ಪಾತಕ್, ಪವಿತ್ ಸಭಾ ಆನಿ ಸಯ್ತಾನ್

ಆದಾ೦ವ್ ಆನಿ ಏವೆನ್ ಆದಾರ್ಲೆಲೆ೦ ಪಾತಕ್ “ಪಯ್ಲೆ೦ ಪಾತಾಕ್” (original sin) ಜಾ೦ವ್ಕ್ ಪಾವ್ಲೆ೦.  ಹ್ಯಾ ಮೂಳಾವ್ಯಾ ಪಾತ್ಕಾ ಥಾವ್ನ್ ಸುಟ್ಕಾ ಆಮ್ಕಾ೦ ಪವಿತ್ರ್ ಸಭೆನ್ ಬಾವ್ತಿಜ್ಮಾ ರುಪಾರ್ ಸಾಕ್ರಾಮೆ೦ತ್ ಜಾವ್ನ್ ದಿಲ್ಯಾ. ಬಾವ್ತಿಜ್ಮಾ ಥಾವ್ನ್ ಮ್ಹಜೆಂ ಪಯ್ಲೆ೦ ಪಾತಕ್ ನಿವಾರ್ಲೆ೦ ತರ್, ಹಾ೦ವೆ೦ ಕಿತ್ಯಾಕ್ ದುಸ್ರ್ಯಾ ಪಾತ್ಕಾ೦ ವಿಶ್ಯಾ೦ತ್ ಖಂತ್ ಕರಿಜಾಯ್? ಕುಮ್ಸಾರ್ ಕರುನ್ ಪ್ರಾಚಿತ್ ಕರಿಜಾಯ್? ಮೀಸ್ ರಜಾರ್ ಕರಿಜಾಯ್? ವಾ೦ಜೆಲ್ ವಾಚಿಜಾಯ್? ಇತ್ಲೆ೦ ಕೆಲ್ಯಾ ಉಪ್ರಾ೦ತೀ ಮ್ಹಜ್ಯಾ ಮರ್ಣಾ ಉಪ್ರಾ೦ತ್ ದೆವಾಚಾ ಘರಾ ಮ್ಹಾಕಾ ಆಕ್ರೇಚೆಂ ನ್ಹಾಣ್ ನಾ೦ವ್ಕ್ ಆಸಾ, ತಿರ್ಮಾನಾಚೊ-  ಝಡ್ತಿಚೊ ದೀಸ್ (judgement day) ಆಸಾ ತರ್ . . .  ಜೀವಂತ್ ಆಸ್ತಾನಾ ಜ್ಯೆ೦ ಹಾ೦ವೆ೦ ಕೆಲ್ಲೆ೦ ಪೂರಾ ಉದ್ಕಾ೦ತ್ ವ್ಹಾಳೊನ್ ಗೆಲೆ೦?

ಪಾತಕ್ ಮ್ಹಳ್ಯಾರ್ ಕಿತೆ೦? ಸೈತಾನ್ ಕೋಣ್ ?  ಆನಿ  ಪವಿತ್ರ್ ಸಭಾ  ಹ್ಯಾ ವಿಶ್ಯಾ೦ತ್ ಕಿತೆ೦ ಸಾ೦ಗ್ತಾ?

ಜಾಯ್ ಮ್ಹಣ್, ಮನಃಪೂರ್ವಕಿ ಕೆಲ್ಲಿ ಕರ್ನಿ ಯಾ ಚಿಂತಾಪ್ ದೆವಾ ವಿರೋದ್ ವೆತಾ ಜಾಲ್ಲ್ಯಾನ್ ತಾಕಾ ಪಾತಾಕ್ ಮ್ಹಣ್ತಾತ್. ಫಕತ್ ಖುನ್, ವ್ಯಭಿಚಾರ್ ಯಾ ಚೊರಿ ಪಾತಕ್ ನಯ್, ಬಗಾರ್ ಗರ್ವ್, ಮೊಸೊರ್, ಖಂತ್ ಸಯ್ತ್ ಪಾತಕ್ ಜಾವ್ನಾಸಾ. ಕರು೦ಕ್ ನಜೊ ಆಸ್‌ಲ್ಲೆಂ ಕೆಲ್ಯಾರ್ ಪಾತಕ್ ಜಾತಾ – ಸಾಕರ್ಣಿ( sin of commission), ಆನಿ ಕರು೦ಕ್ ಜಾಯ್ ಆಸ್‌ಲ್ಲೆಂ ಕರಿನಾತ್ಲ್ಯಾರ್‌ಯೀ ಪಾತಕ್ ಜಾತಾ – ನಾಕರ್ಣಿ (sin of omission). ಪವಿತ್ ವಾ೦ಜೆಲಾ೦ತ್ ಹ್ಯಾ ವಿಶ್ಯಾ೦ತ್ ವಿವರಣ್ ಆಸಾ :

“ಹಾ೦ವ್ ಮ್ಹಜ್ಯಾ ಜಲ್ಮಾ ಥಾವ್ನ್೦ಚ್ ಪಾತ್ಕಿ. ಆವಯ್ನ್ ಮ್ಹಾಕಾ ಗರ್ಭ್ ಘೆತ್‌ಲ್ಲ್ಯಾ ಘಡ್ಯೆ ಥಾವ್ನ್ ಹಾ೦ವ್ ಪಾತ್ಕಾ೦ನಿ ಭರ್ಲಾ೦”( ಕೀರ್ತನ್:51:5), “ಕಾಳಿಜ್ ಘಾತ್ಕಿ ಜಾವ್ನಾಸೊನ್ ಬುರ್ಶೆ೦ಪಣಾನ್ ಭರ್ಲಾ೦” ( ಜೆರೆಮಾಯ್:17:9 ), “ಸರ್ವ್ ಪಾತಕ್ ಕರುನ್ ದೆವಾಚಾ ಮಹಿಮೆ ಥಾವ್ನ್ ಪಯ್ಸ್ ಸರ್ಲ್ಯಾತ್”( ರೊಮಗಾರಾ೦ಕ್:3:23).

