ಲೂಯಿಸ್ ಪಿರಾಂಡೆಲ್ಲೊ (1867-1936) ಇಟೆಲಿಚೊ ಕವಿ, ಕಾಣ್ಯೆಗಾರ್, ಕಾದಂಬರಿ ಆನಿ ನಾಟಕ್ ಬರವ್ಪಿ. ನಾಟಕಾಂ ವರ್ವಿಂ ಹೊ ಫಾಮಾದ್ ಜಾಲೊ. ಹಾಕಾ 1934 ವ್ಯಾಂತ್ ನೊಬೆಲ್ ಸಾಹಿತ್ಯ್ ಪುರಸ್ಕಾರ್ ಲಾಭ್ಲೊ. ತೀಸಾಂ ವಯ್ರ್ ಮಟ್ವ್ಯೊ ಕಾಣಿಯೊ, ಸಬಾರ್ ಕಾದಂಬರಿ ಆನಿ ಕವಿತಾ ಬರವ್ನ್ ಸಾಹಿತ್ಯಾಕ್ ತಾಣೆ ಗ್ರೇಸ್ತ್ ಕೆಲಾಂ. https://en.wikipedia.org/wiki/Luigi_Pirandello
ರೋಮಾಥಾವ್ನ್ ಎಕ್ಸ್ ಪ್ರೆಸ್ಸಾಚೆರ್ ಚಡ್ಲೆಲ್ಯಾ ಪಯ್ಣಾರಿಂಕ್ ಮಧೆಂ ಫ್ಯಾಬ್ರಿಯಾನೋಚಾ ಲ್ಹಾನ್ ನಿಲ್ಡಾಣಾಂತ್ ಸಾಕಾಳಿಂ ಮ್ಹಣಾಸರ್ ರಾಂವ್ಚೆಂ ಪಡ್ಲೆಂ. ಮುಖಾರ್ ತಾಂಚೆಂ ಪಯ್ಣ್ ಸ್ತಳೀಯ್ ಸಲ್ಮೋನಾಚೊ ಮುಖ್ಯ್ ರಸ್ತೊ ಧರ್ನ್ ಮುಂದರುಂಕ್ ಆಸ್ ಲ್ಲೆಂ.
ಪಾಂಚ್ ಜಣಾಂನಿ ಸಗ್ಳಿ ರಾತ್ ನಿದ್ಲೆಲ್ಯಾ, ಉಸ್ವಾಸ್ ಭಾಂದ್ಚಾ ಆನಿ ಧುಂವ್ರಾಚಾ ಸೆಕೆಂಡ್ ಕ್ಲಾಸ್ ಡಬ್ಬ್ಯಾಂತ್ ಫಾಂತೆಂ ಜಾತಾನಾ ಏಕ್ ಮೊಟಾಯೆಚಿ ಬಾಯ್ಲ್ ಮನಿಸ್ ವೊಜೆಂ ಉಡಯಿಲ್ಲ್ಯಾ ಭಾಷೆನ್ ಭಿತರ್ ಪಡ್ಲಿ. ತಿಚ್ಯೆ ಪಾಟ್ಲ್ಯಾನ್ ಮೊಟ್ವೊ ಕೂಡಿಚೊ ತಿಚೊ ಘೊವ್ ಉಸ್ಮಡ್ಚೆ ಬರಿ ಉಸ್ವಾಸ್ ಕಾಡೀತ್ತ್ ಭಿತರ್ ರಿಗ್ಲೊ. ಭಾರೀಕ್ ಅಸ್ಚೊ ತೊ ಅಸ್ಕತ್ ದಿಸ್ಲೊ. ತಾಚೆಂ ತೋಂಡ್ ಮೊರ್ಚಾ ಮನ್ಶ್ಯಾ ಬರಿ ಧವೆಂ ದಿಸ್ತಾಲೆಂ. ದೊಳೆ ಲ್ಹಾನ್ ಆಸ್ಲ್ಯಾರೀ ಪರ್ಜಳ್ತಾಲೆ.
