ಅಗಸ್ಟರಾಚೆಂ ಬಾಯ್ಕ್ ‘ಬ್ಲೂ ಟೇಲ್’ ತಾಳ್ಯಾಚ್ಯಾ ಭಂವಾರಿಂ ಥಾವ್ನ್ ಪರತ್ ಪಾಟಿಂ ವೆಚ್ಯಾಕ್ ತ್ಯಾ ‘ಎಂಡ್ ಪೋಂಯ್ಟ್ ಗಾರ್ಡಾನಾ’ ಚ್ಯಾ ಗೆಟಿ ಲಾಗಿಂ ಧಾಂವಾತ್ತ್ ಆಸ್ತಾಂ…ಎಕಾಚ್ಚಾಣೆಂ ತಾಚೆಂ ಮೊಬಾಯ್ಲ್ ಆವಾಜುಂಕ್ ಲಾಗ್ಲೆಂ.
ತ್ಯಾಚ್ಚ್ ಕ್ಶಣಾಂ ಆಗಸ್ಟರ್ ಬಾಯ್ಕ್ ಥಂಯ್ಚ್ ದೆಗೆನ್ ದವರಿಲಾಗ್ಲೊ. ಆನಿ ಆಪ್ಲಿ ದೀಶ್ಟ್ ಮೊಬಾಯ್ಲಾಚೆರ್ ವ್ಹರ್ತಾಸ್ತಾಂ …ತೆಂ ಆತ್ತಾತ್ತಾಂ ಶಿರ್ಕಾಯಿಲ್ಲ್ಯಾ ತ್ಯಾ ನವ್ಯಾ ‘ಸಿಮ್ಮಾ’ಚೆಂ ನಂಬರ್. ಘಡ್ಯೆನ್ ತೊ ಚುರುಕ್ ಜಾಲೊ. ಆನಿ ಅಮ್ಸರ್ಲೊ…
“ಹಾ..ಹಾಲೊ ಸರ್…”
“ಅಗಸ್ಟರ್…ಮ್ಹಜ್ಯಾ ತಾಳ್ಯಾಕ್ ವೊಳ್ಕಾಲೊಯ್.?!”
“ಖಂಡಿತ್ ಜಾವ್ನ್ ಸರ್.”
“ತರ್ ಆಯ್ಕ್. ಹ್ಯಾ ಮುಕಾರ್ ಹರ್ಯೆಕ್ ಘಡಿ ಮ್ಹಳ್ಳೆಪರಿಂ ಮ್ಹಜ್ಯಾ ತಾಳ್ಯಾಕ್ ರಾಕೊನ್ ರಾವ್. ತಶೆಂ ತಕ್ಶಣಾಂಚ್ಚ್ ಮ್ಹಾಕಾ ಪಾಟಿಂ ಜಾಪ್ ದಿಂವ್ಚ್ಯಾಂತ್ ಚುರುಕ್ ಜಾ. ಆನಿ ತ್ಯಾಚ್ಚ್ ಪರ್ಮಾಣೆಂ…
‘ಕೆನ್ನಾಂಯೀ ಚುಕೊನ್ ತರೀ…ಹ್ಯಾ ಸಿಮ್ಮ್ ನಂಬರ್ ಥಾವ್ನ್ ಹೆರಾಂಕ್ ಕೋಲ್ ಕರಿನಾಕಾ.’ ಆನಿಂ ಆಗಸ್ಟರ್…
ಪರತ್ ತುಕಾ ದಾಂಬೂನ್ ಸಾಂಗ್ತಾಂ…ಹೆಂ ತುಕಾ ದಿಲ್ಲೆಂ ನವೆಂ ಸಿಮ್ಮ್ …ಫಕತ್ತ್ ಮ್ಹಜ್ಯಾ ಆನಿ ತುಜ್ಯಾ ಮಧ್ಲ್ಯಾ ಸಂಪರ್ಕಾಕ್ ಮಾತ್ರ್. ಆನಿ ಹಾಂತುನ್ ಕಾಂಯ್ ತುಂ ಚುಕೊನ್ ಪಡ್ಲೊಯ್ ತರ್…ಹಾಚೆ ಥಾವ್ನ್ ಉದೆಂವ್ಚೊ ‘ಪೊಲಿಸ್ ಅಪಾಯ್’ ಫಕತ್ತ್ ತುಕಾ ಮಾತ್ರ್ ಆಸ್ತೊಲೊ.”
“ಮ್ಹಳ್ಯಾರ್?!”
“ಮ್ಹಳ್ಯಾರ್…ಅಜ್ಞಾತ್ ಜಾವ್ನ್ ಆಸ್ಚೊ ಹಾಂವ್…ಕೆನ್ನಾಂಯೀ ಅಜ್ಞಾತ್ ಜಾವ್ನ್‌ಚ್ಚ್ ಉರ್ತೊಲೊಂ. ಆನಿಂ ಮ್ಹಜೆ ಖೆಳ್ ಹಾಂವ್ ಪರ್ದ್ಯಾ ಪಾಟ್ಲ್ಯಾನ್‌ಚ್ಚ್ ಖೆಳುನ್ ಆಸ್ತೊಲೊಂ. ದೆಕುನ್ ತುಜಿ ಜಾಗ್ರುತ್ಪಣ್ ತುವೆಂಚ್ಚ್ ಕರುಂಕ್ ಜಾಯ್. ತುಜಿ ಜವಾಬ್ದಾರ್ ತುಕಾ.
ಹಾಂತುನ್ ಕಾಂಯ್ ಚುಕ್ಲೊಯ್ ತರ್… ಹಾಚೊ ಪರಿಣಾಮ್ ಜಾವ್ನ್ ಉದೆಂವ್ಚೊ ತೊ ಪೊಲಿಸ್ ಅಪಾಯ್…ಫಕತ್ತ್ ತುಕಾ ಮಾತ್ರ್.”.
“ಹ್ಯಾ ತುಜ್ಯಾ ಪರ್ದ್ಯಾ ಪಾಟ್ಲ್ಯಾ ಖೆಳಾಂತ್… ಪೊಲಿಸ್ ಅಪಾಯ್ ಆಸಾ…?!”…ಅಮ್ಸರಿಂ ಉದ್ಗಾರ್ಲೊ ಅಗಸ್ಟರ್. “ಹೆಂ ಹಾಂವೆಂ ಅಂದಾಜ್-ಚ್ಚ್ ಕರುಂಕ್ ನಾತ್‌ಲ್ಲೆಂ.”
“ಅಗಸ್ಟರ್…ತುಜಿಂ ಅಸ್ಕತ್ ಉತ್ರಾಂ ಆಯ್ಕಾತಾಂ…ತುಜೆರ್ ಆಸ್ಚೊ ಮ್ಹಜೊ ಭರ್ವೊಸೊಯೀ ಅಸ್ಕತ್ ಜಾತಾ. ದೆಕುನ್…ಒ.ಕೆ. ತುಕಾ ಜಾಯ್ನಾಂ ತರ್ ಸೋಡ್. ಆತಾಂ ಮ್ಹಜೆ ತೆ ಪಾಂಚ್ ಹಜಾರ್ ರುಪಯ್ ಥಂಯ್ಚ್ ತ್ಯಾ ಎಂಡ್ ಪೋಂಯ್ಟ್ ಗಾರ್ಡಾನಾಂತ್ ಪಾಟಿಂ ದವರ್ ಆನಿಂ ಉಸಾಳ್.”
“ಸರ್…ಹಾಂವೆ ನಾಂ ಮ್ಹಣೊಂಕ್ ನಾಂ.” ತಕ್ಶಣಾಂಚ್ಚ್ ಮದೆಂಚ್ಚ್ ಬೊಬಾಟ್ಲೊ ಅಗಸ್ಟರ್.“ಹಾಂವ್ ತುಜ್ಯಾ ಹ್ಯಾ ಖರಾರೆ ಗಜಾಲೆರ್‌ಚ್ಚ್ ಆಸ್ ಲ್ಲೊಂ. ಆನಿ ಆಸಾಂ. ಆತಾಂ ಮುಕಾರ್ ಕಿತೆಂ …ಹಾಂವೆ ಕಿತೆಂ ಕರುಂಕ್ ಆಸಾ ತೆಂ ಸಾಂಗ್.”
“ತಶೆಂ ತರ್… ಆಯ್ಕ್…ಮ್ಹಜ್ಯಾ ಹರ್ಯೆಕ್ ಕೋಲಾಂತ್ ಹಾಂವೆ ದಿಂವ್ಚೆ ಹರ್ಯೆಕ್ ಹಿಶಾರೆ…ಸಾರ್ಕೆಂ ಮತಿಂ ಜಿರೊವ್ನ್ ಘೆ. ಆನಿ ತ್ಯಾಚ್ಚ್ ಘಡ್ಯೆ ಮ್ಹಜ್ಯಾ ತ್ಯಾ ಹಿಶಾರೆಂಚೆರ್ ತುಜಿಂ ಚತುರ್ ಮೆಟಾಂ ಘಾಲುಂಕ್ ತಯಾರ್ ಆಸೊಂಕ್ ಜಾಯ್.”
“ಒ.ಕೆ ಸರ್…”.
