ಮಂಗ್ಳುರ್ಚ್ಯಾ ಸಾಂ ಅಂತೊನಿ ಆಸ್ರ್ಯಾಂತ್ ಜನೆರಾಚ್ಯಾ 26 ತಾರಿಕೆ ಪಾಸುನ್ ಚಾಲು ಆಸ್ಲಲೆಂ ತೀನ್ ದಿಸಾಂಚೆಂ ಬೈಬಲ್ ಪ್ರದರ್ಶನ್ ಸನ್ವಾರಾ, 30 ವೆರ್ ಸಂಪ್ಲೆಂ. ಮಂಗ್ಳುರ್ ದಿಯೆಸೆಜಿಚೊ ವಿಗಾರ್ ಜೆರಾಲ್ ಮೊ| ಮ್ಯಾಕ್ಸಿಮ್ ಎಲ್. ನೊರೊನ್ಹಾ ಸಮಾರೋಪ್ ಕಾರ್ಯಾಕ್ ಮುಕೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್ಲೆ.
” ಪವಿತ್ ಪುಸ್ತಕ್ ಜಾವ್ನಾಸಾ ಕೆದಿಂಕ್ಚ್ ಸಂಪಾನಾ ತಸಲಿ ನಿಧಿ. ನವೆಂಸಾಂವ್ ಆನಿ ಜೀವ್ ದಿಂವ್ಚೆಂ, ಹರ್ ಕಾಳಾಕ್ ಸಹಜ್ ಜಾಲ್ಲೆಂ ಪುಸ್ತಕ್ ಮ್ಹಳ್ಯಾರ್ ತೆಂ ಪವಿತ್ ಪುಸ್ತಕ್. ಪವಿತ್ ಪುಸ್ತಕಾನ್ ಜಾಯ್ತ್ಯಾಂಕ್ ಸ್ಪೂರ್ತೆನ್ ಭರ್ಲಾಂ ಆನಿ ಜಾಯ್ತ್ಯಾಂಚಿಂ ಜಿಣಿ ಬದ್ಲಿಲ್ಯಾ. ಪವಿತ್ ಪುಸ್ತಕ್ ವಾಚುನ್ ನಾಸ್ತಿಕ್ ಆಸ್ತಿಕ್ ಜಾಲ್ಯಾತ್. ಕಿತ್ಯಾಕ್ ಮ್ಹಳ್ಯಾರ್ ಪವಿತ್ ಪುಸ್ತಕ್ ಜಾವ್ನಾಸಾ ದೆವಾಚೆಂ ಉತರ್” ಮ್ಹಣ್ ಮೊ| ಮ್ಯಾಕ್ಸಿಮ್ ಎಲ್. ನೊರೊನ್ಹಾ ಹಾಣಿ ಮ್ಹಳೆಂ.
ಪ್ರದರ್ಶನಾಚ್ಯಾ ಸಮಾರೋಪ್ ಕಾರ್ಯಾಂತ್, ಪ್ರಸ್ತುತ್ ಸಂವಹನ್ ವಿಧಾನಾಂ ವಾಪಾರ್ನ್, ದೆವಾಚೆಂ ಉತರ್ ಪ್ರಸಾರ್ ಕರ್ಚ್ಯಾ ಯಾಜಕಾಂಚಿಂ ಅನನ್ಯ್ ಆನಿ ನಿಸ್ವಾರ್ಥಿ ಸೆವಾ ಮಾಂದುನ್ ಘೆವ್ನ್, ತಾಂಕಾ ಮೊ| ಮ್ಯಾಕ್ಸಿಮ್ ನೊರೊನ್ಹಾ ಹಾಣಿ ಶೊಲ್ ಆನಿ ಫುಲಾಂ ತುರೆಂ ಅರ್ಪುನ್ ಸನ್ಮಾನ್ ಕೆಲೊ.
