ಅಸ್ತಿತ್ವವಾದಿ ಸಿದ್ಧಾಂತಾಚೆ ಶಿಲ್ಪಿ

ಆದ್ಲ್ಯಾ ಕೀಸ್ತಾಂತ್ ಅಸ್ತಿತ್ವವಾದಿ ಸಿದ್ಧಾಂತಾಚಿ ಮಟ್ವ್ಯಾನ್ ಒಳಕ್ ಕರುನ್ ಘೆತ್ಲ್ಯಾ ಉಪ್ರಾಂತ್, ಹ್ಯಾ ಸಿದ್ಧಾಂತಾ ಪಾಟ್ಲ್ಯಾನ್ ಅಸ್ಲೆಲ್ಯಾ ಥೊಡ್ಯಾ ಪ್ರಭಾವಿ ವ್ಯಕ್ತಿಂ ವಿಶಿಂ ಜಾಣಾಂ ಜಾಂವ್ಚೆಂ ಗರ್ಜೆಚೆಂ. ಹಾಣಿಂ ಫಕತ್ತ್ ಹ್ಯಾ ಸಿದ್ಧಾಂತಾಕ್ ಏಕ್ ಸ್ಪಶ್ಟ್ ವಿವರಣ್ ದಿಲಾಂ ಮಾತ್ರ್ ನ್ಹಯ್, ಹ್ಯಾ ಸಿದ್ಧಾಂತಾಕ್ ವಾಪಾರುನ್ ಸಾಹಿತ್ಯಾಕ್ ಥೊಡಿಂ ಮೊಲಾಧಿಕ್ ತಶೆಂ ಗುಮಾನ್ ವೊಡ್ಚೆ ಕೃತಿಯೊ ದಿಲ್ಯಾತ್. ಹಾಂಚ್ಯಾ ಕೃತಿಯಾಂನಿ ಹೆರ್ ಸಭಾರ್ ಭಾಷೆಂತ್ಲ್ಯಾ ಸಾಹಿತ್ಯಾಂತ್ ಬರಿಚ್ ಕೃಶಿ ಜಾಲ್ಯಾ.

ಸೋರೆನ್ ಕಿರ್ಕೆಗಾರ್ಡ್ (1813-1855): ಹಾಚೆಂ ತತ್ವಜ್ಞಾನ್ ಕಥೋಲಿಕ್ ಧರ್ಮಾಚೆರ್ ರುತಾ ಜಾವ್ನ್, ಹಾಚಿ ಶೈಲಿ ಸೌಂದರ್ಯಾತ್ಮಕ್ ಆನಿ ಭಾವ್ ನೈತಿಕ್ ಗುಣಾಂನಿ ಆಟಾಪ್ಚಿ ಜಾವ್ನಾಸಾ. ತರೀ ಪ್ರೊಟೆಸ್ಟೆಂಟ್ ಪ್ರಭಾವ್ ಸಯ್ತ್ ಹಾಚ್ಯಾ ಚಿಂತ್ಪಾಂಚೆರ್ ಆಸ್‌ಲ್ಲೊ. ಹಾಚ್ಯಾ ಕಾಲಾರ್‌ಚ್ ಜರ್ಮನಿಂತ್ ಹೆಗೆಲಾಚೆಂ ತತ್ವಜ್ಞಾನ್ ಚಡ್ ಪ್ರಚಲಿತ್ ಆಸ್ಲೆಂ ಅನಿ ಹಾಚ್ಯಾ ಸಿದ್ಧಾಂತಾ ವಿಶಿಂ ಕಿರ್ಕೆಗಾರ್ಡ್ ಆಕ್ಷೇಪಣ್ ಕರುನ್ ಉಲಯ್ಲೊ. ಹೆಗೆಲ್ ಆಪ್ಲ್ಯಾ ಸಿದ್ಧಾಂತಾಕ್ ‘ಥೀಸಿಸ್-ಏಂಟಿ ಥೀಸಿಸ್-ಸಿಂಥೆಸಿಸ್’ ಮ್ಹಣ್ ಆಪಯ್ತಾ. ಆನ್ಯೆಕಾ ಅರ್ಥಾನ್ ಹಾಕಾ ವಾದ್ (ಥೀಸಿಸ್) – ಪ್ರತಿವಾದ್ ( ಏಂಟಿ ಥೀಸಿಸ್)- ಸಂಸ್ಕರಣ್ ( ಸಿಂಥೆಸಿಸ್) ಮ್ಹಳ್ಳೆಂ ಕಿರ್ಕೆಗಾರ್ಡ್ ಒಪ್ವಾನಾ. ದೆವಾಕ್ ತಾರ್ಕಿಕ್ ಥರಾನ್ ಪಾತ್ಯೆವ್ಯೆತ್ ಮ್ಹಣ್ ಹೆಗೆಲಾನ್ ಸಾಂಗ್ಲ್ಯಾರ್ ಕಿರ್ಕೆಗಾರ್ಡ್ ದೆವಾಕ್ ಫಕತ್ತ್ ಪಾತ್ಯೆಣಿ ಮಾತ್ರ್ ಆರ್ಥ್ ಕರುಂಕ್ ಸಕ್ತಾ ಮ್ಹಣ್ ಸಾಂಗ್ತಾ.

