ಹೊ ಅನ್ಭವ್ ತುಮ್ಕಾಂಯ್ ಜಾಲಾ ಆಸ್ತಲೊ. ಕೋಣ್‌ನಾಂ ಕೋಣ್ ಎಕ್ಲೊ ಆಪುಣ್ ಹೆರ್ ಕೊಣಾಲಾಗಿಂ ಉಲಯ್ತೇ ಆಸಾಂ ಮ್ಹಣ್ ಚಿಂತುನ್ ಆಪುಣ್ಂಚ್ ಉಲೊಂವ್ಚೊ ಮಾನೇಸ್ತ್ ತುಮ್ಕಾಂಯ್ ಭೆಟ್ಲಾ ಆಸ್ತಲೊ. ತಾಚೆಂ ಉಲೊವ್ಣೆಂ ಆಯ್ಕುನ್ ಆಮ್ಕಾಂ ಹಾಸೊ ಆಯ್ಲ್ಯಾತ್ ಆಸ್ತಲ್ಯೊ. ಪೂಣ್ ಗಂಭೀರ್‌ಪಣಿಂ ತೊ ವೆಕ್ತಿ ಉಲಯ್ತಾ. ಆಪುಣ್ ಕೊಣಾಕ್ ಉದ್ದೇಶುನ್ ಉಲಯ್ತಾಂ ತಿ ವೆಕ್ತಿ ಆಪ್ಣಾಕ್ ಆಯ್ಕುಂಕ್ ಸಕ್ತಾ, ಸಮ್ಜುಂಕ್ ಸಕ್ತಾ ಮ್ಹಣ್ಚಿ ಖೆರಿತ್ ಪಾತ್ಯೆಣಿ ಹ್ಯಾ ಉಲಯ್ತಾ ತಾಕಾ ಆಸಾ. ಆನಿ ತಾಚ್ಯಾ ವಾಂಟ್ಯಾಕ್ ತೆಂ ಏಕ್ ಸಂಪೂರ‍್ಣ್ ಸಂವಹನ್. ಚತುರ್ ಸಂವಹಕಾಕ್ ಆಪ್ಣಾಕ್ ಸಾಂಗುಂಕ್ ಆಸಾ ತೆಂ ಕಾಂಯಿಂಚ್ ಅಡ್ಕಳ್ ನಾಸ್ತಾನಾಂ ಮುಕಾರ್ ಪಾವಂವ್ಕ್ ಹಿ ರೀತ್ ಭೋವ್ ಬರಿ. ನಾಟಕಾಂತ್ ಸ್ವಗತ್ ಉಲೊವ್ಪ್ ಸಂವಹನ್ ಪರ‍್ಗಟ್ಚೊ ಏಕ್ ಪ್ರಮುಕ್ ವಾಂಟೊ.
ಆತಾಂ ಸದಾಂಚೆ, ಸಾಧೆ ಮನಿಸ್ ಸ್ವಗತ್ ಉಲೊವ್ಪ್ ಚಲಯ್ತಿತ್ ತರ್ ಚಲ್ತಾ. ಪೂಣ್ ಕಾಂಯ್ ವ್ಹಡ್ ಜಾಣಾರಿ ಆನಿ ಉಂಚ್ಲ್ಯಾ ಸಾಮಾಜಿಕ್ ಸ್ಥಾನ್‌ಮಾನಾರ್ ಆಸ್ಚೆ ಧಾ ಜಣಾಂ ಮುಕಾರ್ ಸ್ವಗತ್ ಉಲೊವ್ಪ್ ಚಲಯ್ತಿತ್ ತರ್? ವ್ಹಯ್ ಹಾಂವೆಂ ಅಸಲ್ಯಾ ದೊಗಾಂ’ತೆಗಾಂ ಯಶಸ್ವಿ ಸ್ವಗತ್ ಉಲೊವ್ಪ್ಯಾಂಕ್ ಆಯ್ಕಾಲಾಂ. ತ್ಯಾ ವೆಳಾರ್ ಮ್ಹಾಕಾ ತಾಂಚೆಂ ಸ್ವಗತ್ ಉಲೊವ್ಪ್ ಆಯ್ಕುನ್ ಹಾಸೊ ಆಯಿಲ್ಲ್ಯೊ ಆಸಾತ್ ತರಿ ಆತಾಂ ಚಿಂತ್ತಾನಾಂ ತ್ಯಾ ಉಲೊವ್ಪಾ ಪಾಟ್ಲೊ ಅರ‍್ಥ್ ಆನಿ ಶೆವೊಟ್ ಇಲ್ಲೊ ಇಲ್ಲೊ ಸಮ್ಜಾತಾ.
