‘ಲೀಜಾಚೊ ಖುನಿಗಾರ್ ಡೊಕ್ಟರ್, ಡೊಕ್ಟರ್ ಫ್ರಾನ್ಸಿಸ್ ಕ್ಲೆಮೆಂಟ್, ಒಸಿಸಾಂತ್ಲ್ಯಾ ರಿಚರ್ಡ್ ಕ್ಲೆಮೆಂಟಾಚೊ ಬಾಪಯ್ ಆನಿ….. ಆಜ್ ರಿಚರ್ಡ್ ಒಸಿಸಾಕ್ ಆಯ್ಲೊ ನಾ. ಸಾಂಜೆರ್ ತಾಚೆಥಾವ್ನ್ ಎಕ್ ಚೀಟ್ ‘ಸ್ಪೆಶಲ್ ಡೆಲಿವರಿ’ ಜಾವ್ನ್ ಮ್ಹಾಕಾ ಪಾವಿತ್ ಜಾಲಿ. ತಾಚೆರ್ ಇತ್ಲೆಂಚ್ ಲಿಕುನ್ ಆಸ್‌ಲ್ಲೆಂ- ಮ್ಹಜೊ ಜೀವ್ ಅಪಾಯಾಂತ್ ಆಸಾ; ಮ್ಹಜಿಂ ಸೊದ್ನಾಂ ಕರ್ಚೆಂ ಕಸಲೆಂಚ್ ಪ್ರೇತನ್ ಕರಿನಾಕಾ.’
ತ್ಯಾ ವಗ್ತಾ ಡೋಬ್ಬಿಚ್ಯಾ ಕೊಟೆಜಿಂತ್ ದೆಂವ್‌ಲ್ಲೆಂ ಮೌನ್ ಇತ್ಲೆಂ ಘುಸ್ಪಡಿತ್ ಜಾವ್ನಾಸ್‌ಲ್ಲೆಂ ಕಿ, ತುಫಾನಾ ಮದೆಂಯಿ ಹೆ ತುಫಾನ್ ಆಯಿಲ್ಲೆಂಚ್ ನಾ ಮ್ಹಣ್ ಕೊಣೆಂಗಿ ಸಾಂಗ್‌ಲ್ಲೆಪರಿಂ, ಕಿತೆಂಚ್ ಜಾಲ್ಲೆಂ ನಾ ಆನಿ ತುಮಿಂ ತುಮ್ಚ್ಯಾ ತುಮ್ಚ್ಯಾ ಘರಾ ವಚುನ್ ಆರಾಮ್ ಕರಾ ಮ್ಹಳ್ಳೆಪರಿಂ ಜಾಲೆಂ. ಸರ್ವ್‌ಯಿ ಯೆಕಾಮೆಕಾ ಪಳೆಲಾಗ್ಲೆ ಪುಣ್ ಕಸಲಿಂಚ್ ಉತ್ರಾಂ ಸುಟ್ಲಿಂನಾಂತ್.
ಆಕ್ರೇಕ್, ಅಂಕಲ್ ಕ್ಲೆರೆನ್ಸ್ ಡೊಮಿನಿಕಾನ್ ಮೊನೆಪಣ್ ಫೊಡ್ಲೆಂ. ‘ಇತ್ಲ್ಯಾ ಕುಸ್ಕುಟಾ ಖಾತಿರ್ ತುಂ ಹ್ಯೆ ರಾತಿಂ, ಹ್ಯಾ ವಾದಾಳಾಂತ್ ಆಪ್ಲೊಚ್ ಜೀವ್ ಅಪಾಯಾಂತ್ ಘಾಲುನ್ ಹಾಂಗಾಸರ್ ಆಯ್ಲೆಂಯ್? ತುಕಾ ಕಾಂಯ್ ಕೀಸ್ ಜಾಲ್ಲೆಂ ತರ್? ತೊ ರಿಚರ್ಡ್ ಕೋಣ್ ಪರ್ದೆಶಿ ತುಕಾ ಇತ್ಲ್ಯಾ ಮಹತ್ವಾಚೊ ಜಾಲೊ? ತಾಣೆ ಪಳಾಪಳ್ ಘೆತ್ಲ್ಯಾ ತರ್ ತಾಚ್ಯಾಚ್ಚ್ ದಳ್ದಿರ್‌ಪಣಾಕ್ ಲಾಗುನ್ ಆಸ್ತೆಲೆಂ. ತುಂ ಕಿತ್ಯಾಕ್ ಪ್ರಾಚಿತ್ ಕರ್ತಾಯ್?’
ಹೆಲೀನಾನ್ ಆಪ್ಲೆಂ ಮೌನ್ ಫೊಡ್ಲೆಂ ನಾ. ಕೊಟೆಜಿಂತ್ಲ್ಯಾ ಖಟ್ಲ್ಯಾರ್ ತೆಂ ಬಸ್ಲೆಂ ಆನಿ ಎಕ್ ಕಪ್ ಕೊಫಿ ಆನಿ ಬಿಸ್ಕಿಟ್ ತಾಣೆ ಘೆತ್ಲಿ. ತಾಚೊ ಫಳಾರ್ ಜಾಂವ್ಚೆ ವರೇಗ್ ಕೊಣ್ಂಚ್ ಉಲಯ್ಲೆನಾಂತ್.
ತ್ಯಾ ವಗ್ತಾ ಡೋಬ್ಬಿಚ್ಯಾ ಕೊಟೆಜಿಂತ್ ದೆಂವ್‌ಲ್ಲೆಂ ಮೌನ್ ಇತ್ಲೆಂ ಘುಸ್ಪಡಿತ್ ಜಾವ್ನಾಸ್‌ಲ್ಲೆಂ ಕಿ, ತುಫಾನಾ ಮದೆಂಯಿ ಹೆ ತುಫಾನ್ ಆಯಿಲ್ಲೆಂಚ್ ನಾ ಮ್ಹಣ್ ಕೊಣೆಂಗಿ ಸಾಂಗ್‌ಲ್ಲೆಪರಿಂ, ಕಿತೆಂಚ್ ಜಾಲ್ಲೆಂ ನಾ ಆನಿ ತುಮಿಂ ತುಮ್ಚ್ಯಾ ತುಮ್ಚ್ಯಾ ಘರಾ ವಚುನ್ ಆರಾಮ್ ಕರಾ ಮ್ಹಳ್ಳೆಪರಿಂ ಜಾಲೆಂ. ಸರ್ವ್‌ಯಿ ಯೆಕಾಮೆಕಾ ಪಳೆಲಾಗ್ಲೆ ಪುಣ್ ಕಸಲಿಂಚ್ ಉತ್ರಾಂ ಸುಟ್ಲಿಂನಾಂತ್.
ಆಕ್ರೇಕ್, ಅಂಕಲ್ ಕ್ಲೆರೆನ್ಸ್ ಡೊಮಿನಿಕಾನ್ ಮೊನೆಪಣ್ ಫೊಡ್ಲೆಂ. ‘ಇತ್ಲ್ಯಾ ಕುಸ್ಕುಟಾ ಖಾತಿರ್ ತುಂ ಹ್ಯೆ ರಾತಿಂ, ಹ್ಯಾ ವಾದಾಳಾಂತ್ ಆಪ್ಲೊಚ್ ಜೀವ್ ಅಪಾಯಾಂತ್ ಘಾಲುನ್ ಹಾಂಗಾಸರ್ ಆಯ್ಲೆಂಯ್? ತುಕಾ ಕಾಂಯ್ ಕೀಸ್ ಜಾಲ್ಲೆಂ ತರ್? ತೊ ರಿಚರ್ಡ್ ಕೋಣ್ ಪರ್ದೆಶಿ ತುಕಾ ಇತ್ಲ್ಯಾ ಮಹತ್ವಾಚೊ ಜಾಲೊ? ತೊ ಕಯ್ದ್ ಜಾಲಾ ತರ್ ತಾಚ್ಯಾ ದಳ್ದಿರ್‌ಪಣಾಕ್ ಲಾಗುನ್ ಆಸ್ತೆಲೆಂ. ತುಂ ಕಿತ್ಯಾಕ್ ಪ್ರಾಚಿತ್ ಕರ್ತಾಯ್?’
ಹೆಲೀನಾನ್ ಆಪ್ಲೆಂ ಮೌನ್ ಫೊಡ್ಲೆಂ ನಾ. ಕೊಟೆಜಿಂತ್ಲ್ಯಾ ಖಟ್ಲ್ಯಾರ್ ತೆಂ ಬಸ್ಲೆಂ ಆನಿ ಎಕ್ ಕಪ್ ಕೊಫಿ ಆನಿ ಬಿಸ್ಕಿಟ್ ತಾಣೆ ಘೆತ್ಲಿ. ತಾಚೊ ಫಳಾರ್ ಜಾಂವ್ಚೆ ವರೇಗ್ ಕೊಣ್ಂಚ್ ಉಲಯ್ಲೆನಾಂತ್.
‘ಪುಣ್ ಹ್ಯಾ ಸರ್ವಾಕ್ ಹಾಂವ್ ತಯಾರ್‌ನಾತ್‌ಲ್ಲಿಂ!’
