ಝುಜಾಕ್ ಆರಂಭ್ ಆಸಾ – ಅಂತ್ಯ್  ನಾ!

ಝುಜ್ ಮ್ಹಳ್ಯಾರ್ ‘ಜಿಕ್ಲಲ್ಲೊ ಸಲ್ವತಾ ಆನಿ ಸಲ್ವಲ್ಲೊ ಮೊರ್ತಾ’ ಮ್ಹಣ್ ಅರ್ಥ್. ಮ್ಹಳ್ಯಾರ್ ಝಜಾಂತ್ ಜೀಕ್ ಮ್ಹಳ್ಳಿ ನಾ. ಝುಜಾ ವರ್ವಿಂ ಜಾಂವ್ಚೊಂ  ವಿನಾಶ್, ವಿಬಾಡ್, ಲುಕ್ಸಾಣ್ ಆನಿ ಭೊಂಗೊಸ್ತಳ್  ಮಾತ್ ಮ್ಹಳ್ಳೆಂ ಹ್ಯಾ ಆದಿಂಯ್ ಆಮಿ ಪಳಯ್ಲಾಂ.

ಪಾಟ್ಲ್ಯಾ ದೋನ್ ಹಪ್ತ್ಯಾಂ ಥಾವ್ನ್ ರಷ್ಯಾ ಆನಿ ಉಕ್ರೇನಾ ಮಧೆಂ ಝುಜ್ ಚಾಲು ಆಸಾ. ಹ್ಯಾ ದೊನೀ ರಾಷ್ಟ್ರಾಂ ಮಧೆಂ ಜಾಂವ್ಚೆಂ ಝುಜ್ ರಾವಂವ್ಕ್ ಎದೊಳ್ ದೋನ್ ಸಂಧಾನಾಂ ನಿರ್ಫಳ್ ಜಾವ್ನ್ ತಿಸ್ರೆಂ ಪ್ರೇತನ್ ಜಾಲೆಂ ತರೀ ಕಿತೆಂಚ್ ಫಾಯ್ದೊ ಜಾಂವ್ಚೆಪರಿಂ ದಿಸಾನಾ. ಸದ್ದ್ಯಾಚಿ  ಪರಿಸ್ಥಿತಿ ಪಳಯ್ತಾನಾ ಆಪ್ಲಿಂ ಶರ್ತಾಂ ಮಾಂದುನ್ ಘೆನಾಸ್ತಾನಾ ರಷ್ಯಾ ಝುಜಾ ಥಾವ್ನ್ ಪಾಟಿಂ ಸರ್ಚಿಂ ಖುಣಾಂ ದಿಸಾನಾಂತ್. ಪಾಟ್ಲ್ಯಾ ದೋನ್ ಹಪ್ತ್ಯಾನಿಂ ಉಕ್ರೇನಾಚಿ ದೆಸ್ವಾಟ್ ಜಾಂವ್ಚಿಂ ಆಮಿ ಪಳೆವ್ನ್ ಆಸಾಂವ್. ಬಾಂಬ್, ಕ್ಷಿಪಣಿ, ಮಿಸೈಲ್, ಬಂದೂಕ್ ವಾಪಾರ್ಲೆಲ್ಯಾ ವರ್ವಿಂ ಹಜಾರಾನಿಂ ಜೀವ್ ಬಲಿ ಜಾಲ್ಯಾತ್. ಮನಿಸ್, ಮನ್ಜಾತ್, ಸುಕ್ಣಿಂ ಆನಿ ಹರ್ ಜೀವಿ ಝುಜಾ ವರ್ವಿಂ ಮೊರ್ತೇ ಆಸಾತ್ ಆನಿ ಕಶ್ಟಾತೇ ಆಸಾತ್. ಕಟ್ಟೊಣಾಂ, ಘರಾಂ, ದಫ್ತರಾಂ, ರಸ್ತೆ, ಸಾಂಕೆ ಅನಿ ಹೆರ್ ಮುಳಾವ್ಯಾ ಸವ್ಲತಾಯೊ ದೆಸ್ವಾಟ್ ಜಾಲ್ಯಾತ್. ಸಾಂಗಾತಾಚ್ಚ್  ಪರಿಸರಾಚೆರ್ ಪ್ರತಿಕೂಲ್ ಪರಿಣಾಮ್ ಜಾತೇ ಆಸಾ ಆನಿ ಲಾಂಬ್ ಆವ್ಧೆ ಪರ್ಯಾಂತ್ ಮನ್ಶಾಕುಳಾಕ್ ತಶೆಂಚ್ ಹೆರ್ ಜೀವಿಂಕ್ ಮಾರೆಕಾರ್ ಪರಿಸ್ಥಿತಿ ಫುಡ್ ಕರಿಜಾಯ್ ಪಡ್ತೆಲಿ. ಝುಜಾಂತ್ ಮರಣ್ ಪಾವ್ಲಲೆ ಆನಿ ಘಾಯೆಲ್ಲೆ ಸೊಜೆರ್ ಆನಿ ಸಾದೆ ನಾಗರಿಕ್, ನಿರಾಶ್ರಿತ್ ಜಾಲ್ಲೊ ಲೋಕ್ ಆನಿ ತಾಂಚಿ ಪರಿಸ್ಥಿತಿ ಪಯ್ಸ್ ಥಾವ್ನ್ ಪಳೆತೆಲ್ಯಾ ಆಮ್ಚೆಂ ಥಂಯ್ ಭಿರಾಂತ್ ಉಬ್ಜಯ್ತಾ ತರ್ ಥಂಯ್ಸರ್ ಝುಜಾ ಶೆರಾಂತ್ ಆಸ್ಲೆಲ್ಯಾ ಲೊಕಾಚಿ ಪರಿಗತ್ ಕಿತೆಂ ತೆಂ ಆಮಿಂ ಸಮ್ಜೊನ್ ಘೆವ್ಯೆತ್.

