ಡಿ ವಿ ಗುಂಡಪ್ಪಾನ್ ಲಿಕ್ಲಲೆಂ ಮಂಕುತಿಮ್ಮನ ಕಗ್ಗ ವಿವಿಧ್ ತತ್ವ್ಶಾಸ್ತ್ರಾಂ ಆನಿ ಗೂಂಡ್ ಆಧ್ಯಾತ್ಮಿಕ್ ಸುತ್ರಾಂ ಸೊಂಪ್ಯಾ ಆನಿ ಸಲೀಸಾಯೆನ್ ಸಮ್ಜುಂಚ್ಯಾ ಭಾಶೆಂತ್ ಪ್ರಸ್ತುತ್ ಕರ್ತಾ. ವಿವಿಂಗಡ್ ವರ್ಗಾಚ್ಯಾ ಲೊಕಾಂಚ್ಯೊ ವಿಭಿನ್ನ್ ಜಿಣ್ಯೆದಿಷ್ಟಿ ಮಾನಾನ್ ಲೆಕುನ್ ಮನ್ಶಾಕುಳಿ ಆಪುಣ್ ಎಕ್ಚ್ ಮ್ಹಣ್ಚೆಂ ಚಿಂತಪ್ ಪಾಸಾರ್ಚಿ ಹಿ ಕೃತಿ ಮನ್ಶಾವಾದಾಚೆಂ ಚಿಂತಪ್ ಮುಕಾರ್ ಮಾಂಡ್ತಾ. ಭಾಯ್ಲ್ಯಾ ದೆಕಿಕ್ ಹಾಂಗಾಸರ್ಚೆಂ ಚಿಂತಪ್ ವಿಚಾರ್ವಾದಿ ಆಸುನ್ ಆಸ್ತಿಕ್ ತತ್ವಾಕ್ ಮಹತ್ವ್ ದೀನಾಂ ಮ್ಹಣ್ಚೆಪರಿಂ ದಿಸ್ತಾ ತರಿ ಸರ್ವ್ ಸಿದ್ಧಾಂತಾಂಚೆಂ ಬಳ್ ಜಾವ್ನಾಸುನ್ ಸಗ್ಳ್ಯಾ ಸೃಷ್ಟೆಕ್ ನಿಯತೆನ್ ಚಲಂವ್ಚ್ಯಾ ತ್ಯಾ ವಿಚಿತ್ರ್ ಸಕ್ತೆಕ್ ಮಾನುನ್ ಘೆಂವ್ಚ್ಯಾಂತ್ ಆನಿ ತಾಕಾ ವಿಧೇಯ್ ಜಾಂವ್ಚ್ಯಾಂತ್ ಹ್ಯಾ ಕೃತಿಯೆಚಿ ಸೊಭಾಯ್ ಸ್ಪಷ್ಟ್ ಜಾತಾ. ಹ್ಯಾ ಕೃತಿಯೆಚಿ ವಾಪರ್ಣಿ ಆಮ್ಚ್ಯಾ ಸದಾಂ ಜಿವಿತಾಂತ್ ಪರ್ತ್ಯಾಂ ಪರ್ತ್ಯಾಂ ಜಾವ್ನ್ ಆಮ್ಚೆಂ ಮನ್ ಸೃಷ್ಟೆಚ್ಯಾ ಗುಂಡಾವ್ಯಾ ಸತಾಂ ತೆವ್ಶಿಂ ಪರ್ತಾಜೆ ಮ್ಹಣ್ ಮೂಡ್ಬಿದ್ರಿ ಕೋರ್ಪುಸ್ ಕ್ರಿಸ್ತಿ ಫಿರ್ಗಜೆಚೊ ವಿಗಾರ್ ಬಾಪ್ ಒನಿಲ್ ಡಿಸೋಜಾ ಮ್ಹಣಾಲೊ.
