ಕೊಂಕ್ಣಿ ಸಮಾಜ್ ಏಕ್ ಬಳಿಷ್ಟ್ ಸಮಾಜ್ ಕರ್ಚೆ ದಿಶೆನ್ ನಿಷ್ಠೆನ್ ವಾವುರ್ಪಿ, ಉದ್ಯಮಿ ಆನಿ ದಾನಿ ಪದ್ಮಶ್ರೀ ಶ್ರಿ ಟಿ. ವಿ. ಮೋಹನದಾಸ ಪೈ ಹಾಂಚಿ ಆವಯ್ ಶ್ರೀಮತಿ ವಿಮಲಾ ವಿ. ಪೈ ಹ್ಯಾ ಸಂಸಾರಿ ತಿಚೆಂ 91 ವರ್ಸಾಂಚೆಂ ಪಯ್ಣ್ ಸಂಪವ್ನ್, ಬೆಂಗ್ಳುರಾಂತ್, ಮಂಗ್ಳಾರಾ 2022 ಸಪ್ತೆಂಬರಾಚ್ಯಾ 6 ವೆರ್ ವೈಕುಂಠಾಕ್ ಚಮ್ಕಾಲ್ಯಾ.
ವೃತ್ತೆನ್ ಏಕ್ ಶಿಕ್ಷಕಿ ಜಾವ್ನಾಸ್ಲ್ಲಿ ಶ್ರೀಮತಿ ವಿಮಲಾ ಪೈ ಏಕ್ ಸಮುದಾಯ್ ಸಶಕ್ತ್ ಕರಿಜೆ ತರ್ ಸಮಾಜಾಚ್ಯಾ ಭುರ್ಗ್ಯಾಂಕ್ ಉಂಚ್ಲೆಂ ಶಿಕಪ್ ಫಾವೊ ಜಾಯ್ಜೆ ಮ್ಹಣ್ ಥಿರ್ ಪಾತ್ಯೆಲ್ಲಿ. ತಿಚೆಥಾವ್ನ್ ಪ್ರೇರಣ್ ಜೊಡ್ಲ್ಲೊ ತಿಚೊ ಪೂತ್, ಪದ್ಮಶ್ರೀ ಶ್ರೀ ಟಿ. ವಿ. ಮೋಹನದಾಸ ಪೈ ಹಾಣಿ ವಿಶ್ವ ಕೊಂಕ್ಣಿ ಕೇಂದ್ರಾಂತ್, ಉಂಚ್ಲೆಂ ಶಿಕಪ್ ಜೊಡ್ಚ್ಯಾ ಕೊಂಕ್ಣಿ ಸಮಾಜಾಚ್ಯಾ ಭುರ್ಗ್ಯಾಂಕ್ ವಿದ್ಯಾರ್ಥಿ ವೇತನ್ ನಿಧಿ ಸ್ಥಾಪಿತ್ ಕರ್ನ್, ಚಾಲನ್ ದಿಲೆಂ.
