ಮಾನ್ಯತೆಚೊ ಮಹತ್ವ್ ಜಾಣಾ ಜಾವ್ಯಾಂ – ಜೇಮ್ಸ್ ಮೆಂಡೋನ್ಸಾ

“ದೇವ್ ಬರೆಂ ಕರುಂ, ದೇವ್ ಬರೊ ದೀಸ್ ದೀಂವ್ . . . ಅಶೆಂ ಆಮ್ಚ್ಯಾ ಚಡಾವತ್ ಉತ್ರಾಂನಿಂ ದೇವಾಚೆಂ ಹಾಜರ್ಪಣ್ ಆಸ್ತಾ ಜಾಲ್ಲ್ಯಾನ್ ಆಮ್ಚಿ ಕೊಂಕ್ಣಿ ಭಾಸ್ ‘ದೆವಾಚಿಚ್ ಭಾಸ್’ ಮ್ಹಣ್ಯೆತ್. ಆಮ್ಚ್ಯಾ ಭಾಶೆಕ್ ಸಾಂವಿಧಾನಿಕ್ ಮಾನ್ಯತಾ ಮೆಳೊನ್ 31 ವರ್ಸಾಂ ಜಾಲಿಂ ಮ್ಹಣ್ತಾನಾ ಮಾನ್ಯತೆಚೊ ಮಹತ್ವ್ ಜಾಣಾ ಜಾಂವ್ಚಿ, ಮಾನ್ಯತೆವರ್ವಿಂ ಆಮ್ಕಾಂ – ಕೊಂಕ್ಣಿ ಭಾಷಿಕಾಂಕ್ ಸರ್ಕಾರಾಥಾವ್ನ್ ಮೆಳ್ಚ್ಯಾ ಸವ್ಲತೆಂ ವಿಶಿಂ ಚಡ್ ಆನಿ ಚಡ್ ಲೊಕಾಕ್ ಕಳಂವ್ಚಿ ಗರ್ಜ್ ಆಸಾ” ಮ್ಹಣಾಲಾಗ್ಲೊ ಶ್ರಿ ಜೇಮ್ಸ್ ಮೆಂಡೋನ್ಸಾ, ಅನಿವಾಸಿ ಉದ್ಯಮಿ, ಕೊಂಕ್ಣಿ ಸಮರ್ಥಕ್ , ಪೋಶಕ್ ತಶೆಂ ಮಂಗ್ಳುರ್ ಕೊಂಕಣ್ಸ್, ದುಬಯ್ ಹಾಚೊ ಅಧ್ಯಕ್ಷ್.

ಶ್ರಿ ಮೆಂಡೋನ್ಸಾ, ಮಂಗ್ಳುರಾಂತ್ – ಸಾಂ. ಲುವಿಸ್ ಕೊಲೆಜ್ ವಿದ್ಯಾ ಸಂಸ್ಥೊ(ಸ್ವಾಯತ್ತ್) ಕೊಂಕ್ಣಿ ಸಂಘ್, ಸಾಂ. ಲುವಿಸ್ ಪ್ರಕಾಶನ್, ಕೊಂಕ್ಣಿ ಭಾಶಾ ಮಂಡಳ್, ಕರ್ನಾಟಕ್ – ಹಾಣಿ ಸಾಂಗಾತಾ ಮೆಳೊನ್, ಸಾಂ. ಲುವಿಸ್ ಕೊಲೆಜಿಚ್ಯಾ ಎರಿಕ್ ಮಥಾಯಸ್ ಸಭಾಸಾಲಾಂತ್, ಸುಕ್ರಾರಾ, 18 ಅಗೋಸ್ತ್ 2023 ವೆರ್ ಮಾಂಡುನ್ ಹಾಡ್ಲೆಲ್ಯಾ ‘ಕೊಂಕ್ಣಿ ಮಾನ್ಯತಾ ದೀಸ್ ಆಚರಣ್’ ಕಾರ್ಯಾಚೊ ಮುಕೆಲ್ ಸಯ್ರೊ ಜಾವ್ನ್ ಉಲಯ್ತಾಲೊ.

