ಟ್ರಾಫಿಕ್

“ಅರ್ಧ್ಯಾ ಘಂಟ್ಯಾ ಭಿತರ್ ಡೆಲಿವರಿ ದೀವ್ನ್ ಜಾಯ್ಜೆ. ಪೇಶೆಂಟ್ ಸೀರಿಯಸ್ ಆಸಾ ಖಂಯ್..” ಕೌಂಟರಾಂತ್ ಆ‌ಸ್‌ಲ್ಲ್ಯಾ ಚೆಡ್ವಾನ್  ಒಕ್ತಾಂಚಿ ಪೊಟ್ಲಿ ಬಶೀರಾಚಾ ಹಾತಾಕ್ ವೊಡ್ಡಾಯ್ಲಿ.

ಪೊಟ್ಲಿ ಅಪ್ಲ್ಯಾ ಸ್ಕೂಟಿರ್ ಆಸ್‌ಲ್ಲ್ಯಾ ಕ್ಯಾರಿ ಬ್ಯಾಗಾಂತ್ ಶಾಭಿತ್ ದವರ್‌ಲ್ಲೆಂಚ್ ತಾಣೆಂ ಡೆಲಿವರಿ ಎಡ್ರೆಸ್ ಪರತ್ ಏಕ್ ಪಾವ್ಟಿಂ ಸೂಕ್ಷಿಮಾಯೆನ್ ಪಳೆಯ್ಲೊ.

ಪಾಟ್ಲ್ಯಾ ತೀನ್ ವರ್ಸಾಂಥಾವ್ನ್ ಬಶೀರ್ ತ್ಯಾ ಸಿಟಿಂತ್ ಏಕ್ ಡೆಲಿವರಿ ಬೋಯ್ ಜಾವ್ನ್ ಹರ್ ದೀಸ್ ಮ್ಹಳ್ಳೆಬರಿಂ ಆಡ್-ಉಬೆಂ ಭೊಂವೊನ್ ಅಸ್ತಾ. ಚಡಾವತ್  ಎಡ್ರೆಸ್ ತಾಕಾ ಭೋವ್ ವಳ್ಕಿಚೆ. ತರೀ ಡೆಲಿವರಿಕ್ ಭಾಯ್ರ್ ಸರ್ಚ್ಯಾ ಪಯ್ಲೆಂ ತಾಣೆಂ ಏಕ್ ಪಾವ್ಟಿಂ ಎಡ್ರೆಸ್ ಸೂಕ್ಮಿಮಾಯೆನ್ ಪಳೆಂವ್ಚೊ ಅಸ್ತಾ. ಎಡ್ರೆಸ್ ಪಳೆಲ್ಲೆಂಚ್, ಖಿಣಾನ್ ತಾಚಾ ಮತಿಚಾ ಪಡ್ದ್ಯಾರ್ ಏಕ್ ರೂಟ್ ಮ್ಯಾಪ್ ತಯಾರ್ ಜಾತಾ ಆನಿ ಥಂಯ್ ಪಾವೊಂಕ್ ಭೋವ್ ಮಟ್ವಿ ವಾಟ್ ಖಂಯ್ಚಿ ಮ್ಹಳ್ಳೆಂ ನಖ್ಖಿ ಜಾತಾ.

ಸೈಂಟ್ ಜೋನ್ ಹೊಸ್ಪಿಟಲ್
ಕಾರ್ಡಿಯಕ್  ಕೇರ್ ಯೂನಿಟ್
ರೂಮ್ ನಂಬರ್ 8
ಪಿರಿಯಾಪಟ್ಣ, ಥರ್ಡ್ ಕ್ರಾಸ್

ಚೀಟ್ ಘಡಿ ಕರ್ನ್ ಬೊಲ್ಸಾಂತ್ ಚೆಪ್‌ಲ್ಲ್ಯಾ ಬಶೀರಾನ್ ಅಪ್ಲಿ ಸ್ಕೂಟಿ ಸ್ಟಾರ್ಟ್ ಕೆಲಿ ಆನಿ ಪಯ್ಣ್ ಆರಂಭ್ ಕೆಲೆಂ. ಟ್ರಾಫಿಕ್ ನಾತ್ಲ್ಯಾರ್ ಸೈಂಟ್ ಜೋನ್ ಹಾಸ್ಪಿಟಲಾಕ್ ಪಾವೊಂಕ್ ಭರ್ತಿ ಅರ್ಧೆಂ ವೋರ್. ಭಿತರ್ಲ್ಯಾ ವಾಟೆಂನಿ ಗೆಲ್ಯಾರ್ ವೀಸ್ ಮಿನುಟಾನಿಂ ಪಾವ್ಯೆತ್. ಪೇಶೆಂಟ್ ಸೀರಿಯಸ್ ಅಸಾ ಮ್ಹಳ್ಳಿ ಚೆತಾವ್ಣಿ ಪಯ್ಲೆಂಚ್ ಮೆಳ್‌ಲ್ಲಿ ದೆಕುನ್ ಬಶೀರಾನ್ ಧಾ ಮಿನುಟಾಂ ಲಾಭ್ ಕರುಂಕ್ ಚಿಂತ್‌ಲ್ಲೆಂ ಅನಿ ಮುಖೆಲ್ ರಸ್ತ್ಯಾಥಾವ್ನ್ ಭಿತರ್ಲ್ಯಾ ರಸ್ತ್ಯಾಕ್ ಅಪ್ಲಿ ಸ್ಕೂಟಿ ಘುಂವ್ಡಾಯಿಲ್ಲಿ.