ವೆಬ್ಬ್ಲಾಗ್ ಆನಿ ಯೂಟ್ಯೂಬ್ ಚಾನೆಲಾರ್ ವಿಡಿಯೊ ಮುಕಾಂತ್ರ್ ದೆವಾಚೆಂ ಉತರ್ ಪ್ರಸಾರ್ ಕರ್ಚೊ ಜೆಪ್ಪು ಸಾಂ. ಜುಜೆ ಸೆಮಿನರಿಚೊ ತತ್ವಶಾಸ್ತ್ರ್ ಪ್ರಾಧ್ಯಾಪಕ್, ಜೆಪ್ಪು ಫಿರ್ಗಜೆಚೊ ವಿಗಾರ್ ಮಾ| ಬಾ| ಮ್ಯಾಕ್ಸಿಮ್ ಡಿ’ ಸೋಜಾ, ಹರ್ ದೀಸ್ ಶುಭ್ವರ್ತಮಾನ್ ಮಟ್ವ್ಯಾ ವೀಡಿಯೋ ಶಿಂಕ್ಳೆ ಮಾರಿಫಾತ್ ದಿಸ್ಪಡ್ತೆಂ ಸುವಾರ್ತಾ ವಾಚನ್ ಆನಿ ದೋನ್ ಮಿನುಟಾಂಚೊಂ ಸಂದೇಶ್ ದಿಂವ್ಚ್ಯಾ ಆನಿ ಗಾಂವಾಂ ಗಾಂವಾಂಕ್ ವಚೊನ್ ಬೈಬಲ್ ಆಧ್ಯಯನ್ ವರ್ಗ್ ಚಲಂವ್ಚ್ಯಾ ಮಂಗಳಜ್ಯೋತಿ ಕೇಂದ್ರಾಚೊ ಸಹಾಯಕ ನಿರ್ದೇಶಕ್, ಬೈಬಲ್ ಆಯೋಗಾಚೊ ಕಾರ್ಯದರ್ಶಿ ಆನಿ ಸಾಂ. ಜುಜೆ ಸೆಮಿನರಿಂತ್ ದೇವ್ಶಾಸ್ತಾಚೊ ಪ್ರಾಧ್ಯಾಪಕ್ ಮಾ| ದೊ| | ವಿನ್ಸೆಂಟ್ ಸಿಕ್ವೇರಾ – ಹಾಂಕಾ ಹ್ಯಾ ಸಂದರ್ಭಿಂ ಮಾನ್ ಕೆಲೊ.
ಮಂಗ್ಳುರ್ ಧರ್ಮ್ಪ್ರಾಂತ್ಯಾಚೊ ಸಾರ್ವಜನಿಕ್ ಸಂಪರ್ಕ್ ಅಧಿಕಾರಿ ರೊಯ್ ಕಾಸ್ತೆಲಿನೊ, ಆಶ್ರಮಾಚ್ಯಾ ಆಡಳ್ತ್ಯಾ ಮಂಡಳೆಚೊ ಸಾಂದೊ ದೊ| ಜೊನ್ ಡಿಸಿಲ್ವಾ, ಯಾಜಕ್, ದರ್ಮ್ ಭಯ್ಣಿಂ, ವಿದ್ಯಾರ್ಥಿ ಆನಿ ಸಾಂ. ಆಂತೊನ್ ಆಸ್ರ್ಯಾಚಿಂ ನಿವಾಸಿ ಹ್ಯಾ ಸಂದರ್ಭಾರ್ ಹಾಜರ್ ಆಸ್ಲಿಂ.
ಪ್ರದರ್ಶನಾಚ್ಯಾ ದುಸ್ರ್ಯಾ ದಿಸಾ ಮಂಗ್ಳುರ್ ಧರ್ಮಪ್ರಾಂತ್ಯಾಚೊ ನಿವೃತ್ತ್ ಧರ್ಮಾಧ್ಯಕ್ಷ್ ಅ| ಮಾ| ದೊ| ಲುವಿಸ್ ಪಾವ್ಲ್ ಸೊಜ್ ಹಾಣಿ ಪ್ರದರ್ಶನಾಕ್ ಭೆಟ್ ದೀವ್ನ್ ತೊಕ್ಣಾಯ್ ಕೆಲಿ.