ಅಖ್ರೇಕ್ ಏಕಾ ಬಸ್ಕೆಚೆರ್ ಬಸ್ತಚ್ ತಾಣೆಂ ಅಪ್ಲ್ಯಾ ಬಾಯ್ಲೆಕ್ ಕುಮಕ್ ಕರುನ್ ಬಸೊಂಕ್ ಜಾಗೊ ದಿಲ್ಲ್ಯಾ ಖಾತಿರ್ ಥಂಯ್ಸರ್ ಅಸ್ಚಾ ಪಯ್ಣಾರಿಂಕ್ ದೇವ್ ಬರೆಂ ಕರುಂ ಮ್ಹಣಾಲೊ. ಉಪ್ರಾಂತ್ ಆಪ್ಲ್ಯಾ ಕೊಟಾಚೊ ಕೊಲ್ಲರ್ ಸಕ್ಲಾ ವೊಡ್ಚೆಂ ಪ್ರಯತನ್ ಕರ್ಚ್ಯೆ ಬಾಯ್ಲೆಕ್ ಪಳೆವ್ನ್ ತಾಣೆಂ ಮೊವಾಳಾಯೆನ್ ವಿಚಾರ್ಲೆಂ;
“ತೂಂ ಬರೆಂ ಆಸಾಯ್ಮೂ ಮೋಗಾ?”
ಬಾಯ್ಲೆನ್ ಜಾಪ್ ದಿಂವ್ಚಾ ಬದ್ಲಾಕ್ ತೋಂಡ್ ಧಾಂಪ್ಚಾಕ್ ಮ್ಹಳ್ಳೆ ಬರಿ ಪರ್ತುನ್ ಕೊಲ್ಲರ್ ಆಪ್ಲ್ಯಾ ದೊಳ್ಯಾಂಚೆರ್ ವೊಡ್ಲೊ.
“ದರಿದ್ರ್ ಸಂಸಾರ್” ಬೆಜಾರಾಯೆಚೊ ಹಾಸೊ ದೀವ್ನ್ ತೊ ಘುಣ್ಗುಣ್ಲೊ.
ಆಪ್ಲ್ಯಾ ಬಾಯ್ಲೆಚೆಂ ಹೆಂ ವರ್ತನ್ , ತಿಚಿ ಹಿ ಪರಿಸ್ಥಿತಿ ಅಶಿ ಕಿತ್ಯಾಕ್ ಮ್ಹಣ್ ಹೆರ್ ಪಯ್ಣಾರ‍್ಯಾಂಕ್ ವಿವರ್ಸುನ್ ಸಾಂಗಿಜಾಯ್ ಮ್ಹಣ್ ತಾಕಾ ಭಗ್ಲೆಂ. ವೀಸ್ ವರ್ಸಾಚೊ ಎಕ್ಲೊಚ್ ಪೂತ್ ಝುಜಾಕ್ ಗೆಲ್ಲ್ಯಾನ್ ತಿಕಾ ಸಕ್ಡಾಂಚಿಂ ಭಿರ್ಮತ್ ಗರ್ಜೆಚಿ ಮ್ಹಣಾಲೊ. ಘೊವ್, ಬಾಯ್ಲೆ ದೊಗಾಂಯ್ನೀ ಆಪ್ಲ್ಯಾ ಪುತಾ ಖಾತಿರ್ ಸಗ್ಳಿ ಜಿಣಿ ಝರಯಿಲ್ಲಿ. ರೋಮಾಕ್ ಶಿಕೊಂಕ್ ವೆಚ್ಯೆ ತಾಚ್ಯೆ ಖಾತಿರ್ ಸಲ್ಮೋನಾಚೆಂ ಘರ್ ಸಯ್ತ್ ವಿಕಿಜಾಯ್ ಪಡ್‌ಲ್ಲೆಂ. ಶಿಕೊಂಕ್ ಗೆಲ್ಲೊ ತೊ ಸ್ವ ಖುಶೇನ್ ಝುಜಾಂತ್ ಭರ್ತಿ ಜಾಲೊ. ಪಯ್ಲೆ ಸ ಮಹಿನೆ ತಾಕಾ ಮುಖ್ಲ್ಯಾ ಪಂಗ್ತಿಚೆರ್ ಝುಜೊಂಕ್ ನಾ ಮ್ಹಣ್ ಭಾಸವ್ಣಿ ದಿಲ್ಲಿ ತರೀ ಅಖ್ರೇಚ್ಯೆ ಘಡ್ಯೆ ಹೆಂ ಬದ್ಲಾಲೆಂ. ದೆಖುನ್ ಆಪುಣ್ ಆನಿ ತೀನ್ ದಿಸಾಂನಿ ಝುಜಾಕ್ ವೆಚಾರ್ ಆಸಾಂ , ಯೇವ್ನ್ ಮೆಳಾ ಮ್ಹಣ್ ತಾಣೆಂ ತಾಂಕಾಂ ಟೆಲಿಗ್ರಾಂ ಧಾಡ್‌ಲ್ಲೆಂ.
