ಶೆಣೈ ಗೊಂಯ್ ಬಾಬಾಚೊ ಸ್ರ್ಮತಿ ದೀಸ್ ವಿಶ್ವ ಕೊಂಕಣಿ ದೀಸ್ ಮ್ಹಣ್ ಸಂಭ್ರಮ್ತಾತ್. ಪಾಟ್ಲ್ಯಾ ಕಾಂಯ್ ವರ್ಸಾಂ ಪಾಸುನ್ ಕೊಂಕ್ಣಿ ಭಾಶೆ ಖಾತಿರ್ ವಾವುರ್ಪಿ ಸಂಸ್ಥಾ ಕೊಂಕ್ಣಿ ಉಲವ್ಪಿ ಲೋಕ್ ಆಸ್ಚ್ಯಾ ವಠಾರಾಂನಿ ಕೊಂಕ್ಣಿ ದಿಸಾ ಕಾಂಯ್ ಕಾರ್ಯಕ್ರಮಾಂ ಮಾಂಡುನ್ ಹಾಡ್ತಾತ್. ಅಸಲೊಚ್ ಕೊಂಕ್ಣಿ ಭಾಶೆಚೊ ದಬಾಚೊ ಕೊಂಕ್ಣಿ ಭಾಶೆಕ್ ಸಂವಿದಾನಾಚ್ಯಾ ಅಟ್ವ್ಯಾ ವಳೆರಿಂತ್ ಸ್ಥಾನ್ ಮೆಳ್‌ಲ್ಲ್ಯಾ ದಿಸಾಯ್, ಕೊಂಕ್ಣಿ ಉಲವ್ಪಿ ಲೋಕ್ ಆಸ್ಚ್ಯಾ ವಠಾರಾಂನಿ ಪಾಟ್ಲ್ಯಾ ಕಾಂಯ್ ವರ್ಸಾಂ ಪಾಸುನ್ ಚಲುನ್ ಆಸಾ. ಕೊಂಕ್ಣಿ ಭಾಶೆಚೆ ವಾವುರ್ಪಿ ಥೊಡೆ, ತಾಂಚ್ಯಾ ಭುರ್ಗ್ಯಾಂಕ್, ನಾತ್ರಾಂಕ್ ಕೊಂಕ್ಣಿ ಉಲಂವ್ಕ್ ಯೇನಾ ಜಾಲ್ಯಾರೀಯ್ “ಕೊಂಕ್ಣಿ ಉಲಯ್, ಕೊಂಕ್ಣಿ ಫುಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಮ್ಹಜಿ ಆವಯ್” ಮ್ಹಳ್ಳೆ ನಾರೆ ಆತಾಂಯ್ ದೀವ್ನ್ ಆಸಾತ್. ಕೊಂಕ್ಣಿ ಭಾಶೆಚೆ ಸ್ವಘೋಷಿತ್ ಸೊಡ್ವೊಣ್ದಾರ್ ಥೊಡೆ ಅನ್ಯೇಕ್ ಮೇಟ್ ಮುಕಾರ್ ವಚೊನ್ ” ಕೊಂಕ್ಣಿ ಮರ್ತಾ, ಕೊಂಕ್ಣಿ ಮರ್ತಾ, ವಾಂಚಯಾ” ಮ್ಹಣ್ ರುದಾನ್ ಕರ್ತಾತ್.
