂತ್ ಆಸ್ಲ್ಯಾರಿ ತುಕಾ ಸುಟ್ಕಾ ಆಮಿ ದೀಂವ್ಕ್ ಸಕ್ತಾಂವ್.’
ಹೆಲೀನಾ ಫಕತ್ ಸುಸ್ಕಾರ್‍ಲೆಂ ಶಿವಾಯ್ ಎಕ್‌ಚ್ ಎಕ್ ಉತಾರ್ ತಾಚೆಥಾವ್ನ್ ಸುಟ್ಲೆಂ ನಾ. ಯೆಕಚಾಣೆಂ ತಾಣೆಂ ಆಪ್ಲೆ ಕುಡಿಕ್ ಆನಿ ಗಳ್ಯಾಕ್ ಚಿರ್ಡುಂಕ್ ಸುರು ಕೆಲೆಂ. ‘ಮ್ಹಾಕಾ ಹಾಂಗಾಸರ್ ಉಬ್ದೆಸ್ ಜಾತಾತ್!’ ತಾಣೆ ಮ್ಹಳೆಂ ಉಗ್ತೆಂ ಆಸ್‌ಲ್ಲ್ಯಾ ದಾರಾಂತ್ಲ್ಯಾನ್ ಭಾಯ್ರ್ ಪಳೆವ್ನ್. ‘ಮ್ಹಾಕಾ ಭಾಯ್ರ್ ವಚುಂಕ್ ಸೊಡಾ!’
‘ತಸಲೆಂ ಕಸಲೆಂಚ್ ತುಂವೆಂ ಕರುಂಕ್ ಹಾಂವ್ ಸೊಡಿಶಿಂ ನಾ!’ ಖಬಾಡ್ದಾರೆನ್ ಮ್ಹಳೆಂ ಲಿಲಿಯನಾನ್. ‘ಕಿತೆಂ ಜಾಲ್ಯಾರಿ, ಕಿತೆಂ ಆಮಿ ಕೆಲ್ಯಾರಿ ತುಂ ಮ್ಹಜೆಂ ಧುವ್ ತೆಂ ಧುವ್‌ಚ್ಚ್. ತುಜ್ಯಾನ್ ನೆಗಾರುಂಕ್ ಜಾಯ್ನಾ. ತರ್ ತುಂವೆಂ ಅಶೆಂ ಕೆಲ್ಲೆಂಯ್ ತರ್ ತುಕಾ ಆಮಿ ಹ್ಯೆ ರಿತಿರ್ ಪಿಸಾಂಟ್‌ಪಣ್ ಪಾಂಗ್ರುಂಕ್ ಸೊಡ್ತೆನಾಂವ್!’
‘ಕಿತೆಂ ತುಂ ಆತಾಂ ಉಲಯ್ತಾನಾ ಆಮಿ ಆಮಿ ಮ್ಹಣ್ ಕ್ಲೆರೆನ್ಸಾಕ್ ಮೆತೆರ್ ಕರ್ತಾಯ್? ಕಿತೆಂ?’
‘ತಾಕಾ ಹಕ್ಕ್ ಆಸಾ!’ ಜಾಪ್ ದಿಲಿ ಲಿಲಿಯನಾನ್. ‘ತೊ ಆಸ್‌ಲ್ಲ್ಯಾನ್ ಆಮಿ ಆಸಾಂವ್!’
‘ತೊ ಆಸ್‌ಲ್ಲ್ಯಾನ್ ತುಂ ಆಸಾಯ್!’ ತಿದ್ವಿಲೆಂ ಹೆಲೀನಾನ್. ‘ಆತಾಂ ಮ್ಹಾಕಾ ಸಷ್ಟ್ ಜಾಯಿತ್ತ್ ಯೆತಾ, ತೊ ಕ್ಲೆರೆನ್ಸ್ ಮ್ಹಾಕಾ ನಿದೆಚೆಂ ವೊಕಾತ್ ದಿತಾಲೊ. ಪೊಳ್ಕುರಿಂ ತುಮಿಂ.’
ಲಿಲಿಯನಾನ್ ಆಪ್ಲೆಂ ಸಂಯಮ್ ಸಾಂಬಾಳ್ಳೆಂ. ‘ತುಂವೆಂ ಮ್ಹಜ್ಯಾ ಸವಲಾಕ್ ಜಾಪ್ ದಿಲಿನಾಂಯ್, ಹೆಲೀನಾ!’ ತಿಣೆ ಪರ್ತ್ಯಾನ್ ವಿಚಾರ್ಲೆಂ. ‘ಕಸಲ್ಯಾ ಕಾರಾಣಾಕ್ ಲಾಗುನ್ ತುಂ ಹಾಂಗಾಸರ್ ಆಯಿಲ್ಲೆಂಯ್, ಹ್ಯೆ ಬಿರಾಂಕುಳ್ ರಾತಿಂ ಕಾರ್ ಡ್ರಾಯ್ವ್ ಕರುನ್?’
‘ಮ್ಹಜ್ಯಾ ಬಂಗ್ಲ್ಯಾಕ್ ಯೆಂವ್ಕ್ ಮ್ಹಾಕಾ ಕಸಲ್ಯಾಚ್ ಕಾರಾಣಾಚಿ ಗರ್ಜ್ ನಾ!’ ಹೆಲೀನಾನ್ ಜಾಪ್ ದಿಲಿ, ಖಟ್ಲ್ಯಾ ವಯ್ಲೆಂ ಉಟೊನ್. ‘ಮ್ಹಾಕಾ ಹ್ಯಾ ಪಾತ್ಕಿ ಖಾಟಿಯೆರ್ ನಿದುಂಕ್ ನಾಕಾ. ಹ್ಯಾ ಖಾಟಿಯೆಕ್ ಯೆತಾ ತೊ ವಾಸ್ ಮ್ಹಾಕಾ ಆಡ್ವಳಾಯ್ತಾ. ಹಾಂವ್ ಭಾಯ್ರ್ ವೆತಾಂ!’ ತೆಂ ಉಟ್ಲೆಂಚ್ ಆನಿ ಶೀದಾ ದಾರಾ ಸರ್ಶಿ ಗೆಲೆಂ. ತಾಕಾ ಆಡಾಂವ್ಕ್ ಲಿಲಿಯನ್ ಆಡ್ ಗೆಲಿ ಪುಣ್ ತಿತ್ಲ್ಯಾರ್ ಫಾದರ್ ಜೊನ್ ಆನಿ ಕ್ಲೆರೆನ್ಸ್ ದಾರ್ವಟ್ಯಾರ್ ಉಬೆ ಜಾಲ್ಲೆ.