ಲಿಲಿಯನಾನ್ ಆನಿ ಕ್ಲೆರೆನ್ಸಾನ್ ಯೆಕಾಮೆಕಾ ಪಳೆಂವ್ಚೆಂ ಹೆಲೀನಾಚ್ಯಾ ಗಮನಾಕ್ ಗೆಲೆಂ ನಾ.
‘ಪುಡೆಂ ತುಂವೆಂ ಆಯ್ಕೊಂಕ್ ಆಸ್ಚ್ಯಾಕ್‌ಯಿ ತುಂ ತಯಾರ್‌ನಾಂಯ್ ಹೆಲೀನಾ!’
ಸಟ್ಟ್ ಕರುನ್ ಕ್ಲೆರೆನ್ಸ್, ಲಿಲಿಯನ್ ಆನಿ ಹೆಲೀನಾ ಮದೆಂ ಆಯ್ಲೊ.
‘Not now, Lilian, not now!’ ತಾಚಿಂ ಉತ್ರಾಂ ಎಕ್ ಪ್ರಾರ್ಥನ್ಂಚ್ ಜಾವ್ನಾಸ್‌ಲ್ಲಿಂ. ‘Not now.’
‘ಆನಿ ಮ್ಹಜ್ಯಾನ್ ಹೆ ಉಬ್ದೆಸ್ ಸೊಸುಂಕ್ ಜಾಯ್ನಾಂತ್, ಕ್ಲೆರೆನ್ಸ್,’ ಕಸ್ಕಸೋನ್ ರಡ್ಲಿ ಲಿಲಿಯನ್. ‘ಆನಿ ಕೆದೊಳ್ ಪರ್ಯಾಂತ್, ಕೆದೊಳ್?’
‘ಆತಾಂ ತುಂ ವೋಂಟ್ ಉಸಯ್ಶಿ ತರ್ ತುಜೊ ಸಗ್ಳೊ ರಾಜಕೀಯ್ ಫುಡಾರ್ ಧ್ವಂಸ್ ಜಾತೊಲೊ, ಚತ್ರಾಯ್, ಚತ್ರಾಯ್?’
‘ಹಾಂವ್ ಜಾಣಾಂ!’ ಜಾಪ್ ದಿಲಿ ಲಿಲಿಯನಾನ್. ‘ಪುಣ್ ಹಾಂವ್ ಆತಾಂ ವೋಂಟ್ ಉಸಯ್ನಾ ತರ್, ಮ್ಹಜಿ ಫುಡ್ಲಿ ಸಗ್ಳಿ ಜಿಣಿ- ಕಿತೆಂ ತಿಚೆಂ ಉರ್‍ಲಾಂ ತೆಂ- ಧ್ವಂಸ್ ಜಾತೆಲೆಂ. How long can I live with this guilt?’ ಲಿಲಿಯನಾನ್, ಹೆಲೀನಾಕ್ ಪಳೆಲೆಂ. ‘ಕೆದೊಳ್ ಪರ್ಯಾಂತ್?’
ತವಳ್ ಫಾದರ್ ಜೊನ್ ಫುಡೆಂ ಸರ್ಲೊ ಆನಿ ತಾಣೆ ಲಿಲಿಯನಾಚಿ ಭುಜಾಂ ಆರಾಯ್ಲಿಂ. ‘ಹೆಂ ಉಗ್ಡಾಪೆಂ ಜಾಂವ್ಕ್‌ಚ್ ಆಸ್‌ಲ್ಲೆಂ, ಲಿಲಿಯನ್!’ ತಾಣೆ ಫೈಸಲ್ ಕಶೆಂ ದಿಲೆಂ. ‘ಹಾಂವ್ ಆಸಾಂ ತುಮ್ಚ್ಯಾ ಸಾಂಗಾತಾ.’
‘ತುಮ್ಚ್ಯಾ ಸಾಂಗಾತಾ?’ ಸಯ್ರ್‌ಭಯ್ರ್ ಜಾಲೆಂ ಹೆಲೀನಾ. ‘Guilt ಮ್ಹಳೆಂಯ್, ಮಮ್ಮಿ ತುಂವೆಂ? ಕಸಲೆಂ ತೆಂ, ಕಸಲೆಂ ಆಯ್ಬ್ ತೆಂ, ಕಸಲೆಂ ಲಜೆಭರಿತ್ ಆಯ್ಬ್ ತೆಂ?’
ಫಾದರ್ ಜೊನಾಚ್ಯಾ ಬಾವ್ಳ್ಯಾಂ ಮದ್ಲೆಂ ಸುಟೊನ್ ಲಿಲಿಯನ್ ಆತಾಂ ಧುವೆ ಸಾಮ್ಕಾರ್ ಉಬಿ ಜಾಲಿ. ‘ಸಂಸಾರಾಚೆ ದೃಷ್ಟೆಕ್ ಹೆಂ ಎಕ್ ಆಯ್ಬ್ ಪುಣ್ ಹಾಂವೆಂ ಹೆಂ ಉತಾರ್ ತುಜೆರ್ ಥಾಪುಂಕ್ ನಜೊ ಆಸ್‌ಲ್ಲೆಂ. ಪುಣ್ ತುಂ ಜಾಣಾಂಯ್, ಹೆಲೀನಾ, ಆಸ್‌ಲ್ಲ್ಯೊ ಸಂಗ್ತಿ ಆಸ್‌ಲ್ಲೆಪರಿಂ ಘೆಂವ್ಕ್ ಹಾಂವೆಂ ತುಕಾ ಶಿಕಯ್ಲಾಂ. ತುಂವೆಂ ಸೆರ್‍ವಾಲ್ಲ್ಯಾ ಹೊಸ್ಟೆಲಾಂತ್ ಅನಯ್ತಿಕ್ ರ್‍ಯಾಗಿಂಗಾಕ್ ತುಂ ವಳಗ್ ಜಾತೆಲೆಂ ಮ್ಹಣ್ ಹಾಂವ್ ಜಾಣಾಸ್ಲಿಂ’
‘ತುಕಾ ಕಶೆಂ ಕಳಿತ್?’ ಹೆಲೀನಾಚೊ ಜೀವ್ ಕಾಣ್ಸಿರ್ಲೊ ತ್ಯೆ ರಾತಿಚೆಂ ದೃಶ್ ನಿಹಾಳೊನ್. ‘ಹಾಂವೆಂ ತುಕಾ ಕಸಲೊಚ್ ವಿವರ್ ದಿಲ್ಲೊ ನಾ, ಫಿರ್‍ಯಾದ್ ದಿಲ್ಲಿ ನಾ…. ಪುಣ್, ಹಾಂವ್ ತ್ಯಾ ಅಸಹ್ಯ್ ಪರಿಗತಿಥಾವ್ನ್ ಭಾಯ್ರ್ ಆಯ್ಲಿಂ. ಪುಣ್ ತುಕಾ ಕಶೆಂ ಹೆಂ ಸರ್ವ್ ಕಳಿತ್?’
‘ತುಂ ವಿಸರ್‍ಲಾಂಯ್ ತ್ಯೆ ರಾತಿಂ ಘಡ್‌ಲ್ಲೆಂ?’ ಲಿಲಿಯನಾಚೊ ತಾಳೊ ತೀಕ್ ಜಾಲೊ. ‘ತ್ಯಾ ಘಡಿತಾಕ್ ತುಕಾ ಹಾಂವೆಂ ತಯಾರ್ ಕರುಂಕ್ ನಾ.’
ಹೆಲೀನಾನ್ ಆಪ್ಲೆ ದೊಳೆ ಘಟ್ಟ್ ದಾಂಪ್ಲೆ, ಪುಣ್ ತೆಂ ಘಡಿತ್ ಉದೆವ್ನ್ ಆಯ್ಲೆಂಚ್-
ಸಾತ್-ಆಟ್ ಜೊಡಿ ಶೀತಳ್ ದೊಳೆ ತಾಕಾ ಪಳೆತಾಲೆ. ಚಲಿಯಾ೦ ಪಯ್ಕಿ೦ ದೊಗಾ೦ ತೆಗಾ೦ ಚುಯಿ೦ಗ್ ಗಮ್ ಚಾಬ್ತಾಲಿ೦. ಅವ್ಯವಸ್ತ್ ಜಾಲ್ಲಿ ಮುಸ್ತಾಯ್ಕಿ ತಾ೦ಚ್ಯಾ ಕುಡಿ೦ಚೆರ್ ಆಸ್‌ಲ್ಲಿ. ಎಕ್ಲ್ಯಾನ್ ಘಾಲ್ಲ್ಯಾ ಪಾತಳ್ ನಾಯ್ಟಿ ಪ೦ದ್ಲ್ಯಾನ್ ತರ್ನ್ಯಾ ಸ್ಥನಾ೦ಚಿ೦ ಗುಲೊಬಿ ವರ್ತುಲಾ೦ ಆನಿ ಅ೦ರ್ದುನ್ ಬಸ್‌ಲ್ಲಿ ಬಿಕಿನಿ ಪ್ಯಾ೦ಟಿ ದಿಸ್ತಾಲಿ.