ಹಾಂವ್ ಮುಳಾನ್ ಮಿಲಾರ್ ಅತ್ತಾರ‍್ಚೊ, ಭುರ‍್ಗ್ಯಾ ಪ್ರಾಯೆರ್ ದಿಸಾಚ್ಯಾ ಚಡ್ ವೆಳಾ ಮಿಲಾರ್ ಇಗರ‍್ಜ್‌ಚ್ ಮ್ಹಜೆಂ ವಸ್ತೆಠಾಣೆಂ. ಮಂಗ್ಳಾರಾ ಸಾಂತ್ ಆಂತೊನಿಚೆಂ ಭಕ್ತಿಪಣ್ ಥಂಯ್ಸರ್ ವ್ಹಡ್ ದೆವಾಸಾಂವ್. ಸಾಂತ್ ಆಂತೊನಿಚ್ಯಾ ಆಸ್ರ್ಯಾಚೆ ಪಾದ್ರಿ ಥಂಯ್ ನೊವೆನ್ ಕರ‍್ತಾಲೆ (ಹರ‍್ಯೆಕಾ ಮಂಗ್ಳಾರಾ ಆಸ್ರ್ಯಾಚ್ಯಾ – ಚಲುಂಕ್ ತಾಂಕ್ಚ್ಯಾ – ಸರ‍್ವಾಂಕ್ ಆಸ್ರ್ಯಾಥಾವ್ನ್ ಮಿಲಾರ್ ಪುರ‍್ಶಾಂವಾರ್ ಯೇಂವ್ಕ್ ಆಸ್‌ಲ್ಲೆಂ) ನೊವೆನಾಂತ್ ವಾಚುಂಕ್ ರಾಶಿಂನಿ ಇಂತೆಂಸಾಂವಾಂ ಯೆತಾಲಿಂ. ಆಸ್ರ್ಯಾಚೊ ನಿರ‍್ದೇಶಕ್ ಯೇನಾಂ ತ್ಯಾ ದಿಸಾಂನಿ ಏಕ್ ಮ್ಹಾಲ್ಘಡೊ ಜೆಜ್ವಿತ್ ನೊವೆನ್ ಕರ‍್ತಾಲೊ. ಲಾಂಬ್ ಖಾಡಾಚ್ಯಾ ತಾಕಾ ಸ್ವಗತ್ ಉಲೊವ್ಪ್ ಎಕ್ದಮ್ ಪಸಂದ್ ಜಾತಾಲೆಂ ದಿಸ್ತಾ.
ಏಕ್ ದೀಸ್ ಏಕ್ ಇಂತೆಂಸಾಂವ್ (ತೆಸಾಂವ್) ತ್ಯಾ ಮ್ಹಾಲ್ಘಡ್ಯಾ ಯಾಜಕಾನ್ ವಾಚುಂಕ್ ಧರ‍್ಲೆಂ; ’ಎಕ್ಲ್ಯಾಕ್… ಎಕ್ಲ್ಯಾಕ್ …’ ಗಾಡಿ ಮುಕಾರ್ ವಚಾನಾಂ, ನಿಮಾಣೆಂ ಕಷ್ಟಾಂನಿ ’ಎಕ್ಲ್ಯಾಕ್ ಪರೀಕ್ಷೆಂತ್ ಪಾಸ್ ಜಾಂವ್ಕ್’ ಮ್ಹಣ್ ತಾಣೆಂ ವಾಚುನ್ ಮುಗ್ದಿಲೆಂ. ಮಾಗಿರ್ ಪಾದ್ರ್ಯಾಬ್, ’ಸಾಂತ್ ಆಂತೊನಿ ಅಶೆಂ ಬರಯ್ಲ್ಯಾರ್ ಪರೀಕ್ಷೆಂತ್ ಪಾಸ್ ಜಾಂವ್ಚೆಂ ಕಶೆಂ? ತುಜೆಲಾಗಿಂ ಮಾಗಾಜೆ ವ್ಹಯ್ ಪೂಣ್ ಹಾತ್ ಬರಪ್ ಬರೆಂ ಕರ್ನ್ ಘೆಂವ್ಕ್ ತಾಣೆಂ ಪೆಚಾಡಿಜೆ ನ್ಹಂಯ್‌ಗೀ’ ಮ್ಹಣ್ ಜೊರಾನ್ ಮ್ಹಣಾಲೊ. ತ್ಯಾಚ್ ಪಾದ್ರ್ಯಾಬಾಕ್ ಏಕ್ ಪಾವ್ಟಿಂ, ’ಬಾರಾ ಚೆಡ್ವಾಂಕ್ ಗಲ್ಫಾಚಿ ಬರಿ ಸಯ್ರಿಕ್ ಮೆಳುಂಕ್’ ಮ್ಹಳ್ಳಿ ತೆಸಾಂವಾಚಿ ಚೀಟ್ ಆಯ್ಲಿ. ತೆಸಾಂವ್ ವಾಚುನ್ ಮಾಗಿರ್ ಪಾದ್ರ್ಯಾಬ್ ಜೊರಾನ್ ’ಸಾಂತ್ ಆಂತೊನಿ ಸಕ್ಡಾಂಕ್ ಚೆಡೆ ಗಲ್ಫಾಚೆಚ್ ಜಾಯ್ಜೆ, ಕಿತ್ಯಾಕ್ ಮಾಂಯಾಂಕ್ ಗಾಂವ್ಚೆ ಜಾಂವಂಯ್ ಜಾಯ್ನಾಂತ್‌ಗೀ, ಸಕ್ಡಾಂನಿ ಗಲ್ಪಾಚ್ಯಾಂಕ್‌ಚ್ ಆಶೆಲ್ಯಾರ್ ಗಾಂವ್ಚ್ಯಾ ಚೆರ‍್ಕ್ಯಾಂಕ್ ಕಾಜಾರ್ ಜಾಂವ್ಚೆಂ ಕೆದಾಳಾ’ ಮ್ಹಣಾಲೊ. ’ದೊಗಾಂಚಿ ಪಿಡಾ ಗೂಣ್ ಜಾಂವ್ಕ್’ ಮ್ಹಳ್ಳಿ ತೆಸಾಂವ್ ಚೀಟ್ ಆಯ್ಲ್ಯಾರ್, ’ಸಾಂತ್ ಆಂತೊನಿ ಪಿಡಾ ಗೂಣ್ ಜಾಂವ್ಕ್ ತುಜೆಲಾಗಿಂ ಮಾಗ್ಲ್ಯಾರ್ ಪಾವಾನಾಂ ತಾಣಿಂ ಆಸ್ಪತ್ರೆಕ್‌ಯ್ ವಚಾಜೆ ಮ್ಹಣ್ ತೊ ಸಾಂಗ್ತಾಲೊ. ಅಶೆಂಚ್ ತೊ ಸಾಂತ್ ಆಂತೊನಿಲಾಗಿಂ ಸ್ವಗತ್ ಉಲಯ್ತಾಲೊ ತೆಂ ಹಾಂವೆಂ ಆಲ್ತಾರಿರ್ ರಾವುನ್ ಮೀಸ್ ಅಜಿತರ್ ಕರ‍್ತಾನಾಂ (ಆಲ್ತಾರ್ ಭುರ‍್ಗೊ ಜಾವ್ನ್) ಸಭಾರ್‌ಪಾವ್ಟಿಂ ಆಯ್ಕಾಲಾಂ.