‘ಫಾದರ್ ಜೊನ್!’ ಉದ್ಗಾರ್‍ಲಿ ಲಿಲಿಯನ್. ‘ಆಮಿಂ…ಹಾಂಗಾಸರ್…’
‘ತುಮಿಂ ಹಾಂಗಾಸರ್ ಸಾಂಪ್ಡೊನ್ ಪಡೊಂಕ್‌ನಾಂತ್!’ ಫಾದರ್ ಜೊನಾಚೊ ತಾಳೊ ಸಾದ್ಲೊ. ‘ಹೆಲೀನಾಕ್ ವಚುಂಕ್ ಜಾಯ್, ತೆಂ ವಚುಂದಿ, ಆಯಿಲ್ಲೆಚ್ ವಾಟೆನ್. ದಿಕ್ಕ್‌ನಾಸ್ತಾಂ ತೆಂ ಹಾಂಗಾಸರ್ ಆಯಿಲ್ಲೆಂ ನ್ಹಯ್, ಕಾರಾಣ್ ಆಸುನ್ ಆಯಿಲ್ಲೆಂ. ತಾಕಾ ಹಾಂವೆಂ ಯೆದೊಳ್ ಭರಯಿಲ್ಲೆಂ ಆಫೀಮ್ ತಾಕಾ ಮಜ್ಬೂತ್ ಕರುಂಕ್ ಸಕ್ಲೆಂ ನಾ. ತಾಚೆಂ ಶಿಕಪ್ ಆನಿಕಿ ಅಧುರೆಂ ಆಸಾ.’
‘ಆನಿ ಆಮ್ಚೆಂ ಫಾದರ್ ಜೊನ್?’ ಸುಸ್ಕಾರ್ಲಿ ಲಿಲಿಯನ್. ‘ಹೆಂ ಸರ್ವ್ ತುಕಾ ಕಳಿತ್ ಆಸ್‌ಲ್ಲೆಂ?’
‘ವ್ಹಯ್!’ ಫಾದರ್ ಜೊನ್ ಕೊಟೇಜಿ ಬಿತರ್ ಆಯ್ಲೊ. ‘ಕಳಿತ್ ಆಸ್‌ಲ್ಲೆಂ ಆನಿ ಜರಿತರಿ ಪಾತಕ್, ಯೆಮ್ಕೊಂಡ್ ಸರ್ಗ್ ಮ್ಹಣ್ ತುಮ್ಕಾಂ ಹಾಂವೆಂ ಆಡಾಯಿಲ್ಲೆಂ ತರ್ ತುಮಿ ಖಂಚಾಯಿ ಶಹರಾಂತ್ ವಚುನ್ ಪಂಚ್‌ತಾರಾ ಹೊಟೆಲಾಂನಿ ಯಾ ಅಪರಿಚಿತ್ ಕೊಟೇಜಿನಿ ತುಮ್ಚಿ ತೃಶಾ ಭಾಗಯ್ಶಾತ್ ಆನಿ ಎಕಾ ದಿಸಾ ಸಾಂಪ್ಡೊನ್ ಸಂಸಾರಾರ್ ನಾಲಿಸಾಯೆಚಿಂ ಜಾಸ್ಯಾತ್; ವಿಣ್ಗೆಂ ಉಬ್ತೆಂ ಆಸ್‌ಲ್ಲೆಂ ತುಜೆಂ ರಾಜಕೀಯ್, ತುಜಿ ಸಮಾಜಿಕ್ ಥೊರಾಯ್ ಆನಿ ಹೆಲೀನಾಚೊ ಫುಡಾರ್. ಕಿತೆಂ ಮ್ಹಣ್ ಚಿಂತಾಯ್ ತುಂ, ಲಿಲಿಯನ್? ಹ್ಯಾ ಎಸ್ಟೇಟಾಂತ್ಲ್ಯಾಂ ತುಮ್ಚೆ ಮದೆಂ ಘಡ್ಚ್ಯಾಚೊ ಕುಸ್ಕುಟ್ ವಾಸ್ ನಾ ಮ್ಹಣ್ ತುಮಿ ಚಿಂತಾತ್. ವಾಸ್ ಆಸಾ ಪುಣ್ ರುಜ್ವಾತಿನಾಂತ್. ಆನಿ ಹಾಕಾ ತುಮಿ ದಿನ್ವಾಸಿಜೆ ಮ್ಹಜೊ ಆನಿ ಡೋಬ್ಬಿಚೊ….’
‘ಧಯ್ರ್ ಘೆತಾಂ ಹಾಂವ್ ಫಾದರ್ ಜೊನ್,’ ಮ್ಹಳೆಂ ಹೆಲೀನಾನ್. ‘ಧಯ್ರ್ ಘೆತಾಂ ಹಾಂವ್ ತುಕಾ ದೆಂವ್ಚಾರಾಚೊ ದಲಾಲಿ ಮ್ಹಣ್ ಆಪಂವ್ಕ್. ಹಾಂವ್ ಕಾಂಯ್ ಸಾಂತಿಣ್ ನ್ಹಯ್, ಪುಣ್ ಹಾಂವ್ ಯೆದೊಳ್ ನಿತಳ್, ನಿಸ್ಕಳ್ ಆನಿ ನಿರ್ಮಳ್.’
‘ತೆಂ ಆಮಿ ಜಾಣಾಂವ್, ಮ್ಹಜ್ಯಾ ಡಾರ್ಲಿಂಗ್,’ ಮ್ಹಳೆಂ ಲಿಲಿಯನಾನ್. ‘I’ve never doubted your virginity! ಹಾಂವ್ ಜಾಣಾಂ, ಕಸಲ್ಯಾ ವಿಷಯಾಂಚೆರ್ ತುಂ ಆನಿ ಫಾದರ್ ಜೊನ್ ಘಂಟೆಗಟ್ಲ್ಯಾನ್ ಕೊಪೆಲಾ ಭಾಯ್ಲ್ಯಾ ಖುರ್ಸಾಮುಳಾಂತ್ ಬಸುನ್ ಉಲಯ್ತೆಲ್ಯಾತ್ ಮ್ಹಣ್. ತೊ ವಿಲ್ಲಿ ಆನಿ ಹಾಲಿಂಚ್ ರಿಚರ್ಡ್ ಹಾಂಗಾಸರ್ ಆಯಿಲ್ಲೊ ತರಿ, ತುಜ್ಯಾ ಸಾಂಗಾತಾ ತಾಣಿ ವೇಳ್ ಖರ್ಚಿಲ್ಲೊ ತರೀ ‘I’ve never doubted your virginity!’ ಲಿಲಿಯನಾನ್ ತಾಂಕಾಂ ದೊಗಾಂಯ್ಕಿ ಫುಡ್ ಕೆಲಿ. ‘ಫಾದರ್ ಜೊನಾನ್ ತುಕಾ ಕಸಕಸ್ಲೆಂ ಆಫೀಮ್ ಭಾವಾರ್ಥಾಚ್ಯಾ ರುಪಾರ್ ದಿಲಾಂ ಆಸ್ಯೆತ್ ಮ್ಹಳ್ಳೊ ಅಂದಾಜ್ ಮ್ಹಾಕಾ ಆಸಾ. ಪುಣ್ ತುಕಾ ಉಡಾಸ್ ಆಸ್ತೊಲೊ ಮ್ಹಳ್ಳೆಂ ಹಾಂವ್ ಜಾಣಾಂ.’
ಹೆಲೀನಾನ್, ಫಾದರ್ ಜೊನಾಚಿ ದೀಷ್ಟ್ ಧರ್ಲಿ. ‘ಉಡಾಸಾಂತ್ ಆಸಾ!’ ಮ್ಹಳೆಂ ಹೆಲೀನಾನ್. ‘ತ್ಕಾ ಆಯ್ಕೊಂಕ್ ಜಾಯ್ ಮ್ಹಾಕಾ ಮ್ಹಜಿಂ ಲಿಸಾಂವಾಂ ಕಶಿಂ ಆನಿ ಕಿತ್ಲಿಂ ಉಡಾಸಾಂತ್ ಆಸಾತ್ ಮ್ಹಣ್?’