ಬಾಯ್ಲ್ ವ್ಹಡ್ಲ್ಯಾ ಕೊಟಾ ಭಿತರ್ ಹುಳ್ವುಳ್ತಾಲಿ ಆನಿ ಮಧೆಂ ಮಧೆಂ ವಿಕಾರ್ ಮನ್ಜಾತಿ ಬರಿ ಆವಾಜ್ ಕರ್ತಾಲಿ. ಘೊವಾಚೆಂ ವಿವರಣ್ ಆಯ್ಕಾಲ್ಯಾಂಚೆರ್ಭಿ ರ್ಮತ್ ಹಾಡಿನಾ ಮ್ಹಣ್ ತಿಕಾ ಖಂಡಿತ್ ಗೊತ್ತಾಸ್‌ಲ್ಲೆಂ. ಬಹುಶ್ಯಾ ತಾಂಚ್ಯೆ ಬರಿಚ್ ಪಯ್ಣಾರಿಂಕೀ ಕಷ್ಟ್,ಅನ್ವಾರ್ ಅಸ್ತೆಲೆ.
ಘೊವಾನ್ ಸಾಂಗ್ಚೆಂ ಚೀತ್ ದೀವ್ನ್ ಆಯ್ಕೊನ್ ಆಸ್ಲೊಲೊ ಏಕ್ಲೊ ಪಯ್ಣಾರಿ ಮ್ಹಣಾಲೊ:
“ತುಜೊ ಪೂತ್ ಮುಖ್ಲ್ಯಾ ಪಂಗ್ತಿಚೆರ್ ಝುಜೊಂಕ್ ಆತಾಂ ವೆತಾ ದೆಖುನ್ ದೆವಾಕ್ ಅರ್ಗಾಂ ದೀ. ಮ್ಹಜೊ ಪೂತ್ ಝುಜ್ ಸುರು ಜಾಲ್ಲ್ಯಾ ಪಯ್ಲೆಂಚ್ಯೆ ದಿಸಾಚ್ ಗೆಲ್ಲೊ. ಏದೊಳ್‌ಚ್ ದೋನ್ ಪಾವ್ಟಿಂ ಘಾಯೆವ್ನ್ ಪಾಟಿಂ ಆಯಿಲ್ಲೊ ಪರ್ತುನ್ ಗೆಲ್ಲ್ಯಾಕ್ ಪರ್ತುನ್ ಪಯ್ಲ್ಯಾ ಪಂಗ್ತಿಚೆರ್ ಝುಜೊಂಕ್ ಧಾಡ್ಲಾಂ”.
“ಮ್ಹಜೆ ವಿಶ್ಯಾಂತ್ ಕಿತೆಂ?” ಆನ್ಯೆಕ್ಲೊ ಪಯ್ಣಾರಿ ಉಲಯ್ಲೊ. ” ಮ್ಹಜೆ ದೋಗ್ ಪೂತ್ ಆನಿ ತೇಗ್ ಭಾಚೆ ಮುಖ್ಯಾ ಪಂಗ್ತಿಚೆರ್ ಝುಜೊನ್ ಆಸಾತ್”.
“ಜಾಂವ್ಕ್ ಪುರೊ. ಪೂಣ್, ಆಮ್ಚೊ ಏಕ್ಲೊಚ್ ಪೂತ್” ಘೊವ್ ಮ್ಹಣಾಲೊ.
“ಕಿತೆಂ ಜಾಲೆಂ? ತುಮ್ಚಾ ಚಡ್ ಕೊಂಡಾಟ್ಯಾನ್ ಪೂತ್ ಭಿಗಡ್ಚೆಂ ಸಾಧ್ಯ್ ಆಸ್‌ಲ್ಲೆಂ. ತುಮ್ಕಾಂ ಏಕಾದವೆಳಾ ದುಸ್ರಿಂ ಭುರ್ಗಿಂ ಆಸ್ಲೆಲಿಂ ತರ್ ತುಮಿ ಹಾಚೊ ತಿತ್ಲೊ ಮೋಗ್ ಕರುಂಕ್ ಜಾತೆಂ ನಾ. ಅವಯ್ ಬಾಪಾಯ್ಚೊ ಮೋಗ್ ಉಂಡ್ಯಾಚೊ ಕುಡ್ಕೆ ಕರುನ್ ಸಕ್ಕಡ್ ಭುರ್ಗ್ಯಾಂಕ್ ಏಕಾ ಸಾರ್ಕೆಂ ವಾಂಟ್ಚೆ ಬರಿ ನ್ಹಯ್. ಬಾಪುಯ್ ಆಪ್ಲೊ ಮೋಗ್ ಸಕ್ಕಡ್ ಭುರ್ಗ್ಯಾಂಕ್ ಏಕ್ ಯಾ ಧಾ ಜಾಲ್ಯಾರೀ ಕಸಲೊಚ್ ಭೇದ್ ಭಾವ್ ಕರಿನಾಸ್ತಾನಾ ದಿತಾ. ಹಾಂವ್ ಮ್ಹಜ್ಯೆ ದೊಗಾಂ ಪೂತಾಂ ಖಾತಿರ್ ಆತಾಂ ಕಷ್ಟಾತಾಂ….”