“ಹ್ಯಾ ಕಾರ್ಯಾಕ್ ಮ್ಹಾಕಾ ದುಬಯ್ ಥಾವ್ನ್ ಆಪಯ್ಲಾಂ ಜಾಲ್ಲ್ಯಾನ್ ಪರ್ಗಾಂವಾಂತ್ ಆಸ್ಚ್ಯಾ ಸರ್ವ್ ಕೊಂಕ್ಣಿಮೊಗಿಂಚ್ಯಾ ತರ್ಫೆನ್ ತುಮ್ಕಾಂ ಕೊಂಕ್ಣಿ ಮಾನ್ಯತಾ ದಿಸಾಚೆ ಶುಭಾಶಯ್ ಪಾಟಯ್ತಾಂ” ಮ್ಹಣ್ ಆಪ್ಲ್ಯಾ ಉಲವ್ಪಾಕ್ ಸುರ್ವಾತ್ ಕೆಲ್ಲ್ಯಾ  ತಾಣಿ “ಹಾಂಗಾಸರ್ ಜಾಯ್ತಿಂ ಸಂಘಟನಾಂ ಕೊಂಕ್ಣೆಚೊ ನಿಸ್ವಾರ್ಥ್ ವಾವ್ರ್ ಕರಿತ್ ಆಸಾತ್. ಸಾಹಿತಿ, ಕಲಾಕಾರ್ ಕೊಂಕ್ಣೆ ಖಾತಿರ್ ಕಾಮ್ ಕರುನ್ ಆಸಾತ್. ತಶೆಂಚ್ ಪರ್ಗಾಂವಾಂತೀ ಥೊಡಿಂ ಸಂಘಟನಾಂ ಕೊಂಕ್ಣಿ ಸೆವಾ ದೀವ್ನ್ ಆಸಾತ್. ಹಾಂವ್ ಅಧ್ಯಕ್ಶ್ ಜಾವ್ನಾಸ್ಚ್ಯಾ ‘ಮಂಗ್ಳುರ್ ಕೊಂಕಣ್ಸ್’ ಸಂಘಟನಾ ಥಾವ್ನ್‌ಯೀ ಕೊಂಕ್ಣೆಚೊ ವಾವ್ರ್ ಚಾಲು ಆಸಾ. ಕೊಂಕ್ಣೆ ಖಾತಿರ್ ವಾವುರ್ಚ್ಯಾ ಸಂಸ್ಥ್ಯಾಂಕ್ ಆನಿ ಮನ್ಶ್ಯಾಂಕ್  ಸಹಕಾರ್ ಗರ್ಜೆಚೊ” ತಾಣಿ ಮ್ಹಳೆಂ.

ಮುಕಾರುನ್ “ಕೊಂಕ್ಣಿ ಭಾಶಿಕಾಂಚೊಂ ಸಂಕೊ ಉಣೊ ಜಾವ್ನ್ ಯೆತೇ ಆಸಾ ಮ್ಹಣ್ತಾತ್. ಆಮ್ಚ್ಯಾ ಭುರ್ಗ್ಯಾಂಕ್ ಕೊಂಕ್ಣಿ ಶಿಕಂವ್ಚೆಂ ವಿಶಿಂ ಚಡಿತ್ ಗುಮಾನ್ ದೀಂವ್ಕ್ ಜಾಯ್.” ಮ್ಹಳ್ಳ್ಯಾ ಶ್ರೀ ಮೆಂಡೋನ್ಸಾನ್ ತರುಣ್ ವಿದ್ಯಾರ್ಥಿಂಕ್ “ಪಯ್ಲ್ಯಾನ್; ಆಮ್ಚ್ಯಾ ಚೆಡ್ವಾಂ ಭುರ್ಗ್ಯಾಂನಿಂ ಕೊಂಕ್ಣಿ ಶಿಕ್ಲ್ಯಾರ್ ಫಾಲ್ಯಾಂ ತಿಂ ಆಪ್ಲ್ಯಾ ಭುರ್ಗ್ಯಾಂಕೀ ಕೊಂಕ್ಣಿ ಶಿಕಯ್ತೆಲಿಂ, ದುಸ್ರ್ಯಾನ್; ಆಜ್ – ಕಾಲ್ ಸಾಮಾಜಿಕ್ ಮಾಧ್ಯಮಾಂಚೊಂ ಕಾಳ್ ಚಾಲು ಆಸಾ. ಸಮಾಜಿಕ್ ಮಾಧ್ಯಮಾಂ ವಾಪರ್ಚ್ಯಾ ಯುವಜಣಾಂನಿ ಸಮಾಜಿಕ್ ಮಾಧ್ಯಮಾಂನಿ ಕೊಂಕ್ಣಿ ವಾಪಾರುನ್ ಆಮ್ಚಿ ಭಾಸ್ ಫುಲಯ್ಜೆ” ಮ್ಹಣ್ ಉಲೊ ದಿಲೊ.

