ಹೆಂ ಉಗ್ಡಾಪಣ್ ಆಯ್ಕೊನ್ ಹೆಲೀನಾಚೆಂ ಪ್ರತಿಕ್ರಿಯೆಂ ಕಸಲೆಂ ಜಾಯ್ತ್ ಮ್ಹಳ್ಳೊ ಅಂದಾಜ್ ಕೊಣಾಯ್ಕಿ ನಾತ್‌ಲ್ಲೊ, ಚಡಿತಾಯೆನ್ ಲಿಲಿಯನಾಕ್. ಪುಣ್ ಆತಾಂ ತಿಚೊ ಛಾರೊ ಪಳೆತಾನಾ, ತಿಚಿ ಆಯ್ಸ್ಕಾಂತಿಕ್ ಸೊಬಾಯ್ ದೊಡಿ ಜಾಲ್ಲೆಪರಿಂ ದಿಸ್ತಲಿ. ಹೆಲೀನಾನ್ ಕಸಲ್ಯಾಚ್ ಮುಲಾಜ್ಯಾವಿಣೆಂ ಪರತ್ ಮ್ಹಣ್ಯೆತ್ ಆಸ್‌ಲ್ಲೆಂ – ತುಂ ಕಿತ್ಲಿ ಸೊಬಿತ್ ದಿಸ್ತಾಯ್ ಮಮ್ಮಿ, ಅಶೆಂ. ಪುಣ್ ತಸಲೆಂ ಕಸಲೆಂಯಿ ಘಡ್ಲೆಂ ನಾ. ಫಕತ್ ಅಸಬಾವಿಕ್ ಮೊನೆಪಣi ಆನಿ ಹ್ಯಾ ಮೊನೆಪಣಾಕ್ ಫಾಸ್ಳಾಂವ್ಕ್ ಪ್ರೇತನ್ ಕರ್ಚೆಪರಿಂ ಉರ್ಡೊಂಚೊ ಸರ್ವಾಂಚೊ ಸ್ವಾಸ್-ಉಛಾಸ್.
ಲಿಲಿಯನಾಚ್ಯಾನ್ ಹೆಂ ಸೊಸುಂಕ್ ಜಾಲೆಂ ನಾ.
ತಿ ಉಟ್ಲಿ ಆನಿ ವಚುನ್ ತಿಣೆ ಪರ್ತ್ಯಾನ್ ಹೆಲೀನಾಚಿಂ ಭುಜಾಂ ದರ್‍ಲಿಂ ಆನಿ ತಾಕಾ ಹಾಲಯ್ಲೆಂ. ‘ತುಜ್ಯಾ ಮೊನ್ಯಾಪಣಾನ್ ತುಂ ಮ್ಹಾಕಾ ದಣ್ಸಿತಾಯ್ ಮ್ಹಣ್ ತುಜಿ ಆಶಾ ವ್ಹಯ್ ತರ್, ತೆಂ ವಿಸರ್!’ ತಿಣೆ ಹೆಲೀನಾಕ್ ಸಾಂಗ್ಲೆಂ. ‘ಹಾಂವ್ ತಿತ್ಲ್ಯಾವೆಗ್ಗಿಂ ಪಿಗಳ್ಚಿಂ ನ್ಹಯ್.’
‘ತುಂ ಪಿಗಳ್ಚಿಚ್ ನ್ಹಯ್, ಮಮ್ಮಿ!’ ಶಾಂತ್ ತಾಳ್ಯಾನ್ ಜಾಪ್ ದಿಲಿ ಹೆಲೀನಾನ್. ‘ಸಿಲ್ವೆಸ್ಟರ್ ಜೆನಿಸಾಕ್ ವಿಕ್ರಿತ್ ಕರುಂಕ್ ಸಕ್ಚಿ ತುಂ, ಬಿಲ್ಕುಲ್ ಪಿಗಳ್ಚಿ ಸ್ತ್ರೀ ನ್ಹಯ್.’
‘ವಾಪರ್ಲೊಯ್ ತುಂವೆಂ ಸಬ್ದ್ ಸ್ತ್ರೀ ಮ್ಹಳ್ಳೊ,’ ಮ್ಹಳೆಂ ಲಿಲಿಯನಾನ್ ಹೆಲೀನಾಚಿಂ ಭುಜಾಂ ಸೊಡುನ್. ‘ಕಳಿತ್ ಆಸಾ ಅರ್ಥ್ ತುಕಾ ತ್ಯಾ ಸಬ್ದಾಚೊ? ತುಕಾ ಹ್ಯಾ ಸಂಸಾರಾಂತ್ ಅಜಾದ್ ಸೊಡುನ್ ಕಿತೆಂ ಫಾಯ್ದೊ? ಸ್ತ್ರೀ ಮ್ಹಳ್ಯಾರ್ ಕಿತೆಂ ಮ್ಹಣ್ ತುಂ ಸಮ್ಜಾಲಾಂಯ್?’
‘ಹಾಂವ್ ಕಿತೆಂಚ್ ಸಮ್ಜೊಂಕ್ ನಾ!’ ಜಾಪ್ ದಿಲಿ ಹೆಲೀನಾನ್. ‘ಹಾಂವ್ ಆನಿಕಿ ಜಾಪಿಚೆ ಸೊದ್ನೆರ್ ಆಸಾಂ!’
‘ದೆಕುನ್ ಎಕಾ ದಾದ್ಲ್ಯಾಥಾವ್ನ್ ಧಾಂವೊನ್ ಆಯ್ಲಾಂಯ್!’ ತಿ ಕ್ಲೆರೆನ್ಸ್ ಡೊಮಿನಿಕಾಚ್ಯಾ ಬಗ್ಲೆಕ್ ವಚುನ್ ಬಸ್ಲಿ. ‘ತ್ಯಾ ರಿಚರ್ಡ್ ಕ್ಲೆಮೆಂಟಾಚೊ ತಿತ್ಲೊ ಹುಸ್ಕೊ ಕಿತ್ಯಾಕ್ ತುಕಾ?’
‘ತಾಚೊ ಜೀವ್ ರಿಸ್ಕೆರ್ ಆಸಾ!’
‘ತಾಚೊ ಯಾ ತುಜೊ? ಆಸಾ ಕಾಂಯ್ ತಾಚೆಂ ಫಳ್ ತುಜ್ಯಾ ಉದರಾಂತ್?’
‘ಹಾಂವ್ ಶಾರೀಕ್ ರಿತಿರ್ ಕ್ಲೆರೆನ್ಸಾಚಿ ಧುವ್ ಜಾವ್ನಾಸ್ಯೆತ್ ಪುಣ್ ಹಾಂವ್ ಆಯಿಲ್ಲಿಂ ತುಜ್ಯಾ ಉದರಾ ಥಾವ್ನ್ಂಚ್ ನ್ಹಯ್? ತರ್ ತುಜೆಂ ಸ್ಥಯ್ರ್ ಮ್ಹಾಕಾ ಕಿತ್ಯಾಕ್ ಯೆಂವ್ಕ್ ನಾ?’
‘ಹ್ಯಾ ಸವಲಾಕ್ ಜಾಪ್ ತುಂವೆಂಚ್ ಸೊದಿಜೆ ಆನಿ ತುಕಾಚ್ ತಿ ಜಾಪ್ ದೀಜೆ. ಹಾಂಗಾಸರ್ ಹಾಲಿಂಚ್ ಉಗ್ಡಾಪೆಂ ಜಾಲ್ಲೆಂ ಸತ್ ಅನಿರೀಕ್ಷಿತ್ ವ್ಹಯ್ ಪುಣ್ ಸತ್ ತೆಂ ಸತ್.’
‘ಸತಾಕ್ ಮೊಲ್ ಆಸಾ ಆನಿ ತೆಂ ಲಿಪಯಿಲ್ಲ್ಯಾನ್ ಜಾಂವ್ಚ್ಯಾ ಧಗ್ಯಾಕ್ ಭೊಗ್ಸಾಣೆಂ ನಾ!’ ಜಾಪ್ ದಿಲಿ ಹೆಲೀನಾನ್. ‘ನಾ, ರಿಚರ್ಡಾಚೆಂ ಭಿಂ ಯೆದೊಳ್ ಮ್ಹಜೆಥಂಯ್ ಪಡ್‌ಲ್ಲೆಂ ನಾ.’ ಆತಾಂ ಮಾಲಿಸಾಯ್ ಸಾಂಡುನ್ ಹೆಲೀನಾ ಉಲಯ್ಲೆಂ. ‘ಕಸಲೊಚ್ಚ್ ದೋಷ್ ಮ್ಹಜೆಥಂಯ್ ಯೆದೊಳ್ ಆಯಿಲ್ಲೊ ನಾ.’ ‘ಅಶೆಂ ಮ್ಹಣ್ತಕೂಚ್,’ ಪರ್ತ್ಯಾನ್ ಹೆಲೀನಾಕ್ ಬೊಟ್ ಜೊಕ್ಲೆಂ ಲಿಲಿಯನಾನ್. ‘ಅಶೆಂ ಮ್ಹಣ್ತಕೂಚ್ ತುಂ ಖಂಚಾಯಿ ಮಾಪಾನ್ ಮ್ಹಜ್ಯಾಕಿ ಊಂಚ್ ಜಾಲೆಂನಾಂಯ್ ಕಿತ್ಯಾಕ್ ಮ್ಹಳ್ಯಾರ್ ಎಕ್ ಸ್ತ್ರೀ ಜಾವ್ನ್ ತುಂವೆಂ ತುಜ್ಯಾ ಸ್ತ್ರೀಪಣಾಕ್, ವಿಶ್ವ್ಯಾಕ್ ನ್ಹಯ್, ಸ್ತ್ರೀಪಣಾಕ್ ಅಕ್ಮಾನ್ ಕೆಲಾಯ್.’
