ಮರಿಮಾಯ್, ಜಾವ್ನಾಸಾ ‘ಶೊರ್ಟ್‌ಕಟ್’ ವಾಟ್ – ಬಾಪಾಲಾಗಿಂ ಪಾವೊಂಕ್!

“ಮರಿಮಾಯ್ ಜಾವ್ನಾಸಾ ಶೊರ್ಟ್‌ಕಟ್ ವಾಟ್ ಬಾಪಾಲಾಗಿಂ ಫಾವೊಂಕ್” ಮ್ಹಣ್ತಾ –  ಮರಿಯಾಳ್ ಮೊಗಾನ್ ಆನಿ ಭಕ್ತಿಪಣಾನ್ ನಿಶ್ಕಲ್ಮಶ್ ಭರ್‌ಲ್ಲೊ ಸಾಂ. ರೊಕಿಕ್ ಸಮರ್ಪಿಲ್ಲ್ಯಾ ನೀರುಡೆ ಫಿರ್ಗಜೆಚೊ ನಿವಾಸಿ ಮಾನೆಸ್ತ್ ಸ್ಟೇನಿ ಕೆನ್ಯೂಟ್ ಪಿಂಟೊ.

ಹಾಚೆ ಪಾಟ್ಲ್ಕ್ಯಾನ್ ಆಸ್ಚೆಂ ರಾಜಾಂವ್ ಸೊಂಪ್ಯಾ ಉತ್ರಾಂನಿ ವಿಸ್ತಾರಾವ್ನ್ ತೋ ಮ್ಹಣ್ತಾ –   “ಚಿಂತ್ಯಾಂ ಏಕ್ ಕುಟಮ್ ಆಸಾ – ಆವಯ್, ಬಾಪುಯ್ ಆನಿ ಭುರ್ಗಿಂ. ಭುರ್ಗ್ಯಾಂನಿ ತಾಂಕಾ ಜಾಯ್ ಜಾಲ್ಲೆಂ ಕಿತೇಂಯ್ ಶೀದಾ ಬಾಪಯ್‌ಲಾಗಿಂ ವಚೊನ್ ವಿಚಾರ್ಲ್ಯಾರ್ ಏಕ್‌ಚ್ ತೆಂ ತಾಂಕಾ ಮೆಳಾನಾ ವಾ ಬಾಪುಯ್ ಮ್ಹಣ್ತಾ “ಟೆಲ್ ಮಮ್ಮ”. ಪೂಣ್  ತೆಂಚ್ ಆವಯ್ ಮಾರಿಫಾತ್ ಬಾಪಯ್ ಲಾಗಿಂ ವಿಚಾರುಂಕ್ ಲಾಯ್ಲ್ಯಾರ್, ತೆಂ ಭುರ್ಗ್ಯಾಂಕ್ ಖಂಡಿತ್ ಮೆಳ್ತಾ.”

” ಹಾಚೊ ಅರ್ಥ್ – ಬಾಪಾಯ್ಕ್ ಭುರ್ಗ್ಯಾಂಚೊಂ ಮೋಗ್ ನಾ ವಾ  ಆವಯ್ನ್ ಸಾಂಗ್ಲ್ಯಾರ್ ಮಾತ್ ಬಾಪುಯ್  ದಿತಾ ಮ್ಹಣ್ ನ್ಹಯ್. ಭುರ್ಗ್ಯಾಂಕ್ ಕಿತೆಂ ಜಾಯ್ ? ಕಿತೆಂ ನಾಕಾ? ಮ್ಹಳ್ಳೆಂ ಏಕ್ ಆವಯ್ ಮಾತ್ರ್ ಬರ‍್ಯಾನ್ ಜಾಣಾ. ದೆಕುನ್ “ಟೆಲ್ ಮಮ್ಮ” ಮ್ಹಳ್ಯಾರ್ ಆವಯ್ ಬರೆಂ – ವಾಯ್ಟ್ ಚಿಂತೂನ್ ಪಳಯ್ತಾ ಮ್ಹಣೊನ್‌ಯೀ ಅರ್ಥ್ ಕರುನ್ ಘೆವ್ಯೆತಾ.” ಮ್ಹಣ್ ಆಪ್ಲ್ಯಾ ರಾಜಾಂವಾಂಚಿ ದುಸ್ರಿ ಕೂಸ್ ಉಗ್ತಿ ಕರ್ತಾ – ಮಂಗ್ಳುರ್ ಆನಿ ಉಡುಪಿ ದಿಯೆಸೆಜಿಚ್ಯಾ ಫಿರ್ಗಜಾಂನಿ ಲೂರ್ಡ್ ಮಾಯೆಚೆ ಗ್ರೊಟ್ಟೆ ಬಾಂದುನ್ ದಿಂವ್ಚೆಂ ಮರಿಯಾಳ್ ಮಿಸಾಂವ್ ಹಾತಿಂ ಘೆತ್‌ಲ್ಲೊ,  ಮಾನೆಸ್ತ್ ಸ್ಟೆನಿ ಕೆನ್ಯೂಟ್ ಪಿಂಟೊ, ಉರ್ಫ್ – ಸತ್ತರ್ ಆನಿ ಆಂಯ್ಶ್ಯಾಂಚ್ಯಾ ಧಾಕ್ಡ್ಯಾಂತ್ ‘ಮೊಗಾಚೊ ರಾಯ್’ ಮ್ಹಣ್ ಕೊಂಕ್ಣಿ ಸಾಹಿತ್ಯಾಂತ್ ನಾಂವಾಡ್ಲೊಲೊ ಫಾಮಾದ್ ಕಾದಂಬರಿಕಾರ್ ಸ್ಟೇನಿ, ನಿರುಡೆ!