ಖರ‍್ಯಾನ್ ಹೆಂ ಕಿತೆಂಚ್ ನ್ಹಂಯ್ ಮ್ಹಣ್ತಾಂ ಹಾಂವ್ ಕಿತ್ಯಾಕ್ ಮ್ಹಳ್ಯಾರ್ ಏಕ್ ವ್ಹಡ್ ನಾಮ್ಣೆಚ್ಯಾ ಮೊನ್ಸಿಞರಾನ್ (ತೊ ದಿಯೆಸೆಜಿಚೊ ವಿಗಾರ್ ಜೆರಾಲ್ ಜಾಂವ್ಕ್ ನಾಂ – ಭೆಷ್ಟೆಂ ತುಮಿಂ ಚೂಕ್ ದುಬಾವ್ ಕರ‍್ಚೊ ನಾಕಾ) ಸ್ವಗತ್ ಉಲೊಂವ್ಚೆಂ ಹಾಂವೆಂ ಭುರ‍್ಗ್ಯಾಪ್ರಾಯೆರ್ ಆಯ್ಕಾಲ್ಲೆಂ. ತಾಚ್ಯಾ ಸ್ವಗತ್ ಶಯ್ಲೆ ಮುಕಾರ್ ಹೆರ್ ಕೊಣಾಚೆಂಚ್ ಹಾಂವೆಂ ಆಯ್ಕಾಲ್ಲೆಂ ನಾಂ. ತೊ ಶ್ಹೆರಾಂತ್ಲ್ಯಾ ನಾಮ್ಣೆಚ್ಯಾ ಫಿರ‍್ಗಜಾಂಚೊ ವಿಗಾರ್ ಆಸ್‌ಲ್ಲೊ. ಮರಿಯೆಚೊ ವ್ಹರ‍್ತೊ ಭಕ್ತ್ ತೊ, ತಾಚೆಂ ಉಲೊವ್ಪ್ ಸಕ್ಕಡ್ ಮರಿಯೆಲಾಗಿಂ. ’ಪಳೆ ಮಾಯೆ, ಹಿಂ ತುಜಿಂ ಭುರ‍್ಗಿಂ ಪರೀಕ್ಷಾ ಸುರು ಜಾತಾನಾಂ ಮಾರ‍್ಚ್ – ಎಪ್ರಿಲಾಂತ್ ತುಜೆಲಾಗಿಂ ಆಯಿಲ್ಲಿಂ, ಪಳೆ ಮಾಯೆ ಆತಾಂ ಪರೀಕ್ಷಾ ಸಂಪ್ಲಿ, ರಿಜಲ್ಟ್ ಆಯ್ಲೆಂ, ಎಕ್ಲೆಂ ಪುಣಿಂ ತುಜೆಲಾಗಿಂ ಆಯ್ಲೆಂಗಿ ಮಾಯೆ, ತೆಂ ಪಾಸ್‌ಗೀ ಫಯ್ಲ್‌ಗೀ ತುಕಾ ಕಳ್ಳೆಂಗೀ ಮಾಯೆ…’ ಮ್ಹಣ್ ತೊ ಶೆರ‍್ಮಾಂವಾರ್ ಸುರು ಕರಿತ್ ತರ್ ಮಾಗಿರ್ ಸಬ್ಧಾಂಚೆಂ, ಸಂಭಾಷಣಾಚೆಂ ಫೆಸ್ತ್‌ಚ್. ಮಧೆಂ ಮಧೆಂ, ’ಸಾಂಗ್ ಮಾಯೆ ತುಂ ಆತಾಂ ಸಾಂಗ್’ ಮ್ಹಣ್ ಮಾಯೆಚೆರ್ ದಬಾವ್.
’ಪಳೆ ಮಾಯೆ, ತುಜೊ ಉಮೊ ದೀಂವ್ಕ್ ಹಿಂ ಚೆಡ್ವಾಂ ಯೆತಾತ್, ಜಾಗ್ರುತ್ ಮಾಯೆ ತಾಂಚೆಂ ತೆಂ ವೊಂಠಾಂಚೆಂ ತಾಂಬ್ಡೆಂ ತಾಂಬ್ಡೆಂ ಮೆಣ್ ತುಕಾ ಲಾಗತ್, ತುಕಾ ಮಾಗಿರ್ ತೆಂ ಧುಂವ್ಕ್ ಕಷ್ಟ್ ಜಾತಿತ್ ಮ್ಹಣ್ ತಾಣೆಂ ಸಾಂಗ್ತಾನಾಂ’ ಲೊಕಾಕ್ ಹಾಸ್ಚೆಂಗೀ ರಡ್ಚೆಂಗೀ ಮ್ಹಣ್ ಕಳ್ನಾಶೆಂ ಘುಸ್ಪಡ್ ಜಾತಾಲಿ. ’ಕುಮ್ಗಾರ್ ದಿತಾನಾಂ ಹೊ ಲೋಕ್ ಸಮಾ ತೊಂಡ್ ಉಗ್ತೆಂ ಕರಿನಾಂ, ಆದ್ಲೆ ರಾತಿಂ ಸೊರೊ ಪಿಯೆಲ್ಲೊ ಸಕಾಳಿಂ ಸಮಾ ತೊಂಡ್ ಧುಯ್ನಾಶೆಂ ಮಿಸಾಕ್ ಯೆತಾ, ತಾಣೆಂ ಕುಮ್ಗಾರಾಕ್ ತೊಂಡ್ ಉಗಡ್ಲ್ಯಾರ್ ಮ್ಹಾಕಾ ಕಾಂಠಾಳ್ತಾ, ಹಾಂಚೆ ಸವೆಂ ಮ್ಹಜೆ ಕಷ್ಟ್ ಕಿತೆಂ ತೆಂ ತಾಂಕಾಂ ತುಂ ಸಾಂಗ್ ಮಾಯೆ…’ ಅಶೆಂಚ್ ಚಲ್ತಾಲಿ ತಾಚಿ ಸುಲಿಲಕ್ವಿ. ಆಜ್ ಕಾಲ್ ಆಮ್ಚೊ ಲೋಕ್ ಲೆಕಾವ್ಹರ‍್ತೆಂ ಪಿಯೆನಾಂ, ಎಕ್ದಮ್ ಸುಧಾರ‍್ಲಾ. ಹ್ಯಾ ಮಹಾನ್ ವಾವ್ರಾಂತ್ ಹ್ಯಾ ಮೊನ್ಸಿಞರಾಚ್ಯಾ ಸ್ವಗತ್ ಉಲೊವ್ಪಾಚೊ ಪಾತ್ರ್ ವ್ಹಡ್ ಆಸಾ.
