ಇಮಾಜ್

“ಕಾಲ್ ಸಾಂಜೆರ್ ಸಾಂಗ್‌ಲ್ಲೆಂ ಉಡಾಸ್ ಆಸಾಮೂ?, ತುಂವೆಂ ವ್ಹಯ್ಲ್ಯಾ ಮಾಳಯೆಚ್ಯಾ ಕುಡಾಂತ್ ಸಾಂಜೆಚ್ಯಾ ಚ್ಯಾರ್ ವೊರಾಂಚ್ಯಾಕೀ ಪಯ್ಲೆಂಚ್ ವೆಚೆಂ ಆನಿ ಕುಡಾಚೆಂ ದಾರ್ ಬಂದ್ ಕರ್ನ್ ಬೊಸ್ಚೆಂ. ಸಗ್ಳಿಂ ವೆತಾಸರ್ ತುವೆಂ ಸಕ್ಲಾ ಬಿಲ್ಕುಲ್ ಯೆಂವ್ಚೆಂ ನ್ಹಯ್” ಆಲಿಸ್ ಬಾಯೆನ್ ಅಪ್ಲೆ ಬಿಕ್ಣಾದೊಳೆ ಅನಿಕ್‌ಯೀ ವ್ಹಡ್ ಕರುನ್ ಅಪ್ಲ್ಯಾ ಘಡ್ಗಡ್ಯಾ ತಾಳ್ಯಾಂತ್ ದಿಲ್ಲೊ ಆದೇಸ್ ಆಯ್ಕಲ್ಲೆಪರಿಂಚ್ ಹುಂಬ್ರಾರ್ ಬೊಸೊನ್ ಆಸ್ಚೊ ಪೆಟೊ ’ಕಾಂಯ್ ಅಪ್ಣಾಚೆರ್ ದಡ್ಯೊ ಪಡ್ಲ್ಯೊ ಮ್ಹಣುನ್’ ಟೊಮಿ ಉಟೊನ್ ಭಾಯ್ರ್ ಗೆಲೊ.

ಆಲಿಸ್ ಬಾಯೆಕ್ ವಾಡ್ಯಾಂತ್ ಚಡ್ತಾವಾಂ ಘಡ್ಗಡೊ ಬಾಯ್ಲ್ ಮ್ಹಣ್ತಾಲಿಂ ಪುಣ್ ಗುಪ್ತಿಂ. ತಾಕಾ ಸರಿ ಜಾವ್ನ್ ತಿಚೊ ’ಊಟ್ ಮ್ಹಣ್ತಾನಾ ಉಟ್ಚೊ, ಬೋಸ್ ಮ್ಹಣ್ತಾನಾ ಬೊಸ್ಚೊ’  ಬೆಪ್ಪೊ ಘೊವ್ ವಿಶೆಂತ್ ಗಲ್ಫಾಂತ್ ಅಟ್ರಾ ವರ್ಸಾಂ ಕಾಮ್ ಕರ್ನ್, ಉಪ್ರಾಂತ್ ಅಪ್ಲ್ಯಾ  ಚೆರ್ಕ್ಯಾಕ್ ಕುವೆಯ್ಟಾಕ್ ಹಾಡವ್ನ್, ಮದಾಮೆಚೆ ಪಾಂಯ್ ಧರುನ್ ಕಾಮಾಕ್ ಲಾಗವ್ನ್ ಗಾಂವಾಕ್ ಯೇವ್ನ್ ಥೊಡೊಚ್ ತೇಂಪ್ ಜಾಲ್ಲೊ.

ದೊಗ್‌ಯೀ ಪುತಾಂಕ್ ಆಸ್ತಿಂತ್ಲೊ ವಾಂಟೊ ಏಕ್ ಸಮಾನ್ ಮ್ಹಣುನ್ ವೀಲ್ ಕರುನ್ ಗೆಲ್ಲ್ಯಾ ಕಾರಣಾಕ್ ಲಾಗುನ್ ಪ್ರಾಯೆನ್ ಅಪ್ಣಾಚ್ಯಾಕೀ ಸಾತ್ ವರ್ಸಾಂ ಲ್ಹಾನ್ ತರ್‌ಯೀ, ಮತಿಚ್ಯಾ ಪಿಡೆವರ್ವಿಂ, ಸಾರ್ಕೆಂ ಉಲಂವ್ಕ್ ಜಾಯ್ನಾಸ್ಚೊ ಸಾವೆರ್ ಘರಾಂತ್ ಘರಾಭಿತರ್ ಯೆಂವ್ಚ್ಯಾ ಕುಂಕ್ಡಾಂಕ್ ವ ಆಂಗ್ಣಾಂತ್ ಸುಕತ್ ಘಾಲ್ಲ್ಯಾ ತಾಂದ್ಳಾಕ್ ಖಾಂವ್ಕ್ ಯೆಂವ್ಚ್ಯಾ ಕಾವ್ಳ್ಯಾಂಕ್ ’ಹುಯ್ಯಿ’ ಮ್ಹಣ್ ಧಾಂವ್ಡಾಂವ್ಚೆಂ ಕಾಮ್ ಸೊಡ್ನ್ ಹೆರ್ ಕಿತೆಂಯ್ ಕರುಂಕ್ ಸಕಾನಾತ್ಲೊ. ಪೆಂಟೆಸಾಲಾಂತ್ ಆಸ್ಚ್ಯಾ ದೇಡ್ ಎಕ್ರೊ ಸುವಾತೆಕ್ ಕಿತ್ಯಾಕ್ ದೋನ್ ವಾಂಟೆ ಕರ್ಚೆ? ಸಾವೆರಾಕ್ ಆಮಿಂ ಸೊಡ್ಲ್ಯಾರ್ ಆನಿ ಕೊಣ್ ಆಸಾ ಆಧಾರ್? ಅಶೆಂ ಮ್ಹಣುನ್ ವಿಶೆಂತಿನ್ ಆನಿ ಆಲಿಸ್ ಬಾಯೆನ್ ಸಾವೆರಾಚಿ ಜತನ್ ಘೆಂವ್ಚಿ ಆಸ್ಲಿ.