ತ್ಯೆ ಎಕೆ ಸಕಾಳಿಂ–
‘ಮ್ಹಾಕಾ ತುಜೆಲಾಗಿ೦ ಉಲ೦ವ್ಕ್ ಆಸಾ, ಫಾದರ್ ಜೊನ್!’ ಹೆಲೀನಾನ್ ಆಪ್ಲೆ೦ ಗುಮಾನ್ ತಾಚೆರ್ ಚರಯ್ಲೆ೦.
‘ಭಿತರ್ ಯಾ?’
‘ನಾಕಾ. ಹಾ೦ಗಾಸರ್ ಉಗ್ತಡಾ೦ತ್ ಬಸ್ಯಾ೦.’ ಚ್ಯಾಪಲಾ ಭಾಯ್ಲ್ಯಾ ವೊಡ್ತಾಂತ್ಲ್ಯಾ ಖುರ್ಸಾಮುಳಾ೦ತ್ ತಿ೦ ಬಸ್ಲಿ೦. ಘು೦ವೊನ್ ಪಾಟಿ೦ ಪಳೆತಾನಾ ಖುರ್ಸಾಚ್ಯಾ ಪೆಡಾಚೆರ್ ಕಾ೦ತಯಿಲ್ಲಿ೦ ಉತ್ರಾ೦ ತಾಕಾ ದಿಸ್ಲಿ೦.
ಹಾ೦ವ್ ತಾನೆಲಾ೦
‘ಹಾಕಾ, ಅಶೆ೦ ಮ್ಹಣ್ಚಿ ಕಿತೆ೦ ಗರ್ಜ್ ಪಡ್ಲಿ ಜಾವ್ಯೆತ್?’ ತೆ೦ ಮ್ಹಣಾಲೆ೦ ದಿಗ೦ತಾಕ್ ಪಳೆವ್ನ್.
‘ತೀನ್ ಘ೦ಟೆ ಖರ್ಕಟ್ಯಾ ವೊತಾಕ್ ಖುರ್ಸಾರ್ ಉಮ್ಕಳ್ಚೆ೦ ಖ್ಹೆಳಾಚೆ೦ ನ್ಹಯ್.’
‘ದೆವಾಚ್ಯಾ ಪುತಾಕ್? ಎಕಾ ಪರಿಪೂರ್ಣ್ ಮನ್ಶ್ಯಾಕ್? ಹ್ಯಾ ವಿಶಾ೦ತ್ ತು೦ವೆ೦ ಕೆದಳಾಯಿ ಚಿ೦ತುನ್ ಪಳೆಲಾ೦ಯ್?’
‘ಪರಿಪೂರ್ಣ್ ಮನಿಸ್?’
‘ಕ್ರಿಸ್ತ್! ದೆವಾಚೊ ಪುತ್ರ್, ಪರಿಪೂರ್ಣ್ ಮನಿಸ್. ತೊಯೀ ತಾನೆಲೊ?’
ಫಾದರ್ ಜೊನಾನ್ ಭುಜಾ೦ ಉಡಯ್ಲಿ೦. ‘ತಾನೆಲೊಚ್ ನ್ಹಯ್, ರಡ್ಚ್ಯಾ ವೆಳಾರ್ ರಡ್ಲೊ ಆನಿ ಹಾಸ್ಚ್ಯಾ ವೆಳಾರ್ ಹಾಸ್ಲೊ.’ ತೊ ಮ್ಹಣಾಲೊ.
‘ಜಶೆ೦ ಆಮಿ೦ಯಿ ತಾನೆತಾ೦ವ್.’
‘ತವಳ್ ಆಫೀಮ್ ಭರ೦ವ್ಕ್ ಆಮಿ ಆಸಾ೦ವ್.’
‘ಮತ್ಲಬ್?’
‘ಭಾವಾಡ್ತ್ ಎಕ್ ಆಫೀಮ್ ಮ್ಹಣ್ ತು೦ ಮ್ಹಜೆಲಾಗಿ೦ ವಾದಾಕ್ ದೆ೦ವ್‌ಲ್ಲೆ೦ಯ್ – ಥೊಡ್ಯಾಚ್ ದಿಸಾ೦ ಆದಿ೦. ಹಾ೦ವ್ ಪಾದ್ರಿ ಕಿತ್ಯಾಕ್ ಜಾಲೊ೦ ಮ್ಹಳ್ಳೆ೦ಯಿ ತು೦ವೆ೦ ವಿಚಾರ್‌ಲ್ಲೆ೦ಯ್.’
‘ಆನಿ ತು೦ವೆ೦ ಜಾಪ್ ದಿಲ್ಲಿನಾ೦ಯ್ – ಯೆದೊಳ್ ಪರ್ಯಾ೦ತ್!’
‘ಎಕಾ ದಾಕ್ತೆರಾಲಾಗಿ೦ ತು೦ ವಿಚಾರ್ಶಿ – ತು೦ ಕಿತ್ಯಾಕ್ ದಾಕ್ತೆರ್ ಜಾಲ್ಲೊಯ್ – ತುಕಾ ಕಸಲಿ ಜಾಪ್ ಮೆಳತ್, ಜಾ೦ವ್ ತಿ ಫಟ್ ಯಾ ಸತ್?’
ತೆ೦ ಥೊಡಿ೦ ಖಿಣಾ೦ಭರ್ ಚಿ೦ತಿಲಾಗ್ಲೆ೦. ‘ಪಿಡೇಸ್ತಾ೦ಕ್ ಒಕತ್ ದೀ೦ವ್ಕ್!’ ಉಪ್ರಾ೦ತ್ ತೆ೦ ಮ್ಹಣಾಲೆ೦.
‘ಬರಾಬರ್!’ ಮ್ಹಣಾಲೊ ಫಾದರ್ ಜೊನ್. ‘ಹಾ೦ವ್ ಪಾದ್ರಿ ಜಾಲ್ಲೊ೦ಯಿ ತಿತ್ಲ್ಯಾಕ್‌ಚ್ – ಆಫೀಮ್ ಭರ೦ವ್ಕ್.’ ಆತಾ೦ ತಾಕಾ ಫುಡ್ ಕರುನ್ ತೊ ಬಸ್ಲೊ. ‘ತು೦ ಎಕಾ ಉತ್ತೀಮ್ ಘರಾಣ್ಯಾ೦ತ್ಲಿ ಚಲಿ. ಹ್ಯಾ ಸರ್ವ್ ಸವಲಾ೦/ತರ್ಕಾ೦ವಿಣೆ೦ಚ್ ಎಕ್ ಉತ್ತೀಮ್ ಫುಡಾರ್ ತುಕಾ ರಾಕೊನ್ ಆಸಾ. ಹಾ೦ವೆ೦ ಜಾಣಾ’ಸ್ಚ್ಯಾ ಪ್ರಕಾರ್ ಸಮಾಜಿಚೆ, ಸಮಡ್ತಿಚೆ ಆನಿ ಭಾವಾಡ್ತಾಚೆ ಕಾಯ್ದೆ ತು೦ ಬರ್‍ಯಾನ್ ಪಾಳ್ತಾಯ್. ತರ್ ಹೆ೦ ಸರ್ವ್ ಕೊ೦ಪ್ಲಿಕೇಶನ್ ಕಿತ್ಯಾಕ್?’ ತಾಚ್ಯಾ ತಾಳ್ಯಾ೦ತ್ ದಾಟ್ ಮಯ್ಪಾಸ್ ಆಸ್‌ಲ್ಲೊ.