ತೊ ಸಾಂತ್ ಲುವಿಸ್ ಕೊಲೆಜಿಂತ್ ಚಲ್ಲ್ಲ್ಯಾ ಕಾರ್ಯಾಂತ್ ಕರ್ನಾಟಕ ಸರ್ಕಾರಾಚ್ಯಾ ಕುವೆಂಪು ಭಾಷಾ ಭಾರತಿ ಪ್ರಾಧಿಕಾರಾನ್ ಪರ್ಗಟ್ಲಲೊ ಕನ್ನಡಾಚೊ ಶ್ರೇಷ್ಟ್ ಕವಿ ಡಿವಿಜಿಚೊ ಮಂಕುತಿಮ್ಮನ ಕಗ್ಗ ಪ್ರೊ. ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆನ್ ಕೊಂಕ್ಣಿಕ್ ಭಾಶಾಂತರ್ ಕರ್ನ್ ಸಂರಚಿತ್ ಕೆಲ್ಲೊ ’ಮಂಕುತಿಮ್ಮಾಚೆಂ ಕಾವ್ಯೆಂ’ ಪುಸ್ತಕ್ ಲೊಕಾರ್ಪಣ್ ಕರ್ನ್ ಉಲಯ್ತಾಲೊ. ಹೆರಾಂಕ್ ಸೊಸುನ್ ಘೆವ್ನ್ ಉತ್ತೀಮ್ ಮನಿಸ್ ಜಾಂವ್ಚೆಂ ಅನಿವಾರ್ಯ್ ಜಾಲ್ಲ್ಯಾ ಹ್ಯಾ ಕಾಳಾಂತ್ ಮಂಕುತಿಮ್ಮನ ಕಗ್ಗ ವಾಚಪ್ ಆಮ್ಕಾಂ ವ್ಹಡ್ ಆಧಾರ್ ಮ್ಹಣ್ ತಾಣೆಂ ಸಾಂಗ್ಲೆಂ.
ಕಾರ್ಯಾಂತ್ ಪುಸ್ತಕಾಚಿ ವಳಕ್ ಕರ್ನ್ ದಿಲ್ಲ್ಯಾ ಕೊಲೆಜಿಚೊ ರಿಜಿಸ್ಟ್ರಾರ್ ಡಾ. ಆಲ್ವಿನ್ ಡೆ’ಸಾನ್. ಮಂಕುತಿಮ್ಮನ ಕಗ್ಗ ಕಾವ್ಯಾಂತ್ ಡಿವಿಜಿನ್ ಸಾದ್ಯಾ ಲೊಕಾಂಚೊ ಅನ್ಭವ್ ಆನಿ ಅನುಭಾವ್ ಪ್ರಸ್ತುತ್ ಕರ್ಚೆಂ ಪ್ರೇತನ್ ಕೆಲಾಂ. ತಾಣೆಂ ಉಗ್ಡಾಪಿಂ ಕರ್ಚಿಂ ಸತಾಂ ಆನಿ ತ್ಯಾ ಸತಾಂಕ್ ಉಗ್ಡಾಪೆಂ ಕರುಂಕ್ ವಾಪರ್ಚಿ ಭಾಸ್ ಎಕ್ದಮ್ ಸೊಂಪಿ. ತಶೆಂತರಿ ತಿ ಭಾಸ್ ಸಕಾಳಿಕ್ ಆನಿ ಸರ್ವ್ಕಾಳಿಕ್. ಹ್ಯಾ ಕಾವ್ಯಾಚಿ ಸೋಭಾಯ್ ವಾಪರ್ಲಲ್ಯಾ ಸಬ್ಧಾಂನಿ ಆಸ್ಚೆಪರಿಂ ತ್ಯಾ ಸಬ್ಧಾಂನಿ ಲಿಪುನ್ ದವರ್ಲಲ್ಯಾ ಅರ್ಥಾಗ್ರೇಸ್ತ್ಕಾಯೆಂತ್ ರೊಂಬುನ್ ಆಸಾ. ವೇದೋಪನಿಷತ್, ಪುರಾಣ್, ವಿವಿಧ್ ಮಹಾಕಾವ್ಯಾಂಚ್ಯಾ ತಶೆಂಚ್ ಸಭಾರ್ ಧರ್ಮಾಂಚ್ಯಾ ಧರ್ಮ್ಗ್ರಂಥಾಂತ್ಲ್ಯಾ ಜಾಣ್ವಾಯೆಕ್ ಆನಿ ಜಿಣ್ಯೆದಿಷ್ಟಾವ್ಯಾಕ್ ಭರುನ್ ಘೆತ್ಲ್ಲೊ ಪುಸ್ತಕ್ ಖಂಚೊಯ್ ಆಸಾ ತರ್ ತೊ ಮಂಕುತಿಮ್ಮನ ಕಗ್ಗ. ಅಸಲ್ಯಾ ಮಹಾನ್ ಕೃತಿಯೆಕ್ ಭಾಶಾಂತರ್ ಕರ್ಚೆಂ ಕಠಿಣ್ ಕಾಮ್, ತೆಂ ಕಾಮ್ ಜವಾಬ್ಧಾರೆನ್ ಆನಿ ವ್ಹರ್ತ್ಯಾ ಸುಕ್ಷಿಮಾಯೆನ್ ಕರ್ನ್ ಮುಗ್ದಿಲ್ಲ್ಯಾ ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆಕ್ ಅಭಿನಂದನ್ ಪಾಠಯ್ತಾಂ ಮ್ಹಣಾಲೊ.
