ತಾಕೊಡೆಚೆಂ ನಾಂವ್ ಕೊಂಕ್ಣಿ ಸಾಹಿತ್ಯಾಂತ್ ಥಿರ್ ಕೆಲ್ಲೊ ಮ್ಹಜೊ ಈಶ್ಟ್

ತಾಕೊಡೆ ಥಾವ್ನ್ ಬಿದ್ರ್ಯಾಂ ವೆಚ್ಯಾ ವಾಟೆರ್, ತಾಕೊಡೆ ಫಿರ‍್ಗಜೆ ಗಡಿರ್ ಬಿರಾವ್ ಮ್ಹಳ್ಳೊ ಏಕ್ ಲ್ಹಾನ್ ಚಡ್ಣೆಚೊ ಗಾಂವ್ ಮೆಳ್ತಾ. ಆಲ್ತಡಿ ತಾಕೊಡೆ, ಪಲ್ತಡಿ ಹೊಸ್ಪೆಟ್ ಆನಿ ಚಡ್ಣೆಚ್ಯಾ ತುದಿಯೆರ್ ಗೊಮ್ಟಿ ಲಾಂಬ್ ಕಾಡ್ಲ್ಯಾರ್ ಬಿದ್ರ್ಯಾಂ ಫಿರ‍್ಗಜೆಚಿ ಗಡ್ ದಿಸ್ಚ್ಯಾ ಗಡಿ ಫತ್ರಾರ್ ಸಿಜ್ಯೆಸಾಚೆಂ ಬಿಡಾರ್. ಬಿಡಾರಾಚ್ಯಾ ದೆಗೆನ್ ಬಂಟ್ವಾಳಾಕ್ ವೆಚೊ ರಾಜ್ ರಸ್ತೊ, ಉದಾರೊ ನಿದ್‌ಲ್ಲ್ಯಾ ರಸ್ತ್ಯಾ ಪಲ್ತಡಿ ಪಳೆಲ್ಯಾರ್ ಸಿಜ್ಯೆಸಾಚ್ಯಾ ಘರಾಚ್ಯಾ ಸಮಾ ಪಡ್ಲಾಕ್ ಏಕ್ ಜಾಂಬ್ಳಿಚೊ ರೂಕ್ ಆಸ್‌ಲ್ಲೊ, ಆತಾಂಯ್ ಆಸಾ ಆನಿ ತ್ಯಾ ರುಕಾ ಪಂದಾ ಗಟ್ಟ್ ಜಿವಾಚೊ, ದಾಟ್ ರಂಗಾಚೊ, ಮದ್ಲ್ಯಾ ಪ್ರಾಯೆಚೊ, ಪೆಂಕ್ಡಾಕ್ ಏಕ್ ಕುಡ್ಕೊ ಆಡ್ ಬಾಂದ್‌ಲ್ಲೊ ಬೋರಾ ನಾಂವಾಚೊ ದಾದ್ಲೊ ಉಬೊ ಆಸ್‌ಲ್ಲೊ ವಾ ಬಸ್‌ಲ್ಲೊ ಪಳೆಂವ್ಕ್ ಮೆಳ್ತಾಲೊ.

ಆಮಾಸೆಕ್, ಪನ್ವೆಕ್ ತಾಕಾ ಚಾಳ್ವಾತಾ, ತ್ಯಾ ವೆಳಾರ್ ತಾಕಾ ಕೊಣೆಂಯ್ ಮುಕಾರ್ ಮೆಳ್ನಜೊ, ಜಿವಾಕ್ ಆಪಾಯ್ ಆಸ್ತಾ, ಹೆರೆ ವೆಳಾರ್ ತೊ ಭೋವ್ ಸಾದೊ ಆಸ್ತಾ ಅಶೆಂ ಆಮಿ ಆಯ್ಕಾಲ್ಲೆಂ. ತರ‍್ನ್ಯಾ ಪ್ರಾಯೆರ್ ತಾಕಾ ಬಾಯ್ಲ್ ಸೊಡ್ನ್ ಗೆಲ್ಲಿ, ಬಣಾಂತ್ಲ್ಯಾ ಸೊರ‍್ಪಾಚೊ ಫಾತರ್ ತಾಣೆಂ ಕಾಡ್‌ಲ್ಲೊ ದೆಕುನ್ ತಾಚಿ ತಕ್ಲಿ ಗಿರ್ಗಿಟ್ಲಿ ಅಶೆಂ ಆಮಿ ಆಯ್ಕಾಲ್ಲೆಂ. ಬಿದ್ರ್ಯಾಂಚ್ಯಾ ಇಸ್ಕೊಲಾ ಥಾವ್ನ್ ಸಾಂಜೆರ್ 7 – 8 ಮಯ್ಲಾಂ ಚಲೊನ್ ಘರಾ ಪಾಟಿಂ ಯೆತಾನಾ ಜಾಂಬ್ಳಿ ರುಕಾ ಮುಳಾಂತ್ ಬೋರಾ ಆಮ್ಕಾಂ ಫಡ್ ಕರ‍್ನ್ ಚಲೊನ್ ಯೆತಾನಾ ಆಮ್ಕಾಂ ಭಿತರ‍್ಲ್ಯಾ ಭಿತರ್ ಭಿರಾಂತ್ ಭಗ್ತಾಲಿ, ಪಣ್ ಹಫ್ತ್ಯಾ ಹಫ್ತ್ಯಾಕ್ ಬ್ರೆಸ್ತಾರಾ ದಿಸಾ ಘರಾ ಪಾಂವ್ಚ್ಯಾ ರಾಕ್ಣ್ಯಾಂತ್ ಆಮ್ಕಾಂ ಬೊಲ್ತೊಚ್ ಬೋರಾ ಉಗ್ತೊ ಜಾತಾಲೊ. ಹಾಕಾ ಕಾರಣ್ ಆಸ್‌ಲ್ಲೆಂ.

