“ಕೊಂಕಣಿ ಭಾಷಾ ಮಂಡಳಾನ್ ಮಾಂಡುನ್ ಹಾಡ್‌ಲ್ಲೆಂ ಆಯ್ಚೆಂ ಆಪುರ್ಬಾಯೆಚೆಂ ಕಾರ್ಯೆಂ ಪಳೆವ್ನ್ ಮನ್ ಸಂತೊಸ್ಲೆಂ. ಕೊಂಕ್ಣಿ ಭುರ್ಗ್ಯಾಂನಿ ಸಾದರ್ ಕೆಲ್ಲಿಂ ನಾಚ್ ಆನಿ ಗಾಯನಾಚಿಂ ಕಾರ್ಯಕ್ರಮಾಂ ಬೋವ್ ಆಂವಡ್ಲಿಂ. ಭುರ್ಗ್ಯಾಂಕ್ ವಿವಿಧತೆನ್ ಭರ್ಲೆಲಿ ಪ್ರತಿಭಾ ಸಾದರ್ ಕರುಂಕ್ ಆವಯ್ ಭಾಸ್ ಜೊಕ್ತಿ ಆನಿ ಪರಿಣಾಮ್‌ಕಾರಿ ಮಾಧ್ಯಮ್ ಮ್ಹಣ್ ಮ್ಹಾಕಾ ಭೊಗ್ತಾ. ಅಸಲ್ಯಾ ಕಾರ್ಯಕ್ರಮಾಂಕ್ ಸದಾಂಚ್ ಉತ್ತೇಜನ್ ದಿಂವ್ಚೆಂ ಕಾಮ್ ಜಾಯ್ಜೆ ಆನಿ ಹೆ ದಿಶೆನ್ ಸದಾಂಚ್ ಮ್ಹಜೊ ಪಾಟಿಂಬೊ ಅಸ್ತಾಲೊ” ಮ್ಹಣಾಲೊ ಕ್ಯಾಪ್ಟನ್ ಥೋಮಸ್ ಡಬ್ಲ್ಯೂ .ಪಿಂಟೊ.
ಕ್ಯಾ| ಪಿಂಟೊ, ಕೊಂಕಣಿ ಭಾಷಾ ಮಂಡಳ್ ಮಹಾರಾಷ್ಟ್ರ ಹಾಣಿ ಆಯ್ತಾರಾ ಸಾಂಜೆರ್ ದಾದರ್ ಪಶ್ಚಿಮಾಂತ್ ಡಾ| ಅಂತೋನಿಯೋ ದ’ಸಿಲ್ವಾ ಇಸ್ಕೊಲಾಚ್ಯಾ ಸಭಾಗೃಹಾಂತ್ ಮಾಂಡುನ್ ಹಾಡ್‌ಲ್ಲ್ಯಾ ಕೊಂಕಣಿ ಭಾಷಾ ಮಂಡಳ್ ಮಹಾರಾಷ್ಟ್ರ ಸಂಸ್ಥ್ಯಾಚೊ 80 ವೊ ವಾರ್ಷಿಕೋತ್ಸವ್ ಆನಿ 30 ವೊ ಕೊಂಕ್ಣಿ ಮಾನ್ಯತಾ ದಿವಸ್ ಸಂಭ್ರಮ್ – ಹ್ಯಾ ಸಂಭ್ರಮಿಕ್ ಜವ್ಳ್ಯಾ ಕಾರ್ಯಾಚೊ ಮುಕೆಲ್ ಸಯ್ರೊ ಜಾವ್ನ್ ಹಾಜರ್ ಅಸೊನ್ , ದಿವೊ ಪೆಟವ್ನ್ ಕಾರ್ಯಾಕ್ ಚಾಲನ್ ದೀವ್ನ್ ಉಲಯ್ತಾಲೊ.