‘ಹಲ್ಲೊ ಪುಸ್ಸಿ!’ ತಾ೦ಚೆ ಪಯ್ಕಿ ಎಕ್ಲೆ೦ ಮಾದಕ್ ತಾಳ್ಯಾನ್, ಜೀಬ್ ಲಳವ್ನ್ ಮ್ಹಣಾಲೆ೦. ‘ಆಮಿ ಹಾ೦ಗಾಸರ್ ಕಿತ್ಯಾಕ್ ಆಯ್ಲ್ಯಾ೦ವ್ ಮ್ಹಣ್ ತು೦ ಜಾಣಾ೦ಯ್, ಪುಸ್ಸಿ?’
‘ಪ್ರೀಮಿಯರ್ ಕೊಲೆಜಿಚ್ಯಾ ರ್‍ಯಾಗಿ೦ಗಾ ವಿಶಾ೦ತ್ ಹಾ೦ವೆ೦ ಆಯ್ಕಾಲಾ೦.’ ಸ್ಪಶ್ಟ್ ತಾಳ್ಯಾನ್ ಮ್ಹಣಾಲೆ೦ ಹೆಲೀನಾ. ‘ಆನಿ ಮ್ಹಜೆ೦ ನಾ೦ವ್ ಪುಸ್ಸಿ ನ್ಹಯ್.’
‘ಆಮಿ ಜಾಣಾ೦ವ್ ಡಾರ್ಲಿ೦ಗ್!’ ತಿ ಚಲಿ ಮ್ಹಣಾಲಿ. ‘ಪುಣ್ ಹೆ ಘಡಿಯೆ ತುಜ್ಯಾ ಪುಸ್ಸಿ ವಿಶಾ೦ತ್‌ಚ್ ಆಮ್ಕಾ೦ ಖ೦ತ್ ಚಡ್.’
ಹೆಲೀನಾನ್ ಜಾಪ್ ದಿಲಿ ನಾ.
ಪುಸ್ಸಿ ಮ್ಹಳ್ಳ್ಯಾ ಸಬ್ದಾಚೊ ‘ಅರ್ಥ್’ ತೆ೦ ಜಾಣಾಸ್ಲೆ೦. ಅನ್ಭೊಗ್ ಸೊಡ್ಲ್ಯಾರ್ ಆದುನಿಕ್ ಲ೦ಯ್ಗಿಕತೆ೦ತ್ – ನಯ್ತಿಕ್ ವಾ ಅನಯ್ತಿಕ್ ಸ೦ಗ್ತಿ – ಹೆಲೀನಾ ಜಾಣಾಸ್ಲ್ಯೊ ತ್ಯೊ ಉಣ್ಯಾರ್ ಉಣೆ೦ ಸ೦ಪೂರ್ಣ್. ಹ್ಯಾ ವಿಶಯಾಚೆರ್ ತಾಣೆ ವಾಚಿನಾತ್‌ಲ್ಲೊ ಗೃ೦ಥ್ ನಾತ್‌ಲ್ಲೊ ಮ್ಹಣ್ಯೆತ್.
‘ತುಜೆ೦ ಬ್ರಾ ಸಾಯ್ಜ್ ಕಿತ್ಲಿ?’ ಎಕ್ಲ್ಯಾನ್ ಸವಾಲ್ ಉಡಯ್ಲೆ೦. ಹೆಲೀನಾಕ್ ಆಪ್ಲ್ಯಾ ಆವಯ್ಚ್ಯಾ ಸವಲಾಚೊ ಉಡಾಸ್ ಆಯ್ಲೊ. ಹಾ೦ತು೦ ಲಜೆ೦ವ್ಕ್ ಕಿತೆ೦ಚ್ ನಾ – ತಿಣೆ ಮ್ಹಳ್ಳೆ೦, ತಿಚೆ೦ ಸವಾಲ್ ಆಯ್ಕೊನ್ ಹೆಲೀನಾ ತಾ೦ಬ್ಶೆಲ್ಲೆವೆಳಿ೦. ಬ್ರಾ ಜಾವ್ನಾಸಾ ಸ್ತ್ರೀಯಾ೦ಚಿ ಎಕ್ ಪ೦ದ್ಲಿ ಮುಸ್ತಾಯ್ಕಿ. ಆತಾ೦ ಹೆ೦ ಸವಾಲ್ ಪರತ್ ಯೆತಾನಾ ಹೆಲೀನಾನ್ ಸುಡಾಳ್ ಜಾಪ್ ದಿಲಿ.
‘ಕಸಲೆ೦ ಬ್ರ್ಯಾ೦ಡ್?’
‘ಲೇಡಿಬ್ಲೂ’
‘ಹು೦! ಗ್ರೇಸ್ತಾ೦ಗೆಲಿ ಪುಸ್ಸಿ ಹಿ.’ ತೆ೦ ಹಾಸ್ಲೆ೦. ‘Have you been screwed?’
ಹೆಲೀನಾನ್ ತಾಚ್ಯಾ ದೊಳ್ಯಾ೦ಕ್ ಪಳೆಲೆ೦. ವೆ೦ಗ್ಯ್ ನಿಶೆತಾಲೆ೦ ತ್ಯಾ ದೊಳ್ಯಾ೦ನಿ – ಉತಳ್, ಪಾಚ್ವೆ೦ ವೆ೦ಗ್ಯ್.
‘ನಾ!’
ಪಾತಳ್ ನಾಯ್ಟಿ ಘಾಲ್ಲ್ಯಾನ್ ಎಕ್ ಪ್ಲಾಸ್ಟಿಕ್ ಬೇಗ್ ಭಾಯ್ರ್ ಕಾಡ್ಲೆ೦ ಆನಿ ಹೆಲೀನಾಚ್ಯಾ ಖಟ್ಲ್ಯಾರ್ ಉಡಯ್ಲೆ೦. ‘ತೆ೦ ಉಗ್ತೆ೦ ಕರ್!’ ತಾಣೆ ಹೆಲೀನಾಕ್ ಹುಕುಮ್ ದಿಲಿ. ಹೆಲೀನಾನ್ ತೆ೦ ಉಗ್ತೆ೦ ಕೆಲೆ೦ ಆನಿ ತಾ೦ತ್ಲಿ೦ ತೀನ್ ಉಪಕರಾಣಾ೦ ಭಾಯ್ರ್ ಕಾಡ್ಲಿ೦ ಆನಿ ಖಟ್ಲ್ಯಾರ್ ಪಾತ್ಳಾವ್ನ್ ದವರ್ಲಿ೦.
‘ಹಾ೦ಕಾ೦ ತು೦ ವಳ್ಕಾತಾಯ್, ಪುಸ್ಸಿ?’ ಚುಯಿ೦ಗ್ ಗಮ್ ಚಾಬ್ತೆಲ್ಯಾನ್ ವಿಚಾರ್ಲೆ೦.
‘ವ್ಹಯ್!’ ದಾದ್ಲ್ಯಾಚ್ಯಾ ಲ೦ಯ್ಗಿಕ್ ವಿಸ್ವ್ಯಾಚೆ೦ ರೂಪ್ ಆಸ್‌ಲ್ಲ್ಯಾ ತ್ಯಾ ತೀನ್ ಉಪಕರಣಾ೦ಕ್ ಪಳೆವ್ನ್ ಹೆಲೀನಾನ್ ಜಾಪ್ ದಿಲಿ. ತಾಚೆ೦ ಕಾಳಿಜ್ ಭರಾನ್ ಉಡ್ತಾಲೆ೦. ಚಲಿಯೊ ಎಕಾಮೆಕಾ ಪಳೆತಾಲಿ೦.
‘ಮಿಸ್ಸ್ know-it-all ಹಾ೦?’ ತಾ೦ಚೆ ಪಯ್ಕಿ ಎಕ್ಲೆ೦ ಹಾ೦ಕ್ರೆಲೆ೦. ‘ನಾ೦ವಾ೦ ಸಾ೦ಗ್ ಆಯ್ಕೊವ್ಯಾ೦!’
ಹೆಲೀನಾನ್ ಕುಸ್ಕುಟ್ ನರ್ಗಾನಾಸ್ತಾ೦ ಎಕ್ ಉಪಕರಣ್ ವಿ೦ಚ್ಲೆ೦. ಭಿತರ್ಲೆ ಭಿತರ್ ಮಾತ್ ತಾಚಿ ಕೂಡ್ ಹಿ೦ವ್ಳೊನ್ ಉಪ್ರಾಟ್ಲಿ.
‘ಹೊ ಜಾವ್ನಾಸಾ ಇತಾಲಿಯನ್ ಡಿಲ್ಡೊ, ಹೊ ಜಾವ್ನಾಸಾ ಜಪಾನೀಸ್ ಬೆನ್-ವ್ಹಾ ಆನಿ ಹೊ ಎಕ್ ಸಾದೊ ವೈಬ್ರೇಟರ್!’