“ಓಹ್.. ಘರ್ ಪುಣಿ ಸೊಭಿತ್ ಭಾಂದ್ಲಾಂ ಆಲಿಸ್ ಬಾಯೆನ್, ಗೆಟಿಭಿತರ್ ದೋನ್ ಕಾರಾಂ ಸಲೀಸಾಯೆನ್ ಪಾರ್ಕ್ ಕರುಯೆತಾ, ದೆಕುನ್ ಆಂಗ್ಣಾಭಂವಾರಿಂ ಫುಲಾಂ ಝಡಾಂ ಲಾಯ್ಲ್ಯಾರ್ ಘರಾಚಿ ಸೊಭಾಯ್ ದೊಡ್ತಿ ಜಾಯ್ತ್. ತಶೆಂಚ್ ಏಕ್ ಅಲ್ಶೇಶಿಯನ್ ವಾ ಡಾಬರ್‌ಮೆನ್ ಪೆಟೊ ತರೀ ಘರಾಂಕ್ ಆಸ್ಲ್ಯಾರ್ ವ್ಹಾ ಕಿತೆಂ ಅಪುರ್ಭಾಯ್?” ಆಧ್ಲೆಪಾವ್ಟಿಂ ಘರ್ ಬೆಜ್ಮೆಂತ್ ಕರುಂಕ್ ಆಯಿಲ್ಲೆವೆಳಾರ್ ಪಾದ್ರಿನ್ ಸಾಂಗ್ಲೆಲಿಂ ಉತ್ರಾಂ ‘ದೆವಾಚೆಂ ಉತರ್ ಹೆಂ’ ಮ್ಹಳ್ಳೆಪರಿಂ ಆಲಿಸ್ ಬಾಯ್ ಪಾಳುನ್ ಆಯ್ಲ್ಯಾ ಜಾಲ್ಲ್ಯಾನ್. ಎಕಾ ಹಫ್ತ್ಯಾಕ್ ತರ್‌ಯೀ ಭಾಡ್ಯಾಚೊ ಡಾಬರ್‌ಮೆನ್ ಪೆಟೊ ಹಾಡ್ ಮ್ಹಣುನ್ ಪಾಟ್ಲ್ಯಾ ಥೊಡ್ಯಾ ದಿಸಾಂ ಥಾವ್ನ್ ಬಾಯ್ಲ್ ಪಾಟಿಕ್ ಲಾಗ್‌ಲ್ಲ್ಯಾನ್ ಎಕಾ ಸಕಾಳಿಂ ಗೆಲ್ಲೊ ವಿಶೆಂತ್ ಪೆಟ್ಯಾಕ್ ಘೆವ್ನ್ ಯೆಂವ್ಚ್ಯಾರ್ ಆಸ್ಲೊ.