ಸಿಜ್ಯೆಸ್ ಹಫ್ತ್ಯಾ ಹಫ್ತ್ಯಾಕ್ ಫಕಣಾಂ ಸೊಡ್ಟಾಲೊ, ಫಗೆಟ್ಯೊ ಮಾರ‍್ತಾಲೊ ಆನಿ ಮಧೆಂ ಮಧೆಂ ಬೊಲ್ತ್ಯಾಚ್ ಎಕಾ ಬೋರಾಕ್ ಆಮ್ಚೆ ಸಾಮ್ಕಾರ್ ಹಾಡ್ಟಾಲೊ. ಸಿಜ್ಯೆಸ್ ಮ್ಹಜ್ಯಾ ಗಾಂವ್ಚೊ ತರೀ, ಹಾಂವೆಂ ಸಿಜ್ಯೆಸಾಕ್ ಪಳೆಂವ್ಕ್ ನಾತ್‌ಲ್ಲೆಂ. ಪಣ್ ಮ್ಹಾಕಾ ತೀನ್ ಕಡೇನ್ ಬೋರಾ ದಿಶ್ಟಿಕ್ ಪಡ್ತಾಲೊ, ಏಕ್‌ಕಡೆ ಸಿಜ್ಯೆಸಾಚ್ಯಾ ಕಾಣಿಯೆಂತ್, ದುಸ್ರೊ ತಾಚ್ಯಾ ಘರಾಮುಕ್ಲ್ಯಾ ರೂಕಾ ಮುಳಾಂತ್, ತಿಸ್ರೊ ಮ್ಹಜ್ಯಾ ಗಾಂವ್ಚ್ಯಾ ಮ್ಹನ್ಶಾಂಚ್ಯಾ ತೊಂಡಾಂತ್.

ಮಾಗಿರ್ ಮ್ಹಾಕಾ ಸಿಜ್ಯೆಸಾಚಿ ವ್ಹಳಕ್ ಜಾಲಿ.

ತ್ಯಾ ಉಪ್ರಾಂತ್ ಸಿಜ್ಯೆಸಾನ್ ಮ್ಹಜೆ ಕಡೆನ್ ಉಲಯ್ಜೆ ಮ್ಹಣ್ ನಾತ್‌ಲ್ಲೆಂ, ತಾಕಾ ಪಳೆಲ್ಯಾರ್‌ಚ್ ಮ್ಹಾಕಾ ಹಾಸೊ ಯೆತಾಲೊ.