ಕಿರ್ಕೆಗಾರ್ಡಾಚ್ಯೆ ಸಿದ್ಧಾಂತಾಚೊ ಕೇಂದ್ರ್ ‘ವಿಂಚವ್ಣಿ’. ಹರ್ಯೆಕಾ ವ್ಯಕ್ತಿಕ್ ಆಪ್ಲ್ಯಾ ಜಿಣ್ಯೆಚ್ಯೆ ಅವ್ದೆಂತ್ ಸಭಾರ್ ನೈತಿಕ್ ವಿಂಚವ್ಣ್ಯೊ ಕರುನ್, ಥೊಡ್ಯಾ ಸಮಸ್ಯಾಂಕ್ ಹರ್ದೆಂ ದೀಜಾಯ್ ಪಡ್ತಾ. ವ್ಯಕ್ತಿನ್ ಕರ್ಚ್ಯೊ ವಿಂಚವ್ಣ್ಯೊ ಏಕಾ ಸಾಂಕ್ಳಿ ಬರಿ ಆಸುನ್ ಎಕಾಮೆಕಾಚೆರ್ ಪರಿಣಾಮ್ ಘಾಲ್ತಾತ್. ” ಸತ್ ಮ್ಹಳ್ಯಾರ್ ಏಕ್ ಜಾಳ್.ತ್ಯಾ ಜಾಳ್ಯಾಂತ್ ಶಿರ್ಕಾಲ್ಯಾ ಶಿವಾಯ್ ತೆಂ ಜಾಳ್ ಹಾತಾಕ್ ಮೆಳಾನಾ,ಬದ್ಲಾಕ್ ಆಪ್ಣಾಕ್ ಚ್ ಶಿರ್ಕೊನ್ ಘಾಲಾಯ್ತಾ”. ಮ್ಹಣ್ಚಾ ತಾಚ್ಯಾ ಉತ್ರಾಂನಿ ಅಸ್ತಿತ್ವ್ ಮ್ಹಳ್ಯಾರ್ ಏಕ್ ಚಿಂತಾಪ್, ತೆಂ ಚಿಂತಾಪ್ ಸತ್ ಮ್ಹಣ್ ಆಪಯ್ಲ್ಯಾರ್ ತೆಂಚ್ ಸತ್ ಏಕ್ ಪಾತ್ಯೆಣಿ ಜಾವ್ನ್ ಬದ್ಲಾತಾ. ವ್ಯಕ್ತಿ ಆಪ್ಲೆಂ ವ್ಯಕ್ತ್ವಿತ್ವ್ ಹೊಗ್ಡಾಯ್ನಾಸ್ತಾನಾ, ಅಸ್ತಿತ್ವಾ ಮುಖಾಂತ್ರ್ ಚ್ ದೆವಾ ಥಂಯ್ ಏಕ್ ಜಾವ್ಯೆತ್ ಮ್ಹಣ್ ಕಿರ್ಕೆಗಾರ್ಡ್ ಪಾತ್ಯೆತಾ. ಹೊ ಏಕ್ ಅಸ್ತಿಕ್ ಅಸ್ತಿತ್ವ್ ವಾದಿ. ತರೀ ಹಾಕಾ ಸದಾಂಚ್ ಖರೊ ಕ್ರೀಸ್ತಾಂವ್ ಜಾಂವ್ಚೆಂ ಕಸೆಂ? ಮ್ಹಳ್ಳೆಂ ಸವಾಲ್ ಧೊಸ್ತಾಲೆಂ. ಹಾಕಾ ಜಾಪ್ ಸೊದ್ತಾನಾ ತಾಕಾ ಜೆಜುನ್ ಶಿಕಯಿಲ್ಲೆಂ ಆನಿ ಕಥೊಲಿಕ್ ಇಗರ್ಜ್ಯಾಂನಿ ಕರ್ಚೆಂ ‘ವಿಧಿ ವಿಧಾನ್’ (Rituals ) ಮಧೆಂ ಘುಸ್ಪೊಡ್ ದಿಸ್ಲೊ. ಹ್ಯಾ ವಿಶಿಂ ತಾಣೆಂ ವಿರೋಧ್ ಕೆಲ್ಲ್ಯಾನ್ ತಾಚೊ ಆನಿ ಇಗರ್ಜೆ ಮಧ್ಲೊ ಸಂಬಂಧ್ ಭಿಗಡ್ಲೊ. ಇಗರ್ಜ್ಯಾಂನಿ ಜೆಜುಚಾ ನಾಂವಿ ಕರ್ಚೆಂ ಪೂರಾ ತಾಣೆಂ ‘ಕ್ರಿಶ್ಚಿಯನ್ ಸಾಮ್ರಾಜ್ಯ್’ (Christendom) ಮ್ಹಣ್ ವೊಲಾಯ್ಲೆಂ.