ತಾಂಚ್ಯೆ ಹಸ್ತುಕಿಂ ಲೊಕಾರ್ಪಣ್ ಜಾಲ್ಲ್ಯಾ ಬುಕಾಚೊ ಬರಯ್ಣಾರ್ ಪ್ರಾಧ್ಯಾಪಕ್ ಸ್ಟೀವನ್ ಕ್ವಾಡ್ರಸ್, ಪೆರ‍್ಮುದೆ ಹಾಂಚ್ಯಾ ಸಾಹಿತಿಕ್ ವಾವ್ರಾಕ್ ಬರೆಂ ಮಾಗೊನ್ ಶ್ರೀ ಮೆಂಡೋನ್ಸಾನ್, ಕೊಂಕಣ್ ಕೊಗುಳ್ ವಿಲ್ಫಿ ರೆಬಿಂಬಸಾಚೆಂ ಅಮರ್ ಪದ್ ‘ಕೊಂಕ್ಣಿ ಆಮ್ಚಿ ಭಾಸ್, ಕೊಂಕಣ್ ಆಮ್ಚೊ ಗಾಂವ್ . . . ‘ ಉಲ್ಲೇಕ್ ಕರುನ್, ಆಪ್ಲ್ಯಾ ಉತ್ರಾಂಕ್ ವಿರಾಮ್ ದಿಲೊ.

‘ಕೊಂಕಣಿ ಭಾಸ್ ಭರ್ಮಾಚಿ – ಸರ್ವ್ ಧರ್ಮಾಂಚಿಂ’ ಮ್ಹಳ್ಳ್ಯಾ ಗೀತ್ – ನಾಚಾಸವೆಂ ಸುರ್ವಾತ್ಲೆಲ್ಯಾ ಕಾರ್ಯಾಂತ್, ಜೋಯೆಲ್ ಕ್ರಾಸ್ತಾನ್ ಯೆವ್ಕಾರ್ ಮಾಗ್ಲೊ. ಸಾಂ. ಲುವಿಸ್ ಕೊಲೆಜಿಚೊ ಪ್ರಭಾರಿ ಪ್ರಾಚಾರ್ಯ್ ದೊ| ಡೆನಿಸ್ ಫೆರ್ನಾಂಡಿಸ್ ಹಾಣಿ ಕಾರ್ಯಾಚೆಂ  ಅಧ್ಯಕ್ಷ್‌‌ಪಣ್ ಘೆತ್‌ಲ್ಲೆಂ. ಕೊಂಕಣಿ ಭಾಶಾ ಮಂಡಳ್, ಕರ್ನಾಟಕ ಹಾಚೊ ಅಧ್ಯಕ್ಷ್ ಶ್ರೀ ಕೆ. ವಸಂತ ರಾವ್ ಮಾನಾಚೊ  ಸಯ್ರೊ  ಜಾವ್ನ್ ವೆದಿರ್ ಹಾಜರ್ ಆಸ್ಲೆ.

ಇತಿಹಾಸ್ ಶಾಸ್ತ್ರಾಚೊ ಪ್ರಾಧ್ಯಾಪಕ್, ಪ್ರೊ| ಸ್ಟೀವನ್ ಕ್ವಾಡ್ರಸ್ ಹಾಣಿ ಬರವ್ನ್, ಸಾಂ. ಲುವಿಸ್ ಪ್ರಕಾಶನಾನ್ ಫಾಯ್ಸ್ ಕೆಲ್ಲೊ ‘ಜಮ್ಯಾಂತ್ಲ್ಯಾನ್’ ಪುಸ್ತಕ್ ಶ್ರೀ ಜೇಮ್ಸ್ ಮೆಂಡೋನ್ಸಾ ಹಾಣಿ  ಹ್ಯಾ ಸುವಾಳ್ಯಾರ್ ಲೊಕಾರ್ಪಣ್ ಕೆಲೊ. ಹ್ಯಾ ವೆಳಿಂ ಸಾಂ. ಲುವಿಸ್ ಪ್ರಕಾಶನಾಚಿ ದಿರೆಕ್ತೊರ್ ಡೊ| ವಿದ್ಯಾ ವಿನುತ ಡಿ’ಸೊಜಾ ಹಿಣೆ  ವೆದಿರ್ ಸಯ್ರ್ಯಾಂಕ್ ಸಾಂಗಾತ್ ದಿಲೊ.