ರಷ್ಯಾಚೊ ಅಧ್ಯಕ್ಷ್ಯ್ ವೊಲಿಡಿಮಿರ್ ಪುಟಿನ್ ಅನಿ ಉಕ್ರೇನಾಚೊ ಅಧ್ಯಕ್ಷ್ ವೊಲಿಡಿಮಿರ್ ಜೆಲೆನ್ಸ್ಕಿ ಆತಾಂ ರಷ್ಯಾ – ಉಕ್ರೇನ್ ಝುಜಾಚೆ ಪ್ರಮುಖ್ ಸೂತ್ರ್‌ದಾರ್. ಪುಟಿನ್ 20 ವರ್ಸಾ ಆದಿಂ ರಷ್ಯಾಚೊ ಅಧ್ಯಕ್ಷ್ ಜಾಂವ್ಚ್ಯಾ ಆದಿಂ ರಷ್ಯಾಚಾ ಗುಪ್ತ್ ಇಲಾಳ್ಯಾಂತ್ (ಕೆಜಿಬಿ) ಸುಮಾರ್ 16 ವರ್ಸಾಂಚೊ ಅನ್ಭೊಗ್ ಜೊಡುನ್ ರಾಜಕೀಯಾಕ್ ಆಯಿಲ್ಲೊ.  ಜೆಲೆನ್ಸ್ಕಿ 2019ವ್ಯಾ ಇಸ್ವೆಂತ್ ಉಕ್ರೇನಾಚೊ ಅಧ್ಯಕ್ಷ್ ಜಾವ್ನ್ ಚುನಾಯಿತ್ ಜಾಲ್ಲೊ ರಾಜಕೀಯಾಂತ್ ಅನ್ಭೊಗ್ ನಾತ್‌ಲ್ಲೊ ಯುವ ಫುಡಾರಿ. ರಾಜಕೀಯಾಂತ್ ತಾಚೊ ಪ್ರವೇಶ್ ಜಾಂವ್ಚ್ಯಾ ಫುಡೆಂ ತೊ ಏಕ್ ಕೊಮೆಡಿಯನ್ ಜಾವ್ನ್ ಲೊಕಾಮೊಗಾಳ್ ಜಾಲ್ಲೊ. ರಾಜಕೀಯಾಂತ್ ಅನ್ಭೊಗ್ ನಾತ್ಲೆಲ್ಯಾ ಜೆಲೆನ್ಸ್ಕಿಕ್ ಅಮೆರಿಕಾಚೊ ಆದ್ಲೊ ಅಧ್ಯಕ್ಷ್ ಟ್ರಂಪಾಕ್ ತುಲನ್ ಕೆಲ್ಲೆಂ ತೆಂ ಸತ್ ಬೋವ್ಶಾ ಸಬಾರಾಂಕ್ ಕಳಿತ್ ನಾ.

ಪುಟಿನ್ ಆನಿ ಜೆಲೆನ್ಸ್ಕಿ ದೊಗೀ ಆದ್ಲ್ಯಾ ಸೋವಿಯತ್ ಎಕ್ವಟಾಂತ್ ಜಲ್ಲ್ಮಾಲ್ಲೆ. ದೊಗಾಂಯ್ಚೆಂ ಪಯ್ಲೆಂ ನಾಂವ್ ವೊಲಿಡಿಮಿರ್. ವೊಲಿಡಿಮಿರ್ ಮಳ್ಯಾರ್ ಫಾಮಾದ್ ವ ಸಗ್ಳ್ಯಾ ಸಂಸಾರಾಚೊ ಮುಖೆಲಿ ಮ್ಹಣ್ ಅರ್ಥ್. ಪೂಣ್ ನಾಂವಾ ತೆಕಿದ್ ಮನಿಸ್ ಆಸಾನಾ ತೆಂ ಆಮಿಂ ಪಳೆತಾಂವ್. ಹ್ಯಾ ದೋನ್ ಮುಖೆಲ್ಯಾಂ ಮದ್ಲೆಂ ವಯಕ್ತಿಕ್ ತಶೆಂ ರಾಜಕೀಯ್ ಝಗ್ಡೆಂ ಆನಿ ಹಾಚೊ ಫಾಯ್ದೊ ಜೊಡುಂಕ್ ರಾಕೊನ್ ಆಸ್‌ಲ್ಲ್ಯಾ ಅಮೆರಿಕಾ ಆನಿ ನ್ಯಾಟೊ ರಾಷ್ಟ್ರಾಂಚೆ ಎಕ್ವಟಾಚೆ ಚಿಡಾವ್ನ್ ರಷ್ಯಾ – ಉಕ್ರೇನ್ ಝುಜಾಕ್ ಪ್ರಮುಖ್ ಕಾರಣ್. ನ್ಯಾಟೊ ರಾಷ್ಟ್ರಾಂಚೊ ವಿಸ್ತರಣ್‌ವಾದ್, ರಷ್ಯಾಚೊ ಸೆಜಾರಿ ರಾಷ್ಟ್ರ್ ಉಕ್ರೇನಾಕ್ ನ್ಯಾಟೊ ರಾಷ್ಟ್ರಾಂಚಾ ಪಂಗ್ಡಾಂತ್ ಮೆಳಂವ್ಕ್ ಕರ್ಚೆಂ ಪ್ರೇತನ್ ಆನಿ ತ್ಯಾ ಮಾರಿಫಾತ್ ರಷ್ಯಾಕ್ ಮುಲ್ಯಾಕ್ ದವರುಂಕ್ ನ್ಯಾಟೊ ಎಕ್ವಟ್ ರಾಷ್ಟ್ರಾಂಚಿ ಹಿಕ್ಮತೆಚಿ ಪ್ರತಿಫಳ್‌‌ಚ್ ಹೆಂ ಝುಜ್. ಉಕ್ರೇನಾಕ್ ಆಪ್ಲ್ಯಾ ಉದ್ದೇಶಾಕ್ ಗಳ್ಸುಂಕ್ ನ್ಯಾಟೊನ್ ಘಾಲ್ಲೊ ಪಾಸ್ ಆತಾಂ ಅಂರ್ದಲಾಂ.