ಆಜ್ ಮೆರೆನ್ ತಾಣೆ, ಸಾಂ. ರೊಕಿಕ್ ಸಮರ್ಪಿಲ್ಲಿ ಆಪ್ಲಿ ಮಾಯ್ ಫಿರ್ಗಜ್ ನೀರುಡೆ, ಪೊಂಪಯ್ ಮಾಯೆಕ್ ಸಮರ್ಪಿಲ್ಲಿ ಫಿರ್ಗಜ್ ಉರ್ವಾ, ನಿತ್ಯಾದರ್ ಮಾಯೆಕ್ ಸಮರ್ಪಿಲ್ಲಿ ಉಡುಪಿ ದಿಯೆಸೆಜಿಚಿ ಫಿರ್ಗಜ್ ನಿರ್ಮಲಪದವು ಆನಿ ಸಾಂ. ಲೊರೆಸಾಕ್ ಸಮರ್ಪಿಲ್ಲಿ ಕಾಸರಗೋಡ್ ವಾರಾಡ್ಯಾಚಿ ಫಿರ್ಗಜ್ ಮಣಿಯಾಂಪರೆ – ಅಶೆಂ ಮಂಗ್ಳುರ್ ಆನಿ ಉಡುಪಿ ದಿಯೆಸೆಜಿಚ್ಯಾ 4 ಫಿರ್ಗಜಾಂನಿ ಲೂರ್ಡ್ ಸಾಯ್ಭಿಣಿಚೆ ಗ್ರೊಟ್ಟೆ ಬಾಂದುನ್ ದಿಲ್ಯಾತ್. ಫುಡಾರಾಂತೀ – ಪ್ರತ್ಯೇಕ್ ಜಾವ್ನ್ ಹಳ್ಳೆಚ್ಯಾ ಫಿರ್ಗಜಾಂಕ್ ಲೂರ್ಡ್ಸ್ ಮಾಯೆಚೆ ಗ್ರೊಟ್ಟೆ   ಬಾಂದುನ್ ದಿಂವ್ಚೊ ಇರಾದೊ ಆಸಾ ಮ್ಹಣ್ ತೋ ಮ್ಹಣ್ತಾ.

ಸ್ಟೇನಿ, ನೀರುಡೆಕ್ ಹಾಂವೆ ಪಯ್ಲೆಂ ವಾಚ್‌ಲ್ಲೊ ಹಾಂವ್ ಪಾಂಚ್ವ್ಯಾ ಕ್ಲಾಶಿಂತ್ ಆಸ್ತಾನಾ. ತವಳ್ ತಾಚಿ ಏಕ್ ಮೆಗಾ ಕಾದಂಬರಿ ಪಯ್ಣಾರಿ ಪತ್ರಾರ್ ಸಾಂಕಳ್ ಜಾವ್ನ್ ವ್ಹಾಳ್ತಾಲಿ. ಆನಿ ಹಿ ಕಾಣಿ ವಾಚುಂಕ್ ಮ್ಹಣ್ ಸರ್ವ್ ವರ್ಗಾಚೆ ವಾಚ್ಪಿ ಹಫ್ತ್ಯಾಥಾವ್ನ್ ಹಫ್ತ್ಯಾಕ್ ಆತುರಾಯೆನ್ ಪಯ್ಣಾರಿಕ್ ರಾಕೊನ್ ರಾವ್ತಾಲೆ. ಸಾರ್ಕೆ ರಸ್ತೆ ನಾತ್ಲೆಲ್ಯಾ ಪೆರ್ನಾಲ್ ತಸಲ್ಯಾ ಲ್ಹಾನ್  ಗಾಂವಾಂತ್ ತಪ್ಪಾಲ್ ಪಾವಿತ್ ಕರುಂಕ್ ಪೋಸ್ಟ್‌ಮ್ಯಾನ್ ಗಾದೆ – ಮೆರೊ, ನಂಯ್ – ವ್ಹಾಳ್ ಉತ್ರೊನ್ ಘರಾ ಘರಾ ವೆಚ್ಯಾ ಬದ್ಲಾಕ್ ಏಕ್ ವಿಚಿತ್ರ್  ‘ಶೊರ್ಟ್ ಕಟ್’ ವಾಪಾರ್ತೆಲೆ. ಬಾರಾ ವೊರಾರ್ ಆಮ್ಚ್ಯಾ ಇಸ್ಕೊಲಾಕ್ ಯೆಂವ್ಚೆಂ ಆನಿ ಒಂದನೇ ಥಾವ್ನ್ ಏಳನೇ ಕ್ಲಾಶಿ ಪರ್ಯಾಂತ್ ಖಂಯ್ಚ್ಯಾ ಘರ್ಚಿಂ ಭುರ್ಗಿಂ ಇಸ್ಕೊಲಾಂತ್ ಶಿಕ್ತಾತ್ ತಾಂಚ್ಯಾ ಹಾತಾಂತ್ ತ್ಯಾ ಘರಾಕ್ ಆಯಿಲ್ಲೆಂ ತಪ್ಪಾಲ್, ಕಾಗ್ದಾಂ – ಪತ್ರಾಂ ಆಸ್ಲ್ಯಾರ್ ದೀವ್ನ್ ವೆಚೆಂ. ಮಾಗಿರ್ ಅಮಿ ಭುರ್ಗ್ಯಾಂನಿ ತಿಂ ಕಾಗ್ದಾಂ ಪೊತ್ಯಾಂತ್ ದವರ್ನ್ ಸಾಂಬಾಳ್ನ್  ಸಾಂಜೆರ್ ಘರಾ ಪಾವ್‌ಲ್ಲೆಂಚ್ ಘರಾ ದಿಂವ್ಚಿಂ. ಥೊಡೆಪಾವ್ಟಿಂ ಆಮ್ಚಿಂ ಮಾತ್ರ್ ನ್ಹಯ್ , ಸೆಜಾರ‍್ಯಾಂಚೀಯ್ ಕಾಗ್ದಾಂ ಪೋಸ್ಟ್‌ಮೆನಾನ್ ಆಮ್ಚೆಂ ಹಾತಿಂ ದೀವ್ನ್ ಆಮ್ಕಾಂ ಸಬ್ ಪೋಸ್ಟ್‌ಮೆನ್ ಕೆಲ್ಲೆಂಯ್ ಆಸಾ.