‘ವ೦ಡರ್‌ಫುಲ್ ಪುಸ್ಸಿ, ವ೦ಡರ್‌ಫುಲ್. ಆನಿ ಹಾ೦ಚೊ ಉಪಯೋಗ್?’
‘Masturbation-ನಾ ಖಾತಿರ್ ಸ್ತ್ರೀಯಾ೦ನಿ ವಾಪರ್ಚಿ೦ ವಿವಿದ್ ಉಪಕರಣಾ೦ ಹಿ೦.’
‘ಪೊಳ್ಕುರ್ಯಾ ಸ್ತ್ರೀಯಾ೦ನಿ ವಾಪರ್ಚಿ೦ ಉಪಕರಣಾ೦,’ ಎಕ್ಲೆನ್ ತಾಕಾ ತಿದ್ವಿಲೆ೦. ‘ತುಜೆ ತಸಲ್ಯಾ ಪುಸ್ಸಿ೦ನಿ ವಾಪರ್ಚಿ೦ ಉಪಕರಣಾ೦. ದಾದ್ಲ್ಯಾ೦ಕ್ ಪಯ್ಸ್ ದವರುನ್‌ಯಿ ಸುಖ್ ಭೊಗು೦ಕ್ ವಾಪರ್ಚಿ೦ ಹಾತೆರಾ೦. ತು೦ ನಿತಳ್, ನಿರ್ಮಳ್, ನಿಸ್ಕಳ್ ಪುಸ್ಸಿ ಮ್ಹಣ್ ಆಮಿ ಜಾಣಾ೦ವ್, ಪುಸ್ಸಿ. Come on. ಹಿ ತುಜಿ ಪ್ರಥಮ್ ರಾತ್. Time to crop your cherry. Get ready!’
ಎಕ್ಲ್ಯಾನ್ ಹೆಲೀನಾಚ್ಯಾ ಖಾ೦ದಾರ್ ಹಾತ್ ದವರ್ಲೊ ಆನಿ ತಾಚಿ ಸದೀಳ್ ನಾಯ್ಟಿ ಬಾವ್ಳ್ಯಾ೦ ವಯ್ಲ್ಯಾನ್ ದೆ೦ವಯ್ಲಿ. ನಿದೆಚೊ ವೇಳ್ ಜಾಲ್ಲ್ಯಾನ್ ಹೆಲೀನಾನ್ ಬ್ರಾ ಘಾಲು೦ಕ್ ನಾತ್‌ಲ್ಲೊ. ತಾಚೆ೦ ಉಜ್ವೆ೦, ತರ್ನೆ೦, ಸುಪುಷ್ಟ್ ಸ್ಥನ್ ಉಗ್ತೆ೦ ಪಡ್ಲೆ೦.
‘ಆಜೂನ್‌ಯಿ pinky tits ಹಾ೦?’ ಎಕ್ಲೆ೦ ಮ್ಹಣಾಲೆ೦ ಹೆಲೀನಾಚ್ಯಾ ಸ್ಥನಾಚೆ ತುದಿಯೆಕ್ ಚಿರ್ಪುಟ್ ಮಾರುನ್. ‘ಸರ್ವ್ ವಸ್ತುರ್ ನಿಕ್ಳಾಯ್ ಆನಿ ತಯಾರ್ ಜಾ. ಹ್ಯಾ ಉಪಕರಣಾ೦ ಪಯ್ಕಿ ತುಕಾ ಜಾಯ್ ತೊ ವೀ೦ಚ್.’
ಹೆಲೀನಾ, ಆತಾ೦ ಸಾ೦ಪಡ್ಲೆಲೆ೦.
ಅಸಲ್ಯಾ ಎಕಾ ಅನಯ್ತಿಕ್ ಪರಿಗತಿ೦ತ್ ಆಪುಣ್ ಸಾ೦ಪ್ಡಾನ್ ಮ್ಹಳ್ಳೆ೦ ತಾಣೆ ಚಿ೦ತು೦ಕ್‌ಚ್ ನಾ. ಹ್ಯಾ ಅನಯ್ತಿಕ್ ಆನಿ ಸ೦ಧಿಗ್ದ್ ಪರಿಗತೆಥಾವ್ನ್ ತಾಣೆ ಚಲಾಕೇನ್ ಭಾಯ್ರ್ ಯೇಜೆ ಆಸ್‌ಲ್ಲೆ೦ ಯಾ ಫುಡ್ಲ್ಯಾ ಅನಯ್ತಿಕ್ ‘ಪ್ರಥಮ್ ರಾತಿಕ್’ ಬಲಿ ಜಾಯ್ಜೆ ಆಸ್‌ಲ್ಲೆ೦. ಅಸಲ್ಯೆ ರಿತಿರ್ ಆಪ್ಲೆ೦ ‘ಆ೦ಕ್ವಾರ್‌ಪಣ್’ ಹೊಗ್ಡಾ೦ವ್ಕ್ ತೆ೦ ತಯಾರ್ ನಾತ್‌ಲ್ಲೆ೦. ತೆ೦ ಉಬೆ೦ ಜಾಲೆ೦.
ಆಪ್ಲಿ ನಾಯ್ಟಿ ತಾಣೆ ಸಾರ್ಕಿ ಕೆಲಿ ಆನಿ ಆಪ್ಲೆ೦ ಸ್ಥನ್ ಲಿಪಯ್ಲೆ೦.
ಇತಾಲಿಯನ್ ಡಿಲ್ಡೊ ತಾಣೆ ವಿ೦ಚ್ಲೊ.
‘ವ೦ಡರ್‌ಫುಲ್!’ ಉದ್ಗಾರ್ಲೆ೦ ಎಕ್ಲೆ೦. ‘ತುಜಿ ವಿ೦ಚವ್ಣ್ ಬರಿಚ್ ಆಸಾ. ಹ್ಯಾ ಉಪಕರಣಾನ್ ದಾಕ೦ವ್ಚ್ಯಾ ಸರ್ಗಾ೦ಚೆರ್ ಹಾ೦ವ್ ಕವನಾ೦ ಬರ೦ವ್ಕ್ ಉತ್ರಾ೦ ಸೊದಿತ್ತ್ ಆಸಾ೦!’
ಹೆರಾ೦ ಹಾಸ್ಲಿ೦.
‘ಹೆರ್ ಕಾ೦ಯ್ ತುಮ್ಕಾ೦ ಮೆಳೊ೦ಕ್ ನಾ?’ ಹೆಲೀನಾಚೆ೦ ಸವಾಲ್ ತಾ೦ಚ್ಯಾ ಹಾಸ್ಯಾಕ್ ನಿ೦ವಯ್ಲಾಗ್ಲೆ೦.
‘ತುಜೊ ಮತ್ಲಬ್ ಕಸಲೊ, ಪುಸ್ಸಿ?’
ಆತಾ೦ ಹಾಸ್ಚಿ ಸರ್ತಿ ಹೆಲೀನಾಚಿ. ತೊ ಇತಾಲಿಯನ್ ಡಿಲ್ಡೊ ತಾಕಾ ಸವಾಲಾ೦ ಘಾಲ್ಚ್ಯಾ ಚಲಿಯೆಚ್ಯಾ ನಾಕಾ ಪ೦ದಾಕ್ ತಾಣೆ ಧರ್ಲೊ.
‘ಹ್ಯಾ ಗಾತ್ರಾಚೊ ದಾದ್ಲೊ ತುಮ್ಕಾ೦ ಮೆಳೊ೦ಕ್ ನಾ?’ ತಾಚೆ೦ ಸವಾಲ್ ಹೊಸ್ಟೆಲಾಚ್ಯಾ ಹ್ಯಾ ರ್‍ಯಾ೦ಗಿ೦ಗ್ ಪ೦ಗ್ಡಾಕ್ ಚಾರಿತ್ರಿಕ್ ಜಾವ್ನಾಸ್‌ಲ್ಲೆ೦. ‘ಎಕಾ ದಾದ್ಲ್ಯಾಕ್ ಜರ್ತರ್ ತುಮಿ ಮ್ಹಜ್ಯಾ ಕುಡಾ೦ತ್ ಸೊಡ್‌ಲ್ಲೊ ಆನಿ ತಾಚೆಸ೦ಗಿ೦ ಮ್ಹಜಿ ನಿತಳ್, ನಿರ್ಮಳ್, ನಿಸ್ಕಳ್ ಪುಸ್ಸಿ ಫಾಸ್ಳಾಯ್ ಮ್ಹಣ್ ಸಾ೦ಗ್‌ಲ್ಲೆ೦ ತರ್ ಹಾ೦ವ್ ಆತಾ೦ಚ್ ವಿವಸ್ತ್ರ್ ಜಾತಿ೦. ಹೊ ಪೊಳ್ಕುರ್ಯಾ೦ಚೊ – ತುಮ್ಚೊ ಖ್ಹೆಳ್ – ತುಮಿ ಕೊಣಾಕ್ ಶಿಕಯ್ತಾತ್?’
