ಭ್ರಶ್ಟಾಚಾರಾಚ್ಯಾ ಕಾಯ್ಲಿಥಾವ್ನ್ ಬೆಕಾರ್ಪಣಾಚ್ಯಾ ಉಜ್ಯಾಕ್ ?

ಪಾಟ್ಲ್ಯಾ ಪಂದ್ರಾ ದಿಸಾಂ ಥಾವ್ನ್ ಆಮ್ಚಾ ದೇಶಾಚೊ ಉತ್ತರೀ ಭಾಗ್ ಮ್ಹಳ್ಯಾರ್ ಉತ್ತರ್ ಪ್ರದೇಶ್, ಹರಿಯಣಾ, ಜಮ್ಮು, ಮಧ್ಯಪ್ರದೇಶ್, ಉತ್ತರಖಂಡ್, ಪ.ಬಂಗಾಲ್ ತಶೆಂ ಭಂವ್ತಣಿಚೆ ರಾಜ್ಯ್ ಹಿಂಸಾತ್ಮಕ್ ಕರ್ತುಂವಾಂನಿ ಥರ್ಥರ‍್ತಾತ್. ಉತ್ತರ್ ಪ್ರದೇಶಾಂತ್ ಬುಲ್‌ಡೋಜರ್ ವಾಪಾರುನ್ ಅನಧಿಕೃತ್ ಮ್ಹಣ್ ಬಾಂದ್ಪಾಂ ಧರ‍್ಣಿಕ್ ಸಮಾ ಕೆಲಿಂ ಆನಿ ವ್ಹಡ್ ಗಲಾಟೊ ಜಾಲೊ. ಸುಪ್ರೀಮ್ ಕೊಡ್ತಿನ್ ಉತ್ತರ್ ಪ್ರದೇಶ್ ಸರ್ಕಾರಾಕ್ ಬುಲ್‌ಡೋಜರ್ ಕಿತ್ಯಾಕ್ ಚಲಯ್ಲೊ ಆನಿ ತಾಚೆ ವರ್ವಿಂ ಕಿತೆಂ ಫಾಯ್ದೊ ಜಾಲೊ? ಕಾರಣ್ ದಾಖಯಾ ಮ್ಹಣ್ ನೋಟಿಸ್ ಧಾಡ್ಲಾಂ.

ಕಾಂಗ್ರೆಸ್ ಫುಡಾರಿ ರಾಹುಲ್ ಗಾಂಧಿಚಿ ತನ್ಕಿ ಇ.ಡಿ. ಪಾಟ್ಲ್ಯಾ ದಿಸಾಂ ಪಾಸುನ್ ಕರುನ್ ಆಸಾ ಆನಿ ಹಾಚೆ ವಿರೋಧ್ ಪ್ರತಿಭಟನ್ ಜಾವ್ನ್ ಕಾಂಗ್ರೆಸ್ ಸಮರ್ಥಕ್ ಸಗ್ಳ್ಯಾ ದೇಶಾಂತ್ ರಾಜಕೀ ಗಲಾಟೊ ಚಲವ್ನ್ ಆಸಾತ್.

ಜಮ್ಮು ಕಾಶ್ಮಿರಾಂತ್ ಆಡ್ತಿಗ್ 370 ಕಾಡ್ಲ್ಯಾ ಉಪ್ರಾಂತ್‌ಯಿ ಶಾಂತಿ ಸಮಾಧಾನ್ ನಾ, ಕಾಶ್ಮಿರಾಂತ್ ಲೋಕ್ ಆತಾಂಯ್ ಭಿಯಾನ್ ಜಿಯೆತಾ. ಗಡಿಭಾಯ್ರ್ ಥಾವ್ನ್ ಯಾ ಗಡಿ ಭಿತರ್ ಲಿಪೊನ್ ಆಸ್ಲಲೆ ಆತಂಕಿ ಆಪಾಲಿಪಾ ಹಲ್ಲೊ ಕರ್ನ್ ಜೀವ್ ಕಾಡ್ನ್ಂಚ್ ಆಸಾತ್. ಆಮ್ಚೆ ಸೊಜೆರ್ ತಶೆಂ ಸಂರಕ್ಶಾದಳ್ ತ್ಯಾ ಆತಂಕಿಂಕ್ ಸೊಧುನ್ ಆನಿ ಮೆಳ್‌ಲ್ಲ್ಯಾಂಕ್ ನಿರ್ನಾಮ್ ಕರುನ್ ಆಸಾತ್.

