ಪಾಟ್ಲ್ಯಾ ದಿಸಾಂನಿ ಸುಪ್ರಿಮ್ ಕೊಡ್ತಿಚಾ ದೊಗಾಂ ನಿತಿದಾರಾಂನಿ, ದೇಶಾಂತ್ ಖಬ್ರೆ ಚ್ಯಾನೆಲಾಂನಿ, ಸಾಮಾಜಿಕ್ ಜಾಳಿ ಜಾಗ್ಯಾಂನಿ, ಪ್ರಿಂಟ್ ಮಿಡಿಯಾ ದ್ವಾರಿಂ ದ್ವೇಶಾನ್ ಭರ್‌ಲ್ಲೆ ಚರ್ಚೆ, ದ್ವೇಷಾನ್ ಭರ‍್ಲೆಲಿಂ ಭಾಷಣಾಂ, ದ್ವೇಷಾನ್ ಭರ‍್ಲೆಲೆ ಸಂವಾದ್ ಆನಿ ಸಂದರ್ಶನಾಂ ಪ್ರಸಾರ್ ಜಾಂವ್ಚೆ ವಿಶ್ಯಾಂತ್ ಕಠೀಣ್ ಶಿಣ್ ಉಚಾರ‍್ಲಾ. ತ್ಯಾ ವಯ್ರ್ ಹ್ಯಾ ದೊಗಾಂ ನಿತಿದಾರಾಂನಿ, ಕೇಂದ್ರ್ ತಶೆಂ ರಾಜ್ಯ್ ಸರ್ಕಾರ್ ಕಿತ್ಯಾಕ್ ಮೌನ್ ಬಸ್ಲಾ? ಮ್ಹಣ್ ಸವಾಲ್ ಕೆಲಾಂ. ಮಾದ್ಯಮಾಂನಿ ಅಸಲೊ ದ್ವೇಷ್ ಪ್ರಸಾರ್ ಜಾಯ್ನಾಶೆಂ ಆಡಾಂವ್ಕ್ ಸರ್ಕರಾನ್ ಕಿತೆಂ ಕ್ರಮ್ ಘೆತ್ಲಾಂ? ಮ್ಹಣ್‌ಯಿ ನಿತಿದಾರಾಂನಿ ವಿಚಾರ‍್ಲಾಂ.
ದ್ವೇಶಾನ್ ಭರ‍್ಲೆಲ್ಯಾ ಭಾಷಣಾಂಚೆರ್, ಖದ್ವಳ್ ಉಟಂವ್ಚಾ ವಾರ್ತಾಂಚೆರ್, ಧರ್ಮಾಂ ಮಧೆಂ, ಜಾತಿ ಮಧೆಂ ಆಶಾಂತಿ ಉಬ್ಜಂವ್ಚ್ಯಾ ಸರ್ವ್ ಗಜಾಲಿಂಚೆರ್ ಸರ್ಕಾರಾನ್ ಫಾವೊತೆಂ ಕ್ರಮ್ ಘೆಂವ್ಕ್ ಜಾಯ್ ಮ್ಹಣ್ ಹ್ಯಾ ಆದಿಂಯ್ ಕೊಡ್ತಿನ್ ಆದೇಶ್ ದಿಲ್ಲೆ ಆಸಾತ್. ತಶೆಂ ದಿಲ್ಲ್ಯಾ ಆದೇಶಾಂಕ್ ಕಿತ್ಯಾಕ್ ಪಾಳೊ ದಿಂವ್ಕ್ ನಾ ? ಮ್ಹಣ್‌ಯ್ ತಾಂಣಿ ವಿಚಾರ‍್ಲಾಂ. ಅಸಲ್ಯಾ ಗಜಾಲಿಂಚೆರ್ ನಿಯಂತ್ರಣ್ ಹಾಡಿನಾ ಜಾಲ್ಯಾರ್ ದೇಶಾಚೊ ಫುಡಾರ್ ಭಿಗಡ್ತೊಲೊ, ಆತಾಂಚ್ ಸಬಾರ್ ಕಡೆ ಸಮಧಾನ್ ಭಿಗ್ಡೊನ್ ಆಯ್ಲಾಂ. ಧರ್ಮಾಂ ಮಧೆಂ ಸಂಬಂಧ್ ಮೊಡೊನ್ ಆಯ್ಲ್ಯಾತ್. ಪ್ರಮುಖ್ ಧರ್ಮಾಚಾ ಲೊಕಾಂ ಮಧೆಂ ಎಕಾ ಥರಾಚೆಂ ಭ್ಯೆಂ ಖಂಚೊನ್ ಆಯ್ಲಾಂ. ಜರ್ತರ್ ಹ್ಯೆ ವಿಶಿಂ ಫಾವೊತೆಂ ಮೇಟ್ ಸರ್ಕಾರ್ ಕಾಡಿನಾ ಜಾಲ್ಯಾರ್ ಆಮ್ಚ್ಯಾ ದೇಶಾಕ್ ಮಾರೆಕಾರ್ ದೀಸ್ ಪಳಂವ್ಕ್ ಮೆಳ್ತೆಲೆ ಮ್ಹಣ್ ಖಂತ್ ಉಚಾರ‍್ಲ್ಯಾ.