ಆತಾಂ, ಪಾತ್ಕಾ೦ಕ್ ದೋನ್ ಥರಾನ್ ಪಳೆವ್ಯೆತ್ ಯಾ ವಾಂಟೆ ಕರ್ಯೆತ್. ಸಭಾರ್ ಪಾತ್ಕಾ೦ ಆಸ್ಲ್ಯಾರೀ, ತಿ೦ ಹ್ಯಾ ದೋನ್ ಪಾತ್ಕಾ೦ ವಾಂಟ್ಯಾಂನಿ ಲಾಗು ಜಾತಾತ್. ಪಯ್ಲೆಂ –  ಉತ್ತೇಜಿತ್ ಪಾತಕ್ (sin of impulse) ಆನಿ ದುಸ್ರೆಂ  – ಕಾಳ್ಜಾಚೆ೦ ಪಾತಕ್ (sin of the heart).

ಉತ್ತೇಜಿತ್ (ಪ್ರಚೋದಿತ್,ಆವೇಶಿತ್) ಪಾತಕ್:

ಹೆ೦ ಪಾತಕ್ ಚಡಾವತ್ ಜಾವ್ನ್ ಮತಿ೦ತ್ ಚಿ೦ತಾನಾ (ಪಾತ್ಕಾ ವಿಶ್ಯಾ೦ತ್) ಯೆ೦ವ್ಚೆ೦ ಪಾತಕ್ ಜಾವ್ನಾಸಾ. ದಾಕ್ಲ್ಯಾಕ್: “ಹಾ೦ವ್ ಕಿತೆ೦ ತರೀ ಪಳೆತಾ೦”, “ಮ್ಹಾಕಾ ತೆ೦ ಜಾಯ್”,  “ದೆಖುನ್ ಹಾ೦ವ್ ಕಾಣ್ಘೆತಾ೦”. ಆಪ್ಣಾ೦ವ್ಕ್, ಹಕ್ಕ್ ಚಲ೦ವ್ಕ್ ಯಾ ನಾಸ್ ಕರು೦ಕ್ ಚಿ೦ತ್ಚೆಂ ಚಿತಾ೦ಪ್, ವ್ಯಭಿಚಾರ್, ಖುನ್, ಚೊರಿ, ಪಾಡ್ ಸವಯೊ ಯಾ ವಿಪ್ರೀತ್ ರಾಗಾ ಥ೦ಯ್ ಬದ್ಲೊನ್ ಉತ್ತೇಜಿತ್ ಪಾತಕ್ ಜಾತಾ. ಹೆ೦ ಪಾತಕ್ ಚಡಾವತ್ ಜಾವ್ನ್ ಭಾವಾನಾತ್ಮಕ್ ಚಿ೦ತ್ಪಾ೦ ಥಾವ್ನ್ ಉದೆತಾ. ಭೊಗ್ಣಾಂ ಆಮ್ಚೆರ್ ಅಧಿಕಾರ್ ಚಲಯ್ತಾನಾ ಆಮಿ ಉತ್ತೇಜಿತ್ ಪಾತ್ಕಾ೦ತ್ ಪಡ್ತಾ೦ವ್.

ಕಾಳ್ಜಾಚೆ೦ ಪಾತಾಕ್:

ಹಾಕಾ ಆದ್ಯಾತ್ಮಿಕ್( spiritual ) ಪಾತಕ್ ಮ್ಹಣ್ತಾತ್. ಹೆ೦ ಆಮ್ಕಾ೦ ಭಾಯ್ರ್ ಥಾವ್ನ್ ದಿಸಾನಾ ( ದಾಕ್ಲ್ಯಾಕ್ : ಚೊರಿ ಕರ್ಚೆ೦ ಮನ್), ಪೂಣ್ ಕಾಳ್ಜಾ೦ತ್ ಪಾಳಾ೦ ಘೆತಾ. ಸ್ವಾರ್ಥ್, ಗರ್ವ್, ಮೊಸೊರ್, ದಗಲ್ಬಾಜಿ ಇತ್ಯಾದಿ ಶಾರೀರಿಕ್ ಥರಾನ್ ದಿಸಾನಾ೦ತ್ ತರೀ, ಆತ್ಮ್ಯಾಚೆರ್ ಜಾಳ್ ಚಲಯ್ತಾತ್. ಕಥೊಲಿಕ್ ಸಭಾ ಗರ್ವ್ (pride) ಹೆರ್ ಪಾತ್ಕಾ೦ಚ್ಯಾಕೀ ಚಡ್ ಆಪಾಯಾಚೆ೦ ಮ್ಹಣ್ ಚಿ೦ತ್ತಾ. ಸಾಮಾಜಿಕ್ ನದ್ರೆಂತ್ ಪಳೆಲ್ಯಾರ್ ಗರ್ವ್ (pride) ಏಕ್ ಸಕಾರಾತ್ಮಾಕ್ ಗೂಣ್ ಜಾವ್ನಾಸಾ. “ತುಜೆರ್ ತೂ೦ ಗರ್ವ್ ದವರ್”, “ತೂ೦ ಕುಟ್ಮಾಚೊ ಗರ್ವ್”, ಇತ್ಯಾದಿ. ಆಪ್ಣಾಚೆರ್ ಆತ್ಮ್ ವಿಶ್ವಾಸ್ ದವರುನ್ ಕಾಮ್ ಕರ್ಚೆ೦, ಜಿಯೆ೦ವ್ಚೆ ಪಾಡ್ ನ೦ಯ್!  ಪೂಣ್ ಸ್ವಾರ್ಥಾನ್ ಭರೊನ್ ತೆಂ ಕೆಲ್ಯಾರ್ ಪಾತಕ್ ಜಾತಾ. ಸಕ್ಕಡ್ ಮ್ಹಜೆ೦ – ಮ್ಹಾಕಾ – ಮ್ಹಜೆ ಖಾತಿರ್ – ಮ್ಹಜೆ ವರ್ವಿ೦ – ಮ್ಹಜೆ೦ ಸುಖ್- ಮ್ಹಜೊ ಅಧಿಕಾರ್ . . .  ಇತ್ಯಾದಿ ಮತಿ೦ತ್ ಆನಿ ಕಾಳ್ಜಾ೦ತ್ ಜಲ್ಮೊನ್ ದೆವಾ ಥಾವ್ನ್  ಪಯ್ಸ್  ವೆಚೆ೦ ಕಾಳ್ಜಾಚೆ೦ ಪಾತಕ್ ಜಾತಾ. “ಹಾ೦ವ್” ಹ್ಯಾ ಪ೦ಗ್ಡಾ೦ತ್ ಪ್ರಮುಖ್ ಪಾತ್ರ್ ಖೆಳ್ತಾ.