ಶಿರ‍್ವಾಂ ಕಿನ್ನಿಗೋಳಿ ಕುಶಿಂತ್ ಫಾಮದ್ ಜಾಲ್ಲೊ ಏಕ್ ಮ್ಹಾಲ್ಘಡೊ ಯಾಜಕ್ ಆಸ್‌ಲ್ಲೊ ತಾಚೆಂ ಸ್ವಗತ್ ಸಕ್ಕಡ್ ಸೊಮ್ಯಾಲಾಗಿಂ, ’ಸೊಮ್ಯಾಂ ತುಕಾಯ್ ದಿಸಾನಾಂಗೀ? ಮಿಸಾಕ್ ಇಗರ‍್ಜೆ ಭಿತರ್ ಯೇನಾಂತ್ ತೆ, ಗ್ರೊಟ್ಟ್ಯಾಲಾಗಿಂ ಉಬೆ ಆಸಾತ್ ತೆ, ತಾಂಕಾಂ ವೋಡ್ನ್ ಭಿತರ್ ಹಾಡ್ ಸೊಮ್ಯಾಂ’ ಮ್ಹಣುನ್ ಹರ‍್ಯೆಕಾ ಮಿಸಾರ್ ಸಾಂಗಿನಾಶೆಂ ತಾಕಾ ಮುಕಾರ್ ವೆಚ್ಯಾಕ್ ಜಾಯ್ನಾತ್‌ಲ್ಲೆಂ. ’ಸೊಮ್ಯಾ, ಆಮ್ಚ್ಯಾ ಲೊಕಾಕ್ ಕೆದಾಳಾ ತುಂ ಬೂದ್ ಸಾಂಗ್ಶಿ? ಹಾಂಚಿ ಮುಸ್ತಾಯ್ಕಿ ಪಳೆ, ಹಿಂ ತುಕಾ ಮೆಳುಂಕ್ ಆಯ್ಲ್ಯಾಂತ್‌ಗೀ ವಾ ಸರ್ಕಸ್ ಪಳಂವ್ಕ್ ಆಯ್ಲ್ಯಾಂತ್?, ಮ್ಹಜ್ಯಾನ್ ಹಾಂಕಾಂ ಸಮಾ ಕರುಂಕ್ ಜಾಯ್ನಾಂ, ತುವೆಂಚ್ ಯೇಜೆ’ ಮ್ಹಣುನ್ ತೊ ಸಾಂಗುಂಕ್ ಆಸ್‌ಲ್ಲೆಂ ಸಾಂಗ್ತಾಲೊ. ’ಸೊಮ್ಯಾ ಮೆರ‍್ಶ್ಯಾ ಬಾಯೆಚ್ಯಾ ಸುಣ್ಯಾ ಕಾಲೆಸ್ತಾಚ್ಯಾ ಕೊಂಬಿಯೆಕ್ ಚಾಬ್ಲೆಂ ಮ್ಹಣುನ್ ಆದ್ಲ್ಯಾ ಹಫ್ತ್ಯಾಂತ್ ತಾಂಚೊ ಕಸಲೊ ಗಲಾಟೊ, ತುಕಾ ತ್ಯಾ ಶಿಪಾಯಾಂನಿ ಥಾಪ್ಟಾಂ ಮಾರ‍್ಲ್ಯಾರಿ ತುಂ ತಾಳೊ ಕಾಡಿನಾಶೆಂ ಕಿತ್ಲ್ಯಾ ಸಮಾಧಾನೆನ್ ಆಸ್‌ಲ್ಲೊಯ್, ಎಕಾ ಪುಸ್ಕಟ್ ಕುಂಕ್ಡಾಖಾತಿರ್ ಹಾಂಚೊ ಗಾಂವಾರ್ ಗಲಾಟೊಗೀ, ತುಂ ಪುಣಿಂ ಹಾಂಕಾಂ ಬೂದ್ ಸಾಂಗ್ ಸೊಮ್ಯಾ, ಮ್ಹಜ್ಯಾನ್ ಜಾಯ್ನಾಂ…’ ಮ್ಹಣುನ್ ಸಕ್ಡಾಂ ಮುಕಾರ್ ಸೊಮ್ಯಾಕ್ ತೊ ಬೋಬ್ ಮಾರ‍್ತಾಲೊ.
