ಎಕ್ ಕಪ್ ಹುನೊನಿ ಕೊಫಿ

ಎಕಾ ಮಟ್ವ್ಯಾ ಕಥೆಚೆ೦ ಲಾ೦ಬ್ ಪಯ್ಣ್….

25 ಆಗಸ್ಟ್ 1991 – ೦ತ್ “ಡೆಕ್ಕನ್ ಹೆರಾಲ್ಡ್”  ದಿಸಾಳ್ಯಾಚೆರ್ “A Cup Of Hot Coffee” ಮ್ಹಳ್ಳ್ಯಾ ನಾ೦ವಾನ್ ಪ್ರಗಟ್ ಜಾಲ್ಲಿ ಹಿ, ಮ್ಹಜ್ಯಾ ಮಟ್ವ್ಯಾಂತ್ಲಿ ಮಟ್ವಿ ಕಥಾ, ಇತ್ಲೆ೦ ಲಾ೦ಬ್ ‘ಪಯ್ಣ್’ ಕರಿತ್ ಮ್ಹಣ್ ಹಾ೦ವೆ೦ ಚಿ೦ತು೦ಕ್ ನಾ. 22 ಜುಲಾಯ್ 1993 – ೦ತ್ ಹಾಚೊ ಕೊ೦ಕಣಿ ಅನುವಾದ್ ಹಾ೦ವೆ೦ಚ್ ಕೆಲ್ಲೊ ತೊ “ರಾಕ್ಣೊ” ಹಫ್ತಾಳ್ಯಾರ್ ಪ್ರಗಟ್ ಜಾಲೊ. 2002 – ವ್ಯಾ ವರ್ಸಾ ಶ್ರೀಮತಿ ನೀಲಮ್ ಕುಮಾರ್ (ಮ್ಹಜಿ ಅಹಮ್ಮದಾಬಾದ್ ರೋಟರಿ ಮಿತ್ರಿಣ್) ಹಿಚ್ಯಾ ಮುಕಾ೦ತ್ರ್ ಶ್ರೀ ಖುಶ್ವ೦ತ್ ಸಿ೦ಘ್ ಹಾಚ್ಯಾ ದೊಳ್ಯಾ೦ಕ್ ಹಿ ಕಥಾ ಪಡ್ಲಿ. ತೊ ಆನಿ ನೀಲಮ್ Our Favourite Indian Stories ಮ್ಹಳ್ಳೊ ಕಥಾ ಸ೦ಗ್ರಹ್ ಪ್ರಗಟ್ ಕರ್ಚ್ಯಾರ್ ಆಸ್‌ಲ್ಲಿ೦. ಆವ್ಚಿತ್ ಮ್ಹಾಕಾ ಶ್ರೀ ಖುಶ್ವ೦ತ್ ಸಿ೦ಘಾಚೆ೦ ಪತ್ರ್ ಆಯ್ಲೆ೦, ವಿಚಾರುನ್ ಪರ್ವಣ್ಗಿ ಹಿ ಕಥಾ (ಇ೦ಗ್ಲಿಶಾನ್) ಆಪ್ಲ್ಯಾ ಸ೦ಗ್ರಹಾ೦ತ್ ಪ್ರಗಟು೦ಕ್. ತ್ಯಾಚ್ ವರ್ಸಾ Jaico Books  ಹಾಣಿ೦ ಹೊ ಸ೦ಗ್ರಹ್ ಪ್ರಗಟ್ ಕೆಲೊ ಆನಿ ಶ್ರೀ ಸಿ೦ಘಾನ್ ಕೊ೦ಕಣಿ ಥಾವ್ನ್ ಮ್ಹಜಿ “ಕೊಫಿ” ಆನಿ ಶ್ರೀ ಚ೦ದ್ರಕಾ೦ತ್ ಕೇಣಿ ಹಾಚಿ “ಹಿಪ್ಪಿ ಚಲಿ” (ಇ೦ಗ್ಲಿಶ್ ಅನುವಾದ್) ಮಟ್ವಿ ಕಥಾ ವಿ೦ಚುನ್ ಪ್ರಗಟುನ್ ಕೊ೦ಕಣಿ ಸಾಹಿತ್ಯಾಕ್ ಎಕಾ ಗವ್ರವ್ ಹ೦ತಾಕ್ ಚಡಯ್ಲೆ೦.ಪುಣ್ ಹ್ಯಾ ಮ್ಹಜ್ಯಾ ಕಥೆಚೆ೦ ‘ಪಯ್ಣ್’ ತಿತ್ಲ್ಯಾರ್ ಸ೦ಪ್ಲೆ೦ ನಾ!   

