ಪಾಸ್ಕ್ ಫೆಸ್ತ್…ಜೆಜುಚೆಂ ಪುನರ್ ಜಿವಂತ್ಪಣಾಚೆಂ ಫೆಸ್ತ್.
ಹೆಂ ಫೆಸ್ತ್ ಆಚರ್ಸುಂಚ್ಯಾ ಸಂಧರ್ಭಿಂ…ಜೆಜು ಖರೊಚ್ಚ್ ಆಮ್ಚೆಂ ಸಂಗಿ ಜಿವಂತ್ ಆಸಾ ಮ್ಹಳ್ಳೆಂ ಸತ್ ಆಮಿಂ ಭರ್ವಾಶ್ಯಾನ್ ಸಂಭ್ರಮುಂಕ್ ಜಾಯ್.
ಹೊ ದೀಸ್ ಸಂಸಾರ್ಭರ್ ಕ್ರೀಸ್ತೀ ಲೊಕಾಕ್ ಏಕ್ ವರ್ತೊ ಮಹತ್ವಾಚೊ ದೀಸ್. ಹೊ ದೀಸ್ ಸೊಮ್ಯಾಚೊ ದೀಸ್. ಕಿತ್ಯಾಕ್ ಕ್ರೀಸ್ತೀ ಲೊಕಾಚೆಂ ಅಸ್ತಿತ್ವ್ ಆನಿ ಭಾವಾರ್ಥಿ ಜೀವನ್… ಜೆಜುಚ್ಯಾ ಪುನರ್ ಜಿವಂತ್ಪಣಾಚ್ಯಾ ಮಿಸ್ತೆರಾಂತ್ ಆಟಾಪುನ್ ಆಸಾ.
ಆಮಿ ಅಚಾನಕ್ ಆಮ್ಚ್ಯಾ ಕಶ್ಟಾಂ ಅನ್ವಾರಾಂತುನ್ ಅಜಾಪಿಂ ಮ್ಹಳ್ಳೆಪರಿಂ ಬಚಾವ್ ಜಾಲ್ಲ್ಯಾ ತವಳ್, ಆಮ್ಚ್ಯಾ ಜಿವಿತಾಂತ್ ಎಕಾ ಥರಾಚೆಂ ಜಿವಂತ್ಪಣ್ ಆಮಿ ಭೊಗ್ತಾಂವ್. ಅಸಲ್ಯಾವೆಳಾ ಭೊಗ್ಚೊ ತೊ ಸಂತೊಸಾಚೊ ಅನ್ಭೊಗ್…ಜೆಜುಚ್ಯಾ ಪುನರ್ ಜಿವಂತ್ಪಣಾಚ್ಯಾ ಸಂತೊಸಾಕ್ ಸರಿ ಮ್ಹಣ್ಯೆತಾ.
ಆಮಿ ಹರ್ಯೆಕ್ ದೀಸ್ ಸೊಮಿಯಾನ್ ಭಾಸಾಯಿಲ್ಲ್ಯಾ ಜಿವಂತ್ಪಣಾಚ್ಯಾ ಭರ್ವಾಶ್ಯಾನ್ ಜಿಯೆಂವ್ಕ್ ಜಾಯ್ ಮ್ಹಣ್ ಆಮ್ಕಾಂ ತೋ ಜಾಗಯ್ತಾ. ತಾಚ್ಯಾ ಸ್ಪರ್ಶಾಂತ್ ಆಸ್ಲೆಲ್ಯಾಂಕ್ ಅತ್ಮೀಕ್ ಮರಣ್ ನಾ ಆನಿ ತಾಂಚ್ಯಾ ಕಶ್ಟಾ ಅನ್ವಾರಾಂತ್ ತೊ ಸದಾಂ ತಾಂಚೆ ಸಂಗಿ ಆಸಾ ಮ್ಹಳ್ಳೊ ಭರ್ವೊಸೊ ತೋ ಆಮ್ಕಾಂ ದಿತಾ.
