ಹ್ಯಾ ಸಾಂಜೆರ್ ಕಿತೆಂಗಿ ಜಮೊ ಕುಡಿಂತ್ಲ್ಯಾ ಹರ್ ಶಿರೆಚೆರ್ ಚಡೊನ್ ಉಬೊ ಜಾಲ್ಲೆಪರಿಂ ದಿಸ್ತಾಲೊ. ಎಕ್ ಕಾರಾಣ್ ಆಸ್ಯೆತ್ ಜಮಾತ್ ಸಾತ್ ದಿಸಾಂಕ್ ಪಾಟಿಂ ಘಾಲ್ಲಿ ಪುಣ್ ದುಸ್ರಿ ಜಾವ್ನಾಸ್‌ಲ್ಲಿ ಕಠಿಣ್ ಉಬ್ದೆಸಾಂಚಿ, ಎಕ್ ಕಿಟಾಳ್ ಅಸಲ್ಯೆ ಪರಿಗತಿಕ್ ವಿಸ್ಪೋಟ್ ಕರುಂಕ್ ಸಕ್ತೆಲೆಂ ಮ್ಹಣ್ ಸರ್ವಾಂಕ್ ನ್ಹಯ್ ತರ್ ರೆವರೆಂಡ್ ಫ್ರೆಡ್ ಟೇಯ್ಲರಾಕ್ ಕಳಿತ್ ಆಸ್‌ಲ್ಲೆಂ. ಹೆಂ ಕಳಿತ್ ಜಾಂವ್ಚೆ ವರೇಗ್ ತಾಣೆ ಪೆಟ್ರೊಂತ್ ರಾವೊಂಕ್ ನಜೊ ಆಸ್‌ಲ್ಲೆಂ, ಜಶೆಂ ಖಂಚಾಯಿ ಎಕಾ ದೇಶಾಚ್ಯಾ ಖಂಚಾಯಿ ಎಕ್ ಪ್ರಾಂತ್ಯಾಂತ್ ಆಪ್ಲ್ಯೊ ಜಮಾತಿ ಚಲವ್ನ್, ಆಪ್ಲಿಂ ‘ಅಜಾಪಾಂ’ ಕರುನ್ ಟೇಯ್ಲರ್ ಚಿರ್ಪುಟ್ ಮಾರ್ಚೆತಿತ್ಲೆ ಆವ್ದೆಕ್ ಪುಣಿ ರಾವಾನಾತ್‌ಲ್ಲೊ. ಹೆಂ ಸಿಸೆರೊಕ್ ಕಳಿತ್ ಆಸ್‌ಲ್ಲೆಂ. ಪುಣ್ ಪೆಟ್ರೊಂತ್ ಕಿತ್ಯಾಕ್ ಅಸಲಿ ಪರಿಗತ್ ಟೇಯ್ಲರಾನ್ ಉಬಿ ಕೆಲ್ಲಿ? ಹೆಂ ವಿಚಾರುಂಕ್ ಸಿಸೆರೊಕ್ ಜಾಂವ್ ಯಾ ಹೆರಾಂಕ್ ಜಾಂವ್ (ಜಾಣಿಂ ಪೆಟ್ರೊಂತ್ಲ್ಯಾ ಜಮಾತಿಂನಿ ಟೇಯ್ಲರಾಕ್ ವ್ಯಕ್ತ್/ಅವೆಕ್ತ್ ರಿತಿಂನಿ ಪಾಟಿಂಬೊ ದಿಲ್ಲೊ) ಅವ್ಕಾಸ್ ಟೇಯ್ಲರಾನ್ ದಿಲ್ಲೊಲೊ ನಾ. ದಿಲ್ಲೊ ತರಿ ತಾಂಕಾಂ ಹಿ ಜಾಪ್ ಮೆಳ್ತಿ – ಹಾಂವ್ ಪೆಟ್ರೊಕ್ ಆಯಿಲ್ಲೊ ಮಕ್ಸದ್ ಪುರ್‍ಣ್ ಜಾಂವ್ಕ್ ನಾ, ಮ್ಹಜ್ಯಾಚ್ ಜಿಣಿಯೆಂತ್ಲೆಂ ಮಹತ್ವಾಚೆಂ ಮಿಸಾಂವ್ ಪೂರ್‍ಣ್ ಜಾಲೆಂ ನಾ, ಮ್ಹಾಕಾ ಮ್ಹಜೆಸ್ತಕಿಂ ಕಾಮ್ ಕರುಂಕ್ ಸೊಡಾ.
ಪುಣ್ ಹೊ ಹುನ್ನರ್ ಸಿಸೇರೊಕ್ ಕಳಿತ್ ಆಸ್‌ಲ್ಲೊ ಕಿತ್ಯಾಕ್ ಟೇಯ್ಲರಾಚೊ ಆನಿ ತಾಚೊ ಸಾಂಗಾತ್ ಲಂಡನಾಂತ್ ಜಮ್ಲೆಲ್ಯಾ ಪ್ರಥಮ್ ಜಮಾತಿ ಥಾವ್ನ್ಂಚ್ ಸುರು. ಪುಣ್ ಆಪ್ಲೆ ವೋಂಟ್ ಕೆದಳಾ ಬಂದ್ ದವರ್‍ಚೆ, ಕೆದಳಾ ಉಘಡ್ಚೆ ಮ್ಹಣ್ ಸಿಸೇರೊಕ್ ಬರ್‍ಯಾನ್ ಕಳಿತ್ ಆಸ್‌ಲ್ಲೆಂ, ಟೇಯ್ಲರಾನ್ ತಾಕಾ ಬರೊಚ್ ತರ್ಬೆತ್ ಕೆಲ್ಲೊ.
ಪುಣ್, ಟೇಯ್ಲರಾನ್ ಕೆಲ್ಲ್ಯಾ ಘಳಾಯೆಕ್ ಯಾ ಘಳಾಯೆಚ್ಯಾ ಪರಿಣಾಮಾಕ್ ಲಾಗುನ್, ಟೇಯ್ಲರಾನ್ ಆಚರಿಲ್ಲಿಂ ಸರ್ವ್ ‘ಅಜಾಪಾಂ’ ಬರ್ಫಾಚಿಂ ಕರ್ಪಾಂ ಕಡ್‌ಲ್ಲೆಪರಿಂ ನಾಸ್ ಜಾವ್ನ್ ಗೆಲ್ಲಿಂ. ತಾಣೆ ಗೂಣ್ ಕೆಲ್ಲಿ ಪಿಡಾ, ಪರತ್ ಉಸ್ಕಾಲ್ಲಿ, ಧಾಂವ್ಡಾಯಿಲ್ಲೆ ದೆಂವ್ಚಾರ್/ಸಯ್ತಾನ್ ಪರತ್ ಪಾಟಿಂ ಆಯಿಲ್ಲೆ ಆನಿ ತಾಣೆ ವ್ಹಡಾ ತಾಳ್ಯಾನ್ ಆನಿ ಥೊರಾಯೆನ್ ಆಪಯಿಲ್ಲೊ ಪವಿತ್ ಅತ್ಮೊ ಕಾಂಯ್ ಕಾನ್ ಹಾಲಂವ್ಚೆಪರಿಂ ದಿಸನಾತ್‌ಲ್ಲೊ. ತಾಣೆ ಜಮಾತಿ ಚಲಯಿಲ್ಲ್ಯಾ ಹರ್‌ಕಡೆನ್ ಅಶೆಂಚ್ ಘಡ್ತಾ ಮ್ಹಣ್ ಟೇಯ್ಲರಾಕ್ ಕಳಿತ್ ಆಸ್ಚಿಚ್ ಸಂಗತ್ ಆನಿ ದೆಕುನ್ಂಚ್ ಎಕ್ ಜಮಾತ್ ಚಲಯಿಲ್ಲ್ಯಾ ಸ್ಥಳಾಕ್ ಪರತ್ ವಚಾನಾತ್‌ಲ್ಲೊ. ಅಶೆಂ ಮ್ಹಣ್ತಕೂಚ್ ಎಕ್ ಮನೋವಿಗ್ಯಾನಾಚೊ ಸಿದ್ದಾಂತ್ ಬರ್‍ಯಾನ್ ವಾಪರ್‌ಲ್ಲೊ ಟೇಯ್ಲರಾನ್. ಖಂಚೊ ತೊ ಪಿಡೇಸ್ತ್ ಯಾ ದೆಂವ್ಚಾರ್ ಲಾಗ್‌ಲ್ಲೊ, ಮತಿಭೃಷ್ಟ್ ಜಾಲ್ಲೊ ಟೇಯ್ಲಾರಾಚ್ಯಾ ಜಮಾತಿಕ್ ಹಾಜರ್ ಜಾವ್ನ್ ಹಜಾರ್ ಜಣಾಂ ಸಾಮ್ಕಾರ್ ಟೇಯ್ಲರಾಚ್ಯಾ ಶಾಥಿಯೆಚಿ, ಕುರ್ಪೆಚಿ ಆನಿ ದೆವಾಳ್ ಸಸಾಯೆಚಿ ಗವಾಯ್ ದಿತಾ ಆನಿ ಆಪುಣ್ ಸಾಲ್ವರ್ ಜಾಲೊಂ ಮ್ಹಣ್ತಾ, ತೊ ಕಾಂಯ್ ಪರತ್ ಯೆವ್ನ್ ಆಪ್ಲಿ ಗವಾಯ್ ಸತ್ ನ್ಹಯ್ ಮ್ಹಣ್ತಾ?
ಅಸಲಿ ಪರಿಗತ್ ಆಯಿಲ್ಲೆ ದಾಕ್ಲೆ ಆಸಾತ್ ದೆಕುನ್ಂಚ್ ಟೇಯ್ಲರಾನ್ ಅಸಲಿ ಎಕ್ ಪೊಕೊಳ್ ದೆಕಾವ್ಣಿ ಪೆಟ್ರೊಂತ್ಲ್ಯಾ ಎಕಾ ಜಮಾತಿ ವೆಳಾರ್ ಆಸಾ ಕೆಲ್ಲಿ.