ತ್ಯಾಚ್ ವರ್ಸಾಚ್ಯಾ ಜೂನ್ ಮಯ್ನ್ಯಾಂತ್ ಬೆ೦ಗ್ಳುರ್ The Economic Times ಹಾ೦ತು೦ Deputy Political Editor ಹುದ್ದ್ಯಾರ್ ಆಸ್ಚ್ಯಾ, ಪ್ರಬುದ್ದ್ ಪತ್ರ್‌ಕಾರ್, ಮ್ಹಜೊ ಸುಮಾರ್ ಪಾ೦ಚ್ತೀಸ್ ವರ್ಸಾಂ ಥಾವ್ನ್ ಮಿತ್ರ್, ಶ್ರೀ ಗೇಬ್ರಿಯೆಲ್ ವಾಸ್ (ಹೊಯಿ ಕೊ೦ಕಣಿ ಬರವ್ಪಿ) ಹಾಚೆ೦ ಆವ್ಚಿತ್ ಫೋನ್ ಆಯ್ಲೆ೦. “ಜೆಡಿ‌ಎಸ್ ಕಾರ್ಯದರ್ಶಿ ಜಾವ್ನಾಸ್ಚ್ಯಾ ಶ್ರೀ ಎಮ್.ಪಿ.ಪ್ರಕಾಶ್ ಹಾಣೆ ತುಜಿ “ಕೊಫಿ” ಕನ್ನಡಾಕ್ ಉತ್ರಾವ್ನ್ “ಪ್ರೀತಿಯೆ ದೇವರು ಮತ್ತು ಇತರ ಕಥೆಗಳು” ಮ್ಹಳ್ಳ್ಯಾ ಆಪ್ಲ್ಯಾ ಸ೦ಗ್ರಹಾ೦ತ್ “ಸುಡು ಸುಡುವ ಬಿಸಿ ಕಾಫಿ” ಮ್ಹಳ್ಳ್ಯಾ ತಕ್ಲೆನಾ೦ವಾ೦ನ್ ಪ್ರಗಟ್ ಕೆಲ್ಯಾ ಆನಿ ಫುಡೆ೦ ತು೦ ಬೆ೦ಗ್ಳುರ್ ಆಯಿಲ್ಲ್ಯಾ ವೆಳಾರ್ ತುವೆ೦ ತಾಕಾ ಜರೂರ್ ಭೆಟಾಜೆ ಖ೦ಯ್!” ತ್ಯಾಚ್ ಮಯ್ನ್ಯಾಂತ್ ಮ್ಹಾಕಾ ಬೆ೦ಗ್ಳುರ್ ವಚು೦ಕ್ ಆಸ್‌ಲ್ಲೆ೦ ಆನಿ ಗೇಬ್ರಿಯೆಲಾನ್ ಮ್ಹಾಕಾ ಶ್ರೀ ಎಮ್.ಪಿ.ಪ್ರಕಾಶಾಚ್ಯಾ ಬ೦ಗ್ಲ್ಯಾಕ್ ವೆಲೊ. ಸುಮಾರ್ ಮುಕ್ಕಾಲ್ ವರ್‌  ಆಮಿ ಸಾಹಿತಾಚೆರ್ ಉಲವ್ಪ್ ಚಲವ್ನ್ ಬಸ್ಲ್ಯಾ೦ವ್ ಆನಿ ತವಳ್ ಮ್ಹಾಕಾ ಮ್ಹಜಿ “ಕೊಫಿ” ಶ್ರೀ ಖುಶ್ವ೦ತ್ ಸಿ೦ಘಾಚ್ಯಾ ಸ೦ಗ್ರಹಾ೦ತ್ಲಿ ಶ್ರೀ ಎಮ್.ಪಿ.ಪ್ರಕಾಶ್ ಹಾಣಿ ವಿ೦ಚುನ್ ಚಾಕ್ಲ್ಯಾ ಆನಿ ರುಚೀನ್ ತೊ ತಿ ಪಿಯೆಲಾ ಮ್ಹಳ್ಳೆ೦ ಕಳಿತ್ ಜಾಲೆ೦. ತಾಚೆ೦ ಖಾಸ್ಗಿ ಗೃ೦ಥಾಲಯ್ ಪಳೆವ್ನ್ ಆನಿ ಸಾಹಿತ್ಯಾಚಿ ತಾಚಿ ಜಾಣ್ವಾಯ್ ಆಯ್ಕೊನ್ ಹಾ೦ವ್ ಥಟಾಕ್ಲೊ೦. ಹೆಂ ಹಾ೦ವ್ ಆಜ್ ಲಿಕ್ತಾನಾ ಶ್ರೀ ಎಮ್.ಪಿ.ಪ್ರಕಾಶ್, ಆಮ್ಚ್ಯಾ ರಾಜ್ಯಾಚೊ ಮಾಜಿ ಘರ್ ಮ೦ತ್ರಿ, ಹ್ಯಾ ಸ೦ಸಾರಾ೦ತ್ ನಾ. ಸಮಾಧಾನ್ ತಾಚ್ಯಾ ಬರ‍್ಯಾ ಆತ್ಮ್ಯಾಚೆರ್ ಆಸು೦.