ಜೆಜು, ಪಾತಕ್ ಆಧಾರಿನಾಸ್ತಾನಾ – ಹ್ಯಾ ದೋನ್ ಪಾತ್ಕಾ೦ ಆಧಾರ್‌ಲ್ಲ್ಯಾಂ ಲೋಕಾ ಮಧೆ೦ ಜಿಯೆಲ್ಲೊ. ತಾಚ್ಯಾ ಕಾಳಾಚಾ ಧಾರ್ಮಿಕ್ ಮುಕೆಲ್ಯಾಂನಿ ವ್ಯಭಿಚಾರಿ೦ಕ್, ಸು೦ಕ್ ಜಮಾ೦ವ್ಚಾ೦ಕ್, ಬೆಬ್ದ್ಯಾ೦ಕ್ ಆನಿ ಹೆರ್ ಲೊಕಾ೦ಕ್ “ಪಾತ್ಕಿ” ಮ್ಹಣ್ ವೊಲಾಯಿಲ್ಲೆ೦. ಪೂಣ್ ಕಾಳ್ಜಾಚೆ೦ ಪಾತಕ್ ಆಧಾರುನ್ ಜಿಯೆ೦ವ್ಚೆ “ಫಾರಿಜೆವ್” ಧಾರ್ಮಿಕ್ ಮುಖೆಲಿ  ಜಾವ್ನಾಸುಲ್ಲೆ. ಜೆಜುನ್ ಹಾ೦ಕಾ “ಚುನೊ ಕಾಡ್ಲೊಲೊ ಫೊ೦ಡ್, ಭಾಯ್ಲ್ಯಾನ್ ಸೊಭಿತ್ ಪೂಣ್ ಭಿತರ್ಲ್ಯಾನ್ ಹಾಡಾ೦” ಮ್ಹಣ್ ಆಪಯಿಲ್ಲೆ೦ (ಮಾತೆವ್: 23:27). ಫಾರಿಜೆವ್ ಆಪ್ಣಾಕ್‌ಚ್ ಪವಿತ್ರ್ ದಿಸೊ೦ಕ್ ಪಳೆತಾಲೆ ಶಿವಾಯ್ ಪವಿತ್ರ್  ನಯ್ ಆಸ್‌ಲ್ಲೆ. ಚಾರ್ ಶುಭ್ ವಾರ್ತಾ( ಮಾತೆವ್, ಮಾರ್ಕ್, ಲೂಕ್ ಆನಿ ಜುವಾ೦ವ್) ವಾಚ್ತಾನಾ ಆಮ್ಕಾ೦ ಕಳಿತ್ ಜಾತಾ ಕೀ ಜೆಜು ಆಧ್ಯಾತ್ಮಿಕ್ ಪಾತಕ್ ಕೆಲ್ಲ್ಯಾ ಲೊಕಾ ವಿರೋಧ್ ಕಟಿಣಾಯೆನ್ ಉಲಯಿಲ್ಲೊ, ರಾಗಾರ್ ಜಾಲ್ಲೊ.

ಪಾತ್ಕಾಂಚೆ೦ ತುಲನ್ :

ಚರಿತ್ರೆನ್ ಪಾತ್ಕಾಕ್ ವಿವಿಧ್ ರುಪಾಂನಿ ಪಳಯ್ಲಾಂ, ತುಲನ್ ಕೆಲಾ೦. ಥೊಡಿ೦ ಪಾತ್ಕಾ೦ ಇತ್ಲ್ಲಿ೦ ಭುರ್ಶಿ೦ಗೀ, ತಾ೦ಚೆ ವಿಶ್ಯಾ೦ತ್ ಉಲ೦ವ್ಚೆ೦ ಬರೆ೦ ಲಾಗಾನಾ. ಆನಿ ಥೊಡಿ೦ ಪಾತ್ಕಾ೦ ಖಾ೦ದೆ ಹಾಲವ್ನ್ ಮ್ಹಾಕಾ ಪಡೊ೦ಕ್ ವಚೊ೦ಕ್ ನಾ೦ ಮ್ಹಳ್ಳೆ ಬರಿ ವಾರ‍್ಯಾರ್ ಸೊಡ್ಲ್ಯಾ೦ತ್. ಪೂಣ್ ಪವಿತ್ರ್ ಸಭೆನ್ ಪಾತ್ಕಾ ವಿಶ್ಯಾ೦ತ್  ವಿಶ್ಲೇಶಣ್ ಕರುನ್ ದೋನ್ ವಾಂಟೆ – ಮಹಾ ಪಾತಕ್ ( mortal sin ) ಆನಿ ಊ೦ ಪಾತಾಕ್( venial sin ) – ಆಸೆ೦ ಮ್ಹಣ್ ನಾ೦ವಾ೦ ದಿಲ್ಯಾಂತ್.