“ಆನಿ ತ್ಯಾಚ್ಚ್ ಪರ್ಮಾಣೆಂ…” ಮುಂದರಿಲೆಂ ರಿಶಬಾನ್… “ಆನಿ ತುಂವೆಂ ಆರಾಯಿಲ್ಲ್ಯಾ ಹರ್ಯೆಕ್ ಗಜಾಲೆಂಚಿ ಇಂಚಾನ್ ಇಂಚ್ ವಿವರ್ ಮ್ಹಾಕಾ ದಿತೇ ರಾವಜಾಯ್.”.
“ಒ.ಕೆ. ಸರ್…ಡನ್ನ್.” ಅಗಸ್ಟರಾಚ್ಯಾ ಹ್ಯಾ ಉತ್ರಾಂ ಬರಾಬರ್…
ಅಗಸ್ಟರಾಚ್ಯಾ ಆನಿ ರಿಶಭಾಚ್ಯಾ ಪರ್ದ್ಯಾಪಾಟ್ಲ್ಯಾ ಖರಾರೆಕ್ ಸೀಲ್ ಪಡ್ಲಿ.
***
ಖರಾರೆ ನಂತರ್ ಪಂದ್ರಾ ದೀಸ್ ಪಾಶಾರ್ ಜಾಲ್ಲೆ.
ಆನಿ ರಿಶಭಾಚ್ಯಾ ಖರಾರೆ ಪ್ರಕಾರ್ ತಾಣೆಂ ಮಾಂಡ್ಲೆಲ್ಯಾ ಮಿಸಾಂವಾ ವರ್ತುಲಾಂತ್…ಅಗಸ್ಟರ್ ಆಪ್ಲಿಂ ಚತುರ್ ಚುರುಕ್ ಮೆಟಾಂ ಘಾಲಿತ್ತ್ ಆಸ್‌ಲ್ಲೊ. ಆನಿ ರಿಶಬಾಕ್ ತೊ ಹರ್ಯೆಕ್ ವಿವರ್, ಮಾಹೆತ್ ದಿತೇ ಆಸ್‌ಲ್ಲೊ.
ಆನಿ ಆಜ್ ಆತಾಂ…ಹ್ಯಾ ಘಡ್ಯೆ…ತಾಣೆಂ ದಿಲ್ಲೊ ಹಿಶಾರೊ ರಿಶಭಾಕ್ ಚುರುಕ್ ಕರಿಲಾಗ್ಲೊ.
“ಸರ್…ಕ್ಲೋಡಿಯಾ…ಸೆರೆನಾ ಪೊಲಿಸ್ ಸ್ಟೇಶನಾ ಭಿತರ್ ಗೆಲಾಂ. ಹ್ಯಾವೆಳಾ ತಾಣೆಂ ಕಾರಾಕ್ ಲೋಕ್ ಕರುಂಕ್ ನಾತ್‌ಲ್ಲೆಂ. ಹೊ ಆವ್ಕಾಸ್ ಹಾಂವೆಂ ವಿಂಚ್ಲೊ. ಆನಿ ಖಿಣಾನ್ ಹಾಂವ್ ಚೊರ‍್ಯಾಂ ತಾಚ್ಯಾ ಕಾರಾ ಭಿತರ್ ರಿಗ್ಲೊಂ.
ಆನಿ ಸಾರ್ಕೆಂ ತಪಾಸಣ್ ಕರ್ತಾಸ್ತಾಂ…ಕಾರಾರ್ ಏಕ್ ಸಿಗ್ರೆಟಿಚೆಂ ಮುಳ್ಕಾಟ್ ಮ್ಹಾಕಾ ಮೆಳ್ಳೆಂ.”
“ಸಿಗ್ರೆಟಿಚೆಂ ಮುಳ್ಕಾಟ್…ಕ್ಲೋಡಿಯಾಚ್ಯಾ ಕಾರಾರ್…?! …”
“ವ್ಹಯ್ ಸರ್… ಕ್ಲೊಡಿಯಾ ಸಿಗ್ರೆಟ್ ವೊಡಿನಾಂ ತೆಂ ಮ್ಹಜ್ಯಾ ಗಮನಾಕ್ ಯೆದೊಳ್‌ಚ್ಚ್ ಆಯ್ಲಾಂ. ಆನಿ ತೆಂ ತುಂಯೀ ಜಾಣಾ ಆಸಾಯ್. ತಶೆಂ ತರ್… ತಿಸ್ರೊ ಏಕ್ ವೆಕ್ತಿ ಕ್ಲೋಡಿಯಾ ಸಂಗಿ ಸಂಭಂದೆಂತ್ ಆಸಾ ಮ್ಹಳ್ಳೊ ದುಬಾವ್ ಮ್ಹಾಕಾ ಜಬ್ಬೋರ್ ಧೊಸ್ತಾ.” ಅಶೆಂ ಅಗಸ್ಟರ್ ಘುಣ್ಘುಣ್ತಾನಾಂ…
‘ತಶೆಂ ತರ್ ತೊ ವೆಕ್ತಿ ಕೋಣ್ ?!’ ಮತಿಂತ್‌ಚ್ಚ್ ಅಂದಾಜ್ ಕರುಂಕ್ ಪಡ್ಲೊ ರಿಶಭ್. ಆನಿ ಘಡ್ಯೆನ್ ಮೊಬಾಯ್ಲಾರ್ ಪುಸ್ಪುಸ್ಲೊ…
“ಅಗಸ್ಟರ್ ತಾಕಾ ಥಂಯ್ಚ್ ಸೋಡ್ ಆನಿ ಆತಾಂಚ್ಚ್ ತುಂ ಕ್ಲೋಡಿಯಾಚ್ಯಾ ಬೊಂಗ್ಲ್ಯಾಲಾಗಿಂ ವಚ್. ಆನಿಂ ಕ್ಲೋಡಿಯಾ ಹಾಂಗಾಸರ್ ಆಸ್ತಾಂ…ತುಂ ಥಂಯ್ಸರ್ ತಾಚ್ಯಾ ಭೊಂಗ್ಲ್ಯಾ ಭಿತರ್ ರಿಗುನ್…
ಕ್ಲೋಡಿಯಾಚ್ಯಾ ಗೈರ್ ಹಾಜ್ರೆರ್, ಥಂಯ್ಸರ್ ತ್ಯಾ ಬೊಂಗ್ಲ್ಯಾಂತ್ ಕಿತೆಂ ಸರ್ವ್ ಘಡ್ತಾ ತೆಂ ಗುಪಿತ್ ಜಾವ್ನ್ ಸೊದ್ನಾಂ ಕರ್. ಆನಿ…ಥಂಯ್ಸರ್ಚೊ ವಿವರ್ ತುರ್ತಾನ್ ಮ್ಹಾಕಾ ದಿ.
ಪೂಣ್ ಹ್ಯಾವೆಳಾ ಬೊಂಗ್ಲ್ಯಾ ಭಾಯ್ರ್ ಯಾ ಭಿತರ್ ಕೊಣಾಯ್ಚ್ಯಾಚ್ಚ್ ನದ್ರೆಕ್ ಪಡಾನಾಶೆಂ ಜಾಗ್ರುತ್ ರಾವ್.” ಅಶೆಂ ಸಾಂಗೊನ್ ಆಸ್ತಾಂಚ್ಚ್ ಮಾರ್ಗಾರ್ ವೆಚ್ಯಾ ಟ್ಯಾಕ್ಸಿಕ್ ರಿಶಭಾನ್ ಹಾತ್ ಭಾಸ್ ಕರುನ್ ರಾವಯ್ಲೆಂ.
ಹ್ಯಾವೆಳಾ ಆಪ್ಲೆಂ ತೋಂಡ್ ಆಪ್ಣೆಂ ನ್ಹೆಸ್ಲೆಲ್ಯಾ ಹುಡಿ ಜಾಕೆಟಿಂತ್ ಧಾಂಪುನ್ ಧರ್ಲೊ. ಆನಿ ಹಾತಾಂತ್ಲೊ ಸರಳ್…ಪ್ಯಾಂಟಾ ದೆಗೆನ್ ಲಿಪಯ್ಲಾಗ್ಲೊ. ಆನಿ ಕಾರಾಚೆಂ ಪಾಟ್ಲೆಂ ಬಾಗಿಲ್ ಉಗ್ತೆಂ ಕರುನ್ ಭಿತರ್ ರಿಗ್ತಾಸ್ತಾಂ ಡ್ರೈವರಾಕ್ ಸಾಂಗಿಲಾಗ್ಲೊ…
“ಸೆರೆನ್ ಪೋಲಿಸ್ ಸ್ಟೇಶನ್”.