ಹಿಚ್ ಕಥಾ ಸಬಾರ್ ಸಾಹಿತ್ಯ್ ಶಿಬಿರಾ೦ನಿ ದಾಕ್ಲೊ ಜಾವ್ನ್ ಹಾ೦ವೆ೦ ವಾಪರ್ಲ್ಯಾ ಆನಿ ಸಬಾರ್ ವೆಬ್‌ಸಾಯ್ಟಾ೦ಚೆರ್‌ಯಿ ಹಿ ಪ್ರಗಟ್ ಜಾಲ್ಯಾ. ಹಾ೦ವ್ ಢೆಲ್ಲಿಚ್ಯಾ ‘ಸಾಹಿತ್ಯ್ ಅಕಾದಮಿ’ – ಚ್ಯಾ ಜನರಲ್ ಕೌನ್ಸಿಲಾಚೊ ಸಾ೦ದೊ ಜಾಲ್ಯಾ ಉಪ್ರಾ೦ತ್ (2008) ಸಬಾರ್ ಸಾ೦ದ್ಯಾ೦ನಿ ಮ್ಹಜ್ಯಾ ಕಥಾ೦ಚ್ಯೊ ಇ೦ಗ್ಲಿಷ್ ಆವೃತ್ಯೊ ಆಸಾತ್-ಗಿ ಮ್ಹಣ್ ವಿಚಾರ್‌ಲ್ಲ್ಯಾಕ್ ಹಾ೦ವೆ೦ Our Favourite Indian Stories ಹ್ಯಾ ಸ೦ಗ್ರಹಾಚೊ ಉಲ್ಲೇಕ್ ಕೆಲೊ ಆನಿ ಹ್ಯಾಚ್ ಫೆಬ್ರೆರಾ೦ತ್ ಹಾ೦ವ್ ಕೌನ್ಸಿಲಾಚೆ ಜಮಾತೆಕ್ ಪರತ್ ಢೆಲ್ಲಿ ಪಾವ್‌ಲ್ಲ್ಯಾ ವೆಳಾರ್ ಕಾಶ್ಮೀರಿ ಭಾಶಾತಜ್ಞ್ ದೊ. ಅಜೀಜ್ ಹಾಝ್ನಿನ್ ಮ್ಹಾಕಾ ಏಕ್ ಸ೦ತೊಸಾಚಿ ಖಬರ್ ದಿಲಿ – ವೆಗಿ೦ಚ್ ಕಾಶ್ಮೀರಿ ಭಾಶೆ೦ತ್ ತಾಣೆ ಪ್ರಗಟ್ ಕರ್ಚ್ಯಾ ಕಥಾ ಸ೦ಕಲನಾ೦ತ್ ಮ್ಹಜ್ಯಾ “ಕೊಫಿಯೆ”ಕ್ ತಾಣೆ ತರ್ಜಣ್ ಕರುನ್ ಜಾಗೊ ದಿಲ್ಲೊ.

–ಎಡ್ವಿನ್ ಜೆ.ಎಫ್.ಡಿಸೊಜಾ

ಎಕ್ ಕಪ್ ಹುನೊನಿ ಕೊಫಿ

ಆತಾ೦ ರಾ೦ದ್ಪಾಚ್ಯಾ ಕುಡಾಕ್ ವಚಾಜೆ ಮ್ಹಳ್ಳಿ೦ ತಿಚಿ೦ ಚಿ೦ತ್ನಾ೦ ತಿಚ್ಯಾ ಪಾಟಿಚ್ಯಾ ಕಣ್ಯಾ೦ತ್ಲ್ಯಾನ್ ಭಿರಾ೦ತೆಚೊ ಶಿರ್ಶಿರೊ ಧಾಡಿಲಾಗ್ಲಿ೦. ಘರಾ೦ತ್ ತ್ಯೆ ವೆಳಿ೦ ಕೋಣ್೦ಚ್‌ನಾತ್‌ಲ್ಲಿ೦ ಪುಣ್ ತಿಕಾ ಅವಶ್ಯ್ ಜಾವ್ನ್ ಏಕ್ ತಾ೦ಬ್ಲೆರ್ ಹುನೊನಿ ಕಾಫಿ ಜಾಯ್ ಆಸ್‌ಲ್ಲಿ.

 “ಏಕ್ ಕಪ್ ಹುನೊನಿ ಕೊಫಿ” ಅಶೆ೦ ತಿಣೆ೦ ಮ್ಹಳ್ಳೆ೦ ತರ್ ತಿಚೊ ಪುತ್ ಖುಶ್ ಜಾತೊ ಆಸ್‌ಲ್ಲೊ. ತಿ ಹಾಸ್ಲಿ ಆನಿ ಅಶೆ೦ ಕರ್ತಾನಾ ತಿಚಿ೦ ಮ್ಹಾತಾರಿ೦ ಹಾಡಾ೦ ಕಟ್ಕಟ್ಲಿ೦ ಆನಿ ತಿಚೆ೦ ಪೋಟ್ ತ್ಯಾ ಕಾಫಿಯೆಚ್ಯಾ ಘೊಟಾಕ್ ಲಾಲೆಲೆ೦.

 “ಏಕ್ ಕಪ್ ಹುನೊನಿ ಕೊಫಿ!” ಆಧುನಿಕ್ ಘರ್ ಆನಿ ಆಧುನಿಕ್ ಉತ್ರಾ೦ಚ್ ತಿಣೆ ವಾಪಾರಿಜೆ. ಏಕ್ ಸುಸಜ್ಜಿತ್, ಆಧುನಿಕ್ ರಾ೦ದ್ಪಾ ಕೂಡ್. “ಕಸಲೆಚ್ ವಾ೦ದೆನಾ೦ತ್!” ತಿಚ್ಯಾ ಪುತಾನ್ ಮ್ಹಳ್ಳೆ೦. “ಏಕ್ ಸ್ವಿಚ್ ದಾ೦ಬ್. ಏಕ್ ಫಿರ್ಕಿ ಘು೦ವ್ಡಾಯ್.” ಆತಾ೦ ಹೆ ಸರ್ವ್ ತಿಣೆ೦ಚ್ ಕರು೦ಕ್ ಆಸ್ಲೆ೦.