ಬರಯ್ಣಾರ್ ಪ್ರೊ| ಸ್ಟೀವನ್ ಕ್ವಾಡ್ರಸ್ ಹಾಣಿ ಆಪ್ಲ್ಯಾ ಕೊಂಕ್ಣಿ ವಾವ್ರಾಚಿ ಝಳಕ್ ದಿಲಿ, ರಿಜಿಸ್ಟ್ರಾರ್ ಡೊ| ಆಲ್ವಿನ್ ಡೆ’ಸಾ ಹಾಣಿ ‘ಜಮ್ಯಾಂತ್ಲ್ಯಾನ್’ ಬುಕಾಚಿ ಒಳಕ್ ಕರುನ್ ದಿಲಿ. ಹ್ಯಾ ಸಂದರ್ಭಾರ್ ಡೊ| ಡೆಸಾನ್ ಫಕತ್ ದೋನ್ ವರ್ಸಾಂಚ್ಯಾ ಆವ್ಧೆಂತ್ ಸಾಂ. ಲುವಿಸ್ ಪ್ರಕಾಶನಾನ್ 18 ಪುಸ್ತಕಾಂ ಫಾಯ್ಸ್ ಕರುನ್ ಏಕ್ ದಾಕ್ಲೊಚ್ ಕೆಲಾಂ ಮ್ಹಳೆಂ.

ಹಿಟ್ಲರ್, ಮುಸಲೋನಿ ಥಾವ್ನ್ ಧರುನ್ ಇತಿಹಾಸ್, ಬಸವ, ಅಂಬೇಡ್ಕರ್ ಮಾತ್ ನಯ್, ಬಸ್ಸಾಚ್ಯಾ ಪಯ್ಣಾ ಅನ್ಭೊಗಾ ಪರ್ಯಾಂತ್ ವೆವೆಗ್ಳ್ಯಾ ವಿಶಯಾಂಚೇರ್ 35 ಲೇಕನಾಂ ಆಟಾಪುನ್ ಆಸ್ಚೊ ಸ್ಟೀವನಾಚೊ ಬೂಕ್ ‘ಜಮ್ಯಾಂತ್ಲ್ಯಾನ್’ ಸಗ್ಳ್ಯಾಂನಿ ವಾಚಿಜೆ ಜಾಲ್ಲೊ, ಜಿವಿತಾಚಿಂ ಮೊಲಾಂ ಆಟಾಪುನ್ ಆಸ್ಚೊ ಏಕ್ ‘ಮೌಲ್ಯ್ ಶಿಕ್ಶಣಾಚೊ ಬೂಕ್’ – ತಾಣಿ ಮ್ಹಳೆಂ.

ಆಪ್ಲ್ಯಾ ಅಧ್ಯಕ್ಷೀಯ್ ಭಾಶಣಾಂತ್ ಡೊ| ಡೆನಿಸ್ ಫೆರ್ನಾಂಡಿಸ್, ಬೊಳಿಯೆ ಹಾಣಿ ಚಾ. ಫ್ರಾ. ದೆಕೊಸ್ತಾಚ್ಯಾ ಕೊಂಕ್ಣಿ ಭಾಸ್ ಸರಸ್ವತಿ ನಂಯ್ಚ್ಯಾ ಸುಳ್ಸುಳ್ಯಾಂನಿ ಉದೆಲ್ಲಿ ಭಾಸ್ ಮ್ಹಳ್ಳ್ಯಾ ಉತ್ರಾಂಚೊಂ ಉಲ್ಲೇಕ್ ಕರುನ್, ಸರಸ್ವತಿ ನಂಯ್ ನಪಂಯ್ಚ್ ಜಾವ್ನ್ ತಿಚೆರ್ ಪಾತ್ಯೆವ್ನ್ ಆಸ್‌ಲ್ಲ್ಯಾಂನಿ ಗಾಂವ್ ಸಾಂಡುನ್ ವಚಾಜೆ ಪಡ್ಲೆಂ, ಆನಿ  ಕೆನರಾ, ಕೇರಳಾ ಗೆಲ್ಯಾರೀ ಆಪ್ಲಿ ಕೊಂಕ್ಣಿ ಭಾಸ್  ಆನಿ ಸಂಸ್ಕೃತಿಚೊ  ಪೋಸ್ ಕರುಂಕ್ ತೆ ವಿಸ್ರಲೆನಾಂತ್ ಮ್ಹಳ್ಳೆವಿಶಿಂ ಚಾರಿತ್ರಿಕ್ ನದ್ರೆನ್ ಸವಿಸ್ತಾರ್ ವಿವರ್ ದಿಲೊ.