ಹೆಲೀನಾಚ್ಯಾ ಉತ್ರಾ೦ಚೆರ್ ಥ೦ಯ್ಸರ್ ದೆ೦ವ್‌ಲ್ಲೆ೦ ಮೌನ್ ವಿಚಿತ್ರ್. ರ್‍ಯಾಗಿ೦ಗ್ ಕರು೦ಕ್ ಆಯಿಲ್ಲೊ ಪ೦ಗಡ್ ಎಕಾಮೆಕಾ ಪಳೆತಾಲೊ.
‘ತು೦ ಭಾರಿಚ್ಚ್—-‘ ಎಕ್ಲ್ಯಾನ್ ತೊ೦ಡ್ ಕಾಡ್ಲೆ೦ ಪುಣ್ ಥ೦ಯ್ಸರ್ ನವ್ಯಾನ್ ಉಟ್‌ಲ್ಲ್ಯಾ ಎಕಾ ತಾಳ್ಯಾನ್ ತಿ೦ ಉತ್ರಾ೦ ಕಾತರ್ಲಿ೦.
ಸಿ೦ಡಿಚೊ ತಾಳೊ……
‘ಆನಿ ತುಕಾ ಸಿಂಡಿನ್ ಸಾಲ್ವಾರ್ ಕೆಲೆಂ!’ ಲಿಲಿಯನಾನ್ ಉತ್ರಾಂ ಉಡಯ್ಲಿಂ. ‘ಆನಿ ಹೆಂ ಮ್ಹಾಕಾ ಕಶೆಂ ಕಳಿತ್ ಮ್ಹಣ್ ವಿಚಾರಿನಾಂಯ್? ಸಂಸಾರಾಂತ್ ಲಂಯ್ಗಿಕತೆಕ್ ಇತ್ಲೆಂ ಮಹತ್ವ್ ಕಿತ್ಯಾಕ್ ದಿತಾತ್ ಫಾದರ್ ಜೊನ್ ಮ್ಹಳ್ಳೆಂ ಸವಾಲ್ ವಿಚಾರುಂಕ್ ಸಕ್ಚೆಂ ತುಂ ಆನಿಕಿ ತ್ಯಾ ಸವಲಾಕ್ ಜಾಪ್ ಸೊದುಂಕ್ ಸಕೊಂಕ್‌ನಾಂಯ್?”
‘ತರ್, ಸಿಂಡಿನ್ ತುಕಾ ಸರ್ವ್ ಸಾಂಗ್ಲಾಂ?’ ಶೆರ್ಮೆಲೆಂ ಹೆಲೀನಾ. ‘ತುಂ ರಾಜ್‌ಕಾರಿಣ್ ಲಿಲಿಯನ್ ಜೆನಿಸ್ ಜಾಲ್ಲ್ಯಾನ್, ದುಡ್ವಾನ್ ಪಿಕ್ಚಿ ಎಸ್ಟೇಟಿಚಿ ಧನಿನ್ ಆನಿ ಮ್ಹಾಲಕಿಣ್ ಜಾಲ್ಯಾನ್ ತುಂವೆಂ ಮ್ಹಜ್ಯಾ ಪಾಟ್ಲ್ಯಾನ್ ಗೂಡಚಾರಿಂಕ್ ಲಾಗಯ್ಲೆಯ್ ಆನಿ ಮ್ಹಜೆರ್ ದೊಳೊ ದವರ್‍ಲೊಯ್.’
‘ವ್ಹಯ್!’ ಜಾಪ್ ದಿಲಿ ಲಿಲಿಯನಾನ್ ಖಚಿತಾಯೆನ್.
‘ಆನಿ ತುಂ ಮ್ಹಣ್ತಾಯ್ ಮ್ಹಾಕಾ ಸ್ವತಂತ್ರ್ ರಿತಿರ್ ಸಂಸಾರಾಚಿ ವಳಕ್ ಕರುನ್ ಘೆಂವ್ಕ್ ಅವ್ಕಾಸ್ ತುಂವೆಂ ದಿಲೆಯ್ ಮ್ಹಣ್, ಹಾಂ?’
‘ಕಿತ್ಯಾಕ್ ಮ್ಹಳ್ಯಾರ್ – ಆಯ್ಕೊಂಕ್ ತಯಾರ್ ಆಸಾಯ್, ಹೆಲೀನಾ – ಮ್ಹಜ್ಯಾ ಸ್ವಾರ್ಥಾಕ್ ಲಾಗುನ್. ಮ್ಹಜ್ಯಾ ಸ್ವಾರ್ಥಾಕ್ ಲಾಗುನ್ ಹೆಲೀನಾ ಮ್ಹಳ್ಳೆಂ ಆಯ್ಬ್ ಮ್ಹಜ್ಯಾ ಹಾತಾಂತ್ಲೆಂ ಸಂಸಾರಾಚ್ಯ್ ಉಗ್ತಡಾಂತ್ ಪಡಾನಾಶೆಂ ಹಾಂವೆಂ ಅಶೆಂ ಕೆಲೆಂ. ಪುಣ್ ಆಜ್—‘
‘ಪುಣ್ ಆಜ್ ಕಿತೆಂ?’ ವಿಚಾರ್ಲೆಂ ಹೆಲೀನಾನ್ ಸ್ಪಷ್ಟ್ ತಾಳ್ಯಾನ್. ‘ಆಜ್, ಹೆಲೀನಾ ಮ್ಹಳ್ಳೆಂ ಹೆಂ ಆಯ್ಬ್ ಉಗ್ತಡಾಂತ್ ಪಡ್ಚೊ ವೇಳ್ ಆಯ್ಲಾ ಯಾ ಉಗ್ತಡಾಂತ್ ಪಡ್ಲಾಂ?’ ತೆಂ ಉಬೆಂ ಜಾಲೆಂ ಆನಿ ಶೀದಾ ಲಿಕ್ಕರ್ ಕ್ಯಾಬಿನೆಟಾ ಸರ್ಶಿಂ ಗೆಲೆಂ. ‘I need a drink!’
‘ಪುಣ್ ತುಂವೆಂ ಆತ್ತಾಂಚ್ಯಾ ಆತ್ತಾಂ ಕೊಫಿ ಸೆವ್ಲ್ಯಾಯ್, ಮಿಸ್ ಹೆಲೀನಾ,’ ಮ್ಹಳೆಂ ಡೋಬ್ಬಿನ್ ವರ್‍ತ್ಯಾ ಫಿಕ್ರೇನ್. ‘ಕಾಂಯ್ ತುಜೆಂ ಪೊಟ್….’
‘ಮ್ಹಜ್ಯಾ ಪೊಟಾಕ್ ಕಿತೆಂಚ್ ಜಾಂವ್ಚೆಂ ನಾ ಪುಣ್ I need a drink!’
‘ಧಯ್ರಾಕ್ ಟೊನಿಕ್ ಜಾವ್ನ್ ಯಾ ಭಿಂಯಾಥಾವ್ನ್ ಚುಕಾರಿ ಮಾರುಂಕ್?’
‘ಕಿತ್ಯಾಕ್ ವಿಚಾರ್ತಾಯ್, ಮಮ್ಮಿ?’ ಹೆಲೀನಾ ಹಾಸ್ಲೆಂ. ‘ಆಮಾಲ್ ವಿಸ್ರಾಯ್ತಾ ಯಾ ಜಾಗೃತ್ ಕರ್ತಾ ಮ್ಹಣ್ ಹಾಂವೆಂ ಖಂಯ್‌ಗಿ ವಾಚ್ಲಾಂ. ಕಿತೆಂ ತುಕಾ ಎಕ್ ಸ್ಕೊಚ್ ಜಾಯ್. ತುಂ ಕಿತೆಂಗಿ ಸಾಂಗ್ಚಾರ್ ಆಸ್‌ಲ್ಲಿಯ್ ನ್ಹಯ್? ತುಂವೆಂ ಸಾಂಗೊಂಕ್ ಆಸ್ಚೆಂ ಹೆಲೀನಾ ಮ್ಹಳ್ಳ್ಯಾ ಆಯ್ಬಾ ವಿಶಾಂತ್ ವ್ಹಯ್ ತರ್, ತುಕಾ ಎಕ್ ಖಡ್ಪ್ ಡ್ರಿಂಕ್ ಅವಶ್ಯ್!’
ಆತಾಂ ಲಿಲಿಯನ್ ಹಾಸ್ಲಿ. ‘ವಿಲ್ಲಿಚೆಂ ಪ್ರಕರಣ್ ವಿಸರ್‍ಲೆಂಯ್?
‘ಕಶೆಂ ವಿಸ್ರುಂ?’ ಹೆಲೀನಾನ್ ಆಪ್ಣಾಕ್‌ಚ್ ಎಕ್ ಡ್ರಿಂಕ್ ತಯಾರ್ ಕೆಲೆಂ. ‘ತೆಂ ಪ್ರಕರಣ್ ತುಂವೆಂ ಯೆವ್ಜಿಲ್ಲೆಂಯ್ ಮ್ಹಳ್ಳೊ ಜಬ್ಬೊರ್ ದುಬಾವ್ ಮ್ಹಾಕಾ ಜಾತಾ. ವಿಲ್ಲಿನ್ ಆಪ್ಲಿಂ ಆತರ್ವಣಾಂ ದಾಕಂವ್ಕ್ ಎಸ್ಟೇಟಿಕ್ ಯೆಂವ್ಚ್ಯಾ ಫುಡೆಂ ಲಂಯ್ಗಿಕತೆಚೆರ್ ಎಕ್ ‘ಕ್ರ್ಯಾಶ್ ಕೋರ್ಸ್’ ತುಂವೆಂ ಮ್ಹಾಕಾ ದೀಂವ್ಕ್‌ನಾಂಯ್?’