ತಿತ್ಲ್ಯಾರ್-
ಆಪ್ಲೆಂಚ್ ರೊದಾಂಕದೆಲ್ ಲೊಟುನ್ ಎಕ್ಲಿ ಪ್ರಾಯ್ವೆಂತ್ ಮುಕಾರ್ ಆಯ್ಲಿ. ತಿಕಾ ಕುಮಕ್ ಕರುಂಕ್ ಆಯಿಲ್ಲ್ಯಾ ಸ್ವಯಂ ಸೇವಕಿಂಕ್ ತಿಣೆ ಪಯ್ಸ್ ಲೊಟ್ಲೆಂ. ‘ರೆವರೆಂಡ್ ಫ್ರೆಡ್ ಟೇಯ್ಲರ್!’ ತಿಣೆ ಕಷ್ಟಾಂನಿ ಆಪ್ಲೊ ತಾಳೊ ಕಾಡ್ಲೊ. ಟೇಯ್ಲರ್ ಪಂದ್ರಾ – ವೀಸ್ ಖಿಣಾಂಕ್ ಸ್ತಬ್ಧ್ ಜಾಲೊ. ಉಬಾರೊನ್ ಆಸ್‌ಲ್ಲೆ ತಾಚೆ ಬಾವ್ಳೆ ಗಳ್ಳೆ. ‘ಫ್ರೆಡ್ ಟೇಯ್ಲರ್!’ ತಿಚೊ ತಾಳೊ ಆತಾಂ ಸ್ಪಶ್ಟ್ ಜಾಲ್ಲೊ.
‘ಕಿತೆಂ ಅಪೇಕ್ಷಿತಾಯ್, ಸ್ತ್ರೀಯೆ?’
‘ಸ್ತ್ರೀಯೆ ಮ್ಹಣ್ತಾಯ್? ಹಾಂವ್ ಮರಿ ಮಗ್ದೆಲಿನ್ಂಚ್ ಜಾಲ್ಲಿಂ ತರೀ ಸ್ತ್ರೀಯೆ ಮ್ಹಣ್ ಮ್ಹಾಕಾ ಉಲೊ ಮಾರುನ್ ಕ್ರಿಸ್ತಾಚೆಂ ನಟನ್ ಆನಿ ಶಾಥಿ ತುಕಾ ನಾ, ಕಪಟ್ಯಾ!’
‘ಮುಂದರ್‍ಸಿ ಸ್ತ್ರೀಯೆ, ಪವಿತ್ ಅತ್ಮೊ ತುಜ್ಯಾ ಸಾಮ್ಕಾರ್ ಆಸಾ,’ ತಾಣೆ ಮ್ಹಳೆಂ ಶಾಂತ್ ತಾಳ್ಯಾನ್. ‘ದಯಾಕರುನ್, ತಿಚ್ಯಾ ವೊಂಟಾಂ ಸಾಮ್ಕಾರ್ ಎಕ್ ಮೈಕ್ ಧರಾ. ತಿಚೊ ತಾಳೊ ಹ್ಯಾ ಸಗ್ಳ್ಯಾ ಜಮಾತಿಕ್ ಆಯ್ಕೊಂದಿ. ಪವಿತ್ ಅತ್ಮೊ ಕೊಣೆಂಯಿ ಉಚಾರಿನಾತ್‌ಲ್ಲೆಂಯಿ ಆಯ್ಕಾತಾ!’
ಎಕ್ಲೆ ಸ್ವಯಂ ಸೇವಕಿನ್ ಎಫ್.ಎಮ್. ಮೈಕ್ ತಿಚೆ ಸಾಮ್ಕಾರ್ ಧರ್‍ಲೆಂ.
‘ಹೆಂ ನಾತ್ಲ್ಯಾರ್‌ಯಿ ಮ್ಹಜೊ ತಾಳೊ ತುಜೆಂ ಕಾಳಿಜ್ ಫೊಡುಂಕ್ ಸಕ್ತಾ, ದೆಂವ್ಚಾರಾ!’ ತಿ ಮ್ಹಣಾಲಿ, ರೊದಾಂಚೆಂ ಕದೆಲ್ ಆನಿಕಿ ಮುಕಾರ್ ಲೊಟುನ್ ಹಾಡುನ್. ‘ಕಾನಾಂಕ್ ಗುಡ್ದ್ಯೊ ಚೆಪುನ್ ಕೊಣಾಕ್ ಫಟಯ್ತಾಯ್ ತುಂ? ತುಜೆ ವರ್ವಿ ಸಾದ್ಯ್ ಜಾತಾ ತರ್ ದೇಂವ್ ಆನಿ ಮ್ಹಾಕಾ ಗೂಣ್ ಕರ್.’
ಟೇಯ್ಲರ್ ತಿಕಾಚ್ ಪಳೆತಾಲೊ.
‘ಗೂಣ್ ಕರ್ಚೆಂ ಪವಿತ್ ಅತ್ಮ್ಯಾನ್—‘
‘ತುಕಾ ಆಯ್ಕಾತಾ, ತರ್?’
‘ಪವಿತ್ ಅತ್ಮ್ಯಾಚೆ ಸಕ್ತೆನ್ ಹಾಂವ್ ತುಜಿಂ ಚಿಂತ್ನಾಂಯಿ ವಾಚುಂಕ್ ಸಕ್ತಾಂ, ಸ್ತ್ರೀಯೆ.’
‘ಫಟ್ಕಿರ್‍ಯಾ! ದೋನ್‌ಯಿ ಕಾನಾಂಕ್ ಮೈಕ್ರೋ-ರಿಸೀವರಾ ಬಸಯ್ಲ್ಯಾಂಯ್ ಮ್ಹಣ್ ಕಿತ್ಯಾಕ್ ಸಾಂಗಾನಾಂಯ್?’
‘ಪವಿತ್ ಅತ್ಮ್ಯಾಕ್ ತಾಂತ್ರಿಕತೆಚಿ ಗರ್ಜ್ ನಾ, ಸ್ತ್ರೀಯೆ.’
‘ತುಜೆಂ ನ್ಹೆಸಣ್ ನ್ಹೆಸ್ ಚಲಿಯೆ!’ ರೊದಾಂಚ್ಯಾ ಕದೆಲಾಚೆರ್‌ಚ್ ಘುಂವೊನ್ ತಿಣೆ ತ್ಯಾ ವಿಣ್ಗೆಂ ಜಾಲ್ಲ್ಯಾ ಚಲಿಯೆಕ್ ಹುಕುಮ್ ದಿಲಿ.. ‘ಕಿತ್ಲೆಶಾ ದೊಳ್ಯಾಂನಿ ತುಕಾ ಆನಿಕಿ ವಿಣ್ಗೆಂ ಕರ್ಚೆ ಫುಡೆಂ ಹಾಂಗಾಥಾವ್ನ್ ವಚ್.’
ತ್ಯೆ ಚಲಿಯೆನ್ ಎಕ್ ದೀಷ್ಟ್ ಭಂವ್ತಿಂ ಚರಯ್ಲಿ ಆನಿ ತಿಕಾ ಕಿತೆಂ ಭೊಗ್ಲೆಂಗೀ, ಆಪ್ಲಿಂ ವಸ್ತ್ರಾಂ ಆರಾವ್ನ್ ವಿಂಚುನ್ ತಿ ನಪಂಯ್ಚ್ ಜಾಲಿ.
ರೊದಾಂಚ್ಯಾ ಕದೆಲಾ ವಯ್ಲಿ ಸ್ತ್ರೀ ಹಾಸ್ಲಿ.
‘ಆತಾಂ ಕಿತೆಂ ಮ್ಹಣ್ತಾಯ್, ರೆವರೆಂಡ್ ಫ್ರೆಡ್ ಟೇಯ್ಲರ್?’
ತಿತ್ಲ್ಯಾರ್ ನಿರ್ವಾಹಕ್ ಮದೆಂ ಪಡ್ಲೊ.
‘ನಾ ಪಾತ್ಯೆಣಿ ಆಸ್‌ಲ್ಲಿಂ ಅಸಲಿ ಆತರ್ವಣಾಂ ರೆವೆರೆಂಡಾಕ್ ಕಾಂಯ್ ಪರ್ಕಿ ನ್ಹಯ್. ಅಶೆಂ ಘಡ್ತಾನಾ – ಸಬಾರ್ ಪಾವ್ಟಿಂ ಅಶೆಂ ಘಡ್ಲಾಂ – ತಾಚೆಂ ಸಮಧಾನ್ ಖಂತಿನ್ ಪಿಗಳ್ತಾ ಜಾಲ್ಲ್ಯಾನ್ ತಾಕಾ ಥೊಡ್ಯಾ ವಿಶೆವಾಚಿ ಗರ್ಜ್ ಆಸಾ. ತಾಕಾ ಥೊಡ್ಯಾ ಮಿನುಟಾಂಚೊ ಮಾನಸಿಕ್ ವಿಶೆವ್ ಗರ್ಜ್. ತ್ಯಾ ಮಿನುಟಾಂಕ್ ತೊ ಆಪ್ಲ್ಯಾ ಕೆಬಿನಾಕ್ ವೆತೊಲೊ. ತವಳ್ ಪರ್ಯಾಂತ್ ಭಕ್ತಿಕ್ ಗಿತಾಂ ಆನಿ ಗಾಯಾನಾಂ ಚಾಲು ಆಸ್ತೆಲಿಂ.