ಪಯ್ಣ್ ಆರಂಭ್ ಕರ್ನ್ ಪಾಂಚ್ ಮಿನುಟಾಂ ಜಾತಿತ್.

ಪಯ್ಸ್  ರಸ್ತ್ಯಾ ಮಧೆಂ ವ್ಹಡ್ ಏಕ್ ಲೊಕಾಜಮೊ ದಿಸ್ತೆ ಆಸಾ.

“ಅವ್ಘಡ್ ಪುಣೀ ಘಡೊಂಕ್ ನಾ ಮೂ…” ಬಶೀರಾಚಾ ಸ್ಕೂಟಿಚೊ ವೇಗ್ ಅಪಾಪಿಂಚ್ ದೆಂವ್ಲೊ.

“ಎಮ್ಮೆಲ್ಲೆಕ್ ಯೂಥ್ ಕ್ಲಬ್ಬಾ ತರ್ಫೆನ್ ಸನ್ಮಾನ್ ಖಂಯ್. ಅನಿ ಏಕ್ ದೋನ್ ಘಂಟ್ಯಾಂಕ್ ತೆಣೆಂ ಪಾಸ್ ಜಾಂವ್ಚೆ ಬರಿ ನಾ. ರಸ್ತ್ಯಾರ್‌ಚ್ ಸ್ಟೇಜ್ ಉಬಾರ್ಲ್ಯಾ..” ಮುಕ್ಲೆ ಕುಶಿಥಾವ್ನ್ ಆಯಿಲ್ಲ್ಯಾ ಎಕಾ ರಿಕ್ಷಾವಾಲ್ಯಾನ್ ಮಾಹೆತ್ ದಿಲಿ. ಕಶೆಂ ಪುಣೀ ವಾಟ್ ಕರ್ನ್ ಮುಕಾರ್ ವಚ್ಯೆತ್ ಮ್ಹಳ್ಳ್ಯಾ ಚಿಂತ್ಪಾನ್ ಬಶೀರಾನ್ ಸ್ಕೂಟಿ ಮುಕಾರ್ ವ್ಹೆಲಿ.

“ಖಂಯ್ ಸಾಯ್ಭಾ ಮಧೆಂ. ಇತ್ಲೊ ಲೋಕ್ ಜಮೊ ಜಾಲ್ಲೊ ದಿಸಾನಾಂಗೀ..” ಲಾಗಿಂ ಪಾವ್ಲ್ಯಾ ತಕ್ಷಣ್ ಎಕ್ಲ್ಯಾನ್ ಅವಾಜ್ ಘಾಲೊ.

“ಇಲ್ಲೆಂ ಅರ್ಜೆಂಟ್ ಅಸಾ…” ಬಶೀರ್ ತಗ್ಸಾಲೊ.

“ಅರ್ಜೆಂಟ್ ಆಸ್‌ಲ್ಲೆಂ ತರ್ ಹೆಣೆಂ ಕಿತ್ಯಾಕ್ ಆಯ್ಲೊಯ್ ಪುನೆಗೆಲ್ಲ್ಯಾ… ಅನ್ಯೇಕ್ ರಸ್ತೊ ಧರ್ಯೆತ್ ಆಸ್ಲೊ ನ್ಹಂಯ್ಗೀ..?” ತೊ ವೆಕ್ತಿ ಇಲ್ಲೆಂ ತಾಪ್‌ಲ್ಲೆ ಬರಿ ದಿಸ್ಲೊ.

“ದಾಟ್ಟು ಹಾಂಗಾ ಆಯ್ಲ್ಯಾ ಉಪ್ರಾಂತ್‌ಚ್ ಕಳ್ಳೆಂ ಕೀ ಹಾಂಗಾ ಬ್ಲೋಕ್ ಆಸಾ ಮ್ಹಣ್. ಅನಿ ಹಾಂಗಾ ಥಾವ್ನ್ ಪಾಟಿಂ ಘುಂವ್ಡಿ ಕಾಡ್ನ್ ಅನ್ಯೇಕ್ ರಸ್ತೊ ಧರ್ತಾಂ ಮ್ಹಣ್ತಾನಾ ಚಡುಣೆಂ ಕಾಲ್ದೆಂ ವೊರ್ ಲಾಗ್ತಾ…” ಬಶೀರಾನ್ ಹಕೀಗತ್ ಸಾಂಗೊನ್ ಸೊಡ್ಲಿ.

“ತುಂ ವ್ಹಡ್ಲೊ ಜಡ್ಜ್ ಕಾಂಯ್ ನ್ಹಂಯ್ ನೇ. ಇಲ್ಲೊ ವೇಳ್ ರಾವ್. ಏಕ್ ಕಾಲ್ದೊ ಘಂಟೊ ಮ್ಹಳ್ಯಾರ್ ವಿಶೇಸ್ ಕಾಂಯ್ ನ್ಹಂಯ್. ಆಮ್ಚೊ ಎಮ್ಮೆಲ್ಲೆ ಯೆತಾ ಮ್ಹಣ್ ಆಮಿ ಪಾಟ್ಲ್ಯಾ ದೋನ್ ವೊರಾಂಥಾವ್ನ್ ರಾಕೊನ್ ಆಸಾಂವ್. ತುಂಯ್ ಹಾಂಗಾ ಕುಶಿಕ್ ರಾವ್. …”  ತೊ ವೆಕ್ತಿ ಮುಕಾರ್ ಜಮ್ಯಾ ಮಧೆಂ ಘುಸೊನ್ ಅದೃಶ್ಯ್ ಜಾಲೊ.