ಮುಕೆಲ್ ಸಯ್ರೊ ಜಾವ್ನ್ ಕಾರ್ಯೆಂ ಸೊಭಯಿಲ್ಲೊ ಕುವೆಂಪು ಭಾಷಾ ಭಾರತಿ ಪ್ರಾಧಿಕಾರಾಚೊ ಅಧ್ಯಕ್ಷ್ ಡಾ. ಗಿರೀಶ್ ಭಟ್ ಅಜಕ್ಕಳಾನ್ ಪ್ರಾಧಿಕಾರಾಚ್ಯಾ ಯೋಜನಾಂಚೊ ಆನಿ ದ್ಯೇಯೋದ್ದೇಶಾಂಚಿ ವಳಕ್ ಕರ್ನ್ ದಿಲಿ ತಶೆಂಚ್ ಡಿವಿಜಿ ಖಂಚ್ಯಾ ರಿತಿನ್ ಆಪ್ಲ್ಯಾ ಕಾವ್ಯಾಂತ್ ಪ್ರಸ್ತುತ್ ಕೆಲ್ಲ್ಯಾ ಉದಾತ್ತ್ ತತ್ವ್ಸಿದ್ಧಾಂತಾಂಪರಿಂ ಜಿಯೆಲೊ ಮ್ಹಣ್ಚೆಂ ತಾಣೆಂ ನಿದರ್ಶನಾಂ ಸಮೇತ್ ವಿವರಿಲೆಂ. ಡಿವಿಜಿಚ್ಯಾ ಮಂಕುತಿಮ್ಮನ ಕಗ್ಗ ಕೃತಿಯೆಂತ್ಲ್ಯಾ ಉತ್ರಾಂಚೊ ಉಲ್ಲೇಕ್ ಕರ್ತಾಂವ್, ಸರ್ಕಾರಾನ್ ಸಯ್ತ್ ಲೊಕಾಂನಿ ಡಿವಿಜಿಚ್ಯಾ ಉತ್ರಾಂಚೊ ಉಗ್ಡಾಸ್ ಕಾಡ್ಚ್ಯಾಕ್ ವೆವಸ್ತಾ ಕರ್ತಾ. ಹಜಾರೋ ಜಣಾಂನಿ ಕಗ್ಗಾಚೆ ಭಾಗ್ ವಾಚುನ್ ಆಪ್ಲಿ ಜೀಣ್ ಸುಧಾರ್ಸುನ್ ಘೆತ್ಲಿ ಮ್ಹಣ್ ಸಾಂಗ್ಚೆಂ ಆಮಿ ವಾಚ್ತಾಂವ್. ಆಮ್ಚ್ಯಾ ಜಿವಿತಾಂತ್ಲೊ ಕಾಳೊಕ್ ಕಗ್ಗಾಚ್ಯಾ ಉಜ್ವಾಡಾಂತ್ಲ್ಯಾನ್ ಧಾಂವ್ಡಾಂವ್ಕ್ ಪ್ರೇತನ್ ಕರ್ಯಾಂ ಮ್ಹಣ್ ತಾಣೆಂ ಸಾಂಗ್ಲೆಂ.