ಉಕ್ರೇನಾನ್ ನ್ಯಾಟೊ ಸಹವಾಸ್ ಸೊಡಿಜಾಯ್ ಆನಿ ರಷ್ಯಾನ್ ಅಯ್ಲೆವಾರ್ ಆಕ್ರಮಣ್ ಕೆಲ್ಲೆ ಡೊನೆಟ್‌ಸ್ಕ್ ಆನಿ ಲುಗಾನ್ ಸ್ಕ್ ಸ್ವಾಯತ್ತ್ ಪ್ರಾಂತ್ ಮ್ಹಣ್ ಉಕ್ರೇನಾನ್ ಮಾಂದಿಜಾಯ್ ಮ್ಹಣ್ ರಷ್ಯಾಚೆಂ ಶರ್ತ್. ರಷ್ಯಾಚಾ ಹೆಂ ಶರ್ತ್ ಆಪ್ಲ್ಯಾ ಸುರಕ್ಷೆ ಆನಿ ಆಂತರಿಕ್ ಭದ್ರತೆ ಬಾಬ್ತಿನ್ ವಾಜ್ಬಿ ಮಣ್ಯೆತ್. ಕಿತ್ಯಾಕ್ ಕೊಣಾಯ್ಕೀ ಆಪ್ಲ್ಯಾ ಮಾತ್ಯಾ ವಯ್ರ್ ಕೆದ್ನಾಂಯೀ ತಲ್ವಾರ್ ಉಮ್ಕಾಳೊನ್ ಆಸ್ಚೆಂ ಪಸಂದ್ ನಾ. ನ್ಯಾಟೊ ಎಕ್ವಟ್ ಉಕ್ರೇನಾ ಮುಕಾಂತ್ರ್ ಆಪ್ಲ್ಯಾ ರಾಷ್ಟ್ರಾಕ್ ಭೆಷ್ಟಾಂವ್ಚೆಂ ಕಾಮ್ ಕರ್ತಾ ಆನಿ ರಷ್ಯಾಚಾ ಹಿತಾಸಕ್ತೆಕ್ ಅಡ್ಕಳ್ ಜಾತಾ ದೆಕುನ್ ಆಪ್ಲ್ಯಾ ರಾಷ್ಟ್ರಾಚಿ ಸುರಕ್ಷಾ ಕರ್ಚೆಂ ಆಪ್ಲೆಂ ಕರ್ತವ್ಯ್ ಮ್ಹಣ್ಚೊ ಪುಟಿನಾಚೊ ವಾದ್. ಹೊ ವಾದ್ ಫಕತ್ ಪುಟಿನಾನ್ ಮಾತ್ ದವರ್ಲಲೊ ನಂಯ್. ತಾಚ್ಯಾ ಆದಿಂ ಅಧ್ಯಕ್ಷ್ ಆಸ್ಲೆಲ್ಯಾ ಬೋರಿಸ್ ಯೆಲ್‌ಸ್ಟಿನ್ ತಾಚ್ಯಾ ಕಾಳಾರೀ ಜೋರ್ಜಿಯಾ ಆನಿ ಉಕ್ರೇನ್ ನ್ಯಾಟೋ ಎಕ್ವಟಾಂತ್ ಮೆಳೊಂಕ್  ನಜೊ ಮ್ಹಣ್ ಶರ್ತ್ ಘಾಲ್ಲ್ಯಾಕ್ ಇತಿಹಾಸ್ ಸಾಕ್ಸ್ ಆಸಾ.

ನ್ಯಾಟೊ ಮಾತ್ರ್ ನಹಿಂ ಹೆರ್ ಖಂಯ್ಚ್ಯಾಯ್ ಅಂತಾರಷ್ಟ್ರೀಯ್ ಸಂಘಟನಾಕ್ ಉಕ್ರೇನಾನ್ ಆನಿ ರಷ್ಯಾಚೊ ಅನ್ಯೇಕ್ ಸೆಜಾರಿ ದೇಶ್ ಜಾವ್ನಾಸ್ಚ್ಯಾ ಜೋರ್ಜಿಯಾಕ್ ಭರ್ತಿ ಜಾಂವ್ಕ್  ನಜೊ ಮ್ಹಣ್ ರಷ್ಯಾ ಸಾಂಗೊನ್‌ಚ್  ಆಸ್‌ಲ್ಲೆಂ ತರೀ ಕೊಣೆಂಯೀ ತಾಕಾ ಚಡ್ ಗುಮಾನ್ ದೀಂವ್ಕ್ ನಾ. ಪಾಶ್ಚಾತ್ಯ್ ರಾಷ್ಟ್ರಾಂಚೊ ಪಾಟಿಂಬೊ ಉಕ್ರೇನಾಕ್ ಆನೀ ಜೋರ್ಜಿಯಾಕ್ ಮೆಳೊನ್ ತಾಂಚೆ ವಿಸ್ತರಣ್ ರಷ್ಯಾಚಾ ಗಡಿಕ್ ಆಯ್ಲ್ಯಾರ್ ರಷ್ಯಾಚಾ ಅಸ್ತಿತ್ವಾಕ್ ತೊಂದ್ರೆ ಆಸಾತ್ ಮ್ಹಣ್ ಪುಟಿನಾನ್ ವಾದ್ ಕೆಲ್ಲ್ಯಾಂತ್ ಚೂಕ್ ನಾ ಮ್ಹಣ್ಯೆತ್. ಹ್ಯಾ ಪಾಟಿಥಳಾರ್ ರಷ್ಯಾ-ಯುಕ್ರೇನ್ ಝುಜಾಕ್ ಪುಟಿನ್,  ಜೆಲೆನ್ಸ್ಕಿ ಆನಿ ಆಮೇರಿಕಾ ಆನಿ ನ್ಯಾಟೊ ಎಕ್ವಟ್ – ಹೆ ಸರ್ವ್ ಕಾರಣ್ ಜಾವ್ನಾಸಾತ್. 2014 ಇಸ್ವೆಂತ್ ಕ್ರಿಮಿಯಾಚೆರ್ ಆಕ್ರಮಣ್ ಕರುನ್ ಆಪ್ಲೆಂ ಕರುನ್ ಘೆತಾನಾ ಅಮೇರಿಕಾ ಆನಿ ಮಿತ್ರ್ ರಾಷ್ಟ್ರಾಂನಿ ಜಾಗೆ ಜಾವ್ನ್ ಪುಟಿನಾನ್ ಉಟಯ್ಲೆಲ್ಯಾ ವಿಶಯಾಚೆರ್  ಚರ್ಚಾ ಕರುನ್ ಪರಿಹಾರ್ ಸೊಧಿಜಾಯ್ ಆಸ್‌ಲ್ಲೊ. ಪೂಣ್ ತಶೆಂ ಜಾಂವ್ಕ್ ನಾ. ಬಗಾರ್ ಸಮಸ್ಸೊ ಚಡ್  ವಾಡೊಂಕ್ ಸೊಡ್ಲೊ.