ವಾ೦ಜೆಲ್ ಥೊಡಿ೦ ಪಾತ್ಕಾ೦ ಕೆಲ್ಲ್ಯಾರ್ ಚಡ್ ಪರಿಣಾಮ್, ಆನಿ ಥೊಡಿ೦ ಪಾತ್ಕಾ೦ ಕೆಲ್ಲ್ಯಾರ್ ಉಣೊ ಪರಿಣಾಮ್ ದಿತಾ ಮ್ಹಣ್ ವಿಶ್ಲೇಶಣ್ ಕರ್ತಾ ಜಾಲ್ಲ್ಯಾರೀ, ದೊನೀ ಪಾತ್ಕಾ೦ ಮನ್ಶ್ಯಾಚಾ ಆತ್ಮ್ಯಾಕ್ ದೆವಾ ಥಾವ್ನ್ ಪಯ್ಸ್ ವರ್ತಾತ್ ಮ್ಹಣ್ ಪವಿತ್ರ್ ಸಭಾ ಶೆರ್ಮಾ೦ವ್ ದಿತಾ. ಪಾತ್ಕಾ೦ತ್ ಡಿಗ್ರಿ ನಾ೦, 100%  ಯಾ  99.9%  ಮ್ಹಣ್ ನಾ೦. ಪಾತಕ್ ಲ್ಹಾನ್ ಯಾ ವ್ಹಡ್, ಪಾತಕ್‌ಚ್!

ಪೂಣ್ ದೇವ್ ಹರ್ಯೆಕ್ ಪಾತಕ್ ಸಮಾನ್ ರೀತಿನ್ ಪಳೆತಾಗೀ? ದಾವಿದ್ ರಾಯಾಕ್ ಪಳೆಯಾತ್. ಇಸ್ರೇಲಾಚೊ ಫಾಮಾದ್ ರಾಯ್ ತೊ ಜಾವ್ನಾಸ್‌ಲ್ಲೊ.  ಆಪ್ಲ್ಲ್ಯಾ ಅಧಿಕಾರಾಚಾ ಊ೦ಚಾಯೆಕ್ ಪಾವ್ತಾನಾ,  ತಾಚ್ಯಾ  ತಕ್ಲೆಂತ್, ಕಾಳ್ಜಾ೦ತ್ ಗರ್ವ್ ಚಡ್ಲೊ. “ಹಾ೦ವ್”, “ಮ್ಹಜೆ೦” ” ಮ್ಹಾಕಾ” ಮ್ಹಣ್ ತೊ ಚಿ೦ತಿಲಾಗ್ಲೊ. ಪಾತ್ಕಾ೦ತ್ ಪಡ್ಲೊ. ಪೂಣ್ ದೆವಾಕ್ ತೊ ಮೊಗಾಚೊ ಜಾವ್ನ್ ಕಸೊ ಉರ್ಲೊ? ಸಾಮಾಜಿಕ್ ನದ್ರೆನ್ ಪಳೆತಾನಾ ಹೊ ದಾವಿದ್ ಖೂಬ್ ಪಾತ್ಕಾಂ ಆದಾರುನ್, ಭೊಗ್ಸಾಣ್ಯಾಕ್ ನಾಫಾವೊ ತಸೆ೦ ದಿಸ್ಲ್ಯಾರೀ ದೆವಾನ್ ತಾಕಾ ಸಾ೦ಬಾಳ್ಳೊ. “ದೆವಾಚಾ ಕಾಳ್ಜಾಕ್ ಲಾಗ್ಸಿಲೊ ಮನಿಸ್” ಮ್ಹಣ್ ಪರ್ನ್ಯಾ ಸೊಲ್ಲ್ಯಾ೦ತ್ ಬರ‍ಯ್ಲಾಂ.

ಹರ್ಯೇಕ್ ಪಾತಕ್ ದೆವಾಕ್ ದುಕಯ್ತಾ ಮ್ಹಣ್ ವಾ೦ಜೆಲಾ೦ತ್ ಸಾ೦ಗ್ಲ್ಯಾರೀ, ಪಾತಕ್ ಹರ‍ೆಯೆಕಾ ಮನ್ಶ್ಯಾಚೆರ್ ವಿವಿಧ್ ಥರಾನ್ ಪರಿಣಾಮ್ ಘಾಲ್ತಾ. ಫಟಿ ಮಾರುನ್ ಕೆಲ್ಲೆ೦ ಪಾತಕ್, ಖುನಿ ಕರುನ್ ಕೆಲ್ಲ್ಯಾ ಪಾತ್ಕಾ ಮುಖಾರ್ ದೆವಾಚಾ ನದ್ರೆಂತ್ ವ್ಹಡ್ ದಿಸೊನ್ ಯೆತಾ, ಆಮ್ಚೆ೦ ಕಾನೂನೀ ವಿವಿಧ್ ಥರಾನ್ ಪಳೆವ್ನ್ ತ್ಯಾ ಪ್ರಕಾರ್ ಶಿಕ್ಶಾ ದಿತಾ.

ಪವಿತ್ರ್ ಸಭೆ೦ತ್  ಸಾತ್ ಮಾರೆಕಾರ್ ಪಾತ್ಕಾ೦ :

ಕಥೊಲಿಕ್ ಸಭಾ  ದೆವಾಚಾ  ಧಾ ಉಪದೇಸಾಂಚ್ಯಾ ವಿರೋಧ್ ವೆಚ್ಯಾ ಸಾತ್ ಪಾತ್ಕಾ೦ ವಿಶ್ಯಾ೦ತ್ ದಾಂಬೂನ್ ಸಾ೦ಗ್ತಾ. ಹ್ಯೊ ಸಾತ್ ಪಾಡ್ “ಸವಯೊ” ಮಾರೆಕಾರ್ ಮ್ಹಣ್ ವೊಲಯ್ತಾ. ಪಾಪ್ ಸಾಯ್ಭ್ ಗ್ರೆಗೊರಿ (Gregory the Great) ನ್ ಸವ್ಯಾ ಶತಮಾನಾ೦ತ್ ಹ್ಯಾ ಸಾತ್ ಪಾತ್ಕಾ೦ಚಿ ಪಟ್ಟಿ ಬರಯಿಲ್ಲಿ. ಆನಿ ತಿ ಅಶಿ ಆಸಾ –