ಕಾರ್ಯಾಚೆಂ ಅಧ್ಯಕ್ಷ್ಪಣ್ ಘೆತ್ಲ್ಲ್ಯಾ ಕೊಲೆಜಿಚೊ ಪ್ರಿನ್ಸಿಪಲ್ ಜೆಜ್ವಿತ್ ಬಾಪ್ ಡಾ. ಪ್ರವೀಣ್ ಮಾರ್ಟಿಸ್ ಉಲವ್ನ್ ಮಂಕುತಿಮ್ಮನ ಕಗ್ಗ ಏಕ್ ಶ್ರೇಷ್ಟ್ ಸಾಹಿತಿಕ್ ಕೃತಿ ಅಸಲಿ ಕೃತಿ ಕೊಂಕ್ಣಿಕ್ ಆಯಿಲ್ಲ್ಯಾನ್ ಕೊಂಕ್ಣಿ ಸಾಹಿತಾಚೆಂ ಮಾಪ್ ವಾಡ್ಲಾಂ ಮ್ಹಣಾಲೊ. ಅಸಲ್ಯಾ ಗೂಂಡ್ ಅನ್ಭವಿ ಚಿಂತ್ಪಾಂಚೆಂ ಸಾಹಿತ್ ಭಾಶಾಂತರ್ ಕರ್ಚೆಂ ಎಕ್ದಮ್ ಕಠಿಣ್ ಕಾಮ್ ತಾಂತ್ಲ್ಯಾತಾಂತುಂ ಕಾವ್ಯಾಚೆಂ ಭಾಶಾಂತರ್ ಕರ್ತಾನಾಂ ಮೂಳ್ ಕೃತಿಯೆಚೆಂ ರೂಪ್ – ಸ್ವರೂಪ್ ಆನಿ ದೊನ್ಯ್ ಸಂಸ್ಕೃತೆಂಚೊ ಅರ್ಥ್ ಆನಿ ಶೆವಟ್ ಸಾಂಬಾಳ್ನ್ ಘೆಂವ್ಕ್ ಪೆಚಾಡ್ಚೆಂ ಪಡ್ತಾ. ಅಸಲೆಂ ಭಂಗಾಚೆಂ ಕಾಮ್ ಫುಗಾರ್ಣೆಕ್ ಫಾವೊ ಜಾಂವ್ಚೆ ರಿತಿನ್ ಕೆಲ್ಲೊ ಪ್ರೊ. ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ ಆಮ್ಚ್ಯಾ ಸಾಂತ್ ಲುವಿಸ್ ಕೊಲೆಜಿಚೊ ಮ್ಹಾಲ್ಘಡೊ ವಿದ್ಯಾರ್ಥಿ ಮ್ಹಣ್ಚೆಂ ಅಭಿಮಾನಾಕ್ ಫಾವೊ. ಸಾಂತ್ ಲುವಿಸ್ ಕೊಲೆಜಿಚೆ ವಿದ್ಯಾರ್ಥಿ ಕೊಂಕ್ಣಿ ಶಿಕ್ಪಾಂತ್ ವ್ಹರ್ತಿ ಆತುರಾಯ್ ದಾಕಯ್ತಾತ್ ತಾಣಿಂ ಕೊಂಕ್ಣಿ ಸಾಹಿತ್ ವಾಚ್ಚ್ಯಾಂತ್ ಆನಿ ಆಪ್ಣೆಂ ಜಾವ್ನ್ಂಚ್ ಸಾಹಿತ್ ರಚ್ಚ್ಯಾಂತ್ ವಾಂವ್ಟ್ ಕೆಲಿ ತರ್ ಆಮ್ಚಿ ಭಾಸ್ ಆನಿ ತಿತ್ಲಿ ಗ್ರೇಸ್ತ್ ಜಾಂವ್ಚ್ಯಾಂತ್ ದುಬಾವ್ ನಾಂ ಮ್ಹಣ್ ತಾಣೆಂ ಸಾಂಗ್ಲೆಂ.
ಕೊಲೆಜಿಚಿ ಇಂಗ್ಲಿಷ್ ಉಪನ್ಯಾಸಕಿ ಶ್ರೀಮತಿ ಸೆವ್ರಿನ್ ಪಿಂಟೊನ್ ಸ್ವಾಗತ ಭಾಶಣ್ ಕೆಲೆಂ. ಪ್ರೊ. ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆನ್ ಉಪ್ಕಾರ್ ಆಟವ್ಣಿ ಕೆಲಿ. ವಿದ್ಯಾರ್ಥಿ ರಾಹುಲ್ ನೊರೊನ್ಹಾನ್ ಕಾರ್ಯೆಂ ನಿರ್ವಹಣ್ ಕೆಲೆಂ.