ಸಿಜ್ಯೆಸ್ ಮ್ಹಜ್ಯಾ ಗಾಂವಾಂತ್ ಜಿಯೆತಾನಾ, ತರ‍್ನಾಟೆ ಭಾರಿ ತಾಂಕಿಚೆ ಆಸ್‌ಲ್ಲೆ. ಬರ‍್ಪಾಂತ್, ನಾಟಕಾಂತ್, ತಾಲೆಂತಾಂನಿ ತಾಣಿಂ ನಾಂವ್ ಕೆಲ್ಲೆಂ. ಸಿಜ್ಯೆಸಾಕ್ ತಾಕೊಡೆಚಿಂ ಬಾಯ್ಲಾಂ ಕೊಣೀ ಮುಕಾರ್ ಮೆಳ್ಳ್ಯಾರ್, ಉಲವ್ನ್ ಜಾಲ್ಲೆಂಚ್, ಪರ‍್ವಾಂಚ್ಯಾ ರಾಕ್ಣ್ಯಾಂತ್ ಪಣಿ ಬರಯ್ನಾಕಾ ಮ್ಹಣ್ಟಾಲಿಂ. ಸಿಜ್ಯೆಸಾನ್ ಹಾಸ್ತಾನಾಂಚ್ ತೊ ಬರಯ್ತಾಚ್ ಮ್ಹಣೊನ್ ಆಮ್ಕಾಂ ಕಳ್ಟಾಲೆಂ. ಪದೊರ‍್ನ್, ಮೊದೊರ‍್ನ್, ಎಸ್ತುಬಾಯ್, ಲಿಲ್ಲಿಬಾಯ್, ಸೆಲ್ಲಿಬಾಯ್, ಜಿಲ್ಲಿಬಾಯ್, ದೆರಾಡಿ, ಸುರ‍್ಲಾಯ್, ಮಾರೂರ್, ಕಜೆಬೈಲ್, ತಾರಿಪಡ್ಪು, ಮಂಗಲ್‌ಪೇಟ್ ತಾಚ್ಯಾ ಪಕಣಾಂನಿಂ ಆಸ್ತಾಲೆಂಚ್. ಸಿಜ್ಯೆಸಾಚಿಂ ಬರ‍್ಪಾಂ ಮ್ಹಳ್ಯಾರ್ ಆಮಿ ತಾಕೊಡೆಂತ್ ಏಕ್ ಭಂವಾಡೊ ಕಾಡ್‌ಲ್ಲೆಪರಿಂ ಜಾತಾಲೆಂ. ’ಸಿರ‍್ಲಾ ಸರ‍್ಲಾ’ ಮ್ಹಣೊನ್ ಕಾಜಾರಾಚಿ ವೊವ್ಳಿಗ್ ದಿಲ್ಲೆಪರಿಂ ತಾಣೆಂ ಬರಯಿಲ್ಲೊ ತಮಾಸೊ ಆತಾಂಯ್ ಮ್ಹಜ್ಯಾ ಮತಿಂತ್ ಆಸಾ.

ಸಕ್ಡಾಂನಿಂ ಚಿಂತ್‌ಲ್ಲೆಪರಿಂ ಸಿಜ್ಯೆಸಾನ್ ಫಕತ್ ಹಾಸಯ್ಲಾಂ ಮಾತ್ರ್ ನ್ಹಂಯ್, ಸಾಮಾಜಿಕ್ ಕಾದಂಬರಿ ಬರಯ್ಲ್ಯಾತ್, ಚಿಮ್ಟೆ ಕಾಡ್ಚಿಂ ಫಕಣಾಂ ಬರಯ್ಲ್ಯಾಂತ್, ಚಿಂತೂಂಕ್ ಲಾಂವ್ಚಿಂ ಲೇಖನಾಂಯ್ ಬರಯ್ಲ್ಯಾಂತ್. ತೊ ಏಕ್ ಸಮಾಜೆಚೊ ಹುಸ್ಕೊ ಆಸ್‌ಲ್ಲೊ ಮ್ಹನಿಸ್.

ಸಿಜ್ಯೆಸ್ ಕಾಳ್ಜಾನ್ ಏಕ್ ಮೊವಾಳ್ ಮ್ಹನಿಸ್, ಕಾಲೆತಿನ್ ಮೊಗಾಳ್, ಹಾತಿಂ ಧರ್‌ಲ್ಲೆಂ ಕಾಮ್ ವೆಳಾರ್ ಸಂಪಂವ್ಚೊ, ದಿಲ್ಲೆಂ ಉತರ್ ಪಾಳ್ಚೊ, ಈಶ್ಟಾಗತ್ ಸಾಂಬಾಳ್ಚೊ, ಜೊಡ್‌ಲ್ಲೆ ಸಂಬಂಧ್ ಉರಂವ್ಚೊ ಮ್ಹನಿಸ್ ಮ್ಹಳ್ಳಿ ಗಜಾಲ್ ಸಬಾರಾಂಕ್ ಖಬರ್ ನಾಂ ಆಸ್ತಲಿ.

ಸಿಜ್ಯೆಸ್ ತಕ್ಲೆನ್ ಬುಧ್ವಂತ್, ಉಡಾಸಾನ್ ಚುರುಕ್, ಕಾಮಾಂತ್ ಶಾಣೊ, ಚಿಂತ್ಪಾಂತ್ ಶೀದಾ ಆನಿ ಆಪ್ಲ್ಯಾ ವೈಚಾರಿಕ್ ವಿಚಾರಾಂನಿಂ ಖಡಕ್.