ಮುಂಬಯಿ ಉಂಚ್ಲ್ಯಾ ಕೊಡ್ತಿಚೊ ವಕೀಲ್ ಮಾನೆಸ್ತ್ ಪಿಯೂಸ್ ವಾಸ್ ಆನಿ ಸೆವೆನ್ ಐಲ್ಯಾಂಡ್ ಶಿಪ್ಪಿಂಗ್ ಲಿಮಿಟೆಡ್ ಸಂಸ್ಥ್ಯಾಚೊ ಆಡಳ್ತ್ಯಾ ನಿರ್ದೇಶಕ್ ಮಾನೆಸ್ತ್ ಜೋಸೆಫ್ ಡಿಸೋಜಾ ಮಾನಾಚೆ ಸಯ್ರೆ ಜಾವ್ನ್ ಕಾರ್ಯಾಕ್ ಹಾಜರ್ ಆಸ್ಲೆ. ಭಾಷಾ ಮಂಡಳ್ ಅಧ್ಯಕ್ಷ್ ಮಾನೆಸ್ತ್ ಜಾನ್ ಡಿ’ಸಿಲ್ವಾ, ಉಪಾಧ್ಯಕ್ಷ್ ಮಾನೆಸ್ತ್ ಆಲ್ಬರ್ಟ್ ಡಬ್ಲೂ .ಡಿ’ಸೋಜಾ, ಕಾರ್ಯಾಧ್ಯಕ್ಷ್ ಮಾನೆಸ್ತ್ ಹೆನ್ರಿ ಲೋಬೊ, ಜೆರಾಲ್ ಕಾರ್ಯದರ್ಶಿ ಮಾನೆಸ್ತ್ ಲಾರೆನ್ಸ್ ಡಿ’ಸೋಜಾ ಕಮಾನಿ, ಸಾಂಗಾತಿ ಕಾರ್ಯದರ್ಶಿ ಮಾನೆಸ್ತ್ ಜೋನ್ ಆರ್. ಪಿರೇರಾ ಆನಿ ಖಜಾನ್ದಾರ್ ಮಾನೆಸ್ತ್ ವಾಲ್ಟರ್ ಡಿ’ಸೋಜಾ ಜೆರಿಮೆರಿ ಹ್ಯಾ ಸಂದರ್ಬಾರ್ ವೆದಿರ್ ಹಾಜರ್ ಆಸ್ಲೆ.
ವಕೀಲ್ ಮಾನೆಸ್ತ್ ಪಿಯೂಸ್ ವಾಸ್ ಹಾಣಿ “ಮುಂಬಯಿ ಥಾವ್ನ್ ಗುಜರಾತ್‌ – ಕೇರಳ ಪರ್ಯಾಂತ್ ಕೊಂಕಣಿ ಉಲಂವ್ಚೊ ಲೋಕ್ ವಿಸ್ತಾರ್ಲಾ. ಆಮಿ ಕೊಂಕಣಿ ಆಮ್ಚ್ಯಾ ಆವಯ್ ಭಾಶೆಚೊ ಮೋಗ್ ಕರುಂಕ್ ಜಾಯ್. ಆಮ್ಚ್ಯಾ ಭುರ್ಗ್ಯಾಂಕ್ ಕೊಂಕಣಿ ಶಿಕೊಂಕ್ ಉತ್ತೇಜನ್ ದೀಂವ್ಕ್ ಜಾಯ್” ಮ್ಹಣ್ ಆಪ್ಲ್ಯಾ ಸಂದೇಶಾಂತ್ ಉಲೊ ದಿಲೊ.