‘ಕಿತೆಂ, ಹಾಂವೆಂ ತುಂವೆಂ ಕೆಲ್ಲ್ಯಾಪರಿಂ ಹೆರ್ ದಾದ್ಲ್ಯಾಂಚಿ ಬಿಸ್ತ್ರಾಂ ಹುನ್ ಕರಿಜೆ ಆಸ್ಲಿಂ?’ ಹೆಲೀನಾ ಸಣ್ಸಣ್ಲೆಂ. ‘ಮ್ಹಾಕಾ ಅವ್ಕಾಸ್ ನಾತ್‌ಲ್ಲೆ ಮ್ಹಣ್ ತುಂ ಚಿಂತಾಯ್? ತುಂವೆಂ ಮ್ಹಾಕಾ ಅಜಾದಿ ದಿಲ್ಲಿಯ್ ತುಜೆಂ ಆನಿ ತಾಚೆಂ ಹೆಂ ಪ್ರಕರಣ್ ಮ್ಹಜ್ಯಾ ದೊಳ್ಯಾಂಕ್ ಪಡೊಂಕ್ ನಜೊ ಮ್ಹಳ್ಳ್ಯಾ ಖಾತಿರ್ ಮಾತ್ರ್.’
‘ತಸಲೆಂ ಪೊಳ್ಕುರ್‌ಪಣ್ ಹಾಂವ್ ಕಿತ್ಯಾಕ್ ಆದಾರುಂ?’ ವಿಚಾರ್ಲೆಂ ಲಿಲಿಯನಾನ್. ‘ಸಂಸಾರ್ ಮ್ಹಳ್ಯಾರ್ ಕಿತೆಂ ಮ್ಹಣ್ ಚಿಂತಾಯ್? ಎಕ್ ಬೊಕುಲ್ ಎಕಾ ಕೊಳೆಂದ್ರಾ ಸಾಂಗಾತಾ ಗೆಲ್ಯಾರಿ ಲೋಕ್ ಮ್ಹಣ್ತಾ, ತ್ಯಾ ಬೊಕುಲಾ ಆನಿ ಕೊಳೆಂದ್ರಾ ಮದೆಂ ಕಿತೆಂಗಿ ಆಸಾ. ತುಕಾ ಅವ್ಕಾಸ್ ನಾತ್‌ಲ್ಲೆಗಿ ಮ್ಹಣ್ ತುಂ ವಿಚಾರ್‍ತಾಯ್. ಆಸ್ಲ್ಲೆ? ಅಶೆಂ ಹಾಂವ್ ವಿಚಾರ್‍ತಾಂ. ವಿಲ್ಲಿ ಉಪ್ರಾಂತ್ ರಿಚರ್ಡಾಕ್ ಘೆವ್ನ್ ತುಂ, ವ್ಹಯ್ ತುಂ, ಹಾಂಗಾಸರ್ ಆಯಿಲ್ಲೆಂಯ್ ನ್ಹಯ್? ತವಳ್ ಅವ್ಕಾಸ್ ಆಸ್‌ಲ್ಲೊ ಯಾ ತುಂವೆಂ ತೊ ಫಾದರ್ ಜೊನಾಚಿಂ ತತ್ವಾಂ ಆಯ್ಕೊನ್ ಹೊಗ್ಡಾಯ್ಲೊಯ್?’
ಹೆಲೀನಾನ್ ದೊಳೆ ಧಾಂಪ್ಲೆ ತರಿ ಎಸ್ಟೇಟಿಚ್ಯಾ ಸುಂದರ್ ತಳ್ಯಾ ಸರ್ಶಿಂ ಪಿಕ್‌ನಿಕ್ ಕರ್ತಾನಾ ಘಡ್‌ಲ್ಲ್ಯಾ ಘಡಿತಾಚೊ ಉಡಾಸ್ ತಾಕಾ ಖೊಟಾಯ್ಲಾಗ್ಲೊ-
‘ಚಲ್ಯಾ೦,’ ಮ್ಹಣಾಲೆ೦ ಹೆಲೀನಾ, ರಿಚರ್ಡಾಚೊ ಹಾತ್ ಧರುನ್. ‘ಆತಾ೦ ಯೆತಾ ಮಹತ್ವಾಚೊ ಅವಸ್ವರ್ ಆಮ್ಚ್ಯಾ ಮಟ್ವ್ಯಾ ರಜೆಚೊ. ಹಾ೦ವೆ೦ ಪಿಕ್‌ನಿಕಾಕ್ ವಿ೦ಚಲ್ಲೊ ಜಾಗೊ ಪಯ್ಸ್ ಆಸಾ ಆನಿ ತುಕಾ ಯೆದೊಳ್‌ಚ್ ಜಾಯ್ತೆ೦ ಚಲೊ೦ಕ್ ಆನಿ ಉಬೊ೦ಕ್ ಹಾ೦ವೆ೦ ಕೆಲಾ೦ ಜಾಲ್ಲ್ಯಾನ್ ಆಮಿ ಆಮ್ಚೆ೦ ಜೀಪ್ ವರ್‍ಯಾ೦. ತು೦ಚ್ ಡ್ರಾಯ್ವ್ ಕರ್.’
ಹೆಲೀನಾನ್ ವಿ೦ಚ್‌ಲ್ಲೊ ಜಾಗೊ ಮೆಳ್ತಾನಾ ಸುರ್ಯೊ ಮಸ್ತಕಾಕ್ ಚಡ್‌ಲ್ಲೊ ಆನಿ ವಾತಾವರಣಾ೦ತ್ ಊಬ್ ಆಸ್ಲ್ಲಿ. ಹೆಲೀನಾ ಪಾತಳ್ ಮುಸ್ತಾಯ್ಕಿ ನೆಸ್‌ಲ್ಲೆ೦ ಆನಿ ಸ್ಪೆಗೆಟ್ಟಿ ಸ್ಟ್ರಾಪಾ೦ಚೆ ಆ೦ಗ್ಲೆ೦ ತಾಣೆ ಘಾಲ್ಲ್ಯಾನ್ ತಾಚಿ೦ ಭುಜಾ೦ ಉಗ್ತಿ೦ ಪಡ್‌ಲ್ಲಿ೦ ಆನಿ ತಾಚ್ಯಾ ಸ್ಥನಾ೦ಚೊ ವಯ್ಲೊ ಭಾಗ್ ಆನಿ ತಾ೦ಚೆ ಮಧ್ಲೆ೦ ಫಾಲ್ಕೆ೦ ದಿಸ್ತಾಲೆ೦.
‘ಹೆ೦ ಆಮ್ಚ್ಯಾ ಎಸ್ಟೇಟಿ೦ತ್ಲ್ಯಾ ಸಬಾರ್ ತಳ್ಯಾ೦ ಪಯ್ಕಿ ಎಕ್,’ ರಿಚರ್ಡಾನ್ ಜೀಪ್ ರಾವಯ್ತೆಚ್ ಹೆಲೀನಾನ್ ಮ್ಹಳೆ೦. ‘ಪುಣ್ ಹೆ೦ ತಳೆ೦ ಮ್ಹಜ್ಯಾ ಮೊಗಾಚೆ೦.’ ತಿ೦ ಜೀಪಾ೦ತ್ಲಿ೦ ದೆ೦ವ್ಲಿ೦ ಆನಿ ಹೆಲೀನಾನ್ ದಾಟ್ ತಣಾಚೆರ್ ಎಕ್ ಜಮ್ಕಾ೦ಡ್ ಸೊಡಯ್ಲೆ೦.
‘ಹಾ೦ವ್ ಶೀದಾ ಮುಖ್ಯಾ೦ಶಾಕ್ ಯೆತಾ೦!’ ಹೆಲೀನಾನ್ ಮ್ಹಳೆ೦ ಕಸಲಿಚ್ ಸರ್ಬಾರಾಯ್‌ನಾಸ್ತಾ೦. ‘ಬಸ್ಯಾ೦! ಫುಮಾರಾಯ್ ಸೊಸುನ್ ಮ್ಹಾಕಾ ಸವಯ್ ನಾ.’
ರಿಚರ್ಡಾನ್ ಕಿತೆ೦ಚ್ ಮ್ಹಳೆ೦ ನಾ.
‘ತುಜೆ ವಿಶಾ೦ತ್ ಹಾ೦ವ್ ಕಸಲೆ೦ಚ್ ನೆಣಾ೦ ಆನಿ ಕಸಲೆ೦ಯಿ ಜಾಣಾ೦ ಜಾ೦ವ್ಚಿ೦ ಲಕ್ಷಣಾ೦ ಮ್ಹಾಕಾ ದಿಸುನ್ ಯೆನಾ೦ತ್ ಆನಿ ತಸಲೊ ಭರ್ವಸೊಯಿ ಮ್ಹಾಕಾ ನಾ. ಪುಣ್ ತು೦ವೆ೦ ಮ್ಹಜೆ ವಿಶಾ೦ತ್ ಸರ್ವ್ ಜಾಣಾ೦ ಜಾಯ್ಜೆ.’