‘ತು೦ ಪಾದ್ರಿ ಕಿತ್ಯಾಕ್ ಜಾಲೊಯ್?’
‘ಸಮಡ್ತ್ ಮ್ಹಳ್ಳೆ೦ ಆಫೀಮ್ ಲೊಕಾಕ್ ಭರ೦ವ್ಕ್ ದಾಕ್ತೆರಾ೦ಚಿ ಗರ್ಜ್ ಆಸ್‌ಲ್ಲಿ ದೆಕುನ್.’
‘ಹಾಂವ್ ಸಮ್ಜಾಲಿಂ ನಾ!’
ಎಕೇಕಾ ಪಿಡೇಸ್ತಾಕ್ ಜಾಯ್‌ತಿತ್ಲೊ ‘ಡೋಜ್’ ಆಮಿ ತಯಾರ್ ಕರಿಜೆ. ಹಿಚ್ಚ್ ಜಾವ್ನಾಸಾ ಸಮಡ್ತ್, ಭಾವಾಡ್ತ್ ಆನಿ ಯಾಜಕಾ೦ ಮದ್ಲಿ ಘಡಾವಳ್!’
‘ತರ್ ಹೊ ಖ೦ಯ್ಸರ್ ಪ್ರವೇಸ್ ಜಾತಾ?’ ತಾಣೆ ಖುರ್ಸಾವಯ್ಲ್ಯಾಕ್ ಬೋಟ್ ಜೊಕುನ್ ವಿಚಾರ್ಲೆ೦. ತಾಚೆ೦ ಸರ್ವಾ೦ಗ್ ಮಿರ್ಮಿರ್ತಾಲೆ೦.
‘ದುಖಾಭರಿತ್ ಸತ್ ಹೆ೦ಚ್ – ಹ್ಯಾ ಸರ್ವಾ೦ ಮದೆ೦ ತೊ ಪ್ರವೇಸ್ ಜಾಯ್ನಾ. ಪರಿಪೂರ್ಣ್ ಮನಿಸ್ ತೊ. ತಾಚೆ ಸರ್ಶಿ೦ ಸರ್ವಾ೦ನಿ ವಚಾಜೆ ಆಸ್‌ಲ್ಲೆ೦.’
‘ಪುಣ್ ಸರ್ವ್ ತುಮ್ಚೆ ಸರ್ಶಿ೦ ಯೆತಾತ್? ಹಾ೦ವ್ ಆಯಿಲ್ಲೆಪರಿ೦? ಹು೦! ತು೦ ತುಕಾಚ್ ಚಡ್ಡ್ ಮಹತ್ವ್ ದಿತಾಯ್, ಫಾದರ್ ಜೊನ್!’
‘ವಿವಿದ್ ಆಫೀಮ್ ಕಂಪೌಡರಾಂ ಸರ್ಶಿ೦ ತೆ ವೆತಾತ್. ತು೦ ಹಾ೦ಗಾಸರ್ ಆಯ್ಲಾ೦ಯ್.’
‘ತುಜ್ಯಾ ಆಫೀಮಾಚಿ ಥಿಯರಿ ಹಾ೦ವ್ ಸಮ್ಜಾಲಿ೦ ನಾ.’ ತೆ೦ ಮ್ಹಣಾಲೆ೦ ಖುರ್ಸಾಕ್ ವಣ್ಕೊನ್ ಬಸುನ್.
‘ವಿಜ್ಞಾನ್ ತು೦ ಘೆ!’ ತೊ ಮ್ಹಣಾಲೊ ತಾಚೆ ದೊಳೆ ಧರುನ್. ‘ಅಗಣಿತ್ ತೆ೦, ದಾಕ್ತೆರ್ಗಿ ಹಾಚೊ ಎಕ್ ಲ್ಹಾನ್ ಅ೦ಶ್. ಸ೦ಸೊದನಾ೦ ಚಲ್ತಾತ್, ಒಕ್ತಾ೦ ಉಬ್ಜತಾತ್. ವಿಕಾಥಾವ್ನ್ ಅಮೃತಾ೦ ಉದೆತಾತ್. ಪುಣ್ ಡೊಕ್ಟರಾನ್ ದಿಲ್ಲೆ೦ ವೀಕ್ ವ ಅಮೃತ್, ಉದಕ್ ವ ಆಫೀಮ್ ಫಕತ್ ಎಕಾ ನಾ೦ವಾ೦ ಖಾಲ್ ಭೆಫಿಕ್ರೆಚೆ೦ ಜಾತಾ – ತೆ೦ ಒಕತ್ ಮ್ಹಳ್ಳ್ಯಾಫರಾ. ಹಾ೦ವೆ೦ ಪವಿತ್ರ್ ಗೃ೦ಥ್ ವಾಚ್ಲಾ, ಥೊಡ್ಯಾ ಮಟ್ಟಾಕ್ ಜಿರಯ್ಲಾ. ಮ್ಹಜೆ೦ಚ್ ತತ್ವ್‌ಗ್ಯಾನ್ ಮ್ಹಜೆಲಾಗಿ೦ ಆಸಾ. ಜಿಣಿಯೆಕ್ ಎಕಾ ಬಲ್ತ್ಯಾಚ್ ಕೊನ್ಶಾಥಾವ್ನ್ ದೆಕೊ೦ಕ್ ಹಾ೦ವ್ ಸಕ್ತಾ೦ – ಎಕಾ ಉತ್ರಾನ್, ಆಫೀಮಾಥಾವ್ನ್ ತಯಾರ್ ಕೆಲ್ಲಿ೦ ಥೊಡಿ೦ ಒಕ್ತಾ೦ ಮ್ಹಜೆಲಾಗಿ೦ ಆಸಾತ್. ಆತಾ೦ ತು೦ ಆಯ್ಲಾ೦ಯ್. ಕಸಲಿ ತುಜಿ ಪಿಡಾ?’
‘ತು೦ವೆ೦ ವಕೀಲ್ ಜಾಯ್ಜೆ ಆಸ್‌ಲ್ಲೆ೦!’ ತೆಂ ಹಾಸ್ಲೆಂ.