ಫುಗೆಟ್ಯೊ, ಫೊಕಣಾಂ, ಗ್ರಹಚಾರ್, ಸುರ‍್ಸುರ‍್ಯೊ, ಕುಚಿಲ್ಯೊ, ಮಸ್ಕಿರ‍್ಯೊ, ಚಿರ್ಮುಲ್ಯೊ, ಹಾಯ್ ಹಾಯ್ ದುಬಾಯ್, ಬುಳ್ಬುಳೆ, ಸುಳ್ಸುಳೆ, ತಾಂಬ್ಡೆಗುಳೆ ತಾಚಿಂ ಹಾಸ್ಯ್ ಪಸ್ತಕಾಂ. ಮರಿಮಾಗ್ದೆಲ್, ಚ್ಯಾರ್ ದಿಸಾಂಚೊ ಸಂಸಾರ್, ಹಾಸ್ಚೆಂಗಿ ರಡ್ಚೆಂ, ಪಿತುಳ್, ಭಾಡ್ಯಾಚಿ ಭಾಯ್ಲ್, ಎಕ್ಲೆಂ ಎಕ್ಸುರೆಂ, ಜಿರ‍್ಗಿ ಮಿರ‍್ಸಾಂಗ್, ಡಾಯಾನಾ, ತಾಚೆ ಸಮಾಜಿಕ್ ಆನಿ ಹಾಸ್ಯ್ ನಾಟಕ್. ಪತ್ತೆದಾರಾಂಚೆಂ ಸಾಹಸ್, ದುಕಾಂ, ಖುನ್ಯೆಗಾರಾಚಿ ಖುನ್, ಸಿಸ್ಟರ್ ಶೋಭಾ – ತಾಚ್ಯೊ ನವಲ್ ಕಥಾ. ಇಜ್ಮೊಲಾಚಿ ವಾಟ್ಲಿ, ಕುಲ್ಕುಲೊ – ತಾಚ್ಯೊ ಕವಿತಾ. ರವಿ ಆನಿ ಕವಿ, ಉಲೊ ಆನಿ ಝೆಲೊ, ಪಾಂಚ್ ಪಾಕ್ಳ್ಯೊ, ಸಾತ್ ಸಾಳ್ಕಾಂ- ತಾಚಿಂ ಸಂಪಾದಿತ್ ಬರ‍್ಪಾಂ. ಕಾಣಿಕ್ ಆನಿ ಉಮಾಳ್ಯಾಚೊ ಸಂಪಾದಕ್ ತಶೆಂ ರಾಕ್ಣೊ ಪತ್ರಾಚೊ ಸಹ-ಸಂಪಾದಕ್. ಡೊನ್ ಕ್ವಿಕ್ಸೊಟ್, ಜೀವನ್ ತುಫಾನ್, ವೇಕ್ ಫಿಲ್ಡಾಚೊ ವಿಗಾರ್, ಅಬೊಲಿನಾ, ಪೆರಿಸ್ – ತಾಚ್ಯೊ ಅನುವಾದಿತ್ ಕಾದಂಬರಿ. ಇಂಡಿಯಾಚೊ ಆಪಸ್ತಲ್, ಆಧುನಿಕ್ ಖುರ್ಸಾವಾಟ್, ಪಿಡೆಸ್ತಾಂಚಿ ಖುರ್ಸಾವಾಟ್ – ತಾಚಿಂ ಧಾರ್ಮಿಕ್ ಪಸ್ತಕಾಂ.

ಗೊಂಯ್ ಭಾಶಾ ಮಂಡಳ್, ದಾಯ್ಜಿ ದುಬಾಯ್, ಸಂದೇಶ, ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿ ಆನಿ ಕೊಂಕ್ಣಿ ಕುಟಮ್ ಬ್ರಾಹ್ರೇಯ್ನ್ – ತಾಕಾ ಲಾಭ್‌ಲ್ಲ್ಯೊ ಪ್ರಶಸ್ತ್ಯೊ.

ಸಿಜ್ಯೆಸಾಚೆಂ ಕಾಜಾರ್ ಜಾವ್ನ್ ಸಬಾರ್ ವರ‍್ಸಾಂ ಜಾಲಿಂ. ಸಿಜ್ಯೆಸಾಚ್ಯಾ ಕಾಜಾರಾಕ್ ಸಗ್ಳ್ಯಾ ಗಾಂವ್ಚೊ ಲೋಕ್ ಹಾಜರ್ ಆಸ್‌ಲ್ಲೊ. ಹಾಂವ್‌ಯೀ ಕಾಜಾರಾಕ್ ಗೆಲ್ಲೊಂ. ಲ್ಹಾನ್ ಭುರ‍್ಗೊ ತೆದ್ನಾ. ಆಂಗಣ್‌ಭರ್ ಲೊಕಾಕ್ ಬಸೊಂಕ್ ಜಾಗೊ ಪಾವೊಂಕ್ ನಾ. ವಿಲ್ಫಿಯಾಬಾಚೆಂ ಬ್ಯಾಂಡ್, ಪದಾಂ ಆನಿ ಕೊಡ್ಯಾಳ್‌ಚೆಂ ಕೆಟರಿಂಗ್ ಮ್ಹಳ್ಳೆಬರಿ ಉಡಾಸ್. ತಿತ್ಲ್ಯಾ ಲೊಕಾಕ್ ಜೆವಣ್ ಕಶೆಂ ಸುಧಾರ‍್ಶಿಲೆಂ ಮ್ಹಳ್ಳೆಂಯ್ ಮ್ಹಾಕಾ ಉಡಾಸ್ ನಾ.