ಜೆರಾಲ್ ಥರಾನ್, ಕೊಂಕ್ಣಿ ಭಾಶೆಚಿ ವಸ್ತುಸ್ಥಿತಿ ಪಳಂವ್ಕ್ ಗೆಲ್ಯಾರ್ – ಕೊಂಕ್ಣಿ ಸ್ನಾತಕೋತ್ತರ್ ಶಿಕ್ಪಾಕ್ ವಿದ್ಯಾರ್ಥಿಂಚೊಂ ಸಂಕೊ ಉಣೊ ಜಾತೇ ಆಸಾ. ಶಾಳಾಂನಿ ಕೊಂಕ್ಣಿ ಶಿಕ್ಚ್ಯಾ ಭುರ್ಗ್ಯಾಂಚೊಂ ಸಂಕೊ ಉಣೊ ಜಾತೇ ಆಸಾ. ಜಾಯ್ತ್ಯಾ ಪದ್ವೆ ಕೊಲೆಜಿಂನಿ ಕೊಂಕ್ಣಿ ಶಿಕಂವ್ಚೆಂ ರಾವಯ್ಲಾಂ. ಕೊಂಕ್ಣಿ ಸಂಘ್, ಕ್ಲಬ್ಬಾಂ ಕುರ್ವೊತಾತ್. ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೆಂ ಮೊಬಾಯ್ಲ್ ಕೊಂಕ್ಣಿ ಬಜಾರ್ ಆತಾಂ ಅಂಬುಲೆನ್ಸ್ ಜಾಲಾಂ. ಅಕಾಡೆಮಿಚ್ಯಾ ಎಕಾ ಅಧ್ಯಕ್ಷಾನ್ ಮಂಗ್ಳುರ್ ವಿಶ್ವವಿದ್ಯಾಲಯಾಂತ್ ಕೊಂಕ್ಣಿ ಅಧ್ಯಯನ ಪೀಠ ಸುರು ಕೆಲೆಂ ಮ್ಹಣ್ ಅನ್ಯೆಕಾ ಅಧ್ಯಕ್ಷಾನ್ ಅನ್ಯೇಕಾ ವಿಶ್ವವಿದ್ಯಾಲಯಾಂತ್ ಸುರು ಕೆಲ್ಲೆಂ ಕೊಂಕ್ಣಿ ಅಧ್ಯಯನ ಪೀಠ ಆತಾಂ ಕಿತೆಂ ಕರ್ತಾ ? ಮ್ಹಳ್ಳಿ ಖಬರ್ ನಾ. ಹ್ಯಾ ಸಗ್ಳ್ಯಾಮಧೆಂ, ಸಮಾದಾನೆಚಿ ಗಜಾಲ್ ಮ್ಹಳ್ಯಾರ್, ಪ್ರಸ್ತುತ್ ಅಕಾಡೆಮಿಚ್ಯಾ ಅಧ್ಯಕ್ಷಾನ್ ಕೊಂಕಣಿ ಭವನ ಉಬಾರುಂಕ್ ಬುನ್ಯಾದ್ ಘಾಲ್ಯಾ. ಹ್ಯಾಚ್ ಅಧ್ಯಕ್ಷಾಚಾ ಆವ್ಧೆಂತ್ ಭವನಾಚೆಂ ಕಾಮ್ ಸಂಪೂರ್ಣ್ ಜಾಲ್ಯಾರ್ ಬರೆಂ – ನಾ ಜಾಲ್ಯಾರ್ ಭವನಚೀಯ್ ಗತ್ ಮೊಬಾಯ್ಲ್ ಬಜಾರಾಚಿ ಜಾವ್ನ್ – ಮೆಟಾಡೊರ್ ಅಂಬುಲೆನ್ಸ್ ಜಾಲ್ಲೆಪರಿಂ- ಭವನ ಆಸ್ಪತ್ರ್ ಜಾಯ್ನಾ ಜಾಲ್ಯಾರ್ ಪುರೊ ಮ್ಹಣ್ ಮಾಗ್ಯಾಂ!
ಅಸಲ್ಯಾ ಎಕಾ ಸಂದಿಗ್ದ್ ಪಾಟಿಥಳಾರ್, ಶೆಣೈ ಗೊಂಯ್ ಬಾಬಾಚೊ ಸ್ರ್ಮತಿ ದೀಸ್ – ವಿಶ್ವ ಕೊಂಕಣಿ ದೀಸ್ ಮ್ಹಣ್ ಮಾನಾಂವ್ಚ್ಯಾ ಪಾಟ್ಲಿಂ ಸಂವೇದನಾಂ ಸಮ್ಜೊನ್ ಎಕೊಡೊ ನಿಯಾಳ್ ಘೆಂವ್ಚಿ ಗರ್ಜ್ ಆಸಾ ಮ್ಹಣ್ ಮ್ಹಾಕಾ ಭೊಗ್ತಾ.