ಮಾಗ್ದಾಲಾಚಿ ಮರಿ, ಪೆದ್ರು ಆನಿ ತೊ ಆನ್ಯೆಕ್ಲೊ ಶಿಸ್ – ತೆಗೀ ಜೆಜುಚೆ ಪಾಟ್ಲಾವ್ದಾರಿ. ಜೆಜುಸಂಗಿ ಜಿಯೆವ್ನ್, ತಾಚಿ ಉತ್ರಾಂ ಆಯ್ಕೊನ್ ಆಸ್ಲ್ಲೆ ಮನಿಸ್. ತರೀ ಜೆಜುನ್ ಸಾಂಗ್ಲೆಲ್ಯಾ ‘ಆಪುಣ್ ತೀನ್ ದಿಸಾಂನಿಂ ಜಿವಂತ್ ಜಾತಾ’ ಮ್ಹಳ್ಳ್ಯಾ ಉತ್ರಾಚೆರ್ ಭರ್ವೊಸೊ ದವರಿನಾಸ್ತಾಂ… ಭರ್ಲೆಲ್ಯಾ ದುಖಾನ್ ತಾಚ್ಯಾ ಫೊಂಡಾ ಸರ್ಶಿಂ ಗೆಲೆ.
ಪೂಣ್ ಜೆಜು ತಾಂಕಾ ಥಂಯ್ಸರ್ ಮೆಳ್ಳೊನಾಂ!.
ಹ್ಯಾ ವರ್ವಿಂ ಜೆಜು ಆಮ್ಕಾಂ ದಾಕವ್ನ್ ದಿತಾ…‘ಆಪುಣ್ ಮನ್ಶಾ ಮಧೆಂ ಜಿಯೆವ್ನ್ ಆಸಾ. ತಾಂಕಾ ಜಿವಿತ್ ದೀವ್ನ್ ಆಸಾ’. ದೆಕುನ್ ಆಮಿಂ ಆಮ್ಚ್ಯಾ ಕಶ್ಟಾಂ ಅನ್ವಾರಾಂತ್, ನಿರಾಶೆಂತ್ ಭರ್ವೊಸೊ ಸಾಂಡುನ್ ಜಿಯೆಂವ್ಚೆಂ ನ್ಹಂಯ್. ಬಗಾರ್ ಜಿವಂತ್ ಜೆಜುಚ್ಯಾ ಭರ್ವಾಶ್ಯಾಚೆರ್ ಜಿಯೆಂವ್ಕ್ ಜಾಯ್.
ಗರ್ದಾನಾಚ್ಯಾ ಗೊಟ್ಯಾಂತ್ ಜಲ್ಮಾಲ್ಲ್ಯಾ ಜೆಜುನ್ …ಮರಣಾ ನಂತರ್ ಖಡ್ಪಾಂನಿಂ ಪೊಕೊರ್ಲೆಲ್ಯಾ ಮಾಟ್ಯಾಂತ್ ವಿಶೆವ್ ಘೆತ್ಲೊ. ಜಲ್ಮಾತಾನಾಂ ಖಾಲ್ತೊ ಜಾವ್ನ್ ಗೊರ್ವಾಂಚ್ಯಾ ಖಾವ್ಣೆರ್ ಜಲ್ಮಲ್ಲೊ ತೊ… ಮೊರ್ತಾಸ್ತಾನಾಂ ಭೊಗ್ಸಾಣ್ಯಾಚೊ ಕಾಕುಳ್ದಾರ್ ಜಾವ್ನ್ ಖುರ್ಸಾರ್ ಮರಣ್ ಪಾವ್ಲೊ.
ಜೆಜುಕ್ರೀಸ್ತಾನ್…ದೆವಾಚೊ ಪ್ರತ್ಯೇಕ್ ಇರಾದೊ ಜ್ಯಾರಿ ಕರ್ಚ್ಯಾ ಖಾತಿರ್ ಖುರ್ಸಾ ಮರಣ್ ಆಪ್ಣಾಯ್ಲೆಂ. ಆನಿ ತೀನ್ ದಿಸಾಂನಿಂ ತೊ ಪುನರ್ಜಿವಂತ್ ಜಾಲೊ.