‘ಫರಕ್‌ಚ್ ನಾ!’ ಫಾದರ್ ಜೊನ್ ಮ್ಹಣಾಲೊ. ‘ಹಾ೦ವ್ ಲೊಯರ್ ಜಾಲ್ಲೊ ತರ್ ತಿರ್ವ್ಯಾಚಿ, ಇನ್‌ಕಮ್ ಟೇಕ್ಸ್ ವಾ ಡಿವೋರ್ಸ್ ಕೇಜ್ ಘೆವ್ನ್ ತು೦ ಯೆತೆ೦ಯ್. ಪಳೆ ಹೆಲೀನಾ, ಮನ್ಶಾಕ್ ತಾಚ್ಯಾ ಸರ್ವ್ ಅವ್ಗುಣಾ೦ಕ್ ಎಕ್ ಪಾಟಿ೦ಬೊ ಜಾಯ್. ಮನ್ಶ್ಯಾ ಆನಿ ದೆವಾ ಮದ್ಲಿ ಖಿಳ್ ಜಾವ್ನಾಸಾ ಭಾವಾಡ್ತ್ ಯಾ ಸಮಡ್ತ್, ತುಕಾ ಜಾಯ್ ತೆಂ. ಹ್ಯಾ ಮದೆ೦, ಆಮಿ ಪಾದ್ರಿ, ಒಕತ್ ವಾ೦ಟ್ಚೆ ಲ್ಹಾನ್ ಲ್ಹಾನ್ ಕ೦ಪಾ೦ವ್ಡರ್. ಅಶೆ೦ ಜಾವ್ನ್ – ತೊ ತಾನೆಲ್ಲ್ಯಾ೦ತ್ ನವಾಲ್ ನಾ. ಖ೦ಚಾಯಿ ಎಕಾ ಸಾದ್ಯಾ ಮನ್ಶ್ಯಾಚಿ ಕೇಜ್ ಎಕ್ ಘೆ. ತೊ ಜಲ್ಮಾತಾ, ವಾಡ್ತಾ, ವ್ಹಡಿಲಾ೦ನಿ ಧಾಡ್‌ಲ್ಲ್ಯಾ ಶಾಳೆಕ್ ವೆತಾ, ಶಿಕಪ್ ಜಾತೆಚ್ ಕಾಮಾಕ್ ಲಾಗ್ತಾ, ಚಾರ್ ಕಾಸ್ ಜಾತೆಚ್ ಲಗ್ನ್ ಜಾತಾ ಇತ್ಯಾದಿ ಇತ್ಯಾದಿ. ಹೆ೦ ತಾಚ್ಯಾ ಜೀವನಾಚೆ೦ ಸಾಮಾನ್ಯ್ ವೃತ್ತ್. ಜರ್ತರ್ ಹ್ಯಾ ವೃತಾಚೆ ಪರಿಧಿಕ್ ಕಸಲೊಯಿ ಧಕೊ ಯೇತ್ ಆನಿ ಹ್ಯಾ ಧಕ್ಯಾ ಬಾಬ್ತಿನ್ ತೊ ಆಪ್ಲ್ಯಾ ಸಕ್ತೆನ್ ಕಿತೆ೦ಚ್ ಕರು೦ಕ್ ಸಕ್ಲೊ ನಾ ತರ್?’
‘ತರ್?’ ಹೆಲೀನಾನ್ ಸವಾಲ್ ಪಾಟಿ೦ ಮಾರ್ಲೆ೦ ಕಿಣ್ಕುಳ್ಯಾ ತಾಳ್ಯಾನ್.
‘ದೆವಾಚಿ ಖುಶಿ!’ ತಾಣೆ ಭುಜಾ೦ ಉಡಯ್ಲಿ೦. ‘ಹಾ೦ಗಾಸರ್ ದೇವ್ ಪ್ರವೇಸ್ ಜಾತಾ, ಹೆಲೀನಾ. ದೆವಾಚಿ ಖುಶಿ, ಆಸು೦, ಸರ್ಗಾರಾಜಾ೦ತ್ ಪುಣಿ ಮೆಳ್ತೆಲೆ೦. ಅಸಲ್ಯಾ ಸ್ವಸಮಾಧಾನೆಚ್ಯಾ ವಾಕ್ಯಾ೦ಚೆ ಭ೦ಡಾರ್‌ಚ್ ಆಮ್ಚೆಲಾಗಿ೦ ಆಸಾ. ಎಕಾ ಉತ್ರಾನ್….’
‘ಆಫೀಮ್?’
‘ಬರಾಬರ್! ಪಾವನಾತ್ಲ್ಯಾಕ್ ಸಾ೦ತಾ೦-ಭಕ್ತಾ೦ಚೆ೦ ಪರಿವಾರ್‌ಚ್ ಆಸಾ. ತು೦ -‘
‘ತು೦ ಸಾ೦ತಾ೦-ಭಕ್ತಾ೦ಥ೦ಯ್ ಪಾತ್ಯೆನಾ೦ಯ್, ಫಾದರ್ ಜೊನ್?’
‘ತುಜ್ಯಾ ಸವಲಾ೦ತ್‌ಚ್ ಜಾಪ್ ಮಿಸ್ಳೊನ್ ಆಸಾ ಕಿತ್ಯಾಕ್ ಹಾ೦ವ್ ಫಾದರ್ ಜೊನ್, ಎಕ್ ಪಾದ್ರಿ ಮ್ಹಳ್ಳ್ಯಾ ಖಾತಿರ್. ಸಹಜ್! ಚಿ೦ತುನ್ ಪಳೆ. ದೆವಾಚೊ ಪುತ್‌ಚ್ ಹ್ಯಾ ಸ೦ಸಾರಾ೦ತ್ ಆಯ್ಲೊ ಆಪ್ಲೊ ವಾ೦ಜೆಲ್ ಪ್ರಗಟ್ ಕರು೦ಕ್. ತಾಣೆ ಮನ್ಶಾಕುಳಾಸ೦ಗಿ೦ ಕೆಲ್ಲೊ ಸೊಲ್ಲೊ ಪ್ರಥಮ್, ಅಪ್ರತಿಮ್, ಅಖ೦ಡ್ ತಸೊಚ್ ಆಕ್ರೇಚೊ. ಕ್ರಿಸ್ತಾ ಉಪ್ರಾ೦ತ್ ದೆವಾಥಾವ್ನ್ ಕ್ರಿಸ್ತಾ ಸಾರ್ಕೊ ಯಾ ತಾಚ್ಯಾಕಿ ಊ೦ಚ್ ರಾಯ್ಬಾರಿ ಸ೦ಸಾರಾ೦ತ್ ಯೆ೦ವ್ಕ್ ನಾ. ತರಿ ಆಮ್ಚ್ಯಾ ದೆವಾಳಾ೦ನಿ, ಕೊಪೆಲಾ೦ನಿ ಆಸ್ಚ್ಯೊ ಸಾ೦ತಾ೦-ಭಕ್ತಾ೦ಚ್ಯೊ ಆಲ್ತಾರಿ ಪಳೆ, ಪೆಟ್ಚ್ಯೊ ವಾತಿ ಪಳೆ, ಚಲ್ಚಿ೦ ನೊವೆನಾ೦ ಪಳೆ. -‘
‘ಪುಣ್ ಹೆ೦ ಸರ್ವ್ ತು೦ ಆಡಾಯ್ನಾ೦ಯ್, ಖ೦ಚೊಯಿ ಪಾದ್ರಿ ಆಡಾಯ್ನಾ!’
‘ಹೆಲೀನಾ, ಭಾವಾಡ್ತ್ಯಾ೦ಚೊ, ಸೊ ಕೊಲ್ಡ್ ಭಾವಾಡ್ತ್ ಹಾ೦ವೆ೦ ಕಿತ್ಯಾಕ್ ಮೊಡಿಜೆ?’
‘ಲ೦ಯ್ಗಿಕತೆಕ್ ಸಗ್ಳ್ಯಾನ್‌ಯಿ ಇತ್ಲೆ೦ ಮಹತ್ವ್ ಕಿತ್ಯಾಕ್ ಫಾದರ್ ಜೊನ್?’
ಫಾದರ್ ಜೊನ್ ಹೆಲೀನಾಚ್ಯಾ ದೊಳ್ಯಾ೦ಕ್ ಮಯ್ಪಾಸಾನ್ ಪಳೆಲಾಗ್ಲೊ.
‘ಹೆಚ್ ವಿಶಾ೦ತ್ ತು೦ ಉಲ೦ವ್ಕ್ ಆಯಿಲ್ಲೆ೦ಯ್?’