ಪುಟಿನಾನ್ ಆಪ್ಲ್ಯಾ ದೇಶಾಚಾ ಭದ್ರತೆಕ್ ಆಪಾಯ್ ಆಸಾ ಮ್ಹಳ್ಳೊ ವಾದ್ ಸಬಾರ್ ಮಾಂದುನ್ ಘೆನಾಂತ್.  ಕಿತ್ಯಾಕ್ ರಷ್ಯಾ ಉಕ್ರೇನಾಕ್ ತುಲನ್ ಕರುನ್ ಪಳೆತಾನಾ ಭಾರೀ ವ್ಹಡ್ ಆನಿ ಪರಮಾಣು ಸಕತ್ ಆಸ್ಚೊ ಬಳ್ವಂತ್ ರಾಷ್ಟ್ರ್. ಝುಜ್ ಪುಟಿನಾನ್ ಸುರು ಕೆಲ್ಲೆಂ ದೆಕುನ್ ತೊಚ್ ‘ವಿಲನ್’ ಮ್ಹಣ್ ಸಂಸಾರ್ ಲೆಕ್ತಾ. ಅಮೇರಿಕಾಕ್ ಆನಿ ನ್ಯಾಟೊ ರಾಷ್ಟ್ರಾಂಚಾ ಸಂಘಟಾನಾಂಕ್ ಹೆಂಚ್ ಜಾಯ್. ದೆಕುನ್ಂಚ್ ಝುಜ್ ಪ್ರಾರಂಭ್ ಜಾವ್ನ್ ಏಕಾಚ್ಚ್ ಹಪ್ತ್ಯಾ ಭಿತರ್ ಉಕ್ರೇನಾಚೊ ಅಧ್ಯಕ್ಷ್ಯ್  ಜೆಲೆನ್ಸ್ಕಿಕ್ ರಷ್ಯಾ ತಸಲ್ಯಾ ವ್ಹಡ್ ರಾಷ್ಟ್ರಾಕ್ ಭಿಯೆನಾಸ್ತಾನಾ ಝುಜ್‌ಲ್ಲೊ ‘ಹೀರೊ’ ಕರ್ಚಾಂತ್ ಜೀಕ್ ಲಾಬ್ಲ್ಯಾ.  ಹೆರ್ ರಾಷ್ಟ್ರಾಂಕ್ ಪ್ರತ್ಯೇಕ್ ಜಾವ್ನ್ ಪಾಶ್ಚ್ಯಾತ್ಯ್ ರಾಷ್ಟ್ರಾಂಚಿಂ ಮಾಧ್ಯಮಾಂ ವಾಚುನ್ ಆನಿ ಪಳೆವ್ನ್ ಆಸ್ಚ್ಯಾ ಥೊಡ್ಯಾಂಕ್ ಜೆಲೆನ್ಸ್ಕಿ ಹಿರೋ ದಿಸೊಂಕ್ ಪುರೊ. ಕಿತ್ಯಾಕ್ ಜೆಲೆನ್ಸ್ಕಿ ಹಿರೋ ಜಾಂವ್ಚ್ಯಾಕ್ ಪಾಶ್ಚ್ಯಾತ್ಯ್ ದೇಶಾಚಾ ಪಕ್ಷಪಾತ್ ಮಾಧ್ಯಮಾಂಚೊ ಪಾತ್ರ್ ಪ್ರಮುಖ್ ಆಸಾ ತೆಂ ಆಮಿ ಪಳೆತಾಂವ್. ಉಕ್ರೇನಾನ್ ರಷ್ಯಾಕ್ ಫಾವೊ ತಿ ಜಾಪ್ ದಿಲ್ಯಾ ಮಣ್ ಜೆಲೆನ್ಸ್ಕಿಕ್ ಮುಕಾರ್ ದವರ್ನ್ ಅಮೇರಿಕಾ ಆನಿ ನ್ಯಾಟೊ ರಷ್ಯಾಕ್ ಅನಿಕೀ ಚಾಳ್ವವ್ಚೆಂ ಪ್ರೇತನ್ ಕರುನ್ ಆಸಾತ್. ಅಖ್ಖೊ ಸಂಸಾರ್ ಉಕ್ರೇನಾಕ್ ಆನಿ ಜೆಲೆನ್ಸಕ್ಕಿಕ್ ಪಾಟಿಂಬೊ ದೀವ್ನ್ ಆಸಾ ಮ್ಹಳ್ಳೆಂ ಚಿತ್ರಣ್ ದಿಂವ್ಚೆಂ ಪ್ರೇತನ್ ಪಾಶ್ಚಾತ್ಯ್ ಮಾದ್ಯಮಾಂ ಕರುನ್ ಆಸಾತ್. ಹ್ಯಾ ಪಕ್ಷಪಾತಿ ಮಾದ್ಯಮಾಂ ವರ್ವಿಂ ರಷ್ಯಾ – ಉಕ್ರೇನ್ ಝುಜಾಚಿ ಖರಿ ಹಕೀಗತ್ ಕಿತೆಂ ತೆಂ ಸಮ್ಜವ್ಚೆಂ ಕಷ್ಟ್!