ಟೇಯ್ಲರ್, ಪಡ್ದೊ ಉಸವ್ನ್ ಆಪ್ಲ್ಯಾ ಕೆಬಿನಾಕ್ ಗೆಲೊ. ಧರ್ಣಿಕ್ ಶೆವ್ಟಾಲ್ಲೊ ಜೆರೊಮ್ ತವಳ್ ಸನಿನ್ ಜಾವ್ನ್ ಸ್ಟೇಜಿಚೆರ್‌ಚ್ ಬಸ್‌ಲ್ಲೊ. ಟೇಯ್ಲರಾಚೆಂ ಶಿಂತಿದ್ ಸಂಯಮಾಕ್ ಯೆತಾ ಪರ್ಯಾಂತ್ ಕೊಣೆಂಯಿ – ನಿರ್ವಾಹಾಕ್ ಸೊಡುನ್ – ಕೆಬಿನಾಕ್ ಯೆಂವ್ಕ್ ನಜೊ ಮ್ಹಳ್ಳಿ ತಾಕಿದ್ ಆಸ್‌ಲ್ಲಿ. ಕೆಬಿನಾ ಭಿತರ್ ರಿಗ್ತೆಚ್ ಟೇಯ್ಲರಾನ್ ಖ್ಹಿಳ್ ಘಾಲಿ.
ಏಕ್‌ಕಂಡೀಶನಾರ್ ಚಾಲು ಆಸ್‌ಲ್ಲೊ.
‘ಕಿತೆಂ ಮ್ಹಣ್ತಾಯ್ ಭಾವಾ, ಸಿಸೆರೊ?’ ಟೇಯ್ಲರಾನ್ ವಿಚಾರ್‍ಲೆಂ,ದೊಳೊ ಮೊಡುನ್.
‘You’re a real bastard, Taylor!’ ತಾಣೆ ಮ್ಹಳೆಂ ಎಕಾ ದಾಟ್ ಬ್ರೀಫ್‌ಕೇಜಿಂತ್ಲೆ ಕೊನ್ಯಾಕಾಚೆ ಪಾಂಯ್ಟ್ ಭಾಯ್ರ್ ಕಾಡುನ್. ‘ಪುಣ್ ತ್ಯಾ ವೀಲ್‌ಚೇರಾಚ್ಯಾ ಪ್ರಕರಣಾಚಿ ಗರ್ಜ್ ಆಸ್‌ಲ್ಲಿ?’
‘ಸಿಸೆರೊ!,’ ಮ್ಹಳೆಂ ಟೇಯ್ಲರಾನ್ ತಾಚ್ಯಾ ಹಾತಾಂತ್ಲೆಂ ಪಾಂಯ್ಟ್ ಘೆವ್ನ್. ‘ಇತ್ಲಿಂ ವರ್ಸಾಂಥಾವ್ನ್ ತುಂ ಮ್ಹಜೆ ಸಂಗಿ ಆಸಾಯ್ ತರಿ ಹ್ಯೆ ವಿದ್ಯೆಚೆಂ ಪರಿಪೂರ್ಣ್ ಹುನ್ನರ್ ತುಕಾ ಆನಿಕಿ ಕಳಿತ್ ಜಾಂವ್ಕ್ ನಾ ಆನಿ ತೆಂ ಮ್ಹಜ್ಯಾನ್ ಶಿಕಂವ್ಕ್‌ಯಿ ಜಾಂವ್ಚೆಂ ನಾ ಆನಿ ತೆಂ ಹಾಂವ್ ತುಕಾ ಶಿಕಂವ್ಕ್‌ಯಿ ಶಿಕಯ್ನಾ.’ ತಾಣೆ ಕೊನ್ಯಾಕಾಕ್ ಎಕ್ ಘೊಟ್ ಮಾರ್‍ಲೊ ಆನಿ ಪಾಂಯ್ಟ್ ಫ್ಲಾಸ್ಕ್ ಸಿಸೆರೊಕ್ ಪಾಟಿಂ ದಿಲೊ. ‘ಪೆಟ್ರೋಸ್ಟೇಟ್ ತಾಂತ್ರಿಕತೆನ್ ಭಾರಿಚ್ ಮುಕಾರ್ ಆಸಾ ತೆಂ ತುಂ ಜಾಣಾಂಯ್. ಭಾಯ್ಲ್ಯಾ ಜಮ್ಯಾಂತ್ ಆಸ್ಚೆ ಸರ್ವಯಿ ಭೆಂಕ್ರೆ ನ್ಹಯ್. ನವೆಂ ನವೆಂ ಆಪ್ಜೀಮ್ ಸರ್ವಾಂಕ್‌ಯಿ ಜಾಯ್ ಪುಣ್ ಹೊ ಖ್ಹೆಳ್ ಕಸಲೊ ಮ್ಹಣ್ ಆಯಿಲ್ಲೆ ‘ಅನ್ಭಾವಾಡ್ತಿ’ ಧಾರಾಳ್ ಆಸಾತ್. ತಾಂಚೆಂ ‘ಫೀಡ್‌ಬ್ಯಾಕ್’ ಜೆರೊಮ್ ತಸಲ್ಯಾ ಪಿಶಾಂನಿ ಮ್ಹಾಕಾ ದಿಲಾಂ. ತಿಂ ದೊಗಾಂ ರಾಜ್‌ಕಾರಿಣಿಂ – ಮಾವ್ರಿಸ್ ಆನಿ ಲಿಲಿಯನ್ – ಹಾಂಗಾಸರ್ ಜಾಂವ್ಚೆಂ ಪಾತಿಯೆತಾತ್ ಮ್ಹಣ್ ತುಂ ಚಿಂತಾಯ್? ತ್ಯಾ ಖಾತಿರ್, ಕಸಲಿಂಯ್ ಸವಲಾಂ ಉಟ್ಚ್ಯಾ ಪಯ್ಲೆ – ಹೆರಾಂಥಾವ್ನ್ ಉಟ್ಚ್ಯಾ ಪಯ್ಲೆಂಚ್ – ಹಾಂವೆಂಚ್ ತಿಂ ಉಟಯ್ಲಿಂ. ಕಶೆಂ ಆಸ್‌ಲ್ಲೆಂ ನಟನ್ ಆಮ್ಚ್ಯೆ ಮ್ಹಾತಾರೆಚೆಂ – ದೊರೊತಿಚೆಂ?’
ತಾಚೊ ಹುನ್ನರ್ ಅಸೊ ಆಸ್ತಾಲೊ ಕಿ ಆಪ್ಲ್ಯಾ ದಗಾಲ್ಭಾಜಿಯೆಂತ್ ಕಸಲೆ ಅಖಾಡೆ ಯೆತಿತ್ ಮ್ಹಳ್ಳೊ ನಕ್ಕಿ ಅಂದಾಜ್ ತಾಕಾ ಆಸ್ತಾಲೊ ಆನಿ ಅಸಲ್ಯಾ ಆಖಾಡ್ಯಾಂಚಿ ದಾಡ್ ಮಜ್ವಂವ್ಕ್ ತೊ ಸನ್ನಿವೆಶಾಂ ಖುದ್ದ್ ಆಸಾ ಕರ್ತಾಲೊ ಆನಿ ಜಮಾತಿಕ್ ಆಯಿಲ್ಯಾಂಚೆ ಮತಿಂತ್ ದುಬಾವಿ ಚಿಂತ್ನಾಂ ಉಬ್ಜಾಶಿಂ ಕರುನ್ ಆಪ್ಲ್ಯಾ ವಾಕ್‌ಚೌರ್ಯಾಂನಿ ತಿಂ ‘ನಿವ್ರಾಯ್ತಾಲೊ.’
ಪುಣ್ ಆಯ್ಚೆ ಹೆ ಸಾಂಜೆರ್ ಹಿ ತಾಚಿ ಚತುರಾಯ್ ಚಲ್ಚೆಪರಿಂ ದಿಸಾನಾತ್‌ಲ್ಲೆಂ ಖರೆಂ. ಪುಣ್ ಸಿಸೇರೊ ತಸಲ್ಯಾಂಕ್ ಸಮ್ಜಾನಾತ್‌ಲ್ಲೆಂ ಕಿತ್ಯಾಕ್ ಟೇಯ್ಲರಾನ್ ಜಮಾತ್ ಸಾತ್ ದಿಸಾಂಕ್ ಪಾಟಿಂ ಘಾಲುನ್ ಹಿ ಪರಿಗತ್ ಉಬ್ಜಾಶಿ ಕೆಲಿ, ಅಶೆಂ. ಮತ್ಲಬ್‌ನಾಸ್ತಾಂ ಕಸಲಿಂಚ್ ಕಾಮಾಂ ಕರ್ಚೊ ಸಯ್ತಾನ್ ಟೇಯ್ಲರ್ ನ್ಹಯ್. ಸಬಾರ್‍ಶಾ ಜಮಾತಿಂನಿ ಟೇಯ್ಲರಾಚ್ಯಾ ಹರ್ ಕರ್ತುಬಾಕ್ ಪಾಟಿಂಬೊ ದಿಲ್ಲ್ಯಾ ಸಿಸೇರೊಕ್ ಆಜೂನ್ ಕಳಿತ್ ಜಾಲ್ಲೆಂ ನಾ, ಟೇಯ್ಲರ್ ಹ್ಯಾ ದಂದ್ಯಾಕ್ ಕಿತ್ಯಾಕ್ ಆನಿ ಕಸೊ ದೆಂವ್‌ಲ್ಲೊ ಮ್ಹಣ್.