ಆತಾಂ – ಸರ್ಕಾರ್ ಚಲಂವ್ಚಿ ಪಾಡ್ತ್, ದೇಶಾಂತ್ಲೆಂ ವಾತಾವರಣ್ ಆಪ್ಣಾಕ್ ಫಾಯ್ದೊ ಜಾಂವ್ಚೆ ಪರಿಂ ಪಳೆತಾ ಆನಿ ಭಿತರ‍್ಲ್ಯಾ ಭಿತರ್ ಕೋಮುಹಿಂಸಾಚಾರ್ ಆಡಾಂವ್ಕ್ ವಚಾನಾ, ಬದ್ಲಾಕ್ ತಸಲ್ಯಾಂಕ್ ಪ್ರಚೋದಿತ್ ಕರ್ತಾ. ಶಾಂತಿ – ಸಮಾಧಾನ್ ಪಾಸಾರ‍್ಚೆ ಪುಡಾರಿ ಆಸ್ಚೊ, ಪರ‍್ಜೆಚ್ಯಾ ಮುಳಾವ್ಯಾ ಹಕ್ಕಾಂಕ್ ಸಂರಕ್ಷಣ್ ದಿಂವ್ಚೊ, ಶಾಂತೆಚೊ ದೇಶ್ ಮ್ಹಣ್ ಘಾಜ್‌ಲ್ಲೊ ಆಮ್ಚೊ ದೇಶ್, ಪಾಟ್ಲ್ಯಾ ಥೊಡ್ಯಾ ವರ್ಸಾಂ ಥಾವ್ನ್ ಅಶಾಂತೆಚೊ ಆನಿ ಆಂತರಿಕ್ ಝುಜಾಚೊ ದೇಶ್ ಮ್ಹಣ್ ಪ್ರಚಾರ್ ಜೊಡ್ತೇ ಆಸಾ.
ಆವಾಜಾವಿಣೆ ಮತೀಯ್ ಹಿಂಸಾ ಚಲೊನ್ ಆಸಾ. ಎಕಾಮೆಕಾ ದ್ವೇಶಾನ್ ಭರೊನ್ ತರ್ನಾಟ್ಯಾಂಚೆಂ ಜೀವ್ ಉಬ್ಲ್ಯಾತ್. ಹ್ಯೆ ದಿಶೆನ್ ಸರ್ಕಾರಾನ್ ಕಸಲೆಂಚ್ ಕತೀಣ್ ಕ್ರಮ್ ಘೆತ್‌ಲ್ಲೆಂ ದಿಸಾನಾ. ಜಾಯ್ತ್ಯಾ ಪ್ರದೇಶಾಂನಿ ಉಚಾಂಬಳ್ ಜಾಲ್ಲೊ ಲೋಕ್ ಕಾಯ್ದೊ ಆಪ್ಲ್ಯಾ ಹಾತಾಂತ್ ಘೆತಾ ಆನಿ ಪೊಲಿಸಾಂನಿ ಕರ್ಚೆಂ ಕಾಮ್ ಖುದ್ ಕರ್ತಾ, ಫಾರಿಕ್ಪಣ್ ಘೆತಾ!