’ಸತ್….ಸತ್….” ಘೊವ್ ಕಾಲುಬುಲೊ ಜಾಲ್ಲೆ ಬರಿ ಮ್ಹಣಾಲೊ.”ಪುಣ್ (ತುಮ್ಚಾ ವಿಶ್ಯಾಂತ್ ಆಸೆಂ ನ್ಹಂಯ್ ಮ್ಹಣ್ ಚಿಂತ್ತಾಂ) ಏಕಾ ಬಾಪಾಯ್ಕ್ ದೋಗ್ ಪೂತ್ ಆಸೊನ್ ಏಕ್ಲ್ಯಾಕ್ ಹೊಗ್ಡಾಯ್ಲ್ಯಾರೀ ದುಸ್ರೊ ಭುಜವ್ಣಿ ದೀಂವ್ಕ್ ಆಸಾ ಮ್ಹಣ್ತಾನಾ….”
“ವ್ಹಯ್” ಆನ್ಯೆಕ್ಲೊ ಪಯ್ಣಾರಿ ರಾಗಾನ್ಂಚ್ ಮ್ಹಣಾಲೊ. ” ಭುಜವ್ಣಿ ದೀಂವ್ಕ್ ಎಕ್ಲೊಚ್ ಪೂತ್ ಆಸಾ ಆನಿ ತ್ಯಾ ಪೂತಾ ಖಾತಿರ್ ಬಾಪಾಯ್ನ್ ವಾಂಚೊಂಕ್ ಜಾಯ್. ಪೂಣ್, ಏಕ್ಲೊಚ್ ಪೂತ್ ಮೆಲ್ಯಾರ್ ತಾಚಾ ಬಾಪಾಯ್ನ್ ಸಯ್ತ್ ಮೊರೊನ್ ದುಖಿಕ್ ಅಂತ್ಯ್ ಘಾಲ್ಯೆತ್.ಹ್ಯಾ ದೋನ್ ಸಂಗ್ತಿ ಪೈಕಿ ಖಂಚಿ ಪಾಡ್? ತುಜ್ಯಾಕೀ ಚಡ್ ಮ್ಹಜೆಂ ಘಡಿತ್ ಪಾಡ್ ಮ್ಹಳ್ಳೆಂ ತುಕಾ ಕಳಾನಾ?”
“ನಾನ್ ಸೆನ್ಸ್” ಮೊಟೊ, ಆನಿ ತಾಂಬ್ಸೆಲೆಂ ತೋಂಡ್ ಆನಿ ದೊಳ್ಯಾಂಚೊ ಆನ್ಯೆಕ್ಲೊ ಪಯ್ಣಾರಿ ಮಧೆಂ ಉಲಯ್ಲೊ. ತೊ ಉಸ್ವಾಸ್ ಘೆಂವ್ಕ್ ಕಷ್ಟಾತಾಲೊ. ತಾಚ್ಯೆ ವ್ಹಡ್ ಸುಜ್ಲೆಲೆ ದೊಳೆ ಆಪ್ಲ್ಯಾ ಭಿತರ್ ಧಾಂಬೂನ್ ದವರ್ಲೆಲಿ ತಾಚಿ ಹಿಂಸಾ ದಾಖಯ್ತಾಲಿ ಆನಿ ತಾಚಿ ಅಸ್ಕತ್ ಕೂಡ್ ಸೊಸುಂಕ್ ಕಷ್ಟಾತಾಲಿ.
“ನಾನ್ ಸೆನ್ಸ್” ಆಪ್ಲೆಂ ತೋಂಡ್ ಆನಿ ಗೆಲ್ಲೆ ಮುಖ್ಲೆ ದೋನ್ ದಾಂತ್ ಲಿಪಯ್ತ್ ಪರ್ತುನ್ ತೊ ಮ್ಹಣಾಲೊ. “ನಾನ್ ಸೆನ್ಸ್. ಆಮಿ ಆಮ್ಚಾ ಭುರ್ಗ್ಯಾಂಕ್ ಆಮ್ಚ್ಯಾ ಸ್ವಂತ್ ಲಾಭಾ ಖಾತಿರ್ ಜೀವ್ ದಿತಾಂವ್ಗೀ?”