ಸಾಂಗಾತಾ ವಿದ್ಯಾರ್ಥಿ ವೇತನ್ ಜೊಡ್ಚ್ಯಾ ವಿದ್ಯಾರ್ಥಿಂಕ್ ಫಾವೊತೆಂ ಮಾರ್ಗದರ್ಶನ್ ದೀಂವ್ಕ್ ವಿಶ್ವ ಕೊಂಕ್ಣಿ ಕೇಂದ್ರಾಂತ್ ವೆವೆಗ್ಳಿಂ ಶಿಬಿರಾಂ ಆಯೋಜನ್ ಕೆಲಿಂ. ಶಿಬಿರಾರ್ಥಿ ವಿದ್ಯಾರ್ಥಿಂಕ್ ರಾವೊಂಕ್ ಮ್ಹಣ್ ಅಂತರಾಷ್ಟ್ರೀಯ್ ದರ್ಜ್ಯಾಚೆಂ ಅತ್ಯಾಧುನಿಕ್ ಸವ್ಲ್ಯತ್ಯೊ ಆಟಾಪ್ಚೆಂ ಹೊಸ್ಟೆಲ್ ಆಪ್ಲಿಂ ಜಲ್ಮ್ ದಾತಾರಾಂ ಶ್ರಿ ಟಿ.ವಿ. ರಮಣ ಪೈ ಆನಿ ಶ್ರೀಮತಿ ವಿಮಲಾ ವಿ. ಪೈ ಹಾಂಚ್ಯಾ ನಾಂವಾರ್ ಬಾಂದುನ್ 2011 ನವೆಂಬ್ರಾಚ್ಯಾ 11 ವೆರ್ (11.11.11) ತೆಂ ಉಗ್ತಾಯ್ಲೆಂ. ಹ್ಯಾ ಸಂಭ್ರಮಾಕ್ ಖುದ್ ಶ್ರೀಮತಿ ವಿಮಲಾ ವಿ. ಪೈ ಹಾಜರ್ ಆಸೊನ್ ಕೊಂಕ್ಣಿ ಸಮಾಜಾಕ್ ತಿಣೆ ಆಪುರ್ಬಾಯೆಚೊ ಸಂದೇಶ್ ದಿಲ್ಲೊ. (ವಿಡಿಯೊ ಪಳಯಾ)
2010 ವ್ಯಾ ವರ್ಸಾ, ಪಯ್ಲೆ ಪಾವ್ಟಿಂ ಕೊಂಕ್ಣೆಂತ್ ರುಪಯ್ ಏಕ್ ಲಾಕ್ ಐವಜಾಚೊ, ಸರ್ಕಾರೇತರ್ ಪುರಸ್ಕಾರ್, ಅತ್ಯುತ್ತಮ್ ಕೊಂಕ್ಣಿ ಬುಕಾಕ್ ದಿಂವ್ಚೊ ಮ್ಹಣ್ ಠರಾವ್ನ್, 2010 ದಸೆಂಬ್ರಾಚ್ಯಾ 18 ತಾರಿಕೆರ್ ಗೊಂಯ್ಚ್ಯಾ ರವೀಂದ್ರ ಭವನಾಂತ್ ಮಹಾಭಲೇಶ್ವರ್ ಸಯ್ಲ್ ಹಾಂಚ್ಯಾ “ಹಾವ್ಟನ್” ಕಾದಂಬರೆಕ್ ಶ್ರೀಮತಿ ವಿಮಲಾ ವಿ. ಪೈ ವಿಶ್ವ ಕೊಂಕಣಿ ಪುಸ್ತಕ ಪುರಸ್ಕಾರ್, ತವಳ್ಚೊ ಗೊಂಯ್ಚೊ ಮುಕೆಲ್ ಮಂತ್ರಿ ದಿಗಂಬರ್ ಕಾಮತ್ ಹಾಂಚ್ಯಾ ಹಾಜ್ರೆಂತ್ ಪ್ರದಾನ್ ಕೆಲೊ. ಹ್ಯಾ ಸಂಭ್ರಮಾಕ್ಯೀ ಶ್ರೀಮತಿ ವಿಮಲಾ ವಿ. ಪೈ ಹಾಜರ್ ಆಸೊನ್ ತಿಣೆಂ ಕೊಂಕ್ಣಿ ಪರ್ಜೆಚೊ ಉಪ್ಕಾರಿ ಮನಾಚೊ ಮಾನ್ ಸ್ವೀಕಾರ್ ಕೆಲ್ಲೊ.