“ಎಮ್ಮೆಲ್ಲೆ ಯೇಂವ್ಕ್ ವೇಳ್ ಲಾಗತ್‌ಗೀ..?” ಬಶೀರಾನ್ ಥಂಯ್ಸರ್ ಆಸ್‌ಲ್ಲ್ಯಾ ಅನ್ಯೇಕ್ಲ್ಯಾ ಲಾಗಿಂ ವಿಚಾರ್ನ್ ಸೊಡ್ಲೆಂ.

“ಯೆತಾ-ಯೆತಾ ಮ್ಹಣ್ ಏಕ್ ಘಂಟೊ ಜಾಲೊ. ಆನಿ ಕಿತ್ಲೊ ವೇಳ್ ಜಾತಾ ಮ್ಹಣ್ ಕಳಿತ್ ನಾ. ತೊ ಯೇವ್ನ್ ವೆತಾ ಮ್ಹಣಾಸರ್ ಹೊ ಬ್ಲೋಕ್ ಉತ್ರೊನ್ ವಚೊಂಕ್ ಜಾತಾ ಮ್ಹಣ್ ಚಿಂತಿನಾಕಾ. ಅರ್ಜೆಂಟ್ ಆಸಾ ತರ್ ದುಸ್ರಿ ವಾಟ್ ಪಳೆ “ತಾಣೆಂ ಶೀದಾ ಪರಿಹಾರ್ ದಿಲೊ.

ಬಶೀರಾನ್ ಸ್ಕೂಟಿ ಘುಂವ್ಡಾಯ್ಲಿ. ತಾಚಾ ಮತಿ ಪಡ್ದ್ಯಾರ್ ಅನ್ಯೇಕ್ ರೂಟ್  ಮ್ಯಾಪ್ ತಯಾರ್ ಜಾಲ್ಲೆಂ.

***

ಬಶೀರಾಚೆಂ ಸ್ಕೂಟರ್ ಆತಾಂ ತೀನ್ ರಸ್ತೆ ಆಡ್ ಉತ್ರೊನ್ ಚೊವ್ತ್ಯಾ ರಸ್ತ್ಯಾಚಾ ಪಯ್ಲ್ಯಾ ಘುಂವ್ಡೆರ್ ಆಸಾ. ಹಿ ಘುಂವ್ಡಿ ಪಾಶಾರ್ ಜಾವ್ನ್ ಮುಕಾರ್ ಗೆಲ್ಯಾರ್ ಎದೊಳ್ ನಶ್ಟ್ ಜಾಲ್ಲಿಂ ಧಾ ಮಿನುಟಾಂ ಪಯ್ಕಿಂ ಪಾಂಚ್ ಮಿನುಟಾಂ ಪಾಟಿಂ ಅಪ್ಣಾವ್ಯೆತ್ ಮ್ಹಳ್ಳಿ ಅಲೋಚನ್ ತಾಚಿ. ಸ್ಕೂಟಾರಾಕ್ ಬರೊ ವೇಗ್ ಆಸಾ.

“ಮುಕಾರ್ ರಸ್ತೊ ಕೊಸ್ಳೊನ್ ಪಡ್ಲಾ. ವಾಹನ್ ಚಾಲಕಾಂನಿ ಅನಿ ಚಲೊನ್ ವೆಚ್ಯಾಂನಿ ದುಸ್ರೊ ರಸ್ತೊ ವಾಪಾರ್ಚೆಂ” ಮ್ಹಳ್ಳೊ ಮಟ್ವೊ ಏಕ್ ಬೋರ್ಡ್ ಬಶೀರಾನ್ ಪಳೆಯ್ಲೊ.

’ವ್ಹಯ್; ಮುಕಾರ್ ರಸ್ತ್ಯಾಕ್ ಚಾರ್ ಇಟೆ ದವರ್ಲ್ಯಾತ್ ಅನಿ ತಾಚಾ ಪಾಟ್ಲ್ಯಾನ್ ರಸ್ತೊ ಫುಟ್‍‍‍ಲ್ಲೊ ಸಾರ್ಕೊ ದಿಸ್ತಾ’. ನಿರಾಶೆನ್ ಬಶೀರಾನ್ ಭಂವ್ತಣಿ ಪಳೆಯ್ಲೆಂ.  ’ಎಮ್ಮೆಲ್ಲೆನ್ ಅನುದಾನ್ ಹಾಡವ್ನ್ ನಿರ್ಮಾಣ್ ಕೆಲ್ಲೊ ರಸ್ತೊ’ ಮ್ಹಣ್ ಸ ಮಹಿನ್ಯಾ ಪಯ್ಲೆಂ ಉಮ್ಕಾಳಾಯ್ಲೆಂ ಬ್ಯಾನರ್ ಅರ್ಧೆಂ ಪಿಂಜೊನ್ ವಾರ‍್ಯಾರ್ ಧಲ್ತಾಲೆಂ.