ಕಿರ್ಕೆಗಾರ್ಡಾನ್ ‘ಅಸ್ತಿತ್ವ್’ ಮ್ಹಳ್ಳ್ಯಾ ಸಬ್ದಾಕ್ ಏಕ್ ಪ್ರತ್ಯೇಕ್ ಆರ್ಥ್ ದಿಲಾ ತೆಂ ಸತ್. ಹಾಚ್ಯೆ ಉಪ್ರಾಂತ್ ಜರ್ಮನಿ ಆನಿ ಫ್ರಾನ್ಸ್ ದೇಶಾಂನಿ ವಾಡ್ಲೆಲೆಂ ಆಸ್ತಿತ್ವ್ ವಾದಾಚ್ಯೆ ಸಿದ್ಧಾಂತಾಂತ್ ಆಮಿ ಹೊಚ್ಚ್ ಅರ್ಥ್ ಪಳೆತಾಂವ್. ಅಸ್ತಿತ್ವ್ ಮ್ಹಳ್ಯಾರ್ ಮನ್ಶ್ಯಾನ್ ‘ಜಾವ್ನಾಸ್ಚಾಕೀ’ ‘ಜಾಂವ್ಚೆಂ’ ಏಕ್ ನಿರಂತರ್ ಪ್ರಯತನ್ ಆನಿ ಗರ್ಜೆಚೆಂ. ಅಸ್ತಿತ್ವ್ ಮ್ಹಳ್ಯಾರ್ ಫಕತ್ ‘ಅಸ್ಚೆಂ’ ನ್ಹಯ್ ಬದ್ಲಾಕ್ ‘ವಿಂಚವ್ಣೆಚೆಂ’ ಸ್ವಾತಂತ್ರ್ಯ್ ಚಲವ್ನ್ ಜಿಯೆಂವ್ಚೆಂ. ಮನ್ಶ್ಯಾಕ್ ವಿಂಚವ್ಣಿ ಕರ್ಚ್ಯಾಕ್ ದೇವ್ ಪರ್ವಣ್ಗಿ ದಿತಾ ಯಾ ಆವ್ಕಾಸ್ ದಿತಾ. ದೆಕುನ್ ಆಪುಣ್ ಕೆಲ್ಲ್ಯಾ ವಿಂಚವ್ಣೆ ವಿಶಿಂ ತಾಣೆಂ ಜವಾಬ್ದಾರಿ ಘೆಜಾಯ್ ಮ್ಹಳ್ಳೆಂಚ್ ಕಿರ್ಕೆಗಾರ್ಡಾಚ್ಯೆ ಅಸ್ತಿತ್ವವಾದ್ ಸಿದ್ಧಾಂತ್.