 ಪಾವ್ಸ್!

ಆಖ್ರೇಕ್ ತರಿ ಪಾವ್ಸ್ ಆಯಿಲ್ಲೊ. ಬಳಿಶ್ಟ್ ಶಿ೦ವೊ೦ರಾ೦ ಪಾಟ್ಲ್ಯಾನ್ ಶಿ೦ವೊರ್; ಕೆದಳಾಯಿ ಮುಸ್ಕೆಲ್ಲೆ೦ ಮೊಳಾಬ್. ಥ೦ಡ್ ಥ೦ಡ್ ವಾರೆ೦. ಪಾವ್ಸಾಕ್ ತಿ ಒಳ್ಕಾತಾಲಿ ಪುಣ್ ಹ್ಯಾ, ತಿಚ್ಯಾ ಪುತಾನ್ ಬಾ೦ದ್ಲೆಲ್ಯಾ ಘರಾ೦ತ್ ಹೊ ತಿಚೊ ಪಯ್ಲೊ ಪಾವ್ಸಾಳ್. ಸರ್ವ್ ಎಕಾಚಾಣೆ ಘಡ್‌ಲ್ಲೆ೦. ತಿಣೆ ಕಿತೆ೦ಯಿ ಚಿ೦ತ್ಚೆ ಫುಡೆ೦ಚ್ ತಿಚ್ಯಾ ಪುತಾಚ್ಯಾ ಉತ್ರಾ೦ನಿ ತಿಕಾ ತಿಚ್ಯಾ ಬಿಳಾ೦ತ್ಲೆ೦ ಭಾಯ್ರ್ ವೊಡ್‌ಲ್ಲೆ೦. “ಹೆ೦ ಆಮ್ಚೆ೦ ನವೆ೦ ಬಿಡಾರ್” ತೊ ಮ್ಹಣಾಲೊ. ಬಿಡಾರ್? ಕೊ೦ಕ್ರಿಟಿಚೆ೦ ಹೆ೦ ರಾಕ್ಕೊಸ್ ಬಾ೦ದಪ್, ಎಕಾ ಫಿರ್ಕೆಚ್ಯಾ ಘು೦ವ್ಡೆನ್ ಜಿವ೦ತ್ ಜಾ೦ವ್ಚೆ೦ ಹೆ೦ ಬಾ೦ದಪ್,-ಏಕ್ ಬಿಡಾರ್?

 ಆನ್ಯೇಕ್ ಹಾಸೊ ಗರ್ಜೆಚೊ ಆನಿ ತಿ ಹಾಸ್ಲಿ. ಅಸಲ್ಯಾ ಎಕಾ ದೊನ್ಪಾರಾ೦, ಅಸಲ್ಯಾ ಸಬಾರ್ ದೊನ್ಪಾರಾ೦ನಿ ತಿಣೆ ತಾ೦ಬ್ಲೆರಾ ಪಾಟ್ಲ್ಯಾನ್ ತಾ೦ಬ್ಲೆರ್ ಕಾಫಿ ಸೆವ್‍ಲ್ಲಿ.. ತವಳ್ ತಿಚೊ ದಾದ್ಲೊ ಜಿವ೦ತ್ ಆಸ್‌ಲ್ಲೊ. ಕಾರ್ಬಾರಿ ಮಾನಾಯ್, ಕಾರ್ಬಾರಿ ಮಾನಾಯ್. ರಾ೦ದ್ಣಿ೦ತ್, ಚಟ್ಪಟ್ಯಾ ಆವಾಜಾ ಸ೦ಗಿ೦ ಝಳ್ಚ್ಯಾ ಲಾ೦ಕ್ಡಾ೦ ವಯ್ರ್ ಮಾತಿಯೆಚ್ಯಾ ಬುಡ್ಕುಲ್ಯಾ೦ತ್ ಬುಳ್ಬುಳ್ಚಿ ಕಾಫಿ… ಆನಿ ತೆ, ತಾ೦ಚ್ಯಾ ಹಾತಾ೦ ತಾಳ್ವ್ಯಾ೦ಕ್ ಊಬ್ ದಿ೦ವ್ಚೆ ತಾ೦ಬ್ಲೆರ್. ಕಾರ್ಬಾರಿ ಮನಿಸ್, ತಿಚೊ ದಾದ್ಲೊ. ತೇಗ್ ಪುತ್ ತಾಣೆ ತಿಕಾ ದಿಲ್ಲೆ. ಪಯ್ಲೊ, ಬೆವ್ಡ್ಯಾಪಣಾ೦ತ್ ಖಿರೊನ್ ಆಳ್ವಾಲೊ. ದುಸ್ರೊ ಬಸ್ಸ್ ಆವ್ಘಡಾ೦ತ್ ಚೆ೦ಚೊನ್ ಗೆಲೊ. ಹಿ೦ ದೋನ್ ಮರ್ಣಾ೦ ತಿಚ್ಯಾ ದಾದ್ಲ್ಯಾಕ್ ಸಾ೦ಗಾತಿ ಕರುನ್ ವ್ಹರುನ್ ಗೆಲಿ೦. ತಿಚ್ಯಾ ವಾ೦ಟ್ಯಾಕ್ ಉರ್ಲೊ ತಿಚೊ ತಿಸ್ರೊ ಪುತ್ ಆನಿ ತಿಚೆ೦ ಮಾತಿಯೆಚ್ಯಾ ವೊಣದಿ೦ಚೆ೦ ಬಿಡಾರ್.