ಬಶೀರಾಚಿ ಮತ್ ಪರತ್ ಚತುರ್ ಜಾಲಿ. ಕೊಸ್ಳೊನ್ ಪಡ್‌ಲ್ಲ್ಯಾ ರಸ್ತ್ಯಾಚಾ ಉಜ್ವ್ಯಾ ಕುಶಿಕ್ ಅನ್ಯೇಕ್ ಭಾರೀಕ್ ವಾಟ್ ದಿಸ್ತಾ. ರಿಕ್ಷಾವಾಲ್ಯಾನಿಂ ಆನಿ ಟು ವೀಲರ್ ರೈಡರಾನಿಂ ಮಾತ್ರ್ ವಾಪರ್ಚಿ ವಾಟ್. ತಿ ವಾಟ್ ಧರ್ಲ್ಯಾರ್ ಶೀದಾ ಪಿರಿಯಾ ಪಟ್ಣ ಮುಖೆಲ್ ರಸ್ತೊ ಮೆಳ್ತಾ. ಥಂಯ್ ಪಾವ್ಲ್ಯಾರ್ ಉಪಾಂತ್ ಆಸ್ಪತ್ರೆಕ್ ಪಾವೊಂಕ್ ಧಾ ಮಿನುಟಾಂಚಿ ವಾಟ್. ಬಶೀರಾನ್ ಸ್ಕೂಟಿಚೊ ಎಕ್ ಕಾನ್ ವಾಳಾಯ್ಲೊ.

ಮುಕ್ಲ್ಯಾನ್ ಆಯಿಲ್ಲ್ಯಾ ಚಾರ್-ಪಾಂಚ್ ರಿಕ್ಷಾವಾಲ್ಯಾಂನಿಂ ದೊಳ್ಯಾನಿಂಚ್ ದಿಲ್ಲ್ಯಾ ಧಮ್ಕೆಚಿ ಪರ್ವಾ ಕರಿನಾಸ್ತಾಂ ಜಾತಾ ತಿತ್ಲೊ ವೇಗ್ ಅರಾವ್ನ್ ಬಶೀರಾನ್ ತೆರಾ ಮಿನುಟಾನಿಂ ತಿ ವಾಟ್ ಕಾಬಾರ್ ಕೆಲ್ಲಿ. ಅತಾಂ ಬಶೀರಾನ್ ರಸ್ತ್ಯಾರ್ ಖರ್ಚಿಲ್ಲೊ ಒಟ್ಟುಕ್ ವೇಳ್ ತೀಸ್ ಮಿನುಟಾಂ.

***

ಬಶೀರ್ ಆತಾಂ ಪಿರಿಯಾ ಪಟ್ಟಣ ಮೈನ್ ರೋಡಾಚೆರ್ ಆಸಾ. ಚಡುಣೆಂ ಧಾ- ಪಂದ್ರಾಂ ಮಿನುಟಾಂ ಭಿತರ್ ಸೈಂಟ್ ಜೋನ್ ಆಸ್ಪತ್ರೆಕ್ ಪಾಂವ್ಚ್ಯಾರ್ ಆಸಾ. ಸ್ಕೂಟಿಕ್ ಬರೊ ವೇಗ್‌ಯೀ ಆಸಾ. ರಬ್ಬರಾಚೆಂ ಟಾರ್ ಘಾಲ್ಲೊ ನವೊಚ್ ರಸ್ತೊ. ಅಸಲ್ಯಾ ರಸ್ತ್ಯಾಂನಿ ವಾಹನಾಂ ಚಲಂವ್ಚೆ ಮ್ಹಳ್ಯಾರ್ ತಾಚೆಂ ಸುಖ್ ದುಸ್ರೆಂಚ್ ಅಸ್ತಾ. ವೇಗ್ ಚಡ್‌ಲ್ಲೊಚ್ ಕಳನಾ. ಬಶೀರ್ ವಾರ‍್ಯಾರ್‌ಚ್ ಆಸಾ ಮ್ಹಣ್ಯೆತ್. ಪುಣ್ ರಸ್ತ್ಯಾರ್ ಎಕಾಚ್ಛಾಣೆಂ ವಾಹನಾಂಚೊ ವೇಗ್ ಉಣೊ ಜಾಂವ್ಕ್ ಆರಂಭ್ ಜಾಲೊ. ಸಾಂಗಾತಾ ಬಶೀರಾಚಿ ಬೊಟಾಂಯ್ ಬ್ರೇಕಿಚೆರ್ ಅಂರ್ಧಾಲಿಂ.

ವಾಹನಾಂ ರಾವ್ಲಿಂ. ಪುಣ್ ಮಧೆಂ ಘುಸವ್ನ್ ಮ್ಹಳ್ಳೆ ಬರಿ ಬಶೀರ್ ಜಾತಾ ತಿತ್ಲೆಂ ಮುಕಾರ್ ಗೆಲೊ. ಪುಣ್ ಅಖ್ರೇಕ್ ತಾಣೆಂಯ್ ರಾವಾಜೆ ಪಡ್ಲೆಂ. ಮುಕಾರ್ ವ್ಹಡ್ ಏಕ್ ಲೊಕಾ ಜಮೊ ರಸ್ತ್ಯಾರ್ ಬಸ್‌ಲ್ಲೊ.