ಹೆರ್ ಪಯ್ಣಾರಿನಿ ಸಂಕಟ್ ಜಾಲ್ಲ್ಯಾ ಬರಿ ತಾಕಾಚ್ ಪಳೆಲೆಂ. ಆಪ್ಲೊ ಪೂತ್ ಝುಜಾಚ್ಯೆ ಪಯ್ಲೆ ದಿಸಾಚ್ ಮುಖ್ಲ್ಯಾ ಪಂಗ್ತಿಚೆರ್ ಝುಜ್ತೆಲ್ಯಾಚೊ ಬಾಪುಯ್ ಉಲಯ್ಲೊ:
“ತೂಂವೆ ಸಾಂಗ್ಚೆಂ ಸಮಾ. ಆಮ್ಚಿಂ ಭುರ್ಗಿಂ ಆಮ್ಚಿಂ ನ್ಹಯ್, ತಿಂ ದೇಶಾಚಿಂ”.
“ಹುಶ್” ಮೊಟೊ ಪಯ್ಣಾರಿ ಉದ್ಗಾರ್ಲೊ. “ಆಮಿ ಅಮ್ಚಾ ಭುರ್ಗ್ಯಾಂಕ್ ಜಲ್ಮ್ ದಿತಾನಾ ದೇಶಾ ವಿಶಿಂ ಚಿಂತ್ತಾಂವ್ಗೀ? ಆಮ್ಚ್ಯೆ ಪೂತ್ ಜಲ್ಮಾಲ್ಲೆ ಕಿತ್ಯಾಗೀ ಮ್ಹಳ್ಯಾರ್….ತಾಣಿಂ ಜಲ್ಮಾ ಜಾಯಿಚ್ಚ್ ಆನಿ ತೆ ಜಿಯೆತಾನಾ ಆಮ್ಚಿ ಜಿಣಿ ಸಯ್ತ್ ತಾಂಚ್ಯೆ ಸಾಂಗಾತಾ ಘೆತಾತ್. ಹೆಂ ಸತ್. ಆಮಿ ತಾಂಚೊ ವಾಂಟೊ, ಪೂಣ್ ತೆ ಆಮ್ಚೊ ವಾಂಟೊ ಕೆದಿಂಚ್ ನ್ಹಯ್. ಆನಿ ತಾಂಕಾಂ ವೀಸ್ ಭರ್ತಾನಾ ಆಮಿ ತ್ಯಾಚ್ಚ್ ಪ್ರಾಯೆರ್ ಆಸ್ಲೆಲೆ ಬರಿಚ್ ತೆ ಆಸ್ತಾತ್. ಆಮ್ಕಾಂ ಸಯ್ತ್ ಏಕ್ ಬಾಪುಯ್ ಆನಿ ಏಕ್ ಆವಯ್ ಆಸ್‌ಲ್ಲಿ. ಪೂಣ್ ಆಮ್ಕಾಂ ಹೆರ್ ಸಭಾರ್ ಸಂಗ್ತಿ ಆಸ್ ಲ್ಲ್ಯೊ …. ಚೆಡ್ವಾಂ, ಸಿಗ್ರೆಟ್, ನವೆ ಸಂಬಂಧ್, ಸ್ವಪ್ಣಾಂ …. ಆನಿ ದೇಶ್. ಆಮ್ಕಾಂ ವೀಸ್ ಭರ್ತಾನಾ ಆವಯ್ ಬಾಪಾಯ್ನ್ ನಾಕಾ ಮ್ಹಳ್ಯಾರೀ ದೇಶಾ ಖಾತಿರ್ ಆಮೀಂಯ್ ಝುಜಾಕ್ ವೆತೆಲ್ಯಾಂವ್ ಕೊಣ್ಣಾ. ದೇಶಾಚೆರ್ ಆಸ್ಚೊ ಆಪ್ಲೊ ಮೋಗ್ ವರ್ತೊ ವ್ಹಯ್ ತರೀ ತಾಚ್ಯಾಕೀ ವರ್ತೊ ಮೋಗ್ ಆಮ್ಚ್ಯೆ ಭುರ್ಗ್ಯಾಂಚೇರ್. ಆಮ್ಚ್ಯೆ ಪಯ್ಕಿ ಹರ್ಯೆಕ್ಲೊ ಆಪ್ಲ್ಯಾ ಪೂತಾ ಬದ್ಲಾಕ್ ಝುಜೊಂಕ್ ಮುಖ್ಲಿ ಪಂಗ್ತಿ ಘೆಂವ್ಕ್ ತಯಾರ್ ನಾಂತ್ ಗೀ?”
ಕೊಣೆಂಚ್ ಜಾಪ್ ದಿಲಿ ನಾ ಆನಿ ವ್ಹಯ್ ಮ್ಹಳ್ಳೆ ಬರಿ ತಕ್ಲಿ ಹಾಲಯ್ಲಿ.