ರಷ್ಯಾ – ಉಕ್ರೇನ್ ಝುಜಾಕ್ ಖಂಯ್ಚೇಂಯ್ ಏಕ್ ಕಾರಣ್ ಮಣ್ಚಾಂಕೀ ಸಬಾರ್ ಕಾರಣಾಂ ಆಸಾತ್,  ತೆಂ ಸವ್ಕಾಸ್ ತರೀ ಆಮ್ಕಾಂ ದಿಸೊನ್ ಯೆತೇ ಆಸಾ. ಥೊಡಿಂ ಕಾರಣಾಂ ಸಾಮಾನ್ಯ್ ಲೊಕಾಚಾ ನದ್ರೆಕ್ ದಿಸೊಂಕ್ ಪುರೊ ವ ಥೊಡಿಂ ಅಮ್ಚ್ಯಾಂ ಸಮ್ಜೊಣೆಚ್ಯಾ ಭಾಯ್ರ್ ಆಸೊಂಕ್ ಪುರೊ. ರಷ್ಯಾ-ಉಕ್ರೇನ್ ಝುಜಾ ಪಾಟ್ಲ್ಯಾನ್ ಆಸ್ಚಿಂ ಕಾರಣಾಂಆನಿ ಕೋಣ್ ಚುಕಿದಾರ್, ಕೋಣ್ ಅನ್ಯಾಯಾಕ್ ಒಳಗ್ ಜಾಲಾ,  ಕೊಣೆಂ ಝುಜಾಕ್ ಪ್ರತ್ಯಕ್ಷ್ ವ ಪರೋಕ್ಷ್ ರಿತಿನ್ ಉತ್ತೇಜನ್ ದಿಲಾಂ –  ಹೆಂ ಸಮ್ಜೊನ್ ಘೆಂವ್ಚಿ ಗರ್ಜ್ ಆಸಾ. ಪೂಣ್ ಸಾಂಗಾತಾಚ್ಚ್ ಹೆಂ ಝುಜ್ ಆಡಾವ್ಯೆತೆಂಗೀ,  ಮ್ಹಳ್ಳ್ಯಾ  ಸವಾಲಾಕ್  ಜಾಪಿ ಸೊಧ್ಚೆಂಯ್ ತಿತ್ಲೆಂಚ್ ಗರ್ಜೆಚೆಂ.

ಹ್ಯಾ  ದೋನ್ ರಾಷ್ಟ್ರಾಂ ಮಧೆಂ ಜಾಂವ್ಚೆಂ ಝುಜ್ ತಿಸ್ರ್ಯಾ ಮಹಾಝುಜಾಕ್ ಕಾರಣ್ ಜಾಯ್ತ್‌ಗಿ ಮಳ್ಳಿ ಭಿರಾಂತ್ ಅತಾಂ ಸಗ್ಳ್ಯಾ ಸಂಸಾರಾಕ್ ಧೊಸ್ತಾ. ಏಕಾದಾವೆಳಾ ತಶೆಂ ಜಾಯ್ತ್ ತರ್ ತಾಚಿ ಪರಿಗತ್ ಕಿತೆಂ ಜಾಯ್ತ್ ತಾಚೊ ಅಂದಾಜ್ ಸಬಾರಾಂಕ್ ಆಮ್ಕಾಂ ಕಳಿತ್ ಆಸಾ. ದೆಕುನ್,  ತಶೆಂ ಜಾಂವ್ಕ್ ನಜೊ, ಹೆಂ ಝುಜ್ ವೆಗಿಂಚ್ ಅಖೇರ್ ಜಾಯ್ಜಯ್ ಮಣ್ಚೆಂ ಪ್ರೇತನ್ ಚಾಲು ಆಸಾ. ಆಧುನಿಕ್ ಕಾಳಾರ್ ದೋನ್ ಹಪ್ತೊ ಏಕ್ ಝುಜ್ ಜಾಲೆಂ ತರ್ ತ್ಯಾ ವರ್ವಿಂ ವ್ಹಾಳ್ಚೆಂ ರಗತ್, ನಿರ್ಗತಿಕ್ ಜಾಂವ್ಚೊ ಲೋಕ್, ಜಾಂವ್ಚಿಂ ದೆಸ್ವಾಟ್, ಮನ್ಶ್ಯಾ ಆನಿ ಪರಿಸರಾಂತ್ಲ್ಯಾ ಹೆರ್ ಜೀವಿಂಚೆರ್ ಜಾಂವ್ಚೊ ಅತ್ಯಾಚಾರ್ ಪಳೆತಾನಾ ಆಮ್ಚ್ಯಾ ದುಸ್ಮಾನಾಕೀ ಅಸಲೆಂ ಖರ್ಗ್ ಯೇಂವ್ಕ್  ನಜೊ ಮ್ಹಳ್ಳೆಂ ಚಿಂತಾಪ್ ಯೆಂವ್ಚೆಂ ಸಹಜ್.