ಟೆಯ್ಲರಾಚ್ಯಾ ಉಜ್ವ್ಯಾಕ್ ಉಬೊ ಆಸ್‌ಲ್ಲ್ಯಾ ಸಿಸೇರೊನ್ ವೇದಿವಯ್ಲಿಂ ಸರ್ವ್ ಮೈಕಾಂ ಯೆಕಾಚಾಣೆ ಒಫ್ ಕರುಂಕ್ ಆಸ್‌ಲ್ಲಿ ಸಿಂಗಲ್ ಸ್ವಿಚ್ಚ್ ದಾಂಬ್ಲಿ ಆನಿ ಹಾಳ್ವಾಯೆನ್ ತಾಚ್ಯಾ ಕಾನಾಲಾಗಿಂ ಭಾಗಾಲೊ ಆನಿ ಪಿಸ್ಪಿಸ್ಲೊ. ‘ರೆವರೆಂಡ್, ಆಮ್ಚಿ ಪಿತುಳ್ ಭಾಯ್ರ್ ಪಡ್ಚೆಪರಿಂ ದಿಸ್ತಾ! ತುಂವೆಂ ಕಿತ್ಯಾಕ್ ಹಿ ಜಮಾತ್ ಪಾಟಿ ಘಾಲಿಯ್? ಖಂಯ್ ಆಸ್‌ಲ್ಲೊಯ್ ತುಂ? ಕಸ್ಲೊ ಛದ್ಮವೇಷ್ ಹೊ? ಹಾಂಗಾಸರ್ ಘಡ್ತಾ ತರಿ ಕಿತೆಂ?’
‘ಇತ್ಲಿಂ ಸವಲಾಂ ತುಂ ಯೆಕಾಚ್‌ಫಾರಾಕ್ ವಿಚಾರ್‍ಶಿ ತರ್ ಹಾಂವ್ ಕಸಲಿ ಜಾಪ್ ದೀಂವ್?’ ಟೇಯ್ಲರಾನ್ ವಿಚಾರ್‍ಲೆಂ. ತಾಚ್ಯಾ ಮುಕ್ವಾಡಾಂತ್ಲ್ಯಾನ್ ಉತ್ರಾಂ ಚಿಕ್ಕೆಸೆ ಅಸ್ಪಷ್ಟ್ ಆಯ್ಕಾತಾಲಿಂ. ‘ಹಾಂವ್ ಜಾಣಾಂ ಹಾಂಗಾಸರ್ ಘಡೊಂಕ್ ಆಸ್ಚೆಂ. ಪುಣ್ ತುಂ ಜಾಣಾಂಯ್, ಭಿಂಯಾಕ್ ಮ್ಹಜೆ ಜಿಣಿಯೆಂತ್ ಪ್ರವೇಸ್ ನಾ.’
‘ಪುಣ್ ಮ್ಹಜೆ ಜಿಣಿಯೆಂತ್ ಆಸಾ!’ ಬಿರ್ಮತೇನ್ ಮ್ಹಳೆಂ ಸಿಸೇರೊನ್. ‘ಭಂವ್ತಿಂ ಪಳೆ, ಪಯ್ಲೆ ಜಮಾತಿಂಕ್ ಯೆಂವ್ಕ್ ನಾತ್‌ಲ್ಲಿಂ ಸಯ್ತ್ ಆಯ್ಲ್ಯಾಂತ್.’
‘ಹಾಂವ್ ಪಳೆತ್ತ್ ಆಸಾಂ!’ ಟೇಯ್ಲರಾನ್ ಸ್ವಿಚ್ಚ್ ಚಾಲು ಕೆಲೊ ಆನಿ ಆಪ್ಣಾ ಸಮ್ಕಾರ್ ಆಸ್‌ಲ್ಲ್ಯಾ ಮೈಕಾಕ್ ಚಿರ್ಪುಟ್ ಮಾರ್‍ಲೆಂ. ಬಳಿಷ್ಟ್ ಸ್ಪೀಕರಾಂತ್ಲ್ಯಾನ್ ಡಬ್ಬ್ ಡಬ್ಬ್ ಪೊಕೊಳ್ ಆವಾಜ್ ಆಯ್ಲೆ. ಹ್ಯಾ ಆವಾಜಾಂನಿ ಜಮಾತಿಂತ್ಲೊ ಆವಾಜ್ ಥಾಂಬಯ್ಲೊ. ತಾಕಾ ದಿಸ್ಲೆಂ ಜಮ್ಯಾ ಮದೆಂ ಮಿನಿಸ್ಕರ್‍ಟಾರ್ ಉಬೊನ್ ಆಸ್‌ಲ್ಲ್ಯಾ ಎಕೆ ಚಲಿಯೆಥಾವ್ನ್ ಎಕಾ ಮಾನೇಸ್ತಾನ್ ಎಫ್.ಎಮ್. ಮೈಕ್ ಘೆತ್ಲೆಂ ಆನಿ ತಾಣೆಂಯಿ ಮೈಕಾಚ್ಯಾ ನಾಕಾಕ್ ಚಿರ್ಪುಟ್ ಮಾರ್‍ಲೆಂ. ಪರ್ತ್ಯಾನ್ ಡಬ್ ಡಬ್ ಆವಾಜ್.
‘ರೆವರೆಂಡ್ ಟೇಯ್ಲರ್!’ ತ್ಯಾ ಮಾನೇಸ್ತಾನ್ ತಾಳೊ ಕಾಡ್ಲೊ. ‘ಹಿ ಎಕ್ ಉಗ್ತಿ ಜಮಾತ್ ಕಶಿ ಮ್ಹಾಕಾ ದಿಸ್ತಾ. ಕಸಲ್ಯಾಗಿ ಉದ್ದೇಶಾನ್ ತುಂವೆಂ ಹಿ ಜಮಾತ್ ತಹಕೂಬ್ ಕೆಲ್ಯಾಯ್ ಆನಿ ಕಿತ್ಯಾಕ್ ಮ್ಹಳ್ಳೆಂ ಜಾಣಾಂ ಜಾಂವ್ಕ್ ಆಮಿ ಅಪೇಕ್ಷಿತಾಂವ್ ಮಾತ್ರ್ ನ್ಹಯ್ ದಬಾವ್ ಘಾಲ್ತಾಂವ್. ತುಕಾ ಕಾಂಯ್ ಅಂದಾಜ್ ಜಾಲಾ ಕಿ ತುಂ ಎಕ್ ಬನಾವಟಿ ಫೇಯ್ತ್ ಹೀಲರ್ ಮ್ಹಣ್. ಸಬಾರ್ ವರ್ಸಾಂಥಾವ್ನ್ ಹಾಂವ್ ತುಜಿ ಅತರ್ವಣಾಂಚ್ಯೊ ತಪ್ಶೀಲ್ಯೊ ಪಾರತ್ ಕರುನ್ಂಚ್ ಆಸಾಂ ಆನಿ ಎಕಾ ನ್ಹಯ್ ತರ್ ಎಕಾ ದಿಸಾ ತುಂ ಸಾಂಪಡ್ತೊಲೊಯ್ ಮ್ಹಳ್ಳೆಂ ಮ್ಹಾಕಾಚ್ ನ್ಹಯ್ ಹಾಂಗಾಸರ್ ಜಮ್ಲೆಲ್ಯಾ ಸಮೇಸ್ತಾಂಕ್ ಕಳಿತ್ ಆಸ್‌ಲ್ಲೆಂ ಆನಿ ಕಳಿತ್ ಆಸಾ. ಆತಾಂ ಮುಖ್ವಾಡ್ ಘಾಲ್ಲ್ಯಾನ್ ತುಂ ಕಾಂಯ್ ಆಮ್ಕಾಂ ಫಟಯ್ತೊಲೊಯ್ ಮ್ಹಳ್ಳ್ಯಾ ಭ್ರಮಿದೆಂತ್ ತುಂವೆಂ ಆಸ್ಚೆಂ ನಾಕಾ. ತುಂ ಭಾವಾರ್ಥಾ ಸಂಗಿಂ ಖ್ಹೆಳ್ತಾಯ್, ಆಮಿ ಕ್ರಿಸ್ತಾಂವಾಂನಿ ಪಾತ್ಯೆಂವ್ಚ್ಯಾ ಪವಿತ್ ಅತ್ಮ್ಯಾ ಸಂಗಿಂ ಖ್ಹೆಳ್ತಾಯ್. ಆದ್ಲ್ಯಾ ಜಮಾತ್ಯೆಂನಿ ತುಂವೆಂ ಐಲಾನ್ ಕೆಲೆಂಯ್ – ಪವಿತ್ ಅತ್ಮ್ಯಾನ್ ಆಮ್ಕಾಂ ಆಪಯ್ಲಾಂ, ಅಶೆಂ. ಆತಾಂ ತುಂವೆಂ ತುಜೆ ಐಲಾನ್ ಬದ್ಲಿಲಾಂಯ್ – ಝುಡ್ತೆಚ್ಯಾ ಝುಜಾಂಕ್ ಪವಿತ್ ಅತ್ಮ್ಯಾನ್ ಆಪಯ್ಲಾಂ, ಅಶೆಂ. ಕಸಲೊ ಅದಿಕಾರ್ ತುಜೊ ಅಸಲೆಂ ಎಕ್ ಐಲಾನ್ ಕರುಂಕ್? ಝಡ್ತೆಚಿಂ ಝುಜಾಂ, ಕೊಣಾಚಿಂ, ಕೋಣ್ ಕೊಣಾಚಿ ಝಡ್ತಿ ಕರ್ತೊಲೊ? ತುಂ, ರೆವರೆಂಡ್ ಫ್ರೆಡ್ ಟೇಯ್ಲರ್? ತುಂ, ತುಜಿಂ ಸರ್ವ್ ಅಜಾಪಾಂ ಟುಸ್ಸ್ ಜಾಲ್ಯಾ ಉಪ್ರಾಂತ್ ಆನಿ ತುಜಿ ದಗಾಲ್ಭಾಜ್ ಉಗ್ತಡಾಂತ್ ಆಯ್ಲ್ಯಾ ಉಪ್ರಾಂತ್. ಕಿತ್ಯಾಕ್ ಆಮಿ ಪೆಟ್ರೊಗಾರ್ ತುಜ್ಯಾ ಬನಾವಟಿಂಕ್ ವಳಗ್ ಜಾಲ್ಯಾಂವ್ ಮ್ಹಲ್ಳೆಂ ಆಮ್ಕಾಂ ಸಮ್ಜಾನಾ. ಜರಿತ್ರಿ ತ್ಯಾ ಮೌರಿಸ್ ಅಗುಸ್ತಿನಾನ್ ಆಪ್ಲ್ಯಾ ಎಲಿಸಾಂವಾಂಚ್ಯಾ ಫಾಯ್ದ್ಯಾಕ್ ಹಾಂಗಾಸರ್ ಹಾಡ್‌ಯಿಲ್ಲೊ, ತಾಚ್ಯಾ ಉಮೇದ್ವಾರಾಕ್ ಫಾಯ್ದ್ಯಾಚೆಂ ಕಸಲೆಂಚ್ ತುಂವೆಂ ಕೆಲ್ಲೆಂನಾಂಯ್. ಕಸಲ್ಯಾಗಿ ಅಥ್ವ್ಯಾಚ್ ಉದ್ದೇಶಾನ್, ಜಾಯ್ ತರ್ ಸೊದ್ನೆರ್ ಮ್ಹಣ್ ತುಂ ಮ್ಹಣ್, ತುಂ ಹಾಂಗಾಸರ್ ಆಯ್ಲಾಯ್, ಮಹಂತನಾಚ್ಯಾಂಕ್ ತಶೆಂ ಸಾಮಾನ್ಯ್ ಭಾವಾರ್ಥ್ಯಾಂಕ್ ತುಂವೆಂ ಫಸಯ್ಲಾಂಯ್ ಆನಿ ದಿಸ್ತಾ ಆಮ್ಕಾಂ ಕಸಲ್ಯಾಗಿ ಮುಖ್ವಾಡಾ ಪಾಟ್ಲ್ಯಾನ್ ಲಿಪೊನ್, ಮಾಜ್ವೊನ್ ಮಾಜ್ವೊನ್ ತುಂ ನಪಂಯ್ಚ್ ಜಾತೊಲೊಯ್. ಪುಣ್ ಅಶೆಂ ಜಾಂವ್ಕ್ ಆಮಿ ಸೊಡಿಶೆಂ ನಾಂವ್!’ ಜಮ್ಯಾಂತ್ ಸ್ವಾಸ್‌ಚ್ ಆಯ್ಕಾನಾತ್‌ಲ್ಲೊ.
ತಿತ್ಲ್ಯಾರ್ ಜಮ್ಯಾಂತ್ಲೊ ಆನ್ಯೇಕ್ಲೊ ಉಟ್ಲೊ ಆನಿ ತಾಣೆ ಮೈಕ್ ಹಾತಿಂ ಘೆತ್ಲೆಂ. ‘ಆಮಿ ಶಿಮ್ಟೆಥಾವ್ನ್ ಕಿತ್ಯಾಕ್ ಸುರು ಕರ್ಚೆಂ? It is a fact that by our own folly that we have been taken for a ride. ಆತಾಂ ಮ್ಹಜೆಂ ಸವಾಲ್ ಆಸಾ, ರಾಜ್‌ಕಾರಿಣಿ ಮೌರಿಸ್ ಅಗುಸ್ತಿನಾಕ್. ಆಪ್ಣಾಕ್‌ಚ್ ರೆವರೆಂಡ್ ಫ್ರೆಡ್ ಟೇಯ್ಲರ್ ಮ್ಹಣ್ ಭಾವಾರ್ಥಿಕ್ ವರ್ಟುಲಾಂನಿ ಫಾಮಾದ್ ಜಾಲ್ಲೊ ಹೊ ಶಕ್ಸ್ ಪೆಟ್ರೊಕ್ ಕಸೊ ಪಾವ್ಲೊ. ಕಿತ್ಯಾಕ್ ಆನಿ ಕಸಲಿ ವೀಜಾ ತಾಕಾ ತಲಾಸ್ ಕೆಲಿಯ್ ತುಂವೆಂ…. ಆನಿ ಮಾನೆಸ್ತಾ ತುಂವೆಂ ಸತ್ ಸಾಂಗ್ಚೆಂ ಬರೆಂ, ಎಲಿಸಾಂವ್ ಚಲ್ತಾ ಪೆಟ್ರೊಂತ್. ಪಳೆ, ರಾಜ್‌ಕಾರಿಣ್ ಮಿಸೆಸ್ ಲಿಲಿಯನ್ ಜೆನಿಸ್ ಹಾಂಗಾಸರ್ ಹಾಜರ್ ಆಸಾ. ಆಮಿ ತುಜೆ ಜಾಪಿಕ್ ರಾಕೊನ್ ಆಸಾಂವ್!’ ಜಮ್ಯಾಥಾವ್ನ್ ಹ್ಯಾ ಸವಲಾಕ್ ಕಬ್ಲಾತ್ ಆಸಾ ಮ್ಹಳ್ಳೆಪರಿಂ ಪ್ರತಿಕ್ರಿಯೆಂ ಉಟ್ಲೆಂ.
ಮೌರಿಸ್ ಅಗುಸ್ತಿನ್ ಉಬೊ ಜಾತೆಚ್ ಚಲಿಯೆನ್ ತಾಚ್ಯಾ ಹಾತಾಂತ್ ಮೈಕ್ ದಿಲೆಂ. ‘ಮಟ್ವ್ಯಾನ್ ಹಾಂವ್ ಜಾಪ್ ದಿತಾಂ,’ ಮ್ಹಳೆ ಮೌರಿಸಾನ್. ತಾಚೊ ತಾಳೊ ಸ್ಪಷ್ಟ್ ಆಸ್‌ಲ್ಲೊ ಆನಿ ಕಾಂಪಾನಾತ್‌ಲ್ಲೊ. ‘ಹ್ಯಾ ರೆವರೆಂಡ್ ಫ್ರೆಡ್ ಟೇಯ್ಲರಾಚ್ಯಾ ಖಾಸ್ಕ್ಯಾನ್ (personal assistant) ವಿದೇಶಾಥಾವ್ನ್ ಮ್ಹಜೊ ಸಂಪರ್ಕ್ ಕರುನ್ ದೋನ್ ವೀಜಾ ಮಾಗ್ಲ್ಯೊ, ಭಾವಾರ್ಥ್ ಪ್ರಸಾರಾಚ್ಯಾ ಉದ್ದೇಶಾನ್. ಆಯಿನ್ನ್ ವೆಳಾರ್ ಪೆಟ್ರೊಂತ್ ಇಲೆಕ್ಷನಾಚೊ ಉಜೊ ಪಡ್ಲೆಲ್ಯಾನ್ ಹಾಂವೆಂ ಅಂದಾಜ್ ಕೆಲೊಕಿ ಹ್ಯಾ ರೆವರೆಂಡಾಕ್ ಹಿಕ್ಡ್ಯಾಂನಿ ವಾಪರ್‍ಲ್ಯಾ ಮ್ಹಾಕಾ ಕಾಂಯ್ ಇಲೆಕ್ಷನಾ ವೆಳಾರ್ ಪಾಟಿಂಬೊ ಮೆಳತ್ ಮ್ಹಣ್. ಪುಣ್ ಮ್ಹಜೊ ಅಂದಾಜ್ ಫಟ್ ಜಾಲೊ ಆನಿ ಟೇಯ್ಲರ್ ಹಾಂಗಾಸರ್ ಆಯಿಲ್ಲೊ ಉದ್ದೇಶ್ ಬಲ್ತೊಚ್ ಕಸಲೊಗಿ ಆಸಾ ಮ್ಹಳ್ಳೊ ಸುರಾಗ್ ಮ್ಹಾಕಾ ಮೆಳ್ಳೊ. ದೆಕುನ್ಂಚ್ ತಾಕಾ ಹಾಂವೆಂ ಪಯ್ಸಾಪಯ್ಸ್ ದವರ್‍ಲೊ, ಮ್ಹಜಿ ಮಾನೆಸ್ತಿಣ್ ಎದ್ರಿ ಮಿಸೆಸ್ ಲಿಲಿಯನ್ ಜೆನಿಸಾನ್ ಒಸಿಸ್ ಕಂಪೆನಿಂತ್ಲ್ಯಾ ಜೆರೊಮ್ ಲಾಜ್ರಾ ಮ್ಹಳ್ಳ್ಯಾ ಯೆಕ್ಲ್ಯಾಚ್ಯಾ ದಲಾಲ್ಪಣಾನ್ ಖಾಸ್ಕಿ ಪತ್ತೇದಾರ್ ಮೆಲ್ಕಮ್ ಮ್ಹಳ್ಳ್ಯಾ ಯೆಕ್ಲ್ಯಾಕ್ ಮ್ಹಜ್ಯಾ ಪಾಟ್ಲ್ಯಾನ್ ಲಾಗಯ್ಲೊ. ಪುಣ್ ತಾಕಾ ಕಿತೆಂಚ್ ಮೆಳ್ಳೆಂ ನಾ; ತ್ಯಾ ಫುಡೆಂ ಮಾನೇಸ್ತ್ ಮೆಥ್ಯು ಲಿಯೊನ್ ಆನಿ ತಾಚ್ಯಾ ಪರ್‍ದಾನಿ ರಿಚರ್ಡ್ ಕ್ಲೆಮೆಂಟಾನ್ ಮ್ಹಜಿ ಕಂಪೆನಿ ಫಾರ್ಲಿ. ಹಾಚೊ ವಿವರ್ ಹಾಂಗಾಸರ್ ಗರ್ಜೆಚೊ ನ್ಹಯ್. ತ್ಯಾ ಉಪ್ರಾಂತ್, ಹಾಲಿಂಚ್, ಹ್ಯಾಚ್ ಮೆಥ್ಯು ಲಿಯೊನ್, ರಿಚರ್ಡಾಕ್ ಕಸಲ್ಯಾಗಿ ಟೆಂಡರಾಂಚ್ಯಾ ಮಾಮ್ಲ್ಯಾಂತ್ ಫಸವ್ನ್ ಘಾಲಿಜೆ ಮ್ಹಲ್ಳ್ಯಾ ಉದ್ದೇಶಾಚೆಂ ಸ್ಕೆಚ್ ಮ್ಹಜ್ಯಾ ಸಾಮ್ಕಾರ್ ದವರ್‍ಲೆಂ. ಹಾಂವ್ ವೊಪ್ಲೊಂ ಪುಣ್ ಹಾಂಗಾಸರ್ ಹಾಂವೆಂಯಿ ಮ್ಹಜೊ ಫಾಯ್ದೊ ಚೊಯ್ಲೊ. ಲಿಲಿಯನಾಚಿ ಇನ್ನೊಸೆಂತ್ ಧುವ್ ಒಸಿಸಾಂತ್ ಮೆಥ್ಯುಚಿ ಪರ್ಸನಲ್ ಸೆಕ್ರೆಟರಿ ಜಾವ್ನ್ ಸೆರ್ವಾಲ್ಯಾ ಮ್ಹಳ್ಳೆಂಯಿ ಮ್ಹಾಕಾ ಕಳಿತ್ ಜಾಲೆಂ ರಾಜಕೀಯ್ ಮಟ್ಟಾರ್ ಹೊ ಮೆಥ್ಯು ಲಿಯೊ ಮ್ಹಜ್ಯಾ ಪಾಡ್ತಿಚ್ಯಾ ಕುಶಿನ್ ಮಾಲ್ವಲಾ ಯಾ ಲಿಲಿಯನಾಚ್ಯಾ ಮ್ಹಳ್ಳೊ ಖರೊ ಅಂದಾಜ್ ಮ್ಹಾಕಾ ಜಾಲೊ ನಾ. ಹಾಂವೆಂ ಖ್ಹೆಳ್ ಜ್ಯಾರಿ ದವರ್‍ಲೊ. ಕಿತೆಂಯಿ ತರಿ, ಹಾಂವ್ ಮೌರಿಸ್ ಅಗುಸ್ತಿನ್, ತುಮ್ಚ್ಯಾ ಮೊಗಾಚೊ ರಾಜ್‌ಕಾರಿಣಿ!’