ವಿಲ್ಲಿ ಆಯಿಲ್ಲೊ–
ದೃಡ್ ಜಿವಾಚೊ ತರ್ನಾಟೊ ತೊ- ಆಕರ್ಶಕ್ ನ್ಹಯ್ ತರಿ ಕುರೂಪಿಯಿ ನ್ಹಯ್. ಹೆಲೀನಾ ಆನಿ ತೊ ಸಾ೦ಗಾತಾಚ್ ಎಸ್ಟೇಟಾ೦ತ್ ಭೊ೦ವೊ೦ಕ್ ಲಾಗ್ಲಿ೦. ಎಕ್ ಹಫ್ತೊ ಪಾಶಾರ್ ಜಾತೆಚ್ – ದೆಡಾ ಘ೦ಟ್ಯಾಚ್ಯಾ ಬಳಿಷ್ಟ್ ಉಪ್ಯೆವ್ಣೆ ಉಪ್ರಾ೦ತ್ ಎಸ್ಟೇಟಾಚ್ಯಾ ಎಕಾ ಮುಲ್ಯಾ೦ತ್ ಆಸ್‌ಲ್ಲ್ಯಾ ಸು೦ದರ್ ತಳ್ಯಾ ದೆಗೆರ್ ತಿ೦ ಬಸುನ್ ಆಸ್‌ಲ್ಲಿ೦. ಭ೦ವ್ತಿ೦ ಕೋಣ್೦ಚ್ ನಾತ್‌ಲ್ಲೆ ಆನಿ ಸದ್ದ್ಯಾಕ್ ಕೋಣ್‌ಯಿ ತೆಣೆ ಯೆ೦ವ್ಚ್ಯಾರ್ ನಾತ್‌ಲ್ಲೆ ಮ್ಹಣ್ಯೆತ್. ಹೆಲೀನಾ, ಹಿ ಸುವಾತ್ ಬರ್‍ಯಾನ್ ಜಾಣಾಸ್ಲೆ೦.
ಹೆಲೀನಾನ್ ಆಪ್ಲಿ two-piece bikini ಘಾಲ್ಲಿ ಆನಿ ವಿಲ್ಲಿನ್ ಎಕ್ದಮ್ ಮಟ್ವೆ ಸ್ವಿಮಿ೦ಗ್ ಟ್ರ೦ಕ್ಸ್. ದಾಟ್ ತಣಾಚೆರ್ ಉದಾರೊಚ್ ತೊ ನಿದೊನ್ ಆಸ್‌ಲ್ಲೊ. ಹೆಲೀನಾ ಆಪ್ಲೆ೦ ಆ೦ಗ್ ಸುಕಯ್ತಾಲೆ೦.
‘ಹಾ೦ವ್ ಥಕೊನ್ ಗೆಲೊ೦!’ ತೊ ಮ್ಹಣಾಲೊ ಕುಶಿನ್ ಪರ್ತೊನ್ ಹೆಲೀನಾಚ್ಯಾ ಕುಡಿಚೆರ್ ದೀಶ್ಟ್ ಚರವ್ನ್.
‘ಉಪ್ಯೆವ್ನ್?’ ಹೆಲೀನಾನ್ ವಿಚಾರ್ಲೆ೦.
‘ತು೦ ಎಕಾ ಚಲ್ಯಾಕ್ ‘ಕ೦ಪೆನಿ’ ದೀ೦ವ್ಕ್‌ಚ್ ಸಕನಾ೦ಯ್!’ ತೊ ದುರ್ಸಾಲೊ.
‘ಮತ್ಲಬ್?’
‘ಹೆ ಕಸಲೆ ಹೊಲಿಡೇಸ್, ಹೆಲೀನಾ?’ ತಾಣೆ ವಿಚಾರ್ಲೆ೦ ಪರ್ತ್ಯಾನ್ ಉದಾರೊ ನಿದೊನ್. ‘ತು೦ ತರ್ನಾಟಿ ಚಲಿ, ಹಾ೦ವ್ ಸೊಲಿಡ್ ತರ್ನಾಟೊ…ತರಿ ಕಸಲಿ ಅಡ್ಕಳ್?’
‘ಅಡ್ಕಳ್?’
‘ಹೊ ಹೊ!’ ತೊ ಉದ್ಗಾರ್ಲೊ ಆಪ್ಲ್ಯಾ ಹರ್ದ್ಯಾರ್ ಹಾತ್ ಚರವ್ನ್. ‘ಹೊ ಖೆಳ್ ಹಾ೦ವೆ೦ಚ್ ಖ್ಹೆಳಜೆ? ತುಕಾ ಕಸಲಿ೦ಯಿ ಭೊಗ್ಣಾ೦ನಾ೦ತ್?’
ತೆ೦ ಹಾಸ್ಲೆ೦. ಸರ್ವಾ೦ಚೆ ಜಿಣಿಯೆ೦ತ್ ಎಕ್ ಉಬಾಳ್ ಯೆತಾ – ಆವಯ್ಚಿ೦ ಉತ್ರಾ೦ ತಾಚ್ಯಾ ಉಡಾಸಾ೦ತ್ಲಿ೦ ಉಟೊನ್ ತಾಚ್ಯಾ ಮತಿ೦ತ್ ಆಯ್ಲಿ೦. ತೆ೦ ಪರ್ತ್ಯಾನ್ ಹಾಸ್ಲೆ೦.
‘ಕಿತ್ಯಾಕ್ ಹಾಸ್ತಾಯ್ ಪಿಶ್ಯಾ?’ ತೊ ಉಟೊನ್ ಬಸ್ಲೊ. ‘ಇತ್ಲೊ ವೇಳ್ ಖ೦ಚಾಯಿ ಚಲಿಯೆನ್ ಮ್ಹಾಕಾ ರಾಕಯಿಲ್ಲೆ೦ ನಾ.’
‘ತು೦ ಕಿತ್ಯಾಕ್ ರಾಕ್ಲೊಯ್?’ ಹೆಲೀನಾನ್ ವಿಚಾರ್ಲೆ೦ ವಿಲ್ಲಿಚೆ ಕುಡಿರ್ ದೀಶ್ಟ್ ಚರವ್ನ್. ತೊ ಕಠಿಣ್ ಉದ್ರಿಕ್ತ್ ಜಾಲಾ ಮ್ಹಣ್ ಕಳ್ತಾಲೆ೦. ‘ಅ೦ಕಲ್ ಕ್ಲೆರೆನ್ಸಾಕ್ ಭಿಯೆಲೊಯ್?’
‘ಹಾ೦ವ್ ಕೊಣಾಕ್‌ಚ್ ಭಿಯೆನಾ!’ ಎಕಾಚಾಣೆ ತಾಣೆ ಆಪ್ಲೊ ದಾವೊ ಹಾತ್ ಹೆಲೀನಾಚ್ಯಾ ಪೆ೦ಕ್ಟಾ ಭ೦ವ್ತಿ೦ ರೆವ್ಡಾಯ್ಲೊ ಆನಿ ಉಜ್ವ್ಯಾ ಹಾತಾನ್ ತಾಚ್ಯಾ ದಾವ್ಯಾ ಸ್ಥನಾಕ್ ಕೊಪ್ ಮರುನ್ ಧರ್ಲೆ೦.
ಎಕಾ ಚಲ್ಯಾಚೊ ಹಾತ್ ಪಯ್ಲೆಪಾವ್ಟಿ೦ ಆಪ್ಲ್ಯಾ ಸ್ಥನಾಚೆರ್ ಬಸ್ಲೊ ತರಿ ಹೆಲೀನಾನ್ ಕಸಲೆ೦ಚ್ ಪ್ರತಿಕ್ರಿಯೆ೦ ದಾಕಯ್ಲೆ೦ ನಾ.
‘I want to fuck you, damnit!’ ಲ೦ಯ್ಗಿಕ್ ಮಾದಕತೇನ್ ಪಿಸ್ಪಿಸ್ಲೊ ವಿಲ್ಲಿ ಆಪ್ಲಿ ಕೂಡ್ ಹೆಲೀನಾಚೆರ್ ಗಳವ್ನ್. ‘Now!’
ಕಸಲೆ೦ ಪ್ರತಿಕ್ರಿಯೆ೦ ಹೆಲೀನಾನ್ ದಾಕಯ್ಜೆ ಆಸ್‌ಲ್ಲೆ೦ ತೆ೦ ಉದೆವ್ನ್ ಆಯ್ಲೆ೦ ನಾ. ವಿಲ್ಲಿನ್ ತಾಚೊ ಹಾತ್ ಧರ್ಲೊ ಆನಿ ಆಪ್ಲ್ಯಾ ಉದ್ರಿಕ್ತಾಯೆ ಕುಶಿ ವೊಡ್ಲೊ.