***
ಪಾಂಚ್ ಸ ಮಿನುಟಾಂನಿಂ ರಿಶಬ್… ಸೆರೆನಾ ಪೋಲಿಸ್ ಸ್ಟೇಶನಾ ಮುಕಾರ್ ಟ್ಯಾಕ್ಸಿ ಥಾವ್ನ್ ದೆವ್ಲೊ. ತವಳ್‌ಚ್ಚ್ ತಾಚಿ ದೀಶ್ಟ್… ಪೊಲಿಸ್ ಸ್ಟೇಶನಾ ಮುಕಾರ್ ಉಬೆಂ ಆಸ್ಚ್ಯಾ ಕ್ಲೋಡಿಯಾಚೆಂ ಕಾರಾಚೆರ್ ಪಡ್ಲಿ. ಹ್ಯಾವೆಳಾ…
‘ಕ್ಲೋಡಿಯಾ ಪೊಲಿಸ್ ಸ್ಟೇಶನಾಕ್ ಕಿತ್ಯಾ ಆಯ್ಲಾಂ …ತಾಕಾ ಕಾಂಯ್ ಕಸಲ್ಯಾ ತರೀ ಅಪಾಯೆಚಿ ಸಾವ್ಳಿ ಧೊಸುನ್ ಆಸಾ?!’ ಮ್ಹಳ್ಳೊ ದುಬಾವ್ ಧೊಸುಂಕ್ ಲಾಗ್ಲೊ. ಆನಿ ಹ್ಯಾ ದುಬಾವೆವಿಶಿಂ ಕ್ಲೋಡಿಯಾ ಥಾವ್ನ್‌ಚ್ಚ್ ಜಾಣಾಂ ಜಾಂವ್ಯಾ. ಮ್ಹಳ್ಳ್ಯಾ ಚಿಂತ್ನಾಂ ಬರಾಬರ್…
ಟ್ಯಾಕ್ಸಿ ಥಾವ್ನ್ ದೆವ್ಲೊ. ಆನಿ ಸವ್ಕಾಸ್ ತೊ ಕ್ಲೋಡಿಯಾಚ್ಯಾ ತ್ಯಾ ಕಾರಾಸರ್ಶಿಂ ಮೆಟಾಂ ಘಾಲಿಲಾಗ್ಲೊ. ಆನಿ ಲಾಗಿಂ ಪಾವ್ತಚ್ಚ್ ಕಾರಾಕ್ ವೊಣ್ಕೊನ್ ಕ್ಲೋಡಿಯಾ ಖಾತಿರ್ ರಾಕೊನ್ ರಾವ್ಲೊ.
ಪಾಂಚ್ ಸ ಮಿನುಟಾಂ ಜಾಯ್ಜಾಯ್ ತರ್ … ತಾಚೆಂ ಮೊಬಾಯ್ಲ್ ವ್ಹಾಜೊಂಕ್ ಲಾಗ್ಲೆಂ.
ಅಗಸ್ಟರಾಚೆಂ ಕೋಲ್.
“ಸರ್… ಹಾಂವ್ ಕ್ಲೋಡಿಯಾಚ್ಯಾ ಬೊಂಗ್ಲ್ಯಾ ಮುಕಾರ್ ಆಸಾಂ. ಪೂಣ್ ಮ್ಹಾಕಾ ಬೊಂಗ್ಲ್ಯಾ ಭಿತರ್ ವಚೊಂಕ್ ಅಸಾಧ್ಯ್ ಜಾಲಾಂ. ಮ್ಹಳ್ಯಾರ್ ಹಾಂಗಾಸರ್ ಬೊಂಗ್ಲ್ಯಾ ಮಾಳಿಯೆಚ್ಯಾ ಜನೆಲಾ ಲಾಗಿಂ ವೀಲ್ ಚೇರಾರ್ ಆಸ್ಚೊ ಕ್ಲೋಡಿಯಾಚೊ ನೊವ್ರೊ ಕ್ಲೈವ್… ಮಾರ್ಗಾ ಕುಶಿನ್ ಪಳೆತ್ತ್ ಆಸಾ.
ಬಹುಶ್ಹಾ ತೊ ತ್ಯಾ ಲಾಂಬ್ ಕೆಸಾಂಚ್ಯಾಕ್ ರಾಕೊನ್ ಆಸ್‌ಲ್ಲೊ ಜಾಯ್ಜಾಯ್. ಹಾಂವ್ ಬೊಂಗ್ಲ್ಯಾಕ್ ಪಳೆತ್ತ್ ಆಸ್ತಾಂ…ಆತಾಂ ತಾಚೊ ತೊ ಲಾಂಬ್ ಕೆಸಾಂಚೊ ವೆಕ್ತಿ ತಾಚ್ಯಾ ಬೊಂಗ್ಲ್ಯಾಚಿ ಮೆಟಾಂ ಚಡತ್ತ್ ಆಸಾ. ಹಾಂ ಆತಾಂ ಭಿತರ್ ರಿಗ್ಲೊ.” ಅಶೆಂ ಅಗಸ್ಟರ್ ಸಾಂಗಿತ್ತ್ ಆಸ್ತಾಂಚ್ಚ್…ಹಾಂಗಾಸರ್…
ಕ್ಲೋಡಿಯಾ … ಪೊಲಿಸ್ ಸ್ಟೇಶನಾಚಿಂ ಮೆಟಾಂ ದೆಂವೊಂನ್ ಆಸ್ಚೆಂ ರಿಶಭಾನ್ ಪಳೆಲೆಂ.
ಹೆಂ ಪಳೆಲ್ಲೆಂಚ್ಚ್ ಮೊಬಾಯ್ಲಾರ್ ಆಸ್ಚ್ಯಾ ಅಗಸ್ಟರಾಕ್ ತೊ ಮ್ಹಣಾಲೊ… “ಆನಿ ಬೊಂಗ್ಲ್ಯಾ ಭಿತರ್ ರಿಗ್ಚೆಂ ಪ್ರೇತನ್ ಕರಿನಾಕಾ. ಆನಿ ಥೊಡ್ಯಾಚ್ಚ್ ವೆಳಾನ್ ಕ್ಲೋಡಿಯಾ ಥಂಯ್ಸರ್ ಆಸ್ತೆಲೆಂ.”
“ಒ.ಕೆ ಸರ್…ಹಾಂಗಾ ಆತಾಂ ಜನೆಲಾ ಲಾಗಿಂ ಕ್ಲೈವ್ ಆನಿ ತೊ ಲಾಂಬ್ ಕೆಸಾಂಚೊ ಘಂಬೀರ್ ಸಂಭಾಶಣೆರ್ ವೆಸ್ತ್ ಜಾವ್ನ್ ಆಸಾತ್.”.
ಲಾಂಬ್ ಕೆಸಾಂಚ್ಯಾ ವೆಕ್ತಿವಿಶಿಂ ಹೆಂ ಆಯ್ಕಾತಾಂ ಖಿಣಾನ್ ರಿಶಭಾಕ್ ಹ್ಯಾ ಆದಿಂ… ಏಕ್ ಪಾವ್ಟಿಂ ಕ್ಲೋಡಿಯಾನ್ ತ್ಯಾ ಲಾಂಬ್ ಕೆಸಾಂಚ್ಯಾ ತರ್ನಾಟ್ಯಾ ಲಾಗಿಂ ಝಗ್ಡೆಂ ಕೆಲ್ಲೆಂ. ಆನಿ ತ್ಯಾ ನಂತರ್ ತ್ಯಾಚ್ಚ್ ವೆಕ್ತಿಕ್ ಕ್ಲೈವಾನ್ ತಾಚ್ಯಾ ಗುಪಿತ್ ಕಾಮಾಂ ಖಾತಿರ್ ತಾಕಾ ವಿಂಚ್‌ಲ್ಲೊ. ಆನಿಂ ಹೆಂ ಸಗ್ಳೆಂ ಉಗ್ಡಾಸಾಕ್ ಆಯ್ಲೆಂ.
ಕ್ಲೈವ್…ಲಾಂಬ್ ಕೆಸಾಂಚ್ಯಾ ವೆಕ್ತಿಕ್ ಉಪಯೋಗ್ಸುನ್…ಕ್ಲೋಡಿಯಾಚ್ಯಾ ಪರ್ದ್ಯಾ ಪಾಟ್ಲ್ಯಾ ಹರ್ಯೆಕ್ ಮೆಟಾಂಚೆರ್ ತೊ ನದರ್ ದವರ್ನ್ ಆಸಾ. ಆನಿ ತಾಚಿ ಹಿ ಗುಪಿತ್ ನದರ್ … ಖಂಡಿತ್ ಜಾವ್ನ್ ಕ್ಲೋಡಿಯಾಕ್ ಅಪಾಯೆಚೆಂ ತೆಂ ಖಂಡಿತ್.
ಅಶೆಂ ಮ್ಹಣ್ ರಿಶಭ್ ಚಿಂತುನ್ ಆಸ್ತಾಂಚ್ಚ್ … ತ್ಯಾ ಥೊಡ್ಯಾ ಸೆಕುಂದಾಂನಿಂ … ಕ್ಲೋಡಿಯಾಚ್ಯಾ ಕಾರಾಕ್ ವೊಣ್ಕೊನ್ ಆಸ್ಲೆಲ್ಯಾ ರಿಶಭಾಚಿ…ತಶೆಂಚ್ಚ್ ಕಾರಾ ಲಾಗಿಂ ಪಾವ್ಲೆಲ್ಯಾ ಕ್ಲೊಡಿಯಾಚಿ…ಮುಖಾಮುಖ್ ಭೆಟ್ ಜಾಲಿ. ಹ್ಯಾವೆಳಾ…
ರಿಶಭಾಕ್ ಅಚಾನಕ್ ಹಾಂಗಾಸರ್ ಪಳೆಲ್ಲೆಂಚ್ಚ್…ಕ್ಲೋಡಿಯಾನ್ ಎಕಾಚ್ಚಾಣೆಂ ಆಂಗ್ ಕಾಡ್ಲೆಂ!