ಹಾಂವ್ ತಾಕಾ ಬಿರಾವ್‌ಕಾರ್, ತಾಕೊಡ್‌ಕಾರ್ ಮ್ಹಣೊನ್ ಆಪಾಯ್ತಾಲೊಂ. ಮ್ಹಾಕಾ ತೊ ನಂಬರ್ 33 ಮ್ಹಣ್ಟಾಲೊ, ಮ್ಹಳ್ಯಾರ್ ತೆತ್ತಿಸ್, ತೆತ್ತುಸ್ ಮ್ಹಣೊನ್ ಜಾತಾ. ತಾರಿಪಡ್ಪುಕಾರ್ ಮ್ಹಣೊನೀ ಆಪಯ್ತಾಲೊ. ಆಫಿಸಾಂತ್ಲ್ಯಾ ಮೇವಿಸಾಕ್ ಮೇ 20 ಮ್ಹಣೊನ್ ಆಪಯ್ತಾಲೊ. ಜಿನೊಸಾನ್ ಖುಶಾಲಿ ಆನಿ ಮಯ್ಪಾಸಿ ಮ್ಹನಿಸ್.

ಸಿಲ್ವಿಬಾಯೆಚಿ ಭಲಾಯ್ಕಿ ಸಿಜ್ಯೆಸಾ ತಿತ್ಲಿ ಬರಿ ನ್ಹಯ್, ಏಕ್ ದೀಸ್ ಫಾದರ್ ಮುಲ್ಲರ್ ಆಸ್ಪತ್ರೆಂತ್ ಸಿಲ್ವಿಬಾಯೆಚಿ ಸರ್ಜರಿ ಆಸ್‌ಲ್ಲಿ. ಸಿಲ್ವಿಬಾಯೆಚ್ಯಾ ಬೆಡ್ಡಾರ್ ಸಿಜ್ಯೆಸ್ ನಿದ್‌ಲ್ಲೊ. ಏಕ್ ಮಳಿಯಾಳಿ ನರ‍್ಸ್ ಇಂಜೆಕ್ಷನ್ ದೀಂವ್ಕ್ ಯೆತಾನಾ ಸಿಜ್ಯೆಸ್ ನಿದ್‌ಲ್ಲೊ ಪಳೆವ್ನ್ ಕನ್‌ಫ್ಯೂಸ್ ಜಾಲಿ. ತಿಣೆಂ “ವೇರ್ ಈಜ್ ಮೇಡಮ್” ಮ್ಹಣೊನ್ ವಿಚಾರ‍್ಲೆಂ. “ಮೇಡಮ್ ಇಜ್ ಇನ್ ದ ಓಟಿ. ದಿಸ್ ಈಜ್ ಆಡಮ್” ಮ್ಹಣಾಲೊ. ಸಿಜ್ಯೆಸ್ ಖಂಚ್ಯಾಯ್ ಪರಿಗತೆಂತ್ ತೊ ವಿಟ್ಟಿ ಆಸ್ತಾಲೊ. ತೊ ಹುಶಾರ್ ನಾತ್‌ಲ್ಲ್ಯಾ ವೆಳಾರೀ ಹಾಂವ್ ತಾಕಾ ಫೋನ್ ಕರ‍್ತಾಲೊಂ ವಾ ವಾಟ್ಸಾಪ್ ಗ್ರೂಪಾರ್ ಪಾಂಯ್ ವೊಡ್ಟಾಲೊಂ ಆನಿ ತೆದಾಳಾಯ್ ತೊ ತಿತ್ಲೊಚ್ ವಿಟ್ಟಿ ಆಸ್ತಾಲೊ. ತಾಕಾ ಕ್ಯಾನ್ಸರ್ ಆಸ್‌ಲ್ಲಿ ಖಬರ್ ಮ್ಹಾಕಾ ನಾತ್‌ಲ್ಲಿ. ನಾಂ ಮ್ಹಣೊನ್ ತಾಣೆಂಯ್ ಸಾಂಗೊಂಕ್ ನಾತ್‌ಲ್ಲೆಂ.