ಕೊಡ್ತಿ ಪ್ರಕಾರ್ ಎದೊಳ್‌ಚ್ ಆಸ್‌ಲ್ಲೆ ಕಾಯ್ದೆ ಕಾನೂನಾಂ ವಾಪಾರ‍್ನ್ – ದ್ವೇಶ್ ಪಾಚಾರ‍್ಚ್ಯಾ ಫುಡಾರ‍್ಯಾಂಚೆರ್, ಸಂಘಟನಾಂಚೆರ್ ಆನಿ ಮಾದ್ಯಮಾಂಚೆರ್ ಕಠೀಣ್ ಕ್ರಮ್ ಘೆಂವ್ಕ್ ಜಾತಾ. ತೆ ಖಾತಿರ್ ನವ್ಯಾನ್ ಕಾನೂನ್ ರಚಿಜೆ ಮ್ಹಣ್ ನಾ. ಪೂಣ್, ಅಧಿಕಾರಾರ್ ಆಸ್ಚ್ಯಾ ಸರ್ಕಾರಾನ್ ಆಪ್ಲೊ ಫಾಯ್ದೊ ಪಳಂವ್ಚೆಂ ಪ್ರಜಾಪ್ರಭುತ್ವಾಕ್ ಆಪಾಯಾಚೆಂ ಜಾವ್ನಾಸಾ. ಸರ್ಕಾರ್ ಜರ್ತರ್ ಹ್ಯೆ ದಿಶೆನ್ ಮೆಟಾಂ ಕಾಡಿನಾ ಜಾಲ್ಯಾರ್ ಖುದ್ ಕೊಡ್ತಿನ್ ಮುಕಾರ್ ಸರೊನ್ ದ್ವೇಶ್ ಆನಿ ಹಿಂಸಾ ಪ್ರಸಾರಾ ವಿರೋಧ್ ಕಿತೆಂ ಕ್ರಮ್ ಘೆಜಯ್ ಮ್ಹಳ್ಳಿ ಸೂಚನಾವಳ್ ತಯಾರ್ ಕರಿಜೆ ಪಡ್ತೆಲಿ.
ದ್ವೇಶ್ ಭಾಷಣಾಂಕ್ ಉತ್ತೇಜನ್ ದೀವ್ನ್ ತಿಂ ಕಾರ್ಯಗತ್ ಕರ್ಚಿ ತಂತ್ರ್‌ಗಾರಿಕಾ ನಾಸ್ ಕರ್ಚೆಂ ಸರ್ಕಾರಾಚಾ ಆನಿ ಪಾಡ್ತಿಂಚ್ಯಾ ಹಾತಾಂತ್ ಆಸಾ. ಪೂಣ್ ಕರ್ತಾ ಕೋಣ್? ಪ್ರಸ್ತುತ್ ಸರ್ಕಾರ್ ತಶೆಂ ಕರಿತ್‌ಗಿ? ಖುದ್ ಅಧಿಕಾರಾರ್ ಆಸ್ಚ್ಯಾ ಪಾಡ್ತೆಚೆ ಮಂತ್ರಿ ದೋನ್ ವರ್ಸಾಂನಿ ಜಾಂವ್ಕ್ ಆಸ್ಚಾ ಮಹಾಚುನಾವಾಚಿ ತಯಾರಿ ಆತಾಂಚ್ ಸುರು ಕರುನ್ ದೇಶ್‌ಭರ್ ಭಂವೊನ್ ಪರ‍್ಜೆಕ್ ಬಡ್ಕಾಯ್ತೇ ಆಸಾತ್. ಲೊಕಾಚ್ಯಾ ಮತಿಂತ್ ಮತೀಯ್ ವೀಕ್ ವೊಂಪ್ತೇ ಆಸಾತ್. ಆಪ್ಲಿ ಪಾಡ್ತ್ ಮಾತ್ ದೇಶಾಚೆಂ ರಕ್ಷಣ್, ದೇಶಾಚಿ ಪ್ರಗತಿ, ದೇಶಾಂತ್ಲ್ಯಾ ಯುವಜಣಾಂಕ್ ಕಾಮಾಂ, ದುಬ್ಳ್ಯಾಂಕ್ ಘರಾಂ, ಪಿಡೇಸ್ತಾಂಕ್ ಚಿಕಿತ್ಸಾ ದೀಂವ್ಕ್ ಸಕ್ತಾಂವ್ ಮ್ಹಣ್ ಪ್ರಚಾರ್ ಕರುನ್ ಆಸಾತ್. ಧರ್ಮಾಚ್ಯಾ ನಾಂವಾನ್ ಹುಸ್ಕಾವ್ನ್ ಸಗ್ಳೆಂ ರಾಷ್ಟ್ರ್ ಎಕಾ ಧರ್ಮಾಚೆಂ ರಾಷ್ಟ್ರ್ ಕರುಂಕ್ ಪಳೆತಾತ್.