ಆನಿ ಆಪ್ಲೆಂ ಹೆಂ ಅಚಾನಕ್ ಕರ್ತುಬ್ ರಿಶಬಾಚ್ಯಾ ಗಮನಾ ಥಾವ್ನ್ ಲಿಪಂವ್ಚ್ಯಾಕ್ ಖಿಣಾನ್ ತಾಣೆಂ ಕಾರಾಚೆಂ ದಾರ್ ಉಗ್ತೆಂ ಕೆಲೆಂ. ಆನಿಂ ಅಮ್ಸರಿಂ ಭಿತರ್ ರಿಗ್ತಾ ಮ್ಹಣ್ತಾಸ್ತಾಂ…ಸಟ್ಟ್ ಕರುನ್ ರಿಶಭಾನ್ ಆಪ್ಲೆ ವೋಂಟ್ ವೆಗ್ಳೆ ಕೆಲೆ.
“ಕ್ಲೋಡಿಯಾ…ಪೊಲಿಸ್ ಸ್ಟೇಶನಾಕ್ ಕಿತ್ಯಾ ಆಯ್ಲೆಂಯ್?!”.
“ರಿಶಭ್, ತುಜೆಂ ಸವಾಲ್ ಮ್ಹಾಕಾ ಕರ್ಕರೆ ಹಾಡ್ತಾ. ಅಸಲಿಂ ತುಜಿ ಸವಲಾಂ ಮಾಕಾ ಕ್ಲೈವಾಚ್ಯಾ ಸವಾಲಾಂ ಪರಿಂ ಮತಿಕ್ ಇರಾರ್ ದಿತಾತ್.”
“ಜಾಂವ್ಕ್ ಪುರೊ ಕ್ಲೋಡಿಯಾ. ಪೂಣ್ ಮ್ಹಜೆಂ ಸವಾಲ್…‘ತುಂ ಅನೀತಿಚ್ಯಾ ವಾಟೆರ್ ಮೆಟಾಂ ಘಾಲುನ್ ಆಸಾಯ್’ ಮ್ಹಣ್ ತುಕಾ ಜಾಗಯ್ತಾ. ತುಜ್ಯಾ ನಿತಳ್ ನಡ್ತ್ಯಾಕ್ ಕಳಂಕ್ ಹಾಡ್ಚಿಂ ತುಜಿಂ ಹಿಂ ಅನೀತ್ ಮೆಟಾಂ… ಮ್ಹಜ್ಯಾ ಕಾಳ್ಜಾಕ್ ಭಾಲೆ ಮಾರ್ತಾತ್.
ಪೂಣ್ ಮ್ಹಜಿ ಪರ್ವಾ ತುಕಾ ಆಸ್ಚಿನಾಂ. ತರೀ ಮ್ಹಜ್ಯಾ ಕಾಳ್ಜಾಂತ್ ಮೊರ್ತಾಂ ಪರ್ಯಾಂತ್ ಜಿವೊಚ್ಚ್ ಆಸ್ಚ್ಯಾ ಮ್ಹಜ್ಯಾ ಕ್ಲೋಡಿಯಾಚೊ ಹುಸ್ಕೊ ಪರ್ವಾ… ಮ್ಹಾಕಾ ಆಸಾ.
ತ್ಯಾ ಖಾತಿರ್ ಹಾಂವ್ ತುಕಾ ಜಾಗೈತಾಂ… ‘ಜರ್ ಹೆಂ ವಾಯ್ಟ್ ನಡ್ತೆಂ ಕ್ಲೈವಾಕ್ ಕಳಿತ್ ಜಾಯ್ತ್ ತರ್ ’…”
“ತ್ಯಾವಿಶಿಂ ಹಾಂವ್ ಪರ್ವಾ ಕರಿನಾ”. ಮಧೆಂಚ್ಚ್ ಮ್ಹಣಾಲೆಂ…ಕ್ಲೋಡಿಯಾ… “ಕಿತ್ಯಾ ತುಂವೆ ಸಾಂಗ್ಚ್ಯಾ ತಸಲ್ಯಾ ವಾಯ್ಟ್ ನಡ್ತ್ಯಾಂನಿಂ ಹಾಂವ್ ನಾಂ.”
“ಫಟ್ ಮಾರಿನಾಕಾ. ಹಾಂವ್ ಹೆಂ ರುಜ್ವಾತೆ ಸಂಗಿ ತುಕಾ ಸಾಂಗುನ್ ಆಸಾಂ.”
“ರು…ರುಜ್ವಾತ್?!… ಮ್ಹಳ್ಯಾರ್?!… ಕ್ಲೈವಾಪರಿಂ ತುಂವೆಯೀ ತುಜ್ಯಾ ಮನ್ಶಾಕ್ ಮ್ಹಜ್ಯಾ ಪಾಟ್ಲ್ಯಾನ್ ದವರ್ನ್ ಆಸಾಯ್ ಕಿತೆಂ!?.”
“ಖಂಡಿತ್ ಜಾವ್ನ್. ಪೂಣ್ ತುಕಾ ಖೆಂಡುಂಕ್ ನ್ಹಂಯ್. ಬಗಾರ್ ತುಕಾ ಉದೆಂವ್ಚ್ಯಾ ಅಚಾನಕ್ ಅಪಾಯೆ ಥಾವ್ನ್ ತುಕಾ ಬಚಾವ್ ಕರ್ಚ್ಯಾಕ್!”
“ತಶೆಂ ತರ್ ಮ್ಹಾಕಾ ಹ್ಯಾ ದಿಸಾಂನಿಂ ಧೊಸುನ್ ಆಸ್ಚೊ ತೊ ದುಬಾವೆ ವೆಕ್ತಿ ತುಜೊ ಮನಿಸ್.?” ತಕ್ಶಣಾಂಚ್ಚ್ ವಿಚಾರಿಲಾಗ್ಲೆಂ…ಕ್ಲೋಡಿಯಾ.
“ಜಾಂವ್ಕ್ ಪುರೊ…ತೆಂ ಆಸೊಂ…ಆತಾಂ ತುಂ ಪೊಲಿಸ್ ಸ್ಟೇಶನಾಕ್… ತ್ಯಾಚ್ಚ್ ಖಾತಿರ್ ಕಂಪ್ಲೇಂಯ್ಟ್ ದೀಂವ್ಕ್ ಆಯಿಲ್ಲೆಂಯ್.?!”
ಹೆಂ ಆಯ್ಕಾಲ್ಲೆಂಚ್ಚ್…ಕಸಲ್ಯಾಗೀ ಅಪ್ರಾದಿ ಮನೋಭಾವಾನ್…ಆನಿ ಹೊ ಮನೋಭಾವ್ ರಿಶಭಾ ಥಾವ್ನ್ ಚುಕೊಂವ್ಚ್ಯಾಕ್…ಸಟ್ಟ್ ಕರುನ್ ತಾಣೆಂ ತಾಕಾ ಪಾಟ್ ಕೆಲೆಂ. ಆನಿ ಕಾರಾಚೆಂ ದಾರ್ ಉಗ್ತೆಂ ಕರ್ಚ್ಯಾಕ್ ಅಮ್ಸರಿಲಾಗ್ಲೆಂ. ತವಳ್‌ಚ್ಚ್ ರಿಶಭ್ ಮ್ಹಣಾಲೊ…
“ಆಯ್ಕ್ ಕ್ಲೋಡಿಯಾ…ತುಜಿ ಕುಡಿಚಿ ಹಿ ಅನೀತ್ ಆಶೆಚಿ ವೊಡ್ಣಿಂ ತುಕಾ ಬರ‍್ಯಾಕ್ ನ್ಹಂಯ್…ತಿ ಆಶಾ ತುಜ್ಯಾ ಹ್ಯಾ ಕುಡಿಕ್ ಅನ್ವಾರ್ ಹಾಡ್ತೆಲಿ ಖಂಡಿತ್.”
“ರಿಶಭ್…ಹಾಂವ್ ತಾಚಿ ಪರ್ವಾ ಕರಿನಾಂ. ಕಸಲೆಂಯೀ ಜಾಂವ್. ಮ್ಹಾಕಾ ಮ್ಹಜ್ಯಾ ಗರ್ಭಾಂತ್ ಮ್ಹಜೆಂ ಮ್ಹಳ್ಳೆಂ ಪಿಂಪ್ರೆಂ ಕಿರ್ಲುಂಕ್ ಜಾಯ್. ಆನಿ ಹ್ಯಾ ಖಾತಿರ್…ಹಾಂವ್ ಕಸಲ್ಯಾಯೀ ಅನ್ವಾರಾಂಚಿ ಪರ್ವಾ ಕರಿನಾಂ.
ಮ್ಹಾಕಾ ಫಕತ್ತ್ ಮ್ಹಜೆಂ…ಮ್ಹಜೆಂಚ್ಚ್ ಮ್ಹಳ್ಳೆಂ ಬಾಳ್ ಜಾಯ್. ಹ್ಯಾ ಮ್ಹಜ್ಯಾ ಬಾಳಾವರ್ವಿಂ…
ಲಗ್ನಾಂ ಆದ್ಲೊ ಮ್ಹಜೊ ತೊ ಸಲ್ವಾಲ್ಲೊ ಮೋಗ್…ತಶೆಂಚ್ಚ್ ಲಗ್ನಾ ನಂತರ್ ಪತಿ ಕ್ಲೈವಾ ಥಾವ್ನ್ ಮೆಳಾನಾಸ್ಚೊ ಕಾಳ್ಜಾ ಕುಡಿಚೊ ಮೋಗ್… ಹೆಂ ದೊನೀಂ ವಿಸ್ರೊನ್ ಮ್ಹಜಿ ನಿರಾಸ್ ಜಿಣಿ ಹಾಂವ್ ನಂದನ್ ಕರ್ತೆಲಿಂ.”