ಕಾರ‍್ಯಾಂಕ್ / ಮೊರ‍್ನಾಂಕ್ ವೆತಾನಾ ಸಿಜ್ಯೆಸ್ ಮ್ಹಜೆ ಸಾಂಗಾತಾ ಯೆತಾಲೊ. ಸಿಜ್ಯೆಸಾ ಸಾಂಗಾತಾ ಪಯ್ಣ್ ಕರ‍್ಚೆಂ ಮ್ಹಳ್ಯಾರ್ ಏಕ್ ಎನ್‌ಸೈಕ್ಲೊಪೀಡಿಯಾ ಉಗ್ತೆ ಕೆಲ್ಲೆ ಬರಿ. ತಿತ್ಲೊಯ್ ತಾಚೊ ಉಡಾಸ್. ಖಂಚಿ ಸಂಗತ್ ಕೆದಾಳಾ ಕೊಣಾಕ್ ಖಂಯ್ ಕಶಿ ಘಡ್ಲಿ ಮ್ಹಳ್ಳೆಂ ತಾಕಾ ಉಡಾಸ್ ಆಸ್ತಾಲೊ. ದೀಸ್ ತಾರೀಕ್ ವರ‍್ಸ್ ವೇಳ್ ಸಗ್ಳೆಂಯ್ ತಾಚ್ಯಾ ಮತಿಂತ್ ಆಸ್ತಾಲೆಂ. ಭಾಯ್ರ್ ವೆತಾನಾ ಆಮಿ ಮೊಸ್ತು ಸಂಗ್ತಿ ಉಲಯ್ತಲ್ಯಾಂವ್. ತೊ ತಾಕೊಡೆಚೊ ಮ್ಹಳ್ಳೆ ಖಾತಿರ್ ಮಾತ್ರ್ ಮ್ಹಜೊ ಈಶ್ಟ್ ನ್ಹಯ್, ಆಮಿ ಅಶೆಚ್ ಈಶ್ಟ್. ತಾಚೆಲಾಗಿಂ ಏಕ್ ಬರೇಂ ಮ್ಹನ್ಶ್ಯಾಪಣ್ ಆಸ್‌ಲ್ಲೆಂ. ವೇದಿರ್ ಉಲಂವ್ಕ್ ರಾವ್ಲೊ ಜಾಲ್ಯಾರ್ ಎಕ್ದಮ್ unpredictable ಮ್ಹನಿಸ್ ತೊ. ಮುಕ್ಲೆಂ ಕಿತೆಂ ಉಲಯ್ತ್ ತಾಚಿ ಖಬರ್ ಕೊಣಾಕ್ ಆಸಾನಾತ್ಲಿ. ತಾಚ್ಯಾ ವ್ಹಳ್ಕಿಚ್ಯಾ ಮ್ಹನ್ಶ್ಯಾಂ ವಿಶ್ಯಾಂತ್ ತಾಕಾ ಏಕ್ ಅಶಿಚ್ ಮ್ಹಳ್ಳಿ ಖರೋಖರ್ ಅಭಿಪ್ರಾಯ್ ಆಸ್‌ಲ್ಲಿ. He was not judgmental, ಪೂಣ್ ತಾಚಿ ಮಾಹೆತ್ ಮಾಂದಿಜೆ ಪಡ್ಚೆ ತಿತ್ಲಿ ಸಾರ್ಕಿ ಆಸ್ತಾಲಿ. ಕೊಂಕ್ಣಿ ಕುಟಮ್ ಪ್ರಶಸ್ತೆ ವೆಳಾರ್ ಆಮಿ ಸಾಂಗಾತಾ ಕಾಮ್ ಕರ‍್ತಲ್ಯಾಂವ್. ತಾಕಾ ದಿಲ್ಲೆಂ ಖಂಚೆಂಯ್ ಕಾಮ್ ತೊ ವೆಳಾಪುರ‍್ವಿಂ ಮುಗ್ದಿತಾಲೊ. ಕಾಮ್ ಪಾಟಿಂ ಘಾಲ್ಚಿ ಸವಯ್ ಸಿಜ್ಯೆಸಾಕ್ ನಾತ್‌ಲ್ಲಿ.