ಜಮ್ಯಾಂತ್ ಕಾಂಯ್ ಹಾಸೊ ಉಟ್ಲೊ ತರ್ ತೊ ಕ್ಷಣಿಕ್. ‘ತೊ ನಿಂವ್ತೆಚ್ ಮೌರಿಸಾನ್ ಸವಾಲ್ ಉಡಯ್ಲೆಂ. ‘ರೆವರೆಂಡ್!’ ತಾಣೆ ಭಂವ್ತಿ ಪಳೆಲೆಂ. ‘ಆತಾಂ ಸಗ್ಳ್ಯಾ ಜಮಾತಿಕ್ ಉಚಾರ್ನ್ ಸಾಂಗ್ – ಕಸಲೆಂ ಜಾವ್ನಾಸಾ ಹೆಂ ಝಡ್ತೆಂಚೆ ಝುಜ್? ಕೊಣಾಥಂಯ್ ನಾ ಆಯ್ಬ್ ಆನಿ ಪಾತಕ್ ಹ್ಯೊ ಹೆರಾಂಚಿ ಝಡ್ತಿ ಕರುಂಕ್ ಸಕ್ತಾ? ಕೆದೆಂ ಧಯ್ರ್ ತುಜೆಂ? ಕೋಣ್ ಕೊಣಾಚಿ ಝಡ್ತಿ ಕರ್ತೊಲೊ?’
ತವಳ್-ತುಂವೆಂ ಕಸಲಿಯಿ ಜಾಪ್ ಯಾ ಸ್ಪಷ್ಟೀಕರಣ್ ದಿಂವ್ಚಾ ಫುಡೆಂ ತುಜೆಂ ನಖಾಬ್ ಕಾಡ್. ತುಂ, ತುಂಚ್ ವ್ಹಯ್ ಯಾ ನ್ಹಯ್ ಮ್ಹಳ್ಳೆಂ ಸರ್ವಾಂಕ್ ಕಳಿತ್ ಜಾಂವ್ದಿ. ತುಜ್ಯಾ ಆಕರ್ಶಕ್ ಖಾಡಾಕ್ ಆಮಿ ಸ ಜಮಾತಿಂನಿ ವಳ್ಸಾಲ್ಯಾಂವ್. ಆತಾಂ ಉಗ್ತಡಾಂತ್ ಯೆ.’
ಟೇಯ್ಲರಾನ್ ಆಪ್ಲೆ ಹಾತ್ ವಿಸ್ತಾರ್ಲೆ. ‘ಹರ್ ಯೆಕ್ಲೊ/ಯೆಕ್ಲಿ ತಾತಾಂಚಿ ಝಡ್ತಿ ಕರ್ತೆಲಿ ಆನಿ ಹೆಂ ಜಾವ್ನಾಸ್ತೆಲೆಂ ತಾತಾಣಿಂಚ್ ಸ್ವತಾಚೆರ್ ಮಾಂಡ್ಚೆಂ ಝುಜ್!’
‘ಆಮಿ ಸಮ್ಜಾಲಿಂ ನಾಂವ್!’ ಎಕ್ಲೆನ್ ಸುಂಯ್ಪಿಲೆಂ. ‘ಆಮ್ಕಾಂ ಸಮ್ಜಯ್, ಊಣ್ಯಾರ್ ಪುಣಿ ಆಮ್ಚ್ಯಾ ಭುರ್ಗ್ಯಾಂಕ್ ಖರ್‍ಯಾ ಕ್ರಿಸ್ತಾಚಿ ವಳಕ್ ಲಾಬೊಂ, ತುಜ್ಯಾ ತಸಲ್ಯಾ ದಗಲ್ಭಾಜಿಚಿ ನ್ಹಯ್. ಸುರು ಕರ್ತಾಯ್ ತರ್ ತುಜ್ಯಾ ಝಡ್ತೆಥಾವ್ನ್ ಸುರು ಕರ್. ಕೊಣ್ ತುಂ, ಕಿತ್ಯಾಕ್ ಹಾಂಗಾಸರ್ ಆಯ್ಲಾಯ್ ಆನಿ ಕಸಲ್ಯಾ ಸೊದ್ನೆರ್ ತುಂ ಆಸಾಯ್? ಉಚಾರ್ನ್ ಸಾಂಗ್.’
‘ಖಂಡಿತ್ ಹಾಂವ್ ಉಚಾರ್ನ್ ಸಾಂಗ್ತಾಂ ಪುಣ್ ಸುರ್ವೆಚ್ಯಾ ಸುರ್ವೆರ್ ನ್ಹಯ್ ಕಿತ್ಯಾಕ್ ಹ್ಯಾ ಪೆಟ್ರೊಸ್ಟೇಟಾಚ್ಯಾ ಗರ್ಭಾಂತ್ ಕೊಣೆ ಕಿತೆಂ ಲಿಪವ್ನ್ ದವರ್‍ಲಾಂ ತೆಂ ಉಗ್ತಾಡಾಂತ್ ಯೆಂವ್. ತಾಂಚಿಂ ನಖಾಬಾಂ ಝಡೊಂದಿತ್ ಆನಿ ನಿಮಾಣೆಂ ಹಾಂವ್ ಉಗ್ತಾಡಾಂತ್ ಯೆತಾಂ, ತೆಂಚ್ ಮ್ಹಜೆಂ ಅಂತ್ಯ್ ತರಿ. ಕೋಣ್ ಫುಡೆಂ ಸರ್‍ತಾ?’
ಜಮ್ಯಾಂತ್ ಮಿಶ್ರ್ ಪ್ರತಿಕ್ರಿಯೆಂ ಉಟ್ಲೆಂ.
‘ಆಮ್ಕಾಂ ಕಾಂಯ್ ಜಾಂಕ್ ಲಾಗುಂಕ್ ನಾ!’ ಎಕ್ಲೊ ಮೈಕಾಂತ್ ಬೊಬಾಟ್ಲೊ. ‘ಆಮಿ ಪಾತ್ಕಾಂ ಆಮಿಂಚ್ ಮುಕಾರ್ ಹಾಡಿಜೆ? ಹೆಂ ಕಿತೆಂ ಎಕ್ ಪಬ್ಲಿಕ್ ಕುಮ್ಸಾರ್?’
ತವಳ್ ಜೆರೊಮ್ ಲಾಜ್ರಾ ಆವ್ಚಿತ್ ಫುಡೆಂ ಆಯ್ಲೊ ಆನಿ ಶೀದಾ ವೇದಿ ಚಡ್ಲೊ. ‘ಮ್ಹಾಕಾ ತುಮಿ ವಳ್ಕಾತಾತ್!’ ತಾಣೆ ಮ್ಹಳೆಂ. ‘ಮ್ಹಜಿ ಆತರ್ವಣಾಂ ತುಮಿ ಪಳೆಲ್ಯಾಂತ್. ಪುಣಿ ಹಿಂ ಸರ್ವ್ ನಕ್ಲಿ ಆನಿ ಆಜ್ ಹಾಂವ್ ಹ್ಯಾ ದಗಾಲ್ಭಾಜ್ಯಾಕ್ ವಿಣ್ಗೊ ಕರ್ತೊಲೊಂ. ಉಡಾಸಾಂತ್ ಆಸಾತ್ ತುಮ್ಚ್ಯಾ ಹ್ಯಾಚ್ ವೇದಿಚೆರ್ ಚಲ್‌ಲ್ಲಿಂ ಮ್ಹಜಿಂ ಆತರ್ವಣಾಂ?’