ಆನಿ ದೆವಾಚೊ ತೊ ಪ್ರತ್ಯೇಕ್ ಇರಾದೊ ಜಾವ್ನ್ ಆಸ್ಲ್ಲೊ… ‘ಮನ್ಶಾಕುಳಾಕ್ ತಾಣೆಂ ದಿಂವ್ಚೊ ಮೀತ್ ಮೇರ್ ನಾತ್ಲೊಲೊ ಅಪರಿಮಿತ್ ಮೋಗ್…ಆನಿ ತಶೆಂಚ್ಚ್ ತಾಕಾ ಸತ್ಮಾನ್ತಾಲ್ಯಾ ಕೊಣೆಂಚ್ಚ್ ನಾಸ್ ಜಾಂವ್ಕ್ ನಜೊ ಮ್ಹಳ್ಳೊ ಹುಸ್ಕೊ’.
ಜೆಜುಕ್ರೀಸ್ತ್ ಜಾವ್ನಾಸಾ ದೆವಾಚ್ಯಾ ಮೊಗಾಚೊ ಪ್ರತಿರೂಪ್. ಬಾಪಾನ್ ಕರ್ಚ್ಯಾ ಮನ್ಶಾಕುಳಾಚ್ಯಾ ಮೊಗಾಕ್… ಜೆಜುಚಿ ಪರ್ಗಟ್ ಜಿಣಿ, ತಾಚೆಂ ಖುರ್ಸಾ ಮರಣ್ ಆನಿ ಪುನರ್ಜೀವಂತ್ಪಣ್ ಏಕ್ ವರ್ತಿ ಸಾಕ್ಸ್ ಜಾವ್ನಾಸಾ.
ದೆಕುನ್ ಆಮಿಂ ಜೆಜುಚೆಂ ಪುನರ್ ಜೀವಂತ್ಪಣಾಚೆ ಫೆಸ್ತ್ ಆಚರ್ಸುಂಚ್ಯಾ ದಿಸಾ… ದೆವಾಚ್ಯಾ ಮೊಗಾಚಿ ಗುಂಡಾಯ್ ಆಮಿ ಆಮ್ಚೆಂ ಭಂವಾರಿ, ಆಮ್ಚ್ಯಾ ಪೆಲ್ಯಾಕ್ ಪಾವಾಶೆಂ ಕರ್ತಾಂವ್ ಮ್ಹಳ್ಳೊ ನಿಚೆವ್… ಆಮ್ಚ್ಯಾ ಕಾಳ್ಜಾ ಮತಿಂತ್ ಘಟ್ ಕರುಂಕ್ ಜಾಯ್.
ಅಸಲ್ಯಾ ಜಿಣೆಯೆಚ್ಯಾ ಯಶಸ್ವಿ ಖಾತಿರ್, ಆಮಿ ಖರಿ ಪ್ರಮಾಣಿಕ್ ಕ್ರೀಸ್ತೀ ಶಿಕೊವ್ಣೆಚಿ ಜಿಣಿಂ ಆಮ್ಚ್ಯಾ ಜಿಣ್ಯೆಂತ್ ರುತಾ ಕರುಂಕ್ ಜಾಯ್.
ಅಸಲ್ಯಾ ಜಿಣ್ಯೆಕ್ ಆಮ್ಚೊ ಭೆಸ್, ತ್ಯಾ ಖಾತಿರ್ ಕರ್ಚೊ ವಾವ್ರ್ ಪ್ರೇತನ್, ತಾಚೊ ಮಹತ್ವ್ ಆನಿ ಗಂಬೀರತಾ ಸಮ್ಜೊನ್, ಆಮಿಂ ಜಿಯೆಂವ್ಕ್ ಜಾಯ್.