ಪಾವಾನಾತ್ಲ್ಯಾಕ್ – ನುಪೂರ್ ಶರ್ಮಾ ಆನಿ ನವೀನ್ ಕುಮಾರ್ ಹ್ಯಾ ದೊಗಾಂ ಬಿ.ಜೆ.ಪಿ ವಕ್ತಾರಾಂನಿಂ. ದೇಶಾಚೆಂ ಸಮಾಧಾನ್ ಪಿಡ್ಡ್ಯಾರ್ ಕೆಲಾಂ. ಹ್ಯಾ ದೊಗಾಂನಿ ಕಿತ್ಯಾ ಖಾತಿರ್ ಆಶೆಂ ಕೆಲೆಂ ಆನಿ ಸಗ್ಳ್ಯಾ ಸಂಸಾರಾರ್ ತಾಂಚಾ ವಾಕ್ಮೂಲಾಚೆರ್ ನಿಷೇಧ್ ಪಾಚಾರ್ತಾ ಪರ್ಯಾಂತ್ ಬಿಜೆಪಿ ಕಿತ್ಯಾಕ್ ವೊಗೆ ರಾವ್ಲಿ ಮ್ಹಳ್ಳೆಂ ಕಳಾನಾ. ಆತಾಂ ಬಾಜಪಾನ್ ಆಪ್ಲೊ ಮಾನ್ ರಾಕ್ಚೆ ಖಾತಿರ್ ತ್ಯಾ ದೊಗಾಂಯ್ಕಿ ಪಾಡ್ತಿಥಾವ್ನ್ ನಿಕ್ಳಾವ್ನ್ ಘಾಲಾಂ ಆನಿ ತಾಂಣಿ ದಿಲ್ಲಿಂ ಅನುಚಿತ್ ವಾಕ್ಮೂಲಾಂ ಆಮಿ ಖಂಡನ್ ಕರ‍್ತಾಂವ್ ಮ್ಹಣ್ ಪಾಚಾರುನ್ ಹಾತ್ ಧುವ್ನ್ ಘೆತ್ಲ್ಯಾತ್.

ಆತಾಂ, ನುಪೂರ್ ಆನಿ ನವೀನ್ ಹಾಂಕಾ ಎಕಾಣೆಂ ಎಕಾಣೆಂ ಅಸಲೆಂ ವಾಕ್ಮೂಲ್ ದಿಮ್ವ್ಚೆಂ ಧಯ್ರ್ ಖಂಯ್ ಥಾವ್ನ್ ಆಯ್ಲೆಂ ? ದೊಗಾಂಯ್ ಪಾಡ್ತಿಚೆ ನಿಷ್ಠಾವಂತ್ ಸಾಂದೆ ಆಸೊನ್, ಜೆಂ ಕಿತೆಂ ತಾಂಚ್ಯಾ ಫುಡಾರ‍್ಯಾಂನಿ ವೆಳಾ ವೆಳಾ ಪ್ರಕಾರ್ ಉಚಾರ್ಲಾಂ, ತಾಂಕಾಂ ಬರೆಂ ಮ್ಹಣ್ ದಿಸ್ಲಾಂ ಆಸ್ತಾಂ – ತೆಂಚ್ ತಾಣಿಂಯ್ ಆಪ್ಲ್ಯಾ ವಾಕ್ಮೂಲಾಂನಿ ಉಚಾರ್ಲಾಂ.

ಪ್ರಧಾನಿ ಮೋದಿನ್ 2012 ವ್ಯಾ ವರ್ಸಾ ಗುಜ್ರಾತಾಂತ್ ಚುನಾವಿ ಪ್ರಚಾರಾ ವೆಳಾರ್ ಮ್ಹಳ್ಳೆಂ ಆಸಾ – ಆಮಿ ಸ್ವಾಭಿಮಾನ್ ಆನಿ ಮನೋಬಳ್ ಉಚಾಯ್ಲೆಂ ತರ್ ಅಲಿ, ಮಾಲಿ ಆನಿ ಜಮಾಲಿ ಆಮ್ಕಾಂ ಕೊಣಾಕೀ ಲುಕ್ಸಾಣ್ ಕರುಂಕ್ ಸಕ್ಚೆನಾಂತ್.