(i) ಗರ್ವ್, ಘಮ೦ಡ್, ಅಹ೦ (Pride) : ಆಪ್ಣಾಚೊಚ್ ಮೋಗ್, ಸ್ವಾರ್ಥ್‌ಪಣ್, ಆಪ್ಲ್ಯಾಚ್ ಸಕ್ತೆ೦ಚೆರ್, ಆನಿ ತಾಲೆ೦ತಾಚೆರ್ ಖೂಬ್ ಭರ್ವಸೊ ದವರ್ತಾನಾ ಗರ್ವ್ ಜಲ್ಮಾತಾ. ಹೆ೦ ಪೊಕಾಳ್‌ಪಣ್ (vanity = ಆಪುಣ್೦ಚ್ ಮಹಾನ್ ಮ್ಹಳ್ಳೆ೦ ವರ್ತನ್). ಆಮ್ಕಾ೦ಚ್ ಪಸ೦ದ್ ಕರ್ಚೆ೦ ಯಾ ಮೆಚ್ವೊ೦ವ್ಚೆ೦ ಪಾಡ್ ಯಾ ಪಾತಕ್ ನೈ೦, ಜಾಯ್ ಆಶ್ಚಿ ಆನಿ ಭಲಾಯ್ಕೆಚಿ ಕರ್ನಿ ಹಿ. ಪೂಣ್ ವಾಸ್ತವಿಕಾ ಥಾವ್ನ್ ಪಯ್ಸ್, ವಾರ‍್ಯಾರ್ ಉಭೊನ್ “ಹಾ೦ವ್ ಊ೦ಚ್”, “ಮ್ಹಜೆ೦” ಇತ್ತ್ಯಾದಿ ತಕ್ಲೆ೦ತ್ ಘುಸೊನ್ ಜಿಯೆಲ್ಯಾರ್ ತೆಂ ಪಾತ್ಕಾ ರುಪಾರ್ ಬದ್ಲಾತಾ. ಲಾಗ್ಶಿಲ್ಯಾನ್  ಪಳಯ್ತಾನಾ ಗರ್ವ್‌ಚ್ ಉರುಲ್ಲ್ಯಾ ಪಾತ್ಕಾ೦ಕ್ ಮೂಳ್ ಜಾವ್ನಾಸಾ.ತಕ್ಲೆ೦ತ್ ಆನಿ ಕಾಳ್ಜಾ೦ತ್ ಘಮ೦ಡ್ ರಾಜ್ ಕರ್ತಾನಾ, ಹೆರಾಂನಿ ಸಾ೦ಗ್ಚೆ೦ ಚೂಕ್, ಸಂಸಾರ್ ಉಲ್ಟೊ ಮ್ಹಣ್ ದಿಸ್ತಾ, ಗರ್ವ್ ಚಡ್ತಾ ಆನಿ ಫಟಿ , ಚುಕವ್ಣಿ, ನಿ೦ದಾ ಇತ್ತ್ಯಾದಿ ವರ್ತನ್ ಭಾಯ್ರ್ ಯೆತಾ.

ಸಾದೆ೦ಪಣ್, ಖಾಲ್ತೆಪಣ್ (humility)  ಹ್ಯಾ ಪಾತ್ಕಾಕ್ ಬರೆ೦ ವಕಾತ್. ಪವಿತ್ರ್ ಸಭಾ ಖಾಲ್ತೆ೦ಪಣ್ ದೆವಾಚೆ೦ ಬೆಸಾ೦ವ್ ಮ್ಹಣ್ ಪಾತ್ಯೆತಾ.

(ii) ಮೊಸೊರ್,ದ್ವೇಷ್ (Envy): ಹೆರಾ೦ಚೆ೦ ಸುಖ್, ಬರೆ೦ಪಣ್ ಯಾ ಸ೦ತೊಸ್ ಸೊಸುನ್ ವರು೦ಕ್ ಜಾಯ್ನಾತ್‌ಲ್ಲಿ ಸವಯ್‌ಚ್  ಮೊಸೊರ್ ಮ್ಹಳ್ಳೆ೦ ಪಾತಕ್. ಲೌಕಿಕ್ ಯಾ ಭೌತಿಕ್ (material)  ಆನಿ ಧಾರ್ಮಿಕ್ ಯಾ ಆಧ್ಯಾತ್ಮಿಕ್ (spiritual), ಆಸೆ೦ ದೋನ್ ಥರಾ೦ಚೊ ಮೊಸೊರ್ ಆಸಾ ಮ್ಹಣ್ ಪವಿತ್ರ್ ಸಭಾ ಸಾ೦ಗ್ತಾ. ಹೆರಾ೦ಚಾ ದುಡ್ವಾ , ತಾಲೆ೦ತ್, ಸೊಭಾಯ್, ಇಶ್ಟ್ ಇತ್ತ್ಯಾದಿಂಚೆರ್ ಕರ್ಚೊ ಮೊಸೊರ್ ಲೌಕಿಕ್. ಹೆರ್ ಆಧ್ಯಾತ್ಮಿಕ್ ಥರಾನ್ ಸ೦ತೊಸಾನ್ ಯಾ ಭಕ್ತಿಪಣಾನ್ ಜಿಯೆತಾನಾ ತಾ೦ಕಾ ಹಲ್ಕ್ ಕರುಂಕ್ ಪಳೆ೦ವ್ಚೊ ಮೊಸೊರ್ ಆಧ್ಯಾತ್ಮಿಕ್. ಲೌಕಿಕ್ ಮೊಸೊರ್ ಆದ್ಯ್ಹಾತ್ಮಿಕ್ ಮೊಸ್ರಾಚಾಕಿ ಚಡ್ ಪಾಡ್.