ಫ್ರೆಡರಿಕ್ ನೀತ್ಸೆ (1844-1890): ಏಕ್ ಕವಿ, ತತ್ವಜ್ಞಾನಿ,ವಿಶ್ಲೇಷಕ್,ಪ್ರವಾದಿ, ಪ್ರಾಧ್ಯಾಪಕ್ ಮ್ಹಣ್ ಹಾಕಾ ಒಳ್ಕಾತಾತ್. ಹೊ ಸದಾಂಚ್ ಪಿಡೆನ್ ವಳ್ವಳ್ತಾಲೊ. ಜರ್ಮನಿಂತ್ ಜಲ್ಮಾಲ್ಲೊ. ಲ್ಹಾನ್ಪಾಣಾರ್‌ಚ್ ಗ್ರೀಕ್, ಸಂಸ್ಕ್ರತ್ ಆನಿ ಸಾಹಿತ್ಯಾವಿಶಿಂ ಆಕರ್ಷಿತ್ ಜಾಲ್ಲೊ. ಗ್ರೀಕ್ ದುರಂತ್  –  ಭೀಕರ್, ಆಪಾಯಾಚೆಂ ಆನಿ ಸುಲಭಾಯೆನ್ ವಿವರ್ಸುಂಕ್ ಜಾಯ್ನಾ  ತಸಲೆಂ ಮ್ಹಳ್ಳೊ ಸಂದೇಶ್ ದಿತಾ. ನಿರಾಸ್ ಜಾವ್ನ್ ಶರಣಾಗತ್ ಜಾಯ್ನಾಸ್ತಾಂ ಜಿಣಿ ಜಿಯೆಜಾಯ್ ಮ್ಹಣ್ ಗ್ರೀಕ್ ಲೋಕ್ ಪಾತ್ಯೆತಾಲೊ. ಗ್ರೀಕ್ ಸಾಹಿತ್ಯಾಂತ್ ಸಭಾರ್ ದೇವ್ ಆನಿ ದೇವಿ ಆಸೊನ್ ಮ್ಹನ್ಶ್ಯಾಚಿ ಜಿಣಿ ತೆ ನಿಯಂತ್ರಣ್ ಕರ್ತಾತ್. ಅಮಾಲಾಚೊ ದೇವ್ ಡಯೋನೀಸಿಯಸ್, ಸೊಭಾಯೆಚೊ ದೇವ್ ಅಪೊಲೋ, ಅಥೆನಾ), ಬುದ್ವಂತ್ಕಾಯೆಚಿ ದೇವಿ, ಜೆಯಸ್ –  ಸರ್ವ್ ಗ್ರೀಕ್ ದೆವಾಂಚೆ ಮುಖೆಲಿ ( ಹಿಂದೂ ಪುರಾಣಾಂತ್ ಆಸ್ಚ್ಯಾ ಇಂದ್ರಾ ಬರಿ).

“ಭೌತಿಕ್ ಆನಿ ತಾಂತ್ರಿಕ್ ವಾಡಾವಳ್ ಏಕ್ ಫಟ್ಕಿರೆಂ ಆಶ್ವಾಸನ್ ಆನಿ ಹೆಂ ಅವನತೆಕ್ ಕಾರಣ್ ಜಾತಾ. ಜರ್ಮನಿಂತ್ ದಿಸೊನ್ ಆಸ್ಚೆಂ ಸಕ್ಕಡ್ ಫಟ್ಕಿರೆಂ ಆಶಾವಾದ್. ಸಂಸಾರ್ ಸ್ತಬ್ದ್ ಜಾಲಾ, ವ್ಯಕ್ತಿಚೊ ಗೌರವ್ ಚುಕೊನ್ ಗೆಲಾ” ಮ್ಹಳ್ಳಿಂ ಹಾಚಿಂ ಉತ್ರಾಂ ಹಿಟ್ಲಾರಾಚ್ಯೆ ನಾಝಿಂಕ್ ಅನ್ಕೂಲ್ ಜಾಲ್ಲೆಂ ಮ್ಹಣ್ ಆರೋಪ್ ಆಸಾ. ನೀತ್ಸೆ ಕ್ರೀಸ್ತಾಂವ್ ಧರ್ಮಾಚೆಂ ಭೊಗ್ಸಾಣೆಂ, ತ್ಯಾಗ್ ಇತ್ಯಾದಿ ಮೊಲಾಂಕ್ ಮಾಂದಿನಾ. ದೇವ್ ಫಕತ್ತ್ ಏಕ್ ಕಲ್ಪನ್ ಮ್ಹಣ್ ಹಾಚಿ ಅಭಿಪ್ರಾಯ್. ‘ದೇವ್ ಮೆಲಾ!’ ಮ್ಹಳ್ಳಿಂ ಹಾಚೆಂ ಸಾಂಗ್ಣೆಂ ಭಾರಿಚ್ ವಾದ್ ವಿವಾದಾಕ್ ಒಳಗ್ ಜಾಲ್ಲೆಂ. ಕ್ರೀಸ್ತಾಂವ್ ಏಕ್ ಜೀವ್ ವಿರೋಧಿ ಧರ್ಮ್ ದೆಕುನ್ ದೇವ್ ನಾ, ತೊ ಮೆಲಾ. ದೇವ್ ಮೆಲ್ಯ್ಯಾನ್ ಸಗ್ಳ್ಯಾ ಸಂಸಾರಾಕ್ ಸುಟ್ಕಾ ಮೆಳ್ತಾ ಮ್ಹಣ್ ಹಾಚೊ ವಾದ್. ದೇವ್ ಮೆಲಾ ಜಾಲ್ಲ್ಯಾನ್ ಮನ್ಶ್ಯಾನ್ ಆಪ್ಲೆಂಪಣ್ ಆಪ್ಣಾವ್ನ್ ‘ಸೂಪರ್ ಮ್ಯಾನ್’ ಜಾಯ್ಜಯ್ ಮ್ಹಣ್ ಹೊ ಉಲೊ ದಿತಾ. ‘ಜಿಣ್ಯೆಚಿ ಖುಶಿ’ (will to life) ಗರ್ಜೆಚಿ ನ್ಹಯ್,ಬದ್ಲಾಕ್ ‘ಅಧಿಕಾರಾಚಿ ಆಶಾ’ (will to power) ಜಾಯ್ ಮ್ಹಣ್ತಾ. ದೆಕುನ್ ಧರ್ಮಾನ್ ದಿಂವ್ಚೊ ಮೋಗ್, ಭಿರ್ಮತ್, ಭೊಗ್ಸಾಣೆಂ, ದಾನ್, ತ್ಯಾಗ್ ಇತ್ಯಾದಿ ಸೊಡ್ನ್ ಅಧಿಕಾರಾಕ್ ಆಪ್ಣಾಜಾಯ್. ಸತ್ ಸಾಂಗ್ಚೆಂ ತರ್ ಮನಿಸ್ ನಿಜಾಯ್ಕೀ ಅಧಿಕಾರಾಕ್‌ಚ್ ಆಶೆತಾ ಮ್ಹಣ್ ನೀತ್ಸೆ ವಾದ್ ಕರ್ತಾ.