ಪಾಟ್ಲ್ಯಾ ವರ‍್ಸಾ ದೋನ್ ಪಾವ್ಟಿಂ ಮ್ಹಾಕಾ ಆನಿ ಸಿಜ್ಯೆಸಾಕ್ ಸಾಂಗಾತಾ ವೆಚೊ ಆವ್ಕಾಸ್ ಆಸ್‌ಲ್ಲೊ ಆನಿ ಹಾಂವೆಂ ಸಿಜ್ಯೆಸಾಕ್ ಫೋನ್ ಕೆಲ್ಲೆಂ, ತಾಣೆಂ ಭಲಾಯ್ಕೆಚೆಂ ಕಾರಣ್ ದೀವ್ನ್ ಯೇಂವ್ಕ್ ಜಾಯ್ನಾ ಮ್ಹಳ್ಳೆಂ. ಪ್ರೊಸ್ಟೆಟಾಚೆ ವಾಂದೆ ಆಸ್‌ಲ್ಲೆ ಮ್ಹಾಕಾ ಖಬರ್ ಆಸ್‌ಲ್ಲಿ ಪಣ್ ಪ್ರೊಸ್ಟ್ಟೆಟ್ ಕ್ಯಾನ್ಸರ್ ಮ್ಹಳ್ಳಿ ಸಂಗತ್ ಮ್ಹಾಕಾ ಕಳಿತ್ ನಾತ್‌ಲ್ಲಿ. ದೋನ್ ಮಹಿನ್ಯಾ ಪಯ್ಲೆಂ ಮ್ಹಜ್ಯಾ ಎಕಾ ಈಶ್ಟಾ ಸಾಂಗಾತಾ ಜೆವ್ಣಾಕ್ ಯಾ ಮ್ಹಣೊನೀ ಹಾಂವೆಂ ತಾಕಾ ಆಪಯ್ಲೆಲೆಂ. ಅನ್ಯೇಕ್ ಪಾವ್ಟಿಂ ಬಸ್ಯಾಂ ತೀತ್ ಮ್ಹಣಾಲೊ. ಹಾಂವೆಂ ಹಾಂ ಮ್ಹಳೆಂ., ಅನ್ಯೇಕ್ ದೀಸ್ ಯೆಂವ್ಚೊನಾ ಮ್ಹಣೊನ್ ಮ್ಹಾಕಾ ಖಬರ್ ನಾತ್‌ಲ್ಲಿ. ಥೊಡ್ಯಾ ತೆಂಪಾ ಪಯ್ಲೆಂ ತಾಚಿ ಪಿಡಾ ಮ್ಹಾಕಾ ಕಳ್ಳಿ,  ಪಣ್ ಪ್ರೊಸ್ಟೇಟ್ ಕ್ಯಾನ್ಸರ್ ಸ್ಲೋ ಗ್ರೋತ್ ಜಾತಾ ಮ್ಹಣೊನ್ ಮ್ಹಜ್ಯಾ ಮತಿಂತ್ ಆಸ್‌ಲ್ಲೆಂ. ಥೊಡ್ಯಾ ದಿಸಾಂನಿ ತಾಕಾ ವಚೊನ್ ಮೆಳಾಜೆ ಮ್ಹಣೊನ್ ಹಾಂವ್ ಚಿಂತಾಲೊಂ. ಪಣ್ ತಾಕಾ ಹಾಂವೆಂ ಮೊರ್ಚುವರಿಂತ್ ಮೆಳಾಜೆ ಜಾಲೆಂ.

ಮೇ 28, ಸನ್ವಾರಾ ಸಕಾಳಿಂ ಸಿಜ್ಯೆಸಾಕ್ ಹಾಂವೆಂ ಮೊರ‍್ಚ್ಯಾ 15 – 20 ಮಿನುಟಾಂ ಪಯ್ಲೆಂ ಫೋನ್ ಕೆಲ್ಲೆಂ. ತಾಣೆಂ ಕಾಡ್ಲೆಂನಾ. ಮಾಗಿರ್ ಡೊ| ಎಡ್ವರ್ಡಾಕ್ ಫೋನ್ ಕೆಲೆಂ. ತಾಣೆಂ ಕ್ಯಾನ್ಸರ್ boneಕ್ ಗೆಲ್ಲೆವಿಶಿಂ ಸಾಂಗ್ಲೆಂ. ತೆಂ ಮ್ಹಾಕಾ ಕಳಿತ್ ನಾತ್‌ಲ್ಲೆಂ. ತಾಚೆಂ ಫೋನ್ ದವರ‍್ತಾನಾ ವಿನ್ಸಿ ಆಂಜೆಲೊರ್‌ಚೆಂ ಫೋನ್ ಆಯ್ಲೆಂ ಆನಿ ತಾಚ್ಯಾ ಪಾಟಾಪಾಟ್ ದೊ| ಎಡ್ವರ‍್ಡಾಚೆಂ ಫೋನ್ ಆಯ್ಲೆಂ. ಸಿಜ್ಯೆಸ್ ಆನಿ ನಾ ಮ್ಹಣೊನ್ ಕಳ್ಳೆಂ. ಮ್ಹಾಕಾ ದೂಕ್ ಆಯ್ಲೆಂ. ಸರ್‌ಲ್ಲೆಂಚ್ ಮ್ಹಾಕಾ ಕಳಯ್ಜೆ, ಉದಯವಾಣಿ, ದಾಯ್ಜಿವರ್ಲ್ಡಾರ್ ಆನಿ ಹೆರ್‌ಕಡೆನ್ ಟೈಟಸ್ ಖಬರ್ ದಿತಲೊ ಮ್ಹಳ್ಳೆಂ ತಾಣೆಂ.