ಶೆಣೈ ಗೊಂಯ್ ಬಾಬ್ ಕೊಂಕ್ಣೆ ವಿಶ್ಯಾಂತ್ ಉಲಯಿಲ್ಲೊ, ಆನಿ ತ್ಯಾ ಮಾರಿಫಾತ್ ಕೊಂಕ್ಣಿ ಚಳ್ವಳೆಕ್ ಚಾಲನ್ ದಿಲ್ಲೊ ಮನಿಸ್. ತೋ ಕೊಂಕ್ಣಿ ವಿಶ್ಯಾಂಯ್ ಉಲಯ್ತಾ ಮ್ಹಳ್ಳ್ಯಾ ಖಾತಿರ್ ತಾಕಾ ಪಿಶ್ಯಾರ್ ಕಾಡ್‌ಲ್ಲೆಂಯ್ ಆಸಾ ಮ್ಹಣ್ ಕೊಂಕ್ಣಿ ಚಳ್ವಳೆಂತ್ಲ್ಯಾ ಮಾಲ್ಘಡ್ಯಾಂನಿ ಆಪ್ಲ್ಯಾ ಭಾಶಣಾಂನಿ ತವಳ್ ತವಳ್ ಉಲ್ಲೇಕ್ ಕೆಲ್ಲೆಂ ಹಾಂವೆ ಆಯ್ಕಾಲಾಂ. ಶೆಣೈ ಗೊಂಯ್ ಬಾಬಾನ್ ಉಲಯಿಲ್ಲೊ ಕಾಳ್ ತಸೊ ಆಸ್ಲೊ, ಕೊಂಕ್ಣಿ ಉಲಂವ್ಕ್ ಲೋಕ್ ಪಾಟಿಂ ಕರ್ತಾಲೊ, ಲಜೆತಾಲೊ. ಕೊಂಕ್ಣಿ ಭಾಸ್ ಮ್ಹಳ್ಯಾರ್ ಆಯಾ – ಬೊಯಾಂಚಿಂ ಭಾಸ್ ಮ್ಹಣ್ ಲೆಕ್ತಾಲೊ. ಶೆಣೈ ಗೊಂಯ್ ಬಾಬಾಚ್ಯಾ ಕಾಳಾಕ್ “ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಮ್ಹಜಿ ಆವಯ್” ಮ್ಹಳ್ಳೊ ನಾರೊ ಸಾರ್ಕೊ ಬಸ್ತಾಲೊ ಮಾತ್ ನಯ್, ಚಳ್ವಳೆಕ್ ಬಳ್ ದಿತಾಲೊ. ಮಂಜೇಶ್ವರ್ ಗೋವಿಂದ ಪಯ್ ತಸಲೊ ಕೊಂಕ್ಣಿ ಮನಿಸ್ ಸಯ್ತ್, ಕೊಂಕ್ಣಿ ಆವಯ್ಚ್ಯಾ ಥನಾಂನಿ ದೂದ್ ನಾ ಮ್ಹಣ್, ಕನ್ನಡ ಆವಯ್ಚೆಂ ದೂದ್ ಪಿಯೆಂವ್ಕ್ ಗೆಲ್ಲೆ ದೀಸ್ ತೆ! ಪುಣ್ ಆಜ್… ? ? ?
ಕೊಂಕ್ಣಿ ಭಾಶೆಕ್ ಅಟ್ವ್ಯಾ ವಳೆರಿಂತ್ ಸ್ಥಾನ್ ಮೆಳ್ಳಾಂ, ಕೇರಳಾಂತ್ ಕೊಂಕ್ಣಿ ಅಕಾಡೆಮಿ ಸ್ಥಾಪನ್ ಜಾಲ್ಯಾ, ಕೇಜ್ರಿವಾಲಾನ್ ಡೆಲ್ಲಿಂತ್ ಸಯ್ತ್ ಕೊಂಕಣಿ ಅಕಾಡೆಮಿ ಸ್ಥಾಪನ್ ಕರ್ತಾಂ ಮ್ಹಳಾಂ, ಕರ್ನಾಟಕಾಂತ್ ವಿಶ್ವವಿದ್ಯಾಲಯ ಹಂತಾರ್, ಏಕ್ ನಯ್, ದೋನ್ ಕೊಂಕಣಿ ಅಧ್ಯಯನ ಪೀಠಾಂ ಸ್ಥಾಪನ್ ಜಾಲ್ಯಾಂತ್, ಮಂಗ್ಳುರಾಂತ್ ಕೊಂಕ್ಣೆಚೆಂ ಸರ್ಕಾರಿ ಭವನ್ ನಿರ್ಮಾಣ್ ಜಾತೇ ಆಸಾ ಮ್ಹಣ್ತಾನಾ – ಆತಾಂಯ್ “ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಮ್ಹಜಿ ಆವಯ್ ” ಮ್ಹಣ್ ರುದಾನ್ ಕರ್ಚೆಂ ಕಿತ್ಲೆಂ ರಾಜಾಂವೀಕ್ ?