“ಸಕ್ಡಾಂನಿ ಚಾಳೀಸ್ ಪರ್ಸೆಂಟ್. ಪುಣ್ ಆಮ್ಚ್ಯಾನ್ ಪನ್ನಾಸ್ ಪರ್ಸೆಂಟ್ ಮಾರ್ಲ್ಯಾತ್ ಖಂಯ್. ಎಮ್ಮೆಲ್ಲೆನ್ ರಾಜಿನಾಮೊ ದೀಜೆ ಮ್ಹಣ್ ವಿರೋಧ್ ಪಾಡ್ತ್ಯಾಂಚಿ ‘ರೋಡ್ ರೋಕೊ’ ಆರಂಭ್ ಜಾಲ್ಯಾ. ಆರಂಭ್ ಜಾವ್ನ್ ಪಾಂಚ್ ಮಿನುಟಾಂ ಜಾಲ್ಲಿಂ ಮಾತ್ರ್. ಏಕ್ ಪಾಂಚ್ ಮಿನುಟಾಂ ಪಯ್ಲೆಂ ಆಯಿಲ್ಲೆಂ ತರ್ ಪಾಶಾರ್ ಜಾವ್ಯೆತೆಂ” ಬಗ್ಲೆರ್‌ಚ್ ಉಬೊ ಆಸ್‌ಲ್ಲ್ಯಾ ಫುಡ್ ಡೆಲಿವರಿ ಕರ್ಚ್ಯಾ ಬೈಕ್ ವಾಲ್ಯಾನ್ ಬಶೀರಾಕ್ ಸಂಕ್ಷಿಪ್ತ್ ಮಾಹೆತ್ ದಿಲಿ.

“ಪಾಟಿಂ ವಚೊಂಕ್ ಜಾತಾಗೀ…?”ಬಶೀರಾನ್ ಪಾಟಿಂ ಘುಂವೊನ್ ಪಳೆಯ್ಲೆಂ.

“ಕಶ್ಟ್ ಅಸಾತ್. ಸಾಲ್ ಲಾಂಬ್ ಜಾಲಿ ಮ್ಹಣ್ ದಿಸ್ತಾ.” ಬಗ್ಲೆನ್ ಆಸ್‌ಲ್ಲ್ಯಾನೀ ಘುಂವೊನ್ ಪಳೆಯ್ಲೆಂ.

“ಎಮ್ಮೆಲ್ಲೆ ಸುಂದರ್ ಮುರ್ದಾಬಾದ್. ಎಮ್ಮೆಲ್ಲೆನ್ ರಾಜಿನಾಮೊ ದಿತಾಂ ಮ್ಹಣಾಸರ್ ಆಮಿ ಹ್ಯಾ ರಸ್ತ್ಯಾಥಾವ್ನ್ ಹಾಲ್ಚೆ ನಾಂವ್”. ಮುಕ್ಲ್ಯಾನ್ ನಾರೆ ಚಡೊನ್ಂಚ್ ವೆತಾಲೆ.

“ಹೊಸ್ಪಿಟಲ್ ಡೆಲಿವರಿ. ಎದೊಳ್‌ಚ್ ವೇಳ್ ಉತಾರ್ಲಾ. ಹಾಂಗಾಚ್ ಪಾಟ್ಲ್ಯಾನ್ ಏಕ್ ಗಲ್ಲಿ ಆಸಾ. ತೆಣೆಂ ಟ್ರೈ ಕರ್ಯಾಂ.” ಬಶೀರಾನ್ ಸ್ಕೂಟಿ ಪಾಟಿಂ ಘುಂವ್ಡಾಂವ್ಚೆ ಪ್ರೇತನ್ ಕೆಲೆಂ. ಬಗ್ಲೆನ್ ಅಸ್ಲೊಯ್ ಘುಂವ್ಲೊ.

ಬಶೀರ್ ಅನಿ ಬಗ್ಲೆನ್ ಅಸ್‌ಲ್ಲೊ ಘುಂವ್‌ಲ್ಲೆಂ ಪಳೆವ್ನ್ ಉರ್‌ಲ್ಲ್ಯಾ ಥೊಡ್ಯಾ ಬೈಕ್ , ರಿಕ್ಷಾ ಆನಿ ಕಾರ್‌ವಾಲ್ಯಾನಿಂ ಘುಂವ್ಚೊ ನಿರ್ಧಾರ್ ಘೆತ್ಲೊ. ಟ್ರಾಫಿಕಾಂತ್ ವಾಹನಾಂ ಪಾಟಿಂ ಕಾಡ್ಚೆಂ ಮ್ಹಳ್ಯಾರ್ ತೆಂ ಏಕ್ ಸಾಹಸ್. ಪುಣ್ ಬಶೀರಾಕ್ ಟ್ರಿಕ್ಸ್ ಕಳಿತ್ ಆಸ್‌ಲ್ಲೆಂ!

ಟ್ರಾಫಿಕ್ ಮ್ಹಳ್ಳೊ ಚಕ್ರ್ ವ್ಯೂಹ್ ಉತ್ರೊನ್ ಭಾಯ್ರ್ ಯೇಂವ್ಕ್ ಬಶೀರಾಕ್  ವೀಸ್ ಮಿನುಟಾಂ ಲಾಗ್ಲಿಂ. ಅತಾಂ ಬಶೀರ್ ಸೈಂಟ್ ಜೋನ್ ಹಾಸ್ಪಿಟಲಾ ಥಾವ್ನ್ ಅರ್ಧೊ ಕಿಲೋ ಮೀಟರ್ ಪಯ್ಸ್ ಅಸ್ಚ್ಯಾ ಗಲ್ಲೆಂತ್ ಆಸಾ. ಪಯ್ಣ್ ಆರಂಭ್ ಕರ್ತಾನಾ ವೀಸ್ ಮಿನುಟಾಂ ಭಿತರ್ ಆಸ್ಪತ್ರೆಕ್ ಪಾವಾಜೆ ಮ್ಹಣ್ ಚಿಂತ್‌ಲ್ಲೆಂ ತರೀ ಆತಾಂ ತೆಣೆಂ-ಹೆಣೆಂ ಮ್ಹಣ್ ಲಗ್ಭಗ್ ಪನ್ನಾಸ್ ಮಿನುಟಾಂ ಉತಾರ್ಲ್ಯಾಂತ್. ತೆಣೆಂ ಪೇಶೆಂಟ್ ಸೀರಿಯಸ್ ಆಸಾ ಮ್ಹಣ್ ಸುರ್ವೆರ್ ಚ್ ಸಾಂಗ್ಲಾಂ. ಬಶೀರ್ ಸಗ್ಳೊ ಘಾಮೆವ್ನ್ ಗೆಲ್ಲೊ.