ಉತ್ತರ್ ಪರದೇಶಾಂತ್ ಎಕಾ ಚುನಾವ್ ಪ್ರಚಾರಾ ವೆಳಾರ್ ಪ್ರಧಾನಿನ್ ಮ್ಹಳ್ಳೆಂ ಆಸಾ – ಜರ್ ತುಮಿ ಖಬ್ರಸ್ಥಾನ್ ತಯಾರ್ ಕೆಲಿ ತರ್ ಆಮಿ ಸ್ಮಶಾನ್‌ ತಯಾರ್ ಕರ್ತೆಲ್ಯಾಂವ್. ಹ್ಯೆ ಬಾಬ್ತಿನ್ ಖಂಚೊಯಿ ಬೇಧ್‌ಭಾವ್ ಆಸಾನಾಯೆ.

ಉತ್ತರ್ ಪ್ರದೇಶಾಚಾ ಚುನಾವ್ ಪ್ರಚಾರಾಂತ್ ಯೋಗಿ ಆದಿತ್ಯಾನಾಥಾನ್ ಮ್ಹಳ್ಳೆಂ ಆಸಾಂ – ಆತಾಂ ಹೊ ಸ್ಪರ್ಧೊ 80% ಆನಿ 20% ಮದ್ಲೊ ಜಾವ್ನಾಸಾ.

ಆತಾಂ – ನುಪೂರ್ ಆನಿ ನವೀನಾನ್ ಹೆಂ ಸಗ್ಳೆಂ ಆಯ್ಕಾಲಾಂ, ಅಲಿ, ಮಾಲಿ ಜಮಾಲಿ ಮ್ಹಳ್ಯಾರ್ ಕೋಣ್? ಖಬ್ರಸ್ಥಾನ್ – ಸ್ಮಶಾನ್ ತಯಾರ್ ಕರ್ಚೆಂ ಮ್ಹಳ್ಯಾರ್ ಕಿತೆಂ ? 80% ಕೊಣ್ ಆನಿ 20% ಕೊಣ್ ? ಮ್ಹಳ್ಳೆಂ ತಾಣಿ ಬರ‍್ಯಾನ್ ಸಮ್ಜೊನ್ ಘೆತ್ಲಾಂ. ಆನಿ ತಾಂಚ್ಯಾ ವಾಕ್ಮೂಲಾಂನಿ ತೆಂ ಭಾಯ್ರ್ ಪಡ್ಲಾಂ.

ಬಾಜಪಾಕ್ ಭಾರತಾಂತ್ ಸರ್ಕಾರ್ ಚಲಂವ್ಕ್ ಅಲ್ಪ್‌ಸಂಕ್ಯಾತಾಂಚಿ ಗರ್ಜ್ ನಾ. ನೂಪುರ್ ಶರ್ಮಾ ಆನಿ ನವೀನ್ ಕುಮಾರ್ ಹಾಂಚೆ ವಿರೋಧ್ ದಕ್ಷಿಣ್ ಭಾರತಾಂತ್ ಸೊಡ್ಲ್ಯಾರ್ ಹೆರ್ ರಾಜ್ಯಾಂನಿ ವ್ಹಡ್ ಪ್ರಮಾಣಾರ್ ಪ್ರತಿಭಟನಾಂ ಚಲೊನ್ ಆಸಾತ್, ಥೊಡೆಕಡೆ ಪ್ರತಿಭಟನಾಂ ಹಿಂಸೆಕ್ ಘುಂವೊನ್ ಆಸಾತ್. ತಾಂಕಾಂ ಪಾಡ್ತಿಂತ್ಲೆಂ ಕಾಡ್ನ್ ಭಾಜಪಾನ್ ಆಪ್ಲೆ ಹಾತ್ ಧುಲ್ಯಾತ್. ತರೀ ಸಂಸಾರ್‌ಭರ್ ಮುಸ್ಲಿಮ್ ರಾಷ್ಟ್ರಾಂ ಥಾವ್ನ್ ಭಾರತಾ ವಿರೋಧ್ ವಾಯ್ಟ್ ಅಭಿಪ್ರಾಯ್ ಎದೊಳ್‌ಚ್ ಉಬ್ಜಾಲ್ಯಾ. ಪರ್ಜೆರಾಜಾಂತ್ ಆಶೆಂ ಘಡ್ಚೆಂ ಬೆಜರಾಯೆಚೆಂ ಮ್ಹಣ್ ಜಾಯ್ತ್ಯಾ ರಾಷ್ಟ್ರಾಂನಿ ಸಾಂಗ್ಲಾಂ. ಎಲಿಸಾಂವಾಂ ಲಾಗಿಂ ಯೆತಾನಾ, ಅಧಿಕಾರ್ ಧರುಂಕ್ ಲೊಕಾಚಿಂ ಧಾರ್ಮಿಕ್ ಸಿಂತಿಮೆಂತಾಂ ಖದ್ವಾಳವ್ನ್ ದೇಶಾಂತ್ ಆಸ್‌ಲ್ಲೆಂ ಸಮಾಧಾನ್ ಆನಿ ಸಂತುಲನ್ ಬಿಗ್ಡಾಂವ್ಚೆಂ ಕಾಮ್ ಸದಾಂಚೆಂ ಜಾಲಾಂ. ಧಾರ್ಮಿಕ್ ಪ್ರವಾದ್ಯಾಚೆರ್ ವಾಯ್ಟ್ ಟಿಪ್ಪಣಿ ಕೆಲ್ಲ್ಯಾ ಮುಕೆಲ್ಯಾಂಕ್ ಪಾಡ್ತಿಂತ್ಲೆಂ ಕಾಡ್ನ್ ಉಡವ್ನ್ ಸರ್ಕಾರಾನ್ ಆಮಿ ಬರೆ ಮ್ಹಣ್ ದಾಖಂವ್ಚೆ ಪ್ರೇತನ್ ಕೆಲಾಂ. ಪುಣ್ ತಾಂಚ್ಯಾ ವಾಕ್ಮೂಲಾ ವರ್ವಿಂ ಉಬ್ಜಾಲ್ಲೆಂ ಅಶಾಂತೆಚೆಂ ವಾತಾವರಣ್ ನಿತ್ಳಾಂವ್ಚ್ಯಾಂತ್ ಸರ್ಕಾರ್ ಸಲ್ವಾಲಾ.