“ಕೊಂಕಣಿ ಭಾಸ್ ಬೋವ್ ಗೋಡ್ ಭಾಸ್. ಕೊಂಕ್ಣೆಚಿ ಹೊ ಗೊಡ್ಸಾಣ್ ಪೊಸ್ಚೆ ಸಾಂಗಾತಾ, ಸಗ್ಳ್ಯಾಂ ಸಾಂಗಾತಾ ವಾಂಟುನ್ ಘೆಂವ್ಚೆಂ ಕಾಮ್‌ಯೀ ಜಾಂವ್ಕ್ ಜಾಯ್. ಆಮ್ಚ್ಯಾ ತರ್ನ್ಯಾ ಪಿಳ್ಗೆಕ್ ಕೊಂಕ್ಣಿ ಭಾಶೆವಿಶಿಂ ಸಮ್ಜಣಿ ದಿಂವ್ಚೆಂ ಕಾಮ್ ಆಮಿ ಕರುಂಕ್ ಜಾಯ್” ಮ್ಹಣ್ ಮಾನೆಸ್ತ್ ಜೋಸೆಫ್ ಡಿಸೋಜಾ ಹಾಣಿ ಆಪ್ಲಿ ಅಭಿಪ್ರಾಯ್ ವೆಕ್ತ್ ಕೆಲಿ.
ಕೊಂಕಣಿ ಭಾಷಾ ಮಂಡಳಾಚೊ ಅಧ್ಯಕ್ಷ್ ಮಾನೆಸ್ತ್ ಜಾನ್ ಡಿ’ಸಿಲ್ವಾ ಆಪ್ಲ್ಯಾ ಅಧ್ಯಕ್ಷೀಯ್ ಭಾಷಣಾಂತ್ ” ಆಜ್ ಆಮಿ ಕೊಂಕ್ಣಿ ಭಾಶೆಕ್ ರಾಷ್ಟೀಯ್ ಮಾನ್ಯತಾ ಮೆಳ್‌ಲ್ಲೊ ತೀಸ್ ವರ್ಸಾಂಚೊಂ ಸಂಭ್ರಮ್ ಮಾನಾಯ್ತಾಂವ್ ತಿ ವರ್ತ್ಯಾ ಖುಶೆಚಿ ಗಜಾಲ್. ಆಮ್ಚ್ಯಾ ಕೊಂಕ್ಣಿ ಭಾಶೆಕ್ ಮೆಳ್‌ಲ್ಲಿ ರಾಷ್ಟೀಯ್ ಮಾನ್ಯತಾ ಆನಿ ಆಮ್ಚಿ ಕೊಂಕ್ಣಿ ಭಾಸ್ ಉರವ್ನ್ ಘೆಂವ್ಚೆಂ ಕಾಮ್ ಜಾಂವ್ಕ್ ಜಾಯ್. ತಿ ಜವಾಬ್ದಾರಿ ಆಮ್ಕಾಂ ಸಗ್ಳ್ಯಾಂಕ್ ಬಾಂದ್ತಾ. ಆಮ್ಚ್ಯಾ ತರ್ನಾಟ್ಯಾಥಂಯ್ ಕೊಂಕ್ಣಿ ಭಾಶೆಚೊ ಮೋಗ್ ಆಮಿ ವೊಂಪಿಜೆ. ಭುರ್ಗ್ಯಾಂಕ್ ಅಸಲ್ಯಾ ಕಾರ್ಯಕ್ರಮಾಂನಿ ವಾಂಟೊ ಘೆಂವ್ಕ್ ಹುಮೆದ್ ಭರಿಜೆ, ತಾಂಕಾ ವೆದಿ ದೀಜೆ” ಮ್ಹಣಾಲೊ.
ಕಾರ್ಯಕ್ರಮಾಂತ್, ಭಾಷಾ ಮಂಡಳಾಚಿ ಕಾರ್ಯಕಾರಿ ಸಮಿತಿ ಸಾಂದೊ, ಸಮಾಜ್ ಸೇವಕಿ ಮಾನೆಸ್ತಿಣ್ ಬೆನೆಡಿಕ್ಟಾ ಬಿ.ರೆಬೆಲ್ಲೊ ಹಿಕಾ ಸನ್ಮಾನ್ ಕೆಲೊ.