ಅಸಲ್ಯಾ ಜಿಣ್ಯೆಕ್ ಉಂಚ್ಲಿ ಅತ್ಮೀಕ್, ತಶೆಂ ಪೊರ್ನ್ಯಾ ಸೊಲ್ಲ್ಯಾಂತ್ಲ್ಯಾ ಅಬ್ರಾಹಾಮಾಕ್ ಆಸ್ಲೆಲಿ ತಸಲಿ ಭಾವಾರ್ಥಿ ಜಿಣ್ಯೆಚಿ ಬುನ್ಯಾದ್ ಜಾಯ್. ಆನಿ ಹ್ಯಾ ಬುನ್ಯಾದಿಚೆರ್ ಆಮಿ ಆಮ್ಚೆಂ ಜಿಣಿಯೆ ಬಾಂದಾಪ್ ಬಾಂದುನ್ ಹಾಡುಂಕ್ ಜಾಯ್ ಮ್ಙಣ್ ಕ್ರೀಸ್ತ್ ಆಪುಣ್ ಜಿಯೆಲ್ಲ್ಯಾ ಜಿಣ್ಯೆದ್ವಾರಿಂ ಆಮ್ಕಾಂ ದೇಕ್ ದೀವ್ನ್ ಶಿಕಯ್ತಾ.
ಅಸಲಿ ಕ್ರೀಸ್ತೀ ತತ್ವಾಂಚಿ ನಿತಳ್ ನಿಸ್ಕಳ್ ಜಿಣಿ ಜಿಯೆಲ್ಯಾಂವ್ ತರ್…ಆಮಿಂ ಹ್ಯಾ ಮಾರಿಫಾತ್ ಹೆರಾಂಕ್ ದೇಕ್ ತಶೆಂ ಕ್ರೀಸ್ತಾಕ್ ಸಾಕ್ಸ್ ದಿಂವ್ಚೆ ತಸಲೆ ಜಾತೆಲ್ಯಾಂವ್.
ಜೆಜುಕ್ರೀಸ್ತ್ ಆಪ್ಲ್ಯಾ ಪುನರ್ ಜಿವಂತ್ಪಣಾ ವರ್ವಿಂ … ಮನ್ಶಾಕುಳಾಕ್ ಪುನರ್ ಜೀವಂತ್ಪಣ್ ಆಸಾ ಮ್ಹಳ್ಳಿ ಭಾಸಾವ್ಣಿ ದಿತಾ. ಹ್ಯಾ ವರ್ವಿಂ ಆಮ್ಕಾಂ ಸಾಸ್ಣಿಕ್ ಜಿವಿತ್ ಆಸಾ ಮ್ಹಳ್ಳೊ ಭರ್ವೊಸೊ ತೊ ದಿತಾ.
ನಾಂ ತರ್…ಆಮ್ಚೆಂ ಜಿವಿತ್ ಹ್ಯಾ ಸಂಸಾರಿ ಜಿಣ್ಯೆಂ ವರ್ವಿಂ ಅಕೇರ್ ಜಾತಾ. ಆನಿ ಹ್ಯಾ ವರ್ವಿಂ ಆಮ್ಚ್ಯಾ ಸಂಸಾರಿ ಜಿಣಿಯೆಕ್ ಅರ್ಥ್ ನಾಂ ಮ್ಹಣ್ ಆಮ್ಕಾಂ ಭೊಗ್ತೆಂ.
ಪೂಣ್ ಮರಣಾವರ್ವಿಂ ಆಮ್ಚೆಂ ಜಿವಿತ್ ಅಕೇರ್ ಜಾಯ್ನಾಂ. ಬಗಾರ್ ಜೆಜುಚ್ಯಾ ಪುನರ್ ಜಿವಂತ್ಪಣಾವರ್ವಿಂ …ಸಂಸಾರಿ ಜಿಣಿಯೆ ನಂತರ್ ಆಮ್ಕಾಂ ಸಾಸ್ಣಿಕ್ ಜಯ್ತಾಚೊ ಮುಕುಟ್ ರಾಕೊನ್ ಆಸಾ. ಆನಿ ಆಮಿಂ ಸಾಸ್ಣಾಕ್ ಜಿಯೆತಾಂವ್ ಮ್ಹಳ್ಳೆಂ ಸತ್, ಭರ್ವೊಸೊ, ಜೆಜು ಆಮ್ಕಾಂ ದಿತಾ.
ತ್ಯಾಖಾತಿರ್ ಆಮಿಂ ಆಮ್ಚಿ ಜಿಣಿಂ ಆಮ್ಚ್ಯಾ ಪುನರ್ಜಿವಂತ್ಪಣಾಚ್ಯಾ ಭರ್ವಾಶ್ಯಾನ್ ಜಿಯೆವ್ನ್… ಜೆಜುಚ್ಚ್ ಆಮ್ಚಿ ವಾಟ್ ಸತ್ ಆನಿ ಜಿವಿತ್ ಮ್ಹಳ್ಳ್ಯಾ ಭರ್ವಾಶ್ಯಾನ್ ಜಿಯೆಂವ್ಕ್ ಜಾಯ್.