“ಘರಾ ಪಾಟಿಂ ಯೇನಾ ಮ್ಹಣ್ ಸಾಂಗೊನ್ ಆಯ್ಲಾಯ್ಗೀ…?” ಗಲ್ಲೆಂತ್ಲ್ಯಾನ್ ವೇಗ್ ಅರಾಯ್ತಾನಾ ಎಕಾ ದೊಗಾನಿಂ ಹಾತ್ ಜೊಕುನ್ ವ್ಹಡ್ ತಾಳ್ಯಾನ್ ಸಾಂಗ್‌ಲ್ಲೆಂ ಬಶೀರಾಚಾ ಕಾನಾಕ್ ಪಡ್‌ಲ್ಲೆಂ ತರೀ ತಾಣೆಂ ತೆಂ ಗಣ್ಣೆಂ ಕೆಲೆಂ ನಾ. ತೊ ಮುಕಾರ್ ಚಮ್ಕಾತಾಲೊ.

 ಮಿತ್ರ ಟ್ರಾನ್ಸ್ ಪೋರ್ಟ್.

ಮುಕಾರ್ ವ್ಹಾಳೂ ರಾವ್‌ಲ್ಲ್ಯಾ ಲೊರಿಯೆ ಪಾಟ್ಲ್ಯಾನ್ ಬಶೀರಾನ್ ಮತಿ ಭಿತರ್ ಪುರ್ಪುರೊನ್ಂಚ್ ಸ್ಕೂಟಿ ರಾವಯ್ಲಿ. ಮಿತ್ರ ಟ್ರಾನ್ಸ್ ಪೋರ್ಟ್, ಮಿತ್ರ ಎಕ್ಸ್ ಪೋರ್ಟ್ಸ್. ಮಿತ್ರ ಮೈನಿಂಗ್, ಮಿತ್ರ ಟಿಂಬರ್ – ಹೆ ಸಕ್ಕಡ್ ಎಮ್ಮೆಲ್ಲೆ ಸುಂದರಾಚೆಂ ಸಂಸ್ಥೆ. ದಿಸಾಕ್ ಏಕ್ ಪಾವ್ಟಿಂ ಪುಣೀ ಬಶೀರಾಕ್ ಹ್ಯಾ ಸಂಸ್ಥ್ಯಾಚಿಂ ವಾಹನಾಂ ರಸ್ತ್ಯಾರ್ ಪಾಟಿಂ ಯಾ ಮುಕಾರ್ ಮೆಳ್ತಾಲಿ.

ಆಜ್ ಎಮ್ಮೆಲ್ಲೆಚಿ ಲೊರಿ ಶೀದಾ ಮುಕಾರ್ ಆಸಾ. ಗಲ್ಲಿ ಜಾಲ್ಲ್ಯಾನ್ ಕುಶಿಂತ್ಲ್ಯಾನ್ ಚಲೊನ್ ವಚೊಂಕ್ ಸಯ್ತ್ ಅಸಾಧ್. ಎಕ್ದಮ್ ಭಾರೀ ಆನಿ ವನ್ ವೇ ರಸ್ತೊ. ರಸ್ತೊ ಮ್ಹಣ್ಚ್ಯಾಕೀ ವಾಟ್ ಮ್ಹಣ್ಚೆಂ ಚಡ್ ಸಾರ್ಕೆಂ. ವ್ಹಡ್ ವಾಹನಾಂಕ್ ಪ್ರವೇಶ್ ನಾ ಮ್ಹಣ್ ರಸ್ತ್ಯಾಕ್ ರಿಗ್ಚ್ಯಾ ಸುವಾತೆರ್‌ಚ್ಚ್ ಬೋರ್ಡ್ ಘಾಲಾ. ಪುಣ್ ಲೊರಿ ಎಮ್ಮೆಲ್ಲೆಚಿ ನ್ಹಂಯ್ಗೀ? ರೂಲಿ ರೆಗ್ರೆ ಪಾಳಿಜೆ ಮ್ಹಣ್ ನಾಂತ್.

” ಬಂದ್ ಪಡ್ಲಿ. ಎಂಜಿನ್ ಸ್ಟಾರ್ಟ್ ಜಾಯ್ನಾ…ಫಿಟ್ಟರ್ ಯೇವ್ನ್ ಜಾಯ್ಜೆ. ತುಮಿಂ ಪಾಟಿಂ ವೆಚೆಂ ಬರೆಂ” ಲೊರಿಯೆಚಾ ಡ್ರೈವರಾನ್ ತಕ್ಲಿ ಭಾಯ್ರ್ ಘಾಲ್ನ್ ಸಾಂಗ್ತಾನಾ ಬಶೀರಾಕ್ ಕಾಲೆಂ ಕರ್ಚೆಂ ಮ್ಹಣ್ ಕಳಿತ್ ಜಾಲೆಂ ನಾ.

