ರೋಶು ಬಜ್ಪೆ ಹಾಣೆ ಬರಯಿಲ್ಲ್ಯಾ ಮಟ್ವ್ಯಾ ಕಾಣಿಯಾಂಚೊಂ ಫುಡ್ಲದ್ ಪುಸ್ತಕ್ ‘ಪೇಯಿಂಗ್ ಗೆಸ್ಟ್ ಆನಿ ಹೆರ್ ಕಥಾ’ ಸನ್ವಾರಾ, ನವೆಂಬರ್ 5 ತಾರಿಕೆರ್, ಪಿ.ಎಫ್.ಎಕ್ಸ್. ಸಲ್ಡಾನ್ಡಾ ಅಡಿಟೋರಿಯಮ್, ದುಸ್ರಿ ಮಾಳಯ್, ಎಮ್.ಸಿ.ಸಿ. ಬ್ಯಾಂಕ್ ಬಿಲ್ಡಿಂಗ್, ಹಂಪನ್‌ಕಟ್ಟಾ ಹಾಂಗಾಸರ್ ಸಾಂಜೆಚ್ಯಾ 4 ವ್ಹರಾಂಚೆರ್ ಲೊಕಾರ್ಪಣ್ ಜಾತಲೊ.
ಪ್ರಾಧ್ಯಾಪಕ್ ಆನಿ ಲೇಕಕಿ ಪ್ರೊ. ದೊ. ಜಿತಾ ಲೋಬೊ ಬೂಕ್ ಉಗ್ತಾವಣ್ ಕರುನ್ ಬುಕಾ ವಿಶ್ಯಾಂತ್ ಆನಿ ಮಟ್ವ್ಯಾ ಕಾಣಿಯಾಂಚೆರ್ ಉಲಯ್ತಾಲಿ. ಕಾರ್ಯಾಕ್ ಎಮ್.ಸಿ.ಸಿ. ಬ್ಯಾಂಕಾಚೊ ಅಧ್ಯಕ್ಷ್ ಮಾನೆಸ್ತ್ ಅನಿಲ್ ಲೋಬೊ, ಮುಕೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್ತಾಲೊ.
ಪೇಯಿಂಗ್ ಗೆಸ್ಟ್ ಆನಿ ಹೆರ್ ಕಥಾ ಜಮ್ಯಾಂತ್ ರೋಶುನ್ ಪಾಟ್ಲ್ಯಾ ವರ್ಸಾಂನಿ ಬರಯಿಲ್ಲ್ಯೊ ವಿಂಚ್ಣಾರ್ 14 ಕಾಣಿಯೊ ಆಸಾತ್. ಘರ್, ಫುಲಾಂ, ಖಿಳೊ, ಕಾರ್ಯಕರ್ತ್, ಪರತ್ ಅನಾಥಾಶ್ರಮಾಕ್, ಮಾಜ್ರಾಶಾಸ್ತಿರ್, ಫೊಟೊ, ಪೇಯಿಂಗ್ ಗೆಸ್ಟ್, ಸಾಂತ್ರಾಂ, ಗುರ್ಕಾರಾಮ್, ಫಟ್, ಅಪ್ಪು, ಟೈಫಾಯ್ಡ್ ತಾಪ್ ಆನಿ ವಾಟ್.