ಪಾಟ್ಲ್ಯಾ ದಿಸಾಂನಿ ವಿಶ್ವ ಕೊಂಕಣಿ ಸರ್ದಾರ್ ಬಸ್ತಿ ವಾಮನ್ ಶೆಣೈ ಸ್ವರ್ಗೆಸ್ತ್ ಜಾಲ್ಲೆ ತವಳ್ ಮಾಂಡುನ್ ಹಾಡ್‌ಲ್ಲ್ಯಾ ಶೃದ್ದಾಂಜಲಿ ಸಭಾಂನಿ ಜಾಯ್ತ್ಯಾ ಪಂಡಿತಾಂನಿ ಮ್ಹಳ್ಳೆಂ ಆಸಾ – ಶೆಣೈ ಗೊಂಯ್ ಬಾಬ್ ಆನಿ ಬಸ್ತಿ ಮಾಮ್ – ಕೊಂಕ್ಣೆಚ್ಯಾ ಸಂದರ್ಭಾರ್ ದೊಗಾಂಯ್ ಥಂಯ್ ಆಸ್‌ಲ್ಲೆಂ ಸಾಮ್ಕೆಂ ರೂಪ್ ಮ್ಹಳ್ಯಾರ್ – ದೊಗಾಂಯ್ಚ್ಯಾ ನಾಂವಾಂತ್ ಆಸ್‌ಲ್ಲೆಂ “ವಾಮನ”
ಶೆಣೈ ಗೊಂಯ್ ಬಾಬಾಚೆಂ ನಾಂವ್ ವಾಮನ್ ರಘುನಾಥ್ ವರ್ದೆ ವಾಲವಾಲೀಕರ್ ತರ್, ಬಸ್ತಿ ಮಾಮಾಚೆಂ ನಾಂವ್ ಬಸ್ತಿ ವಾಮನ್ ಶೆಣೈ. ನಾಂವಾಂತ್ “ವಾಮನ್” ಮ್ಹಳ್ಳೆಂ ಸಾಮ್ಕೆಂ ರೂಪ್ ಆಸ್ಲ್ಯಾರೀ, ಶೆಣೈ ಗೊಂಯ್ ಬಾಬಾಚ್ಯಾ ಕಾಮಾಂತ್ ಆನಿ ಬಸ್ತಿ ಮಾಮಾಚ್ಯಾ ಕಾಮಾಂತ್ ಮಹತ್ವಾಚೊ ಫರಕ್ ಆಸ್ಲೊ.
ಶೆಣೈ ಗೊಂಯ್ ಬಾಬಾನ್ ಕೊಂಕ್ಣಿ ಉಲಂವ್ಕ್ ಲಾಂವ್ಚೆ ಮಾರಿಫಾತ್ ಕೊಂಕ್ಣಿ ಉರಂವ್ಚ್ಯಾ ಕಾಮಾಕ್ ಚಾಲನ್ ದಿಲೆಂ ತರ್, ಬಸ್ತಿ ಮಾಮಾನ್ ಕೊಂಕ್ಣಿ ಬರಂವ್ಕ್ ಲಾಂವ್ಚೆ ಮಾರಿಫಾತ್ ಕೊಂಕ್ಣಿ ಉರಂವ್ಚೆಂ ಕಾಮ್ ಮುಕಾರುನ್ ವೆಲೆಂ. ಬಸ್ತಿ ಮಾಮಾನ್ ಖುದ್ ಬೂಕ್ ಬರಯ್ಲ್ಯಾತ್, ಪ್ರಕಾಶನ್ ಸಂಸ್ಥೊ ಚಲಯ್ಲಾ ಮಾತ್ ನಯ್, ಕೊಂಕ್ಣೆಂತ್ಲೆಂ ಬರ‍್ಯಾಂತ್ಲೆಂ ಬರೆಂ ಸಾಹಿತ್ಯ್ ಹೆರ್ ಭಾಸಾಂನಿ ಪರ್ಗಟ್ ಕರುನ್ ‘ಸರಸ್ವತಿ ಸಮ್ಮಾನ್’ ತಸಲೊ ಪುರಸ್ಕಾರ್ ಕೊಂಕ್ಣೆಕ್ ಮೆಳ್ಚ್ಯಾಕ್ ಕಾರಣ್ ಕಸೊ ಜಾಲಾ. ಕೊಂಕ್ಣಿ ಮುಳಾಚ್ಯಾ ಬರಯ್ಣಾರಾಂನಿ ಹೆರ್ ಭಾಸಾಂನಿ ಬರಯಿಲ್ಲೆಂ ಉಂಚ್ಲೆಂ ಸಾಹಿತ್ಯ್ ಬಸ್ತಿ ಮಾಮಾನ್ ಕೊಂಕ್ಣೆಕ್ ಹಾಡ್ಲಾಂ. ಪುಂಡಲೀಕ ನಾರಾಯಣ ನಾಯಕ್ ತಸಲ್ಯಾಂ ಮಾಲ್ಘಡ್ಯಾಂ ಕರ್ನಾಂ ಸಂಸೋಧನಾತ್ಮಕ್ ಗ್ರಂಥ್ ಬರಂವ್ಕ್ ಲಾಯ್ಲ್ಯಾತ್. ಶೆಣೈ ಗೊಂಯ್ ಬಾಬಾಚ್ಯಾ ಆನಿ ಬಸ್ತಿ ಮಾಮಾಚ್ಯಾ ಕಾಮಾಂತ್ ಮುಳಾವೊ ಫರಕ್ ಆಸ್‌ಲ್ಲೊ ವ್ಹಯ್ ತರೀ, ತಾಣಿ ಕೊಂಕ್ಣಿ ವಾವ್ರ್ ಕೆಲ್ಲ್ಯಾ ಕಾಳಾಚ್ಯಾ ತುಲನಾಂತ್ – ಹೊ ಫರಕ್ ಕೊಂಕ್ಣಿ ಭಾಶೆಚ್ಯಾ ವಾಡಾವಳಿಕ್ ಪೂರಕ್ ಆಸ್ಲೊ. ಮಾತ್ ನಯ್, ರಿಲೇಂತ್ ಶೆಣೈ ಗೊಂಯ್ ಬಾಬಾನ್ ದಿಲ್ಲಿ ‘ರಿಲೇ ಸ್ಟಿಕ್’ ಬಸ್ತಿ ಮಾಮಾನ್ ದೊಡ್ಯಾ ತಾಕ್ತೆನ್ ಮುಕಾರ್ ಪಾವಯ್ಲಿ.
ಆತಾಂ ಕೊಂಕ್ಣೆ ಸಮೊರ್ ಆಸ್ಚೆಂ ಪ್ರಶ್ನ್ – ಶೆಣೈ ಗೊಂಯ್ ಬಾಬಾನ್, ಬಸ್ತಿ ಮಾಮಾಚ್ಯಾ ಹಾತಾಂತ್ ದಿಲ್ಲ್ಯಾ ಆನಿ ಬಸ್ತಿ ಮಾಮಾನ್ ಮುಕಾರ್ ಪಾವಯಿಲ್ಲ್ಯಾ – ಹ್ಯಾ ‘ರಿಲೇ ಸ್ಟಿಕ್’ ಚೆಂ ಕಿತೆಂ ಕರ್ಚೆಂ? ತಿದೊಡ್ಯಾ ತಾಕ್ತೆನ್ ಫುಡೆಂ ವರ್ಚೆಂ ವಾ ಪಾಟಿಂ ದಿಂವ್ಚೆಂ ?