ಹಾಂವ್ ಪಾಂಚ್ವ್ಯಾ ಕ್ಲಾಶಿಂತ್ ಆಸ್ತಾನಾ ಆಮ್ಗೆರ್ ಪಯ್ಣಾರಿ ಪತ್ರ್ ಯೆತಾಲೆಂ. ಬೊಂಬಯ್ಚ್ಯಾ ಕುಡಾಂತ್ ರಾಂವ್ಚ್ಯಾ ಮ್ಹಜ್ಯಾ ಎಕಾ ತಾರ್ವೊಟಿ ಬಾಪ್ಪುನ್ ಮ್ಹಜ್ಯಾ ಬಾಯೆಕ್ ವಾಚುಂಕ್ ಮ್ಹಣ್ ಪಯ್ಣಾರಿ ಪತ್ರಾಕ್ ವರ್ಗಣಿ ಬಾಂದ್‌ಲ್ಲಿ. ಪೂಣ್ ದೊನ್ಪಾರಾಂ ಇಸ್ಕೊಲಾಕ್ ಆಯಿಲ್ಲೆಂ ಪಯ್ಣಾರಿ ಪತ್ರ್ ಮಾತ್ರ್ ಮ್ಹಜ್ಯಾ ಹಾತಾಕ್ ಸಾಂಜೆರ್ ಇಸ್ಕೊಲ್ ಸುಟ್ತಾನಾ ಮೆಳ್ತಾಲೆಂ. ತವಳ್ ಪರ್ಯಾಂತ್ ತೆಂ ಆಮ್ಚ್ಯಾ ಕ್ಲಾಶಿಚಿ ಕ್ಲಾಸ್ ಟಿಚೆರ್, ಏಕ್ ಸಿಸ್ಟರ್, ವಾಚ್ತಾಲಿ. ಏಕ್ ದೀಸ್ ಬೋ‌ವ್‌ಶಾ ಸಿಸ್ಟರಿಕ್ ದೊನ್ಪಾರಾಂ ಇಸ್ಕೊಲಾಂತ್ ಪತ್ರ್  ವಾಚುಂಕ್ ವೇಳ್ ಮೆಳೊಂಕ್ ನಾ, ದೆಕುನ್ ಸಾಂಕಳ್ ಕಾಣಿಯೆಚೆಂ ಪಾನ್ ತಿಣೆಂ ಕಾಡ್ನ್ ದವರ್ಲೆಂ ಆನಿ ಪಯ್ಣಾರಿ ಪತ್ರ್ ತಶೆಂಚ್ ರ‍್ಯಾಪರ್ ಲಾವ್ನ್ ಮ್ಹಜ್ಯಾ ಹಾತಾಂತ್ ದಿಲೆಂ ಆನಿ ಹಾಂವ್ ಘರಾ ಗೆಲೊಂ. ಮ್ಹಾಕಾ ಬಾಯೆಚ್ಯೊ ಗೊವ್ಜಿಚ್ ಗೊವ್ಜಿ. ದುಸ್ರ್ಯಾ ದಿಸಾ ಸಿಸ್ಟರಿನ್ ಮ್ಹಾಕಾ ಸಾಂಕಳ್ ಕಾಣಿಯೆಚೆಂ ಪಾನ್ ದಿತಾನಾ ಮ್ಹಾಕಾ ಕಳ್ಳೆಂ – ಮ್ಹಜಿ ಬಾಯ್ ಮಾತ್ರ್ ನ್ಹಯ್, ತರ್ನಿ ಸಿಸ್ಟರ್ ಸಯ್ತ್ ಸ್ಟೇನಿ, ನೀರುಡೆಚ್ಯಾ ಮೊಗಾ ಕಾಣಿಯೆಚ್ಯಾ ಮೊಗಾರ್ ಪಡ್‌ಲ್ಲಿ. ಆನಿ ತಿ ಕಾದಂಬರಿ ಜಾವ್ನಾಸ್ಲಿ – ಜಿಕ್ಲೆಲಿ ಸಲ್ವಣ್. [ 2008  ವ್ಯಾ ವರ್ಸಾ ದಾಯ್ಜಿ ಪ್ರಕಾಶನಾನ್ ಹಿ ಕಾದಂಬರಿ ಬುಕಾರುಪಾರ್ ಫಾಯ್ಸ್ ಕೆಲ್ಯಾ ]  ಸಿಸ್ಟರಿಚ್ಯಾ ಕಾರಣಾಕ್ ಲಾಗೊನ್ ಹಾಂವೆ ತಿ ಮೊಗಾಕಾಣಿ ತ್ಯಾ ಕವ್ಳ್ಯಾ ಪ್ರಾಯೆರ್ ವಾಚುಂಕ್ ಸುರು ಕೆಲಿ  ಆನಿ ತ್ಯಾ ಕಾದಂಬರೆಂತ್ಲಿಂ ಲವಿ ಆನಿ ರಫಿ ಮ್ಹಜ್ಯಾ ಉಡಾಸಾಂತ್ ಉರ್ಲಿಂ. ಪೂಣ್ ಸ್ಟೆನಿ ಮ್ಹಣ್ತಾ ತಾಣೆ ಬರಯಿಲ್ಲ್ಯಾ ಕಾದಂಬರೆಂ ಪಯ್ಕಿ, ಸಿರಿವಂತಾನ್ ಸಾಳಕ್ ಪ್ರಕಾಶನಾಂತ್ 1979  ವ್ಯಾ ವರ್ಸಾ ಫಾಯ್ಸ್ ಕೆಲ್ಲಿ  ಮೊಗಾ ಮ್ಹಾಕಾ ಜಳಯ್ನಾಕಾ ತಾಚ್ಯಾ ಕಾಳ್ಜಾಕ್ ಲಾಗ್ಶಿಲಿ ಖಂಯ್ . ಹ್ಯಾ ಕಾದಂಬರೆಂತ್ ಏಕ್ ಸಿನೆಮಾ ಕರ್ಚೆ ತಸಲಿ ಕಥಾವಸ್ತ್ ಆಸಾ ಮ್ಹಣ್ ಸ್ಟೆನಿ ಅಭಿಮಾನಾನ್ ಮ್ಹಣ್ತಾ.

” ಪೂಣ್ ಎಚ್ಚೆಮ್,  ಮ್ಹಜೆಂ ನಾಂವ್ ಬರಯ್ತಾನಾ ಸ್ಟೇನಿ, ನೀರುಡೆ ಮ್ಹಣ್ ಬರಯ್ನಾಕಾ, ಮ್ಹಾಕಾ ಆಜ್ ಕೊಂಕ್ಣಿ ಸಾಹಿತ್ಯಾಂತ್ ತ್ಯಾ ನಾಂವಾನ್ ಕೋಣ್ ವಳ್ಕನಾಂತ್. ವಾಚ್ಪಿ ಮ್ಹಾಕಾ ಖಾಯ್ಸ್ ಕರ್ತಾಲೆ  ಸತ್ತರ್ – ಅಯ್ಶ್ಯಾಂಚ್ಯಾ ಧಾಕ್ಡ್ಯಾಂತ್, ಆತಾಂ ತೆ ವಾಚ್ಪಿ ಆಸ್ಚೆನಾಂತ್ ” ಮ್ಹಣ್ತಾ ಸ್ಟೇನಿ, ಮಾತ್ಶೆಂ ನರ್ಗೊನ್‌ಶೆಂ.