ಬುಲ್‌ಡೋಜರ್, ಕಾಶ್ಮೀರ್, ನುಪೂರ್ – ಪಾಬ್ವಾನಾತ್ಲ್ಯಾಕ್ ಆತಾಂ ಅಗ್ನಿಪಥಾಂತ್ ಎದೊಳ್ ಕಾಯ್ಲಿರ್ ಭಾಜೊನ್ ಆಸ್‌ಲ್ಲೊ ದೇಶ್ ಶೀದಾ ಉಜ್ಯಾಂತ್ ಪಡ್ಲಾ.

ಕೇಂದ್ರ್ ಸರ್ಕಾರಾನ್ ವರ್ಸಾಕ್ ದೋನ್ ಕರೊಡ್ ಕಾಮಾಂಚೆ ಅವ್ಕಾಸ್ ಕರುನ್ ದಿತಾಂವ್ ಮ್ಹಣ್ ಭಾಸಾಯಿಲ್ಲೆಂ. ಭಾಸಾವ್ಣಿ ಫಕತ್ ಭಾಸಾವ್ಣಿ ಜಾವ್ನ್ ಉರ್ಲೆಲ್ಯಾನ್ ದೇಶ್‌ಭರ್ ಅಣ್ಕಾಣೆಂ ಆಯ್ಕೊಂಕ್ ಪಡ್ತಾಲೆಂ. ಹ್ಯಾ ಗಂಡಾಂತರಾಂತ್ಲೆಂ ಬಚಾವ್ ಜಾಂವ್ಚೆ ಖಾತಿರ್ ಅಗ್ನಿಪಥ್ ನಾಂವಾರ್ 20 ವರ್ಸಾಂ ಭಿತರ‍್ಲ್ಯಾ ಧಾವಿ ಆನಿ ಬಾರಾವಿ ಪಾಸ್ ಜಾಲ್ಲ್ಯಾಂಕ್ ತಾತ್ಕಾಲಿಕ್ ಆರ್ಮಿ ಸೆವಾ ನಾಂವಾಖಾಲ್ 4 ವರ್ಸಾಂಚ್ಯಾ ವಾಯ್ದ್ಯಾಕ್ ಆರ್ಮಿ, ನೇವಿ ಆನಿ ವಾರ‍್ಯಾದಳಾಂತ್ ಕಾಮಾಂ ದಿಂವ್ಚೆ ಯೋಜನ್ ಹಾಡ್ನ್ ಕೇಂದ್ರ್ ರಾಕಣ್ ಮಂತ್ರಿಕ್ ಸರ್ವಾಧಿಕಾರಿ ಜಾವ್ನ್ ನೆಮ್ಲೊ. ಲಾಗಿಂ ಲಾಗಿಂ 45,000 ತರ್ನಾಟ್ಯಾಂಕ್ ಫಕತ್ 4 ವರ್ಸಾಂ ಖಾತಿರ್ ಆರ್ಮಿಂತ್ ಘೆತೆಲೆ. ತ್ಯಾ ಉಪ್ರಾಂತ್ ತಾಂಕಾಂ ಪಾಟಿಂ ಧಾಡ್ತೆಲೆ ತರಿ ಪಾಟಿಂ ಧಾಡ್ಲೆಲ್ಯಾಂಕ್ ಉಪ್ರಾಂತ್ಲ್ಯಾ ವರ್ಸಾಂನಿ ಗರ್ಜೆ ಪ್ರಮಾಣೆ ಆರ್ಮಿ ಸೆವೆಂತ್ ಪಾಟಿಂ ಆಪಂವ್ಚೆಂ. ಪೂಣ್ ಇತ್ಲಿಂಚ್ ವರ್ಸಾಂ ಕಾಮ್ ಮ್ಹಣ್ ಮೆಳ್ತಾಲೆಂ ಮ್ಹಳ್ಳಿ ಗ್ಯಾರಂಟಿ ನಾ.