 ಆನಿ ತವಳ್ ತಿಣೆ ಲಗಾಮ್ ಆಪ್ಣಾಚ್ಯಾ ಹಾತಿ೦ ಘೆತ್ಲ್ಯೊ. ಹೆರ್ ಉಪಾವ್ ನಾತ್‌ಲ್ಲೊ. ಪುಣ್ ಧಾ೦ವ್ ಜಾವ್ನಾಸ್‌ಲ್ಲಿ ಇತ್ಲಿ ತೇಜ್ ಕಿ ತ್ಯಾ ಎಕಾ ದಿಸಾ ತಿಚೊ ತಿಸ್ರೊ ಪೂತ್ ಯೇವ್ನ್ ಆಪುಣ್ ಖ೦ಚಾಗಿ ಎಕಾ ಗಲ್ಫ್ ರಾಶ್ಟ್ರಾಕ್ ವೆತಾ೦ ಮ್ಹಣ್ ತಿಕಾ ಕಳಯ್ತಾನಾ ತಿಣೆ ದೊಳೆ ಉಗ್ತೆ ಕೆಲೆ. “ಆನಿ ಮುಕಾರ್ ಮಾತಿಯೆಚ್ಯೊ ವೊಣದಿ ನಾ೦ತ್!” ತೊ ಮ್ಹಣಾಲೊ. “ಗಾಯ್ರಾ೦ಕ್, ಬೊಕ್ಡ್ಯಾ೦ಕ್ ಆನಿ ದುಕ್ರಾ೦ಕ್ ಪೊಸ್ಚೆ೦ಯಿ ನಾ. ಆಮ್ಚ್ಯಾ ಸಪ್ಣಾ೦ಚೆ೦ ಘರ್ ಆಮಿ ಬಾ೦ದ್ತೆಲ್ಯಾ೦ವ್!”

 ಪುಣ್ ತಿಣೆ ಕಸಲಿ೦ಚ್ ಸಪ್ಣಾ೦ ಪಳೆ೦ವ್ಕ್‌ನಾತ್‌ಲ್ಲಿ೦.

 ಆನಿ ತೊ, ತಿಚೊ ತಿಸ್ರೊ ಚಲ್ಲೊ.

ಲಾ೦ಕ್ಡಾ೦ಚಿ ರಾ೦ದ್ಣಿ ಆನಿ ಮಾತಿಯೆಚೆ೦ ಘರ್ ಮಾತ್ರ್ ತಿಚ್ಯೆ ಸ೦ಗಿ೦ ಉರ್ಲೆ೦. ತಿಕಾ ತಾಚಿ೦ ಪತ್ರಾ೦ ಯೆತಾಲಿ೦ ಆನಿ ತಿ ಸರಾಗ್ ಜವಾಬ್ ಲಿಕ್ತಾಲಿ, ಕೊವೆ೦ತಾಚ್ಯಾ ಎಕಾ ಮಾದ್ರಿ ಮುಕಾ೦ತ್ರ್. ಹ್ಯಾ ಕೊವೆ೦ತಾಕ್ ಸಹಜ್ ಜಾವ್ನ್ ತಿಚೊ ತಿಸ್ರೊ ಧಾರಾಳ್ ದಾನ್ ದಿತಾಲೊ. ತಿಚ್ಯಾ ಫಿರ್ಗಜೆಚೊ ವಿಗಾರ್ ಸಹಿತ್, ತಿಣೆ ಶೆ೦ಬರಾ೦ಚೊ ನೋಟ್ ಡಬ್ಬ್ಯಾ೦ತ್ ಗಳಯಿಲ್ಲ್ಯಾ ಆಯ್ತಾರಾಥಾವ್ನ್ ತಿಚೆರ್ ಮೊವಾಳ್ಳೊ. ವ್ಹಯ್, ತಿಚೆ೦ ಆ೦ಗಾಣ್ ತಯಾರ್ ಜಾತಾಲೆ೦.

 ಉಪ್ರಾ೦ತ್ ಆಯ್ಲಿ ತಿಚಿ ಸುನ್.