‘ಕಿತ್ಯಾಕ್?’
‘ಕಾರಾಣಾ೦ ಮ್ಹಜೆಲಾಗಿ೦ ನಾ೦ತ್ ಪುಣ್ ಸಾ೦ಗ್ಚಿ ಆತುರಾಯ್ ಆಸಾ. ತು೦ ಆಯ್ಕೊ೦ಕ್ ತಯಾರ್ ಆಸಾಯ್?’
‘ಹೊ ಮಹತ್ವಾಚೊ ಅವಸ್ವರ್ ಮ್ಹಣ್ ತು೦ವೆ೦ ಮ್ಹಳ್ಯಾ ಉಪ್ರಾ೦ತ್ ಮ್ಹಾಕಾ ಹೆರ್ ವಾಟ್ ಆಸ್ಚೆಪರಿ೦ ದಿಸನಾ.’
‘ತುಕಾ ಹೆರ್ ವಾಟ್ ನಾ, ವಿ೦ಚವ್ಣ್‌ಯಿ ನಾ!’ ತಾಣೆ ಖಚಿತಾಯೆನ್ ಮ್ಹಳೆ೦.
ಆನಿ ಆಪ್ಲಿ ತವಳ್ ಪರ್ಯಾ೦ತ್ಲಿ ಜಿಣಿ ತಾಣೆ ರಿಚರ್ಡಾ ಸಾಮ್ಕಾರ್ ಉಗ್ತಿ ಕೆಲಿ ಫಕತ್ – ವಿಲ್ಲಿಚೆ೦ ಎಕ್ ಪ್ರಕರಣ್ ಸೊಡ್ನ್.
‘ಆನಿ ಹೆ೦ಚ್ ಜಾವ್ನಾಸಾ, ಲಿಲಿಯನ್ ಜೆನಿಸಾಚೆ೦ ಧುವ್, ಹೆಲೀನಾ ಜೆನಿಸ್!’ ಆಪ್ಣಾಚೆರ್‌ಚ್ ಹಾತ್ ಭ೦ವ್ಡಾವ್ನ್ ತಾಣೆ೦ ಮ್ಹಳೆ೦. ‘ಆನಿ ಆತಾ೦….’ ದೆಗೆಚೊ ಎಕ್ ತೆಲ್ತೊ ಫಾತರ್ ವಿ೦ಚುನ್ ತಾಣೆ ತಳ್ಯಾ೦ತ್ ಉಡಯ್ಲೊ. ‘ರೊಸಾಳ್ ಪ್ರಕರಣ್ ಹಾ೦ವೆ೦ ನಿಮಾಣೆ೦ ದವರ್ಲಾ೦!.’
ತವಳ್, ರಿಚರ್ಡಾಚ್ಯಾ ಮುಕಮಳಾರ್ ಕಸಲಿಚ್ ಬದ್ಲವಣ್ ಜಾಲಿ ನಾ ಆನಿ ವಿಲ್ಲಿಚೆ೦ ಪ್ರಕರಣ್ ಆಯ್ಕಾಲ್ಯಾ ಉಪ್ರಾ೦ತ್‌ಯಿ ಕಸಲಿಚ್ ಬದ್ಲವಣ್ ಜಾಲಿ ನಾ.
‘ಆಜ್ ಹಾ೦ವೆ೦ ಟು ಪೀಸ್ ಬಿಕಿನಿ ಘಾಲು೦ಕ್ ನಾ!’ ತೆ೦ ಕಿ೦ದ್ರಿ ತಾಳ್ಯಾನ್ ಮ್ಹಣಾಲೆ೦. ‘ತ್ಯಾ ವಿಲ್ಲಿಚ್ಯಾ ದೊಳ್ಯಾ೦ಕ್ ದಿಸ್‌ಲ್ಲೆ೦ ತುಕಾಯಿ ದಿಸ್ತಾ ಯಾ ನಾ? ನಾ ತರ್ ಹಾ೦ವ್ ವಿವಸ್ತ್ರ್ ಜಾ೦ವ್?’ ತಾಣೆ ಆಪ್ಲ್ಯಾ ಖಾ೦ದಾ೦ ವಯ್ಲೆ ನಾಡೆ ಸುಟಯ್ಲೆ ಆನಿ ಉಬೆ೦ ಜಾಲೆ೦. ತಾಚೆ೦ ಪಾತಳ್ ಆ೦ಗ್ಲೆ೦ ಎಕ್ ಮೋವ್ ಮುದೊ ಜಾವ್ನ್ ತಾಚ್ಯಾ ಪಾ೦ಯಾ೦ ಮುಳಾ೦ತ್ ಪಡ್ಲೆ೦. ಕಾಳ್ಯಾ ವರ್ಣಾಚ್ಯಾ ಬ್ರಾ ಆನಿ ಪ್ಯಾ೦ಟಿಚೆರ್ ತೆ೦ ಉಬೆ೦ ಆಸ್ಲ್ಲೆ೦.
‘ಆತಾ೦ ತುಕಾ ಎಕ್ ಸ್ತ್ರೀ ದಿಸ್ತಾ ಯಾ ಚಲಿ?’ ತಾಣೆ ರಿಚರ್ಡಾ ಸಾಮ್ಕಾರ್ ದಿ೦ಬಿ ಘಾಲಿ. ‘ಯಾ ತುಕಾ ಉದ್ರಿಕ್ತ್ ಕರು೦ಕ್ ರಮೋನಾ ತಸಲಿ ನಾಗಿಣ್ ಜಾಯ್, ಯಾ ಕಾಮುಕತೆನ್ ತೊವಲ್ಲೆ೦ ಈವಾ ಜಾಯ್?’
ರಿಚರ್ಡಾಚಿ ದೀಷ್ಟ್ ಹೆಲೀನಾಚೆರ್ ಚರ್ಲಿ.
ತೆ೦ ಕಿ೦ದ್ರೊನ್೦ಚ್ ಗೆಲೆ೦.
‘ಹಾ೦ವೆ೦ಯಿ ವಿಚಾರ್‍ಯೆತ್ ಮಿಸ್ಟರ್ ರಿಚರ್ಡ್ ಕ್ಲೆಮೆ೦ಟ್, ಉಬೊ ರಾವೊನ್ ಆಪ್ಣಾಯಿತ್ಲ್ಯಾಕ್ ಸುಸು ಕರು೦ಕ್ ಶಿಕ್ಚೊ ಭುರ್ಗೊ ತು೦ ಯಾ ಪರಿಪಿಕಾಯೆಕ್ ಪಾವ್‌ಲ್ಲೊ ದಾದ್ಲೊ? ವಿಸ್ರಾಲೊಯ್? ಟೆರೆಸ್, ಮ್ಹಜೆ೦ ಬೆಡ್‌ರೂಮ್… ಹೆರ್ ಕಿತ್ಲೆ ಅವ್ಕಾಸ್ ತುಕಾ ಜಾಯ್?’ ಝೊ೦ಪಯ್ ಮಾರುನ್ ತಾಣೆ ರಿಚರ್ಡಾಚೊ ಹಾತ್ ಆಪ್ಲ್ಯಾ ಹಾತಾ೦ತ್ ಘೆತ್ಲೊ ಆನಿ ಆಪ್ಲ್ಯಾ ಉಜ್ವ್ಯಾ ಸ್ಥನಾಚೆರ್ ದವರ್ಲೊ.
ರಿಚರ್ಡಾಚೆ ದೊಳೆ ಹೆಲೀನಾಚ್ಯಾ ದೊಳ್ಯಾ೦ಕ್ ಖಿಳಾಲೆ. ತಾಣೆ ಹೆಲೀನಾಚ್ಯಾ ಉಜ್ವ್ಯಾ ಸ್ಥನಾವಯ್ಲೊ ಆಪ್ಲೊ ಹಾತ್ ನಿಸ್ರಾಯ್ಲೊ ಆನಿ ತಾಚ್ಯಾ ಖಾ೦ದಾರ್ ದವರ್ಲೊ. ದಿ೦ಬಿಯೆರ್ ಆಸ್ಲ್ಲ್ಯಾ ತಾಚಾ ಕುಶಿನ್ ತೊ ಭಾಗ್ವಾಲೊ ಆನಿ ತಾಚ್ಯಾ ಪೊಲ್ಯಾ೦ಚೊ ಆನಿ ಕಪಾಲಾಚೊ ಕ್ರಮಾನ್ ತಾಣೆ ಉಮೊ ಘೆತ್ಲೊ.
ಉಪ್ರಾ೦ತ್ ಜೀಪಾಚೆರ್ ಚಡೊನ್ ತೊ ಬಸ್ಲೊ.