ಆಸ್ರ್ಯಾಚೊ ನಿರ್ದೇಶಕ್ ಆನಿ ಪ್ರದರ್ಶನಾಚೊ ಸಂಚಾಲಕ್ ಮಾ| ಬಾ| ಜೆ. ಬಿ. ಕ್ರಾಸ್ತಾ ಹಾಣಿ ಉಲವ್ನ್, ಸಿಎಸ್ಐ ಇಗರ್ಜೆಚೆ ಸಾಂದೆ, , ಧಾರ್ಮಿಕ್ ಭಯ್ಣಿ, ಉಡುಪಿ ಆನಿ ಮಂಗ್ಳುರ್ ಧರ್ಮಪ್ರಾಂತ್ಯಾಚೆ ಯಾಜಕ್, ಥಳೀಯ್ ಶಿಕ್ಪಾಸಂಸ್ಥ್ಯಾಂಚೆಂ ಕಥೊಲಿಕ್ ವಿದ್ಯಾರ್ಥಿ, ಸೆಮಿನರಿಚೆ ಭಾವ್, ಕೊವೆಂತಾಂತ್ಲ್ಯೊ ಭಯ್ಣಿ ಅಶೆಂ ಸುಮಾರು 2,500 ಲೊಕಾನ್ ಪ್ರದರ್ಶನಾಕ್ ಭೆಟ್ ದೀವ್ನ್ ಆತ್ಮೀಕ್ ಬರೆಂಪಣ್ ಜೊಡ್ಲಾಂ ಮ್ಹಳೆಂ.
ಮಂಗ್ಳುರ್ ದಿಯೆಸೆಜಿಚೊ ಬೈಬಲ್, ಸುವಾರ್ತ ಪ್ರಸಾರ್, ಸಾಮಾಜಿಕ್ ಸಂಪರ್ಕ್ ಆನಿ ಲ್ಹಾನ್ ಕ್ರೀಸ್ತಾಂವ್ ಆಯೋಗ್ – ಹಾಂಚ್ಯಾ ಸಹಯೋಗಾಂತ್ ಸಾಂ. ಅಂತೋನಿ ಆಸ್ರೊ, ಸಾಂ. ಜುಜೆ ಸೆಮಿನರಿ, ಕಾಸ್ಸಿಯಾ, ಜೆಪ್ಪು ಆನಿ ವೆಲೆನ್ಸಿಯಾ ಫಿರ್ಗಜಾಂನಿ ಸಾಂಗಾತಾ ಮೆಳೊನ್ ಜೆಪ್ಪು, ಸಾಂ. ಅಂತೊನ್ ಆಸ್ರ್ಯಾಂತ್ ಜನೆರ್ 26 ಪಾಸುನ್ 28 ಸಾಂಜೆ ಪರ್ಯಾಂತ್ ತೀನ್ ದಿಸಾಂಚೆಂ ಬೈಬಲ್ ಪ್ರದರ್ಶನ್ ಮಾಂಡುನ್ ಹಾಡ್ಲ್ಲೆಂ.
ಪ್ರದರ್ಶನಾ ವೆಳಾರ್, ಜೆಪ್ಪು, ಕಾಸ್ಸಿಯಾ ಆನಿ ವಾಲೆನ್ಸಿಯಾ ಫಿರ್ಗಜೆಂ ಥಾವ್ನ್ ತೀನ್ ದೀಸ್ ಸಾಂ. ಮಾರ್ಕಾಚ್ಯಾ ಸುವಾರ್ತೆಚೆಂ ವಾಚನ್ ಚಲ್ಲೆಂ. ಸಾಂಜೆಚೆಂ ಚಲ್ಲೆಲ್ಯಾ ಸಾಂಸ್ಕೃತಿಕ್ ಕಾರ್ಯಕ್ರಮಾಂತ್ ’ಮೇರಿ ಮ್ಯಾಗ್ಡಲೀನ್’ (ಜೋಶಲ್ ಡಿಸೋಜಾ), ’ಜೋಸೆಫ್ ಆಫ್ ಅರಿಮಥಿಯಾ’ (ಬ್ರ| ಲಾಯ್ಡ್, ಜೆಪ್ಪು ಸೆಮಿನರಿ),ಆನಿ ’ಬರಬ್ಬಾಸ್’ (ಅಲ್ವಿನ್ ಮಿರಾಂಡಾ, ಜೆಪ್ಪು) ಹಾಣಿ ಬೈಬಲ್ ಆದಾರಿತ್ ನಾಟ್ಕುಳೆ ಪ್ರಸ್ತುತ್ ಕೆಲೆ.