ಹ್ಯಾ ಸಕ್ಡಾಪ್ರಾಸ್ ವ್ಹರ‍್ತೆಂ ಎಕಾ ಗುರ‍್ಕಾರಾಚ್ಯಾ ಸಹಾಯಾಕಾಚೆಂ ಸ್ವಗತ್. ಹೆಂ ಅಶೆಂ ಚಲ್ಲಾಂ ಮ್ಹಣ್ ತುಮಿಂ ಖಂಡಿತ್ ಪಾತ್ಯೆನಾಂತ್ ತರಿ ತೆಂ ಖರೆಂ. ಹೊ ಗುರ‍್ಕಾರ್ ಖಂಚ್ಯಾಯ್ ಘರಾ ಮೊರ‍್ನ್ ಜಾಲ್ಲೆ ತಕ್ಷಣ್ ಹಾಜಿರ್ (ಆಜೂನ್ ಆಮ್ಚ್ಯಾ ದಿಯೆಸೆಜಿಂತ್ ಏಕ್ ಲಾಯಿಕ್ ಮ್ಹಣಿಯಾರಿ ಜಾವ್ನ್ ಆಮ್ಚ್ಯಾ ಗುರ‍್ಕಾರಾಂಚಿ ಸೆವಾ ವ್ಹರ‍್ತಿ) ತಾಚೆಸವೆಂ ತಾಚೊ ಸಹಾಯಕ್ ಕಾಂಯ್ ೬೦ ವರ‍್ಸಾಂಚೊ. ಗುರ‍್ಕಾರ್ ಜವಾಬ್ಧಾರೆಚಿಂ ಕಾಮಾಂ ಕರ‍್ತಾನಾಂ ಹೊ ಸಹಾಯಕ್ ತೇರ‍್ಸ್ ಸುರು ಕರ‍್ತಾಲೊ. ಕೋಣ್ ಆಸುಂ ನಾಂ ಆಸುಂ, ತೇರ‍್ಸ್ ಚಾಲೂಚ್. ಮೊರ‍್ನಾಕ್ ಆನಿ ದುಕೆಸ್ತಾಂಚ್ಯಾ ಘರಾಂತ್ ದುಕಿಚೆ ಮಿಸ್ತೆರ್ ಶಿಕಯ್ತಾತ್. ಹ್ಯಾ ಸಹಾಯಕಾಚ್ಯಾ ತೆರ‍್ಸಾಂನಿ ನಮಾನ್ ಮರಿಯೆ…ಸಾಂತಾ ಮರಿಯೆ ಪ್ರಾಸ್ ನಿಯಾಳ್‌ಚ್ ಲಾಂಬ್. ಪಯ್ಲೊ ಮಿಸ್ತೆರ್ ಸೊಮಿ ಜೆಜು ಮೊಳ್ಯಾಂತ್ ಮಾಗ್ತಾನಾಂ ರಗತ್ ಘಾಮೆತಾ. ಇತ್ಲೆಂ ಸಾಂಗ್‌ಲ್ಲೆಂಚ್ ಸುರು ಸ್ವಗತ್, ’ಸಾಂಗ್ ಸೊಮ್ಯಾಂ ತುಂ ತ್ಯಾ ಮೊಳ್ಯಾಕ್ ಕಿತ್ಯಾಕ್ ಗೆಲ್ಲೊಯ್? ತುಕಾ ದುಸ್ರೊ ಜಾಗೊ ಖಂಚೊಯ್ ನಾತ್‌ಲ್ಲೊಗೀ, ತ್ಯಾ ಕಾಂಟ್ಯಾಖುಂಟ್ಯಾಂ ಮಧೆಂ ವಚುಂಕ್ ತುಕಾ ಸಾಂಗ್‌ಲ್ಲೆಂ ಕೋಣೆಂ?…’ ಎಕ್ದಮ್ ಪೆದ್ದಾಂಬ್ ಸ್ವಗತ್. ದುಸ್ರೊ ಮಿಸ್ತೆರ್ ಸೊಮಿ ಜೆಜು ಕ್ರಿಸ್ತಾಕ್ ಸೊಜೆರ್ ಖಾಂಬ್ಯಾಕ್ ಬಾಂದುನ್ ಜೆರ‍್ಬಾಂದಾಂನಿ ಮಾರ‍್ತಾತ್ – ’ಸಾಂಗ್ ಸೊಮ್ಯಾ ಕೋಣ್ ತೊ ಶಿಪಾಯ್, ಹಾಂವ್ ತಾಚೆಂ ಕಾನ್ಸುಲ್ ಭೆತ್ತಾಂ, ತಾಕಾ ತುವೆಂ ಕಿತ್ಯಾಕ್ ಸೊಡ್ಲೆಂಯ್ ಸೊಮ್ಯಾ? ತಸಲ್ಯಾ ಕಠೀಣ್ ಮನ್ಶಾಂಕ್ ಸೊಡಿನಾಂಯೆ ಸೊಮ್ಯಾ’ ಅಶೆಂಚ್ ತಾಚೆಂ ವಿವರಣಾತ್ಮಕ್ ಸ್ವಗತ್ ಚಲ್ತಾಲೆಂ.
ಮಿಲಾರ್ ಇಗರ‍್ಜೆಂತ್ ಪಯ್ಲೆಂ ನಿಮಾಣ್ಯಾ ಸುಕ್ರಾರಾಕ್ ತೀನ್ ಶೆರ‍್ಮಾಂವ್ ಆಸ್‌ಲ್ಲೆ, ಪಾಶಾಂವಾಚೊ ಶೆರ‍್ಮಾಂವ್, ಖುರ‍್ಸಾಚೊ ಶೆರ‍್ಮಾಂವ್ ಆನಿ ತುವಾಲ್ಯಾಚೊ ಶೆರ‍್ಮಾಂವ್. ತುವಾಲ್ಯಾಚೊ ಶೆರ‍್ಮಾಂವ್ ಮ್ಹಳ್ಯಾರ್ ಮರಿಯೆಚ್ಯಾ ಹಾತಾಂತ್ ತುವಾಲೊ ದಿತಾನಾಂ ಸಾಂಗ್ಚೊ ಶೆರ‍್ಮಾಂವ್. (ಪಯ್ಲೆಂ ಥಂಯ್ ದೆಖಾವ್ಣಿ ಆಸ್‌ಲ್ಲಿ – ದೆಖಾವ್ಣೆಚೊ ನಿಮಾಣೊ ವಾಂಟೊ ರಾತಿಂ ಜೆಜುಚಿ ಕೂಡ್ ಖುರ‍್ಸಾವಯ್ಲಿ ದೆಂವವ್ನ್ ಪುರ‍್ಶಾಂವಾರ್ ವ್ಹರ‍್ನ್ ಮಾಗಿರ್ ಇಗರ‍್ಜೆ ಭಿತರ್ ಸೆಪುಲ್ಕ್ರಾಂತ್ ದವರ‍್ಲ್ಯಾ ಉಪ್ರಾಂತ್ ಲಾಂಬ್ ಏಕ್ ತುವಾಲೊ-{ಜೆಜುಚೆಂ ರಗ್ತಾಭರಿತ್ ಲಾಂಬ್ ಪಿಂತುರ್} ಮರಿಯೆಚ್ಯಾ ಇಮಾಜಿಚ್ಯಾ ಹಾತಾಂಕ್ ಶಿರ‍್ಕಾಂವ್ಚೆಂ) ಹೊ ಶೆರ‍್ಮಾಂವ್ ಚಡಾವತ್ ಮ್ಹಾಲ್ಘಡೆ ಯಾಜಕ್ ದಿತಾಲೆ – ಲಾಂಬಾಯೆಕ್ ಸ್ವಗತ್. ಆಯ್ಕಾತೆಲ್ಯಾಚ್ಯಾ ದೊಳ್ಯಾಂನಿ ದುಕಾಂ ಹಾಡ್ಚೆಂ ಸ್ವಗತ್. ಚಡ್‌ಶೆಂ ’ಘೆ ಮಾಯೆ ಹೊ ತುವಾಲೊ, ತುಜ್ಯಾ ಪುತಾಚ್ಯಾ ರಗ್ತಾನ್ ಆನಿ ಘಾಮಾನ್ ಭಿಜ್ಲಲೊ…’ ಮ್ಹಣ್ ಹೊ ಶೆರ‍್ಮಾಂವ್ ಸುರ‍್ವಾತ್ತಾ. ಮಾಗಿರ್ ಸಾಂಗ್ಚೆಂ ಸಕ್ಕಡ್ ಜಮ್ಲಲ್ಯಾ ಭಾವಾಡ್ತ್ಯಾಂಕ್‌ಚ್ ತರೀ ಸಕ್ಕಡ್ ಮಾಯೆ ಮುಕಾಂತ್ರ್ ಸಾಂಗ್ಚೆಂ.