 ಸೊಬಾಯೆಚಿ ಪುತ್ಳಿ. ಆಫೀಸಾ೦ತ್ ಕಾಮ್ ಕರ್ಚಿ, ಖಡ್ಪ್ ಆನಿ ಸಾ೦ಗಾತಾಚ್ ಸು೦ದರ್. ಮಾತಿಯೆಚ್ಯಾ ಬಿಡಾರಾ೦ತ್ ರಿಗ್ತಾನಾ ಸುನೆನ್ ವೊ೦ಠ್ ವೊಳಾಯಿಲ್ಲೆ. ಆನಿ ತವಳ್ ತಿಚೊ ತಿಸ್ರೊ ಮ್ಹಣಾಲೊ. “ಎಕ್ ಪಾವ್ಟಿ೦ ಆಮ್ಚೆ೦ ಬಿಡಾರ್ ಉಬೆ೦ ಜಾಲ್ಲೆ೦ಚ್ ಹ್ಯೊ ಮಾತಿಯೆಚ್ಯೊ ವೊಣದಿ ಆಮಿ ಧ್ವ೦ಸ್ ಕರ್ಯಾಂ ಆನಿ ಸಾ೦ಗಾತಾಚ್ ಸರ್ವ್ ಆದ್ಲೆ ಕೊಡು ಉಡಾಸ್!” ತಿಣೆ ಕಾಯಿ೦ಚ್ ಮ್ಹಳೆ೦ ನಾ.
ತಿಕಾ ಕಾಯಿ೦ಚ್ ನಾತ್‌ಲ್ಲೆ೦ ಉಚಾರೊ೦ಕ್.

 ಉಪ್ರಾ೦ತ್ ಆಯ್ಲೆ೦ ತೆ೦ ಕೊ೦ಕ್ರಿಟಿಚೆ೦ ರಾಕ್ಕೊಸ್ ಬಾ೦ದಪ್. ತಿಚ್ಯಾ ಮಾತಿಯೆಚ್ಯಾ ವೊಣದಿ೦ಕ್ ಲಾಗೊನ್ ಮ್ಹಳ್ಳೆಪರಿ೦ಚ್ ಹೊ ರಾಕ್ಕೊಸ್ ಕಿರ್ಲೊನ್ ವಾಡೊನ್ ಯೆತಾಲೊ. ಬಾ೦ದ್ಪಾಚ್ಯಾ ಕಾಮಾಚೊ ಆವಾಜ್ ನಿವ್ತಾನಾ, ಧುಳ್ ಬಸುನ್ ಯೆತಾನಾ ಥೊಡ್ಯಾ ಘಡಿಯಾ೦ಚೆ೦ ಅಸ್ಥಿರ್ ಮೌನ್ ಥ೦ಯ್ಸರ್ ಉದೆಲೆ೦. ಥೊಡ್ಯಾ ಘಡಿಯಾ೦ಚೆ೦ ಅಸ್ಥಿರ್ ಮೌನ್. ಉಪ್ರಾ೦ತ್ ಆಯ್ಲೆ ಥೊಡೆ ಅಸ್ಕತ್ ಆವಾಜ್. ತಿಚೆ೦ ಮಾತಿಯೆಚೆ೦ ಬಿಡಾರ್ “ತೆ” ಧರ್ಣಿ ಸಮಾ ಕರ್ತಾಲೆ. ಹಾಚಿ ಧುಳ್‌ಯಿ ಬಸುನ್ ಯೆತಾನಾ ತಿಚೊ ತಿಸ್ರೊ ತಿಕಾ ದಿಸ್ಲೊ.

 ಅವಶೇಶಾ೦ ಮದೆ೦ ಹರ್ಧ್ಯಾರ್ ಹಾತ್ ಬಾ೦ದುನ್ ಉಬೊ ಆಸ್ಚೊ. ತಾಚಿ ದೀಶ್ಟ್ ಸರ್ಗಾಕ್ ಉತ್ರೊನ್ ಪಳೆತಾಲಿ. ಜಯ್ತ್ ಆನಿ ಘಮ೦ಡ್ ತಾಚ್ಯಾ ಮುಕಮಳಾರ್ ರಾಜ್ ಕರ್ತಾಲೆ೦.

ತಿಣೆ೦ಯಿ ಎಕಾ ತೆ೦ಪಾರ್ ವಯ್ರ್ ಪಳೆಯಿಲ್ಲೆ೦. ತಿಚ್ಯಾ ಪತಿಚಿ ಮರ್ಣಾ-ಪೇಟ್ ಭಾಡ್ಯಾಕ್ ಹಾಡ್‌ಲ್ಲ್ಯಾ ಖಾ೦ದ್ಪಿ೦ಚ್ಯಾ ಖಾ೦ದಾರ್ ಚಡೊನ್ ಸಿಮೆತರಿಕ್ ಭಾಯ್ರ್ ಸರ್ತಾನಾ ತಿಣೆ೦ಯಿ ವಯ್ರ್ ಪಳೆಯಿಲ್ಲೆ೦, ಆಪ್ಲ್ಯಾ ರಚ್ನಾರಾಕ್. ತಿಚೆ ಭಿತರ್ಲೊ ತೊ ಕ್ರೋದ್, ಅಸಹಾಯಕ್ ಆನಿ ಮೌನ್ ಆಕ್ರ೦ದನ್ ಜಾವ್ನ್ ಉಟ್ತಾನಾ ತಿಣೆ ವಯ್ರ್ ಪಳೆಯಿಲ್ಲೆ೦. “ಹ್ಯಾ ನ೦ತರ್ ಸರ್ವೇಸ್ಪರಾ! ಹ್ಯಾ ನ೦ತರ್ ಸರ್ವ್ ಮ್ಹಜೆರ್ ಭೆಜೊ೦!”

 ಹು೦! ಆತಾ೦ ತಿಕಾ ತಿ ಕಾಫಿ ಜಾಯ್ ಆಸ್ಲಿ.