ಅಸಲ್ಯಾ ಪ್ರಮಾಣಿಕ್ ನಿತಿಚ್ಯಾ ಜಿಣ್ಯೆಚ್ಯಾ ವಾವ್ರಾಕ್, ಜೆಜು ಕ್ರೀಸ್ತ್ ಆಮ್ಕಾಂ ಪವಿತ್ರ್ ಅತ್ಮ್ಯಾಚೆಂ ಸಹಕಾರ್ ಆನಿ ಪ್ರೇರಣ್ ಲಾಭಯ್ತಾ. ತಾಚಿ ಕುರ್ಪಾ ಆಶೀರ್ವಾದಾಂ ಆಮ್ಚೆರ್ ತೊ ವೊತ್ತಾ.
ಜುದೆವಾಂನಿಂ, ಶಾಸ್ತ್ರಿಂನಿ, ಫಾರಿಜೆವಾಂನಿಂ ಆಪುಣ್ ಸತ್ ವಾಟ್ ಆನಿ ಜಿವಿತ್ ಮ್ಹಣ್ ಪಾಚಾರ್ಲೆಲ್ಯಾ ಜೆಜುಕ್…ಖುರ್ಸಾರ್ ಉಮ್ಕಾಳಾವ್ನ್ , ಸತಾಕ್ ಪುರ್ಲೆಂ. ಪೂಣ್ ಸತ್ ಉಮ್ಕಾಳೊನ್ ರಾವ್ಲೆಂನಾಂ…ತೆಂ ಕುಸೊಂಕ್ನಾಂ.
ಬಗಾರ್ ಸತ್ ಪರತ್ ಉಟೊನ್ …ಪುನರ್ ಜಿವಂತ್ ಜಾಲೆಂ!.
ಜರ್ ಆಮ್ಚ್ಯಾ ಕಾಳ್ಜಾಂತ್ ಜಿವಂತ್ ಜಾಲ್ಲ್ಯಾ ಜೆಜುಕ್ ಭರ್ವೊಶ್ಯಾನ್ ಪಾತ್ಯೆನಾಂವ್ ತರ್ ಆಮಿಂಯೀ ತ್ಯಾ ಜುದೆವ್ ಫಾರಿಜೆವ್ ತಸಲೆ ಜಾತೆಲ್ಯಾಂವ್. ಅಶೆಂ ಜಾಲೆಂ ತರ್ ಆಮ್ಚೆಂ ಜಿವಿತ್ಚ್ಚ್ ವ್ಯರ್ಥ್. ಕಾಳ್ಜಾಂತ್ಲ್ಯಾ ಜಿವಂತ್ ಜೆಜುಕ್ ಆಮಿಂ ಜಾಗೆಂ ದವರ್ನ್, ತಾಚೆ ಶಿಕೊಣೆಂ ಪರ್ಮಾಣೆಂ ಜಿಯೆನಾಂವ್ ತರ್…ಆಮ್ಚಿ ಕ್ರೀಸ್ತೀ ಜಿಣಿಚ್ಚ್ ವ್ಯರ್ಥ್.
ದೆಕುನ್ ಜೆಜುನ್ ಶಿಕಯಿಲ್ಲೆಲ್ಯಾ ವಾಟೆರ್ ಜಿವಿತಾ ಮೆಟಾಂ ಘಾಲುನ್…ಕ್ರೀಸ್ತೀ ಜಿವಿತಾಕ್ ನವೊ ಅರ್ಥ್ ಲಾವ್ನ್ ಜೆಜುಕ್ ಸಾಕ್ಸ್ ಜಾವ್ನ್ ಜಿಯೆತಾಂವ್ ತರ್…ಪುನರ್ ಜಿವಂತ್ ಜಾಲ್ಲೊ ಜೆಜು ಆಮ್ಕಾಂ ಸಾಸಣ್ ಜಿವಿತಾಚಿ ವಾಟ್ ದಾಕಯ್ತೊಲೊ.