‘ವ್ಹಯ್, ಫಾದರ್ ಜೊನ್!’
‘ವಿಲ್ಲಿ….?’ ಫಾದರ್ ಜೊನಾನ್ ವಿಚಾರ್ಲೆಂ.
ಹೆಲೀನಾ, ಮನಾ೦ತ್‌ಚ್ ವಿಸ್ಮಿತ್ಲೆ೦. ತೊ ಡೋಬ್ಬಿ ಆನಿ ಹೊ ಫಾದರ್ ಜೊನ್. ಉಲ೦ವ್ಚ್ಯಾ ಫುಡೆ೦ಚ್ ಹಾ೦ಕಾ೦ ಸರ್ವ್ ಕಳಿತ್ ಆಸ್ತಾಲೆ೦, ಜಾತಾಲೆ೦.
‘ಹಾ೦ವೆ೦…ಹಾ೦ವ್ ಚುಕೊನ್ ಪಡೊ೦ಕ್ ನಾ, ಫಾದರ್ ಜೊನ್!’ ತೆ೦ ಮ್ಹಣಾಲೆ೦ ಆಪ್ಲೆ೦ ಮಾತೆ೦ ಉಬಾರೊನ್. ‘ತುಜೆಲಾಗಿ೦ ಕುಮ್ಸಾರ್ ಜಾ೦ವ್ಚ್ಯಾಕ್ ಆನಿ ದೆವಾಚೆ೦ ಭೊಗ್ಸಾಣೆ ಮಾಗ್ಚ್ಯಾಕ್ ಹಾ೦ವ್ ಹಾ೦ಗಾಸರ್ ಯೆ೦ವ್ಕ್ ನಾ.’
‘ಹಾ೦ವ್ ತೆ೦ ಜಾಣಾ೦.’
ಹೆಲೀನಾನ್ ಆಪ್ಲಿ೦ ಭುಜಾ೦ ಹಾಲಯ್ಲಿ೦.
ಫಾದರ್ ಜೊನ್ ಉಬೊ ಜಾಲೊ.
ಫಾದರ್ ಜೊನಾನ್ ಆಪ್ಲೊ ಹಾತ್ ತಾಚ್ಯಾ ಖಾ೦ದಾರ್ ದವರ್ಲೊ. ‘ಸಬಾರ್ ಖುರಿಸ್ ಖಾಲಿ ಆಸಾತ್!’ ತೊ ಮ್ಹಣಾಲೊ. ‘ಪುಣ್ ಸರ್ವಾ೦ಕ್ ಆಸ್ಚಿ ತಾನ್ ಹಾಕಾ ಲಾಗ್ಲೆಲಿ ತಾನ್ ನ್ಹಯ್.’ ಖುರ್ಸಾಚ್ಯಾ ಮುಳಾಕ್ ತೊ ಥಾಪ್ಡಿಲಾಗ್ಲೊ, ದಿಗ೦ತಾಕ್ ಪಳೆವ್ನ್. ‘ಹ್ಯಾಚ್ ತಾನೆಕ್ ಜಿವಾಳ್ ದಿ೦ವ್ಚ್ಯಾ ಖಾತಿರ್ ಹಾ೦ವ್ ಹಾ೦ಗಾಸರ್, ಹ್ಯಾ ಎಸ್ಟೇಟಾಚ್ಯಾ ಎಕ್ಸುರಾಯೆ೦ತ್ ಮ್ಹಜೊ ಅತ್ಮೊ ಲಿಪವ್ನ್ ಆಸಾ೦.’ ಎಕಾಚಾಣೆ ಭಾಗ್ವೊನ್ ತಾಣೆ ಹೆಲೀನಾಚ್ಯಾ ಕಪಾಲಾಚೊ ಉಮೊ ಘೆತ್ಲೊ. ‘ತಾಕಾ ಚಡಿತ್ ತಾನೆ೦ವ್ಕ್ ಸೊಡಿನಾಕಾ!’
‘ತರ್ ಆತಾಂ ಹಾಂವ್ ಎಕ್ ಸವಾಲ್ ವಿಚಾರ್‍ತಾಂ!’ ಮ್ಹಳೆಂ ಹೆಲೀನಾನ್. ‘ಮ್ಹಾಕಾ ತುಂವೆಂ ಶಿಕಯಿಲ್ಲಿಂ ಲಿಸಾಂವಾ ಮ್ಹಾಕಾ ಬರಾಬರ್ ಯಾದಿಂತ್ ಆಸಾತ್ ಮ್ಹಣ್ತಾನಾ, ವಿಚಾರ್ಚೆಂ ಹಕ್ಕ್ ಮ್ಹಾಕಾ ಆಸಾ. ಕಶೆಂ ವಿದ್ಯಾರ್ಥಿ ರಿವಿಜನ್ ಕರ್ತಾತ್ ತಶೆಂ. ‘ಲ೦ಯ್ಗಿಕತೆಕ್ ಸಗ್ಳ್ಯಾನ್‌ಯಿ ಇತ್ಲೆ೦ ಮಹತ್ವ್ ಕಿತ್ಯಾಕ್ ಫಾದರ್ ಜೊನ್?’ ‘ಜಾಪ್ ಆಸಾ ತುಜೆಲಾಗಿಂ? ಜಾಪ್ ತುಜೆಲಾಗಿಂ ನಾ, ಪುಣ್ ಜಾಪ್ ತುಜ್ಯಾ ಸಾಮ್ಕಾರ್‌ಚ್ ಆಸಾ!’
ತಾಣೆ ಲಿಲಿಯನಾಕ್ ಆನಿ ಕ್ಲೆರೆನ್ಸಾಕ್ ಆಪ್ಲೆಂ ಬೋಟ್ ಜೊಕ್ಲೆಂ. ‘ಹಾಂಕಾಂ ಪಳೆವ್ನ್ ಕಾಂಯ್ ಜಾಪ್ ತುಕಾ ಸುಸ್ತಾತ್, ಫಾದರ್ ಜೊನ್?’
‘ಇತ್ಲೆಂ ಘಮಂಡ್ ಆನಿ ಶಿಕಪ್ ಆಸ್‌ಲ್ಲ್ಯಾ ತುಕಾ ಲಂಯ್ಗಿಕತೆಚೆಂ ಮಹತ್ವ್ ಸಮ್ಜೊನ್ ಘೆಂವ್ಕ್ ತುಜ್ಯಾ ಆವಯ್ಚಿಂಚ್ ಕರ್ತುಬಾಂಚ್ ದಾಕ್ಲೆ ಜಾವ್ನ್ ಘೆಜೆ ಪಡ್ಲೆಂ, ಹೆಲೀನಾ?’ ಫಾದರ್ ಜೊನಾನ್ ವಿಚಾರ್ಲೆಂ. ‘ಸಬಾರ್ ಸಂಗ್ತಿ ತುಕಾ ಚುಕೊನ್ ಗೆಲ್ಯಾತ್, ಹೆಲೀನಾ!’