ತ್ಯಾ ಕಾಲಾರ್ ತ್ಯಾ ಸುಲಿಲಕ್ವಿಚಿ (ಸ್ವಗತ್ ಉಲೊವ್ಪ್) ಗ್ರೇಸ್ತ್‌ಕಾಯ್ ಚಾಕ್‌ಲ್ಲೊಚ್ ಜಾಣಾಂ ತಿ ಸೊಭಾಯ್. ಸಬ್ಧಾಂಚೊ ಆಡಂಬರ್, ಅರ‍್ಥಾಂಚಿ ಸಂಪತ್ತಿ ಕಿತೆಂ. ಎಕಾಪ್ರಾಸ್ ಏಕ್ ವ್ಹರ‍್ತೊ ಶೆರ‍್ಮಾಂವ್‌ಗಾರ್. ತಾಂಕಾಂ ’ಅಂಗಚೇಷ್ಟೆಚಿ’ ಗರ‍್ಜ್‌ನಾತ್‌ಲ್ಲಿ. ಫಕತ್ತ್ ಭಾಶೆಚಿ ಗ್ರೇಸ್ತ್‌ಕಾಯ್ ಆನಿ ತಾಳ್ಯಾಂತ್ಲಿ ಸಕತ್. ತ್ಯಾ ಮುಕಾಂತ್ರ್ ಪುಲ್ಪತ್ರೆರ್ ರಾವುನ್ಂಚ್ ಸರ‍್ಗ್, ಯಮ್ಕೊಂಡ್, ಲಿಂಬ್ ಆನಿ ಭುಮಿವಯ್ಕುಂಟ್ ಆಸಾ ಕರ‍್ತಾಲೆ ತೆ. ಆಜ್ ವಾಚಪ್ ಉಣೆಂ ಉಣೆಂ ಜಾತಾನಾಂ, ಚಡಾವತ್ ವಾಟ್ಸಾಪ್ ಯುನಿವರ‍್ಸಿಟಿಚೆ ವಿದ್ಯಾರ‍್ಥಿ ಮುಕಾರ್ ಪಡ್ತಾನಾಂ ಭಾಸ್ ವಾಪರ‍್ಣಿ, ಸಬ್ಧಾಡಂಬರ್ ಮುಲ್ಯಾಕ್ ಪಡ್ಲಾಂ. ಫಿರ‍್ಗಜಾಂಚ್ಯಾ ಗೊವ್ಳಿಕ್‌ವಾವ್ರಾಪ್ರಾಸ್ ಆಡಳ್ತ್ಯಾವಾವ್ರಾಚೊ ಭಾರ್ ಯಾಜಕಾಂಚ್ಯಾ ಮಾತ್ಯಾರ್ ಪಡ್ಲಾ. ’ಖಂಯ್ ಗೆಲೆ ತೆ ಆದ್ಲೆ ದೀಸ್ ಇಷ್ಟಾ’ ಮ್ಹಣುನ್ ನೊಸ್ತಾಲ್ಜಿಕ್ ಜಾಂವ್ಚೆಂ ಮಾತ್ರ್ ಆಮ್ಚ್ಯಾ ವಾಂಟ್ಯಾಕ್ ಉರ‍್ಲಾಂ.
► ಸ್ಟೀಫನ್ ಕ್ವಾಡ್ರಸ್, ಪೆರ್ಮುದೆ
ಸ್ಟೀಫನಾಚಿ ಹಿ ಸುಲಿಲಕ್ವಿ ಮ್ಹಜಾ ನದ್ರೆಕ್ ಸಾಂಪ್ಡೊಂಕ್ ನಾತ್ಲಿ. ವಾಚುನ್ ಖೂಬ್ ಮಜಾ ಆಯ್ಲಿ!
Simply superb and lucid style. impressive