ಸಾಂದೊ ಮಾನೆಸ್ತ್ ಪಾಸ್ಕಲ್ ಲೋಬೊ ಸಾಂಗಾತಾ ವ್ಹಡಾ ಸಂಕ್ಯಾನ್ ಕೊಂಕಣಿ ಭಾಷಿಕ್ ಹ್ಯಾ ಕಾರ್ಯಾಕ್ ಹಾಜರ್ ಆಸ್ಲೆ. ಸಾಂಸ್ಕೃತಿಕ್ ಕಾರ್ಯಕ್ರಮಾಚೊ ವಾಂಟೊ ಜಾವ್ನ್ ಸಾಂದೆ ಆನಿ ಭುರ್ಗ್ಯಾಂ ಥಾವ್ನ್ ನಾಚ್ ಆನಿ ಗಾಯನಾಂನಿ ಭರ್ಲಿಲಿಂ ವಿವಿದ್ ಕಾರ್ಯಕ್ರಮಾಂ ಸಾದರ್ ಜಾಲಿಂ.
ಮಾನೆಸ್ತ್ ಜಾನ್ ಡಿ’ಸಿಲ್ವಾ ಹಾಣಿ ಯೆವ್ಕಾರ್ ಮಾಗ್ಲೊ. ಮಾನೆಸ್ತ್ ಹೆನ್ರಿ ಲೋಬೊ, ಮಾನೆಸ್ತ್ ಆಲ್ಬರ್ಟ್ ಡಬ್ಲೂ .ಡಿ’ಸೋಜಾ, ಮಾನೆಸ್ತ್ ಟೋನಿ ಮಾರ್ಟಿನ್ ಹಾಣಿ ಸಯ್ರ್ಯಾಂಚಿಂ ಒಳಕ್ ಕರುನ್ ದಿಲಿ.
ಸಾಂಗಾತಿ ಖಜಾನ್ದಾರ್ ಮಾನೆಸ್ತ್ ಸಿರಿಲ್ ಕಾಸ್ತೆಲಿನೋ, ಕು| ಗ್ಲಾನ್ಸಿಟಾ ಫೆರ್ನಾಂಡಿಸ್, ಲೆವಿನ್ ಫೆರ್ನಾಂಡಿಸ್, ಪ್ರೀತೇಶ್ ಕಾಸ್ತೆಲಿನೋ, ರೆಷ್ಮಾ ಗೋವಿಯಾಸ್, ರೆನಿತಾ ಗೋವಿಯಾಸ್, ವೆರೊನಿಕಾ ಡಿಸೋಜಾ ಹಾಣಿ ಸಯ್ರ್ಯಾಂಕ್ ಫುಲಾಂತುರೆ ದೀವ್ನ್ ಮಾನ್ ಕೆಲೊ.
ವಲೇರಿಯಾ ಡಿಸೋಜಾ ಹಾಣಿ ಮಾನ್ ಪತ್ರ್ ವಾಚ್ಲೆಂ.
ಮಾನೆಸ್ತ್ ಲಿಯೋ ಫೆರ್ನಾಂಡಿಸ್ ಜೆರಿಮೆರಿ ಆನಿ ಮಾನೆಸ್ತ್ ಫ್ರಾನ್ಸಿಸ್ ಒಲಿವೆರಾ ಹಾಣಿ ಕಾರ್ಯೆಂ ಚಲವ್ನ್ ವ್ಹೆಲೆಂ.
ಮಾನೆಸ್ತ್ ಲಾರೆನ್ಸ್ ಡಿ’ಸೋಜಾ ಕಮಾನಿ ಹಾಣಿ ದಿನ್ವಾಸ್ ಪಾಟಯ್ಲೆ.
► ತಸ್ವೀರ‍್ಯೊ / ವರ್ದಿ : ರೋನ್ಸ್ ಬಂಟ್ವಾಳ್, ಮುಂಬಯ್