‘ಫಾದರ್ ಜೊನಾಚಿ ಫಿಲೊಸೊಫಿ ನ್ಹಯ್!’ ಆಪ್ಲ್ಯಾ ಹಾತಾ ತಾಳ್ವೆಂನಿ ತಾಳ್ ಮಾರ್‍ಲೊ ಹೆಲೀನಾನ್. ‘ಹಾಂವ್ ಸಲ್ವಾಲ್ಲಿಂ ರಿಚರ್ಡ್ ಕ್ಲೆಮೆಮ್ಟಾ ಸಾಮ್ಕಾರ್. ಪುಣ್ ಹಿ ಸಲ್ವಣ್ ಎಕಾ ಅವ್ವಲ್ ಜಿಕ್ಣೆಚಿ. ದೆಕುನ್ಂಚ್ ಹಾಂವ್ ಹಾಂಗಾಸರ್ ಆಯ್ಲ್ಯಾಂ ಕಿತ್ಯಾಕ್. ತಾಚೆ ಭಂವ್ತಣಿ ಆಸ್ಚೆ ತಾಚೆ ಖಾತ್ಯಿರ್ ಕಿತೆಂಚ್ ಕರುಂಕ್ ಸಕಾನಾಂತ್ ಆನಿ ಸಕ್ಲ್ಯಾರ್‌ಯಿ ಕರಿಶೆನಾಂತ್. ಆತಾಂ ಪಳೆತಾನಾ ತುಮಿಂ ಸಯ್ತ್ ಕಿತೆಂಚ್ ಕರ್ಚ್ಯಾ ಸ್ಥಿತಿಯೆರ್‌ನಾಂತ್ ಮ್ಹಣ್ ಮ್ಹಾಕಾ ದಿಸ್ತಾ.’
‘ಹಾಂವೆಂ ಉಲೊವ್ಯೆತ್ ತರ್, ತುಂವೆಂ ಸಾಂಗ್‌ಲ್ಲೊ ತ್ರಾಸ್ ಜರಿತರಿ ರಿಚರ್ಡಾಕ್ ಜಾಲಾ ಯಾ ಜಾತಾ….’ ಫಾದರ್ ಜೊನಾನ್ ಮ್ಹಳೆಂ. ‘ಪೆಟ್ರೊಂತ್ಲೆ ಬಳಿಷ್ಟ್, ರಿಚರ್ಡಾಕ್ ಎಕಾ ಘಂಟ್ಯಾಚೆಂ ಜಯ್ಲ್ ಜಾಯ್ನಾಶೆಂ ಆಡಾಂವ್ಕ್ ಸಕ್ತಾತ್.’
‘ಚೂಕ್ ಚಿಂತಪ್, ಫಾದರ್ ಜೊನ್!’ ಮ್ಹಳೆಂ ಹೆಲೀನಾನ್. ‘ಹಾಂಗಾಸರ್ ಆಸುನ್ ತುಕಾ ಭಾಯ್ಲೊ ಸಂಸಾರ್ ಮ್ಹಳ್ಯಾರ್ ಕಿತೆಂ ಆನಿ ಕಸಲೊ ಮ್ಹಣ್ ಕಳಿತ್ ನಾ. ಹಾಂವ್ ತಾನೆಲಾಂ ಮ್ಹಳ್ಳ್ಯಾ ತಾಚ್ಯಾ ರುದಾನಾಕ್ ತುಮಿಂ ಭಾವಾಡ್ತಾಚೆಂ ಆಫೀಮ್ ಭರಂವ್ಚ್ಯಾಂತ್ ಸಲ್ವಲಾಯ್. ಆತಾಂ ದೆಂವ್ಚಾರಾಚೊ ನಾಚ್ ನಾಚ್‌ಚೊ ರೆವೆರೆಂಡ್ ಫ್ರೆಡ್ ಟೇಯ್ಲರ್ ಸಯ್ತ್ ಜಿಕ್ಲಾ ಮ್ಹಣ್ ಹಾಂವ್ ಪಾತ್ಯೆನಾ. ಕೋಣ್ ಜಿಕ್ಲ್ಯಾರ್‌ಯಿ ಯಾ ಸಲ್ವಲ್ಯಾರಿ ಜೆರೊಮ್ ಲಾಜ್ರಾ ಮಾತ್ರ್ ರಿಚರ್ಡಾಚೆರ್ ಅಸಲೆಂ ಹಗೆಂ ಪೋಸ್ ಕರುನ್ ಆಸಾ…. ತಾಣೆಂಚ್ ರಿಚರ್ಡಾಚ್ಯಾ ಬಾಪಾಯ್ ವಿಷಾಂತ್ ಸೊದ್ನಾಂ ಚಲಯಿಲ್ಲಿಂ.’
‘ತರ್ ತೊ ತ್ಯಾ ಡೊಕ್ಟರಾಕ್ ಸೊದುಂದಿ ಆನಿ ತಾಚ್ಯಾ ಗಳ್ಯಾಕ್ ಗಚ್ಚಿ ಘಾಲುನ್ ಮೆಥ್ಯು ಲಿಯೊ ಸಾಮ್ಕಾರ್ ಹಾಡುಂದಿ.’
‘ಹಾಂಗಾಸರ್ ರಾಜಕೀಯಾಚಿ ದೇಗ್ ಆಸಾ, ಕ್ಲೆರೆನ್ಸ್!’ ಸಬಾರ್ ವೆಳಾ ಉಪ್ರಾಂತ್ ಉಲಯ್ಲಿ ಲಿಲಿಯನ್. ‘ತಿ ದೇಗ್ ತುಕಾ ದಿಸನಾ ಯಾ ಸಮ್ಜಾನಾ. ಡೊಕ್ಟರ್ ಫ್ರಾನ್ಸಿಸ್ ಕ್ಲೆಮೆಟಾಕ್ ಉಗ್ತಡಾಂತ್ ಹಾಡ್ಚೆ ಖಾತಿರ್‌ಚ್ ಮೆಥ್ಯು, ಜೆರೊಮ್ ಸಾಂಗಾತಾಚ್ ಹೊ ಖ್ಹೆಳ್ ಖ್ಹೆಳ್ತಾತ್. ಎಕ್ ಪಾವ್ಟಿಂ ತೊ ಉಗ್ತಡಾಂತ್ ಯೇತ್ ತಾಚೆಂ ಶಿರ್ ಕಾತ್ರುನ್ ಭಾಂಗಾರಾಚ್ಯಾ ತಬ್ಕಾಂತ್ ದವರ್‍ನ್ ಮೆಥ್ಯುಚ್ಯಾ ಪಲ್ಲಂಗಾಚೆರ್ ದವರ್‍ಚಿ ಮಾಂಡ್ಣಿ ಜೆರೊಮಾಚಿ.’
ಸಾರ್‍ಕೆಂಚ್ ಉಲಯ್ಲಿಯ್ ತುಂ!’ ಮ್ಹಳೆಂ ಹೆಲೀನಾನ್.
ಲಿಲಿಯನಾಚ್ಯಾ ಗುಮಾನಾಕ್ ಗೆಲೆಂ ಕೀ ಉಗ್ತಡಾಂತ್ ಆಯಿಲ್ಲ್ಯಾ ಪ್ರಕರಣಾ ಉಪ್ರಾಂತ್ ಹೆಲೀನಾನ್ ಆವಯ್ಕ್ ಮಮ್ಮಿ ಮ್ಹಣ್ ಉಲೊ ಮಾರ್‍ಚೆಂ ರಾವಯಿಲ್ಲೆಂ.
‘ರಿಚರ್ಡಾಲಾಗಿಂ ಉಲಂವ್ಚೊ ಅವ್ಕಾಸ್ ತುಕಾ ಮೆಳ್ಳೊ ನಾ?’ ಫಾದರ್ ಜೊನಾನ್ ವಿಚಾರ್ಲೆಂ. ‘ಲಿಲಿಯನ್ ಎಕೆ ಕುಶಿನ್ ಪ್ರಕ್ಯಾತ್ ತರಿ ಪೆಟ್ರೊಂತ್ ಮೌರಿಸ್ ಅಗುಸ್ತಿನ್ ಕಾಂಯ್ ಉಣೊ ನ್ಹಯ್ ಮ್ಹಲ್ಳೆಂ ಹಾಂವೆಂ ಆಯ್ಕಾಲಾಂ?’
‘ಪ್ರಕ್ಯಾತ್ ವ್ಹಯ್ ಪುಣ್ ತುಂ ನೆಣಾಂಯ್ ತಾಚಿ ಕಂಪೆನಿ ಮೆಥ್ಯು ಲಿಯೊನ್ ರಿಚರ್ಡಾಕ್ ವಾಪರೋನ್ ಕಶಿ ಬಿತರ್ ಫಾರ್ಲಿ ಮ್ಹಳ್ಳೆಂ ತುಂ ನೆಣಾಂಯ್. ಆಯ್ಕೊಂಕ್ ಜಾಯ್ ತುಮ್ಕಾಂ, ರಿಚರ್ಡಾನ್ ಕಶೆಂ, ಆಪ್ಲ್ಯಾ ಕರ್ತುಬಾಂನಿ, ಆಪ್ಣಾ ಭಂವ್ತಿಂಚ್ ದುಸ್ಮಾನ್ ರಚ್ಲೆ ಮ್ಹಣ್-
ಆಯ್ಕಾ
ಡೆಲ್ಟಾ ಟ್ರೇಡಿ೦ಗ್ ಕೊರ್ಪೊರೇಶನಾಚೊ ಮಾವ್ರಿಸ್ ಆಗುಸ್ತಿನ್ ಮಟ್ವೊಚ್ ಆನಿ ಮೊಟೊಚ್ ಮನಿಸ್. ಗುಲೊಬಿ ಫುಗ್ರೆ ಗಾಲ್ ತಾಕಾ ಆಸ್ಲ್ಲೆ ಆನಿ ತಾ೦ತ್ಲ್ಯಾನ್ ಕೆದಳಾಯಿ ಹಾಸ್ಯ್ ಪಾಜ್ರೊನ್ ಆಸ್ತಾಲೆ೦. ತಾಚೆ ದೊಳೆ ಲ್ಹಾನ್ ಪುಣ್ ಉರುಟ್ – ನಿಸ್ತೇಜ್ ಗುಟಿಯಾ೦ಪರಿ೦. ಮಾವ್ರಿಸಾಚ್ಯಾ ಸ೦ಪೂರ್ಣ್ ವೆಕ್ತಿತ್ವಾ೦ತ್ ಆಸ್ಲ್ಲೆ೦ ವೀಕ್ ಹ್ಯಾ ದೊಳ್ಯಾ೦ನಿ ಯೆಕ್ಟಾ೦ಯ್ ಜಾಲ್ಲೆ೦. ತೊ ಹಾಸ್ಲ್ಯಾರ್ಯಿ ತಾಚೆ ದೊಳೆ ಹಾಸಾನಾತ್ಲ್ಲೆ. ಮೆಥ್ಯು ಆನಿ ರಿಚರ್ಡ್ ಭಿತರ್ ರಿಗ್ತಾನಾ ಮಾವ್ರಿಸಾನ್ ಹೆಲೀನಾಕ್ ಕಸಲ್ಯಾಗಿ ಫೊಕಾಣಾ೦ತ್ ಭುಡವ್ನ್ ದವರ್ಲ್ಲೆ೦.
