ಮಾಂಯ್ಚೊ ಪಾಲೊಂವ್ – ಕ್ರಿಸ್ ಬೆನ್ ಮ್ಯೂಸಿಕ್ ಯೂಟ್ಯೂಬ್ ಜಾಳಿ ಜಾಗ್ಯಾರ್ ಮೊಕ್ಳಿಕ್

ಕ್ರಿಸ್ ಬೆನ್ ಮ್ಯೂಸಿಕ್ ಹಾಂಚೊ ನವೊ ಸಂಗೀತ್ ವೀಡಿಯೊ ” ಮಾಂಯ್ಚೊ ಪಾಲೊಂವ್” ಕ್ರಿಸ್ ಬೆನ್ ಮ್ಯೂಸಿಕ್ ಯೂಟ್ಯೂಬ್ ಜಾಳಿ ಜಾಗ್ಯಾರ್ ಜುಲಾಯ್ ಚ್ಯಾ 24 ತಾರಿಕೆರ್ ಮೊಕ್ಳಿಕ್ ಜಾಲೊ. ಹಾಚೆಂ ಉಗ್ತಾವಣ್ ಕೊರ್ಡೆಲ್ ಫಿರ್ಗಜಿಚ್ಯಾ ಮಿನಿ ಹೊಲಾಂತ್ ಪೊಯೆಟಿಕಾ ಕವಿಗೋಷ್ಟಿ- 7 ಸಂಗಿಂ ಜಾಲೆಂ.

ಕ್ರಿಸ್ ಬೆನ್ ಮ್ಯೂಸಿಕ್ ಹಾಚೊ ಗುರ್ಕಾರ್ ಕ್ರಿಸ್ಟೊಫರ್ ರೋಶನ್ ಲೋಬೊ ಹಾಣೆಂ ಸಯ್ರ್ಯಾಂಕ್ ಸ್ವಾಗತ್ ಕೆಲೊ. ನಾಮ್ಣೆಚೊ ಕವಿ ಆನಿಂ ಪದಾಂ ಘಡ್ಣಾರ್ ಲೋಯ್ಡ್ ರೇಗೊನ್ ಪದಾವಿಶಿಂ ಪ್ರಸ್ತಾವನ್ ಕೆಲೆಂ. ಕೊರ್ಡೆಲ್ ಫಿರ್ಗಜೆಚೊ ವಿಗಾರ್ ಮಾ. ಬಾಪ್ ಕ್ಲಿಫರ್ಡ್ ಫೆರ್ನಾಂಡಿಸ್ ಹಾಣಿಂ ವೀಡಿಯೊಚೆಂ ಉಗ್ತಾವಣ್ ಕೆಲೆಂ.