ಆಲಿಸ್ ಬಾಯ್ ಫಿರ್ಗಜೆಂತ್ ಕಾರ್ಯಾಳ್, ಮರಿಯೆಚ್ಯಾ ಸೊಡೆಲಿಟಿಂತ್ ಜಾಂವ್, ಸಾಂ ದುಮಿಂಗಾಚ್ಯಾ ಸಂಘಟನಾಂತ್ ಜಾಂವ್, ಸ್ತ್ರೀಯಾಂಚೆಂ ಸಂಘಟನ್ ಜಾಂವ್, ಸಾಂ ವಿಶೆಂತ್ ಸಭೆಂತ್ ಜಾಂವ್ ಸಗ್ಳ್ಯಾಂನಿ ಆಸಾ. ವಾಡ್ಯಾಚಿ ಘುರ್ಕಾರ್ನ್ ಸಯ್ತ್ ತಿ ಜಾಲ್ಲ್ಯಾನ್ ಹ್ಯಾ ವಾಡ್ಯಾಚ್ಯಾ ಘರಾನ್ ಘರ್ ಇಮಾಜ್ ಭಂವ್ಡಾಂವ್ಚಿ ಜವಾಭ್ದಾರಿ ಆಲಿಸ್ ಬಾಯೆಚಿ. ಹ್ಯೇ ಪಾವ್ಟಿಂ ಸಯ್ತ್ ಆಮ್ಚ್ಯಾ ಘರಾಂತ್ ಇಮಾಜ್ ಬರಿಚ್ ಕರ್ನ್ ಹಾಡಿಜೆ ಆನಿ ವಾಡ್ಯಾಂತ್ ಸಗ್ಳ್ಯಾಂನಿ ’ಶಾಭಾಸ್’ ಮ್ಹಣಾಜೆ ಮ್ಹಳ್ಳಿಂ ಖತ್ಕತಿಂ ಚಿಂತ್ನಾಂ ಆಲಿಸ್ ಬಾಯೆಚಿಂ.

ಆಧ್ಲ್ಯೆ ಪಾವ್ಟಿಂ ಮ್ಹಳ್ಯಾರ್ ದೋನ್ ವರ್ಸಾಧಿಂ ಫಿರ್ಗಜೆಕ್ ಇಟಲಿಥಾವ್ನ್ ಘಾಂಟ್ ಹಾಡುಂಕ್ ಆಸ್ತಾನಾ ಸಯ್ತ್ ಅಶಿಚ್ ಘರಾನ್ ಘರ್ ಇಮಾಜ್ ಹಾಡ್‌ಲ್ಲಿ. ಘರಾನ್ ಘರ್ ಹಾಡ್‌ಲ್ಲ್ಯಾ ಸಾಂತಾಚ್ಯಾ ಇಮಾಜೆವರ್ವಿಂಚ್ ಜಾಯ್ತೆಂ ಬರೆಂಪಣ್ ಜಾಲಾಂ ಮ್ಹಳ್ಳಿ ತಿಚಿ ಪಾತ್ಯೆಣಿ ಪುಣ್ ವಾಡ್ಯಾಚ್ಯಾ ಬಾಯ್ಲಾಂ ಅಪ್ಣಾಕ್ ತುಕ್ಲಾಯ್ತಾಲಿಂ ಮ್ಹಣುನ್ ಉಚಾಂಬಳ್ ಜಾಲ್ಲೊ ಸಾವೆರ್ ’ಮೇ… ಯೆಂ.. ಹುಂ…. ಬ್ಬಾ..’ ಅಶೆಂ ಅಪ್ಲೊ ತಾಳೊ ಉಭಾರ್ನ್ ಕಿತೆಂಗಿ ಸಾಂಗ್ತಾಲೊ. ಸಗ್ಳ್ಯಾಂ ಸಮೊರ್ ಹಿ ಎಕಾಥರಾಚಿ ಧೊಸ್ ಮ್ಹಣುನ್ ಪಾತ್ಯೆಲ್ಲ್ಯಾ ಆಲಿಸ್ ಬಾಯೆನ್ ಹ್ಯೇ ಪಾವ್ಟಿಂ ಸಾವೆರಾಕ್ ವಯ್ಲ್ಯಾ ಮಾಳಯೆಂತ್ ಕುಡಾಂತ್ ರಾವಂವ್ಚೊ ಆನಿ ಇಮಾಜ್ ಹಾಡುನ್ ಆಯಿಲ್ಲ್ಯಾ ತಶೆಂಚ್ ಘರಾ ಯೆಂವ್ಚ್ಯಾ ವಾಡ್ಯಾಚ್ಯಾ ಲೊಕಾಂನಿ ಗೆಲ್ಲೆಪರಿಂಚ್ ಸಾವೆರಾಕ್ ಸಕ್ಲಾ ಆಪಂವ್ಚೊ ನಿಚೆವ್ ಆಲಿಸ್ ಬಾಯೆನ್ ಕೆಲ್ಲೊ.

***

’ತುಜ್ಯಾ ಸೆಜಾರಿನ್ ಹ್ಯೇ ಪಾವ್ಟಿಂ ಗಡ್ದಾಯೆನ್ ಇಮಾಜೆಕ್ ಘರಾ ಹಾಡಯ್ಲಾ, ಆಯಿಲ್ಲ್ಯಾಂಕ್ ಬರೆಂ ಖಾಂವ್ಕ್ ಆನಿ ಪಿಯೆಂವ್ಕ್ ದಿಲಾಂ’ ಸೆಸಿಲಾಮಿ ಅಪ್ಲಿ ಏಕ್ ಫುಟ್ ಲಾಂಬ್ ಜಿಬೆನ್ ಖಬ್ರೆಂಕ್ ಫೊಣ್ಣ್ ಘಾಲ್ತಾಲಿ.