ಹ್ಯಾ ಕಾಣಿಯಾಂ ವಿಶ್ಯಾಂತ್ ಬುಕಾಕ್ ವಿಸ್ತಾರ್ ಪ್ರಸ್ತಾವನ್ ಬರಯಿಲ್ಲೊ ಕಾಣಿಯಾಂಗಾರ್ ಆನಿ ಕವಿತಾ ಟ್ರಸ್ಟಾಚೊ ಅಧ್ಯಕ್ಷ್, ಕಿಶೂ ಬಾರ್ಕುರ್ ಮ್ಹಣ್ತಾ ” ಹ್ಯಾ ಜಮ್ಯಾಂತ್ಲ್ಯೊ ಕಾಣಿಯೊ ಪಯ್ಲ್ಯಾ ವಾಚ್ಪಾಕ್‌ಚ್ ವಾಚ್ಪ್ಯಾಕ್ ರೆವೊಡ್ ಘಾಲ್ತಾತ್ ಆನಿ ಧೊಸುಂಕ್ ಸುರು ಕರ‍್ತಾತ್. ಫಕತ್ ಕುಟ್ಮಾಜಿವಿತಾಚ್ಯೆ ಪರಿಧೆಭಿತರ್ ಮಾತ್ರ್ ನ್ಹಯ್, ಸಮಾಜಿಕ್ ಮಾಳಾರ್ ಸಯ್ತ್ ಧೊಸ್ಚ್ಯೊ, ದೆದೆಸ್ಪೊರ್ ಕರ್ಚ್ಯೊ ಕಾಣಿಯೊಯ್ ಹ್ಯಾ ಜಮ್ಯಾಂತ್ ವಾಚುಂಕ್ ಮೆಳ್ತಾತ್. ಆನಿ ಹ್ಯೊ ಕಾಣಿಯೊ ವಾಚ್ತಾನಾ ಶೀದಾ ಸಮಕಾಳೀನ್ ಭಾರತೀಯ್ ಸಮಾಜೆಂತ್ ಮನ್ಶ್ಯಾಜಿವಿತಾಕ್, ಭಾವ್೦ಬಾಂದವ್ಪಣಾಕ್ ಆಕಾಂತಾಕ್ ಲೊಟ್‌ಲ್ಲಿಂ ಘಡಿತಾಂ ದೊಳ್ಯಾಂಸಮೊರ್ ಅಪಾಪಿಂ ಉದೆವ್ನ್ ಯೆತಾತ್”
ಹೆಂ ಪುಸ್ತಕ್ ಕಿಟಾಳ್ ಪ್ರಕಾಶಕಾನ್ ಉಜ್ವಾಡಾಕ್ ಹಾಡ್ಲಾಂ. ಮಾಲ್ಘಡೊ ಕಲಾಕಾರ್/ ವಿನ್ಯಾಸಕ್ ಮಾನೆಸ್ತ್ ಎಡಿ ಸಿಕೇರ್ ಹಾಣಿ ಹೊ ಪುಸ್ತಕ್ ವಿನ್ಯಾಸ್ ಕೆಲಾ ಆಸುನ್, ಮಾನೆಸ್ತ್ ಜೋಕಿಮ್ ಪಿಂಟೊ, ವಾಮಂಜೂರ್ ಹಾಣಿ ಮುಕ್‌ಪಾನ್ ಪಿಂತ್ರಾಯ್ಲಾಂ. ಪುಸ್ತಕಾಚೆಂ ವಿಕ್ರ್ಯಾ ಮೋಲ್ ರುಪಯ್ 150/- ಆಸುನ್, ಉಗ್ತಾವಣೆ ಸುವಾಳ್ಯಾರ್ ಪುಸ್ತಕ್ ರಿಯಾಯ್ತೆ ದರಿರ್ ವಿಕ್ರಾಪಾಕ್ ಆಸ್ತಲೆಂ
ವಿನೋದಿಕ್ ಸಾಹಿತ್ಯಾ ಮಾರಿಫಾತ್ ಕೊಂಕ್ಣಿ ಸಾಹಿತ್ಯಾಂತ್ ಪ್ರವೇಶ್ ಜಾವ್ನ್, ಕವಿತೆಚಿ ದೀಕ್ಶಾ ಘೆವ್ನ್ , ನಾಟಕ್ ತರ್ಜುಮೊ ಕರ್ನ್, ಕಾದಂಬರಿ ರಚುನ್, ಅತಾಂ ಮಟ್ವ್ಯೊ ಕಾಣಿಯೊಯ್ ಬರಂವ್ಚೊ ತರುಣ್ ಸಾಹಿತಿ ರೋಶನ್ ಮೆಲ್ಕಿ ಸಿಕ್ವೇರಾ, ರೋಶು, ಬಜ್ಪೆ ಹ್ಯಾಚ್ ನಾಂವಾನ್ ಕೊಂಕ್ಣಿ ಸಾಹಿತ್ಯಾಂತ್ ಲೊಕಾಮೊಗಾಳ್ ಜಾಲಾ. ಆಜ್ ಮೆರೆನ್ ತಾಚಿಂ ಕವಿತೆಚಿಂ ದೋನ್ (ತೀಂತ್ ಜಾಲೆಂ ರಗತ್, ಗಿರ್ಬುಜಿ) ಪುಸ್ತಕಾಂ, ವಿನೋದಿಕ್ ಸಾಹಿತ್ಯಾಚಿಂ ತೀನ್ (ಹಾಸ್ಯ್ ಎಟ್ಯಾಕ್, ಓಪನ್ ಹಾಸ್ಯ್ ಸರ್ಜರಿ, ಪೆಲಿಸ್ ನವಿಡಾದ್) ಪುಸ್ತಕಾಂ ಉಜ್ವಾಡಾ ಆಯ್ಲ್ಯಾಂತ್. ಕವಿತಾ ಟ್ರಸ್ಟಾನ್ 2018 ವ್ಯಾ ವರ್ಸಾ ಫಾಯ್ಸ್ ಕೆಲ್ಲ್ಯಾ ‘ತೀಂತ್ ಜಾಲೆಂ ರಗತ್’ ಬುಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪುಸ್ತಕ್ ಪುರಸ್ಕಾರ್ ಆನಿ ಡೊ| ಟಿ.ಎಂ.ಎ.. ಪೈ ಪ್ರಶಂಸಾ ಪುಸ್ತಕ್ ಪುರಸ್ಕಾರ್ ಫಾವೊ ಜಾಲ್ಯಾತ್.