“ತರ್ ಕಿತ್ಯಾಕ್? ” ಮೊಟೊ ಮುಖಾರ್ ಉಲಯ್ಲೊ. “ಆಮ್ಚ್ಯೆ ಭುರ್ಗ್ಯಾಂಕ್ ವೀಸ್ ಜಾತಾನಾ ತಾಂಚ್ಯೆ ಭಗ್ಣಾಂಕ್ ಆಮಿ ಲೆಖಾಕ್ ಘೆಜಾಯ್ಗೀ? ಹ್ಯಾ ಪ್ರಾಯೆರ್ ತಾಣಿಂ ದೇಶಾ ಖಾತಿರ್ ಆಪ್ಲೊ ಮೋಗ್ ದಾಖಂವ್ಚೆಂ ಸಹಜ್( ಹಾಂವ್ ಯೋಗ್ಯ್ ಪೂತಾಂ ವಿಶಿಂ ಉಲಯ್ತಾಂ) ಆನಿ ಆಮ್ಚಾ ಮೊಗಾಚ್ಯಾಕೀ ಚಡ್ತಿಕ್ ನ್ಹಂಯ್ಗೀ? ಹೆಂ ಸಹಜ್. ತಾಣಿಂ ಆಮ್ಕಾಂ ಚಲಂವ್ಕ್ ಜಾಯ್ನಾಸ್ತಾನಾ ಘರಾಚ್ ಬಸೊನ್ ಆಸ್ಚಾ ಆದ್ಲ್ಯಾ ಕಾಳಾಚಾ ಚಲ್ಯಾಂ ಬರಿ ಪಳೆಜಾಯ್? ಖಾಂವ್ಚಾ ಶಿತಾ ಬರಿ ದೇಶ್ ಸ್ವಾಭಾವಿಕ್ ಜಾವ್ನ್ ಗರ್ಜೆಚೊ ಆನಿ ಮೊರಾನಾಯೆ ಮ್ಹಣ್ ಆಮಿ ಖಾತಾಂವ್ ದೆಖುನ್ ದೇಶಾಕ್ ಸಯ್ತ್ ಕೊಣೆಂ ಪುಣೀ ರಾಕೊಂಕ್ ಜಾಯ್. ಆನಿ ವೀಸ್ ವರ್ಸಾಂಚೆ ಆಮ್ಚ್ಯೆ ಪೂತ್ ವೆತಾನಾ ತಾಂಕಾಂ ಆಮಿ ರಡೊನ್ ಧಾಡ್ಚೆಂ ನ್ಹಯ್. ಕಿತ್ಯಾಕ್ ಮ್ಹಳ್ಯಾರ್ ತೆ ಮೆಲ್ಯಾರ್ ಸಂತೊಸಾನ್ ಮೊರ್ತಾತ್.( ಹಾಂವ್ ಯೋಗ್ಯ್ ಚಲ್ಯಾಂ ವಿಶಿಂ ಉಲಯ್ತಾಂ). ಜಿಣ್ಯೆಂತ್ ಕಸಲೆಚ್ಚ್ ಕಷ್ಟ್ ನಾಸ್ತಾನಾ, ಏಕ್ಲೊ ತರ್ನಾಟೊ ಖುಶೇನ್ ಹಾಚ್ಯಾಕೀ ಚಡ್ ಕಿತೆಂ ಆಶೆತ್? ದೆಖುನ್ ಸಕ್ಡಾನಿ ಖಂತ್ ಕರಿನಾಸ್ತಾನಾ, ಹಾಸೊಂಕ್ ಜಾಯ್,ಮ್ಹಜ್ಯೆ ಬರಿ. ದೆವಾಕ್ ಆರ್ಗಾಂ. ಮೊರ್ಚಾ ಆದಿಂ ಮ್ಹಜ್ಯೆ ಪೂತಾನ್ ಏಕ್ ಖಬಾರ್ ಮ್ಹಾಕಾ ಧಾಡ್‌ಲ್ಲಿ. ಅಪುಣ್ ಖುಶೇನ್, ತೃಪ್ತೆನ್ ಮೊರ್ತಾಂ ಮ್ಹಣ್. ದೆಖುನ್ ಪಳೆಯಾ,ಹಾಂವ್ ರಡನಾ….”