’ಆಧ್ಲೆಪಾವ್ಟಿಂ ಆಯಿಲ್ಲ್ಯಾಂಕ್ ಚಾಪ್ಪೆಂ ಶರ್ಬತ್ ಮಾತ್ರ್ ದಿಲ್ಲೆಂ’ ಮ್ಹಣುನ್ ಆಯಿಲ್ಲ್ಯಾನಿ ತುಕ್ಲಾಯಿಲ್ಲೆಂ ಕೊಣೆಂಗೀ ಬಾಯ್ಲೆಚ್ಯಾ ಕಾನಾಕ್ ಘಾಲಾಂಸ್ತೆಲೆಂ’ ಗೊದ್ದೆಬಾಯೆನ್ ಅಪ್ಲಿ ಜೀಬ್ ವಾರ‍್ಯಾರ್ ಘಾಲಿ.

’ಘೆತ್ಲೆಲ್ಯಾಂಚೆಂ ಪಾಟಿಂ ದೀಜೆ ಮ್ಹಣ್ ನಾ, ಲೊಕಾಕ್ ದಾಕಂವ್ಕ್ ಡೋಂಗ್ ಕರ್ನ್ ಕಿತೆಂ ಫಾಯ್ದೊ? ಇಮಾಜ್ ಹಾಡ್ಚಿ ಮ್ಹಳ್ಯಾರ್ ಕಿತೆಂ ಚಿಲ್ಲರ್ ಗಜಾಲ್?’ ಇಸ್ರೇಲಾಂತ್ ಇಕ್ರಾ ವರ್ಸಾಂ ಕಾಮ್ ಕರ್ನ್ ಗಾಂವಾಂತ್ ಮದಾಮ್ ಜಾಲ್ಲಿ ಎಕ್ಲಿ ಲಾಗಿಂ ಆಯ್ಲಿ.

’ತುಂವೆಂ ಆಯ್ಕಲೆವೆಂ? ಸಕಯ್ಲ್ಯಾ ವಾಡ್ಯಾಚೊ ಆಂತೊನಾಬ್ ಪಿಸೊ ಜಾವ್ನ್ ರಸ್ತೊ ಭಂವ್ತಾ ಕಂಯ್’ ಅನ್ಯೇಕ್ಲ್ಯೆನ್ ಪುಸುರ್ ಪುಸುರ್ ಕೆಲೆಂ.
ಆಲಿಸ್ ಬಾಯ್ ಕಾಮ್ ಕರ್ನ್ ಆಸ್ಲೆಪರಿಂಚ್ ಅಪ್ಲೆ ಕಾನ್ ನೀಟ್ ಕರುನ್ ಆಯ್ಕತಾಲಿ, ’ಪಿಸೊ ಜಾಯ್ನಾಸ್ತಾಂ ರಾವ್ತಾವೆ ತರ್? ಕೊಣ್‌ಯೀ ಘರಾ ಇಮಾಜ್ ಹಾಡುಂಕ್ ನೆಗಾರ್ ಕರ್ತಾವೆ?’ ತಿಚ್ಯಾ ತೊಂಡಾಂತ್ಲಿಂ ಉತ್ರಾಂ ಅಪ್ಶಿಂಚ್ ಆಯ್ಲಿಂ. ಅಪ್ಲ್ಯಾ ಪುತಾಕ್ ಗಲ್ಫಾಕ್ ವರುಂಕ್ ತಿ ಇಮಾಜ್‌ಚ್ ಕಾರಣ್ ಮ್ಹಳ್ಳೆಂ ಚಿಂತಪ್ ತಿಚ್ಯಾ ಮತಿಂತ್ ಖಡ್ಪಾಪರಿಂ ಖಂಚ್‌ಲ್ಲೆಂ. ಹಾಕಾ ಕಾರಾಣ್‌ಯೀ ಆಸ್ಲೆಂ, ಆಧ್ಲ್ಯೆ ಪಾವ್ಟಿಂ ಇಗರ್ಜೆಚ್ಯಾ ಘಾಂಟಿಕ್ ಲಾಗುನ್ ಕಲೆಕ್ಶನ್ ಕರುಂಕ್ ಘರಾನ್ ಘರ್ ಇಮಾಜ್ ತಶೆಂಚ್ ಕಂರ್ಡೊ ಭಂವ್ಡಾಯಿಲ್ಲೊ. ಆನಿ ಮೆಜುನ್ ದೋನ್ ಮಯ್ನ್ಯಾಂನಿ ಪೂತ್ ಗಲ್ಫಾಕ್ ಗೆಲ್ಲಿ ಖಂಡಿತ್ ಜಾವ್ನ್ ಇಮಾಜೆಚಿಂ ಮಹಿಮಾ, ಇಮಾಜ್ ಘರಾ ಆಯಿಲ್ಲೆಪರಿಂಚ್ ತೊ ಸಾಂತ್‌ಯೀ ಘರಾ ಯೇವ್ನ್ ಅಜ್ಯಾಪಾಂ ಕರುನ್ ಬೆಸಾವಾಂ ಘಾಲುನ್ ವೆತಾ ಮ್ಹಣುನ್ ತಿ ನಖ್ಖಿ ಪಾತ್ಯೆಲ್ಲಿ ಜಾಲ್ಲ್ಯಾನ್ ಹ್ಯೇ ಪಾವ್ಟಿಂ ಇಮಾಜ್ ಯೆತಾನಾ ಸರ್ವ್ ಸರ್ಬರಾಯ್ ಕರುಂಕ್ ಕಿತೆಂಚ್ ಉಣೆಂ ಪಡಾನಾಯೆ ಮ್ಹಣುನ್ ತಿಣೆಂ ಯೆದೊಳ್‌ಚ್ ಘರ್ ನಿತಳ್ ಕೆಲ್ಲೆಂ, ಆಯಿಲ್ಲ್ಯಾಂಕ್ ಸ್ವಾಗತ್ ಪಿಯೊಣೆಂ, ತಶೆಂಚ್ ಇಮಾಜ್ ಹಾಡ್ನ್ ಯೆತಾನಾ ಮೆಟಾಂ ಮೆಟಾಂಕ್ ಫೋಟೊ ಕಾಡ್ಚಿ ಜವಾಭ್ದಾರಿ ಗಾಂವ್ಚ್ಯಾ ಫೋಟೋಗ್ರಾಫರಾಕ್ ದಿಲ್ಲಿ. ವಾಟ್ ಸುಂರ್ಗಾರಾಂವ್ಕ್ ಫುಲಾಂ ಹಾಡ್ಚಿ ತಶೆಂಚ್ ತಿಂ ಗುಂತುನ್ ಉಮ್ಕಳಾಂವ್ಚಿ ಜವಾಭ್ದಾರಿ ಸೆಜಾರ್ಚ್ಯಾ ಭುರ್ಗ್ಯಾಂಕ್ ದಿಲ್ಲಿ.