ಮಾರ್ಟಿನ್ ಹೈಡೆಗರ್ (1889-1976): ಹಾಚ್ಯೆ ಖಾಸ್ಗಿ ಜಿಣ್ಯೆ ವಿಶಿಂ ಚಡ್ತಿಕ್ ಮಾಹೆತ್ ಮೆಳಾನಾ. ಅಸ್ತಿತ್ವವಾದಿಂ ಪೈಕಿ ಹೊ ಎಕ್ಲೊ ನಿಗೂಢ್ ವ್ಯಕ್ತಿ. ಕಥೊಲಿಕ್ ಕುಟ್ಮಾಂತ್ ಜಲ್ಮಾಲ್ಲೊ ಹೊ ಜೆಜ್ವಿತ್ ಜಾಂವ್ಕ್ ವೆತಾ. ಪೂಣ್ ಪಾದ್ರಿ ಜಾಂವ್ಚ್ಯಾ ಪಯ್ಲೆಂಚ್ ಸೊಡ್ನ್ ಭಾಯ್ರ್ ಯೆತಾ. ಹರ್ಯೆಕ್ ಸಮಸ್ಯಿಂ ಮನ್ಶ್ಯಾಚ್ಯೆ ಅಸ್ತಿತ್ವಾ ವಿಶ್ಯಾಂತ್‌ಚ್ ಆಸ್ತಾತ್ ಮ್ಹಣ್ ಹಾಚೆಂ ಚಿಂತಾಪ್. ಹಾಚಿ ಕೃತಿ ‘ಆಸ್ಚೆಂ ಆನಿ ಕಾಳ್’ (Being and Time,1927) ಆಧುನಿಕ್ ತತ್ವಜ್ಞಾನಾಚಿ ‘ಕ್ಲಾಸಿಕ್’ ಕೃತಿ ಮ್ಹಣ್ ನಾಂವಾಡ್ಲ್ಯಾ. ಹ್ಯಾ ಕೃತಿಯೆಂತ್ ತೊ ಮನ್ಶ್ಯಾಚೆಂ ಅಸ್ತಿತ್ವ್‌ಚ್ ಪ್ರಮುಖ್ ಸಮಸ್ಸೊ ಮ್ಹಣ್ ಸಾಂಗ್ತಾ. ’ದೂದ್ ಧವೆಂ ಆಸಾ’, ’ಬೊಲ್ಸಾಂತ್ ಪೈಶೆ ಆಸಾತ್’, ’ಸುರ್ಯೊ ಉದೆತಾ’ ಇತ್ಯಾದಿ ಸಾಂಗ್ಣ್ಯಾ ಪಾಟ್ಲ್ಯಾನ್ ‘ಆಸ್ಚೆಂ’ ಮ್ಹಳ್ಳೆಂ ಕಲ್ಪನ್ ಆಸಾ. ‘ರಾಕಾ!’ ಮ್ಹಳ್ಳ್ಯಾ ಕಿಂಕ್ರಾಟೆ ಪಾಟ್ಲ್ಯಾನ್ ‘ಹಾಂವ್ ಆಪಾಯಾಂತ್ ಆಸಾಂ’ ಮ್ಹಳ್ಳೊ ಆರ್ಥ್ ಆಸಾ. ಹರ್ಯೆಕ್ ಆರ್ಥ್ ಏಕ್ ‘ಆಸ್ಚ್ಯಾಕ್’ ಸಂಬಂದಿತ್ ಜಾವ್ನಾಸಾ. ದೆಕುನ್ ಅಸ್ತಿತ್ವಾಚೊ ಆರ್ಥ್ ಸಮ್ಜೊನ್ ಘೆಜಾಯ್ ತೆದ್ನಾಂ ‘ಆಸ್ಚ್ಯಾಕ್’ ಸಮ್ಜೊವ್ಯೆತ್ ಮ್ಹಣ್ ಹಾಚಿ ಅಭಿಪ್ರಾಯ್.