ಹೆಂ ಯೋಜನ್ ಜಾಹಿರ್ ಕೆಲ್ಲೆ ದೀಸ್ ತರ್ನಾಟ್ಯಾಂನಿ ಯೋಜನಾಕ್ ಉಗ್ತ್ಯಾನ್ ಸ್ವ್ವಾಗತ್ ದಿಲ್ಲೊ. ಪುಣ್ ಫಕತ್ 4 ವರ್ಸಾಂ ಖಾತಿರ್ ಘೆತಾತ್ ಮ್ಹಳ್ಳೆಂ ಕಳ್ತಚ್ ತರ್ನಾಟೆ ಪ್ರತಿಭಟನಾಕ್ ಉಟ್ಲೆ. ಉತ್ತರ್‌ಪ್ರದೇಶ್, ಬಿಹಾರ್ ಛತ್ತಿಸ್‌ಘಡ್ ಮ್ಹಳ್ಯಾರ್ ಉತ್ತರ್ ಭಾರತಾಚಾ ಚಡಾವತ್ ರಾಜ್ಯಾಂನಿ ಹಿಂಸಾ ಸುರು ಜಾಲಿ. ಸರ್ಕಾರಿ ಆಸ್ತ್ ಹುಲ್ಫಾವ್ನ್, ರಯ್ಲಾಂಕ್ ಉಜೊ ಘಾಲೊ. ಫಾತೊರ್ ಮಾರ್ಲೆ – ಮುಕಾರ್ ಜೆಂ ಕಿತೆಂ ಮೆಳ್ತಾ ತೆಂ ನಾಸ್ ಕರುಂಕ್ ಲಾಗ್ಲೆ. ಪೊಲಿಸಾಂಚ್ಯೊ ಲಾಠಿ ಚಲ್ಲ್ಯೊ. ದುಖಾಂ ಕಾಡಂವ್ಕ್ ಗ್ಯಾಸ್. ಲಾಠಿಚಾರ್ಜ್ ಇತ್ಯಾದಿ ಸುರ್ವಾತ್ ಜಾಲಿ. ನುಪೂರ್ ಆನಿ ನವೀನ್ ಕುಮಾರಾಚಾ ಬಡ್ಕಾಂವ್ಚ್ಯಾ ಉಲವ್ಣ್ಯಾಚೆರ್ ಸುರು ಜಾಲ್ಲಿ ಹಿಂಸಾ ರಾಂವ್ಚೆ, ಅಗ್ನಿಪಥಾನ್ ಉಜೊಚ್ ಪೆಟಯ್ಲೊ.