ಉಕ್ರೇನಾಚೊ ಅಧ್ಯಕ್ಷ್ ಜೆಲೆನ್ಸ್ಕಿ ಅಮೇರಿಕಾ ಆನಿ ಯುರೋಪಾಚೆ ನ್ಯಾಟೊ ರಾಷ್ಟ್ರ್ ಹ್ಯಾ ಝುಜಾಂತ್ ಆಪ್ಣಾಂಕ್ ಕುಮಕ್ ಕರ್ತಿತ್ ಮ್ಹಳ್ಳ್ಯಾ ಇರಾದ್ಯಾನ್ ರಷ್ಯಾಲಾಗಿಂ ಸಂಧಾನ್ ಕರ್ಚ್ಯಾ ಬದ್ಲಾಕ್ ಝುಜಾಕ್ ತಯಾರ್ ಜಾಲೊ. ಆತಾಂ ಚೊವ್ದಾ  ದಿಸಾಂ ಉಪ್ರಾಂತ್ ಸವ್ಕಾಸ್ ಪರಿಗತ್ ಕಿತೆಂ ತೆಂ ಸಮ್ಜೊನ್ ಘೆತ್ಲ್ಯಾ ಉಪ್ರಾಂತ್ ಹೀರೋ ಜೆಲೆನ್ಸ್ಕಿ ರಷ್ಯಾಚಿಂ ಶರ್ತಾಂ ಒಪುನ್ ಘೆಂವ್ಕ್ ತಯಾರ್ ಜಾಲಾ, ನ್ಯಾಟೊ ಎಕ್ವಟಾಕ್ ಮೆಳ್ಚೆಂ  ಪ್ರೇತನ್ ಸೊಡುಂಕ್ ಆನಿ ವಯ್ರ್ ಉಲ್ಲೇಖ್ ಕೆಲ್ಲ್ಯಾ ದೋನ್ ಪ್ರಾಂತಾಚೆ ಸ್ವಾಯತ್ತ್ ಮಾಂದುಂಕ್ ತಯಾರ್ ಮ್ಹಣ್ ರಷ್ಯಾಕ್ ಸಮಾಧಾನ್ ಕರುಂಕ್ ಜೆಲೆನ್ಸ್ಕಿ ಅತಾಂ ಮುಕಾರ್ ಆಯ್ಲಾ. ಸತ್ ಸಾಂಗ್ಚೆಂ ತರ್ ಜೆಲೆನ್ಸ್ಕಿ ಕಾಂಯ್ ಸಾಂತ್ ನಂಯ್. ರಷ್ಯಾಕ್ ತುಕ್ಲಾಂವ್ಚೆಂ  ಕಾಮ್ ತೊ ಕರುನ್‌ಚ್ ಆಯ್ಲಾ  2019 ಇಸ್ವೆಂತ್ ತೊ ಅಧ್ಯಕ್ಷ್ ಜಾವ್ನ್ ಜಿಕೊನ್ ಯೇಂವ್ಕ್ ಅಮೇರಿಕಾಚೊ ಪಾಟಿಂಬೊ ಆಸ್‌ಲ್ಲೊ ಮ್ಹಣ್ತಾತ್.  ಅಧ್ಯಕ್ಷ್ ಜಾವ್ನ್ ಚುನಾಯಿತ್ ಜಾಲ್ಯಾ ಉಪ್ರಾಂತ್ ರಷ್ಯಾ ಆನಿ ಪುಟಿನಾಲಾಗಿ ಬರೊ ಸಂಬಂಧ್ ಆಸ್ಲೆಲ್ಯಾ ಆನಿ ಪುಟಿನಾಚೊ ಮಿತ್ರ್ ಆನಿ ಉಕ್ರೇನಾಂತ್ ಪುಟಿನಾಚೊ ತಾಳೊ ಮ್ಹಣ್‌ಚ್ ನಾಂವಾಡ್ಲೆಲ್ಯಾ ಜೆಲೆನ್ಸ್‌ಕಿ ವಿರೋಧ್ ಅಧ್ಯಕ್ಷ್ ಪದ್ವೆಕ್ ಎಲಿಸಾಂವ್ ಉಮೇದ್ವಾರ್ ಅಭ್ಯರ್ಥಿ ಆನಿ ರಾಜಕೀಯ್ ಫುಡಾರಿ ವಿಕ್ಟರ್ ಮೆಡ್ವೆಚುಕ್ ಹಾಂಕಾ ಘರ್ ಬಂದೆಂತ್ ಘಾಲುನ್ ರಾಜಕೀಯ್ ದ್ವೇಶ್ ಸಾಧನ್ ಕರುಂಕ್ ಪ್ರೇತನ್ ಕೆಲ್ಲೆಂ. ಆತಾಂ ಮೆಡ್ವೆಚುಕಾನ್ ಘರ್ ಬಂದೆಥಾವ್ನ್  ಚುಕಾರಿ ಮಾರ‍್ನ್ ಪೊಳಾಪೊಳ್ ಘೆತ್ಲ್ಯಾ.

ಉಕ್ರೇನ್ ವಿರೋಧ್ ರಷ್ಯಾ ಚಾಳ್ವೊಂಕ್ ಅನ್ಯೇಕ್ ಕಾರಣ್, ಅಮೇರಿಕಾನ್ ಶಸ್ತ್ರಾಸ್ತ್ರಾಂ ವಿಕುನ್ ರಷ್ಯಾ ವಿರೋಧಿ ಚಟುವಟಿಕೆಂಕ್ ಪಾಟಿಂಬೊ ದಿಂವ್ಚೊ. ಡೊನಾಲ್ಡ್ ಟ್ರಂಪ್ ಅಧ್ಯಕ್ಷ್ ಆಸ್ತಾನಾ 27 ಬಿಲಿಯನ್ ಡೊಲರಾಂಚೆಂ ಶಸ್ತ್ರಾಸ್ತ್ರ್ ವಿಕುಂಕ್ ಲೈಸನ್ಸ್ ದಿತಾನಾಂಚ್ ರಷ್ಯಾ – ಉಕ್ರೇನಾ ಮದ್ಲಿ ಉದ್ವಿಗ್ನ್ ಪರಿಸ್ಥಿತಿಚೆರ್ ನದರ್ ದವರ್ಲೆಲ್ಯಾ ಸಬಾರಾನಿಂ ಜಾಗವ್ಣೆಚಿ ಘಾಂಟ್ ಮಾರ್‌ಲ್ಲಿ. ಟ್ರಂಪ್ ಸಲ್ವಲ್ಯಾ ಉಪ್ರಾಂತ್, ಬೈಡೆನ್ ಅಧಿಕಾರಾಕ್ ಆಯ್ಲ್ಯಾ ಉಪ್ರಾಂತೀ ಅಮೆರಿಕಾನ್ ಉಕ್ರೇನಾಕ್ ದಿಂವ್ಚಿ ಮಿಲಿಟರಿ ಮಜತ್ ಮುಕಾರುನ್ ವೆಲಿ.  ಹೆಂ ಪಳಯ್ತಾನಾ, ರಷ್ಯಾ – ಉಕ್ರೇನ್ ಝುಜಾಂತ್ ಅಮೇರಿಕಾಕ್ ವ್ಹಡ್ ಲಾಭ್ ಜಾತಾ ತೆಂ ಖಂಡಿತ್. ಹಾಕಾ ಉದಾಹರಣ್ ಜಾವ್ನ್ ಪುಟಿನಾನ್ ಫೆಬ್ರವರಿಚಾ 24 ತಾರಿಕೆಕ್ ಉಕ್ರೇನಾಚೆರ್ ಆಕ್ರಮಣ್ ಕೆಲ್ಲ್ಯಾ ದೋನ್ಂಚ್ ದಿಸಾಂ ಭಿತರ್ 350 ಬಿಲಿಯನ್ ಡೋಲರ್ ಶಸ್ತ್ರಾಸ್ತ್ರ್ ಅಮೆರಿಕಾನ್ ಮಂಜೂರ್ ಕೆಲ್ಯಾತ್. ಉಕ್ರೇನ್ ಹ್ಯಾ ವರ್ವಿ ಅಮೇರಿಕಾ ಆನಿ ತಾಚ್ಯಾ ಮಿತ್ರ್ ರಾಷ್ಟ್ರಾಂಚಾ ಹಾತಾಂನಿ ಖೆಳ್ಚೆಂ ಬೊಂಬೆಂ ಜಾಲಾಂ ಮ್ಹಳ್ಯಾರ್ ಚೂಕ್ ಜಾಂವ್ಚಿ ನಾ.