ಕೊಂಕ್ಣಿ ಸಂಗೀತ್ ಕ್ಯಾಸೆಟ್, ಸಿಡಿ ಯುಗಾ ಥಾವ್ನ್ ಯೂಟ್ಯೂಬ್ ಯುಗಾಕ್ ವೆತಾಸ್ತಾನಾ ನವಿಂ ಕೊಂಕ್ಣಿ ಪದಾಂ ಲೋಕಾರ್ಪಣ್ ಕರುಂಕ್ ಆಸ್ಚಿ ಮಿನತ್ ಆನಿಂ ಖರ್ಚ್ ಹ್ಯಾ ವಿಶಿಂ ಲೋಯ್ಡ್ ರೇಗೊನ್ ಅಭಿಪ್ರಾಯ್ ಉಚಾರ್ಲಿ.   ಯೂಟ್ಯೂಬಾರ್ ಪದಾಂ ಪ್ರಸಾರುಂಕ್ ಆಸ್ಚೊ ಖರ್ಚ್ ಪಳೆವ್ನ್ ಜಾಯ್ತ್ಯಾಂಚಿ ಉಮೆದ್ ನಿವ್ಲಿ ಆನಿಂ ಜಾಯ್ತೆ ಜಣ್ ನಿರಾಶಿ ಜಾಲೆ. ತರೀ ತ್ಯಾ ಮಧೆಂಯ್ ಥೊಡೆ ಫುಲೊನ್ ಆಯ್ಲೆ. ಅಶೆಂ ನಿರಾಶಿ ಜಾಲ್ಲ್ಯಾಂ ಪಯ್ಕಿ ಆಪುಣ್ ಎಕ್ಲೊ ಆನಿಂ ಫುಲೊನ್ ಆಯಿಲ್ಲ್ಯಾಂ ಪಯ್ಕಿ ಕ್ರಿಸ್ತೊಫರ್ ಎಕ್ಲೊ, ಅಶೆಂ ಮ್ಹಣಾಲೊ ಲೋಯ್ಡ್. ಏಕೇಕ್ ಪದ್ ಲೋಕಾ ಪರ್ಯಾಂತ್ ಪಾವಂವ್ಚೆಂ ತಿತ್ಲೆಂ ಸಲೀಸ್ ನ್ಹಂಯ್. ತರೀ ಕ್ರಿಸ್ಟೊಫರ್ ಕಿತೆಂಚ್ ಕಾವ್ಜೆನಾಸ್ತಾನಾ ನವಿಂ ಪದಾಂ ಕಾಡ್ಚೆಂ ಸಾಹಸ್ ಕರುನ್ ಆಸಾ. ಖರ್ಚ್ ಆಸ್ಲ್ಯಾರೀ ಉಂಚ್ಲೊ ದರ್ಜೊ ಸಾಂಬಾಳುಂಕ್ ತೊ ದಾಕ್ಶೆನಾ. ಪದಾಚ್ಯಾ ಸಾಹಿತ್ಯ ವಿಶಿಂ ಲೋಯ್ಡ್ ಥೊಡಿಂ ಉತ್ರಾಂ ಉಲಯ್ಲೊ ತಶೆಂಚ್ ಪದಾಂತ್ಲ್ಯಾ ಸರ್ವ್ ಕಲಾಕಾರಾಂಕ್ ಅಭಿನಂದನ್ ಪಾಟಯ್ಲೆಂ. ಆಪ್ಣೆಂ ಜೊಡ್ ಲ್ಲ್ಯಾಂತ್ಲೆಂ ಉರವ್ನ್ ಪದಾಂ ಲೋಕಾರ್ಪಣ್ ಕರ್ಚ್ಯಾ ಕ್ರಿಸ್ಟೊಫರಾಕ್ ಅಭಿನಂದನ್ ಪಾಟಯ್ಲೆಂ ಆನಿಂ ತಾಕಾ ಬೊರೆಂ ಮಾಗ್ಲೆಂ. ಪ್ರಕ್ರತಿ, ಮಾಂಯ್ ಅಸಲ್ಯಾ ಲಿಸಾಂವಾಭರಿತ್ ವಿಶಯಾಂಚೆರ್ ಪದಾಂ ಬರಂವ್ಚಿ ಗರ್ಜ್ ಆಸಾ, ಫುಡೆಂಯ್ ಅಸಲಿಂ ಪದಾಂ ಯೇಂವ್ದಿತ್ ಮ್ಹಣ್ ಬರೆಂ ಮಾಗ್ಲೆಂ.