’ಆಧ್ಲ್ಯೆಪಾವ್ಟಿಂ ಘಾಂಟಿಚ್ಯಾ ಕಾರಣಾಕ್ ಇಮಾಜ್ ಭಂವ್ಡಾಯ್ತಾನಾ ಜಾಲ್ಲ್ಯಾ ಕಲೆಕ್ಷನಾಚೊ ವಿವರ್ ಫಕತ್ ಫಿರ್ಗಜ್ ಪತ್ರಾಂತ್ ಮಾತ್ರ್ ಛಾಪ್‌ಲ್ಲೊ. ಪುಣ್ ಹ್ಯೇ ಪಾವ್ಟಿಂ ಎಕೆಕಾ ವಾಡ್ಯಾಚ್ಯಾ ಕಲೆಕ್ಷನಾಚೊ ವಿವರ್ ಸಕ್ಕಡ್ ವಾಟ್ಸಾಪ್ ಪಂಗ್ಡಾಂನಿ ಆಮಿ ಧಾಡ್ತಾಂವ್, ತಶೆಂಚ್ ಚಡ್ ಕಲೆಕ್ಷನ್ ಕೆಲ್ಲ್ಯಾಂಕ್ ವ್ಹಡ್ಲ್ಯಾ ಫೆಸ್ತಾಚ್ಯಾ ಮಿಸಾವೆಳಾರ್ ಮಾನಾಚಿ ವಾತ್ ದಿತಾಂವ್’ ಮ್ಹಣುನ್ ಪಾದ್ರಿನ್ ಯೆದೊಳ್‌ಚ್ ಸಾಂಗ್‌ಲ್ಲೆಂ ದೆಕುನ್ ಲೊಕಾಂಚ್ಯಾ ಮತಿಂತ್ ಸಯ್ತ್ ಇಮಾಜ್ ಹಾಡ್ಚಿ ಆನಿ ಮಾನಾಚಿ ವಾತ್ ಕಾಣ್ಘೆಂವ್ಚಿಂಚ್ ಸಪ್ಣಾಂ ದೀಸ್ ರಾತ್ ಪಡ್ತಾಲಿಂ.

***

ವೇಳ್ ದನ್ಪಾರ್ ಉತ್ರಲ್ಲೊ,  ಡಾಬರ್ ಮೆನಾಕ್ ಹಾಡ್‌ಲ್ಲ್ಯಾ ವಿಶೆಂತಿನ್ ವೆಗಿಂ ವೆಗಿಂ ಪೆಟ್ಯಾಕ್ ನ್ಹಾಣಯ್ತಾನಾ ಪೆಟ್ಯಾನ್ ಘಾಸ್ ಮಾರ್ಲೊ.