ದೆಕುನ್ ಟ್ರಂಪ್ ಅಧ್ಯಕ್ಷ್ ಆಸ್ತಾನಾ ಸೆಕ್ರೆಟರಿ ಆಪ್ ಡಿಫೆನ್ಸಾಕ್ ಸಲಹಾ ದಿತಲೊ ಕೊಲೊನಲ್ ಮ್ಯಾಕ್‌ಗ್ರಿಗರ್ ಹಾಣೆಂ ಜೆಲೆನ್ಸ್ಕಿಕ್ ‘puppet’   ಮ್ಹಣ್ ಆಪಯ್ಲಾಂ. ಜೆಲೆನ್ಸ್ಕಿ ‘ಹೀರೋ’ ನಂಯ್ ‘ವಿಲನ್’ ಮಣ್ತಾ ತೊ. ತಾಣೆ ಸಾಂಗ್ಚ್ಯಾ ಪರ್ಮಾಣೆಂ ರಷ್ಯಾನ್ ಝುಜಾಚಾ ಸುರ್ವೆಚಾ ಹಪ್ತ್ಯಾಂಚ್ ವ್ಹಡ್ ಮಾಪಾರ್ ಝುಜ್ ಕರುಂಕ್ ನಾ. ಪುಟಿನಾನ್ ನಿಜಾಯ್ಕೀ ಝುಜಾಂತೀ ಭೊಳೆಂಪಣ್ ದಾಕಯ್ಲಾಂ ಮ್ಹಣ್ತಾ ತೊ. ರಷ್ಯಾಲಾಗಿಂ ಸಂದಾನ್ ಕರ್ಚಾಂತ್ ಜೆಲೆನ್ಸ್ಕಿಚೆ ಹಿರೋಹಿಸಮ್ ಆಸಾ ಮಣ್ ತೊ ಸಾಂಗ್ತಾ. ಹ್ಯಾ ಹಂತಾರ್ ತಾಣೆಂ ಸಾಂಗ್ಚೆಂ ವಾಜ್ಬಿ ಮ್ಹಣ್ ದಿಸ್ತಾ.

ಬೋವ್ಶಾ ಸಂದಾನ್ ಕರ್ಚೆಂ ಕಾಮ್ ದೋನ್ ಹಪ್ತ್ಯಾಂ ಆದಿಂ ಜೆಲೆನ್ಸ್ಕಿನ್ ಕೆಲ್ಲೆಂ ತರ್ ಝುಜ್ ಜಾಂವ್ಚೆಂ ಆನಿ ಹ್ಯಾ ವರ್ವಿಂ ಜಾಲ್ಲೊ ಕಷ್ಟ್ ನಷ್ಟ್ ಖಂಡಿತ್ ಆಡಾವ್ಯೆತೆಂ. ಸಂದಾನ್ ಕರುಂಕ್ ಬರ್ಪೂರ್ ವೇಳ್ ಆಸ್‌ಲ್ಲೊ. ಪಾಟ್ಲ್ಯಾ ಸುಮಾರ್ ದಶಕಾಂ ಥಾವ್ನ್ ಆನಿ ವಿಶೇಷ್ ಜಾವ್ನ್ ಪಾಟ್ಲ್ಯಾ ಏಕಾ ವರ್ಸಾ ಥಾವ್ನ್ ರಷ್ಯಾಚೊ ಪುಟಿನ್ ಹ್ಯಾ ವಿಷ್ಯಾಂತ್ ಅಮೇರಿಕಾಕ್ ಆನಿ ನ್ಯಾಟೊಕ್ ಚೆತಾವ್ಣಿ ದೀವ್ನ್ಂಚ್ ಆಸ್‌ಲ್ಲೊ. ಪೂಣ್ ಬೊಂಕ್ಚೊ ಪೆಟೊ ಚಾಬಾನಾ ಮಣ್ ನ್ಯಾಟೊ ಆನಿ ಆಮೇರಿಕಾನ್ ಚಿಂತ್‌ಲ್ಲೆಂ ಜಾಂವ್ಕ್ ಪುರೊ. ಆನಿ ಪುಟಿನಾಕ್ ತಾಣಿಂ ಬೊಂಕ್ಚೊಂ ಪೆಟೊ ಮ್ಹಣ್ ಚಿಂತ್‌ಲ್ಲೆಂ ಜಾಂವ್ಕ್ ಪುರೊ!