“ಕ್ಲೋಡಿಯಾ… ಹ್ಯಾ ತುಜ್ಯಾ ನಂದನ್ ಜಿಣ್ಯೆ ಖಾತಿರ್ ತುಂವೆ ವಿಂಚ್ಚಿ ರೀತ್ ಅನೀತಿಚಿ!.”
“ರಿಶಭ್ ನೀತ್ ಅನೀತ್ ರಿವಾಜ್ ಹಾಂವ್ ಪಳೆಂನಾಂ…ಮಾಕಾ ಫಕತ್ತ್ ಕ್ಲೈವಾಚ್ಯಾ ಅಸಹಾಯೆಕತೆ ವರ್ವಿಂ ನಿರಾಶಿ ಪತಿಣ್ ಜಾವ್ನ್ ಜಿಯೆವ್ನ್ ಆಸ್ಚಿ ಜಿಣಿ … ಏಕ್ ಆವಯ್ ಜಾವ್ನ್ ಜಿಯೆಂವ್ಚ್ಯಾ ಸುಂದರ್ ಜಿಣ್ಯೆಕ್ ಬದ್ಲುಂಕ್ ಜಾಯ್.
ಕೈವಾ ವರ್ವಿಂ ಮರಣ್ ಪಾವ್-ಲ್ಲಿ ಮ್ಹಜಿ ಜಿಣಿ…ತುಂವೆ ಸಾಂಗ್ಚ್ಯಾ ಅನೀತೆ ವರ್ವಿಂ ಪರತ್ ಜಲ್ಮಾತೆಲಿ!. ಹೆಂ ಮ್ಹಾಕಾ ಜಾಯ್.”
ಕ್ಲೋಡಿಯಾಚಿಂ ಘಟ್ ನಿರ್ಧಾರೆಚಿಂ ಹಿಂ ಕಡಕ್ಕ್ ಉತ್ರಾಂ ಆಯ್ಕಾತಾನಾಂ ರಿಶಭಾಕ್… ಕ್ಲೋಡಿಯಾಚ್ಯಾ ಲಗ್ನಾಂ ಆದ್ಲೆಂ ಎಕ್ ಘಡಿತ್ ಜಗ್ಲೊಂಕ್ ಲಾಗ್ಲೆಂ.
***
ತ್ಯಾ ಎಕಾ ದಿಸಾ… ಕ್ಲೋಡಿಯಾ ಆನಿಂ ರಿಶಭ್ ಎಕಾ ಗಾರ್ಡಾನಾಂತ್ ಆಸ್ತಾನಾಂ…
ಥಂಯ್ಸರ್ ಭೆಟ್ಲೆಲ್ಯಾ ಇನ್ಸ್‌ಪೆಕ್ಟರ್ ನೈಜಿಲಾಚ್ಯಾ ಭುರ್ಗ್ಯಾಸಂಗಿ ಕ್ಲೋಡಿಯಾ ಖೆಳುನ್ ಆಸ್ಚಿ ತಿ ವಿಭಿನ್ನ್ ಮೊಗಾ ವೊಡ್ಣ್ಯಾಂಚಿ ರೀತ್…ಭುರ್ಗ್ಯಾ ಥಂಯ್ ತಾಚಿ ತಿ ಅಪರಿಮಿತ್ ಮೋಗ್ ಹುಸ್ಕೊ ರಿಶಭಾಕ್ ಉಗ್ಡಾಸಾಕ್ ಯೆತಾಂ…
ಅಶೆಂ ಚಿಂತ್ತಾಸ್ತಾನಾಂ… ‘ಕ್ಲೋಡಿಯಾಕ್ ಆಪುಣ್ ಏಕ್ ಆವಯ್ ಜಾವ್ನ್…ಆಪ್ಣಾಕ್‌ಯೀ ತಸಲೆಂಚ್ಚ್ ಏಕ್ ಭುರ್ಗೆಂ ಜಾಯ್!’ ಮ್ಹಳ್ಳಿ ಆಶಾ ವೊಡ್ಣಿಂ ಆಸಾ! ಮ್ಹಳ್ಳೆಂ ತಾಕಾ ರಿಶಭಾಕ್ ಜಗ್ಲಾಲಾಗ್ಲೆಂ.
ಆನಿ ಲಗ್ನಾ ನಂತರ್ ಕ್ಲೈವಾಚ್ಯಾ ಲೈಂಗಿಕ್ ಅಸ್ಕತ್ಕಾಯೆಚ್ಯಾ ಅಸಹಾಯೆಕತೆ ವರ್ವಿಂ ಏಕ್ ಆವಯ್ ಜಾಂವ್ಕ್ ಸಲ್ವಾಲ್ಲೆಂ ಕ್ಲೋಡಿಯಾ … ಪ್ರಸ್ತುತ್ ಆಪ್ಲ್ಯಾ ಆಪುಣ್ ಆವಯ್ ಜಾಂವ್ಚ್ಯಾ ದಬಾವೆರ್…ಕ್ಲೈವಾಚ್ಯಾ ಭೊಗ್ಣಾಂ ತಶೆಂ ಭಿರಾಂತೆ ಥಂಯ್ ಆಪ್ಲೆ ದೊಳೆ ಧಾಂಪುನ್ ದವರ್ಲ್ಯಾತ್.
ಆನಿ ಅಸಲ್ಯಾವೆಳಾ… ‘ಜರ್ ಆತಾಂ ಆಪ್ಲೆಂ ಲೈಂಗಿಕ್ ಅಸಹಾಯೆಕತಾ…ನಿರಾಸ್ಪಣ್… …ಕ್ಯೋಡಿಯಾ ಮುಕಾರ್ ಆಪ್ಲ್ಲ್ಯಾ ಉಣೆಂಪಣಾನ್ ಭೊಗ್ಚ್ಯಾ ಧೆಧೆಸ್ಪರಾನ್ ಬುಡ್ಲೆಲ್ಯಾ…
ಕ್ಲೈವಾಚೆ ದೊಳೆ… ‘ಕ್ಲೋಡಿಯಾಚ್ಯಾ ಹ್ಯಾ ಅನೀತೆಚ್ಯಾ ವೊಡ್ಣ್ಯಾ’ ಥಂಯ್ ಉಗ್ತೆ ಜಾಲೆ ತರ್…
ಕ್ಲೋಡಿಯಾಕ್…ಕ್ಲೈವಾ ಥಾವ್ನ್ ಉದೆಂವ್ಚೊ ತೊ ಭಯಾನಕ್ ಅಪಾಯ್… ಕಸಲೊ, ಖಂಯ್ಚ್ಯಾ ಥರಾನ್ ಜಾಯ್ತ್ ಮ್ಹಳ್ಳೆಂ ಕ್ಲೋಡಿಯಾ ವರ್ವಿಂ ಚಿಂತುಂಕ್ ಅಸಾಧ್ಯ್!.’
ಅಶೆಂ ರಿಶಭ್ ಚಿಂತುನ್ ಆಸ್ತಾನಾಂಚ್ಚ್… ಕ್ಲೋಡಿಯಾಚೆಂ ಕಾರ್ ಸ್ಟಾರ್ಟ್ ಜಾಲೆಂ. ಆನಿ ರಿಶಭ್ ಪಳೆತಾಂ ಪಳೆತಾಂ… ಕ್ಲೋಡಿಯಾಚೆಂ ಕಾರ್ ತಾಚ್ಯಾ ದೊಳ್ಯಾ ಮುಕ್ಲೆಂ ನಪಂಯ್ಚ್ ಜಾಲೆಂ.
ಆತಾಂ ತಾಚೆ ದೊಳೆ ಯಾಂತ್ರಿಕ್ ಥರಾನ್ ಕ್ಲೋಡಿಯಾಚ್ಯಾ ಕಾರಾ ಥಾವ್ನ್ ಪೊಲಿಸ್ ಸ್ಟೇಶನಾ ಕುಶಿನ್ ಬದ್ಲಾಲೆ.
‘ಕ್ಲೋಡಿಯಾ ಸ್ಟೇಶನಾಕ್ ಯೇಂವ್ಕ್ ಕಾರಣ್ ಕಸಲೆಂ ಆಸ್ಯೆತ್ ? ತಾಕಾ ತಿ ಅಪಾಯೆಚೆಂ ಸಾವ್ಳಿ ಧೊಸುನ್ ಆಸಾ?.
ಕಾಂಯ್ ಕ್ಲೈವಾನ್ ನೇಮಕ್ ಕೆಲ್ಲ್ಯಾ ಲಾಂಬ್ ಕೆಸಾಂಚ್ಯಾ ತರ್ನಾಟ್ಯಾಚೆಂ ಪಾಟ್ಲಾವ್ಪಣ್ … ಯಾ ಆಪ್ಣೆಂ ನೆಮ್ಲೆಲ್ಲ್ಯಾ ಅಗಸ್ಟರಾಚೆಂ ಗುಪಿತ್ ಸೊದ್ನಾಂಚೆಂ ಪಾಟ್ಲಾವ್ಪಣ್…ಕ್ಲೋಡಿಯಾಚ್ಯಾ ಚತುರ್ ಮತಿಕ್ ಅದಾಳ್ಳಾ?!.’