ವಿಶ್ವ ಕೊಂಕ್ಣಿ ದೀಸ್ ಆಚರಣಾಚ್ಯಾ ಸಂದರ್ಬಾರ್ ಕೊಡ್ಯಾಳ್ಚ್ಯಾ ಸುತ್ತುರಾಂತ್ ಚಲ್ಚಿಂ ಕಾರ್ಯಕ್ರಮಾಂ ಪಳಯ್ತಾನಾ, ಕೊಂಕ್ಣಿ ಬರವ್ನ್ ಮುಕಾರ್ ವರ್ಚೆ ಪ್ರಾಸ್ ಚಡ್, ಕೊಂಕ್ಣಿ ಉಲವ್ನ್ ಮುಕಾರ್ ವರ್ಚಿಂ ಪ್ರೇತನಾಂ ಉಟೊನ್ ದಿಸ್ತಾತ್. ಕೊಂಕ್ಣಿ ಭಾಸ್ – ಎದೊಳ್‌ಚ್ “ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಮ್ಹಜಿ ಆವಯ್” – ಹೊ ‘ಶೆಣೈ ಗೊಂಯ್ ಬಾಬ್ ಪಾಂವ್ಡೊ’ ಉತ್ರೊನ್ ಮುಕಾರ್ ಆಯ್ಲ್ಯಾ. ಆನಿ ಕಿತ್ಲೆ ವಾಟೆ ನಾಟಕ್ ಖೆಳಯ್ಲ್ಯಾರೀ, ವಾಗ್ ನಾಚಯ್ಲ್ಯಾರೀ – ಕೊಂಕ್ಣಿ ಉಲಯ್ತೆಲ್ಯಾಂಚೊಂ ಸಂಕೊ ವಾಡಾನಾ. ತೋ ಎದೊಳ್‌ಚ್ exhaust ಜಾಲಾ. ಆನಿ ಹ್ಯಾಚ್ ಕಾರಣಾಕ್ ಲಾಗೊನ್ ಆಜ್ ಪರ್ಗಟ್ ವೆದಿರ್ ಕೊಣೀ “ಕೊಂಕ್ಣಿ ಉಲಯಾ, ಕೊಂಕ್ಣಿ ಉರಯಾ” ಮ್ಹಣ್ ಭಾಶಣ್ ದೀತ್ ಜಾಲ್ಯಾರ್ ತೋ ಜೋಕರ್ ದಿಸ್ತಾ. ಪೂಣ್ ಬೆಜಾರಾಯೆಚಿ ಗಜಾಲ್ ಮ್ಹಳ್ಯಾರ್ ಚಡಾವತ್ ಕೊಂಕ್ಣಿ ಸಂಸ್ಥಾಂಚ್ಯಾಂ ಪ್ರಮುಕ್ ಹುದ್ದ್ಯಾಂನಿ ಆಜ್ ಉಲಯ್ತೆಲೆಚ್ ಭರೊನ್ ಗೆಲ್ಯಾತ್. ತಾಂಕಾ ಬರಂವ್ಕ್ ಯೆಂವ್ಚೆಂ ಫಕತ್ ಇಂಗ್ಲೆಜಾಂತ್. ದೆಕುನ್, ಆಪ್ಲ್ಯಾ ಘರಾಂನಿ ಕೊಂಕ್ಣಿ ಉಲಯ್ನಾ ಜಾಲ್ಯಾರೀ, ಕೊಂಕ್ಣೆಚ್ಯಾ ಕಾರ್ಯಾಕ್ ಸಯ್ರೊ ಮ್ಹಣ್ ಆಪಯ್ಲ್ಯಾರ್, ವೆದಿರ್ ಚಡೊನ್ ಕೊಂಕ್ಣೆಚ್ಯಾಚ್ ಲೊಕಾಕ್ ” ಕೊಂಕ್ಣಿ ಉಲಯಾ, ಕೊಂಕ್ಣಿ ಉರಯಾ” ಮ್ಹಣ್ ಉಪದೇಸ್ ದೀಂವ್ಕ್ ಸುರು ಕರ್ತಾತ್. ಕೊಂಕ್ಣಿ ಭಾಸ್, ಉಲವ್ನ್ ವಾಡ್ಚಿ ಬೇಬಿ ಸಿರಿಲ್ಯಾಕ್ ಸ್ಟೇಜ್ ಎದೊಳ್‌ಚ್ ಉತರ್ಲ್ಯಾ ಮ್ಹಳ್ಳಿ ಖಬರ್ ಸಯ್ತ್ ಹಾಂಕಾಂ ನಾ.