“ಪಾಟಿಂ ವಚೊನ್ ಮುಖೆಲ್ ರಸ್ತ್ಯಾಕ್ ಪಾವ್ಲ್ಯಾರ್ ಕಾಂಯ್ ಫಾಯ್ದೊ ನಾ. ಥಂಯ್ ಎಮ್ಮೆಲ್ಲೆನ್ ರಾಜಿನಾಮೊ ದೀಜೆ ಮ್ಹಣ್ಚೆ ಅಸಾತ್. ಮುಖೆಲ್ ರಸ್ತ್ಯಾರ್ ದಾವ್ಯಾ ಕುಶಿಕ್ ಘುವೊನ್ ಸಕಯ್ಲ್ ಥಾವ್ನ್ ಯೆಂವ್ಚೆ ತರ್ ಥಂಯ್ ಎಮ್ಮೆಲ್ಲೆನ್ ಅನುದಾನ್ ಹಾಡವ್ನ್ ರಚ್‌ಲ್ಲೊ ರಸ್ತೊ ಕೊಸಾಳ್ಳಾ. ತೊ ರಸ್ತೊ ಚುಕಾವ್ನ್ ಪಾಟಿಂ ಯೂ ಟರ್ನ್ ಕರ್ನ್ ಯೇಂವ್ಕಿ ಜಾಯ್ನಾ. ಥಂಯ್ ಎಮ್ಮೆಲ್ಲೆಕ್ ಕ್ಲಬ್ಬಾ ತರ್ಫೆನ್ ಸನ್ಮಾನ್ ಜಾತೆ ಆಸಾ. ಆನಿ ಏಕ್ ರಸ್ತೊ ಉರ್ಲಾ. ಶೀದಾ ಪಾಟಿಂ ವಚೊನ್ ಮುಖೆಲ್ ರಸ್ತೊ ಮೆಳ್ಚ್ಯಾ ಪಯ್ಲೆಂ ಅನ್ಯೇಕಾ ಗಲ್ಲೆಕ್ ರಿಗ್ಚೆಂ. ಪುಣ್ ತೊ ಏಕ್ ಮುಖ್ ರಸ್ತೊ. ವೆಚೊ ನ್ಹಂಯ್. ಯೆಂವ್ಚೊ. ಅಶೆಂ ಮ್ಹಣ್ತಾನಾ ವೇಗ್ ಚಡಂವ್ಕ್ ಸಾಧ್ ನಾ. ಸವ್ಕಾಸಾಯೆನ್, ಜಾಗ್ರುತ್ಕಾಯೆನ್ ವಚಜೆ. ತಶೆಂ ವಚೊನ್ ಏಕ್ ಭೊಂವಾಡೊ ಕಾಡ್ನ್ ಆಸ್ಪತ್ರೆಕ್ ಪಾವ್ತಾನಾ ಉಣ್ಯಾರ್ ಮ್ಹಳ್ಯಾರ್ ಅನ್ಯೇಕ್ ಪಂದ್ರಾ ಮಿನುಟಾಂ ಲಾಗ್ತಿತ್. ಎದೊಳ್‌ಚ್  ಘಂಟೊ ಏಕ್ ಉತಾರ್ಲೊ.” ಬಶೀರ್ ಚಿಂತ್ಚ್ಯಾರ್ ಪಡ್ಲೊ.

“ಚಲೊನ್ ವೆಚೆಂ ಬರೆಂ. ಸಾತ್ ಮಿನುಟಾಂ ಭಿತರ್ ಪಾವ್ಯೆತ್…” ನಿರ್ಧಾರ್ ಘಟ್ ಜಾಲ್ಲೊಚ್ ಬಶೀರ್ ಸ್ಕೂಟಿ ವಯ್ರ್ ಥಾವ್ನ್ ದೆವ್ಲೊ. ಸ್ಕೂಟಿ ವಯ್ಲೆಂ ಒಕ್ತಾಚಿ ಪೊಟ್ಲಿ ಘೆವ್ನ್ ಲೊರಿಯೆಚಾ ಪಾಟ್ಲ್ಯಾನ್ ಥಾವ್ನ್  ಚಾರ್ ಪಾಂಯಾನಿ ಲೊರಿಯೆ ಪಂದಾ ರಿಗ್ಲೊ.

“ಡ್ರೈವರ್ ಬಾಯ್… ಸ್ಕೂಟಿ ಪಾಟ್ಲ್ಯಾನ್ ದವರ್ಲ್ಯಾ. ಹಾಂಗಾಚ್ ಆಸ್ಪತ್ರೆಕ್ ವಚೊನ್ ಧಾ ಮಿನುಟಾಂ ಭಿತರ್ ಆಯ್ಲೊಂ..” ಲೊರಿ ಡ್ರೈವರಾಕ್ ಅಯ್ಕೊಂಚೆ ಬರಿ ವ್ಹಡ್ಲ್ಯಾನ್ ಸಾಂಗೊನ್ ಬಶೀರಾನ್ ಧಾಂವೊಂಕ್ ಆರಂಭ್ ಕೆಲೆಂ.

***

ಸೈಂಟ್ ಜೋನ್ ಹೊಸ್ಪಿಟಲ್
ಕಾರ್ಡಿಯಕ್  ಕೇರ್ ಯೂನಿಟ್
ರೂಮ್ ನಂಬರ್ 8

ಬಶೀರಾನ್ ದಾರ್ ಬಡಯ್ತೆ ಅಪ್ಲೆಂ ವಾಚ್ ಪಳೆಯ್ಲೆಂ. ವೀಸ್ ಮಿನುಟಾಂಚಾ ವಾಟೆಕ್ ದೇಡ್ ವೋರ್ ಲಾಗ್‌ಲ್ಲೆಂ. ಬಶೀರಾಚಾ ವೃತ್ತೆ ಜೀವನಾಂತ್ ಪಯ್ಲೆಂ ಪಾವ್ಟಿಂ ಇತ್ಲಿ ಘಳಾಯ್ ಜಾಂವ್ಚಿ.