‘ದಯಾ ಕರುನ್ ಮ್ಹಾಕಾ ವೋಟ್ ದಿಯಾ!’ ತೊ ಮ್ಹಣಾಲೊ ಹಾತ್ ಮುಕಾರ್ ಹಾಡುನ್. ‘ಹಾ೦ವ್ ತುಮ್ಚ್ಯಾ ಮೊಗಾಚೊ ರಾಜ್ಕಾರಣಿ ಮಾವ್ರಿಸ್ ಆಗುಸ್ತಿನ್’.
‘ಹೊ ಆಸಾ ರಿಚರ್ಡ್ ಕ್ಲೆಮೆ೦ಟ್’ ಉಪ್ರಾ೦ತ್ ತಾಣೆ ವಳಕ್ ಕರುನ್ ದಿಲಿ. ‘ಒಸಿಸ್ ಕ೦ಪೆನಿಚೆ೦ ಟೆ೦ಡರ್ ಡಿಪಾರ್ಟ್ಮೆ೦ಟ್ ತೊ ಸಾ೦ಬಾಳ್ತಾ.’
ಮಾವ್ರಿಸಾನ್ ರಿಚರ್ಡಾಚೊ ಹಾತ್ ಹಾಲಯ್ಲೊ.
‘ಮ್ಹಜಿ ದೋಸ್ತಿ ಸಾ೦ಬಾಳ್, ಭುರ್ಗ್ಯಾ!’ ತಾಚೆ೦ ಭುಜ್ ಥಾಪ್ಡುನ್ ಸಾ೦ಗಾಲಾಗ್ಲೊ ಮಾವ್ರಿಸ್, ವ್ಹಡ್ಯಾ ಹಾಸ್ಯಾ ಮದ್ಲ್ಯಾನ್. ‘ತುಕಾ ಉಪ್ಕಾರಾಕ್ ಪಡ್ತೆಲಿ.’
ರಿಚರ್ಡಾನ್ ಕಿತೆ೦ಚ್ ಮ್ಹಳೆ೦ ನಾ. ತಾಚೆ ದೊಳೆ ಹೆಲೀನಾಚೆರ್ ಆಸ್ಲ್ಲೆ ತೆ ಮೆಥ್ಯುಚ್ಯಾ ಗಮನಾಕ್ ಗೆಲೆ.
ತೊ ಮಟ್ವ್ಯಾನ್ ಹಾಸ್ಲೊ.
‘ಮ್ಹಜಿ ಚೂಕ್ ಜಾಲಿ!’ ತೊ ಮ್ಹಣಾಲೊ ರಿಚರ್ಡಾಕ್ ಮುಕಾರ್ ಲೊಟುನ್. ‘ರಿಚರ್ಡ್, ಹೆಲೀನಾ ಜೆನಿಸಾಕ್ ಮೇಳ್. ಮ್ಹಜೆ೦ ಸೆಕ್ರೆಟರಿ. ಆಜ್ಚ್ಚ್ ತೆ೦ ಕಾಮಾಕ್ ಸೆರ್ವಾಲಾ೦.’
ಹೆಲೀನಾ ಆಪ್ಲೊ ಹಾತ್ ಮುಕಾರ್ ಹಾಡುನ್ ಆಯ್ಲೆ೦.
‘ಹೆಲೀನಾ,’ ಮ್ಹಣಾಲೊ ರಿಚರ್ಡ್ ತೊ ಹಾತ್ ಧರುನ್.
‘ರಿಚರ್ಡ್,’ ಮ್ಹಣಾಲೆ೦ ಹೆಲೀನಾ, ಪರಿಚಯ್ ಜಾಲಿ ತಿ ಖಚಿತ್ ಕರುನ್.
‘ಹೆಲೀನಾ ಜೆನಿಸ್,’ ತೆ೦ ನಾ೦ವ್ ಹಾಳ್ವಾಯೆನ್ ಉಚಾರ್ನ್ ಘೊಳಯ್ಲೆ೦ ರಿಚರ್ಡಾನ್. ‘ಜೆನಿಸ್…. ಕಾ೦ಯ್ ಲಿಲಿಯನ್ ಜೆನಿಸಾಚಿ ಧುವ್?’
ಹೆರಾ೦ನಿ ಜಾಪ್ ದಿಲಿ ನಾ.
ಹೆಲೀನಾ, ಮೆಥ್ಯುಚ್ಯಾ ಮುಕಮಳಾಕ್ ಪಳೆಲಾಗ್ಲೆ೦.
‘ವ್ಹಯ್,’ ಮ್ಹಣಾಲೊ ಮೆಥ್ಯು. ತಾಚೆ ದೊಳೆ ಮಾವ್ರಿಸಾಚ್ಯಾ ದಿಷ್ಟೆಲಾಗಿ೦ ಝುಜ್ತಾಲೆ.
‘ರಾಜಕೀಯಾಕ್ ತು೦ ಪಸ೦ದ್ ಕರಿನಾ೦ಯ್ ಮ್ಹಣ್ ಹಾ೦ವೆ೦ ಆಯ್ಕಾಲಾ೦!’ ನ೦ಜಾಳಿ ತಾಳ್ಯಾನ್ ಮ್ಹಣಾಲೊ ಮಾವ್ರಿಸ್.
‘ತು೦ವೆ೦ ಸಾರ್ಕೆ೦ಚ್ ಆಯ್ಕಾಲಾ೦ಯ್!’ ವೆವ್ಹಾರಿಕ್ ತಾಳ್ಯಾನ್ ಜವಾಬ್ ದಿಲಿ ಮೆಥ್ಯುನ್. ‘ಪುಣ್ ಹಾ೦ವ್ ದಕ್ಷತೆಕ್ ಆನಿ ಚತುರಾಯೆಚ್ಯಾ ತಾಲೆ೦ತಾ೦ಕ್ ಪಾಟಿ೦ಬೊ ದಿತಾ೦. ಅಶೆ೦ ಕರ್ತಾನಾ ಥೊಡೆ ರಾಜಕೀಯ್-ಘಾಣ್ಕುರೆ ಸಯ್ತ್ ಪ್ರವೇಸ್ ಜಾಲ್ಯಾರ್ಯಿ ಹಾ೦ವ್ ಪರ್ವಾ ಕರಿನಾ.’
ಮೆಥ್ಯು ಥಾವ್ನ್ ಹಿಸಾರೊ ಮೆಳ್ತೆಚ್ ಹೆಲೀನಾ ಆಪ್ಲೊ ಶೊರ್ಟ್ಹೆ೦ಡ್ ಬುಕ್ ಆನಿ ಪೆನ್ಸಿಲ್ ಘೆವ್ನ್ ತಯಾರ್ ಜಾಲೆ೦. ಹೆ೦ ಪಳೆವ್ನ್
‘ತು೦ವೆ೦ಚ್ ಪ್ರಾರ೦ಬ್ ಕರ್ಚೆ೦ ಬರೆ೦,’ ಮ್ಹಣಾಲೊ ಮೆಥ್ಯು ರಿಚರ್ಡಾ ಕುಶಿನ್ ಎಕ್ ಅರ್ಥಾಭರಿತ್ ನದರ್ ಮಾರುನ್. ಮಾವ್ರಿಸಾನ್ ಆಪ್ಲ್ಯಾ ಕೋಟಾಚಿ ಲೇಪಲ್ಲಾ೦ ಆರಾಯ್ಲಿ೦.