ಸರ್ವ್ ಮನ್ಶಾಂಚೆಂ ರಗಾತ್ ತಾಂಬ್ಡೆ. ಸರ್ವ್ ಮನ್ಶಾಂಕ್ ಸ್ವತಂತ್ರ್ ಜಾಯ್. ಸರ್ವಾಂಕ್ ತಾಂಚೊ ಮ್ಹಳ್ಳೊ ದೇಶ್ ಜಾಯ್. ದೇಶಾಚಿ ಘಟನಾವಳ್ ರಚ್ಲೆಲ್ಯಾಂನಿ ಸರ್ವ್ ಭಾರತೀಯ್ ಏಕ್, ತಾಂಚೊ ಧರ್ಮ್ ಖಂಚೊಯಿ ಆಸೊಂ ತೊ ಧರ್ಮ್ ಪಾಳ್ಚೆಂ ಸ್ವತಂತ್ರ್ ಹರೇಕಾ ನಾಗರಿಕಾಂಕ್ ಆಸಾ ಆನಿ ತೆಂ ತಾಂಚೆಂ ಮುಳಾವೆಂ ಹಕ್ಕ್ ಜಾವ್ನಾಸಾ. ದೇಶಾಚಾ ಖಂಚಾಯ್ ಪ್ರದೇಶಾಂತ್ ವಚೊನ್ ಘೊಳೊನ್ ಜಿಯೆವ್ಯೆತಾ. ವ್ಯಾಪಾರ್ ದಂದೊ ಕರ್ಯೆತಾ. ಹ್ಯಾ ಥರಾಚಿ ಘಟನಾವಳ್ ರಚುನ್ ಭಾರತಾಕ್ ಸಂಸಾರಾಂತ್ಲ್ಯಾ ಪರ್ಜೆರಾಜ್ ರಾಷ್ಟ್ರಾಂ ಪಯ್ಕಿ ಪಯ್ಲೆಂ ಸ್ಥಾನ್ ದಿಲಾಂ ಆಸ್ತಾಂ – ಜಾತೀಯ್ ಆನಿ ಧಾರ್ಮಿಕ್ ಭಾವನಾಂ ಹುಸ್ಕಾವ್ನ್, ನಾಗರಿಕಾಂಚಿ ಹಕ್ಕಾಂ ಮಸ್ತುನ್, ಸರ್ಕಾರ್ ಚಲಯ್ಜೆ ಮ್ಹಣ್ ನಾ. ಫಕತ್ ಧಾರ್ಮಿಕ್ ಭೊಗ್ಣಾಂ ಬಡ್ಕಾವ್ನ್ ದೇಶಾಂತ್ ಫಕತ್ ಎಕಾ ಧರ್ಮಾಚ್ಯಾ ವಾ ಜಾತಿಚ್ಯಾ ಲೊಕಾನ್ ಮಾತ್ ಆಸಜೆ ಮ್ಹಳ್ಳಿಂ ಸಿಂತಿಮೆಂತಾಂ ಲೊಕಾ ಮತಿಂತ್ ವೊಂಪುನ್ ಹಿಂಸೆದ್ವಾರಿ ಸರ್ಕಾರ್ ರಚುಂಕ್ ಗೆಲ್ಯಾರ್ – ವಿವಿಧತೆಂತ್ ಏಕತಾ ಪಾಚಾರ್ಚೊ ದೇಶ್ ನಾಸ್ ಜಾಂವ್ಕ್ ಆಸಾ.

ದೇಶ್ ಭ್ರಶ್ಟಾಚಾರಾಚಾ ಜಾಳಾಂತ್ಲೊ ಸುಟವ್ನ್ ಸಮೃದ್ಧ್ ದೇಶ್ ಬಾಂದ್ತೆಲ್ಯಾಂವ್ ಮ್ಹಣ್ ಭಾಸ್ ದೀವ್ನ್ ಸರ್ಕಾರ್ ರಚ್ಲೆಲ್ಯಾಂನಿ, ಆತಾಂ ಫಕತ್ ಜಾತ್ ಆನಿ ಧರ್ಮಾಚ್ಯಾ ನಾಂವಾರ್ ಲೊಕಾಕ್ ವಾಂಟೆ ಕರುನ್ ರಾಜ್ ಚಲಂವ್ಕ್ ಚಿಂತ್ಲ್ಯಾರ್ – ಭ್ರಶ್ಟಾಚಾರಾಚ್ಯಾ ಕಾಯ್ಲಿರ್ ಎದೊಳ್‌ಚ್ ಭಾಜೊನ್ ಗೆಲ್ಲ್ಯಾ ದೇಶಾಕ್, ಪರ್ತ್ಯಾನ್ ವಿಭಜನಾಚ್ಯಾ ಉಜ್ಯಾಂತ್ ಲಾಸ್ಚಿ ತಾಂಕ್ ಉರೊಂಕ್ ನಾ.

► ನವೀನ್ ಕುಲ್ಶೇಕರ್