ಅಸಲ್ಯಾ ಸರ್ವ್ ದುಬಾವೆ ಚಿಂತ್ನಾನಿಂ ತಾಚಿಂ ಮೆಟಾಂ ಪೊಲಿಸ್ ಸ್ಟೇಶನಾಚ್ಯಾ ದಾರಾರ್ ಪಾವ್ಲಿಂ.
ಹ್ಯಾ ವೆಳಾ ಕಾನ್ಸ್‌ಸ್ಟೇಬಲಾಚೆ ಹಾತ್ ಹುನ್ ಕರುನ್ ಕ್ಲೋಡಿಯಾ ಹಾಂಗಾಸರ್ ಆಯ್ಲೆಲ್ಯಾಚೊ ಘುಟ್ ಭಾಯ್ರ್ ಕಾಡ್ಚ್ಯಾ ಪ್ರೇತನಾರ್ ಆಸ್ತಾನಾಂಚ್ಚ್… ತಾಚಿ ದೀಶ್ಟ್ ಪೊಲಿಸ್ ಇನ್ಸ್‌ಪೆಕ್ಟರಾಚಾ ಮೆಜಾರ್ ಬದ್ಲಾಲಿ.
ಪೂಣ್ ಇನ್ಸ್‌ಪೆಕ್ಟರಾಚಾ ಜಾಗ್ಯಾರ್ ತೊ ಫಲಾಣೊ ಇನ್ಸ್‌ಪೆಕ್ಟರ್ ನಾತ್‌ಲ್ಲೊ. ತವಳ್ ತಾಚಿ ದೀಶ್ಟ್ ಮೆಜಾರ್ ಆಸ್ಲೆಲ್ಯಾ ತ್ಯಾ ಇನ್ಸ್‌ಪೆಕ್ಟರಾಚಾ ನಾಂವಾಚ್ಯಾ ಫಲಕಾರ್ ಬದ್ಲಾತಾನಾಂ…ಎಕಾಚ್ಚಾಣೆಂ ತಾಚೆ ದೊಳೆ ರುಂದಾಲೆ.
‘ಇ| ನೈಜಿಲ್…!’
‘ನೈಜಿಲ್?!…ಆಜಾಪಿಂ ಚಿಂತುಂಕ್ ಪಡ್ಲೊ ರಿಶಭ್. ಥೊಡ್ಯಾ ತೆಂಪಾ ಆದಿಂ ಆಪ್ಲ್ಯಾ ಭುರ್ಗ್ಯಾ ಸಂಗಿ ಕ್ಲೋಡಿಯಾಕ್ ಭೆಟ್ಲೊಲೊ ತೊಚ್ಚ್ ತೊ ಇ|ನೈಜಿಲ್ ಆತಾಂ ಹಾಂಗಾ ಹ್ಯಾ ಪೊಲಿಸ್ ಸ್ಟೇಶನಾಂತ್!’. ಅಶೆಂ ತೊ ಚಿಂತಿತ್ತ್ ಆಸ್ತಾಂ…ಥೊಡ್ಯಾಚ್ಚ್ ಸೆಕುಂದಾನಿಂ ಇನ್ಸ್‌ಪೆಕ್ಟರ್ ನೈಜಿಲ್ ಪಾಟಿಂ ಆಪ್ಲ್ಯಾ ಜಾಗ್ಯಾಕ್ ಆಯ್ಲೊ.
ಹ್ಯಾವೆಳಾ…ರಿಶಭ್ ತಾಕಾ ವೊಳ್ಕಾಲ್ಲೊ ತರೀ,…
ಇ|ನೈಜಿಲ್…ಬಾಗ್ಲಾರ್ ಉಬೊ ಆಸ್ಚ್ಯಾ ರಿಶಭಾಕ್ ವೊಳ್ಕೊಂಕ್ ಕಶ್ಟಾಲೊ. ಪೂಣ್ ಕ್ಲೋಡಿಯಾನ್…ಎಸಿಡ್ ಘಾಯಾನ್ ವಿದ್ರೂಪ್ ಸ್ಥಿತಿಕ್ ಬದ್ಲಾಲ್ಲ್ಯಾ ರಿಶಭಾವಿಶಿಂ ಸಾಂಗ್ಲೆಂಲೆಂ ತೆಂ ಉಗ್ಡಾಸಾಕ್ ಯೆತಾಸ್ತಾನಾಂ…ಸಟ್ಟ್ ಕರುನ್ ತಾಣೆಂ ವಿಚಾರ್ಲೆಂ…
“ರಿ…ರಿಶಭ್?…”
“ಸರ್…” ಮ್ಹಣಾಲೊ ರಿಶಭ್…ಖಿಣಾನ್ ಇ|ನೈಜಿಲಾ ಮುಕಾರ್ ಉಬೊ ರಾಂವ್ಚೆ ಧೈರ್ ಆರಾವ್ನ್.
“ರಿಶಭ್…ಭಿತರ್ ಯೆ… ಬಸ್.” ತಕ್ಶಣಾಂಚ್ಚ್ ಮ್ಹಣಾಲೊ ಇ|ನೈಜಿಲ್. ಆನಿ ಮುಂದರುನ್ …“ಕ್ಲೋಡಿಯಾನ್ ಮ್ಹಾಕಾ ತುಜ್ಯಾ ಹ್ಯಾ ಕಠಿಣ್ ಸ್ಥಿತೆಚಿ ಸಗ್ಳಿ ಗಜಾಲ್ ವಿವರಿಲ್ಲಿ. ತರೀ ಅಸಲಿ ಘಂಭೀರ್ ಭಿರಾಂಕುಳ್ ಸ್ಥಿತಿ ಮ್ಹಣ್ ಹಾಂವೆಂ ಸ್ವಪ್ಣಾಂತೀ ಚಿಂತ್ಲೆಂ ನಾಂ.
ತುಂ ತ್ಯಾ ವಿಶ್ವಾಸ್ ಘಾತ್ಗಿ ಫಟ್ಟಿಂಗಾ ಸರ್ಶಿಂ ಕಿತ್ಯಾ ತರೀ ಗೆಲ್ಲೊಯ್…ರಿಶಭ್ ?” ಬಿರ್ಮೊತೆ ಸಂಗಿ ರಾಗಾನ್ ಇ|ನೈಜಿಲಾಚೆಂ ರಗಾತ್ ಸಳ್ಸಳೊಂಕ್ ಲಾಗ್ಲೆಂ.
“ತೆಂ ಮ್ಹಜೆಂ ನಶಿಭ್. ಮ್ಹಜ್ಯಾ ಫುಟ್ಲೆಲ್ಯಾ ನಶಿಭಾನ್ ಮ್ಹಾಕಾ ತಾಚೆಂ ಸರ್ಶಿಂ ವೋಡ್ಣ್ ವ್ಹೆಲ್ಲೆಂ.”
“ತುಕಾ ಪಳೆತಾಂ ಮ್ಹಜೆಂ ರಗತ್ ಕ್ರೋಧಾನ್ ಸಳ್ಸಳ್ತಾ. ತುಕಾ ಆನಿಂ ಕ್ಲೋಡಿಯಾಕ್ ವಿಶ್ವಾಸ್ ಘಾತ್ ಕರುನ್ ತುಮ್ಕಾಂ ಜಿವಿತ್ ಭರ್ ಸಂಕಶ್ಟಾಕ್ ಒಳಗ್ ಕೆಲ್ಲ್ಯಾ ಫೆಡ್ರಿಕಾಕ್ ಚಿಂತ್ತಾಸ್ತಾನಾಂ…
ಭೊಗ್ಣಾಂ ನಾತ್ಲೆಲ್ಯಾ ತ್ಯಾ ಫಾತ್ರಾ ಕಾಳ್ಜಾಚ್ಯಾ ಫೆಡ್ರಿಕಾಕ್ …ತಶೆಂ ತಾಚ್ಯಾ ಥಾವ್ನ್ ಮುಕಾರೀ ತುಮ್ಕಾಂ ಜಾಂವ್ಕ್ ಸಾಧ್ಯಾತಾ ಆಸ್ಚ್ಯಾ ವಿಶ್ವಾಸ್ ಘಾತ್ಕಿ ಕರ್ತುಬಾಂ ವಿಶಿಂ ಅಂದಾಜ್ ಕರ್ತಾಸ್ತಾನಾಂ…
ಮ್ಹಜೆ ಹಾತ್ ಎಕಾಎಕಿ ರಿವಾಲ್ವರಾ ಖಾತಿರ್ ಖೊರ್ಜಾತಾತ್.!”
