ಆಮಿ ಆತಾಂ ಏಕ್ ಥಾವ್ನ್ ಬಾರಾ ಮ್ಹಣಾಸರ್ ಮೆಜ್ಯಾಂ
ಆನಿಂ ಆಮಿ ಸರ್ವ್ ವೊಗೊಚ್ ರಾವ್ಯಾಂ
ಹ್ಯಾ ಭುಂಯ್ ಥಳಾರ್ ಎಕಾ ಘಡ್ಯೆಕ್ ತರೀ
ಖಂಚೀಯ್ ಭಾಸ್ ಉಲಯ್ನಾಂಸ್ತಾಂ ಉರ್‍ಯಾಂ.
ಆಮಿ ಎಕಾ ಖಿಣಾಕ್ ಥಾಂಬ್ಯಾಂ
ಆನಿಂ ಹಾತ್ ಹಾಲಾಯ್ನಾಸ್ತಾಂ ರಾವ್ಯಾಂ
ತಿ ಏಕ್ ಸ್ವಾದಿಕ್ ಘಡಿ ಜಾವ್ನಾಸ್ತಲಿ –
ಆಂವ್ಸರ್ ನಾಸ್ಲಿ, ಯಾಂತ್ರಿಕತಾ ನಾಸ್ಲಿ.
ಆವ್ಚಿತ್ ಆಜಾಪಾನ್ ಮ್ಹಳ್ಳೆಬರಿಂ
ಆಮಿ ಸರ್ವ್ ಸಾಂಗಾತಾ ಆಸ್ತೆಲ್ಯಾಂವ್
ಹಿಂವಾಳ್ ದರ್‍ಯಾಂತ್ಲೆ ಮೊಗೊರ್
ಮಾಸ್ಯಾಂಕ್ ಧೊಸ್ಚೆನಾಂತ್.
ಆನಿಂ ಮೀಟ್ ಎಕ್ಟಾಂವ್ಚೆ ಮನಿಸ್
ಆಪ್ಲೆ ಘಾಯೆಲ್ಲೆ ಹಾತ್ ದೆಕ್ಚೆನಾಂತ್.
ಪಾಚ್ವಿಂ ಝುಜಾಂ ಆಸಾ ಕರ್ಚೆ,
ತೆಲಾಚಿಂ ತಶೆಂ ಉಜ್ಯಾಚಿಂ ಝುಜಾಂ ಆಸಾ ಕರ್ಚೆ,
ಕೊಣಾಕೀ ಬಚಾವೀ ನಾತ್ಲೆಂ ಜೀಕ್ ಜೊಡ್ಚೆ,
ನಿತಳ್ ವಸ್ತುರ್ ನ್ಹೆಸ್ತಲೆ.
ಆನಿಂ ಆಪ್ಲ್ಯಾ ಭಾಂವ್ಡಾಂ ಸಂಗಿಂ
ಕಿತೆಂಚ್ ಕರಿನಾಸ್ತಾಂ ಸಾವ್ಳೆಂತ್ ಚಲ್ತಲೆ,
ಮ್ಹಜಿ ಹಿ ಆಶಾ, ಶೆಳೆಪಣ್ ಮ್ಹಣ್
ತುಮಿ ಚೂಕ್ ಸಮ್ಜಾನಾಯೆ.
ಜಿಣಿ ಮ್ಹಳ್ಯಾರ್ ಆನಿಂ ಕಿತೆಂ:
ಮ್ಹಾಕಾ ಮರಣ್ ಭರ್‌ಲ್ಲೆಂ ಟ್ರಕ್ ನಾಕಾ
ಆಮ್ಚಿ ಜಿಣಿ ಶಾಭಿತ್ ದವರ್ಚಾಂತ್
ಆಮಿ ಇತ್ಲೆಯ್ ಗುಮಾನ್ ದಿತಾಂವ್
ಆನಿಂ ಕಿತೆಂಯ್ ಕರಿನಾಸ್ತಾಂ ರಾವ್ತಾಂವ್
ಆಮಿ ಆಮ್ಕಾಂಚ್ ಸಮ್ಜಾನಾಸ್ತಾಂ ಆಸ್ಚಿ
ಆನಿಂ ಮರ್ಣಾಚ್ಯಾ ಭಿಯಾನ್ ಥರ್ಥಚಿ
ಹಿ ಬೆಜಾರಾಯ್
ಬೊವ್ಶ್ಯಾ ಏಕ್ ಲಾಂಬ್ ಮೌನ್ ಉಣೆ ಕರಿತ್
ಕಶೆಂ ಸರ್ವ್ ಮೆಲ್ಲೆಬರಿಂ ದಿಸ್ತಾ
ಆನಿಂ ಉಪ್ರಾಂತ್ ಜಿವೆಂಚ್ ಆಸ್ಚೆಂ ದಿಸ್ತಾ
ಬೊವ್ಶ್ಯಾ ಹಿ ಭುಂಯ್ ಆಮ್ಕಾಂ ಶಿಕಯ್ತ್
ಹಾಂವ್ ಆತಾಂ ಏಕ್ ಥಾವ್ನ್ ಬಾರಾ ಮ್ಹಣಾಸರ್ ಮೆಜ್ತಾಂ
ತುಮಿ ವೊಗೊಚ್ ರಾವಾ ಆನಿಂ ಹಾಂವ್ ಚಲ್ತಾಂ.
► ಪಾಬ್ಲೊ ನೆರುಡಾ
ಕೊಂಕ್ಣೆಕ್ : ಆಂಟನಿ ಬಾರ್ಕುರ್
ಸುಖಾಚ್ಯಾ ಸೊದಾಂತ್ ವೇಗಾನ್ ಧಾಂವ್ಚ್ಯಾ ಮನ್ಶ್ಯಾನ್ ಏಕ್ ಥಾವ್ನ್ ಬಾರಾ ಮೆಜುನ್ ತಿತ್ಲೊ ವೇಳ್ ಥಾಂಬಾನಾ ತರ್ ತೊ ಮತ್ ಚುಕೊನ್ ಪಡ್ಚಿ ಸಾಧ್ಯತಾ ಚಡ್ ಅಸಾ. ತಾಂತ್ರಿಕ್ ಗಿನ್ಯಾನಾನ್ ಮನ್ಶಾಚ್ಯಾ ಮೆಂದ್ವಾಕ್ ಅನಿ ಮನ್ಶಾ ಜಿವಿತಾಕ್ ಸಂಪೂರ್ಣ್ ಅಪ್ಲ್ಯಾ ತಾಬೆನ್ ಘೆಂವ್ಚೊ ಭಿರಾಂಕುಳ್ ಅಪಾಯ್ ಮ್ಹನ್ಶ್ಯಾಕುಳಾ ಫುಡೆಂ ಅಸಾ. ಹಿ ಕವಿತಾ ಅಯ್ಚ್ಯಾ ಪರಿಸ್ಥಿತೆಕ್ ಗರ್ಜೆಚಿ ಮ್ಹಣ್ ಹಾಂವ್ ಚಿಂತಾಂ.