‘ಡೆಲ್ಟಾ ಟ್ರೇಡಿ೦ಗ್ ಕೊರ್ಪೊರೇಶನ್ ವಿಕ್ರಾಪಾಕ್ ಆಸಾ,’ ಶೀದಾ ಮುಕ್ಯಾ೦ಶಾಕ್ ಆಯ್ಲೊ ಮಾವ್ರಿಸ್. ‘ಹಾ೦ವ್ ರಾಜ್ಕಾರಣಿ ಆನಿ ಮ್ಹಾಕಾ ವೆವ್ಹಾರಾ೦ತ್ ಕಸಲಿಚ್ ಖರಿ ಅಬಿರೂಚ್ ನಾ. ಯೆದೊಳ್ ಪರ್ಯಾ೦ತ್ ಡೆಲ್ಟಾ ಚಲೊನ್ ಯಾ ಪೋಟ್ ವೊಡುನ್ ಆಯ್ಲಾ೦ ತರ್ ಗಾದಿಯೆರ್ ಆಸ್ಲ್ಲ್ಯಾ ಹಾ೦ವೆ೦ ಪ್ರಬಾವ್ ದಾ೦ಬ್ಲ್ಲ್ಯಾನ್. ಆತಾ೦ ಯೆ೦ವ್ಚೆ೦ ಜೆರಾಲ್ ಎಲಿಸಾ೦ವ್ ಮಹತ್ವಾಚೆ೦. ಹ್ಯಾಚ್ ಪೆಟ್ರೊಸ್ಟೇಟಾ೦ತ್ ಮ್ಹಾಕಾ ಟಿಕೆಟ್ ಮೆಳ್ಳ್ಯಾ. ಎಲಿಸಾ೦ವಾ೦ಚೆ ಗುಮಟ್ ವ್ಹಾಜಯ್ತಾನಾ ಎದ್ರಿ ಪಾಡ್ತಿ ಮ್ಹಜೆ ಕಾಳೆ ದ೦ದೆ ಭಾಯ್ರ್ ಹಾಡು೦ಕ್ ಪಳೆತೆಲಿ. ಹೆ೦ ಸರ್ವ್ ಮ್ಹಾಕಾ ಸದಾ೦ಚೆ೦. ಹ್ಯಾ ಕಾಳ್ಯಾ ದ೦ದ್ಯಾ೦ನಿ ಡೆಲ್ಟಾಚೆ೦ ನಾ೦ವ್ಯಿ ಆಸಾ. ಡೆಲ್ಟಾಕ್ ಮೆಳ್ಲ್ಲಿ೦ ಥೊಡಿ೦ ಕೊ೦ಟ್ರೆಕ್ಟಾ೦, ಟೆ೦ಡರ್ ಇತ್ಯಾದಿ…. ತುಮಿ ಜಾಣಾ೦ತ್.’
ಹೆಲೀನಾಚಿ ಪೆನ್ಸಿಲ್ ಶೊರ್ಟ್ಹೆ೦ಡ್ ಬುಕಾಚೆರ್ ಉಬ್ತಾಲಿ.
‘ಹೆ ಹಾ೦ವೆ೦ ಚುರ್ಚುರೆ ಉಚಾರ್ಚೆ ನ್ಹಯ್. ಹ್ಯಾ ಕುಮ್ಸಾರಾವರ್ವಿ೦ ರಾಜಕೀಯಾ೦ತ್ ಆಸ್ಚಿ ಘಾಣ್ ಉಬೊನ್ ವೆತೆಲಿ ಮ್ಹಣ್ ಹಾ೦ವ್ ಮ್ಹಣಾನಾ. ಮ್ಹಜ್ಯೊ ರಿತಿ ಬದ್ಲು೦ಕ್ ಅಸಾದ್ಯ್. ಜಾಣಾರ್ಯಾ೦ಚಿ ಸಾ೦ಗ್ಣಿ ಆಸಾ: ಎಕಾ ದೇಶಾಚ್ಯಾ ರಾಜಕೀಯಾಕ್ ದುರ್ಸೊನ್ ಫಾಯ್ದೊ ನಾ. ತ್ಯಾ ತ್ಯಾ ಗಾ೦ವ್ಚ್ಯಾ ಲೊಕಾಕ್ ಫಾವೊ ಜಾಲ್ಲೊ ಸರ್ಕಾರ್ಚ್ ಚುನಾಯಿತ್ ಜಾತಲೊ ಶಿವಾಯ್ ಹೆರ್ ನ್ಹಯ್. ತರ್ಯಿ ಮ್ಹಜ್ಯಾ ಮ್ಹಜ್ಯಾ ರಾಜಕೀಯ್ ವರ್ವಿ೦ ಡೆಲ್ಟಾ ಗ್ರೇಸ್ತ್ ಜಾಲೆ೦ ಮ್ಹಣ್ ಲೊಕಾನ್ ಮ್ಹಣ್ಚೆ೦ ನಾಕಾ. ಮ್ಹಜ್ಯಾ ರಾಜಕೀಯಾದ್ವಾರಿ೦ ಹಾ೦ವ್೦ಚ್ ಗ್ರೇಸ್ತ್ ಜಾಲೊ೦ ಮ್ಹಳ್ಯಾರ್ ಚಡ್ ಸೊಬ್ತಾ. ತೆ ಖಾತಿರ್ ಡೆಲ್ಟಾ ವಿಕ್ರಾಪಾಕ್ ಆಸಾ. ದುಸ್ರೆ೦ ಕಾರಾಣ್ ಜಾವ್ನಾಸಾ ದುಡು ಜೊ ಮ್ಹಾಕಾ ಹ್ಯಾ ಎಲಿಸಾ೦ವಾ ಖಾತಿರ್ ಎಕ್ದಮ್ ಗರ್ಜೆಚೊ. ಒಸಿಸ್ ಕ೦ಪೆನಿಕ್ ಡೆಲ್ಟಾ ಟ್ರೇಡಿ೦ಗಾಚ್ಯಾ ದೋನ್ ಪ್ರಮುಕ್ ಎಜೆನ್ಸಿ೦ನಿ ಆತುರಾಯ್ ಆಸಾ ಮ್ಹಣ್ ಹಾ೦ವ್ ಜಾಣಾ೦ ಜಾಲಾ೦. ತರ್, ಸಗ್ಳ್ಯಾ ಡೆಲ್ಟಾ೦ತ್ ತುಮ್ಕಾ೦ ಆತುರಾಯ್ ಕಿತ್ಯಾಕ್ ಆಸು೦ಕ್ ನಜೊ ಮ್ಹಳ್ಳೆ೦ ಸವಾಲ್ ಘೆವ್ನ್ ಹಾ೦ವ್ ಹಾ೦ಗಾಸರ್ ಆಯ್ಲಾ೦!’
‘ಹಾ೦ಗಾಸರ್ಚ್ ಕಿತ್ಯಾಕ್?’ ಮೆಥ್ಯುನ್ ಸವಾಲ್ ಉಡಯ್ಲೆ೦.
ಮಾವ್ರಿಸಾನ್ ಎಕ್ ಲಾ೦ಬ್ ಉಸ್ವಾಸ್ ಸೊಡ್ಲೊ ಆನಿ ಆಪ್ಲೆ ದೊನ್ಯಿ ಕೊ೦ಪೊರ್ ಕೊನ್ಪರೆನ್ಸ್ ಹೊಲಾಚ್ಯಾ ಟೇಬಲಾರ್ ತೆ೦ಕ್ಲೆ.
‘ತುಕಾ ಹಾ೦ವ್ ವಳ್ಕಾತಾ೦, ಮೆಥ್ಯು!’ ತೊ ಮ್ಹಣಾಲೊ ಆಪ್ಲೆ೦ ಎಕ್ ಬೊಟ್ ತಾಕಾ ಜೊಕುನ್. ‘ತುಜ್ಯಾ ವಯ್ವಾಟಿ ಜಿನೊಸಾಕ್ಯಿ ಹಾ೦ವ್ ವಳ್ಕಾತಾ೦. ತುಜ್ಯಾ ಹರ್ಯೆಕಾ ಕರ್ತುಬಾ೦ತ್ ತತ್ವ್ ಆಸಾ. ತುಜೆ ತಸಲೆ ಮನಿಸ್ ಆಮ್ಕಾ೦ ರಾಜಕಾರಿಣಿ೦ಕ್ ಕೊಡು ಒಕತ್. ತರಿ ಪುಣ್ ಆಮಿ ತುಮ್ಚೆ ತಸಲ್ಯಾ೦ ಥಾವ್ನ್ ಪಯ್ಸ್ ರಾ೦ವ್ಚ್ಯಾ ಫುಡೆ೦ಚ್ ತುಮಿ ಆಮ್ಚೆಥಾವ್ನ್ ಪಯ್ಸ್ ರಾವ್ತಾತ್. ತುಕುನ್ ಪಳೆ – ತುಜೆ ತಸಲ್ಯಾ ಎಕಾ ವಯ್ವಾಟಿಕ್ ಹಾ೦ವ್ ಡೆಲ್ಟಾ ವಿಕಿನ್ ಜಾಲ್ಯಾರ್ ಪಬ್ಲಿಕ್ ಕಿತೆ೦ ಸಮ್ಜಾತೆಲೆ? ಹು೦! ಹ್ಯಾ ಫಟಿ೦ಗ್ ಮಾವ್ರಿಸಾನ್ ಆಕೇರಿಕ್ ತರಿ ಎಕ್ ಬರೆ೦ ಕಾಮ್ ಕೆಲೆ೦. ಡೆಲ್ಟಾ ಟ್ರೇಡಿ೦ಗ್ ಎಕಾ ಶಾಣ್ಯಾಚ್ಯಾ ಹಾತಾ೦ನಿ ದಿಲೆ೦. ಹು೦?’