ಹ್ಯಾ ಝುಜಾ ವರ್ವಿಂ ಉಜ್ವಾಡಾಕ್ ಆಯಿಲ್ಲೊ ಅನ್ಯೇಕ್ ವಿಶಯ್ ಮ್ಹಳ್ಯಾರ್ ಪಾಶ್ಚ್ಯಾತ್ಯ್ ದೇಶಾಚೆಂ ಕಪಟ್ಪಣ್ ಆನಿ ದಗಲ್ಬಾಜಿ. ಹ್ಯಾ ಆದಿಂ ಸಿರಿಯಾ, ಯುಗೋಸ್ಲೋವಿಯಾ, ಇರಾಕ್, ಲಿಬಿಯಾ ಹ್ಯಾ ದೇಶಾಂಚೆರ್ ಆಮೆರಿಕಾ ಆನಿ ತಾಕಾ ಸಾಂಗಾತ್ ದಿಲ್ಲ್ಯಾ ಯುರೋಪ್ ರಾಷ್ಟ್ರಾಂನಿ ಝುಜ್ ಮಾಂಡ್ತಾನಾ ಥಂಯ್ ಥಾವ್ನ್ ಫೊಳಾಪಳ್ ಘೆತ್ಲೆಲ್ಯಾ ಲೊಕಾಂಕ್ ನಿರಾಶ್ರಿತ್, ಅಶಿಕ್ಪಿ, ಮೂಲಭೂತ್‌ವಾದಿ, ದುರ್ಬಳೊ ಲೋಕ್ – ಅಶೆಂ ನಾನಾಂತ್ಯಾ ನಾಂವಾಂನಿ ಆಪಯ್ತಲೆ. ಪೂಣ್ ಆತಾಂ ರಷ್ಯಾ – ಉಕ್ರೇನಾ ಝುಜಾ ವೆಳಾರ್ ಬಾರೀ ಲಿಬರಲ್ ಮ್ಹಣ್ ನಾಂವ್ ವೆಲ್ಯಾ ಥೊಡ್ಯಾ ಪತ್ರ್‌ಕರ್ತಾಂಚೊ ಆನಿ ರಾಜಕೀಯ್ ವಿಶ್ಲೇಷಣ್‌ಗಾರಾಂಚೊ ನೀಜ್ ರಂಗ್ ಭಾಯ್ರ್ ಪಡ್ಲಾ. ರಷ್ಯಾ ಉಕ್ರೇನಾಚೊ ಲೋಕ್ ಗೊರ‍್ಯಾ ಖಾತಿಚೊ, ನಿಳ್ಶ್ಯಾ ದೊಳ್ಯಾಂಚೊ, ತೊ ಲೋಕ್ ಶಿಕ್ಪಿ, ಹ್ಯಾ ಲೊಕಾಕ್ ವೃತ್ತಿಪರ್ ಶಿಕ್ಷಣ್ ಆಸಾ ಅಶೆಂ ಮಾಧ್ಯಮಾನಿಂ ತಾಣಿಂ ಸಾಂಗ್‌ಲ್ಲೆಂ ವಾಚ್ತಾನಾ ಏಷಿಯಾ ಆನಿ ಮದ್ಯ ಏಷಿಯಾಚಾ ಲೊಕಾಚೆಂ ಜನಾಂಗೀಯ್ ನಿಂದನ್ ಕರ್ತಾತ್ ಮ್ಹಳ್ಳಿ ಗಜಾಲ್ ಅಂತರ್ಜಾಳಾರ್ ಚರ್ಚೆಕ್ ಆಯ್ಲ್ಯಾ. ಮ್ಹಳ್ಯಾರ್ ಹಾಂಕಾ ಮನ್ಶ್ಯಾಪಣ್ ಪ್ರಮುಖ್ ನಂಯ್. ಇರಾಕ್, ಇರಾನ್, ಲಿಬಿಯಾ, ಹ್ಯಾ ದೇಶಾಂಚೆರ್ ಝುಜ್ ಮಾಂಡುನ್ ತಾಂಕಾ ಸಾರ್ಕ್ಯಾ ವಾಟಿಕ್ ಹಾಡ್ಚೆಂ ಆಪ್ಲೆಂ ಕಾಮ್ ಆನಿ ತ್ಯಾ ಖಾತಿರ್ ಝುಜ್ ಕರ್ಚೆಂ, ಜಿವಿಶಿಂ ಮಾರ್ಚೆಂ, ದೆಸ್ವಾಟ್ ಕರ್ಚಿ ಹೆಂ ಸರ್ವ್ ಗರ್ಜೆಚೆಂ ಮ್ಹಣ್ ವಾದ್ ಕರ್ಚಾ ಹ್ಯಾ ಲೊಕಾಚೆಂ ಕಪಟ್ಪಣ್ ಸಮ್ಜೊನ್ ಘೆಂವ್ಕ್ ಆತಾಂ ಸಾದ್ಯ್ ಜಾಲಾಂ. ಧವ್ಯಾ ಖಾತಿಚ್ಯಾ ಲೊಕಾಚಾ ಶಿರಾಂನಿ ಮಾತ್ರ್ ರಗಾತ್ ವ್ಹಾಳ್ತಾ ಮ್ಹಣ್ಚೆಂ ತಾಂಚೆ ಚಿಂತಾಪ್ ನಿಜಾಕೀ ಬೆಜಾರಾಯೆಚೆಂ.

ಝುಜ್ ತೆಂ ಝುಜ್‌ಚ್ಚ್. ಜಾಂವ್ ತೆಂ ಅಮೇರಿಕಾ ವ ರಷ್ಯಾ ವ ಹೆರ್ ಖಂಯ್ಚೇಂಯ್ ರಾಷ್ಟ್ರ್!  ಝುಜಾಚೊ ಪರಿಣಾಮ್ ಲಾಂಬ್ ಆವ್ದೆ ಪರ್ಯಾಂತ್ ಮನ್ಶಾಕುಳಾನ್ ಭೊಗುಂಕ್ ಪಡ್ತಾ. ದೆಕುನ್ಂಚ್ ಜಾಣ್ತ್ಯಾಂನಿ ಮ್ಹಳಾಂ – ಝುಜಾಕ್ ಆರಂಭ್ ಆಸಾ – ಅಂತ್ಯ್  ನಾ! ಸಂದಾನಾ ಶಿವಾಯ್ ರಷ್ಯಾ – ಉಕ್ರೇನ್ ಝುಜಾಕ್ ದುಸ್ರೆಂ shortcut ಖಂಡಿತ್ ನಾ. ಎದೊಳ್‌‌ಚ್ ನ್ಯಾಟೊ ಆನಿ ಆಮೇರಿಕಾನ್ ಉಕ್ರೇನಾಕ್ ಕುಮ್ಕೆಕ್ ಶಸ್ತ್ರಾಸ್ತ್ರ್ ಸೊಡ್ನ್ ಹೆರ್ ಕುಮಕ್ ದೀಂವ್ಕ್ ಇನ್ಕಾರ್ ಕೆಲಾ.  ಹ್ಯಾ ವರ್ವಿ ‘ಆಪ್ಲೊ ಹಾತ್ ಆಪ್ಲ್ಯಾ ಮಾತ್ಯಾರ್’ ಮ್ಹಳ್ಳ್ಯಾ ಕೊಡು ಸತಾಚೊ ಅನ್ಭೊಗ್ ಉಕ್ರೇನಾಕ್ ಜಾಲಾ ಅಸ್ತಲೊ. ಆತಾಂಯೀ ವೇಳ್ ಉತ್ರೊಂಕ್ ನಾ – ಸಂದಾನಾ ಮಾರಿಫಾತ್ ಝುಜಾಕ್ ವಿರಾಮ್ ದೀಂವ್ಕ್ ಆನಿ ಮನಿಸ್ ಜಾವ್ನ್ ಜಿಯೆಂವ್ಕ್!

► ಫ್ಲೋರಿನ್ ರೋಚ್, ಕಾರ್ವಾರ್