ವೋಟ್ ಆರಾಂವ್ಕ್ ಕರ‍್ಚ್ಯಾ ಅಸಲ್ಯಾ ಪ್ರಚಾರ್ ಭಾಷಣಾಂನಿ ಆಜ್ ಫಕತ್ ದ್ವೇಶ್ ಭರೊನ್ ಆಸ್ಚೆಂ ದಿಸ್ತಾ. ಎಕಾಮೆಕಾ ಠಿಕಾ, ಗಾಳಿ ಪರ್ಯಾಂತ್ ಉಚಾರ‍್ತಾತ್ ಆನಿ ಖಬ್ರೆ ಸಂಸ್ಥೆ, ಖಾಸ್ಗಿ ಮಾಲಕ್ಪಣಾಚೆ ತೆ ಜಾಲ್ಯಾರೀ, ಸರ್ಕಾರಾಕ್ ತಾಂಚಿ ಚೂಕ್ ದಾಕವ್ನ್ ದೀನಾಂತ್. ಬದ್ಲಾಕ್ ಫುಡಾರ‍್ಯಾಂನಿ ದ್ವೇಶಾನ್ ಉಚಾರ‍್ಲೆಲಿಂ ಉತ್ರಾಂ ಮೀಟ್ ಮಿರ್ಸಾಂಗ್ ಲಾವ್ನ್ ಪ್ರಸಾರ‍್ತಾತ್. ಆಜ್ ಖಂಚೊಯ್ ವಾರ್ತಾಹಾರ್ ಯಾ ರಾಜಕೀ ವಿಶೇಶಜ್ಞ್ ಸರ್ಕಾರಾಂತ್ಲ್ಯಾ ಮಂತ್ರಿನಿ ಉಚಾರ‍್ಲೆಲೆಂ ಸರ್ವ್ ಸಾರ್ಕೆಂ ಮ್ಹಣೊನ್ ಪುಕಾರ‍್ತಾ ಶಿವಾಯ್, ಚೂಕ್ ಮ್ಹಣ್ ಸಾಂಗಾನಾ. ಚೂಕ್ ಆಸ್‌ಲ್ಲಿ ಚೂಕ್ ಮ್ಹಣ್ ಸಾಂಗ್ಚೆಂ ಕಾಮ್ ವಾರ್ತಾಹರಾಂಚೆಂ. ದ್ವೇಶಾನ್ ಭರ‍್ಲೆಲಿಂ ಉತ್ರಾಂ ಲೊಕಾ ಮಧೆಂ ಆಸ್ಚೊ ಸಹಾನುಭವ್, ಭಾವ್-ಬಾಂಧವ್ಪಣ್ ಭಿಗ್ಡಾಯ್ತಾತ್. ದೆಕುನ್ ದ್ವೇಶ್ ಭರ್‌ಲ್ಲ್ಯಾ ಭಾಷಣಾಂಕ್ ಬಹಿಷ್ಕಾರ್ ಕರಿಜೆ ಶಿವಾಯ್ ವ್ಹಡ್ ಶಿರೊನಾಂವಾಂ ದೀವ್ನ್ ತಿಂ ಪ್ರಕಟ್ ಕರ್ಚೆಂ ಬರೆಂ ನಯ್. ಹ್ಯಾ ವರ್ವಿಂ ಲೊಕಾಂ ಮಧೆಂ ಆಸ್‌ಲ್ಲೊ ಬರೊ ಸಂಬಂಧ್ ಅನಾವಶೆಂ ಭಿಗಡ್ತಾ. ಕ್ರೋಧ್ ವಾಡ್ತಾ ಆನಿ ಉಜೊ ಪೆಟ್ತಾ. ಆಮ್ಚೆಚ್ ನಾಗರಿಕ್ ಮೆತೆರ್ ಜಾವ್ನ್ ದೇಶಾಚಾ ಆಸ್ತ್ – ಪಾಸ್ತ್ ಲಗಾಡ್ ಕಾಡ್ತಾತ್.