ತಾಣೆಂ ಆಪ್ಲೊ ಕೋಟ್ ಪಾಪುಡ್ಲೊ. ದಾಂತ್ ನಾತ್ಲೆಲೆ ತಾಚೆಂ ತೋಂಡ್ ಹಾಲ್ಲೆಂ, ದೊಳೆ ಭಿಜ್‌ಲ್ಲೆ. ಸಕ್ಕಡ್ ಮುಗ್ದಾಲೆಂ ಮ್ಹಳ್ಳ್ಯಾ ಬರಿ ತೊ ಹಾಸ್ಲೊ.
“ಸಾರ್ಕೆಂ….ಸಾರ್ಕೆಂ….” ಸಕ್ಕಡ್ ಒಪ್ವಾಲೆ.
ಕೋಟಾ ಭಿತರ್ ಬಸೊನ್ ಆಸ್ಲೆಲ್ಯಾ ಬಾಯ್ಲೆನ್ ಸಕ್ಕಡ್ ಅಯ್ಕಾಲೆಂ. ಪಾಟ್ಲ್ಯಾ ತೀನ್ ಮಹಿನ್ಯಾ ಥಾವ್ನ್ ಘೊವಾಚೆಂ ಆನಿ ತಿಚ್ಯೆ ಇಷ್ಟಾಂಚಿಂ ಸಮಾಧಾನಚಿಂ ಉತ್ರಾಂ ಆಯ್ಕೊನ್ ಕಸೆಂ ಏಕಾ ಆವಯ್ನ್ ಆಪ್ಲ್ಯಾ ಪೂತಾಕ್ ಝುಜಾಕ್, ಬಹುಶ್ಯಾ ಮೊರೊಂಕ್‌ಚ್ ಧಾಡಿಜಾಯ್ ಮ್ಹಳ್ಳ್ಯಾ ವಿಶಿಂ ತಿ ಆತಾಂ ಚಿಂತ್ತಾಲಿ. ಆಪ್ಲಿಂ ಭಗ್ಣಾಂ ಕೊಣ್ಂಚ್ ಆರ್ಥ್ ಕರುನ್ ಘೆಂವ್ಕ್ ಸಕಾನಾಂತ್ ಮ್ಹಣ್ ಚಿಂತುನ್ ತಿಚೆಂ ಧೂಖ್ ಅನಿಕೀ ಚಡ್ಲೆಂ.
ತಿಕಾ ಪಯ್ಣಾರ‍್ಯಾಚಿಂ ಉತ್ರಾಂ ಆಯ್ಕೊನ್ ಆಜ್ಯಾಪ್ ಜಾಲೆಂ ಆನಿ ತಿ ವಿಜ್ಮಿತ್ ಪಾವ್ಲಿ. ಹೆರಾಂನಿ ನ್ಹಯ್, ಬದ್ಲಾಕ್ ಆಪ್ಣೆಂಚ್ ಆರ್ಥ್ ಕರುನ್ ಘೆವ್ನ್ ಅಸಲ್ಯಾ ಪರಿಸ್ಥಿತಿ ಥಾವ್ನ್ ಭಾಯ್ರ್ ಯೆಂವ್ಚೆಂ ಪ್ರಯತನ್ ಕರುಂಕ್ ಜಾಯ್ ಮ್ಹಣ್ ತಿಕಾ ಹ್ಯಾ ವಗ್ತಾ ಕಳ್ಳೆಂ. ಹೆರಾಂ ಆವಯಾಂನಿ ಆಪಾಪ್ಲ್ಯಾ ಪುತಾಂಕ್ ಧೈರಾನ್ ,ರಡನಾಸ್ತಾನಾ ಝುಜಾಕ್ ತಸೆಂ ಮೊರೊಂಕ್‌ಚ್ ಧಾಡ್ಲೆಲ್ಯಾ ಬರಿ ಆಪ್ಣೇಂಯ್ ಕರಿಜಾಯ್.
ತಿಣೆಂ ಅಪ್ಲಿ ತಕ್ಲಿ ಉಕಲ್ಲಿ. ಮೊಟ್ಯಾ ಮನ್ಶ್ಯಾನ್ ಸಾಂಗ್ಚೆಂ ಚೀತ್ ದೀವ್ನ್ ಆಯ್ಕೊಂಕ್ ಲಾಗ್ಲಿ. ಕಸೆಂ ಆಪ್ಲೊ ಪೂತ್ ಆಪ್ಲ್ಯಾ ರಾಯ್ ಆನಿ ದೇಶಾ ಖಾತಿರ್ ಸಂತೊಸಾನ್ ಆನಿ ಚುರ್ಚುನಾಸ್ತಾನಾ ಮೊರೊನ್ ಹಿರೋ ಜಾಲೊ ಮ್ಹಳ್ಳೆಂ ತೊ ಸಾಂಗ್ತಾಲೊ. ಆಪ್ಣೆಂ ಚಿಂತುಂಕ್ ಜಾಯ್ನಾತುಲ್ಲೆಂ ಹಾಣೆಂ ಚಿಂತುಂಕ್ ಲಾಯ್ಲೆಂ ಮ್ಹಣ್ ತಿಕಾ ಭಗ್ಲೆಂ. ಸಕ್ಕಡ್ ಆಪ್ಲ್ಯಾ ಪೂತಾಚ್ಯೆ ಮೊರ್ನಾ ವಿಶಿಂ ಧೈರಾನ್ ಉಲಂವ್ಚಾ ಮೊಟ್ಯಾ ಪಯ್ಣಾರಿಕ್ ಶಾಭಾಸ್ಕಿ ಪಾಟಾಯ್ತಾಲೆ ಆನಿ ಹೆಂ ಆಯ್ಕೊನ್ ತಿಕಾಯ್ ಸಂತೊಸ್ ಜಾಲೊ.