(iii) ಕಾಮುಕ್ಪಣ್ (Lust) : ಸ್ರೀಯಾ೦ಕ್, ಚಲಿಯಾ೦ಕ್ (ಆಜ್ ಕಾಲ್ ದಾದ್ಲ್ಯಾ೦ಕ್, ಚೆರ್ಕ್ಯಾ೦ಕ್) ಕಾಮುಕ್ಪಣಾಚಿ ವಸ್ತ್(sex object) ಮ್ಹಣ್ ಚಿ೦ತ್ಚೆ೦ ಪಾತಕ್ ಜಾವ್ನಾಸಾ. ಹೆರಾ೦ಚಾ ಸೊಭಾಯೆ ಥಂಯ್ ಆಕರ್ಶಿತ್ ಜಾ೦ವ್ಚೆ೦, ಯಾ ಹೆರಾ೦ಕ್ ಆಪ್ಣಾ  ಥಂಯ್ ಆಕರ್ಶಿತ್ ಕರ್ಚೆ೦ ಪಾತಕ್ ನೈ೦. ಪೂಣ್ ಕಾಮುಕ್ಪಣಾನ್ ಪಳೆವ್ನ್ ಚಲ೦ವ್ಚೆ೦ ಪಾತಕ್ ಜಾವ್ನಾಸಾ. ನಿಸ್ಕಳ್ಪಣ್ (chastity)  ಹ್ಯಾ ಪಾತ್ಕಾಚೆರ್ ಜಯ್ತ್ ವರು೦ಕ್ ವಕತ್.

(iv) ರಾಗ್ (Anger) : ಏಕಾಚ್ಹಾಣೆ ಭಾವಾನಾತ್ಮಾಕ್ ಜಾ೦ವ್ಚೆ೦, ದುಸ್ಮನ್ಕಾಯೆನ್ (hostlity) ಬದ್ಲಾ ಘೆ೦ವ್ಚಾ ವಿಶ್ಯಾ೦ತ್ ಚಿ೦ತ್ಚೆ೦ ಪಾತಕ್ ಜಾವ್ನಾಸಾ. ಕಿತ್ಯಾಕ್ ರಾಗ್ ಮ್ಹಳ್ಳ್ಯಾಚೆರ್ ಆಮ್ಕಾ೦ ನಿಯತ್ರ೦ಣ್ ನಾತ್ಲ್ಯಾರೀ, ರಾಗಾಚೆರ್ ಜರೂರ್ ಆಸಾ. ಸೊಸ್ಣಿಕಾಯ್ ರಾಗಾಕ್ ಸಲ್ವೊ೦ವ್ಕ್ ಬರೆ೦ ವಕಾತ್.

(v) ಖಾವ್ಗೆಪಣ್/ ಪೊಟಾರ್ದ್ಪಣ್ (Gluttony):  ಖಾ೦ವ್ಚ್ಯಾ  ಆನಿ ಪಿಯೆ೦ವ್ಚಾ ಥಂಯ್ ಚಡಿತ್ ಆಸಕ್ತ್ ಜಾಂವ್ಚೆ೦ ಪಾತಕ್. ರೂಚೀಕ್, ಫರ್ಮಳಿಕ್ ಜೆವಣ್ ಯಾ ಪೀವನ್ ಕರ್ಚೆ೦ ಪಾತಕ್ ನೈ೦, ಪೂಣ್ ಮನಃಪೂರ್ವಕ್ , ಜಾಯ್ ಜಾಲ್ಲ್ಯಾಚ್ಯಾಕೀ ಚಡ್ ಖಾವ್ನ್, ಪಿಯೆವ್ನ್ ಪೊಟಾಕ್ ವಾಡ೦ವ್ಚೆ ಯಾ ಪೊಸ್ಚೆ೦ ಪಾತಕ್ ಜಾವ್ನಾಸಾ.

ಉಪಾಸ್ ಕರುನ್ ಖಾಣಾಚೆರ್ ಚಡ್ ಜಾವ್ನ್ ಮೊಗಾಚಾ(ಆಜ್ ಕಾಲ್ ಜ೦ಕ್ ಫೂಡ್) ಖಾಣಾಚೆರ್ ನಿಯ೦ತ್ರಣ್ ಕೆಲ್ಯಾರ್ ಖಾವ್ಗೆಪಣಾಕ್ ಬೂದ್ ಶಿಕವ್ಯೆತ್.

(vi) ಅ೦ಗಲಾಪ್ (Greed) :  ಜಾಯ್ ಜಾಲ್ಲ್ಯಾಚ್ಯಾಕೀ ಚಡ್ತಿಕ್ ಆಪ್ಣಾ೦ವ್ಚ್ಯಾ ವಿಶ್ಯಾ೦ತ್ ಯೆ೦ವ್ಚೆ೦ ಚಿ೦ತಾಪ್ ಅ೦ಗಲಾಪಾ೦ತ್ ಬದ್ಲುನ್ ಆಮ್ಕಾ೦ ಪಾತ್ಕಾಕ್ ಲಾಯ್ತಾ. ರಾಗ್, ಮೊಸೊರ್ ಆನಿ ಕಾಮುಕ್ಪಣಾ ಉಪ್ರಾ೦ತ್ ಚಡಾವತ್ ಪಾತ್ಕಾ೦ ಅ೦ಗಲಾಪಾ ವರ್ವಿ೦ ಜಾತಾತ್.

(vii ಸುಸ್ತಿ/ಆಳ್ಸಾಯ್ (Sloth) :   ಹೆ೦ ಪಾತಕ್ ಚಡಾವತ್ ಜಾವ್ನ್ ಆಧ್ಯಾತ್ಮಿಕ್ ಜಿಣ್ಯೆ ಆನಿ ಮಾಗ್ಣೆ೦ ಕರ್ಚ್ಯಾಕ್ ಆಡಯ್ತಾ ( ದಾಕ್ಲ್ಯಾಕ್: ತೇರ್ಸ್, ಆಮೊರಿ ಇತ್ತ್ಯಾದಿ). ಹೆ೦ ಪಾತಕ್ ಕೂಡಿಕ್ ನಾಕಾ ಜಾಲ್ಯ್ಯಾರೀ ವಿಶೆವ್ ಘೆ೦ವ್ಚಾ೦ತ್ ಉತ್ತೆಜಿತ್ ಕರ್ತಾ. ದಕ್ಶಾತಾ  (deligence)  ಮ್ಹಳ್ಳ್ಯಾ ಶೆಗುಣಾಚಾ ಪಾಟ್ಲ್ಯಾನ್ ಧಾ೦ವ್ಲ್ಯಾರ್ ಸುಸ್ತೆಕ್ ಸಲ್ವಯೆತ್.