ಅಸಲ್ಲ್ಯಾ ಕ್ರೀಸ್ತೀ ಜಿವಿತಾಕ್ ಜೆಜುಚ್ಯಾ ಸ್ಪರ್ಶಾಚ್ಯಾ ಅನ್ಬೊಗಾ ಬರಾಬರ್ ಸಂಸಾರಿ ಸಂಗ್ತಿಂಚೊ ಅನ್ಭೋಗ್ಯೀ ಗರ್ಜ್ ಆಸಾ.
ಸಂಶೋಧಕ್ ಥೊಡೆ …ಜೆಜು ಆಪ್ಲ್ಯಾ ಬಾರಾ ವರ್ಸಾ ಪ್ರಾಯೆ ಥಾವ್ನ್ ತೀಸ್ ವರ್ಸಾಂ ಪರ್ಯಾಂತ್ ಸಂಸಾರಿ ಅನ್ಭೋಗ್, ಮಾಹೆತ್ ಜೊಡ್ಚೆ ಖಾತಿರ್ ಸಂಸಾರ್ ಭಂವ್ಡೆರ್ ಆಸ್ಲ್ಲೊ ಮ್ಹಣ್ತಾತ್.
ಸಾಧಾರಣ್ ತ್ಯಾ ಕಾಳಾಚ್ಯಾ ಫಾಮಾದ್ ‘ಟ್ರಾವೆಲ್ಲರ್’ ಇಬಿನ್ ಬಟೋಡಾಕ್ … ‘ತುಂ ಸಂಸಾರಿ ಭಂವ್ಡಿ ಮಾರ್ಲೆಲ್ಯಾಂಚೊ ರಾಯ್’ ಮ್ಹಣ್ ಪುಗಾರ್ಲೆಲ್ಯಾ ವೆಳಾ …ತಾಣೆಂ ಆಪುಣ್ ನ್ಹಂಯ್ ಬಗಾರ್ ಮ್ಹಜ್ಯಾಕ್ ಚಡಿತ್ ಸಂಸಾರ್ ಭಂವೊಲ್ಲೊ ಸಂಚಾರಿ ಜಾವ್ನಾಸಾ… ‘ಇಸಾ’ ಮ್ಹಣ್ ಜೆಜುಕ್ ಉದ್ದೇಸುನ್ ತಾಣೆ ಮ್ಹಳೆಂ ಮ್ಹಳ್ಳೊ ಉಲ್ಲೇಕ್ ವಾಚುಂಕ್ ಮೆಳ್ತಾ.
‘ಜೆಜುಯೀ ಸಂಸಾರಿ ಅನ್ಭೊಗ್ ಜೊಡ್ಚ್ಯಾಕ್, ಸಂಸಾರಿ ವಿಂಚ್ಣಾರ್ ಸಂಗ್ತಿವಿಶಿಂ ಜಾಣಾರಿ ಜಾಂವ್ಚ್ಯಾ ಖಾತಿರ್ ಸಂಸಾರ್ ಭಂವ್ಲ್ಲೊ!’ ಮ್ಹಣ್ ಸಂಶೋಧಕ್ ಸಾಂಗ್ತಾತ್.
ಜಿವಂತ್ ಉಟ್ಲೆಲ್ಯಾ ಜೆಜುನ್… ಭಿವ್ಕುರೆ ಜಾವ್ನ್ ಲಿಪೊನ್ ಆಸ್ಲೆಲ್ಯಾ ಅಪೊಸ್ತಲಾಂಕ್…ಪವಿತ್ರ್ ಅತ್ಮ್ಯಾಚ್ಯಾ ಸ್ಪಿರಿತಾನ್ ಭರ್ಚ್ಯಾಕ್… ತಾಂಚೆರ್ ತಾಚೊ ಸ್ವಾಸ್ ಸೊಡುನ್ ತಾಂಕಾ ಧೈರಾಧಿಕ್ ಕೆಲೆಂ. ಅಸಲ್ಯಾ ತಾಚೆ ಭೆಟೆವೆಳಾ…ಜೆಜು ತಾಂಕಾ ಪ್ರಥಮ್ ಜಾವ್ನ್…
‘ಸಮಧಾನ್ ತುಮ್ಕಾಂ.’ ಮ್ಹಣ್ತಾ.