1979  ವ್ಯಾ ವರ್ಸಾ  ದುಬಯ್ ಪಾವ್‌ಲ್ಲೆಂಚ್ ಜ್ಯಾ ಕಂಪ್ಣೆಂತ್ ತೋ ಕಾಮಾಕ್ ಲಾಗ್‌ಲ್ಲೊ ತ್ಯಾಚ್ ಕಂಪ್ಣೆಂತ್ ನಿವೃತ್ತ್ ಜಾತಾಪರ್ಯಾಂತ್ ಲಾಂಬ್ ಕಾಳ್ ಸೆವಾ ದಿಲ್ಲ್ಯಾ ಸ್ಟೇನಿಲಾಗಿಂ  “ತುಮಿ ಕಶೆ ಮರಿಯೆಚ್ಯಾ ಮೊಗಾರ್ ಪಡ್ಲ್ಯಾತ್?” ಮ್ಹಣ್ ವಿಚಾರ್ಲ್ಯಾರ್ ತೊ ಆಪ್ಲ್ಯಾ ಆವಯ್ಚೊ ಆನಿ ತಿಚ್ಯಾ ಮರಿಯಾಳ್ ಭಕ್ತಿಪಣಾನ್ ತಿಚೆಂ ಆಯಾಪಣ್ ಸಾಂಬಾಳ್ಳೆಲ್ಯಾ ಘಡಿತಾಚೊ ಉಡಾಸ್ ಕಾಡ್ತಾ.

“ಆಮ್ಚೊ ಪಪ್ಪಾ ಸುಟ್ಕೆಪೂರ್ವಿಂ ಬ್ರ‍ಿಟಿಶ್ ಆರ್ಮಿಂತ್ ಆಸ್ಲೊ. ತಾಕಾ ಬರೆಂ ಇಂಗ್ಲಿಶ್ ಯೆತಾಲೆಂ.  ಸುಟ್ಕೆ ಉಪ್ರಾಂತ್ ಉಪ್ರಾಂತ್ ಬರ‍್ಯಾ ಫುಡಾರಾಖಾತಿರ್ ತೋ ಗಲ್ಫಾಕ್ ಭಾಯ್ರ್ ಸರ್ನ್ ಗೆಲೊ. ತವಳ್ ಆತಾಂಚೆಂಪರಿಂ ವಿಮಾನಾಂಯ್ ನಾಂತ್, ಫೊನಾಂಯ್ ನಾಂತ್. ಎಜೆಂಟಾಂ ಮುಕಾಂತ್ರ್ ದರ್ಯಾ ವಾಟೆಂತ್ಲ್ಯಾನ್ ಲಾಂಬ್ ಪಯ್ಣ್ ಕರುನ್ ವಚಜೆ. ತಶೆಂ ಗೆಲ್ಲ್ಯಾ  ಆಮ್ಚ್ಯಾ ಪಪ್ಪಾಚಿ ಕಿತ್ಲಿಗೀ ವರ್ಸಾಂ ಖಬರ್‌ಚ್ ನಾ. ಜೀವ್ ಆಸಾ ವಾ ನಾ ಮ್ಹಳೆಂಯ್ ಆಮ್ಕಾಂ ಕಳಿತ್ ನಾ.  ಗಾಂವಾಂತ್ ವೆವೆಗ್ಳ್ಯೊ ಖಬ್ರೊ ಸುರು ಜಾಲ್ಯೊ. ಆಮಿ ಆಮ್ಚ್ಯಾ ಬಾಪಯ್ಚಿ ಆಶಾಚ್ ಸಾಂಡ್‌ಲ್ಲಿ.  ಪೂಣ್ ಆಮ್ಚ್ಯಾ ಆವಯ್ನ್ ಆಶಾ ಸಾಂಡುಂಕ್ ನಾ. ತಿ ಮರ್ಯೆ ಮಾಯೆಲಾಗಿಂ ಸದಾಂಚ್ ಮಾಗ್ತಾಲಿ.”

“ಆನಿ ಕಾಂಯ್ ವರ್ಸಾಂ ಉಪ್ರಾಂತ್ ಅಚಾನಕ್ ಏಕ್ ದೀಸ್ ಭಟ್ಕಳ್ ಥಾವ್ನ್ ಎಕ್ಲೊ ಅಂಕಲ್ ಆಮ್ಚೆಂ ಘರ್ ಸೊಧುನ್ ನೀರುಡೆ ಆಯ್ಲೊ. ತಾಚ್ಯಾ ಹಾತಾಂತ್ ಥೊಡ್ಯೊ ವಸ್ತು, ಪಯ್ಶೆ ಆನಿ ಪಪ್ಪಾಚೆಂ ಕಾಗತ್ ಆಸ್ಲೆಂ. ಆಮ್ಚ್ಯಾ ಬಾಪಯ್ನ್ ತಾಚೆ ಸಾಂಗಾತಾ ಕಿತೆಂ ಘಡ್ಲೆಂ? ಖಂಯ್ ತೋ ಶಿರ‍್ಕಾಲೊ?  ಕಸೊ ತೋ ವಾಂಚ್ಲೊ ? ಕಸೊ ದುಬಯ್ ಪಾವ್ಲೊ ? ಹೆ ವಿಶ್ಯಾಂತ್ ಸವಿಸ್ತಾರ್ ಬರಯಿಲ್ಲೆಂ.”

“ಘರಾ ಥಾವ್ನ್  ಭಾಯ್ರ್ ಸರುನ್ ಗೆಲ್ಲೊ ಆಮ್ಚೊ ಪಪ್ಪ ಕರಾಚಿಂತ್ ಶಿರ್ಕಾಲ್ಲೊ. ಥಂಯ್ ತಾಕಾ ಬಂದೆಂತ್ ಘಾಲ್ಲೊ. ಬಂದಿಖಾನ್ಯಾಕ್ ಯೆಂವ್ಚ್ಯಾ ಉಂಡ್ಯಾಚೆರ್ ಪಿರೇರಾ ಮ್ಹಣ್ ಬೇಕರಿಚೆಂ ನಾಂವ್ ಆಸ್‌ಲ್ಲೆಂ ಪಳೆವ್ನ್ ಮ್ಹಜ್ಯಾ ಪಪ್ಪಾನ್, ಹ್ಯಾ  ಬೇಕರಿಚೊ ಧನಿ ಖಂಡಿತ್ ಗಾಂವ್ಚೊ  ಕ್ರ‍ಿಸ್ತಾಂವ್ ಭಾವ್ ಆಸ್ತಾಲೊ ಆನಿ ಮ್ಹಾಕಾ ಕುಮಕ್ ಕರ‍್ತಲೊ ಮ್ಹಣ್ ತಾಚೊ ಸಂಪರ್ಕ್ ಕೆಲೊ. ಪೂಣ್ ತೋ ಭಾವ್ ಗೊಂಯ್ಕಾರ್ ಜಾವ್ನಾಸ್ಲೊ.  ತರೀ ತಾಣೆ ಆಮ್ಚ್ಯಾ ಪಪ್ಪಾಕ್ ಕುಮಕ್ ಕೆಲಿ, ಬಂದೆತ್ಲೊ ಭಾಯ್ರ್ ಕಾಡ್ಲೊ ಆನಿ ಥೊಡೊ ತೇಂಪ್ ತಾಚ್ಯಾ ಬೇಕರಿಂತ್ ಕಾಮ್ ಸಯ್ತ್ ದಿಲೆಂ. ಉಪ್ರಾಂತ್ ಖರ‍್ಯಾಚೆರ್ ಬಸವ್ನ್ ಪಪ್ಪಾಕ್ ದುಬಯ್ ಧಾಡ್ಲೆಂ. ಥಂಯ್ ಕಾಮಾಕ್ ಲಾಗ್ಲ್ಯಾ ಉಪ್ರಾಂತ್ ಪಪ್ಪಾನ್ ಆಮ್ಚೊ ಸಂಪರ್ಕ್ ಕೆಲೊ. ಆಮ್ಚ್ಯಾ ಆವಯ್ನ್ ಮರಿಯೆಚೆರ್ ದವರ್‌ಲ್ಲಿ ಭಕ್ತ್, ಆನಿ ತಿಚ್ಯಾ ಮಾಗ್ಣ್ಯಾಕ್ ಮೆಳ್‍ಲ್ಲೊ ಪ್ರತಿಫಳ್ ಪಳೆವ್ನ್ ಮ್ಹಜೆಥಂಯ್ ಅಪಾಪಿಂ ಮರ್ಯೆ ಮಾಯೆಚೆರ್ ಮೋಗ್ ಆನಿ ಭಕ್ತ್ ವಾಡ್ಲಿ.”