ಹೆಂ ಆಯ್ಕಾತಾನಾಂ … ರಿಶಭಾಕ್ ಯಾಂತ್ರಿಕ್ ಥರಾನ್ ಇ|ನೈಜಿಲಾಚೆಂ ‘ಪೊಲಿಸ್ ಎನ್ಕೌಂಟರ್!’ ಜಗ್ಲಾಲೆಂ. ತಕ್ಶಣಾಂಚ್ಚ್…
“ಸೊಡಾ ಸರ್ ತ್ಯಾ ಪೆಟ್ಯಾಕ್. ತಾಣೆಂ ಕೆಲ್ಲೆಂ ಕರ್ಮ್ ತೊ ಖಾತೊಲೊ.” ಮ್ಹಣಾಲೊ ತೊ… ಆಪ್ಣೆಂ…ಯೆದೊಳ್‌ಚ್ಚ್ ಫೆಡ್ರಿಕಾಚೆರ್ ಫಾರಿಕ್ಪಣ್ ಆದಾರುಂಕ್ ಕೆಲ್ಲ್ಯಾ ಮಾಂಡಾವಳೆಚ್ಯಾ ಉಗ್ಡಾಸಾನ್…
ಆಪ್ಣಾಚೆಂ ಹೆಂ ಫಾರಿಕ್ಪಣ್… ಇ|ನೈಜಿಲಾಚ್ಯಾ ಎನ್ಕೌಂಟರಾ ವರ್ವಿಂ ಚುಕ್ಚೆಂ ನಾಕಾ!.’ ಮ್ಹಳ್ಳೆಂ ಮತಿಕ್ ಹಾಡುನ್ ಮ್ಹಣಾಲೊ…
“ತ್ಯಾ ಫಟಿಂಗಾಕ್ ಶಿಕ್ಶಾ ದೀಂವ್ಕ್ ವೊಚುನ್ … ತುಮ್ಚ್ಯಾ ಅಧಿಕಾರಾಕ್ ತುಮಿ ಜಾವ್ನ್ ಸಂಚಿಕಾರ್ ಹಾಡಿನಾಕಾತ್.”
ರಿಶಭಾಚಿಂ ಉತ್ರಾಂ ಆಯ್ಕೊನ್ ನೈಜಿಲ್… ಆಪ್ಣಾಚಿಂ ಡಿಟೆಕ್ಟಿವ್ ಚಿಂತ್ನಾಂ ರಿಶಭಾಚೆರ್ ಭಂವ್ಡಾವ್ನ್ ಏಕ್ ಘಡಿ ತಾಕಾ ಪಾರ್ಕಿತ್ತ್ ರಾವ್ಲೊ. ಉಪ್ರಾಂತ್ ಹಳ್ತಾರ್…
“ರಿಶಭ್ ತುಜ್ಯಾ ಮತಿಂ ಕಿತೆಂ ಕಾಂತವ್ನ್ ಆಸಾ?!.” ಸವಾಲ್ ಕರಿಲಾಗ್ಲೊ…ಬೊಲ್ಸಾಂತ್ಲಿ ಸಿಗ್ರೆಟ್ ಪ್ಯಾಕ್ ಉಗ್ತೆಂ ಕರುನ್…ರಿಶಭಾ ಥಂಯ್ ವೊಡ್ಡಾವ್ನ್. “ಕಾಂಯ್ ಫೆಡ್ರಿಕಾಚೆರ್ ಫಾರಿಕ್ಪಣ್…?!”
ಸಿಗ್ರೆಟ್ ಪಳೆಲ್ಲಿಚ್ಚ್… ನೈಜಿಲಾಚ್ಯಾ ಸವಾಲಾಕ್ ಜಾಪ್ ದಿಂವ್ಚ್ಯಾ ಬದ್ಲಾ… ಕ್ಲೋಡಿಯಾಚ್ಯಾ ಕಾರಾರ್ ಅಗಸ್ಟರಾಕ್ ಮೆಳ್ಳೆಲ್ಲ್ಯಾ ಸಿಗ್ರೆಟಿಚ್ಯಾ ಮುಳ್ಕಾಟೆಚೊ ಉಗ್ಡಾಸ್ ತಾಚ್ಯಾ ಮತಿಂ ಆಪ್ಟೊಂಕ್ ಲಾಗ್ಲೊ. ದುಸ್ರೆ ಘಡ್ಯೆ…ತಿ ಸಿಗ್ರೆಟ್ ಹಾತಿಂ ಘೆತಾಸ್ತಾನಾಂ…
ಏಕ್ ಘಡಿ…ತಾಚಿ ದೀಶ್ಟ್… ತ್ಯಾ ಸಿಗ್ರೆಟಿಕ್ ಪಾರ್ಕುಂಚ್ಯಾರ್‌ಚ್ಚ್ ಪಡ್ಲಿ.!
ಉಪ್ರಾಂತ್ ಥೊಡ್ಯಾ ಸೆಕುಂದಾಂನಿ ತಾಂಚ್ಯಾ ದೊಗಾಂಯ್ಚ್ಯಾ ತೋಂಡ್ ನಾಕಾ ಥಾವ್ನ್ ಸಿಗ್ರೆಟ್ ಧುಂವೊರ್ ಉಸ್ಳೊನ್ ಆಸ್ತಾಂ…
‘ಕ್ಲೋಡಿಯಾ…ಆನಿಂ ನೈಜಿಲ್ ಕಾಂಯ್ ಅಕ್ರಮ್ ಸಂಭಂದೆರ್ ಆಸಾತ್.?!’ ಹೆಂ ಚಿಂತಾಪ್ ತಾಕಾ ಧೊಸುಂಕ್ ಲಾಗ್ಲೆಂ. ತ್ಯಾಚ್ಚ್ ವೆಳಾ…
ನೀಜ್ ತರ್ ಫೆಡ್ರಿಕಾಚೆರ್ ಎನ್ಕೌಂಟರ್ ಕರುಂಕ್ ಖೊರ್ಜುಂಚೆ ಇ|ನೈಜಿಲಾಚೆ ಹಾತ್… ಕ್ಲೋಡಿಯಾ ಸಂಗಿಂ ತೊ ಅನೈತಿಕ್ ಸಂಭಂದೆರ್ ಆಸ್ಚ್ಯಾ ವೊಡ್ಣೆನ್ ಜಾಂವ್ಕ್ ಪುರೊ ಮ್ಹಳ್ಳೆಂ ತೆಂ…ರಿಶಭ್ ಅಂದಾಜ್ ಕರಿಲಾಗ್ಲೊ.
ಹ್ಯಾ ವೆಳಾ ತಾಣೆಂ ಆದಿಂ ಗಾರ್ಡನಾಂತ್ ಪಳೆಲ್ಲ್ಯಾ ‘ಕ್ಲೋಡಿಯಾಚೊ ಭುರ್ಗ್ಯಾ ಮೋಗ್ ಆನಿ ಇನ್ಸ್‌ಪೆಕ್ಟರ್ ನೈಜಿಲಾಚೆಂ ತೆಂ ಭುರ್ಗೆಂ…’ ಹೆಂ ಪರತ್ ತಾಕಾ ಉಗ್ಡಾಸಾಕ್ ಯೆತಾಸ್ತಾನಾ…
‘ಕ್ಲೋಡಿಯಾಚಿ ತಿ ವಿಪರೀತ್ ಭುರ್ಗ್ಯಾ ವೊಡ್ಣಿಂ…ಆನಿ ತ್ಯಾಚ್ಚ್ ಖಾತಿರ್ ಕಾಂಯ್ ನೈಜಿಲಾ ಸಂಗಿ ತೆಂ ಅಕೃಮ್ ಸಂಭಂಧ್ ದವರ್ನ್ ಆಸಾ?!’…ಮ್ಹಳ್ಳೆಂ ಮತಿಕ್ ಆಪ್ಟೊಂಕ್ ಲಾಗ್ಲೆಂ. ತವಳ್‌ಚ್ಚ್ ತಾಚ್ಯಾ ಹಾತಾಂತ್ಲಿ ಸಿಗ್ರಟ್ ಧರ್ನಿರ್ ಗಳ್ಳಿ.!. ಆನಿ ತೊ ಮ್ಹಣಾಲೊ…
“ಸರ್ ಏಕ್ ಗಜಾಲ್ ಹಾಂವ್ ತುಮ್ಕಾಂ ಸಾಂಗುಂ?!”
“ಕಸಲೆಂ ತೆಂ ?”
“ಕ್ಲೋಡಿಯಾ…ಆಪ್ಣಾಚ್ಯಾ ಉದರಿಂ ಆಪ್ಣಾಚೆಂ ಮ್ಹಳ್ಳೆಂ ಪಿಂಪ್ರೆಂ ಜಲ್ಮೊಂಕ್ ಜಾಯ್ ಮ್ಹಳ್ಳ್ಯಾ ವೊಡ್ಣ್ಯಾವರ್ವಿಂ ಚಡ್ಪಡುನ್ ಆಸಾ. ಆನಿ ಮ್ಹಾಕಾ ಭೊಗ್ತಾ ಹಿ ತಾಚಿ ವೊಡ್ಣಿಂ ತಾಕಾ ಖಂಡಿತ್ ಜಾವ್ನ್ ತಾಚ್ಯಾ ಜಿವಾಕ್ ಅಪಾಯ್ ಹಾಡ್ತಾ ಖಂಡಿತ್…ತ್ಯಾಚ್ಚ್ ವೆಳಾ…
ಆಪ್ಣಾಚೆಂ ಗರ್ಭ್ ಫಳಾಭರಿತ್ ಕರ್ಚ್ಯಾಕ್…ಕ್ಲೋಡಿಯಾ ಆಪುಣ್ ಲೈಂಗಿಕ್ ಸಂಭಂಧ್ ದವರ್ಚ್ಯಾ ಪುರುಶಾಕ್‌ಯೀ ಅಪಾಯೆಕ್ ಸಾಂಪ್ಡಾಯ್ತಾ.!.”