ಮನ್ಶ್ಯಾನ್ ಕರ್ಚ್ಯಾ ಹರ್ಯೆಕಾ ನಿರ್ಧಾರಾ ಪಾಟ್ಲ್ಯಾನ್ ಅಪಾಯ್ ಆಸಾ ಮ್ಹಣ್ ಹೈಡೆಗರ್ ಚೆತಾವ್ಣಿ ದಿತಾ. ಕಿತ್ಯಾಕ್, ಹೆ ತಾಚೆ ನಿರ್ಧಾರ್ ಮಾತ್ರ್ ನ್ಹಯ್, ವಿವಿಂಗಡ್ ಥರಾನ್ ಹೆರ್ ವ್ಯಕ್ತಿಂಕೀ ತೊಂದ್ರೆ ದೀಂವ್ಕ್ ಪುರೊ. ಹಾಚೆಂ ತತ್ವಜ್ಞಾನ್, ಅಸ್ತಿತ್ವಾಚೆಂ ಸಿದ್ಧಾಂತ್ ನಾಝಿಂಕ್ ಸಹಕಾರ್ ಜಾಂವ್ಕ್ ಪಾವ್ಲೆಂ ಮ್ಹಳ್ಳೊ  ವಾದ್ ವಿವಾದ್ ಜಾಲ್ಲೊ.

ಜಾನ್-ಪೌಲ್-ಸಾತ್ರ್ (1905-1980): 20 ವ್ಯಾ ಶತಮಾನಾನ್ ಪಳೆಲ್ಲೊ ಏಕ್ ಫಾಮಾದ್ ಬರವ್ಪಿ. ಹೊ ಫ್ರೆಂಚ್ ಕಾದಂಬರಿಕಾರ್, ನಾಟಕ್ ಕಾರ್, ಶಿಕ್ಷಕ್, ಸೊಜೆರ್ ಆನಿ ತತ್ವಜ್ಞಾನಿ. ಆಪ್ಣಾಕ್ ಲಾಭ್ಲೆಲಿ ನೊಬೆಲ್ ಪ್ರಶಸ್ತಿಕ್ ಚ್ ತಿರಸ್ಕಾರ್ ಕೆಲ್ಲೊ ಪಯ್ಲೊ ಸಾಹಿತಿ. ಫ್ರಾನ್ಸಾಂತ್ ಅಸ್ತಿತ್ವವಾದ್ ಏಕ್ ಸಾರ್ಕೆಂ ಸಿದ್ಧಾಂತ್ ಜಾಂವ್ಕ್ ಹಾಣೆಂ ವಾದ್ ಮಾಂಡ್ಲೊ ಆನಿ ಬರ‍್ಯೊ ಸಾಹಿತೀಕ್ ಕೃತಿಯೊ ರಚ್ಲ್ಯೊ.ಜರ್ಮನಿಂತ್ ತತ್ವಜ್ಞಾನ್ ಶಿಕ್ತಾನಾ ಥಂಯ್ಸರ್ ಹೈಡಗಾರಾಚಿ ಒಳಕ್ ಜಾತಾ. ಫ್ರಾನ್ಸಾಂತ್ ಸಾತ್ರ್. ದುಸ್ರ್ಯಾ ಜಾಗತಿಕ್ ಝುಜಾ ವೆಳಾರ್ ಸೊಜೆರ್ ಜಾವ್ನ್ ಜರ್ಮನಿಂತ್ ತೊ ಕೈದ್ ಜಾಲೊ. ಸುಟ್ಕಾ ಮೆಳ್ತಚ್ ಪಾಟಿಂ ಪ್ಯಾರಿಸಾಕ್ ಆಯ್ಲೊ.