ಸರ್ಗಾ ವಿಶ್ಯಾಂತ್ ಮ್ಹಜೆಂ ಆನಿ ಸಿಜ್ಯೆಸಾಚೆಂ ಚಿಂತಾಪ್ ಚಡುಣೆಂ ಎಕ್‌ಚ್ ಆಸ್‌ಲ್ಲೆಂ. ಸಿಜ್ಯೆಸಾಕ್ ಪ್ರಾಯ್ ಸತ್ತರ್ ಜಾಲ್ಯಾರೀ ತಾಚೆಂ rational ಚಿಂತಾಪ್ 30ಚೆಂ ಆಸ್‌ಲ್ಲೆಂ. ಹಾಂವ್ ಸಿಜ್ಯೆಸಾಕ್ ವೊಳ್ಕಾತಾಂ ದೆಕುನ್, ಸರ‍್ಗಾಚೆಂ ಸುಖ್ ಮಾಗ್ಚೆಂಗೀ ಸೊಡ್ಚೆಂಗೀ ಮ್ಹಾಕಾ ಕಳಾನಾ. ದೇವ್ ವೈಕುಂಠಾಂತ್ ವೊರುಂ ಮ್ಹಣ್ಚೆಂಗೀ ಸೊಡ್ಚೆಂಗೀ ತೆಂಯ್ ಕಳಾನಾ. ಸಿಜ್ಯೆಸ್ ಖಂಯ್ ಆಸ್ಲ್ಯಾರೀ ಸಾಂಗಾತ್ಯಾಂಕ್ ಹಾಸಯ್ತ್ ಖುಶೆನ್ ಆನಿ ಸುಖಾನ್ ಆಸೊಂ ಮ್ಹಣೊನ್ ಆಶೆತಾಂ.

ಸಿಜ್ಯೆಸಾಚೊ ಕೊಂಕ್ಣಿ ವಾವ್ರ್ ಅಖಂಡ್ ಆನಿ ಸಮಗ್ರ್. ಕೊಂಕ್ಣಿ ಸಾಹಿತ್ಯ್, ತಾಂತ್ಲ್ಯಾ ತಾಂತೂಂ ಹಾಸ್ಯ್ ಸಾಹಿತ್ಯಾಚ್ಯಾ ಚರಿತ್ರೆಂತ್ ಸಿಜ್ಯೆಸಾಚೆಂ ನಾಂವ್ ಊಂಚ್ ಆನಿ ಲಾಂಬ್ ಕಾಳಾಕ್ ಉರ‍್ತಲೆಂ.

ಸಿಜ್ಯೆಸ್ ಜರ್ ನಾತ್‌ಲ್ಲೊ, ತಾಕೊಡೆಚೆಂ ನಾಂವ್ ಬಹುಶ್ಯಾ ಇತ್ಲ್ಯಾ ಲೊಕಾಚ್ಯಾ ಕಾನಾರ್ ಪಡ್ಟೆಂ ನಾತ್‌ಲ್ಲೆಂ, ಜಿಬೆರ್ ಘೊಳ್ಟೆಂ ನಾತ್‌ಲ್ಲೆಂ. ಸಿರಿಲ್ ಗ್ರೆಗರಿ ಸಿಕೇರ್, ಸಿಜಿ ತಾಕೊಡ್‌ಕಾರ್, ಸಿಜಿ ಬಿರಾವ್‌ಕಾರ್ ಆನಿ ಸಿಜ್ಯೆಸ್ ತಾಕೊಡೆ ಕೊಂಕ್ಣಿ ಸಾಹಿತ್ಯಾಂತ್ ಲಾಂಬ್ ಕಾಳ್ ಜಿಯೊಂ.

► ಟೈಟಸ್ ನೊರೊನ್ಹಾ, ತಾಕೊಡೆ

[ ಆಯ್ತಾರಾ, 12 ಜ್ಯೂನ್ 2022 ವೆರ್ ಮಂಗೂರ್ಚ್ಯಾ ಡೊನ್ ಬೊಸ್ಕೊ ಸಾಲಾಂತ್ ಮಾಂಡುನ್ ಹಾಡ್‌ಲ್ಲ್ಯಾ ಸರ್ವಜಣಿಕ್ ಶೃದ್ದಾಂಜಲಿ ಕಾರ್ಯಕ್ರಮಾಂತ್ ತಾಕೊಡೆಗಾರಾಂ ತರ್ಫೆನ್ ಭೆಟಯಿಲ್ಲೊ ಉತ್ರಾಂ – ನಮಾನ್ ]