ಮೆಥ್ಯುನ್ ಆನಿ ರಿಚರ್ಡಾನ್ ದಿಶ್ಟಿ ಮೆಳಯ್ಲ್ಯೊ. ಮೆಥ್ಯುನ್, ರಿಚರ್ಡಾಕ್ ಗುಮಾನಿತ್ ಹಿಶಾರೊ ದಿತೆಚ್-
‘ಬೆಲೆನ್ಸ್ ಶೀಟ್ ಹಾಡ್ಲ್ಯಾಯ್?’ ರಿಚರ್ಡಾನ್ ಪಯ್ಲೆ ಪಾವ್ಟಿ೦ ತಾಳೊ ಕಾಡ್ಲೊ. ಮೆಥ್ಯು, ಹೆರಾ೦ ದೊಗಾ೦ಚೆ ಪ್ರತಿಕ್ರಿಯೆ೦ ಪಳೆತಾಲೊ.
ಮಾವ್ರಿಸಾಚೆ೦ ಮುಕಮಳ್ ಖಿಣ್ಭರ್ ಸಾವ್ಳೆಲೆ೦. ಹೆಲೀನಾಚಿ ಪೆನ್ಸಿಲ್ ಖಿಣ್ಭರ್ ರಾವ್ಲಿ. ಉಪ್ರಾ೦ತ್ ತಿ೦ ಸ್ಥಿಮಿತಾಕ್ ಆಯ್ಲಿ೦. ರಿಚರ್ಡಾಚ್ಯಾ ತಾಳ್ಯಾ೦ತ್ ಮೆಥ್ಯುನ್ ಅ೦ದಾಜ್ ಕೆಲ್ಲೆ ತಸಲೆ೦ ಆಯಾಸ್ಕಾ೦ತ್ ಆಸ್ಲ್ಲೆ೦.
ಮಾವ್ರಿಸಾನ್ ಆಪ್ಲಿ ಬ್ರೀಫ್ ಕೇಜ್ ಉಗ್ತಿ ಕೆಲಿ ಆನಿ ತಾ೦ತ್ಲೆ೦ ಎಕ್ ಪಾತಳ್ ಫಾಯ್ಲ್ ಕಾಡುನ್ ರಿಚರ್ಡಾಕ್ ದಿಲೆ೦. ಪಾ೦ಚ್ ಮಿನುಟಾ೦ ಉಪ್ರಾ೦ತ್ ರಿಚರ್ಡಾನ್ ಫಾಯ್ಲ್ ದಾ೦ಪ್ಲೆ೦ ಆನಿ ಮೆಥ್ಯುಕ್ ಪಾಶಾರ್ ಕೆಲೆ೦. ಮೆಥ್ಯುನ್ಯಿ ಪಾ೦ಚ್ ಮಿನುಟಾ೦ ಕಾಡ್ಲಿ೦. ತ್ಯಾ ಆವ್ದೆ ಉಪ್ರಾ೦ತ್ ತೊ ಮಾವ್ರಿಸಾಚ್ಯಾ ಮುಕಮಳಾಕ್ ಪಳೆಲಾಗ್ಲೊ.
‘ಕಿತೆ೦ ಮ್ಹಣ್ತಾತ್ ತುಮಿ ಮಾನೇಸ್ತ್?’ ಮಾವ್ರಿಸಾನ್ ವಿಚಾರ್ಲೆ೦ ವಿರರಾಯೆಚಿ೦ ಖುಣಾ೦ ವ್ಯೆಕ್ತ್ ಕರುನ್.
‘ದೇಡ್ ಮಿಲಿಯಾ!’ ಮ್ಹಣಾಲೊ ಮೆಥ್ಯು ಆಪ್ಲ್ಯಾ ಘಣ್ಗಣೀತ್ ತಾಳ್ಯಾನ್. ‘ದೇಡ್ ಮಿಲಿಯಾ ನಗ್ದೆನ್. ತು೦ ತಯಾರ್ ಆಸಾಯ್?’
‘ಹಾ೦ವ್ ಹಾ೦ಗಾಸರ್ ದೂದ್ ವಿಕು೦ಕ್ ಯೆ೦ವ್ಕ್ ನಾ, ಮೆಥ್ಯು!’
‘ಹಾ೦ವ್ ಜಾಣಾ೦,’ ತಕ್ಷಣ್ ಜಾಪ್ ದಿಲಿ ಮೆಥ್ಯುನ್. ‘ಪುಣ್ ಆಮ್ಕಾ೦ ಜಾಯ್ ಆಸ್ಲ್ಲೆ೦ ಫಕತ್ ದೂದ್ ಪುಣ್ ತು೦ ಗಾಯ್ ಘೆವ್ನ್ ಆಯ್ಲೊಯ್. ಗಾಯೆಚೆ೦ ಮೋಲ್ ಆಮ್ಚೆಲಾಗಿ೦ ವಿಚಾರ್ಲೆ೦ಯ್. ತು೦ ವಯ್ವಾಟ್ ಕಿತೆ೦ ಜಾಣಾ೦ಯ್ ಮಾವ್ರಿಸ್?’
‘ಖಾಸ್ಕಿ ಅಭಿಪ್ರಾಯೆ೦ಚಿ ಗರ್ಜ್ ಮ್ಹಾಕಾ ದಿಸಾನಾ, ಮೆಥ್ಯು.’
‘ಬರೆ೦ ತರ್,’ ಮೆಥ್ಯುನ್ ಭುಜಾ೦ ಉಡಯ್ಲಿ೦. ‘ದೇಡ್ ಮಿಲಿಯಾ. ಘೆ ಯಾ ಸೊಡ್!’
ಥೊಡ್ಯಾ ವೆಳಾಚೆ೦ ಮೌನ್.
‘ಹಾ೦ಗಾಸರ್ ಯೆ೦ವ್ಚ್ಯಾ ಫುಡೆ೦ ಹಾ೦ವ್ ಮ್ಹಜ್ಯಾ ಒಡಿಟರ್ಸಾ೦ ಲಾಗಿ೦ ಉಲವ್ನ್ ಆಯಿಲ್ಲೊ೦. ತಾ೦ಣಿ…’
‘ಒಡಿಟರ್ಸ್ ಹಕೀಕತ್ ಬದ್ಲು೦ಕ್ ಸಕಾನಾ೦ತ್, ಮಿ|ಮಾವ್ರಿಸ್ ಆಗುಸ್ತಿನ್!’ ಮದೆ೦ಚ್ ಉಲಯ್ಲೊ ರಿಚರ್ಡ್.
‘ತುಕಾ ಫಕತ್ ಜಾಯ್ ಸುಟ್ಕಾ ಡೆಲ್ಟಾ ಟ್ರೇಡಿ೦ಗಾಥಾವ್ನ್.’ ಮೆಥ್ಯುನ್ ಉಲವ್ಣ್ಯಾಚಿ ಧಾರ್ ಹಾತಿ೦ ಘೆತ್ಲಿ. ‘ಎಲಿಸಾ೦ವ್ ಲಾಗಿ೦ ಯೆತಾನಾ ಕೊಣಾಕ್ಚ್ ಕಿತೆ೦ಚ್ ದೆವೆ೦ ಆಸೊ೦ಕ್ ನಜೊ ಮ್ಹಳ್ಳಿ ತುಜಿ ಆಶಾ. ಹಾಚೆ೦ ಮೋಲ್ ಫಕತ್ ದೇಡ್ ಮಿಲಿಯಾ. ಘೆ ಯಾ ಸೊಡ್!’
ಮಾವ್ರಿಸ್ ಹಾಸ್ಲೊ.
‘ತುಮಿ ಜಾವ್ನಾಸಾತ್ ಗೀದ್!’ ತೊ ಮ್ಹಣಾಲೊ, ಆಪ್ಲ್ಯಾ ಉರುಟ್ ದೊಳ್ಯಾ೦ಕ್ ಹಳ್ತಾಚೆ೦ ಧಾ೦ಕಣ್ ಮಾರುನ್. ‘ಹಾ೦ವೆ೦ ಹಾ೦ಗಾಸರ್ ಯೆ೦ವ್ಚ್ಯಾ ಫುಡೆ೦ ಯಾ ರಿಚರ್ಡಾನ್ ಎಕ್ಸ್ಪೋರ್ಟ್ ಯುನಿಯನಾಕ್ ಆನಿ ಡೈಮ೦ಡ್ಸ್ ಇ೦ಟರ್ನ್ಯಾಶನಲಾಕ್ ಪತ್ರಾ೦ ಲಿಕ್ಚ್ಯಾ ಫುಡೆ೦ಚ್ ಡೆಲ್ಟಾಚಿ ಅಸ್ಲಿ, ಆರ್ಥಿಕ್ ಸ್ಥಿತಿ ತುಮ್ಕಾ೦ ಕಳಿತ್ ಆಸ್ಲ್ಲಿ. ದೋನ್ ಖಿಣಾ೦ ಭಿತರ್ ಬೆಲೆನ್್ುಶೀಟಿ ವಯ್ಲೆ ಅ೦ಕ್ಡೆ-ಸಾ೦ಕ್ಡೆ ಜಿಕುನ್ ಧರು೦ಕ್ ಅಸಾದ್ಯ್!’
ರಿಚರ್ಡ್ ಹಳ್ತಾಚೊ ಆವಾಜ್ ಕರುನ್ ಹಾಸ್ಲೊ.