ಖಂಯ್ಸರ್ ಮೋಗ್ ಮಾಯ್ಪಾಸ್ ಹುಸ್ಕೊ, ಭೊಗ್ಸಾಣೆಂ, ಸೊಡ್ದೊಡ್, ರಾಜಿ ಸಂಧಾನ್ ಆನಿ ಎಕ್ವಟ್ ಆಸ್ತಾ…ಥಂಯ್ಸರ್ ಶಾಂತಿ ಸಮಧಾನ್ ಆಸ್ತಾ.
ಸಮಧಾನೆನ್ ಜಿಯೆಂವ್ಚೊ ಮನಿಸ್… ಜಿಣ್ಯೆಂತ್ ಕಿತೆಂಯ್, ಕಿತ್ಲೆಂಯೀ ಕಶ್ಟ್ ಅನ್ವಾರ್ ಯೇಂವ್ ಧಯ್ರಾನ್ ಫುಡ್ ಕರ್ತಾ. ತಶೆಂಚ್ಚ್ ‘ದೆವಾಚಿ ಖುಶಿ ಮ್ಹಜೆ ಥಂಯ್ ಜಾಂವ್’ ಮ್ಹಣ್ ಸೊಸ್ಣಿಕಾಯೆನ್ ಆಪ್ಣಾಯ್ತಾ. ಅಸಲೊ ಮನಿಸ್ ಕೆದಿಂಚ್ಚ್ ಚಂಚಲ್ ಜಾಯ್ನಾಂ.
ಸಮಧಾನ್, ಮೋಗ್ ಸೊಡ್ ದೊಡ್ ಆಸಾ ತರ್, ಜಾಂವ್ ಗಾಂವಾಂತ್, ಘರಾಂತ್, ಸೆಜಾರಾ, ಫಿರ್ಗಜೆಂತ್ ಲಡಾಯ್, ಝಗ್ಡೆಂ – ಅಸಲಿಂ ಸರ್ವ್ ವಾಯ್ಟ್ ಖುಣಾಂ ಆಸಾನಾಂತ್ .
ದೆಕುನ್ ಆಮಿಂ ಜಿವಂತ್ ಜೆಜುಲಾಗಿಂ, ಆಮ್ಚ್ಯಾ ಶಾಂತಿ ಸಮಧಾನೆಚ್ಯಾ ಇಶ್ಟಾಲಾಗಿಂ ಸಮಧಾನೆಚೆಂ ದೆಣೆಂ ಮಾಗ್ಯಾಂ ತಶೆಂ ಸದಾಂನೀತ್ ದೆವಾಚ್ಯಾ ಉತರ್ ವಾಚುನ್ ಮಾಗ್ಣ್ಯಾಂದ್ವಾರಿಂ ಸೊಮ್ಯಾಕ್ ಲಾಗಿಂ ಜಾಂವ್ಯಾಂ. ಆನಿ ಆಮ್ಕಾಂ ಶಾಂತಿ ಸಮಧಾನೆಚೆಂ ಹಾತೆರ್ ಕರ್ ಮ್ಹಣ್ ಮಾಗ್ಯಾಂ.
ಅಶೆಂ ಜಿವಂತ್ ಜೆಜುಚ್ಯಾ ಬಳಾನ್, ನಿತಿನ್, ಎಕಾಮೆಕಾ ಶಾಂತ್ ಸಮಧಾನೆನ್ ಜಿಯೆಂವ್ಚೆಂ ಪ್ರೇತನ್ ಆಮಿಂ ಕರುಂಯಾ.
► ರೋನ್ ರೋಚ್ ಕಾಸ್ಸಿಯಾ
,ಉತ್ತೀಮ್ ಸಕಾಲಿಕ್ ಲೇಖನ್. ರೊನ್ ರೊಚ್ ಕಾಸ್ಸಿಯಾಕ್ ಬರೆಂ ಮಾಗ್ತಾಂ.