ಬಾಯ್ಲೆಕ್ ಕಳ್ಳೆಂ ತರ್ ತಿಚ್ಯಾ ಜಿಬೆಂತ್ಲ್ಯಾ ಉತ್ರಾಂನಿ ಅಪ್ಣಾಕ್ ಪೆಟ್ಯಾನ್ ಚಾಬ್‌ಲ್ಲ್ಯಾ ದುಕಿಚ್ಯಾಕೀ ಚಡ್ ದೂಕ್ ಜಾತಾ ಮ್ಹಳ್ಳೆಂ ಜಾಣಾಸ್ಲ್ಯಾನ್ ಸಾವೆರಾನ್ ಪೆಟ್ಯಾಕ್ ಪಯ್ಸ್ ಥಾವ್ನ್ ನಳಾಚೆಂ ಉದಕ್ ಘಾಲುನ್ ಕಶೆಂಯ್ ಸಾಂಕ್ಳಿಸಮೇತ್ ಹಾಡ್ನ್ ಭಾಯ್ರ್ ಆಂಗ್ಣಾಂತ್ ಭಾಂದ್ಲೊ. ಆತಾಂ ಹ್ಯಾ ಸಯ್ರ್ಯಾ ಪೆಟ್ಯಾಚಿ ಸರ್ಬರಾಯ್ ಪಳೆಲ್ಲೊ ಘರ್ಚೊ ಪೆಟೊ ಪಯ್ಸ್ ರಾವೊನ್ ಜ್ಯೊರಾನ್ ಸುಶೆಗ್ ನಾಸ್ತಾಂ ಘೊಂಕ್ತಾಲೊ.

ಆಂಗ್ಣಾಚೆರ್ ವೋತ್ ಆಸ್ಲೆಂ ದೆಕುನ್ ಶಾಮಿಯಾನಾ ಘಾಲುಂಕ್ ಆಯಿಲ್ಲ್ಯಾಂನಿ ಶಾಮಿಯಾನಾ ಘಾಲೆಂ ತಶೆಂಚ್ ಭಾಡ್ಯಾಚಿಂ ಕದೆಲಾಂ ಮಾಂಡುನ್ ಹಾಡ್ತಾಲೆ.

ಸಾಂಜೆಚಿಂ ಚ್ಯಾರ್ ವೊರಾಂ ಜಾಂವ್ಕ್ ಲಾಗಿಂ ಜಾಲ್ಲೆಪರಿಂಚ್ ವಾಡ್ಯಾಚಿಂ ಎಕೆಕ್ಲಿಂಚ್ ಯೇಂವ್ಕ್ ಲಾಗ್ಲಿಂ.

ಥೊಡಿಂ ಬಾಂಯ್ಚ್ಯಾ ಕಾಟ್ಯಾಲಾಗಿಂ ಸುತ್ತುಘಾಲ್ನ್ ಬಾಂಯ್ಚಿ ಗುಂಡಾಯ್ ಮೆಜ್ತಾನಾ ಥೊಡಿಂ ಮಾಡಾಂಚ್ಯಾ ತಕ್ಲೆಕ್ ದೀಶ್ಟ್ ಲಾವ್ನ್ ಬೊಂಡೆ ಮೆಜ್ತಾಳಿಂ ತರ್ ಆನಿ ಥೊಡಿಂ ಘರ್ಚ್ಯಾ ವಣದಿಚ್ಯಾ ಚುನ್ಯಾಚೊ ರಂಗ್ ಪಳೆತಾಲಿಂ.

ಥೊಡಿಂ ಘರಾ ಭಿತರ್ ರಿಗ್ತಾಲಿಂ ಆನಿ ಭಾಯ್ರ್ ಯೆತಾಲಿಂ. ಫೊಟೊಗ್ರಾಫರ್ ಫೊಟೊ ಕಾಡ್ತಾಲೊ.

ಥೊಡಿಂ ಗಪ್ಪೆ ಮಾರ್ತಾಲಿಂ ಆನಿ ಥೊಡಿಂ ನಾಕ್ ಉಸವ್ನ್ ಪರ್ಮಳ್ ಘೆತಾಲಿಂ. ಗೆಟಿಭಿತರ್ ಥೊಡಿಂ ಕಾರಾಂ, ಬಾಯ್ಕಾಂ ರಾವ್ಲಿಂ, ಥೊಡಿಂ ಬಾಯ್ಕಾಂ, ಕಾರಾಂ ಗೆಟಿ ಭಾಯ್ರ್ ರಾವೊನ್ ಧುಳ್ ಉಭಂವ್ಕ್ ಲಾಗ್ಲಿಂ.