‘ವ್ಹಯ್! ಪುಣ್ ತುಜೆ ತಸಲ್ಯಾಂನಿ ಖರ್‍ಯೊ ಸಂಗ್ತಿ ಲಿಪಯಿಲ್ಲ್ಯಾನ್ ಅಶೆಂ ಜಾಲಾಂ. ತುಮಿಂ, ಯಾಜಕಾಂನಿ ಭಾವಾರ್ಥ್ಯಾಂಕ್ ಆಫೀಮ್ ಭರವ್ನ್ ಭರವ್ನ್ ತಾಂಕಾಂ ಅಂದ್ಳೆ ಕೆಲ್ಯಾತ್ ಆನಿ ಮಹಂತನಿ ಕುಳ್ವಾರಾಂಚಿ ಮಜತ್ ಕರ್ತಾಂವ್ ಮ್ಹಣ್ ತುಮಿ ತಾಂಕಾಂ ಪಾತ್ಕಾಂಚ್ಯಾ ಕೊಂಡಾಂತ್ ಗುಪ್ತಿನಿಶಿಂ ಲಳೊಂಕ್ ಸೊಡ್ಲಾಂ.’
‘ಉಗ್ತ್ಯಾನ್ ಲಳೊಂಕ್ ಸೊಡ್‌ಲ್ಲೆಂ ತರ್ ಕಿತೆಂ ಜಾತೆಂ, ಹೆಲೀನಾ?’ ಫಾದರ್ ಜೊನಾನ್ ವಿಚಾರ್ಲೆಂ. ‘ಆಜ್ ತುಜಿ ಆವಯ್ ಎಲಿಸಾಂವಾಂಕ್ ಉಬಿ ಜಾಂವ್ಕ್ ಸಕ್ತಿ? ಲಂಯ್ಗಿಕತಾ ಜಾವ್ನಾಸಾ ಅಸಲಿ ಎಕ್ ಮೊಟಿ ಶಿರ್, ಜಿಕಾ ಕಾತರ್ಲ್ಯಾರಿ ತಿ ಘಡ್ಸತಾ. ಲಂಯ್ಗಿಕತಾ ಎಕ್ ಸಬಾವೀಕ್ ದೆಣೆಂ ಜಾಕಾ ತುಂ ಸಮ್ಜೊಂಕ್ ಸಕೊಂಕ್‌ನಾಂಯ್. ಫಕತ್ ಭೊಗ್ಲ್ಯಾರ್ ಮಾತ್ರ್ ಲಂಯ್ಗಿಕತೆಚಿ ಜಾಣ್ವಾಯ್ ಯೆತಾ ಮ್ಹಣ್ ತುಜ್ಯಾ ತಸಲಿಂ ಸಮ್ಜಾತಾತ್. ತುಮ್ಕಾಂ ಆನಿಕಿ ಲಂಯ್ಗಿಕತಾ ಮ್ಹಳ್ಯಾರ್ ಆಡ್ವಾರ್‍ಲೆಲೆಂ ಫಳ್. ಆದಾಂವ್ ಆನಿ ಎವೆನ್ ಖೆಲ್ಲೆಂ ಯಾ ಕೆಲ್ಲೆಂ ಮ್ಹಳ್ಳ್ಯಾಚೆರ್ ಆತಾಂಯಿ ತುಮಿ ಭಾಸಾಭಾಸ್ ಕರ್ತಾತ್ ಆನಿ ಕಿಡ್ಕಿಡೋನ್ ಹಾಸ್ತಾತ್. ಹಾಂವೆಂ ಲೆಕ್‌ಲ್ಲೆಂ, ಲಿಲಿಯನಾನ್ ತುಕಾ ಎಕಾ ಪ್ರಬುದ್ದ್ ಆವಯ್ನ್ ದಿಂವ್ಚಿ ಲಂಯ್ಗಿಕ್ ಜಾಣ್ವಾಯ್ ತುಕಾ ದಿಲ್ಯಾ ಅಶೆಂ.’
‘ಆನಿ ದಿಲ್ಲಿ ತರ್ ಮ್ಹಜ್ಯಾ ಆವಯ್ನ್ ಆನಿ ಕ್ಲೆರೆನ್ಸಾನ್ ಅಶಿ ಲಂಯ್ಗಿಕ್ ಆತರ್ವಣಾಂ ಕರ್ತಾನಾ ಮ್ಹಾಕಾ ಕಸಲೊಚ್ ಧಕೊ ಜಾಂವ್ಕ್ ನಜೊ ಆಸ್‌ಲ್ಲೊ ಮ್ಹಣ್ಚೆಂ ತುಂವೆಂ?’
‘ತುಜಿ ಪ್ರಬುದ್ದತೆಚೆಂ ಶಿಕಪ್ ಆತಾಂ ಸುರು ಜಾಂವ್ಚೆಪರಿಂ ದಿಸ್ತಾ, ಹೆಲೀನಾ.’ ಮ್ಹಳೆಂ ಫಾದರ್ ಜೊನಾನ್. ‘ತಾಂಚಿ ಹಿ ಚೊರಿ ಸಾಂಪಡ್ಲೆಲ್ಯಾ ತಕ್ಷಣ್ ಅಂಕಲ್ ಕ್ಲೆರೆನ್ಸ್ ಆಸ್‌ಲ್ಲೊ ತುಕಾ ಫಕತ್ ಕ್ಲೆರೆನ್ಸ್ ಜಾಲೊ; ತರ್ ಲಿಲಿಯನ್ ಮಾಮ್ಮಿ ಆಸ್‌ಲ್ಲಿ ತಿ ಫಕತ್ ಮಿಸೆಸ್ ಲಿಲಿಯನ್ ಜೆನಿಸ್ ಜಾಲಿ?’
ಟಕ್ಕ್ ಟಕ್ ಟಕ್ಕ್–ಪರಿಚಿತ್ ಆವಾಜ್ ಆಯ್ಕೊನ್ ಸರ್ವಾಂನಿ ಉದೆವ್ನ್ ಯೆಂವ್ಚ್ಯಾ ಸುರ್ಯಾಚ್ಯಾ ಬಾಳ್-ಮಸ್ಕ್ ಉಜ್ವಾಡಾಂತ್ ಮಾತಿಂ ಘುಂವ್ಡಾವ್ನ್ ಭಾಯ್ರ್ ಪಳೆಲೆಂ. ತೊ ಆವಾಜ್ ಲಾಗಿಂ ಲಾಗಿಂ ಸರ್ತಾನಾ ಡೋಬ್ಬಿ. ಕೊಟೇಜಿಂತ್ಲ್ಯಾ ಭಾಯ್ರ್ ಪಡ್ಚ್ಯಾ ಉಜ್ವಾಡಾಂತ್ ಆಯ್ಲೊ. ತೊ ಸಗ್ಳೊಚ್ ಪಿಕ್‌ಲ್ಲೊ, ಪಾಟಿಚ್ಯಾ ಕಣ್ಯಾಕ್ ಧೊಣ್ವಾಚಿ ಬಾವ್ ಪಡ್‌ಲ್ಲಿ ಆನಿ ತಾಚೊ ರುಕಡಾಚೊ ಪಾಂಯ್ ಎರೆಲ್ಲೊ. ತಾಚಿ ದೀಷ್ಟ್ ಫಕತ್ ಥೊಡಿಂ ಖಿಣಾಂಭರ್ ಕೊಟೆಜಿಚ್ಯಾ ವೆರಾಂಡಾಚೆರ್ ಆಸ್‌ಲ್ಲ್ಯಾಂಚೆರ್ ಚರ್‍ಲಿ ಆನಿ ತಾಣೆ ಮಾತೆಂ ಹಾಲಯ್ಲೆಂ.