” ಆತಾಂ, ಮ್ಹಜೆ ಥೊಡೆ ಖಾಸ್ ಈಶ್ಟ್‌ಚ್ ಮ್ಹಜಿಂ ನಕ್ಲಾಂ ಕರ್ತಾತ್ – ಇತ್ಲೊ ದುಡು ಖರ್ಚ್ ಕರ್ನ್ ಮರಿಯೆಚೊ ಗ್ರೊಟ್ಟೊ ಬಾಂದ್ಚ್ಯಾ ಬದ್ಲಾಕ್ ಕಾಂಯ್ ಶೆಂಬೊರ್ ಮೊಶಿ ಪೊಸ್ಯೆತ್ಯೊ ತುಕಾ – ಮ್ಹಣ್ ಮ್ಹಾಕಾ ತುಕ್ಲಾಯ್ಲಾತ್. ಪುಣ್ ಮ್ಹಜ್ಯಾ ಜಿವಿತಾಂತ್ ಮ್ಹಾಕಾ ಮರಿ ಮ್ಹಜೆ ಮಾಂಯ್‌ಲಾಗಿಂ ಮಾಗ್‌ಲ್ಲೆಂ ಮೆಳ್ಳಾಂ. ಖರ‍್ಯಾ ಭಕ್ತೆನ್ ಮರಿಯೆಲಾಗಿಂ ಮಾಗ್ತೆಲ್ಯಾಂಕ್ ಮೆಳೊಂದೀ ಹಾಂವೆ ಹೆಂ ಮರಿಯಾಳ್ ಮಿಸಾಂವ್ ಹಾತಿಂ ಘೆತ್ಲಾಂ.” ಮ್ಹಣ್ತಾ ಸ್ಟೆನಿ.

” ಹಾಂವ್ ಕಾಜರ್ ಜಾವ್ನ್ ದುಬಯ್ ಪಾವ್‌ಲ್ಲ್ಯಾ ಸುರ್ವೆರ್ ಮ್ಹಜ್ಯಾ ಪತಿಣೆಕ್ ದುಬಯ್ ಯೇಂವ್ಕ್ ವಿಜಾ ಮೆಳೊಂಕ್ ನಾತ್ಲಿ. ತವಳ್ ಹಾಂವ್ ಸದಾಂ ಮ್ಹಳ್ಳೆಪರಿಂ ಸೇಂಯ್ಟ್ ಮೇರಿಸ್ ಇಗರ್ಜೆಚ್ಯಾ ಗ್ರೊಟ್ಟ್ಯಾ ಮುಕಾರ್ ರಾವೊನ್ ಮಾಗ್ತಾಲೊಂ. ಅಶೆಂ ಮಾಗ್ಣೆ ಸುರು ಕೆಲ್ಲ್ಯಾ ಥೊಡ್ಯಾಚ್ ದಿಸಾಂನಿ ಮ್ಹಜ್ಯಾ ಪತಿಣೆಕ್ ವಿಜಾ ಮೆಳ್ಳಿ ಆನಿ ದುಬಯ್ ಆಯ್ಲಿ. ತವಳ್ ಹಾಂವೆ ಚಿಂತ್‌ಲ್ಲೆಂ ಆಸಾ – ಮರ‍್ಯೆ ಮಾಯೆಕ್ ಕಿತೆಂ ತರೀ ಹಾಂವೆ ಪಾಟಿಂ ದೀಂವ್ಕ್ ಆಸಾ. ಸಬಾರ್ ವರ್ಸಾಂ ಉಪ್ರಾಂತ್ ಆಮ್ಚ್ಯಾ ಕುಟ್ಮಾಚೆರ್ ಕಶ್ಟ್ ಆಯ್ಲೆ ಆನಿ ತವಳ್‌ಯೀ ಹಾಂವ್ ಮರಿಯೆಚ್ಯಾ ಚರಣಿಂ ಗೆಲೊಂ. ಆನಿ ಹ್ಯಾ ಕಶ್ಟಾಂ ಥಾವ್ನ್‌ಯೀ ತಿಣೆ ಆಮ್ಕಾಂ ಸುಟ್ಕಾ ದಿಲಿ. ತವಳ್ ಹಾಂವೆ ಠರಾವ್ ಘೆತ್ಲೊ – ಮರಿಯೆಚ್ಯಾ ಮಾನಾಕ್ ಹಾಂವ್ ಮ್ಹಜ್ಯಾನ್ ಕಿತ್ಲೆ ಜಾತಾತ್ ತಿತ್ಲೆ ಗ್ರೊಟ್ಟೆ ಬಾಂದ್ತಾಲೊಂ ಅನಿ ತಿಚೆಂ ಭಕ್ತಿಪಣ್ ವಾಡಂವ್ಕ್ ಮ್ಹಜ್ಯಾ ತಾಂಕಿ ಪುರ್ತೆಂ ಪ್ರೇತನ್ ಕರ್ತಾಲೊಂ”