“ಬೂಕ್ ಚ್ ಮ್ಹಜಿಂ ಸುಕ್ಣಿಂ, ಗುಡ್, ಮನ್ಜಾತಿ, ಮ್ಹಜೆಂ ಗುಡ್ಸುಲ್, ಮ್ಹಜೆಂ ವೋಡ್ತ್” ಮ್ಹಣ್ ಹೊ ಬೂಕಾ ಥೈಂ ಆಪ್ಲೊ ಮೋಗ್ ದಾಖಯ್ತಾ. ಹಾಣೆಂ ಅಸ್ತಿತ್ವವಾದಾ ವಿಶಿಂ ಚಿಂತ್ಪಾಂ ಆಟಾಂವ್ಚಾ ವಗ್ತಾ ಫ್ರಾನ್ಸ್ Naturalism  ಸಿದ್ಧಾಂತಾನ್ ರೆವ್ಡಾಯಿಲ್ಲೆಂ. ವಾಸ್ತವವಾದಾಕ್ ವಿರೋಧ್ ಜಾವ್ನ್ ಜಲ್ಮಾಲ್ಲೆಂ ಸಿದ್ಧಾಂತ್‌ಚ್ ನಿಸರ್ಗವಾದ್. ಮನ್ಶ್ಯಾಚಾ ಚಿಂತ್ಪಾಂಕ್ ಮೆಳಾನಾತ್‌ಲ್ಲಿ ಏಕ್ ವ್ಹಡ್ ಸಕತ್ ಆಸಾ ಮ್ಹಣ್ ಹ್ಯಾ ವಾದಾಚೊ ಸಾರಾಂಶ್. ಪೂಣ್, ಹ್ಯಾ ಸಕ್ತೆಕ್ ದೇವ್ ಮ್ಹಣ್ ನಾಂವ್ ದಿಲೆಂ ನಾ ಮ್ಹಳ್ಳೆಂ ಆಮಿ ಸಮ್ಜಾಜಾಯ್.

ಸಾತ್ರಾನ್ ಆಪ್ಲ್ಯಾ ಅಸ್ತಿತ್ವವಾದ್ ಚಿಂತ್ಪಾಂಕ್ ಜಲ್ಮ್ ದೀಂವ್ಕ್ ವಿಂಚ್ಲೆಲಿ ವಾಟ್ ಕಾದಂಬರಿ. ಎಕ್ಸುರ್ಪಾಣಾನ್ ಖರ್ಗೊಂಚ್ಯಾ ತಾಕಾ ಸಾಹಿತೀಕ್ ರೀತ್ ಎಕ್ ಸುಟ್ಕಾ ತಸೆಂ ಭಗ್ಲಿ. ಹಾಚಿ ಸುರ್ವಿಲಿ ಕಾದಂಬರಿ ‘ನಾಸಿಯಾ’ ಹಾಂತು  ‘ಆಸ್ಚೆಂ’  ಮ್ಹಳ್ಳೆಂ ಕಸಲೊಚ್ ಉದ್ದೇಶ್ ನಾಸ್ತಾನಾ ಆಸ್ಚೆಂ ಮ್ಹಣ್ ತೊ ಸಾಂಗ್ತಾ. ಉದ್ದೇಶ್ ಮಾತ್ರ್ ನ್ಹಯ್, ಪ್ರೇರಣ್ ಯಾ ಸಮರ್ಥನ್ ಸಯ್ತ್ ನಾ. ‘ನಾ ಆಸ್ಚೆಂಚ್’ ಆಸ್ಚ್ಯಾಚೊ ಘುಟ್. ನಾತ್ಲೆಲ್ಯಾ ದಿಶಿಂ ಲೋಕಾನ್ ವೆಚೆಂ ಅಸಂಬದ್ಧ್ ದೆಕುನ್ ಅಸ್ತಿತ್ವ್ ವಾದ್ ಮ್ಹಳ್ಯಾರ್ ಅಸಂಬದ್ಧ್. ದೇವ್ ಆಸಾ ಮಣ್ಚೆಂ ಏಕ್ ಕಲ್ಪನ್ ಮಾತ್ರ್ ಆನಿ ತೆಂ ಕಲ್ಪನ್ ಅಸಂಬದ್ಧ್ ಮ್ಹಣ್ ತಾಚಿ ಅಭಿಪ್ರಾಯ್. ಅಸ್ತಿತ್ವವಾದಾಕ್ ಹಾಣೆಂ ದಿಲ್ಲಿ ಬ್ರಹತ್ ಕೃತಿ Being and nothingness (1943). ಹ್ಯಾ ಕೃತಿಯೆ ಮುಕಾಂತ್ರ್ ಕಿರ್ಕೆಗಾರ್ಡ್, ನೀತ್ಸೆ ಆನಿ ಹೈಡಗಾರಾನ್ ಅಸ್ತಿತ್ವ್‌ವಾದಾಕ್ ದೀಂವ್ಕ್ ಜಾಯ್ನಾತ್‌ಲ್ಲೆಂ ಏಕ್ ಘಟ್ಟ್ ಸೈದ್ದಾಂತಿಕ್ ರೂಪ್ ದಿಂವ್ಚ್ಯಾಂತ್ ತೋ ಯಶಸ್ವಿ ಜಾಲಾ.