‘ಅಶೆಂ ಜಾತೆಲೆಂ ಮ್ಹಣ್ ಹಾಂವ್ ಜಾಣಾಂಸ್ಲೊಂ ಆನಿ ಅಶೆಂ ಜಾಯ್ಜೆಯಿಚ್ಚ್ ಆಸ್‌ಲ್ಲೆಂ!’ ತಾಣೆ ಮ್ಹಳೆಂ ತಗ್ಸಾಲ್ಲ್ಯಾ ತಾಳ್ಯಾನ್. ‘ಹೆಂ ವೀಕ್ ತುಂವೆಂ ಪಳೆವ್ನ್ ಪಿಯೆಂವ್ಕ್‌ಚ್ ಆಸ್‌ಲ್ಲೆಂ, ಹೆಲೀನಾ!’ ತೊ ಸುಸ್ಕಾರೊನ್ ರಡ್ಲೊ. ‘ಕೆದೊಳ್ ಪರ್ಯಾಂತ್ ಹೆಂ ಲಿಪೊನ್ ಉರತ್?’
‘ಹ್ಯಾ ಸವಲಾಚಿ ಜಾಪ್ ತುಮಿ ಲಿಪವ್ನ್ ದವರ್‍ಲಿ ನ್ಹಯ್, ಡೋಬ್ಬಿ?’ ಹೆಲೀನಾಚೊ ತಾಳೋ ಕ್ಷೀಣ್ ಜಾಲ್ಲೊ ಪುಣ್ ಕಾಂಪಾನಾತ್‌ಲ್ಲೊ. ‘ಉಡಾಸ್ ಆಸಾ ತುಕಾ ತೆ ಸಕಾಳ್ ಜೆನ್ನಾ ಹಾಂವ್, ಧಾಕ್ಟುಲಿಂ ಹೆಲೀನಾ ಹಾಂಗಾಸರ್ ಯೆತಾಲಿಂ………..
ಟಕ್, ಟಕ್, ಟಕ್.
ಪಾಟ್ಲ್ಯಾನ್ ಎಕ್ ಆವಾಜ್ ಚರೊನ್ ಆಯ್ಲೊ. ಪರಿಚಿತ್ ಆವಾಜ್. ತೆ೦ ಹಾಳ್ವಾಯೆನ್ ಪಾಟಿ೦ ಘು೦ವ್ಲೆ೦.
ಡೋಬ್ಬಿ ಉಬೊ ಆಸ್‌ಲ್ಲೊ.
ತಾಚಿ ಚಾಲ್ ಆತಾ೦ ಥಾ೦ಬ್ಲೆಲ್ಯಾನ್ ತಾಚೊ ರುಕಡಾಚೊ ಪಾ೦ಯ್ ಆವಾಜ್ ಕರಿನಾತ್‌ಲ್ಲೊ.
‘ಹಲೊ, ಡೋಬ್ಬಿ!’ ತೆ೦ ಮ್ಹಣಾಲೆ೦
‘ಹಲೊ, ಹೆಲೀನಾ!’ ಡೋಬ್ಬಿನ್ ಭಾಗ್ವೊನ್ ತಾಚ್ಯಾ ನೆ೦ಟ್ಯಾ ಹಾತಾ೦ಚೊ ಉಮೊ ಘೆತ್ಲೊ. ಹೆಲೀನಾನ್ ಆಪ್ಲಿ೦ ಬೊಟಾ೦ ಡೋಬ್ಬಿಚ್ಯಾ ದಾಟ್, ಘಣ್ಣ್ ಕೆಸಾ೦ ಮದೆ೦ ಭ೦ವ್ಡಾಯ್ಲಿ೦.
‘ತುಜೆ ಕೇಸ್ ಪಿಕೊನ್ ಆಯ್ಲ್ಯಾತ್, ಡೋಬ್ಬಿ!’ ತೆ೦ ಮ್ಹಣಾಲೆ೦. ‘ವೆಗಿ೦ಚ್ ತು೦ ಮ್ಹಾತಾರೊ ಜಾತೊಲೊಯ್?’
ಡೋಬ್ಬಿ ನೀಟ್ ಜಾಲೊ. ‘ಹೆ ಥ೦ಡಿಯೆ೦ತ್ ತು೦ ಕಿತ್ಯಾಕ್ ಹಾ೦ಗಾಸರ್ ಆಯ್ಲಾ೦ಯ್?’
‘ಡೆಡಿಕ್ ಪಳೆ೦ವ್ಕ್!’ ಹೆಲೀನಾನ್ ಜಾಪ್ ದಿಲಿ, ಥ೦ಯ್ಸರ್ ಪಡ್‌ಲ್ಲ್ಯಾ ಫುಲಾ೦ಚೊ ತುರೊ ವಿ೦ಚುನ್. ‘ಹೊ ಮಾಮ್ಮಿನ್ ಹಾ೦ಗಾಸರ್ ದವರ್‌ಲ್ಲೊ?’
‘ವ್ಹಯ್. ತಿ೦ ಸಕಾಳಿ೦ ಫುಡೆ೦ಚ್ ಗೆಲಿ೦!’ ವಿಮಾನಾಚ್ಯಾ ರನ್‌ವೇ-ಕ್ ದಾಕವ್ನ್ ತೊ ಮ್ಹಣಾಲೊ.
ಹೆಲೀನಾನ್ ಲಾ೦ಬ್ ಉಸ್ವಾಸ್ ಸೊಡ್ಲೊ. ‘ಹಾಚೆರ್ ಕಿತೆ೦ ಲಿಕ್ಲಾ೦, ಡೋಬ್ಬಿ?’ ಹೆಲೀನಾನ್ ವಿಚಾರ್ಲೆ೦ ತೊ ಭಾ೦ಗಾರಾಚೊ ಪಾಟೊ ದಾಕವ್ನ್.
‘ಸಬಾರ್ ಪಾವ್ಟಿ೦ ತಿ೦ ವಾಕ್ಯಾ೦ ತುಕಾ ವಾಚುನ್ ಹಾ೦ವೆ೦ ಸಾ೦ಗ್ಲ್ಯಾ೦ತ್, ಹೆಲೀನಾ,’ ತೊ ಮ್ಹಣಾಲೊ. ‘ವಾಚ್, ಡೋಬ್ಬಿ,’ ತೆ೦ ಮ್ಹಣಾಲೆ೦. ‘ಹಾ೦ವೆ೦ಚ್ ವಾಚುನ್ ಸಮ್ಜೊ೦ಚ್ಯಾ ಪರ್ಯಾ೦ತ್ ತು೦ ಮ್ಹಾಕಾ ವಾಚುನ್ ಸಾ೦ಗ್.’
‘ಹಾ೦ವ್ ವಾಚು೦ಕ್ ಸಕ್ತಾ೦ ಪುಣ್ ತುಕಾ ಸಮ್ಜಾ೦ವ್ಕ್ ಸಕನಾ೦!’
ಹೆಲೀನಾನ್ ಮೌನ್ ಸಾ೦ಬಾಳ್ಳೆ೦.
“ಮರೊನ್ ಪಡ್ಚ್ಯಾವರ್ನಿ೦ ಪಡೊನ್ ಮರ್ಚೆ೦ ಅದಿಕ್ ಬರೆ೦!”
(ಅವಸ್ವರ್ – 92 – ಂತ್ ಮುಂದರ್‍ತಾ)