“ಹಾಂವೆ ಬಾಂದ್‌ಲ್ಲೊ ಪಯ್ಲೊ ಗ್ರೊಟ್ಟೊ ಆಮ್ಚಿ ಮಾಂಯ್ ಫಿರ್ಗಜ್ ನೀರುಡೆಂತ್, 1998 ವ್ಯಾ ವರ್ಸಾ. ತೋ ಗ್ರೊಟ್ಟೊ ವ್ಹಾಳಾಚ್ಯಾ ಫಾತ್ರಾಂನಿಂ ಬಾಂದ್ಲಾ. ಹಾಂವೆ ಚಿಂತ್‌ಲ್ಲೆಪರಿಂ ಗ್ರೊಟ್ಟೊ ಬಾಂದ್ಚೊ ಶಿಲ್ಪಿ ಮ್ಹಜೊಚ್ ದಾಯ್ಚಿ ವಾಮಂಜೂರ್ಚೊ ವೊಲ್ಟರ್ ಪಿಂಟೊ ಮ್ಹಾಕಾ ಮೆಳ್ಳೊ. ಗ್ರೊಟ್ಟೆ  ಉಬೆ ಕರ‍್ಚ್ಯಾಂತ್ ತೋ ಉಸ್ತಾದ್. ಆಜ್ ನೀರುಡೆಚ್ಯಾ ಹ್ಯಾ ಗ್ರೊಟ್ಟ್ಯಾಕ್ ಕಾಂಯ್ ಲಾಗಿಂ ಲಾಗಿಂ ಪಂಚ್ವೀಸ್ ವರ್ಸಾಂ ಜಾಯ್ತ್ ಯೆತಾತ್. ಪೂಣ್ ಹ್ಯಾ ಗ್ರೊಟ್ಟ್ಯಾಚಿ ಸೊಭಾಯ್ ತಶೀಚ್ ಆಸಾ. ಹರ್ ವರ್ಸಾ ಮೊಂತಿಮಾಯೆಚ್ಯಾ ನೊವೆನಾ ಸಂದರ್ಬಾರ್ ಭುರ್ಗ್ಯಾಂನಿ ಹ್ಯಾ ಗ್ರೊಟ್ಟ್ಯಾ ಸಮೊರ್ ರಾವೊನ್ ಮರಿಯೆಕ್ ಫುಲಾಂ ಅರ್ಪುಂಚೆಂ,  ಗ್ರೊಟ್ಟ್ಯಾಲಾಗಿಂ ಮೊಂತಿ ಫೆಸ್ತಾದಿಸಾ ಕಣ್ಶಿ ಬೆಂಜಾರ್ ಕರ್ಚೆಂ ಪಳಯ್ತಾನಾ ಮ್ಹಜೆಂ ಕಾಳಿಜ್ ಸಂತೃಪ್ತೆನ್ ಭರ್ತಾ.”

ದುಸ್ರೊ ಗ್ರೊಟ್ಟೊ ಹಾಂವೆ ಬಾಂದ್‌ಲ್ಲೊ ಉರ್ವಾ ಪಿರ್ಗಜೆಂತ್. 2015 ವ್ಯಾ ವರ್ಸಾ.  ತವಳ್ ಮಾ| ಬಾ| ವಿಕ್ಟರ್ ಡಿಮೆಲ್ಲೊ ಥಂಯ್ಸರ್ ವಿಗಾರ್ ಜಾವ್ನಾಸ್ಲೊ ಆನಿ ಫಿರ್ಗಜೆಚೊ 150 ವರ್ಸಾಂಚೊಂ ಜುಬ್ಲೆವ್ ಚಲ್ತಾಲೊ.  ಉರ್ವಾಂತ್ ಗ್ರೊಟ್ಟೊ ಬಾಂದ್ತಾನಾ  ಬಿಸ್ಪ್ ಅ| ಮಾ| ದೊ| ಲುವಿಸ್ ಪಾವ್ಲು ಸೊಜಾನ್ ಆಮ್ಕಾಂ ಏಕ್ ಸಲಹಾ ದಿಲಿ. ಗ್ರೊಟ್ಟೊ ಬಾಂದ್ತಾನಾ ವ್ಹಾಳಾಚ್ಯಾ ಫಾತ್ರಾಂ ಬದ್ಲಾಕ್ ಖಡ್ಪಿ ಫಾತ್ರಾಂನಿಂ ಬಾಂದ್ಲ್ಯಾರ್ ಸೊಭಾಯ್ ಆನಿ ಬಾಳ್ವಿ ದೊನೀ ಯೆತಾ. ಆನಿ ಹೆಂ ಮ್ಹಾಕಾಯ್ ಸಾರ್ಕೆಂ ದಿಸ್ಲೆಂ. ದೆಕುನ್ ಉರ್ವಾ ಆನಿ ತೆ ಉಪ್ರಾಂತ್ ಉಡುಪಿ ದಿಯೆಸೆಜಿಚ್ಯಾ  ನಿರ್ಮಲಪದವು ಆನಿ ಆಯ್ಲೆವಾರ್ ಕಾಸರಗೋಡ್ ವಾರಾಡ್ಯಾಚಾ ಮಣಿಯಾಂಪಾರೆ  ಹಾಂಗಾಸರ್ ಬಾಂದ್‌ಲ್ಲೆ ಗ್ರೊಟ್ಟೆ  ಸಗ್ಳೆ ಖಡ್ಪಿ ಫಾತ್ರಾನಿಂಚ್ ಬಾಂದ್ಲ್ಯಾತ್”

2013ವ್ಯಾ ವರ್ಸಾ ಹಾಂವ್ ದಾಯ್ಜಿ ದುಬಯ್ ಬರಯ್ಣಾರಾಂಚ್ಯಾ ಎಕ್ತಾರಾಚೊ ಸಂಚಾಲಕ್ ಆಸ್ತಾನಾ, ನವಿಚ್ ಜಾಲ್ಲ್ಯಾ ಉಡುಪಿ ದಿಯೆಸೆಜಿಂತ್ ದಾಯ್ಜಿ ದುಬಯ್ ಸಂಘಟನಾಚೊ 14 ವೊ ವಾರ್ಷಿಕ್ ದೀಸ್ ಆಚರಣ್ ಕಾರ್ಯೆಂ ಮಾಂಡುನ್ ಹಾಡ್‌ಲ್ಲೆಂ. ತ್ಯಾ  ಕಾರ್ಯಾಕ್ ಉಡುಪಿ ದಿಯೆಸೆಜಿಚೊ ಧರ್ಮಾಧ್ಯಕ್ಷ್ ಅ| ಮಾ| ದೊ| ಜೆರಾಲ್ಡ್ ಐಸಾಕ್ ಲೋಬೊ ಸಯ್ರೊ ಜಾವ್ನ್ ಆಯಿಲ್ಲೊ. ಆಮ್ಚಿ ವಳಕ್ ಬೋವ್ ಆದ್ಲಿ –  ಆಮಿ  ಎಕಾ ಕಾಳಾಚೆ ಸಾಂಗಾತಿ, ಇಸ್ಕೊಲಾಂತ್ ಶಿಕ್ತಾನಾ. ತ್ಯಾ ಇಶ್ಟಾಗತೆಚ್ಯಾ ನಾತ್ಯಾನ್ ಹಾಂವೆ ತಾಂಚೆಲಾಗಿಂ ಗ್ರೊಟ್ಟೊ ಬಾಂದ್ಚಿ ಗಜಾಲ್ ವಾಂಟುನ್ ಘೆತ್ಲಿ ಆನಿ ತಾಣೆ ಮ್ಹಾಕಾ ತವಳ್ ದುರುಸ್ತ್ ಜಾವ್ನ್ ಆಸ್ಚ್ಯಾ  ನಿರ್ಮಲಪದವು ಇಗರ್ಜೆ ವಿಶ್ಯಾಂತ್ ಸಾಂಗ್ಲೆಂ. ನಿರ್ಮಲಪದವು ನಿತ್ಯಾಧಾರ್ ಮಾಯೆಕ್ ಸಮರ್ಪಿಲ್ಲಿ ಫಿರ್ಗಜ್. ನಾಂವಾಂ ವೆವೆಗ್ಳಿಂ ಆಸುಂಕ್ ಪುರೊ, ಪೂಣ್ ಮರಿ ಮಾಯ್, ತಿ ಮರಿ ಮಾಯ್. ಹೆಂ ಮ್ಹಜ್ಯಾ ಉಡಾಸಾಂತ್ ಉರ್ಲೆಂ”