ಆಸ್ಚೆಂ ಆನಿ ನಾ ಆಸ್ಚಾ ಮಧೆಂ ಜಾಂವ್ಚಿ ಲಡಾಯಿಚ್ ಮನ್ಶ್ಯಾಚೆಂ ಜಿವಿತ್. ಹ್ಯೊ ದೋನ್ ಸಂಗ್ತಿ ಕೆದಿಂಚ್ ಸಾಂಗಾತಾ ಯೇನಾಂತ್. ಮನ್ಶ್ಯಾನ್ ಕರ್ಚ್ಯಾ ಹರ್ಯೆಕ್ ವಿಂಚವ್ಣೆಕ್ ತೊಚ್ಚ್ ಜವಾಬ್ದಾರ್ ಜಾವ್ನಾಸಾ. ದೇವ್ ನಾ ಜಾಲ್ಲ್ಯಾನ್ ಆಪುಣ್ ಸಲ್ವಲ್ಯಾರೀ ಯಾ ಜಿಕ್ಲ್ಯಾರೀ, ಪಡ್ಲ್ಯಾರೀ ಯಾ ಉಟ್ಲ್ಯಾರೀ ಕೊಣಾಕ್‌ಚ್ ದುರ್ಸಾನಾಸ್ತಾನಾ ಆಪ್ಣೆಂಚ್ ಜವಾಬ್ದಾರಿ ಮಾಂದುನ್ ಘೆಜಾಯ್. ಆಪ್ಲ್ಯಾ ವಿಂಚವ್ಣೆ ವರ್ವಿಂ ಹೆರಾಂಚೆರ್ ಜಾಂವ್ಚಾ ಪರಿಣಾಮಾಂಕೀ ತೊಚ್ಚ್ ಜವಾಬ್ದಾರ್ ಜಾತಾ.

ಹ್ಯಾ ಸಿದ್ದಾಂತಾಕ್ ಪ್ರತಿಪಾದನ್ ಕೆಲ್ಲೆ ಹೆರ್ ತತ್ವ್ ಜ್ಞಾನಿ ಜಾವ್ನಾಸಾತ್- ಗೇಬ್ರಿಯಲ್ ಮಾರ್ಸೆಲ್ (1889-1973), ಕಾರ್ಲ್ ಯಾಸ್ಪರ್ಸ್ (1883-1969),ನಿಕೊಲಾ ಅಬಗ್ನಾನೊ (1901-199೦) ಆನಿ ಥೊಡೆ ಹೆರ್.

► ಉಬ್ಬ, ಮೂಡ್ ಬಿದ್ರಿ

[ ಮುಕ್ಲ್ಯಾ ಕೀಸ್ತಾಂತ್ – ‘ಅಸ್ತಿತ್ವವಾದ್ ಆನಿ ಪಾಶ್ಚಾತ್ಯ್ ಸಾಹಿತ್ಯ್’ ]