‘ವಯ್ವಾಟಾಚ್ಯಾ ಸ೦ಸಾರಾ೦ತ್, ಮಿ|ಆಗುಸ್ತಿನ್,’ ತೊ ಮ್ಹಣಾಲೊ ಆಪ್ಲೊ ತಾಳೊ ಎಕಾಚಾಣೆ ಧಾರೆಚೊ ಕರುನ್. ‘Industrial Espionage ಮ್ಹಳ್ಳೆ ದೋನ್ ಸಬ್ದ್ ಆಸಾತ್. ತುಜೆ ಕಾಳೆ ತಿಬೆ ಧು೦ವ್ಚೆ೦ ಕಾಮ್ ತುಜೆ೦ ಆನಿ ಡೆಲ್ಟಾಕ್ ಒಸಿಸಾ೦ತ್ ಮಿಸ್ಳಾ೦ವ್ಚೆ೦ ಕಾಮ್ ಆಮ್ಚೆ೦. ಎಲಿಸಾ೦ವಾಕ್ ಜಾಯ್ ಜಾಲ್ಲೆ೦ ಧನ್ ಆನಿ ಟಿಕೆಟಿಕ್ ಜಾಯ್ ತಿತ್ಲಿ ಸಾಫ್-ಸುಫಾಯ್ ತುಜೆ ಸಾಮ್ಕಾರ್ ಆಸಾ!’
ಮಾವ್ರಿಸ್ ಉಬೊ ಜಾಲೊ.
‘ತುಜೆ ಖೊಲೆ ತು೦ ಬರೆ ಕರುನ್ ಖೆಳ್ಳಾಯ್, ಮೆಥ್ಯು!’ ಮ್ಹಣಾಲೊ ಮಾವ್ರಿಸ್ ಆಪ್ಲೊ ಹಾತ್ ಮುಕಾರ್ ಹಾಡುನ್. ಮೆಥ್ಯುನ್ ತೊ ಧರ್ಲೊ. ‘ಪಾವನಾತ್ಲ್ಲ್ಯಾಕ್ ಬರೆ೦ಚ್ ಚಿಟ್ಟ್ಯಾ ವಾಗಾಚೆ೦ ಪೀಲ್ ತು೦ವೆ೦ ಪೊಸುನ್ ದವರ್ಲಾ೦ಯ್.’ ರಿಚರ್ಡಾಕ್ ಬೋಟ್ ಜೊಕುನ್ ತೊ ಮ್ಹಣಾಲೊ. ‘ಚತ್ರಾಯ್! ರಗ್ತಾಚಿ ರೂಚ್ ತಾಕಾ ಲಾಗಯ್ನಾಕಾ. ಆನಿ ತು೦ ಮೊಗಾಚ್ಯಾ ಮಿಸ್ಸ್ ಜೆನಿಸ್ – ತುಜಿ ಆನಿ ಮ್ಹಜಿ ಭೆಟ್ ಜರೂರ್ ಜಾತೆಲಿ – ಫಕತ್ ಹ್ಯಾ ವಯ್ವಾಟಾಕ್ ಲಾಗೊನ್೦ಚ್ ನ್ಹಯ್ – ತು೦ ಜಾಣಾ೦ಯ್, ತುಜ್ಯಾ ಮೊಗಾಚಿ ಮಾಮ್ಮಿಯಿ ಹ್ಯಾಚ್ ಸ್ಟೇಟಾ೦ತ್ ಇಲೆಕ್ಷನಾಕ್ ರಾವ್ತೆಲಿ – ಮ್ಹಜಿ ಪ್ರತಿಸ್ಪರ್ಧಿ ಜಾವ್ನ್.’
‘ಆನಿ ಅಸಲ್ಯಾಕ್ ಬಲಿ ಜಾಲ್ಲೊ ಮೌರಿಸ್, ಮ್ಹಜ್ಯಾ ರಿಚರ್ಡಾಕ್ ಸಾಲ್ವಾರ್ ಕರುಂಕ್ ಎಕ್ ಬೋಟ್ ಉಕ್ಲಿತ್ ಮ್ಹಣ್ ಚಿಂತಾತ್ ತುಮಿ?’
‘ತರ್ ಆತಾಂ ಕಿತೆಂ?’ ಕ್ಲೆರೆನ್ಸಾನ್ ವಿಚಾರ್ಲೆಂ. ‘ತುಜೊ ರಿಚರ್ಡ್?’ ತೊ ಹಾಸ್ಲೊ.
ಹೆಲೀನಾ ಆಪ್ಲ್ಯಾ ಸಗ್ಳ್ಯಾ ದಿಗಾಯೆಕ್ ಉಬೆಂ ಜಾಲೆಂ. ‘ಕಿತೆಂ, ಮ್ಹಜೊ ಶಾರೀರಿಕ್ ಬಾಪಯ್ ಜಾವ್ನ್ ಹೆಂ ಸವಾಲ್ ತುಂ ಕರ್ತಾಯ್ ತರ್, ಥಂಡ್ ಬಸ್. ತುಕಾ ಕಸಲೆಂಚ್ ಹಕ್ಕ್ ನಾ ಹೆಂ ಸವಾಲ್ ವಿಚಾರುಂಕ್. ತುಮ್ಚೆಲಾಗಿಂ ಕಸಲೆಚ್ ಎಕ್ಕೆನಾಂತ್, ತುರುಫಾಂನಾಂತ್. ಹೆಂ ಪ್ರಕರಣ್ ಹಾಂವ್ ಮೌರಿಸಾಕ್ ಕಳಯ್ನ್ ತರ್ ತುಂವೆಂ ತುಜ್ಯಾ election campaign-ಕ್ ಆತಾಂಚ್ ಆದೇವ್ಸ್ ಮಾಗಾಜೆ ಪಡ್ತೆಲೆಂ ಆನಿ ಮೌರಿಸ್, ಹಿ ಮಾಹೆತ್ ಮೆಳೊಂಕ್ ಆಪ್ಲೊ ಉಜ್ವೊ ಹಾತ್ ದೀಂವ್ಕ್‌ಯಿ ಪಾಟಿಂ ಸರ್ಚೊ ನಾ.’
‘ಪುಣ್ ತುಂ ತಶೆಂ ಕರಿಶೆಂನಾಂಯ್!’ ಆತಾಂ ಲಿಯನ್‌ಯಿ ಉಬಿ ಜಾಲಿ. ‘ಚಡ್ ಮ್ಹಳ್ಯಾರ್ ತುಂ ತ್ಯಾ ಪಿಸಾಂಟ್ ಟೇಯ್ಲರಾಲಾಗಿಂ ವೆಶಿ. ಪುಣ್ ತುಂ ಮ್ಹಾಕಾ, ತುಜ್ಯಾ ಶಾರೀಕ್ ಆವಯ್ಕ್ ಧಗೊ ಕರಿಶೆಂನಾಂಯ್.’
‘ಹಾಂವ್ ಕಿತೆಂ ಕರಿನ್ ಯಾ ಕರಿನಾಸ್ತಾಂ ರಾವಾನ್ ಮ್ಹಳ್ಳೊ ಅಂದಾಜ್ ತುಮ್ಕಾಂ ನಾ. ಮಾಂದ್ಲೆಂ, ಮ್ಹಜೊ ಬಾಪಯ್, ಲಗ್ನಾಂತ್ ತುಜೊ ಜಾಲ್ಲೊ ಪತಿ ಸಿಲ್ವೆಸ್ಟರ್ ಜೆನಿಸ್ ಎಕ್ ನಪುಸಂಕ್. ತುಜ್ಯಾನ್ ತುಕಾಚ್ ಖಾಬೂಂತ್ ಧರುಂಕ್ ಜಾಲೆಂ ನಾ, ತುಜಿ ಕೂಡ್ ಉಚಾಂಬಳಾಯೆಚ್ಯಾ ಪರಿಧಿಥಾವ್ನ್ ಭಾಯ್ರ್ ಆಯ್ಲಿ. ಸಮ್ಜಾತಾ ಮ್ಹಾಕಾ – ತಿತ್ಲೆಂ ಶಿಕಪ್ ತುಂವೆಂ ಮ್ಹಾಕಾ ದಿಲಾಂಯ್. ಕರ್‍ನಿ ಘಡ್ಲ್ಯಾ ಆನಿ ಪಾತಳಾಯೆನ್ ಸಗ್ಳ್ಯಾ ಸಂಸಾರಾಕ್ ಕಳಿತ್ ಆಸಾ, ಮ್ಹಾಕಾ ಎಕ್ಲ್ಯಾಕ್ ಸೊಡುನ್. ಆತಾಂ ಆಮಾಮ್ಚೆ ಹಾತ್ ಆಮಾಮ್ಚ್ಯಾ ಮಾತ್ಯಾರ್. ತುಮ್ಕಾಂ ಕಿತೆಂ ಜಾಯ್ ಮ್ಹಜೆಥಾವ್ನ್? ಭೊಗ್ಸಾಣೆ? ಧಾರಾಳ್ ಮಾಪಾನ್ ಘೆಯಾತ್. ಹಾಂವೆಂ ದಿತಾಂ ಪುಣ್ ತುಮ್ಚೆಥಾವ್ನ್ ಕಸಲೆಂಚ್ ಘೆನಾ. ಫಾದರ್ ಜೊನ್, ತುಜೆಂ ಆಫೀಮ್ is not working. He still says “I THIRST. ಆತಾಂ ಮ್ಹಜಿ ವಾಟ್ ಮ್ಹಾಕಾ, ತುಮ್ಚಿ ತುಮ್ಕಾಂ. ಆದೇವ್ಸ್!’
ಅವಸ್ವರ್ – 95 ►►►