“ಏಕ್ ದೀಸ್ ಆಮಿ ಕುಟ್ಮಾಸಾಂಗಾತಾ ಕಾರ್ಕೊಳ್ ಇಗರ್ಜೆಕ್ ಗೆಲ್ಲ್ಯಾಂವ್. ಪಾಟಿಂ ಯೆತಾನಾ ನಿರ್ಮಲಪದವು ಇಗರ್ಜೆಕ್ ಭೆಟ್ ದಿಲಿ. ಭಾಂಗಾರೋತ್ಸವ್ ಸಂಭ್ರಮ್ಚ್ಯಾ ನಿರ್ಮಲಪದವು ಇಗರ್ಜೆಂತ್ ತವಳ್ ದುರುಸ್ತೆಚೆಂ ಕಾಮ್ ಚಲ್ತಾಲೆಂ. ಮ್ಹಾಕಾ ಲೂರ್ಡ್ಸ್ ಸಾಯ್ಭಿಣಿಚೊ ಗ್ರೊಟ್ಟೊ ಬಾಂದುಂಕ್ ಮನ್ ಆಸಾ ಮ್ಹಣ್ ವಿಗಾರಾಕ್ ವಿಚಾರ್ಲೆಲ್ಯಾಕ್ ತಾಣಿ ಖುಶೇನ್ ಕಬ್ಲಾತ್ ದಿಲಿ ಆನಿ ಅಶೆಂ ನಿರ್ಮಲಪದವು ಫಿರ್ಗಜೆಂತ್, 2018 ವ್ಯಾ ವರ್ಸಾ ಮರ‍್ಯೆ ಮಾಯೆಕ್  ಸಮರ್ಪಿಲ್ಲ್ಯಾ ಮಾಯ್ ಮಯ್ನ್ಯಾಚ್ಯಾ  09  ತಾರಿಕೆರ್ ತಿಸ್ರೊ ಗ್ರೊಟ್ಟೊ ಜಾಲೊ.”

“ಆತಾಂ ಮ್ಹಜಿಂ ದೊಗಾಂಯ್ ಭುರ್ಗಿಂ ಉಂಚ್ಲೆಂ ಶಿಕಪ್ ಜೊಡುನ್ ಜೊಡಿಕ್ ಪಾವ್ಲ್ಯಾಂತ್ ಎಚ್ಚೆಮ್. ಮ್ಹಾಕಾ ತಿಂ ಕಾಮ್ ಕರುಂಕ್ ಸೊಡಿನಾಂತ್. ತಶೆಂ ಮ್ಹಣ್ ಭುರ್ಗ್ಯಾಂಕ್ ಥಂಯ್ ಸೊಡ್ನ್ ಗಾಂವಾಂತ್ ರಾವೊಂಕೀ ಆಮ್ಚೆಂ ಮನ್ ಆಯ್ಕಾನಾ. ದೆಕುನ್ ಆತಾಂ ಥೊಡೆ ದೀಸ್ ಗಾಂವಾಂತ್ ಆನಿ ಥೊಡೆ ದೀಸ್ ಗಲ್ಫಾಂತ್ – ಅಶೆಂ ಆಮ್ಚೆಂ ಜಿವಿತ್ ಮರಿಯೆ ಮಾಯೆಚ್ಯಾ  ಮಜತಿನ್ ಚಲ್ತಾ.” ಮ್ಹಣ್ತಾ ಸ್ಟೆನಿ.

“ತಶೆಂ ಮ್ಹಣ್ ನಿವೃತ್ತ್ ಜಾಲಾಂ ಮ್ಹಣ್ ಘರಾ ಬಸೊಂಕ್ ನಾ. ಕಾಮಾಕ್ ಲಾಗ್‌ಲ್ಲೆಥಾವ್ನ್  ನಿವೃತ್ತ್ ಜಾತಾ ಪರ್ಯಾಂತ್ ಎಕಾಚ್ ಕಂಪ್ಣೆಂತ್ ಸರ್ವ್ ವಿಭಾಗಾಂನಿ ಕಾಮ್ ಕೆಲ್ಲೊ ಅನ್ಭೊಗ್ ಮ್ಹಾಕಾ ಆಸಾ, ಪೊಡಕ್ಟಾಂ ವಿಶ್ಯಾಂತ್ ಸಂಪೂರ‍್ಣ್ ಮಾಹೆತ್ ಆಸಾ. ಆನಿ ಹ್ಯಾ ಅನ್ಭೊಗಾಚೆರ್  ಹಾಂವೆ ದುಬಂಯ್ತ್ ಮ್ಹಜಿಚ್ ಏಕ್ ಲ್ಹಾನ್ ಕಂಪೆನಿ ಕೆಲ್ಯಾ. ಆನಿ ಸದ್ದ್ಯಾಕ್ ತಿ ಚಲಯ್ತೇ ಆಸಾಂ. ದುಬಂಯ್ತ್ ಕೊಂಕ್ಣಿ ಸಾಹಿತ್ಯಾಕ್ ಲಗ್ತಿ ಕಾರ್ಯಾವಳಿ ಜಾತಾನಾ ಪಾವ್ಟ್ ಮೆಳ್ತಾನಾ ಹಾಜರ್ ಜಾತಾಂ. ಪಾಟ್ಲ್ಯಾ ದಿಸಾಂನಿ ತುಜ್ಯಾಚ್  ಪೆರ್ನಾಲ್ ಗಾಂವ್ಚ್ಯಾ  ದಿನೇಶ್ ಕೊರೆಯಾಚ್ಯಾ ವಿಲ್ಲಾಂತ್ ಚಲ್ಲೆಲ್ಲ್ಯಾ ಜಮಾತೆಕ್ ಹಾಂವ್ ಹಾಜರ್ ಜಾಲ್ಲೊಂ. ಅಪ್ರೂಪ್‌ಶೆಂ ಬರವ್ಪ್ಯಾಂನಿ ಸಾಂಗಾತಾ ಮೆಳೊನ್ ಸಾಹಿತಿಕ್ ವಿಚಾರ್ ಆದ್ಲಿ ಬದ್ಲಿ ಕರ್ತಾನಾ, ಸಂತೊಸ್ ಜಾತಾ. “