ಭಾಶೆಚ್ಯಾ ವಿಕಾಸಾಚ್ಯಾ ನದ್ರೆನ್ ಪಳಂವ್ಚೆಂ ಜಾಲ್ಯಾರ್ ಕೊಂಕ್ಣಿ ಭಾಸ್ ಆಜ್ ಬರವ್ನ್ ವಾಡ್ಚ್ಯಾ ಪಾಂವ್ಡ್ಯಾರ್ ಆಸಾ. ಕೊಂಕ್ಣೆಂತ್ ಆಜ್ ಚಡ್ ಆನಿ ಚಡ್ ದರ್ಜೆದಾರ್ ಸಾಹಿತ್ಯ್ ರಚ್ಚಿ ಗರ್ಜ್ ಆಸಾ. ಕೊಂಕ್ಣೆಂತ್ಲೆಂ ದರ್ಜೆದಾರ್ ಸಾಹಿತ್ಯ್ ಹೆರ್ ಭಾರತೀಯ್ ಆನಿ ವಿದೇಶಿ ಭಾಸಾಂಕ್ ಪಾವಂವ್ಚೀಯ್ ಗರ್ಜ್ ಆಸಾ. ಕೊಂಕ್ಣಿ ಭುರ್ಗ್ಯಾಂನಿ ಸ್ನಾತಕೋತ್ತರ್ ಶಿಕ್ಪಾಂತ್ ಫಕತ್ ಕೊಂಕ್ಣಿ ಶಿಕ್ಲ್ಯಾರ್ ಪಾವಾನಾ. ಸಾಹಿತ್ಯ್ ರಚಿಜಾಯ್, ಸಂಸೊದ್ ಚಲಯ್ಜಾಯ್. ಹೊ ಶೆಣೈ ಗೊಂಯ್ ಬಾಬ್ ಉಪ್ರಾಂತ್ಲೊ ಕೊಂಕ್ಣಿ ಭಾಶೆಚ್ಯಾ ವಿಕಾಸಾಚೊ ಬಸ್ತಿ ಮಾಮ್ ಪಾಂವ್ಡೊ! ಹ್ಯಾ ಪಾಂವ್ಡ್ಯಾಕ್ ಪಾವ್ಲ್ಯಾ ಉಪ್ರಾಂತ್ ಆತಾಂ ಪರ್ತ್ಯಾನ್ ಉಲವ್ನ್ ವಾಡ್ಚ್ಯಾ ಬೇಬಿ ಸಿರಿಲ್ಯಾಕ್ ಪಾಂವ್ಡ್ಯಾಕ್ ಪಾಟಿಂ ವಚೊಂಕ್ ಜಾಯ್ನಾ.
ಕೊಂಕ್ಣಿ ಮಾಳಾರ್ ಆತಾಂ ಬರಯ್ತೆಲ್ಯಾಂ – ವಾಚ್ತೆಲ್ಯಾಂಪ್ರಾಸ್ ಉಲಯ್ತೆಲ್ಯಾಂಚೊಂ ಸಂಕೊ ಚಡೊನ್ ಆಸಾ. ಆದಿಂ ಗಾಂವಾಂತ್ ವೊಡಾರುಕಾಮುಳಾಂತ್ ಬಸೊನ್ ಉಲಯ್ತಾಲೆ ಆನಿ ಆತಾಂ ಯೂ ಟ್ಯೂಬ್ ಆನಿ ಕ್ಲಬ್ ಹೌಸಾಂತ್ ಉಲಯ್ತಾತ್! ಫರಕ್ ಇತ್ಲೊಚ್ – ಆದಿಂ ರೆಕೊರ್ಡ್ ಜಾಯ್ನಾತ್ಲೆಂ , ಆತಾಂ ರೆಕೊರ್ಡ್ ಜಾತೇ ಆಸಾ! ‘ಆಯ್ಕಾತಾ ಕೋಣ್ ?’ ಮ್ಹಳ್ಳ್ಯಾ ಪ್ರಶ್ನಾಕ್ ಜಾಪ್ ನಾ!
ಖಂಯ್ಚೀಯ್ ಭಾಸ್ ಫಕತ್ ಉಲಯಿಲ್ಲ್ಯಾನ್ ವಾಡನಾ. ಉಲವ್ಪಾಕ್ ಸೀಮಿತ್ ಉರ್‌ಲ್ಲ್ಯೊ ಕಿತ್ಲ್ಯೊಗೀ ಭಾಸೊ, ಉಲಂವ್ಚಿ ಪೀಡಿ ಸರ‍್ತಾನಾ ಆಳ್ವೊನ್ ಗೆಲ್ಲೆ ದಾಕ್ಲೆ ಚಡ್ ಆಸಾತ್. ತುಲನಾಂತ್ ಬರವ್ನ್ ವಿಕಾಸಾಕ್ ಪಾವ್‌ಲ್ಲ್ಯೊ ಭಾಸೊ ಆಳ್ವಾಲ್ಲೆ ದಾಕ್ಲೆ ಉಣೆ. ಇಂದಾ ತಾಳಿಯಾಂನಿ ಬರಯಿಲ್ಲ್ಯೊ ಕಿತ್ಲೆಶೆ ಭಾರತೀಯ್ ಭಾಸೊ ಆಜ್‌ಯೀ ಉರ‍್ಲ್ಯಾತ್ ಆನಿ ವಾಡೊನ್ ಆಸಾತ್. ಇತ್ಲೆಂ ಮಾತ್ ನಯ್, ಭಾಸ್ ಬರಯ್ತಾನಾ ಅಪಾಪಿಂಚ್ ಸುಧ್ರೊನ್ ವೆತಾ. ಉತ್ರಾಂಚಿಂ ಅದ್ಲಿ ಬದ್ಲಿ ಜಾತಾ. ಸಮಾನ್ ರೂಪ್ ಯೆತಾ. ಬರಂವ್ಚ್ಯಾ ಭಾಶೆಂತ್ ಬೋಲಿ, ಪ್ರದೇಶ್, ಉಲಂವ್ಚ್ಯಾ ಭಾಶೆಂತ್ ದಿಲ್ಲೆ ತಿತ್ಲೆ ಧೊಶಿ ದೀನಾಂತ್!