ತಿತ್ಲ್ಯಾರ್ ’ಇಮಾಜ್ ಆಯ್ಲಿ’ ಮ್ಹಣ್ ಕೊಣೆಂಗೀ ಸಾಂಗ್ಲೆಂ ಆನಿ ಸೆಜಾರ್ಚ್ಯಾ ಘರಾಥಾವ್ನ್ ಥೊಡೆ ಎಕ್ಟಾಂಯ್ ಜಾವ್ನ್ ಇಮಾಜೆಕ್ ಘೆವ್ನ್ ಗೆಟಿಭಿತರ್ ರಿಗ್ಲೆ. ತಾಂಚ್ಯೆ ಪಾಟ್ಲ್ಯಾನ್ ಆಂತೊನಾಬ್‌ಯೀ ಭಾಯ್ರ್ ರಾವೊನ್ ಶೆರ್ಮಾಂವ್ ದಿತಾಲೊ. ಆಂಗ್ಣಾಂತ್ ಬಸ್‌ಲ್ಲೊ ಅರ್ಧೊ ಲೋಕ್ ಇಮಾಜೆಕ್ ಪಳೆತಾಲೊ ತರ್ ಅರ್ಧೊ ಲೋಕ್ ಆಂತೊನಾಬಾಚೊ ಶೆರ್ಮಾಂವ್ ಆಯ್ಕತಾಲೊ.

’ಹೊ ಪನ್ವತಿ ಕಂಯ್ ಥಾವ್ನ್ ಉದೆಲೊಕಾಯ್, ಹಾಕಾ ಧಾಂವ್ಡಾಂವ್ಚೆಂಚ್ ಬರೆಂ’ ಅಶೆಂ ಚಿಂತುನ್ ವಿಶೆಂತಿನ್ ತೊ ಗೆಟಿಭಿತರ್ ಯೇನಾಶೆಂ ಗೇಟ್ ಬಂಧ್ ಕರ್ತಾಸ್ತಾಂ ’ಇಮಾಜಿಂಚಿ ಪುಜಾ ಕರ್ತೆಲ್ಯಾಂಕ್ ಮೊಯ್ಜೆನ್ ಸಯ್ತ್ ಖೆಂಡ್ಲಾಂ, ಪಿಶ್ಯಾನೊ ಜಾಗೆ ಜಾಯಾ’ ಮ್ಹಣುನ್ ಆಂತೊನಾಬ್ ಜ್ಯೊರಾನ್ ಬೊಬಾಟ್ತಾಲೊ.

ಇಮಾಜ್ ಆಂಗ್ಣಾಂತ್ಲ್ಯಾನ್ ಘರಾ ಭಿತರ್ ಹಾಡುಂಕ್ ಆಯಿಲ್ಲ್ಯೆಪರಿಂಚ್ ಹೆರಾಂ ಉಟೊನ್ ಅಪ್ಲೆ ದೊನ್‌ಯೀ ಹಾತ್ ಜೊಡುನ್ ತಿಳಿಲಾಗ್ಲಿಂ.

ಡಾಬರ್ ಮೆನ್ ಪೆಟೊ ಮಾತ್ರ್ ಪುರ್ತೊ ಕಂಗಾಲ್ ಜಾವ್ನ್ ಅಪ್ಲ್ಯಾ ಗಳ್ಯಾಚಿ ಸಾಂಕಳ್ ಸುಟ್ಲಿ ತರ್ ಗಾಂವ್ ಸೊಡ್ನ್ ಧಾಂವ್ತಾಂ ಮ್ಹಳ್ಳ್ಯಾ ಚಿಂತ್ಪಾನ್ ಶಿಮ್ಟಿ ಪಂದಾ ಘಾಲುನ್ ಆಸ್ಲೊ.

ಇಮಾಜ್ ಘರಾಂತ್ ಆಯ್ಲಿ, ದೆವಾಚ್ಯಾ ಭಾಗೆವಂತಾಂನಿ ಮಾಗ್ಣಿಂ ಕೆಲಿಂ, ಕಾಂತಾರಾಂ ಗಾಯ್ಲಿಂ, ಕೇಟರಿಂಗಾಚೆಂ ಖಾಣ್ ಸರ್ವಾಂನಿ ಖೆಲೆಂ, ಪಿಯೆಲಿಂ, ಉಲಯ್ಲಿಂ. ಪಳೆವ್ನ್, ತಿಳುನ್, ಚಾಳುನ್ ಉಪ್ರಾಂತ್ ಆಪಾಪ್ಲಿ ವಾಟ್ ಧರುನ್ ಗೆಲಿಂ.

ಎಕಾ ದನ್ಪಾರಾಂ ಮಾಳಯೆಚ್ಯಾ ಕುಡಾಂತ್ ರಿಗ್‌ಲ್ಲೊ ಸಾವೆರ್ ಸಾಂಜೆರ್ ಕಾಳೊಕ್ ಪಡ್ತಚ್ ಸಕ್ಲಾ ದೆಂವೊನ್ ಆಯ್ಲೊ.