ಆನಿ ಏಕಾಚ್ಚಾಣೆ, ಕಿತೆಂಚ್ ಆಯ್ಕೊಂಕ್ ನಾ ಮ್ಹಳ್ಲ್ಯಾ ಬರಿ, ಕಸಲ್ಯಾಗೀ ಸ್ವಪ್ಣಾ ಥಾವ್ನ್ ಜಾಗ್ ಜಾಲ್ಲೆ ಬರಿ ತಿಣೆಂ ಮೊಟ್ಯಾ ಪಯ್ಣಾರಿಕ್ ಪಳೆವ್ನ್ ವಿಚಾರ್ಲೆಂ:
“ತರ್…..ತುಜೊ ಪೂತ್ ನಿಜಾಯ್ಕೀ ಮೆಲಾಗೀ?”
ಸಕ್ಕಡ್ ತಿಕಾಚ್ ದೊಳೆ ವಾಟಾರುನ್ ಪಳೆಲಾಗ್ಲೆ. ಮೊಟ್ಯಾ ಪಯ್ಣಾರಿನ್ ಆಪ್ಲೆ ಭಿಜ್ಲೆಲ್ಯಾ, ಸುಜ್ಲೆಲ್ಯಾ ದೊಳ್ಯಾಂನಿ ತಿಕಾಚ್ ಪಳೆಂವ್ಕ್ ಲಾಗ್ಲೊ. ತಿಚ್ಯೆ ಸವಾಲಾಕ್ ಜಾಪ್ ದೀಂವ್ಕ್ ತೊ ಒದ್ದಾಡ್ಲೊ ತರೀ ತಾಚ್ಯೆ ತೋಂಡಾ ಥಾವ್ನ್ ಉತ್ರಾಂಚ್ ಭಾಯ್ರ್ ಆಯ್ಲಿಂ ನಾಂತ್. ತೊ ತಿಕಾಚ್ಚ್ ಪಳೆಂವ್ಕ್ ಪಡ್ಲೊ. ತಿಣೆಂ ವಿಚಾರ್ಲೆಲ್ಯಾ ಮೂರ್ಖ್, ಅಸಂಬದ್ಧ್ ಸವಾಲಾಕ್ ಜಾಪ್ ಮ್ಹಳ್ಳೆ ಬರಿ ಆಪ್ಲೊ ಪೂತ್ ಸಾಸ್ಣಾಕ್ ಮೆಲಾ ಮ್ಹಣ್ ತಾಕಾ ಸಮ್ಜಾಲೆಂ. ತಾಚೆಂ ತೋಂಡ್ ಸಾವ್ಳೆವ್ನ್, ಲ್ಹಾನ್ ಜಾಲೆಂ ಆನಿ ದೂಖಿನ್ ವಿರೂಪ್ ಜಾಲೆಂ. ಬೊಲ್ಸಾ ಥಾವ್ನ್ ತಾಣೆಂ ತುವಾಲೊ ಭಾಯ್ರ್ ಕಾಡ್ಲೊ. ದುಸ್ರ್ಯಾ ಘಡ್ಯೆ ಸಕ್ಡಾಂಕ್ ಆಜ್ಯಾಪ್ ಜಾಂವ್ಚೆ ಬರಿ, ಕಾಳಿಜ್ ಕರ್ಗೊಂವ್ಚೆ ಬರಿ ಹುಸ್ಕಾರುನ್ ರಡೊಂಕ್ ಲಾಗ್ಲೊ.
ಮೂಳ್: ಲೂಯಿಸ್ ಪಿರಾಂಡೆಲ್ಲೊ – ಕೊಂಕ್ಣೆಕ್: ಉಬ್ಬ, ಮೂಡ್ ಬಿದ್ರಿ