ಹೆಂ ಆಯ್ಕಾತಾಂ ನೈಜಿಲಾಚ್ಯಾ ಕಪಲಾರ್ ಸಟ್ಟ್ ಕರುನ್ ಮಿರಿಯೊ ಉದೆಲ್ಯೊ. ಆನಿ ಸಟ್ಟ್ ಕರುನ್…
“ರಿಶಬ್ ತುಂ ಕ್ಲೋಡಿಯಾಚಿ ಹಿ ಖಾಸ್ಗಿ ಗಜಾಲ್ ಮ್ಹಾಕಾ ಕಿತ್ಯಾ ಸಾಂಗೊನ್ ಆಸಾಯ್.?!” ಕ್ಲೋಡಿಯಾ ಸಂಗಿ ಆಪ್ಣಾಕ್ ಆಸ್ಚೊ ಅಕೃಮ್ ಸಂಭಂಧ್ ಮತಿಕ್ ಹಾಡುನ್ …ಸವಾಲ್ ಘಾಲಿಲಾಗ್ಲೊ ಇ|ನೈಜಿಲ್.
“ಹೆಂ ಫಕತ್ ಇನ್ಸ್ ಪೆಕ್ಟರ್ ಜಾಲ್ಲ್ಯಾ ತುಮಿಂ…ಹ್ಯಾವಿಶಿಂ ಕ್ಲೋಡಿಯಾಕ್ ಜಾಗೊಂವ್ಕ್ ಆನಿ ತಾಕಾ ಜಾಂವ್ಚೊ ಅಪಾಯ್ ಚುಕೊಂವ್ಕ್”. ಘಳಾಯ್ ನಾಸ್ತಾಂ ಜಾಪ್ ದಿಲಿ ರಿಶಭಾನ್ ಆಪ್ಣಾಕ್ ನೈಜಿಲಾಚೆರ್ ಆಸ್ಚೊ ದುಬಾವ್ ಮತಿಂತ್‌ಚ್ಚ್ ದಾಂಬುನ್ ಧರುನ್.
“ಅಪಾಯ್ ಕೊಣಾ ಥಾವ್ನ್…ಕ್ಲೈವ್ ಯಾ ಫೆಡ್ರಿಕಾ ಥಾವ್ನ್?!” ಯಾಂತ್ರಿಕ್ ಥರಾನ್ ಸವಾಲ್ ಉಸಳ್ಳೆಂ ಇ|ನೈಜಿಲಾ ಥಾವ್ನ್.
“ಸರ್…ಕ್ಲೋಡಿಯಾಚೊ ನೊವ್ರೊ ಕ್ಲೈವ್… ‘ಆಪ್ಲ್ಯಾ ಲೈಂಗಿಕ್ ಅಸಹಾಯೆಕ್ಪಣಾ ವರ್ವಿಂ ಚಡ್ಪಡೊನ್ ಆಸಾ. ಕ್ಲೋಡಿಯಾ ಮುಕಾರ್ ಆಪ್ಣಾಚಿ ಹಿ ಲೈಂಗಿಕ್ ಅಸ್ಕತ್ಪಣ್ ಫುಡ್ ಕರುಂಕ್ ಸಖಾನಾಸ್ತಾಂ…ಜಿವಿತಾ ನಿರಾಸ್ಪಣೆರ್ ವಳ್ವಳೊನ್ ಆಸಾ. ಆನಿ ಅಸಲ್ಯಾ ವೆಳಾ…
‘ಆಪ್ಣಾಚಿ ಪತಿಣ್ ಕ್ಲೋಡಿಯಾ ಹೆರ್ ದಾದ್ಲ್ಯಾಚ್ಯಾ ವೆಂಗೆಂತ್ ಸುಖ್ ಭೊಗುನ್ ಆಸಾ!’ ಮ್ಹಳ್ಳೆಂ ಆಪ್ಣಾಂವ್ಕ್ ಸಖಾನಾಸ್ತಾಂ…ತೊ ಕಾಳ್ಜಾ ಕುಡಿ ಮತಿಂತ್ ಜಳೊನ್ ಆಸಾ. ಆನಿ ಹೊ ಧೆಧಸ್ಪರಾಚೊ ಉಜೊ… ಫಲಾಣ್ಯಾ ಎಕಾ ಘಡ್ಯೆ ಅಚಾನಕ್ ಜಾವ್ನ್ ಅಸೊ ಜಳಾತ್‌ಗೀ…
ತುಜೆ ಆನಿಂ ಮ್ಹಜೆ ಥಾವ್ನ್ ಹೆಂ ಚಿಂತುಂಕ್ ಆಸಾಧ್ಯ್!.
ಆಪ್ಣಾಚೆಂ ಲೈಂಗಿಕ್ ಅಸಹಾಯೆಕ್ಪಣ್…ತಾಕಾ ಧೆಧೆಸ್ಪರ್ ಕರುನ್ ತೊ ನಿರಾಶೆಚ್ಯಾ ಮನೋ ಖಿನ್ನತೆಂತ್ ಬುಡೊನ್ ಆಸ್ತಾಂ ತ್ಯಾ ಘಡ್ಯೆ…ತೊ ಕಿತೆಂಯೀ ಕರುಂಕ್ ಪಾಟಿಂ ಸರ್ಚೊನಾಂ.
ಅಸಲ್ಯಾ ವೆಳಾ ತಾಚೆಂ ಮಾನವೀಯ್‌ಪಣ್ ಕುಡ್ಡೆಂ ಜಾವ್ನ್ ಆಸ್ತೆಲೆಂ. ಆನಿ ಅಸಲ್ಯಾವೆಳಾ ತೊ ಕಿತೆಂಯೀ ಕರುಂಕ್ ಸಕಾತ್.!”
ಹೆಂ ಆಯ್ಕಾತಾಂ ಇ|ನೈಜಿಲ್… ‘ಕೋಣ್ ಜಾಣಾಂ ತಸಲ್ಯಾ ಮನೋಭಾವಾಂತ್ ಚಡ್ಪಡೊನ್ ಆಸ್ಚೊ ಕ್ಲೈವ್…ಕಸಲಿ ತರೀ ಭಿರಾಂಕುಳ್ ಮಾಂಡಾವಳ್ ಆತಾಂ ಮಾಂಡುನ್ ಆಸಾ ಕೊಣ್ಣಾ.!’ ಚಿಂತಿಲಾಗ್ಲೊ. ತಿತ್ಲ್ಯಾರ್ ಚ್ಚ್ ಪರತ್ ರಿಶಭಾಚೊ ತಾಳೊ ಉಟ್ಲೊ…
“ಆನಿ ತೊ ಧಾರುಣ್ ಕಾಳ್ಜಾಚೊ ಘಾತ್ಕಿ ಫೆಡ್ಡ್ರಿಕ್ …ತಾಚೆಂ ಅಮಾನವೀಯ್ ಕ್ರೂರ್ ಕರ್ತುಬ್ ಕೆನ್ನಾಂ ಕಶೆಂ ಮ್ಹಣ್ ಚಿಂತುಂಕ್ ಅಸಾಧ್ಯ್.
ಆನಿ ತಾಕಾ ಏಕ್ ರುಜ್ವಾತ್ ಜಾವ್ನಾಸಾ…ಹಾಂವ್. ಆನಿ ಮ್ಹಜಿ ಹಿ ಸ್ಥಿತಿ.!”.
ಹ್ಯಾ ವೆಳಾ ರಿಶಬಾಚಿ ಹಿ ಜಾಗ್ವೊಣ್…ಇ|ನೈಜಿಲಾಕ್ ಆಪ್ಲಿ ಜಿವಿತಾ ಭದ್ರೆತಿ ಧೊಸುಂಕ್ ಲಾಗ್ಲಿ. ಅಸಲ್ಯಾ ವೆಳಾ ತಾಚ್ಯಾ ಮತಿಂ ತಾಚಿಂ ಪತಿಣ್ ಆನಿ ಭುರ್ಗಿಂ ಜಗ್ಲಾತಾನಾಂ…
ಕ್ಲೋಡಿಯಾ ಸಂಗಿ ಆಪ್ಣಾಕ್ ಆಸ್ಚೊ ಅನೈತಿಕ್ ಸಂಭಂದ್ ತಾಕಾ ಕಠಿಣ್ ಧೊಸುಂಕ್ ಲಾಗ್ಲಿ. ಖಿಣಾನ್ ತಾಚೊ ಹಾತ್…ಯಾಂತ್ರಿಕ್ ಥರಾನ್ ತಾಚ್ಯಾ ಪೊಲಿಸ್ ರಿವಾಲ್ವರಾಚೆರ್ ಬಸ್ಲೊ!… ಆನಿ ಹ್ಯಾಚ್ಚ್ ವೆಳಾ…
ರಿಶಭಾಚೊ ಹಾತ್… ಫಾರಿಕ್ಪಣಾಚ್ಯಾ ಉಗ್ಡಾಸಾನ್…ಧರ್ನೆ ವಯ್ಲ್ಯಾ ಆಪ್ಲ್ಯಾ ಸರಳಾಚೆರ್ ಬಸ್ಲೊ!. ಆನಿ ತೊ…ಸರಳ್ ಹಾತಿಂ ಧರುನ್ ಉಬೊ ಜಾಲೊ.
ಮುಂದರ್ಸುನ್ ಆಸಾ ►