ಉಡಾಸಾಂತ್ ಹಾಡ್ತಾಂ ಹಾಂವ್–
‘ಆಮಿ ಪಯಿಲ್ಲೆ ಪಾವ್ಟಿಂ ಭೆಟ್‌ಚೆಂ’ ಟೇಯ್ಲರ್ ಮ್ಹಣಾಲೊ. ‘ಪವಿತ್ ಅತ್ಮ್ಯಾಚೆ ಸಕ್ತೆನ್.’ ದೋನ್-ತೀನ್ ಖಿಣಾಭರ್ ತಾಣೆ ಆಪ್ಲೆ ದೊಳೆ ಘಟ್ಟ್ ಧಾಂಪ್ಲೆ. ‘ತುಮ್ಚೆರ್ ಪವಿತ್ ಅತ್ಮೊ ದೆಂವ್ಚ್ಯಾರ್ ಆಸಾ ಮ್ಹಳ್ಳೆಂ ತುಮಿ ಹಾಂಗಾಸರ್ ಕೆಲ್ಲ್ಯಾ ತಯಾರಾಯೆಂತ್‌ಚ್ ಕಳ್ಟಾ.’
ತಾಣೆ ಪರ್ತ್ಯಾನ್ ಹಾತ್ ವಿಸ್ತಾರ್ಲೆ.
‘ತುಮ್ಚೆ ಮಧೆಗಾತ್ ಮೊನೆಪಣಿ ಕಷ್ಟೊಂಚೊ ಎಕ್ಲೊ ಭಾವ್ ಆಸಾ.’ ತಾಣೆ ಮಾತೆಂ ಸರ್ಗಾಕ್ ಉಬಾರ್‍ಲೆಂ. ‘ಕಿತ್ಯಾಕ್ ತುಮಿ ಯೆದೊಳ್ ಪರ್ಯಾಂತ್ ತಾಕಾ ಕುಮಕ್ ಕರುಂಕ್ ನಾ?’
ಜೆರೊಮ್ ಲಾಜ್ರಾ. ತಾಚಿ ಕೂಡ್ ಬಾರೀಕಾಯೆನ್ ಕಾಂಪ್ತಾಲಿ. ರಮೋನಾನ್ ಪಳೆಲೆಂ ಮ್ಹಣ್ ಮಾವ್ರಿಸಾನ್ ಪಳೆಲೆಂ ಆನಿ ತಾಣಿ ಪಳೆಲೆಂ ಮ್ಹಣ್ ಭಿಸ್ಪಾನ್ ಪಳೆಲೆಂ. ಜೆರೊಮ್, ಆಪ್ಲೆ ಹಾತ್ ಆಪ್ಲ್ಯಾಚ್ ಜಾಂಗಾಂ ಮದೆಂ ರಿಗವ್ನ್ ಬಸ್‌ಲ್ಲೊ.
‘ಕಿತ್ಯಾಕ್ ಕಾಂಪ್ತಾಯ್ ಭಾವಾ, ಜೆರೊಮ್?’ ಟೇಯ್ಲರಾನ್ ವಿಚಾರ್‍ಲೆಂ. ಹ್ಯೆ ಪಾವ್ಟಿಂ ತುಂ ಜಯ್ತೆವಂತ್ ಜಾತೊಲೊಯಿಚ್ ಕಿತ್ಯಾಕ್ ಪವಿತ್ ಅತ್ಮ್ಯಾನ್ ಆಪಯ್ಲಾಂ, ಫಕತ್ ತುಕಾ ನ್ಹಯ್ ಪುಣ್ ಆಮ್ಕಾಂ ಸರ್ವಾಂಕ್‌ಯಿ.’ ದೋನ್ ಮೆಟಾಂ ಮುಕಾರ್ ಸರೊನ್ ತಾಣೆ ಜೆರೊಮಾಚ್ಯಾ ಮಾತ್ಯಾರ್ ಆಪ್ಲೆ ಹಾತ್ ದವರ್‍ಲೆ. ‘ಹಿ ಜಮಾತ್ ಸಂಪ್ಚ್ಯಾ ಪಯ್ಲೆಂ ತುಂ ಪವಿತ್ ಅತ್ಮ್ಯಾಕ್ ಸಾಕ್ಸ್ ದಿತೊಲೊಯ್!’
ಜೆರೊಮ್ ಕಸ್ಕಸೋನ್ ರಡ್ಲೊ ಆನಿ ಟೇಯ್ಲರಾಚೆ ಹಾತ್ ತಾಣೆ ಆಪ್ಲ್ಯಾ ಹಾತಾಂನಿ ಘೆತ್ಲೆ.
‘ತುಂಚ್ ಮ್ಹಜೊ ಸೊಡ್ವಣ್ದಾರ್!’ ತಾಣೆ ಮ್ಹಳೆಂ. ‘ತುಂವೆಂಚ್ ಮ್ಹಜ್ಯಾ ಅತ್ಮ್ಯಾಕ್ ಸಾಲ್ವರ್ ಕರಿಜೆ.’
‘ತಾಚೆರ್ ಪಾತ್ಯೆ ಆನಿ ಪವಿತ್ ಅತ್ಮ್ಯಾಚೆರ್ ಭರ್ವಸೊ ದವರ್. ದೊಂಗೊರ್‌ಚ್ ಉಟ್ತೆಲೆ ಆನಿ ತುಜಿ ವಾಟ್ ಸಾಫ್ ಕರ್ತೆಲೆ.’ ಪಾಟಿಂ ಸರೊನ್, ಟೇಯ್ಲರ್ ಆಪ್ಲೆ ಬಸ್ಕೆಚೆರ್ ಬಸ್ಲೊ.
‘ಹಾಂವ್ ಸೊಡ್ವಣ್ದಾರ್ ನ್ಹಯ್ ಪುಣ್ ಫಕತ್ ತಾಚೆಂ ಎಕ್ ಹಾತೆರ್.’ ಲುಂವಾಂ ಘಾಲ್ಲೆ ಆಪ್ಲೆ ಹಾತ್ ಟೇಯ್ಲರಾನ್ ಯೆಕಾಮೆಕಾಂತ್ ಧರ್‍ಲೆ. ತಾಚೆ ದೊಳೆ ಸರ್ವಾಂಚೆರ್ ಚರ್‍ಲೆ.
‘ತುಕಾ ಹಾಂವೆಂ ಖಂಯ್ಸರ್ಗಿ ಪಳೆಲಾ!’ ಮ್ಹಣಾಲೊ ಜೆರೊಮ್. ‘ತುಜ್ಯಾ ಹ್ಯಾ ದೊಳ್ಯಾಂಕ್ ಪಳೆಲಾಂ.’
‘ಪವಿತ್ ಅತ್ಮೊ ಸಗ್ಳ್ಯಾನ್‌ಯಿ ಆಸಾ!.’ ಮ್ಹಣಾಲೊ ಟೇಯ್ಲರ್, ಆಪ್ಲೆ ದೊಳೆ ಮಾದಕತೇನ್ ಭರ್ಲೆಲೆಪರಿಂ ಅಶೀರ್ ಕರುನ್. ‘ಹಾಂವ್ ಫಕತ್ ತಾಚೆಂ ಎಕ್ ಹಾತೆರ್ ಮಾತ್ರ್.’
‘ಪುಣ್ ತುಕಾ ಮ್ಹಜೆ ವಿಶಾಂತ್ ಕಶೆಂ ಕಳ್ಳೆಂ?’
‘ಸವಲಾಂ, ಸವಾಲಾಂಚ್ ಜಾವ್ನ್ ಉರೊಂದಿತ್, ಮ್ಹಜ್ಯಾ ಭಾವಾ,’ ಆಪ್ಲೆ ಹಾತ್ ಪರತ್ ಉಬಾರೋನ್ ತಾಣೆ ಮ್ಹಳೆಂ. ‘ಸವಲಾಂ ವಿಚಾರಿನಾಸ್ತಾಂಚ್ ಜಾಪಿ ಮೆಳ್ಟಾನಾ ತುಕಾ ಕಸಲಿ ಖಂತ್?’
ಜೆರೊಮಾನ್ ಹಾತ್ ಜೊಡ್ಲೆ.
‘ಕೊಣಾಕ್ ಸಮ್ಜಾನಾ ತರಿ, ಮ್ಹಾಕಾ ಸಮ್ಜಾತಾ!’ ಆಪ್ಲ್ಯಾ ತೆಮೆಟ್ಯಾಂಚೆರ್ ಉಬೊ ಜಾಲೊ ಟೇಯ್ಲರ್. ‘ಪವಿತ್ ಅತ್ಮೊ ಹಾಂಗಾಸರ್ ದೆಂವ್ಲಾ. ಪಳೆಯಾ.. ಪಳೆಯಾ… ತುಮ್ಚ್ಯಾಚ್ ಬಸ್ಕೆಂ ಸಾಮ್ಕಾರ್‍ಚ್ಯಾನ್ ತೊ ಮೆಟಾಂ ಕಾಡ್ಟಾ!’
ತಾಣೆ ಎಕ್ ಭಿರಾಂಕುಳ್ ಕಿಂಕ್ರಾಟ್ ಮಾರ್‍ಲಿ.
‘ಪವಿತ್ ಅತ್ಮ್ಯಾನ್ ಆಮ್ಕಾಂ ಆಪಯ್ಲಾಂ.’
ತಿಚ್ ಕಿಂಕ್ರಾಟ್ ತೀನ್ ಪಾವ್ಟೀ ಜಮ್ಯಾನ್ ಮಾರ್ತಾನಾ ವೇದಿಚೆರ್ ‘ದಡ್ಡ್’ ಆವಾಜ್ ಜಾಲೊ.