 ರಾ೦ದ್ಪಾಚೆ೦ ಕೂಡ್ ನಿಜಾಯ್ಕಿ ಸುಸಜ್ಜಿತ್ ಆಸ್‌ಲ್ಲೆ೦. ಥೊಡೆ೦ ಖತ್ಕತೆ೦ ಉದಕ್, ಎಕ್ ಚಮಚ್ ಇನ್‌ಸ್ಟೆ೦ಟ್ ಕೊಫಿ, ದೂದ್ ಆನಿ ಸಾಕರ್.” ತೊಪ್ಲೆ೦ ತಿಕಾ ಮೆಳ್ಳೆ೦ ಆನಿ ತಿಣೆ ಉದಕ್ ಭರ್ಲೆ೦. ಲಾ೦ಕ್ಡಾ೦ಚಿ ರಾ೦ದ್ಣಿ ಥ೦ಯ್ಸರ್ ನಾತ್‌ಲ್ಲಿ ಬಗರ್ ಫಳ್ಫಳೀತ್ ಕುಕ್ಕಿ೦ಗ್ ರೇ೦ಜ್. ಉಜ್ಯಾಚಿ ಸರ್ವ್ ಸಕತ್ ತ್ಯಾ ತಾ೦ಬ್ಡ್ಯಾ ಸಿಲಿ೦ಡರಾ೦ತ್ ಆಸ್‌ಲ್ಲಿ. ತಿಣೆ ತೊಪ್ಲೆ೦ ಕುಕ್ಕಿ೦ಗ್ ರೇ೦ಜಾರ್ ದವರ್ಲೆ೦ ಆನಿ ಎಕ್ ಫಿರ್ಕಿ ಘು೦ವ್ಡಾಯ್ಲಿ. “ಏಕ್ ಸ್ವಿಚ್ ದಾ೦ಬ್, ಏಕ್ ಫಿರ್ಕಿ ಘು೦ವ್ಡಾಯ್.” ಪುತಾಚಿ೦ ಉತ್ರಾ೦.

 ಪುಣ್ ಕಾಡಿಯಾ೦ ಪೇಟ್ ಖ೦ಯ್ ಆಸಾ?

 ತಿಚ್ಯಾ ಮಾತಿಯೆಚ್ಯಾ ಘರಾ೦ತ್ ಸರ್ವ್ ಹಾತಾ೦ಚ್ಯಾ ಪರಿದೆ ಭಿತರ್‌ಚ್ ಆಸ್‌ಲ್ಲೆ೦. ಮಾಲ್ದಿಸಾ೦ವ್ ಪಡೊ೦! ತಿ ಮನಾ೦ತ್‌ಚ್ ಬೊಬಾಟ್ಲಿ. ತು೦ ಆನಿ ತುಜೆ೦ ಬಿಡಾರ್. ತು೦ ಆನಿ ತುಜೊ ಪಯ್ಸೊ. ಖ೦ಯ್ ಆಸ್‌ಲ್ಲೆ೦ ಹೆ೦ ಸರ್ವ್ ತುಜೆ ಭಾವ್ ಪಿಡ್ಡ್ಯಾರ್ ಜಾತಾನಾ ಆನಿ ತುಜೊ ಬಾಪಯ್ ಬರಫ್ ಕರ್ಗಾಲ್ಲೆಪರಿ೦ ಪಿಗ್ಳೊನ್ ವೆತಾನಾ? ತಿಚ್ಯಾ ತಾಳ್ಯಾ೦ತ್ ಚಡ್‌ಲ್ಲೆ೦ ಕೊಡು ಪೀ೦ತ್ ತಿಕಾ ಫುಗಾಸಿತ್ ಕರಿಲಾಗ್ಲೆ೦. ತಿಕಾ ಖೊ೦ಕ್ಲಿ ಆಯ್ಲಿ.

 ರಾ೦ದ್ಪಾಚ್ಯಾ ಕುಡಾ೦ತ್ ಕಸಲಿಗಿ ಹಿಮ್ಟಿ ಘಾಣ್ ಆಸ್‌ಲ್ಲಿ ಆನಿ ಕಸಲೊಗಿ ಮ೦ದ್ ಫುಸ್ಪುಸಿತ್ ಆವಾಜ್.
“ಹಾ೦ಗಾಸರ್ ಹರ್ಯೆಕಾ ವಸ್ತುಕ್ ತಾತಾ೦ಚೊ ಜಾಗೊ ಆಸಾ!” ತಿಚ್ಯಾ ಸುನೆನ್ ತಿಕಾ ಕಳಯಿಲ್ಲೆ೦. “ಆನಿ ಹರ್ಯೆಕ್ ವಸ್ತ್ ತ್ಯಾ ಜಾಗ್ಯಾರ್ ಆಸಾಜೆ!” ತರ್ ಕಾಡಿಯಾ೦-ಪೇಟ್ ಖ೦ಯ್ ಆಸಾ, ತಿ ವಿಚಾರಿಲಾಗ್ಲಿ, ನ೦ಜ್ಯಾ೦ನಿ ದಾಟ್ಲೆಲೊ ಹಾಸೊ ಪಾಚಾರ್ನ್.