***

ಆಯಿಲ್ಲಿ ಇಮಾಜ್ ದುಸ್ರ್ಯೆ ದಿಸಾ ಸೆಜಾರ್ಚ್ಯಾ ಬಾಲ್ತಾಜಾರಾಚ್ಯಾ ಘರಾಕ್ ಪಾವವ್ನ್ ಥೊಡೆ ದೀಸ್ ಜಾಲ್ಯಾತ್.

ಫಿರ್ಗಜೆಚ್ಯಾ ಸಕ್ಕಡ್ ವಾಟ್ಸಾಪ್ ಗ್ರೂಪಾಂನಿ ತಸ್ವೀರೊ ಧಾಡುಂಕ್ ಆಲಿಸ್ ಬಾಯ್ ವಿಸ್ರೊಂಕ್ ನಾ. ತಶೆಂಚ್ ಅಪ್ಲ್ಯಾ ಸರ್ಬರಾಯೆಚಿ, ಖಾಣಾ-ಜೆವ್ಣಾಚಿ ಜಾಂವ್, ಫುಲಾಂಚ್ಯಾ ಸುಂರ್ಗಾಯಾಚಿ ಜಾಂವ್, ಡಾಬರ್ ಮೆನ್ ಪೆಟ್ಯಾಚಿ ಜಾಂವ್ ತೊಕ್ಣಾಯ್ ವಾಚುನ್, ಆಯ್ಕೊನ್ ತಿಚೆ ಕಾನ್-ದೊಳೆ ಥಕ್ಲೆನಾಂತ್.

ಡಾಬರ್ ಮೆನ್ ಪೆಟ್ಯಾಕ್ ವಿಶೆಂತಿನ್ ಪರತ್ ನಾಣಯ್ನಾಸ್ತಾನಾಂಚ್ ಪಾಟಿಂ ಪಾವವ್ನ್ ಜಾಲಾಂ.

ಘರಾಂತ್ ಏಕ್ ಭಾಂಗಾರಾಚಿ ಇಮಾಜ್ ಕರುನ್ ಹಾಡ್ಲಿ ತರ್ ಘರಾಕ್ ಬೆಸಾಂವ್ ಪಡ್ತಾ ಮ್ಹಣುನ್ ಆಲಿಸ್ ಬಾಯೆಚ್ಯಾ ಪಾಂತ್ಯಾಚ್ಯಾ ಸಪ್ಣಾಂತ್ ಆಯಿಲ್ಲ್ಯಾ ಎಕಾ ಸಾಂತಾನ್ ಸಾಂಗ್ಲೆಂ ದೆಕುನ್ ಬಗ್ಲೆನ್ ನಿದೆಂತ್ ಘೊರೆವ್ನ್ ಆಸ್ಚ್ಯಾ ವಿಶೆಂತಿಕ್ ಧೊಂಕುಳ್ನ್ ಉಟವ್ನ್ ’ಕಶೆಂಯ್ ಕರ್ನ್ ಘರಾಕ್ ಏಕ್ ಭಾಂಗಾರಾಚಿ ಇಮಾಜ್ ಹಾಡ್’ ಮ್ಹಣುನ್ ಪರಾತ್ತುಂಕ್ ಧರ್ಲೆಂ.

ಉಟೋನ್ ತಿ ಚಾ ಕರುಂಕ್ ಮ್ಹಣ್ ಕುಜ್ನಾಕ್ ಗೆಲ್ಲೆಪರಿಂಚ್ ನ್ಹಾಣಿಯೆಂತ್ ’ಬೌ… ಬೌ…’ ಘೊಂಕ್ಚೊ ಆವಾಜ್ ಆಯ್ಕೊನ್ ಆಲಿಸ್ ಬಾಯ್ ಕುಜ್ನಾಂತ್ಲಿ ಭಾಯ್ರ್ ಯೆವ್ನ್ ನ್ಹಾಣಿಯೆಂತ್ ಪೆಟ್ಯಾಪರಿಂ ಘೊಂಕ್ಚ್ಯಾ ವಿಶೆಂತಿಕ್ ಪಳೆವ್ನ್ ’ಹಾಂವ್ ಆತಾಂ ಖರಿಂಚ್ ಸಪಣ್ ಪಳೆತಾಂಕಾಯ್?’ ಮ್ಹಣುನ್ ಚಿಂತಿಲಾಗ್ಲಿ.

ನ್ಹಾಣಿಯೆಂತ್ ’ಬೌ.. ಬೌ.. ಆವಾಜ್ ಜ್ಯೊರಾನ್ ಯೇಂವ್ಕ್ ಲಾಗ್ಲೊ.

ಆಲಿಸ್ ಬಾಯ್ ಆತಾಂ ಉಭಿ ಆಸ್ಲೆಕಡೆಚ್ ಇಮಾಜ್ ಜಾಲ್ಲಿ.

►  ವಲ್ಲಿ ಕ್ವಾಡ್ರಸ್