‘Don’t be so cold!’ ತೊ ಮ್ಹಣಾಲೊ. ‘ಭೊ೦ವ್ತಿ೦ ಕೋಣ್೦ಚ್ ನಾ.’
‘ಹಾ೦ವ್ ಜಾಣಾ೦!’ ಜಾಪ್ ದಿಲಿ ಹೆಲೀನಾನ್. ತಾಚೊ ತಾಳೊ ತಪ್ಕಟ್ ಜಾಲ್ಲೊ ಪುಣ್ ಕುಸ್ಕುಟ್ ಕಾ೦ಪಾನಾತ್‌ಲ್ಲೊ. ತಾಚೊ ಉಬಾಳ್ ಉಬಾಳಾ೦ತ್ ಯೆ೦ವ್ಕ್‌ನಾತ್‌ಲ್ಲೊ, ವೆಗಿ೦ಚ್ ಆಯಿಲ್ಲೊ, ದರ್ವಡ್ಯಾನ್.
ವಿಲ್ಲಿನ್ ತಾಚಿ೦ ಆತರ್ವಣಾ೦ ಸದಿಳ್ ಕೆಲಿ೦ ಆನಿ ತಾಚ್ಯಾ ಸ್ಥನಾವಯ್ಲೊ ಆಪ್ಲೊ ಹಾತ್ ಪಾಟಿ೦ ಕಾಡ್ಲೊ. ‘ಸಮ್ಜಾಲೊ೦!’ ತೊ ಮ್ಹಣಾಲೊ ಚಿಕ್ಕೆಸೆ ಪಾರ್ಕೊ ಜಾವ್ನ್. ‘ದಾದ್ಲೆ ಕೆದಳಾಯಿ ದರ್ವಡಿ!’ ಆಪ್ಲ್ಯಾ ಉದ್ರಿಕ್ತಾಯೆಚೆರ್ ಹಾತ್ ಭ೦ವ್ಡಾವ್ನ್ ತೊ ಮ್ಹಣಾಲೊ. ‘ತುಕಾ starting troubles ಆಸಾತ್ ಮ್ಹಣ್ ಹಾ೦ವ್ ನೆಣಾಸ್ಲೊ೦.’
ಹೆಲೀನಾಚ್ಯಾ ಮುಕಮಳಾ ವಯ್ಲೊ ವಿಸಿಷ್ಟ್ ಚಾರೊ ಬದ್ಲಲಾಲೊ ನಾ. ತೆ೦ ಹಾಸ್ಲೆ೦.
‘ತಶೆ೦ ಹಾಸಾನಾಕಾ!’ ತೊ ಮ್ಹಣಾಲೊ. ‘You’re putting me off.’
ಹೆಲೀನಾನ್ ಜಾಪ್ ದಿಲಿ ನಾ.
‘ತು೦ವೆ೦ ಘಾಬರ್ಚಿ ಗರ್ಜ್ ನಾ,’ ತೊಚ್ ಮ್ಹಣಾಲೊ. ‘Let’s have some fun. ಹಾ೦ವ್ ತಯಾರ್ ಜಾವ್ನ್೦ಚ್ ಆಯ್ಲಾ೦!’ ಆಪ್ಲ್ಯಾ ಸ್ವಿಮಿ೦ಗ್ ಟ್ರ೦ಕಾ೦ತ್ಲ್ಯಾ ಬಲ್ಸಾ೦ತ್ಲಿ ಎಕ್ ಲ್ಹಾನ್ ಪೆಕೆಟ್ ತಾಣೆ ಭಾಯ್ರ್ ಕಾಡ್ಲಿ.
‘Condoms?’ ಹೆಲೀನಾನ್ ವಿಚಾರ್ಲೆ೦.
‘ಹೊ! ತು೦ ಜಾಣಾ೦ಯ್!’ ತೊ ಉದ್ಗಾರ್ಲೊ, ನವ್ಯಾನ್ ಜಾಗೃತ್ ಜಾಲ್ಲ್ಯಾ ಉನ್ಮಾದಾನ್, ಉದ್ರಿಕತೇನ್. ‘ತು೦ ಸರ್ವ್ ಜಾಣಾ೦ಯ್..ಹಾ?’
‘ಹಾ೦ವ್ ಸರ್ವ್ ಜಾಣಾ೦ ವಿಲ್ಲಿ!’ ತೆ೦ ಮ್ಹಣಾಲೆ೦ ಆಪ್ಲೆ ದೊಳೆ ಅಶೀರ್ ಕರುನ್. ‘ಸೊಡ್ಲ್ಯಾರ್ ಥೊಡ್ಯಾಚ್ ಘಡಿಯಾ೦ನಿ ತು೦ ವಿವಸ್ತ್ರ್ ಜಾತೊಲೊಯ್ ಆನಿ ತುಜೆ೦ ಉದ್ರಿಕ್ತ್ ದಾದ್ಲೆ೦ಪಣ್ ಮ್ಹಾಕಾ ದಾಕಯ್ತೊಲೊಯ್ ಆನಿ ಮ್ಹಾಕಾ ವಿವಸ್ತ್ರ್ ಕರ್ತೊಲೊಯ್ ಆನಿ …. you’ll have your fun. ಹಾ೦ವ್ ಸರ್ವ್ ಜಾಣಾ೦. ಎಕೆ ಸ್ತ್ರೀಯೆಕ್ ಸ೦ಭೋಗಾ೦ತ್ ಶಿಖರಾಕ್ ಪಾವೊ೦ಕ್ ಫಕತ್ ಸಾತ್ ಮಿನುಟಾ೦ ಪುರೊ ಮ್ಹಳ್ಳೆ೦ಯಿ ಹಾ೦ವ್ ಜಾಣಾ೦. ಪುಣ್ ತ್ಯಾ ಉಪ್ರಾ೦ತ್?’
‘ತು೦ ಕಸಲಿ ಫಿಲೊಸೊಫಿ ಉಲಯ್ತಾಯ್?’ ತೊ ಚಿಡ್ಲೊ. ‘ತು೦ ಖ೦ಚಾ ಶತಮಾನಾ೦ತ್ಲಿ ಚಲಿ? ಯಾ ತು೦ ಚಲಿಚ್ಚ್ ವ್ಹಯ್ ಯಾ ನ್ಹಯ್?’
‘ಪ್ರೇತನ್ ಕರುನ್ ಕಿತ್ಯಾಕ್ ಖಚಿತ್ ಕರುನ್ ಘೆನಾ೦ಯ್?’
‘ತು೦ವೆ೦ ಅವ್ಕಾಸ್ ದಿಲ್ಯಾರ್-‘
‘ದಾದ್ಲೊ ತು೦?’
‘ತುಕಾ ನಾಕಾ ತರ್, ಹೆಲೀನಾ,’ ತೊ ಮ್ಹಣಾಲೊ. ‘ತುಕಾ ನಾಕಾ ತರ್ ನಾಕಾ. ಹಾ೦ವ್ ಕಾ೦ಯ್ rapist ನ್ಹಯ್.
‘ಹಾ೦ವ್ ಜಾಣಾ೦!’ ತೆ೦ ಮ್ಹಣಾಲೆ೦. ‘ ತು೦ rapist ನ್ಹಯ್ ಪುಣ್ ತುಜ್ಯಾ ಕೊಲೆಜಿ೦ತ್ಲೊ ಪ್ಲೇ-ಬೊಯ್. ಹಿ ರಜಾ ಜಾಲ್ಯಾ ಉಪ್ರಾ೦ತ್ ತು೦ ಪಾಟಿ೦ ವೆತೊಲೊಯ್ ಆನಿ ತುಜ್ಯಾ ಲ೦ಯ್ಗಿಕ್ ಸಾಹಸಾ೦ನಿ ಮ್ಹಜೆ ಕುಡಿಕ್ ವಿವರಿತೊಲೊಯ್. ಪುಣ್ ಮ್ಹಜಿ೦ ಸಾತ್ ಮಿನುಟಾ೦ ಮ್ಹಾಕಾ ದೀ೦ವ್ಕ್ ತು೦ ಸಕ್ಶಿ?’
ವಿಲ್ಲಿ ಆತಾ೦ ಹಾಸ್‌ಲ್ಲೊ ಹಾಸೊ ತಾಚ್ಯಾ ಸಲ್ವಣೆಚಿ೦ ಲಕ್ಷಣಾ೦ ಜಾವ್ನಾಸ್‌ಲ್ಲೊ.