ದಿಯೆಸೆಜಿಚ್ಯಾ ಪತ್ರಾರ್ ಛಾಪುನ್ ಆಯಿಲ್ಲ್ಯಾ ತೀನ್ ಕೊಂಕ್ಣಿ ಲೇಖನಾಂಚೊಂ ಉಲ್ಲೇಕ್ ಕರುನ್, ಕೊಂಕ್ಣಿ ಲೋಕ್ ಕೆನರಾ ಥಾವ್ನ್ ಕೆನಡಾಕ್ ವೆತಾನಾ ಸರಸ್ವತಿ ನಂಯ್ ನಪಂಯ್ಚ್ ಜಾಲ್ಲೆಪರಿಂ ಕೊಂಕ್ಣಿ  ಭಾಸ್‌ಯೀ ನಪಂಯ್ಚ್ ಜಾಯ್ತ್‌ಗೀ ? ಮ್ಹಳ್ಳಿ ಭಿರಾಂತ್ ಧೊಸ್ತೇ ಆಸಾ ಮ್ಹಣ್ ಡೊ| ಫೆರ್ನಾಂಡಿಸ್ ಮ್ಹಣಾಲೆ. ಕೊಂಕ್ಣಿ ಉಲಂವ್ಚ್ಯಾ ಆಮಿ ಆಮ್ಚ್ಯಾ ಭಾಶೆ ವಿಶ್ಯಾಂತ್ ನಿರ್ಲಕ್ಶಾ ಕರಿನಾಸ್ತಾನಾ ಪೋಸ್ ಕರ್ಚೆ ವಿಶ್ಯಾಂತ್ ಚಿಂತ್ಚಿ ಗರ್ಜ್ ಆಸಾ ಮ್ಹಣ್ ತಾಣಿ ಹ್ಯಾ ವೆಳಾರ್ ಜಾಗಯ್ಲೆಂ.

ಕಾರ್ಯಕ್ರಮಾಂತ್ ಕೊಂಕ್ಣಿ ಸಂಘಾಚ್ಯಾ ಆದ್ಲ್ಯಾ ವರ್ಸಾಚಿ ವರ್ದಿ ಪಡ್ದ್ಯಾರ್ ದಾಕಯ್ಲಿ, ಪರ್ಜಳ್ ವಾರ್ಷಿಕ್ ಪತ್ರ್ ಉಗ್ತಾವಣ್ ಕೆಲೆಂ  ಆನಿ ನವ್ಯಾನ್ ವಿಂಚೊನ್ ಆಯಿಲ್ಲ್ಯಾ ಹುದ್ದೆದಾರಾಂಕ್ ಹುದ್ದೊ ಹತಾಂತಾರ್ ಕರ್ಚೆಂ ಕಾರ್ಯೆಂ ಚಲ್ಲೆಂ. ಹುದ್ದೊ ಹತಾಂತರ್ ಕಾರ್ಯೆಂ ಕೊಂಕ್ಣಿ ವಿಭಾಗಾಚಿ ಪ್ರಾಧ್ಯಾಪಕಿ  ಫ್ಲೋರಾ ಕಾಸ್ತೆಲಿನೊ ಹಿಣೆ ಚಲವ್ನ್ ವೆಲೆಂ.

ವೆದಿರ್ ಕೊಂಕ್ಣಿ ಸಂಘಾಚೆ ಅಧ್ಯಕ್ಷಾ ಸೆವ್ರಿನ್ ಪಿಂಟೊ, ಸರಿತಾ ಕ್ರಾಸ್ತಾ, ರಿಶಲ್ ನೊರೊನ್ಹಾ ಆನಿ ಕಾರ್ಯದರ್ಶಿ ಜೋಶ್ವಾ ಸಿಕ್ವೇರಾ, ಮೆಲ್ಕೋನ್ ಡಿ’ಸೊಜಾ, ಕೇವಿನ್ ಮೊಂತೆರೊ ಆನಿ ದಿಯೋನಾ ಮಿರಾಂದಾ ಹಾಜರ್ ಆಸ್ಲಿಂ.

ಜೋಶ್ವಾ ಸಿಕ್ವೇರಾನ್ ಕಾರ್ಯೆಂ ಚಲಯ್ಲೆಂ. ಮೆಲ್ಕೋನ್ ಡಿ’ ಸೊಜಾನ್ ದಿನ್ವಾಸ್ ಪಾಟಯ್ಲೆ. ಮನೊರಂಜನಾಚೊ ವಾಂಟೊ ಜಾವ್ನ್ ಕೊಂಕ್ಣಿ ಸಂಘಾಚ್ಯಾ ಸಾಂದ್ಯಾಂನಿ ನಾಚ್  ಆನಿ  ನಾಟ್ಕುಳೆ ಸಾದರ್ ಕೆಲೆ.