“ತುಂ ಏಕ್ ಖಂಯ್ ಸಾಯ್ಭಾ. ಕೆದಾಳಾ ಥಾವ್ನ್ ರಾಕ್ತೆ ಆಸಾಂವ್. ತುಜ್ಯಾ ಮೆಡಿಕಲ್ ಶೊಪಾಕ್ ವಿಚಾರ್ತಾನಾ ವಚೊನ್ ದೇಡ್ ಘಂಟೊ ಜಾಲೊ ಮ್ಹಣ್ ಸಾಂಗ್ಲೆಂ. ತುಂ ಕಿತೆಂ ಖಂಯ್ ಪುಣೀ ರುಕಾ ಮುಳಾಂತ್ ನಿದ್‌ಲ್ಲೊಯ್‌ಗೀ…?” ದಾರ್ ಉಗ್ತೆಂ ಕೆಲ್ಲ್ಯಾ  ತಿಚ್ಯಾ ತಾಳ್ಯಾಂತ್ ಅಧಿಕಾರ್, ಭೆಶ್ಟಾವ್ಣೆಚೆಂ ಮಿಶ್ರಣ್ ಆಸ್‌ಲ್ಲೆಂ.

“….ಹಾಂಗಾ ಯೆಂವ್ಚೆ ಸಕ್ಕಡ್ ರಸ್ತೆ ಏಕ್ ನಾ ಏಕ್ ಕಾರಣಾಕ್ ಲಾಗೊನ್ ಬಂದ್ ಜಾಲ್ಯಾತ್ ಮೇಡಂ. ಸಗ್ಳ್ಯಾ ಸಿಟಿಂತ್ ಟ್ರಾಫಿಕ್ ಜಾಮ್. ಖಂಯ್ಚ್ಯಾನೀ ವಚೊಂಕ್ ಜಾಯ್ನಾ … ಭಾರೀ ಕಶ್ಟಾಂನಿ ಪಾವ್ಲೊಂ…” ದಾರಾರ್ ಉಬೆಂ ಆಸ್‌ಲ್ಲ್ಯಾ ನರ್ಸಾಕ್ ಸಮ್ಜಂವ್ಚೆಂ ಪ್ರೇತನ್ ಕರಿತ್ತ್ ಬಶೀರಾನ್ ವೊಕ್ತಾಂಚಿ ಪೊಟ್ಲಿ ಮುಕಾರ್ ವೊಡ್ಡಾಯ್ಲಿ.

” ಆನಿ ಕಾಲ್ಯಾಕ್…? ಮೊಡ್ಯಾ  ಸಾಂಗಾತಾ ಹುಲ್ಪಾಂವ್ಕ್ ಗೀ…” ತಿಚೆಂ ತೋಂಡ್ ಫುಗ್ಲೆಂ.

“ಭಿತರ್ ವಚೊನ್ ಪಳೆವ್ಯೆತ್‌ಗೀ…” ಕಾಲುಬುಲೊ ಜಾಲ್ಲ್ಯಾ ಬಶೀರಾನ್ ಶೀದಾ ವಿಚಾರ್ನ್ ಸೊಡ್ಲೆಂ.

“ಭಿತರ್ ವಚೊನ್ ತುಕಾಯ್ ತಿಚೆ ಬರಿಚ್ ನಾಕಾಕ್ ಕಾಪುಸ್ ಚೆಪುನ್ ನಿದಾಜೆ ಮ್ಹಣ್ ಅಸಾಗೀ…? ತಿ ಎಮ್ಮೆಲ್ಲಿಚಿ ಆವಯ್ ಪುಣೆಗೆಲ್ಲ್ಯಾ. ತೊ ಭಿತರ್ ತುಜೆರ್ ರಾಗಾನ್ ಪೆಟ್ತೆ ಆಸಾ. ತುವೆಂ ಘಳಾಯ್ ಕೆಲ್ಲ್ಯಾನ್ ತಾಚಿ ಆವಯ್ ಸರ್ಲಿ ಖಂಯ್. ತುಂ ಹಾಂಗಾಥಾವ್ನ್ ಚ್ ಜಾತಾ ತಿತ್ಲೆಂ ವೆಗ್ಗಿಂ ಭಾಯ್ರ್ ವಚ್ ಅನಿ ಖಂಯ್ ಪುಣೀ ಸ್ಕೂಟಿ ಆಡ್ ಘಾಲ್ನ್ ಎಕ್ಸಿಡೆಂಟ್ ಜಾಲೆಂ ಮ್ಹಣ್ ಕಾಣಿ ಗುಂತುಂಕ್ ಪಳೆ. ಮ್ಹಜ್ಯಾನ್ ತುಕಾ ಇತ್ಲಿ ಮಾತ್ರ್ ಕುಮಕ್ ಕರ್ಯೆತ್…” ತಿಣೆಂ ಎಕಾಚ್ಚಾಣೆ ದಾರ್ ಧಾಂಪ್ಲೆಂ.

► ಸ್ಟ್ಯಾನಿ ಬೆಳಾ