‘ತುಜೆ ತಸಲಿ ಥ೦ಡ್ ಚಲಿ ಹಾ೦ವೆ೦ ಪಳೆ೦ವ್ಕ್ ನಾ!’ ತೊ ಮ್ಹಣಾಲೊ. ‘ಪುಣ್ ಹಾ೦ವ್ ಜಾಣಾ೦ – ತು೦ ಥ೦ಡ್ ನ್ಹಯ್. ಸರ್ವ್ ಕಾಮುಕತ್ಯೊ ತುಜೆಥ೦ಯ್ ಸುಪ್ತ್ ಆಸಾತ್. ಪುಣ್ ತು೦ ರಾಕ್ತಾಯ್ ಎಕಾ ದಾದ್ಲ್ಯಾಕ್ – ತುಜೊ ಪತಿ ಜಾ೦ವ್ಚ್ಯಾ ದಾದ್ಲ್ಯಾಕ್. ತು೦ ರಾಕ್ತಾಯ್ ತ್ಯಾ ಪ್ರಥಮ್ ರಾತಿಕ್, ತ್ಯಾ ಪ್ರಥಮ್ ಉಮ್ಯಾಕ್…. ಹಾ… ತ್ಯಾ ಲಿಲಿಯನ್ ಜೆನಿಸಾಕ್ ತುಕಾ ಹೆ೦ ಸರ್ವ್ ಶಿಕ೦ವ್ಕ್ ಖ೦ಯ್ಸರ್ ವೇಳ್ ಮೆಳ್ಳೊ?’
‘ತುಜೆ೦ ಉಲವ್ನ್ ಜಾಲೆ೦?’
ವಿಲ್ಲಿನ್ ಜಾಪ್ ದಿಲಿ ನಾ.
ಹೆಲೀನಾಚೊ ಪ್ರಥಮ್ ಉಬಾಳ್ ಪಾಶಾರ್ ಜಾಲ್ಲೊ.
ತೆ೦ ಜಿಕ್‌ಲ್ಲೆ೦.
‘ಆನಿ ಹಾಂವ್ ಜಿಕ್‌ಲ್ಲಿಂ!’ ಮ್ಹಳೆಂ ಹೆಲೀನಾನ್. ‘Three cheers to me!’
‘ಆನಿ ಆತಾಂ,’ ಆಪ್ಲಿಂ ಉತ್ರಾಂ ವಿಂಚುನ್ ಉಲಯ್ಲಿ ಲಿಲಿಯನ್. ‘ಕೋಣಾಕ್‌ಗಿ ಎಕ್ಲ್ಯಾಕ್, ರಿಚರ್ಡ್ ಕ್ಲೆಮೆಂಟ್ ಮ್ಹಳ್ಳ್ಯಾಕ್ ಭುಲೊನ್ ತುಂ ಹಾಂಗಾಸರ್ ಆಯ್ಲಾಂಯ್. ‘ಆಪುಣ್ ಗರ್ಬೇಸ್ತಾ ಆಸಾಂ ಮಮ್ಮಿ ಮ್ಹಣ್ ತುಂವೆಂ ಮ್ಹಾಕಾ ಸಾಂಗ್ಲ್ಯಾರಿ ಮ್ಹಾಕಾ ತಕ್ಲೆಂತ್ ಖಜ್ನೊ ಫುಟಯಿಲ್ಲೆಪರಿಂ ಜಾಂವೆಂ ನಾ. ಎಕ್ ಕುಸ್ಕುಟ್, ಅಲ್ಬೆಂ ಆನಿ ಪೊಕೊಳ್ ಕಾರಾಣ್ ಘೆವ್ನ್ ತುಂ ಹಾಂಗಾಸರ್ ಧಾಂವ್ ಮಾರುನ್ ಆಯ್ಲೆಂಯ್. ಕೊಣ್ ತೊ ಡೊ|ಫ್ರಾನ್ಸಿಸ್ ಕ್ಲೆಮೆಂಟ್, ರಿಚರ್ಡ್ ಕ್ಲೆಮೆಂಟಾಚೊ ಬಾಪಯ್ ಮ್ಹಣ್ತಾಯ್ ಆನಿ ಹ್ಯಾ ಡೊಕ್ಟರಾನ್ ಮೆಥ್ಯು ಲಿಯೊಚೆ ಪತಿಣೆಚೆಂ ಮೆಡಿಕಲ್ ಮರ್ಡರ್ ಕೆಲೆಂ ಮ್ಹಣ್ತಾಯ್/ ಆತಾಂ ರಿಚರ್ಡ್ ಕ್ಲೆಮೆಂಟ್ ಫಿಚಾರ್ ಜಾಲಾ ಆನಿ ತುಂ ಮ್ಹಜ್ಯಾ ಸರ್ಶಿಂ ಧಾಂವೊನ್ ಆಯ್ಲಾಂಯ್, ಮ್ಹಜ್ಯಾ ರಾಜಕೀಯ್ ಸ್ಥಾನಾ ಆನಿ ಪ್ರಭಾವಾವರ್ವಿಂ ಹಾಂವೆಂ ತುಜ್ಯಾ ರಿಚರ್ಡಾಕ್ ಸುಟ್ಕಾ ಯಾ ಜಾಮೀನ್ ಮೆಳಾಶಿ ಕರುಂಕ್ ತುಂ ಪ್ರಾರ್ಥನ್ ಕರ್ತೆಲೆಂಯ್, ಅಶೆಂ ಹಾಂವ್ ಸಮ್ಜುಂವ್?’
ದುದಾಕ್ ಆಶೆಂವ್ಚ್ಯಾ ಬಾಳ್ಶ್ಯಾಪರಿಂ ಹೆಲೀನಾನ್ ಲಿಲಿಯನಾಚೆರ್ ದೀಷ್ಟ್ ಘಾಲಿ.
‘ಆಪುಣ್ ತ್ಯಾ ರಿಚರ್ಡಾ ವರ್ವಿಂ ಗರ್ಬೇಸ್ತ್ ಜಾಲ್ಯಾಂ ಮ್ಹಣ್ ತುಂವೆಂ ಸಾಂಗ್ಲ್ಯಾರಿ ಹಾಂವ್ ಕಿತೆಂಚ್ ಕರಿಶಿಂ ನಾ ಕಿತ್ಯಾಕ್ ಎಕ್ ಆಯ್ಬ್ ಲಿಪವ್ನ್ ಘೆವ್ನ್ ಯೆದೊಳ್ ಪರ್ಯಾಂತ್ ಕ್ಲೆರೆನ್ಸಾನ್ ಆನಿ ಹಾಂವೆಂ ಸಾರ್‌ಲ್ಲಿ ಜಿಣಿ ಪುರೊ.’
‘ಕಿತೆಂ ಉಲಯ್ತಾಯ್ ತುಂ, ಆಯ್ಬ್ ಆಯ್ಬ್ ಅಶೆಂ ಮ್ಹಣೊನ್?’
ಲಿಲಿಯನಾನ್ ಮುಟಿ ಅಂರ್ದಿಲ್ಯೊ ಆನಿ ಹೆಲೀನಾ ಸಾಮ್ಕಾರ್ ತಿ ಉಬಿ ಜಾಲಿ. ‘ಆಯ್ಬ್, ಆಯ್ಬ್?’ ತಿ ಖಿಳಂಚ್ಲಿ. ‘ಆಯ್ಕ್, ಆಯ್ಕ್! ತುಂ ಮ್ಹಜೆಂಚ್ಚ್ ಧುವ್, ಎಕ್ಲೆಂಚ್ ಧುವ್ ಪುಣ್ ತುಂ ಸಿಲ್ವೆಸ್ತರ್ ಜೆನಿಸಾಚೆಂ biological ಧುವ್ ನ್ಹಯ್!’
ಮೌನ್, ಪರಿಪೂರ್ಣ್ ಮೌನ್.
‘ಕಿತ್ಯಾಕ್ ಮ್ಹಣ್ ವಿಚಾರ್!’ ಲಿಲಿಯನ್ ಪಾಟಿಂ ವಚುನ್ ಕ್ಲೆರೆನ್ಸಾಚ್ಯಾ ಗಳ್ಯಾಕ್ ಉಮ್ಕಾಳ್ಳಿ. ‘ಕಿತ್ಯಾಕ್ ಮ್ಹಳ್ಯಾರ್ ತುಜೊ ಬಾಪಯ್ ಎಕ್ ನಪುಸಂಕ್ ಜಾವ್ನಾಸ್‌ಲ್ಲೊ.’
‘ದೆಕುನ್ ತುಂವೆಂ ತಾಕಾ ಲಗಾಡ್ ಕಾಡ್ಲೊ?’
‘ನಾ! ಲಂಯ್ಗಿಕತೆ ಸಾಮ್ಕಾರ್ ಹಾಂವ್ ಸಲ್ವಾಲಿಂ. ಕ್ಲೆರೆನ್ಸ್ ಡೊಮಿಕ್ ಜಾವ್ನಾಸಾ ತುಜೊ ಶಾರೀರಿಕ್ ಬಾಪಯ್, biological father. ಆನಿ, ಆನಿ, ಸಿಲ್ವೆಸ್ಟರ್ ಜೆನಿಸಾಚೆಂ ಮರಣ್ ಫಕತ್ ಎಕ್ ಅವ್ಘಡ್!’
ಅವಸ್ವರ್ – 94 ►►►