ಉಪರೋಕ್ತ್ ವಿಚಾರಾಂಚಾ ಪಾಟಿಥಳಾರ್ – ಸರ್ಕಾರಾಚಿ ಅಕಾಡೆಮಿ, ವಿಶ್ವವಿದ್ಯಾಲಯಾಚಿಂ ಅಧ್ಯಯನ ಪೀಠಾಂ ಧರುನ್ ಕೊಂಕ್ಣಿ ಭಾಶೆ ಖಾತಿರ್ ವಾವುರ್ಚ್ಯಾ ಸಂಸ್ಥಾಂನಿ, ಕೊಂಕ್ಣಿ ಭಾಶೆಚ್ಯಾ ವಿಕಾಸಾಚ್ಯಾ ನದ್ರೆನ್, ಶೆಣೈ ಗೊಂಯ್ ಬಾಬಾಚ್ಯಾ ‘ಕೊಂಕ್ಣಿ ಉಲಯ್ – ಕೊಂಕ್ಣಿ ಉರಯ್’ ವಾವ್ರಾರಿತಿ ಪ್ರಾಸ್, ಬಸ್ತಿ ಮಾಮಾಚಿ ‘ಕೊಂಕ್ಣಿ ಬರಯ್ – ಕೊಂಕ್ಣಿ ವಾಡಯ್’ ವಾವ್ರಾರೀತ್ ಆಪ್ಣಾಂವ್ಚಿಂ ಚಡ್ ಗರ್ಜ್ ಆಸಾ ಮ್ಹಣ್ ಮ್ಹಾಕಾ ಭೊಗ್ತಾ. ತುಮ್ಚೆ ವಿಚಾರ್ ಕಮೆಂಟ್ ಬೊಕ್ಸಾಂತ್ ವಾಂಟುನ್ ಘೆಯಾ.
ವಿಶ್ವ ಕೊಂಕ್ಣಿ ದಿಸಾಚೆ ಶುಭಾಶಯ್
► ಎಚ್ಚೆಮ್, ಪೆರ್ನಾಲ್
ಕೋಂಕಣಿ ಭಾಶೆಚೆ ಪುಢಾರ ವಿಶಿಂ ಲಿಖ್ಲೇಲೇಂ ಬರೇಂ. ಫುಣ್ ಬೆಳ್ಸೆಲೆಲೆಂ ಖಾವ್ನ್ ಖಾವ್ನ್ ಕೊಂಕಣಿ ಮಾಯೆಚೆಂ ಪೋಟ್ ಪಾಡ್ನ್ ಜಾವ್ನ್ ಯೆತೇ ಆಸಾ.ಆತಾಂ ಪುಡಾರಚಿ ಖಂತ್ ದೋಸ್ಚೆಂ ಸಹಜ್.
ಕೊಂಕಣಿ ಭಾಷೆ ವಿಷ್ಶಾಂತ ಬೊರೊ ಉಸ್ಕೊ ದವ್ರುನ್ ಬೋವ್ ಬೊರೆಂ ಲೇಖನ್ ಬೊರಯ್ಲಾಯ್ ಏಚ್ ಎಮ್ ಸರ್ ದೇವ್ ಬೊರೆಂ ಕರುಂ ತುಕಾ ತುಜಾ ವಾವ್ರಾಕ್.
ರುಚ್ಲೆಂ ತುಜೆಂ ಲೇಖನ್, ದೇವ್ ಬರೆಂ ಕರುಂ!!
ಕೊಂಕಣಿ ದಿಸಾಕ್ ಸಜ್ಜಚೆ ತಸಲೇ ವಿಚಾರ ಭರಲೆಲೆ ಬರಪ್. ವಂದನ್ ಎಚ್ ಎಂ ಮಾಮ್ 🌷🙏🏻