2010 ವ್ಯಾ ವರ್ಸಾಂತ್ ಫಕತ್ ಎಕಾ ಪುಸ್ತಕ್ ಪುರಾಸ್ಕಾರಾ ಥಾವ್ನ್ ಸುರು ಜಾಲ್ಲೆ ಶ್ರೀಮತಿ ವಿಮಲಾ ವಿ. ಪೈ ವಿಶ್ವ ಕೊಂಕಣಿ ಸಾಹಿತ್ಯ ಪುರಸ್ಕಾರ್ ಆಜ್ – ಅತ್ಯುತ್ತಮ್ ಸಾಹಿತ್ಯ್ ಕೃತಿ, ಅತ್ಯುತ್ತಮ್ ಕವಿತಾ ಕೃತಿ ಆನಿ ಜಿಣ್ಯೆ ಸಾಧನ್ ಅಶೆಂ ತೀನ್ ವಿಭಾಗಾಂನಿ ದೀವ್ನ್ ಆಸಾತ್. ಶ್ರಿಮತಿ ವಿಮಲಾ ವಿ. ಪೈ ವಿಶ್ವ ಕೊಂಕಣಿ ಸಾಹಿತ್ಯ ಪುರಸ್ಕಾರಾಂಕ್ ಕೊಂಕ್ಣಿ ಸಾಹಿತ್ಯ ವರ್ತುಲಾಂತ್ ವ್ಹಡ್ ಮಾನ್ ಆಸೊನ್, ಗೊಂಯ್, ಕೇರಳ, ಕರ್ನಾಟಕ ಅಶೆಂ ಪ್ರಾಂತ್ಯ್ – ಪ್ರದೇಶ್ – ಲಿಪಿ – ಬೊಲಿಚೊ ಭೇದ್ ನಾಸ್ತಾನಾ ಫಕತ್ ಸಾಹಿತ್ಯಾಚಾ ಗುಣಾಮೊಲಾಚೆರ್ ದಿಂವ್ಚಿ ಪ್ರಶಸ್ತಿ ಮ್ಹಳ್ಳ್ಯಾ ವ್ಹಡ್ವಿಕಾಯೆಕ್ ಶ್ರಿಮತಿ ವಿಮಲಾ ವಿ. ಪೈ ಪುರಸ್ಕಾರ್ ಫಾವೊ ಜಾಲ್ಯಾತ್.
ವಿಶ್ವ ಕೊಂಕಣಿ ಕೇಂದ್ರಾಚೊ ಅಧ್ಯಕ್ಷ್ ಸಿಎ ನಂದಗೋಪಾಲ ಶೈಣೈ ಆನಿ ಟ್ರಸ್ಟಿ, ಸಿಇಒ ಗುರುದತ್ತ್ ಬಂಟ್ವಾಳ್ಕರ್ ಹಾಣಿ ಶ್ರೀಮತಿ ವಿಮಲಾ ವಿ. ಪೈ ಹಿಚ್ಯಾ ಮರ್ಣಾಥಂಯ್ ದೂಕ್ ಉಚಾರ್ಲಾಂ. ವಿಶ್ವ ಕೊಂಕ್ಣಿ ಕೇಂದ್ರಾಚಿ ಪ್ರೇರಣಾ ಸಕತ್ ಜಾವ್ನಾಸ್ಚೊ ತಿಚೊ ಪೂತ್ ಪದ್ಮಶ್ರೀ ಶ್ರೀ ಟಿ. ವಿ. ಮೋಹನದಾಸ ಪೈ ಆನಿ ಕುಟ್ಮಾಕ್ ಭುಜಾವಣ್ ಪಾಟಯ್ಲ್ಯಾ.
ಶ್ರೀಮತಿ ವಿಮಲಾ ವಿ. ಪೈ ಹಿಚ್ಯಾ ಮರ್ಣಾಥಂಯ್ ಕಿಟಾಳ್ ಆನಿ ಆರ್ಸೊ ಮಂಡಳಿ ದೂಕ್ ಪಾವ್ತಾ. ದುಕೇಸ್ತ್ ಕುಟ್ಮಾಕ್ ಭುಜಾವಣ್ ಪಾಟಯ್ತಾಂವ್. ओम शांति
► ಎಚ್ಚೆಮ್, ಪೆರ್ನಾಲ್, ಸಂಪಾದಕ್ / ಪ್ರಕಾಶಕ್