ಹ್ಯಾ ವಯ್ಲ್ಯಾ ಸಾತ್ ಮಾರೆಕಾರ್ ಪಾತ್ಕಾ೦ಚೆರ್ ಜಯ್ತ್ ವರು೦ಕ್ ಪವಿತ್ರ್ ಸಭಾ ಆಮ್ಕಾ೦, ಕಥೊಲಿಕಾ೦ಕ್ ಚತ್ರಾಯ್ ದಿತಾ. ಹ್ಯಾಚ್ ಕಾರಾಣಾಕ್  ಆಮಿ೦ ಮೂಳ್ ಪಾತ್ಯೆಣ್ಯೊ ಪಾಳು೦ಕ್ ಜಾಯ್.

ವಾ೦ಜೆಲ್ – ಪ್ರೇರಣಾಭರಿತ್, ಚೂಕಿ ನಾಸ್ತಾನಾ, ದೆವಾ ಥಾವ್ನ್ ಉಗ್ಡಾಪಣ್ ಜಾಲ್ಲೊ ಸಬ್ಧ್ (revealed word of God).

ಬಾವ್ತಿಜ್ಮ್ – ಮ್ಹಜ್ಯಾ ಕ್ರಿಸ್ತಾ೦ವ್‌ಪಣಾಚೆ೦ ಆರ೦ಭ್, ಸಾಲ್ವಾಸಾ೦ವ್ ಜೊಡು೦ಕ್ ಗರ್ಜೆಚೊ ಸಾಕ್ರಾಮೆ೦ತ್.

 ದೆವಾಚೆ ಧಾ ಉಪದೇಸ್  – ಕ್ರಿಸ್ತಾ೦ವ್ ಜಿಣಿ  ಜಿಯೆ೦ವ್ಕ್ ಸೂತ್ರಾ೦.

ತ್ರಿ೦ದಾದ್ – ಏಕಾ ದೆವಾ ಥಂಯ್ ತೀನ್ ವ್ಯಕ್ತಿ, ಬಾಪ್ – ಪೂತ್ – ಪವಿತ್ರ್ ಆತ್ಮೊ ಮ್ಹಳ್ಳಿ ಪಾತ್ಯೆಣಿ.

ಪವಿತ್ರ್ ಸಭೆಚೆ ಸ ಉಪದೇಸ್ – ಕಾಯ್ದ್ಯಾಭಾ೦ದ್ ಚಲೊನ್, ದಾನ್ ಕರುನ್, ಕರೆಜ್ಮಾಚೊ ಕಾಳ್ ಪಾಳುನ್ ಜಿಯೆ೦ವ್ಚೆ೦. ಬಾವಾಡ್ತಾಕ್ ಸಮ್ಜೊ೦ವ್ಚೆ೦ (knowing faith) ಪಯ್ಲೆಂ ಮೇಟ್, ಭಾವಾಡ್ತಾಕ್ ಮಾನ್ವೊ೦ವ್ಚೆ೦(accepting faith) ದುಸ್ರೆ೦ ಮೇಟ್ ಆನಿ ಭಾವಾಡ್ತಾನ್ ಜಿಯೆ೦ವ್ಚೆ೦ (practicing faith) ತಿಸ್ರೆ೦ ಮೇಟ್. ಹೆ೦ ತಿಸ್ರೆ೦ ಮೇಟ್ ಕಶ್ಟಾಂಚೆಂ, ಪೂಣ್ ಸರ್ಗಾಚಾ ದಾರಾ ಲಾಗಿ೦ ಪಾವೊ೦ಕ್ ಟಿಕೆಟ್ ಜಾವ್ನಾಸಾ.

ಕೋಣ್ ಹೊ ಸಯ್ತಾನ್ ?

ಸಯ್ತಾನ್ ಆನಿ ತಾಚೊ ಪ್ರಭಾವ್ ಆಸಾ ಮ್ಹಣ್ ಪರ್ನ್ಯಾ ತಸೆ೦ ನವ್ಯಾ ಸೊಲ್ಲ್ಯಾ೦ತ್ ಬರಯ್ಲಾಂ.  ಪೂಣ್ ಸತ್ ಕಿತೆ೦ಗೀ ಮ್ಹಳ್ಯಾರ್, ಸ೦ಸ್ರಾ೦ತ್ ಸಯ್ತಾನಾ ವಿಶ್ಯಾ೦ತ್ ಚಾಲೂ ಆಸ್ಚ್ಯೊ ಕಾಣ್ಯೊ, ತಾಚ್ಯಾ ವಿಶ್ಯಾ೦ತ್ ಆಯ್ಕೊ೦ಕ್ ಮೆಳ್ಚೆ೦ ವಾ೦ಜೆಲಾ ಥಾವ್ನ್ ನಂಯ್. ತಕ್ಲೆರ್ ಶಿ೦ಗಾ೦, ವಾ೦ಕ್ಡಿ ಶಿಮ್ಟಿ, ಪೆ೦ಕ್ಟಾ ಸಕ್ಲಾ ಬೊಕ್ರ್ಯಾಚಾ ಕೂಡಿನ್ ಆಮ್ಕಾ೦ ಚಿತ್ರಾಂನಿ ದಿಸ್ಚೊ ಸಯ್ತಾನ್ ಗ್ರೀಕಾಂಚೊಂ ದೇವ್ ಪ್ಯಾನ್(pan) ಜಾವ್ನಾಸಾ. ಹೆ೦ ಆಸೆ೦ ತರ್ ವಾ೦ಜೆಲಾ೦ತ್ ಸಾ೦ಗ್ಚೊ  ಸಯ್ತಾನ್ ಕೋಣ್?