ಮಾಂಯ್ಚೊ ಪಾಲೊಂವ್  ಪದಾ ಪಾಟ್ಲ್ಯಾನ್ ಹಾತ್ ಮೆಳಯಿಲ್ಲ್ಯಾಚಿಂ ನಾಂವಾಂ ಹ್ಯಾ ಪರಿಂ ಆಸಾತ್ : ಉತ್ರಾಂ ಲಿಖ್ಲ್ಯಾಂತ್- ಕ್ರಿಸ್ಟೊಫರ್ ರೋಶನ್ ಲೋಬೊ. ತಾಳೊ ಆನಿಂ ಸಂಗೀತ್ ಸಜವ್ಣಿ- ರೋಶನ್ ಡಿಸೋಜಾ ಆಂಜೆಲೋರ್ ಗಾಯ್ಲಾಂ- ಪ್ರಜೋತ್ ಡೆ’ಸಾ ಗಾಯಾನಾಂತ್ ಸಾಂಗಾತ್ – ಶಿಲ್ಪ ಕುಟಿನ್ಹಾ ಆನಿಂ ಮೀರಾ ಕ್ರಾಸ್ತಾ ಮಿಕ್ಸಿಂಗ್ ಆನಿಂ ಮಾಸ್ಟರಿಂಗ್- ನಿತಿನ್ ಕುಟ್ಟುಂಗಲ್, ಎರ್ನಾಕುಲಂ ವೀಡಿಯೊಚಿ ಕಾಣಿ ಆನಿಂ ದಿಗ್ದರ್ಶನ್- ವಿಜಯ್ ಶೋಭರಾಜ್ ಪಾವೂರ್ ನಟನ್ – ವಯೊಲೆಟ್ ಆಗ್ನೆಸ್ ಡಿಸೋಜಾ, ರಾಧಾಕ್ರಷ್ಣ ಕುಂಬ್ಳೆ, ಮಾಸ್ಟರ್ ಭಾರ್ಗವ್ ಕ್ರಷ್ಣ, ಹೆರ ಪಿಂಟೊ, ಲೋಯ್ಡ್ ಡೆನ್ಜಿಲ್, ಮಾಸ್ಟರ್ ಸ್ನಿತಿಕ್ ಸ್ಕ್ರೀನ್ ಪ್ಲೇ ಆನಿಂ ಸಹಾಯಕ್ ದಿಗ್ದರ್ಶನ್- ಚರಿತ್ ಕುಂಪಲ , ಆರವ್ ಭಂಡಾರಿ, ದಿಗ್ದರ್ಶನ್ ವಿಭಾಗ್- ಶ್ರವಣ್ ರೈ, ಮಣಿ ಕುಂಬ್ಳ, ಶುಶಾಂತ್ ಡಿ ಓ ಪಿ- ಶ್ರೀನಾತ್ ಪವಾರ್

ಕ್ರಿಸ್ ಬೆನ್ ಮ್ಯೂಜಿಕ್ :

2020 ಇಸ್ವೆಂತ್ ಕ್ರಿಸ್ಟೊಫರ್ ರೋಶನ್ ಲೋಬೊ- ಕುಲ್ಶೇಕರ್/ ಬಾಹ್ರೆಯ್ನ್ ಹಾಣೆಂ ಹೆಂ ಯೂಟ್ಯೂಬ್ ಚಾನೆಲ್ ಘಡ್ಲೆಂ. ಎದೊಳ್ ಪರ್ಯಾಂತ್ ಮೊಕ್ಳಿಕ್ ಜಾಲ್ಲೆ ಪದಾಂಚೆ ವೀಡಿಯೊ ಹ್ಯಾ ಪರಿಂ ಆಸಾತ್. ಲೋಕ್ಡಾವ್ನ್ ಮೋಗ್- ಕ್ರಿಸ್ಟೊಫರ್ ರೋಶನ್ ಲೋಬೊ, ಯೋ ಮೊಗಾ- ಸೋನಿಯಾ ಶಿರ್ಸಾತ್,  ಪಯ್ಲೊ ಕುಮ್ಗಾರ್- ರೂಬೆನ್ ಲೋಬೊ, O Santa Come – ಜ್ಯಾಕ್ಲಿನ್ ಫೆರ್ನಾಂಡಿಸ್ ಆನಿಂ ಎಲ್ಟನ್ ನಜ್ರೆತ್, ಯೇ ನಾರಿ- ನಿಹಾಲ್ ತಾವ್ರೊ , ಶೀತಳ್ ವ್ಹಾ ರ‍್ಯಾ- ಕೇರನ್ ಕ್ರಾಸ್ತಾ, ಬಿರ್ಬಿರೊ ಪಾವ್ಸ್- ಶಿಲ್ಪ ಕುಟಿನ್ಹಾ ಆನಿಂ ರಯ್ನಲ್ ಸಿಕ್ವೇರಾ, ಮಾಂಯ್ಚೊ ಪಾಲೊಂವ್- ಪ್ರಜೋತ್ ಡೆ’ಸಾ