ವಾಲೆನ್ಸಿಯಾ ಫಿರ್ಗಜೆರ್ಚ್ಯಾ ಮಾ| ಬಾ| ಪಾವ್ಲ್ ಸೆಬಾಸ್ಟಿಯನ್ ಡಿಸೋಜಾ ಹಾಣಿ ಬೈಬಲ್ ಆದಾರಿತ್ ಮ್ಯಾಜಿಕ್ ಪ್ರಸ್ತುತ್ ಕೆಲೆಂ. ಜೆಪ್ಪು ಹೋಲಿ ರೋಜರಿ ಕೊವೆಂತ್, ಪಾನೀರ್ ’ಸಮರ್ಪಣ್’ ಕೊವೆಂತ್, ಮಂಗ್ಳುರ್ ’ಆಶಾ ನಿಕೇತನ್’ ಕೊವೆಂತಾಚ್ಯಾ ಧರ್ಮ್ಭಯ್ಣಿಂ ಥಾವ್ನ್ ಆನಿ ಗ್ಲ್ಯಾಡ್ಸಮ್ ಹೋಮ್ ಮೈನರ್ ಸೆಮಿನರಿಚ್ಯಾ ವಿದ್ಯಾರ್ಥಿಂ ಥಾವ್ನ್ ವಿದ್ಯಾರ್ಥಿಂಕ್ ಬೈಬಲ್ ನಾಚ್, ಬೈಬಲ್ ಗಿತಾಂ, ಧಾ ದೆಡಿಯಾಂಚಿಂ ಒಪಾರ್, ಒಂಪಿಯಾಚಿ ಒಪಾರ್, ಸರ್ಗಿಂಚ್ಯಾ ರಾಜಾಚಿ ಒಪಾರ್, ವೆಚಿಕ್ ಪುತಾಚಿ ಒಪಾರ್, ಬರ್ಯಾ ಸಾಮಾರಿಯಾಗಾರಾಚಿ ಒಪಾರ್ ಆನಿ ಶಿಸಾಂಚೆಂ ಆಪವ್ಣೆಂ ದಾಕಂವ್ಚೆ ನೃತ್ಯ್ ನಾಟಕ್ ಪ್ರದರ್ಶಿತ್ ಜಾಲೆ.
ಪ್ರದರ್ಶನಾಂತ್ 300 ಪ್ರಕಾರಾಚೆ ಬೈಬಲ್, 150 ವರ್ಣ್ಚಿತ್ರಾಂ, 20 ಬೈಬಲ್ ನಮೂನೆ, 30 ಮಿನುಟಾಂಚಿಂ ಸಾಕ್ಶ್ಯ್ಚಿತ್ರಾಂ, ವೀಡಿಯೊ, ಪವರ್ ಪಾಯಿಂಟ್ ಪ್ರಸ್ತುತಿ ಆಸ್ಲೆ.
ಪ್ರದರ್ಶನಾಂತ್ ಚಲ್ಲೆಲ್ಲ್ಯಾ ಸ್ಪರ್ಧ್ಯಾಂನಿ ವಿಜೇತಾಂಕ್ ಸಮಾರೋಪ್ ಕಾರ್ಯಕ್ರಮಾಂತ್ ಇನಾಮಾಂ ದೀವ್ನ್ ಮಾನ್ ಕೆಲೊ.
ವರ್ದಿ & ತಸ್ವಿರ್ಯೊ : ಮಾ| ಬಾ| ಅನಿಲ್ ಫೆರ್ನಾಂಡಿಸ್, ಕೆನರಾ ಸಂಪರ್ಕ್ ಕೇಂದ್ರ್, ಮಂಗ್ಳುರ್