ಸಯ್ತಾನ್ (satan) ಹೀಬ್ರೂ ನಾ೦ವಾ (SA-tan) ಥಾವ್ನ್ ಆಯ್ಲಾ೦. ಖರ‍್ಯಾ ಆರ್ಥಾನ್ “ಪ್ರತಿಸ್ಪರ್ಧಿ” ( adversary). ಸಯ್ತಾನಾಕ್ ಆಪ್ಲೆಂಚ್ ಮ್ಹಳ್ಳೆ೦ ನಾ೦ವ್ ನಾ೦. ಪೂಣ್ ಚರಿತ್ರಾ ವಾಡ್ತಾನಾ, ಪ್ರಗತಿ ಚಡ್ತಾನಾ, ಹೊ ಸಯ್ತಾನೀ ವಾಡೊನ್ ಆನಿ ಚಡೊನ್ ಯೆತಾ. ಹೀಬ್ರೂ ವಾ೦ಜೆಲಾ೦ತ್ ಸಯ್ತಾನ್ ಮ್ಹಳ್ಯಾರ್ ಏಕ್ ಸ್ಥಾನ್ (position) ಜಾವ್ನಾಸೊನ್ ವಯಕ್ತಿಕ್ ಪರಿಚಯ್ ಆಸಾ ನಾ. ವಾ೦ಜೆಲಾ೦ತ್ಲೆ ಹೆ ದಾಕ್ಲೆ ವಾಚ್ಲ್ಯಾರ್ ಕಳ್ತಾ.

1 ಸಾಮ್ವೆಲ್ 29:4 , 1 ರಾಯ್ 11:14,23 , 1 ಕೊರಿ೦ಥ್ 21:1 .

ಸಯ್ತಾನ್,  ಸರ್ಗಾರ್ ವಕೀಲ್( Devil’s Advocate) ಜಾವ್ನ್‌ಯೀ ಕಾಮ್ ಕರ್ತಾ. ಲೊಕಾಚಿ೦ ಪಾತ್ಕಾ೦ ದೆವಾ ಮುಕಾರ್ ವಾಚುನ್ ಸಾ೦ಗ್ತಾ” (ಕೀರ್ತನ್ 109:6), (ಜಕರಾಯ್ 3: 1-).ಪರ್ನ್ಯಾ ಸೊಲ್ಲ್ಯಾ೦ತ್ ವಿರೊಧಿ೦ಕ್ ಶಿಕ್ಶಾ ದಿ೦ವ್ಚಾ೦ತ್ ಸಯ್ತಾನ್ ಕುಮೊಕ್ ಕರ್ತಾ. ನವ್ಯಾ ಸೊಲ್ಲ್ಯಾ೦ತ್ ಹಾಚೊ ಪಾತ್ರ್ ವ್ಹಡಾ ಮ್ಹಾಪಾನ್ ದಿಸೊನ್ ಯೆತಾ. ದೆವಾ ವಿರೊಧ್ ವೆಚ್ಯಾ ಸಯ್ತಾನಾಕ್ ಸೊರೊಪ್, ಬೆಲಿಯಾಲ್ (Belial) , ಪಡ್ಲೊಲೊ ಆ೦ಜ್, ವಿರೊಧಿ, ದೆ೦ವ್ಚಾರ್, ಬೀಲ್ಜೆಬುಲ್  (Beelgebul)  ಇತ್ತ್ಯಾದಿ ನಾ೦ವಾಂನಿ ಉಲ್ಲೇಕ್ ಕೆಲಾ೦.

ಸಭಾರ್ ಪ೦ಡಿತ್ ಸಯ್ತಾನಾಚೊ ಪ್ರಭಾವ್ ಪರ್ಶಿಯನ್ ಧರ್ಮ್ “ಜೊರೊಸ್ಟ್ರೆಯ್ನಿಸ೦” (Zoroastrianism) ಥಾವ್ನ್ ಆಯ್ಲಾ ಮ್ಹಣ್ ಪಾತ್ಯೆತಾತ್. ಹೊ ಧರ್ಮ್ ಬರ‍್ಯಾ ಆನಿ ಪಾಡ್ ಮ್ಹಳ್ಳ್ಯಾ ದೋನ್ ಪ೦ಗ್ಡಾ೦ ಮಧೆ೦ ಸ೦ಸಾರಾಕ್ ಆಪ್ಲ್ಯಾ ಆಧೀನ್ ಕರು೦ಕ್ ಲಡಾಯ್ ಜಾವ್ನಾಸಾ ಮ್ಹಳ್ಳೆ ಬರಿ ಸಾ೦ಗ್ತಾ. ಪೂಣ್ ನವೊ ಸೊಲ್ಲೊ ಹಿಬ್ರೂ ವಾ೦ಜೆಲಾ ಬರಿ ಸಯ್ತಾನಾಕ್ ವಿ೦ಗಡ್‌ಚ್ ರಿತಿನ್ ಪಳೆತಾ. ಸಯ್ತಾನ್ ದೆವಾ ಬರಾಬರ್ ನಂಯ್, ಹಲ್ಕ್, ಕೀಳ್ ಜಾವ್ನಾಸಾ ಆನಿ ದೆವಾ ಮುಕಾರ್ ಸಲ್ವಾತಾ. ಪೂಣ್ ಸ೦ಸಾರಾರ್ “ಯಮ್ಕೊ೦ಡ್” ರಚಿತ್ ಕರ್ಚ್ಯಾಂತ್ ಆಪ್ಲೆಂ  ಪ್ರಯತನ್ ಕರುನು೦ಚ್ ಆಸಾ. (ಲೂಕ್ 22:31).

► ಉಬ್ಬ, ಮೂಡ್ ಬಿದ್ರಿ