ಜೆರೊಮ್ ಲಾಜ್ರಾ ಆಪ್ಲೆ ಬಸ್ಕೆಥಾವ್ನ್ ಖೊಸ್ಳೊನ್ ಧರ್ಣಿಕ್ ಶೆವ್ಟಾಲ್ಲೊ.
ತಾಕಾ ಥಂಯ್ಸರ್‌ಚ್ ಸೊಡಾ! ಬೊಬಾಟ್ಲೊ ಟೇಯ್ಲರ್. ‘ತುಮ್ಚ್ಯಾ ಭಾವಾಂ ಪಯ್ಕಿಂ ನಿಮಾಣೊ ತೊ ಆನಿ ತುಮಿ ತಾಚೆ ಪಾಸತ್ ಕಿತೆಂಚ್ ಕೆಲೆಂ ನಾ. ಆತಾಂ ಪವಿತ್ ಅತ್ಮೊ ತಾಚೆರ್ ಆಪೆಂ ಕಾಮ್ ಕರುಂದಿ ಜಾಗೆ ಜಾಯಾ, ಜಾಣಾ ಜಾಯಾ…. ಪವಿತ್ರ್ ಅತ್ಮ್ಯಾಚ್ಯಾ ಉಜ್ಯಾಲಾಗಿಂ ಖೆಳ್ ಮಾಂಡುಂಕ್ ವಚಾನಾಕಾತ್.’
ಜಮ್ಯಾಂತ್ ಥರಾವಳ್ ರಿತಿಂಚ್ಯೊ ಬೋಬೊ ಉಟ್ಲೊ, ಆಕೃಂದನಾಂ ಆನಿ ವಿಳಾಪ್.
‘ಆತಾಂ ಹಾಂವ್ ಉಲಯ್ನಾ!’ ಟೇಯ್ಲರಾನ್ ಮ್ಹಳೆಂ. ‘ಆತಾಂ ಮ್ಹಜ್ಯಾ ಜಿಬೆನ್ ಉಲಯ್ತಾ ಪವಿತ್ ಅತ್ಮೊ. ಲಂಯ್ಗಿಕತೆಚ್ಯಾ ಕುಸಡಾಯೆಂತ್ ಪಿಕ್ಲೆಲ್ಯಾಂನೊ, ಆಸಾ ತುಮ್ಚೆ ಮಧೆಂ ಎಕ್ಲಿ ಚಲಿ. ರಾತಿಚಿ ನೀದ್ ತಿಕಾ ಪಡಾನಾ. ತಿಕಾ ಸರೊಪ್ ದಿಸ್ತಾತ್. ತೊ ಸರೊಪ್ ಲಾಗಿಂ ಸರ್‍ತಾನಾ ತಾಚೆಂ ಹೆಡೆಂ ತಿಕಾ ಉದ್ರಿಕ್ತ್ ರಗ್ತಾನ್ ಭರ್‌ಲ್ಲ್ಯಾ ದಾದ್ಲ್ಯಾಚ್ಯಾ ವಿಸ್ವ್ಯಾಪರಿಂ ದಿಸ್ತಾ. ಮುಕಾರ್ ಸರ್ ಚಲಿಯೆ ಆನಿ ಯೆದೊಳ್ ದಾಂಬೂನ್ ಧರ್‍ಲೆಲಿಂ ಲಂಯ್ಗಿಕ್ ಚಿಂತ್ನಾಂ ಆನಿ ಪಾಶಾಂವ್ ಆತಾಂ ವೋಂಕ್.’
ಜಮ್ಯಾ ಮದ್ಲಿ ಎಕ್ಲಿ, ಸುಪುಷ್ಟ್ ಕುಡಿಚಿ ಚಲಿ ಉಟೊನ್ ಧಾಂವೊನ್ ಆಯ್ಲಿ ಆನಿ ಖಿಣಾ ಭಿತರ್ ಟೇಯ್ಲರಾ ಸಾಮ್ಕಾರ್ ವಿಣ್ಗಿ ಜಾಲಿ. ‘ಹೆಂ ವಿಣ್ಗೆಂಪಣ್ ನ್ಹಯ್,’ ಮ್ಹಣಾಲೊ ಟೇಯ್ಲರ್. ‘ತಿ, ತಿಚೊ ಅತ್ಮೊ ತುಮ್ಕಾಂ ದಾಕಯ್ತಾ. ಅತ್ಮೊ ಜೊ ಆತಾಂ ನಿತಳ್ ಜಾಯಿತ್ತ್ ಯೆತಾ. ಆಸಾಗೀ ತುಮ್ಚೆ ಮಧೆಂ ಎಕ್ಲೊ ದಾದ್ಲೊ ಜೊ ತಿಚೆಂ ವಿಣ್ಗೆಪಣ್ ಪಳೆವ್ನ್ ಉದ್ರಿಕ್ತ್ ಜಾಲ್ಲೊ. ಎಕ್ಲೊ ದಾದ್ಲೊ ಹಾಂಗಾಸರ್ ಯೆವ್ನ್ ತಾಕಾ ಘೆಂವ್ಕ್ ಸಕ್ಚೊ?’
ಟೇಯ್ಲರಾನ್, ಹೆಂ ಸವಾಲ್ ಪರ್ತ್ಯಾನ್ ವಾರ್‍ಯಾರ್ ಉಮ್ಕಳೊಂಕ್ ಸೊಡ್ಲೆಂ….
‘ಹೊ ಸಗ್ಳೊ ಜಾವ್ನಾಸಾ ಶಿಖರ್ ಬನಾವಟೆಚೊ!’
ಎಕೆ ಸ್ತ್ರೀಯೆಚೊ ತಾಳೊ ಆಯ್ಕೊನ್ ಸಬಾರ್ ತಕ್ಲ್ಯೊ ಘುಂವ್ಲ್ಯೊ ಆನಿ ತಾಂಕಾಂ ದಿಸ್ಲಿ ಎಕ್ ಮಹಂತನಿ ಸ್ತ್ರೀ, ಸುಪುಷ್ಟ್ ಕುಡಿಚಿ, ಉದ್ರಿಕ್ತ್ ಸೊಬಾಯೆಚಿ. ಕೊಣೆಂಗಿ ಮ್ಹಳೆಂ – ಮಿಸೆಸ್ ಈವಾ ಲಾಜ್ರಾ, ಹ್ಯಾ ಪಿಸಾಂಟ್ ಜೆರೊಮಾಚಿ ಉದ್ರಿಕ್ತ್ ಪತಿಣ್.
‘ವೇದಿರ್ ಚಡ್ ಮಾನೆಸ್ತಿಣಿ!’ ಕೊಣೆಂಗಿ ಆಪವ್ಣೆಂ ದಿಲೆಂ. ‘ಝಡ್ತೆಂಚೆಂ ಝುಜ್ ತುಜೆಥಾವ್ನ್ಂಚ್ ಸುರು ಜಾಂವ್ದಿ. ಜಾಯ್ತೆಂ ಆಯ್ಕಾಲಾಂ ಆಮಿ ತುಜ್ಯಾ ಆನಿ ಜೆರೊಮಾಚ್ಯಾ ಬೊಸ್ಸಾ ವಿಷಾಂತ್…..’
‘ತೆಂ ಗರ್ಜೆಚೆಂ ನ್ಹಯ್, ಮಾನೆಸ್ತಾಂನೊ!’ ಕಸಲಿಚ್ ಕಾವ್ಜೆಣ್ ನಾಸ್ತಾಂ ಈವಾ ವೇದಿರ್ ಚಡ್ಲೆಂ. ‘ಜೆಂ ಕಿತೆಂ ಮ್ಹಜ್ಯಾ ಪತಿ ಜೆರೊಮ್ ಲಾಜ್ರಾನ್ ಹ್ಯಾ ಕಪಟ್ಯಾವಿಶಿಂ ಸಾಂಗ್ಲಾಂ ತೆಂ ಸತ್ ಜಾವ್ನಾಸಾ. ಕೊಣಾಯಿ ವಿಶಾಂತ್ ಕಸಲೆಂಚ್ ನೆಣಾಂ ಹೊ ಕಪಟಿ, ಫಕತ್ ತುಮ್ಚ್ಯಾ ಮಾನಸಿಕತೆಚೆರ್ ಖ್ಹೆಳ್ಟಾ. ತಾಚೆ ತೆ ದೊಳೆ ಹಾಂವೆಂಯಿ ಖಂಯ್ಸರ್ಗಿ ಪಲೆಲ್ಯಾತ್. ತ್ಯಾ ದೊಳ್ಯಾಂಕ್ ಲಿಪೊನ್ ಆಸ್ಚಿಂ ಮ್ಹಜಿಂ ಕರ್ತುಬಾಂ ಜಿಂ ಮ್ಹಜೊ ಪತಿ ಸಯ್ತ್ ನೆಣಾಂ, ತಿಂ ದಿಸ್‌ಲ್ಲಿಂ ನಾಂತ್!’
‘ಹಾಂವ್ ಸರ್ವ್ ಜಾಣಾಂ!’ ಬೊಬಾಟ್ಲೊ ಜೆರೊಮ್. ‘ಸ್ಕಾಯ್‌ಪಾರ್ಕ್ ಪಾರ್ಟಿ ಉಪ್ರಾಂತ್ ಕಿತೆಂ ಜಾಲೆಂ ಮ್ಹಣ್ ಹಾಂವ್ ಜಾಣಾಂ!’
ಈವಾ ಲಾಜ್ರಾ ಹಾಸ್ಲೆಂ. ‘ತ್ಯಾ ಫುಡೆಂ ಹಾಂವ್ ಎಕ್ ಖುನಿಗಾರ್‍ನ್ ಮ್ಹಳ್ಳೆಂ ಮಾತ್ರ್ ತುಂ ನೆಣಾಂಯ್!’
ಅವಸ್ವರ್ – 97 ►►►