ಜರ್ತರ್ ಹೆಂ ಆಶೆಂಚ್ ಮುಕಾರುನ್ ವಚತ್ ಜಾಲ್ಯಾರ್, ಏಕ್ ದೀಸ್ ಫಕತ್ ದ್ವೇಶ್ ಮಾತ್ ಉರ‍್ತಲೊ, ದೇಶ್ ಉರ‍್ಚೊ ನಾ. ದೆಕುನ್ ದ್ವೇಶ್ ಪಾಸಾರ‍್ಚ್ಯಾ ಮಾಧ್ಯಮಾಂಚೆರ್ ಆತಾಂಚ್ ಸರ್ಕಾರಾನ್ ಖಾಡುಂ ಘಾಲ್ಚಿ ವ್ಹಡ್ ಗರ‍್ಜ್ ಆಸಾ. ಪರ‍್ತ್ಯಾನ್ ಶಿತ್ ವಚೊನ್ ಪೇಜ್ ಜಾತಾ ಪರ್ಯಾಂತ್ , ಕೊಡ್ತಿಚ್ಯಾ ಚೆತಾವ್ಣೆಕ್ ರಾಕ್ಚೆಂ ನಂಯ್.
► ನವೀನ್ ಕುಲ್ಶೇಕರ್
ಮೋದಿಕ್ ಪ್ರಚಂಡ್ ಬಹುಮತ್ ಮೆಳ್’ಲ್ಲೊಚ್ ಅಲ್ಪ್-ಸಂಖ್ಯಾತಾಂ ವಿರುದ್ಧ್ ದ್ವೇಶ್ ಭಾಶಣಾಂ ಕರುನ್. ದೆಕುನ್, ತಾಚ್ಯೆ ಥಾವ್ನ್ ಕಿತೆಂ ದುಸ್ರೆಂ ಮೇಟ್ ಆಶೆವ್ಯೆತಾ? ತಶೆಂ ಆಸ್’ಲ್ಲೆಂ ಆಸಾ ತಶೆಂ ಸಾಂಗ್ಚಿಭೋವ್ ಥೊಡಿಂ ಮಾಧ್ಯಮಾಂ ಆಸಾತ್. ಹಾಂವ್ ತಿಂ ಮಾತ್ರ್ ಪಳೆತಾಂ ವ ವಾಚ್ತಾಂ. ಅಸಲ್ಯಾ ಮಾದ್ಯಮಾಂ ಪೈಕಿಂ, NDTV India ಆಸ್ಲಿ. ತಾಂತು Prime Time ಪ್ರಸಾರ್, ರವಿಶ್ ಕುಮಾರಾಚೊ,ಚುಕಾನಾಸ್ತಾನಾಂ, ಪಳೆಜೆ.
ಆತಾಂ, NDTV ಗೌತಮ್ ಅದಾನಿಚ್ಯಾ ಘಾಸಾಂತ್ ಪಡ್ಲಿ. ಬಹುಶ್ಯಾ ಸಂಪದಕೀಯ್ ಸ್ವತಂತ್ರ್ ಮುಖಾರ್ ಆಸಾತ್’ಗೀ ತೆಂ ಏಕ್ ವ್ಹಡ್ ಸವಾಲ್. ಗೋದಿ ಮಾದ್ಯಮಾಂ ಮ್ಹಣ್ ಕಳಿತ್ ಆಸ್’ಲ್ಲಿಂ ಟಿವಿ ಚೆನೆಲಾಂಕ್ ಹಾಂವೆಂ ಬಹಿಶ್ಕಾರ್ ಘಾಲಾ ದೆಕುನ್ ಆತಾಂ NDTV ತ್ಯೆ ಪಟ್ಟೆಂತ್ ಕುಡ್ಸತಾ ಮ್ಹಣ್ ದಿಸ್ತಾ. WION ದೇಸಾ ಭಾಯ್ರ್ ಥಾವ್ನ್ ಪ್ರಸಾರ್ ಜಾತಾ ದೆಕುನ್ ಯೆದೊಳ್ ದ್ವೇಶ್ ವೊಂಕಿನಾ<. ಅಸಲಿಂ ಥೊಡಿಂ ಪ್ರಿಂಟ್ ಮಾಧ್ಯಮಾಂ ಆಸಾತ್. ತಾಂಕಾಂ ದ್ವೇಶಾಕ್ ವಿರುದ್ಧ್ ಆಸ್’ಲ್ಲ್ಯಾ ಲೋಕಾನ್ ಪಾಟಿಂಬೊ ದೀಜೆ. ಮೊನೆಂ ಬಸ್’ಚ್ಯೆಂ ಸಹಿಂ.