ಸಮನ್ವಯ ಸಂಸ್ಥ್ಯಾ ಥಾವ್ನ್ 2013 ವ್ಯಾ ವರ್ಸಾ ಯುವಕಿರಣ್ ಪ್ರಶಸ್ತಿ, 2017 ವ್ಯಾ ವರ್ಸಾ ಲಿಯೊ ರೊಡ್ರಿಗಸ್ ಕುಟಮ್ ಕಿಟಾಳ್ ಯುವ ಪುರಸ್ಕಾರ್ ರೋಶುಕ್ ಫಾವೊ ಜಾಲ್ಯಾತ್. ಹೋಂ ಸ್ವೀಟ್ ಹೋಂ, ಆದಾಂವ್ ಎವೆನ್ ಉಗಡ್ಲೆ ದೊಳೆ, ರಚ್ನಾರಾ ಆತಾಂ ತುಂಚ್ ಪಳೆ, ವಿಶೆವ್ ಅಪಾರ್ಟ್‌ಮೆಂಟ್ – ತಾಣೆ ಕೊಂಕ್ಣೆಕ್ ತರ್ಜುಮೊ ಕೆಲ್ಲೆ ನಾಟಕ್. ಸಾಂಡುನ್ ಘಾಲ್ಲಿ ಶೆಳಿ – ಸೆವಕ್ ಪತ್ರಾಕ್ ಬರಯಿಲ್ಲಿ ಕಾದಂಬರಿ. ಕೊಂಕ್ಣೆಂತ್ ಸರಾಗ್ ಬರಂವ್ಚ್ಯಾ ರೋಶುಚಿಂ ಅಂಕಣಾಂ – ನಮಾನ್ ಬಾಳೊಕ್ ಜೆಜು (ಪೋಲಿ ಟಿಕಲ್) ಆರ್ಸೊ (ಮೀಟ್ ಮಿರ‍್ಸಾಂಗ್, ಜಿಣಿಯೆ ಪಾನ್) – ಫಾಯ್ಸ್ ಜಾತೇ ಆಸಾತ್.
ಕೊಂಕ್ಣಿ ಸಾಹಿತ್ಯ್ ಮೋಗಿಂಕ್ ಆನಿ ರೋಶುಚ್ಯಾ ಅಭಿಮಾನಿಂಕ್ ಹ್ಯಾ ಕಾರ್ಯಾಕ್ ಮಾಯಾಮೊಗಾಚೊ ಯೆವ್ಕಾರ್ ಆಸಾ. ಎಂಸಿಸಿ ಬ್ಯಾಂಕ್ ಆಡಳ್ತ್ಯಾ ದಫ್ತಾರಾಂತ್ ಫಾವೊತಿ ಪಾರ್ಕಿಂಗ್ ವೆವಸ್ತಾಯ್ ಆಸಾ. ಕಾರ್ಯೆಂ 5.30 ವ್ಹರಾರ್ ಅಕೇರ್ ಜಾತೆಲೆಂ.
Congratulations to Roshu Bajpe on release of his new story collection “Paying Guest”. Wishing him all success for his future literature journey..