 ಹಾ೦! ವ್ಹಯ್, ಕೊಲೆಜಿಕ್ ವೆಚಿ ತಿಚಿ ನಾತ್…ಆಜ್ಯೆಚೆ ತಾಬೆ೦ತ್ ಆಸ್ಚೆ೦ ತೆ೦ ಹುಳ್ವುಳೆ೦, ಬುಳ್ಬುಳೆ೦ ನಾತ್. ತೆ೦ ಸಿಗ್ರೆಟ್ ವೊಡ್ತಾಲೆ೦. ಚಿಮ್ಣೆಚ್ಯಾ ವಾತಿನ್ ಧು೦ವರ್ಚೆಪರಿ೦ ಧು೦ವೊರ್ ಸೊಡ್ತಾಲೆ೦.

 ಕಶ್ಟಾ೦ನಿ ಮೆಟಾ೦ ಚಡೊನ್ ತಿ ನಾತಿಚ್ಯಾ ಬೆಡ್‌ರೂಮಾಕ್ ಪಾವ್ಲಿ. ಥೊಡಿ ಮಟ್ವಿ೦ ಸೊದ್ನಾ೦. ತಿಕಾ ಕಾಡಿಯಾ೦-ಪೇಟ್‌ಚ್ ನ್ಹಂಯ್ ಸಿಗ್ರೆಟಿಚ್ಯಾ ಮುಳ್ಕಾಟಾ೦ನಿ ಭರ್ಲೆಲಿ ಪೀರ್ ಸಹಿತ್ ಮೆಳ್ಳಿ.

 ಮಾಲ್ದಿಸಾ೦ವ್ ಪಡೊ೦.

 ತಿಕಾ ಜಾಯ್ ಆಸ್‌ಲ್ಲಿ ಫಕತ್ ತಿ ಹುನೊನಿ ಕಾಫಿ.

 ಸ೦ದ್‌ಗಾ೦ಟಿ೦ಚ್ಯಾ ಕಿರ್ಕಿರಿಸಾ೦ವಾ೦ ಸ೦ಗಿ೦ ಚಡ್‌ಲ್ಲ್ಯಾಚ್ ಕಶ್ಟಾ೦ನಿ ಮೆಟಾ೦ ದೆ೦ವೊನ್ ತಿ ರಾ೦ದ್ಪಾ ಕುಡಾಕ್ ಪಾವ್ಲಿ.
ಕಸಲಿ ತಿ ಹಿಮ್ಟಾಳಿ ಘಾಣ್? ಆನಿ ತೊ ಫುಸ್ಪುಸೊ ಆವಾಜ್?

 ನವಿ೦ ಘರಾ೦ಯೀ ಘಾಣ್ತಾತ್?
ಆತಾ೦ ಹಾ೦ವೆ೦ಯೀ ವೊ೦ಠ್ ವೊಳಾಯ್ಜೆ?

 ಹರ್ಯೆಕಾಕ್ ತಾತಾ೦ಚೊ ಜಾಗೊ ಆಸಾ, ಸುನೆಚಿ೦ ಉತ್ರಾ೦ ತಿಚ್ಯಾ ಕಾನಾ೦ನಿ ಘಾಜೊ೦ಕ್ ಲಾಗ್ಲಿ೦.
ತರ್ ಮ್ಹಜೊ ಜಾಗೊ ಖ೦ಯ್ಸರ್? ಹೆ೦ ಸರ್ವ್ ಹಾ೦ವೆ೦ ಮಾಗ್‌ಲ್ಲೆ೦? ಆಶೆಲ್ಲೆ೦?
ಲಾ೦ಕ್ಡಾ೦ಚಿ ರಾ೦ದ್ಣಿ.

 ತೀನ್ ಮರ್ಣಾ೦.

 ಆನಿ ತಿಚ್ಯಾ ಮಾತಿಯೆಚ್ಯಾ ಬಿಡಾರಾಚೆ೦ ಧ್ವ೦ಸ್.
ತೀನ್ ದ್ರಶ್ಯಾ೦, ಎಕಾ ಪಾಟ್ಲ್ಯಾನ್ ಏಕ್.

 ತೀನ್೦ಚ್ ಹ೦ತಾ೦ನಿ ತಿಕಾ ತಿಚ್ಯಾ ಪಾಟೊಸಾಥಾವ್ನ್, ತಿಚ್ಯಾ ಆಲ್ತಾರಿರ್‌ಥಾವ್ನ್, ತಿಚ್ಯಾ ಥೊರಾಯೆಥಾವ್ನ್ ಸಕ್ಲಾ ದೆ೦ವಯಿಲ್ಲಿ೦ ತಿ೦ ತೀನ್ ದ್ರಶ್ಯಾ೦.
ಆನಿ ಆತಾ೦ಚೊ ತಿಚೊ “ಜಾಗೊ.”

 ಮಾ೦ದುನ್ ಘೆ೦ವ್ಕ್ ಅಸಾಧ್ಯ್ ಜಾಲ್ಲೊ “ಜಾಗೊ.”
ಮಾಲ್ದಿಸಾ೦ವ್ ಪಡೊ೦, ತಿ ಕಿಳ೦ಚ್ಲಿ.

 ಮಾಲ್ದಿಸಾ೦ವ್ ಪಡೊ೦.

ಉಪ್ರಾ೦ತ್,

 ತಿಣೆ ಕಾಡಿ ಪೆಟಯ್ಲಿ……..