“ಮ್ಹಜ್ಯಾ ಮರಿಯಾಳ್ ಮಿಸಾಂವಾಂತ್ ಮ್ಹಾಕಾ ಆಮ್ಚ್ಯಾ ಗಾಂವ್ಚೊ ಫೆಲಿಕ್ಸ್ ಪಿಂಟೊ ವ್ಹಡ್ ಕುಮ್ಕೆ ಹಾತ್ ದಿತಾ. ಪ್ರಸ್ತುತ್ ಸಾಂ. ಲುವಿಸ್ ಕೊಲೆಜಿಚೊ ರೆಕ್ಟರ್ ಮಾ| ಬಾ| ಮೆಲ್ವಿನ್ ಪಿಂಟೊ ಹಾಂಚೊ ಭಾವ್ ತೋ. ಮಣಿಯಾಂಪರೆ ಫಿರ್ಗಜೆಕ್ ಹಾಂವ್ ಆನಿ ಫೆಲಿಕ್ಸ್ ದೊಗೀ ಸಾಂಗಾತಾ ಗೆಲ್ಲ್ಯಾಂವ್. ಹಾಂವ್ ದುಬಯ್ ಆಸ್ತಾನಾ ಗ್ರೊಟ್ಟ್ಯಾಚೆಂ ಕಾಂಯ್ ಕಾಮ್ ಅಸ್ಲ್ಯಾರ್ ತೋ ಸಾಂಬಾಳ್ತಾ. ಮಣಿಯಾಂಪರೆ ಫಿರ್ಗಜ್ ವಿಗಾರ್, ಸೆಮಿನರಿಚೊ ಪ್ರಾಧ್ಯಾಪಕ್ ಮಾ| ಬಾ| ನೆಲ್ಸನ್ ದಲ್ಮೇದಾನ್ ಆಮ್ಕಾಂ ಭರ್ಪೂರ್ ಸಹಕಾರ್ ದಿಲೊ. ಪಾಟ್ಲ್ಯಾ ದಿಸಾಂನಿ ಹೊ ಗ್ರೊಟ್ಟೊ ಆಶಿರ್ವದಿತ್ ಜಾಲೊ.”

“ಅಕೇರ್ ಕರ್ತಾನಾ ಹಾಂವೆ ಮ್ಹಣ್ಚೆಂ ಇತ್ಲೆಂ ಎಚ್ಚೆಮ್, ಹಾಂವ್ ಕಾಂಯ್ ವ್ಹಡ್ಲೊ ಸಾಹಿತಿ ನ್ಹಯ್. ಮ್ಹಜೆ ಕಾಣಿಯೊ ಆದ್ಲ್ಯಾ ಕಾಳಾಚ್ಯೊ. . . . ಚಡ್ ಕರುನ್ ಮೊಗಾಚ್ಯೊ! ಪೂಣ್ ಮೊಗಾಕ್ ವೆವೆಗ್ಳಿಂ ರುಪಾಂ ಆಸಾತ್. ಆವಯ್ಚೊ ಮೋಗ್ ಸದಾಂಚ್ ನಿಶ್ಕಲ್ಮಶ್. ಏಕ್ ಆವಯ್ ಆಪ್ಲ್ಯಾ ಭುರ್ಗ್ಯಾಂಥಾವ್ನ್ ಕಿತೆಂಚ್ ಪಾಟಿಂ ಆಶೆನಾ. ತಿಕಾ ಕಳಿತ್ ಆಸ್ಚೆಂ ಫಕತ್ ದೀಂವ್ಕ್ ಮಾತ್ರ್.  ತಿಕಾ ಘೆಂವ್ಕ್ ಕಳಿತ್ ನಾ. ಪೂಣ್ ತಿಚೊ ಮೋಗ್ ಕರ್ಚೊ, ತಿಚಿ ಜತನ್ ಘೆಂವ್ಚಿ ಆಪ್ಲೆಂ ಕರ್ತವ್ಯ್ ಮ್ಹಳ್ಳೆಂ ಭುರ್ಗ್ಯಾಂನಿ ಕೆದಾಳಾರೀ ವಿಸ್ರೊಂಕ್ ನಜೊ. ಮರಿ ಮಾಯ್ ಆಮ್ಚಿ ಆತ್ಮೀಕ್ ಆವಯ್. ಆಮ್ಕಾಂ ಕಿತೆಂ ಜಾಯ್, ಕಿತೆಂ ನಾಕಾ ತಿಕಾ ಕಳಿತ್ ಆಸಾ. ಭುರ್ಗ್ಯಾನ್ ವಿಚಾರ‍್ಲ್ಯಾ ಶಿವಾಯ್ ಆವಯ್ ಸಯ್ತ್ ದೂದ್ ದೀನಾ ಮ್ಹಳ್ಳಿ ಏಕ್ ಗಾದ್ ಆಸಾ ಜಾಣಾಯ್ವೇ, ತಶೆಂ ತಿಚೆಲಾಗಿಂ ಆಮಿ ಮಾಗಾನಾ ಜಾಲ್ಯಾರ್ ತಿಕಾ ಕಳ್ಚೆಂ ಕಶೆಂ? ಮ್ಹಜ್ಯಾ ಖಾಸ್ಗಿ ಅನ್ಭೊಗಾನ್ ಸಾಂಗ್ತಾಂ –  ಮರಿಮಾಯ್ ತಿಚ್ಯಾ ಭುರ್ಗ್ಯಾಂಕ್ ಕೆದಾಳಾರೀ ಸೊಡ್ನ್ ಘಾಲಿನಾ”

ಸಂದರ್ಶನ್ / ನಿರೂಪಣ್ : ಎಚ್ಚೆಮ್, ಪೆರ್ನಾಲ್