ಪಾಚ್ವ್ಯಾ ಗುಡ್ಯಾರ್, ವಯ್ರ್‌ ಥಾವ್ನ್ ಜುಳುಜುಳು ಕರ್ನ್ ವ್ಹಾಳೊನ್ ವೆತೇ ಆಸಾ ಉದಕ್ ಆನಿ ಥಂಡಾಯೆಚ್ಯಾ ತ್ಯಾ ಉದ್ಕಾಂತ್ ಶಾಶ್ವಿತ್ ಜಾವ್ನ್ ಆಡ್ – ತೀಡ್ ಜಾವ್ನ್ ಪಡ್ಲ್ಯಾತ್ ತೆ ಫಾತರ್… ಥೊಡೆ ಬೋವ್ ಸೊಭಾಯೆಚೆ, ಜಾಲ್ಯಾರ್ ಪಾಂಯ್ ದವರ್‍ತಾನಾ ನಿಸ್ರೊಂಚೆ… ಆಜ್ ಹಿ ಝರ್ ಬೋವ್ ಆಪುರ್ಬಾಯೆನ್, ಥಂಡಾಯೆನ್ ವ್ಹಾಳೊನ್ ಆಸಾ ಆನಿ ತಿ ಥಂಡಾಯ್ ಮ್ಹಜ್ಯಾ ಕಾಳ್ಜಾಭಿತರ್ ರೆಂವೊಡ್ ಮಾರ್‌ಲ್ಲೆಬರಿ ಜಾವ್ನ್ ಮ್ಹಜ್ಯಾ ದೊಳ್ಯಾಂನಿ ಆನಿ ನಾಕಾಂತ್ ಉದಕ್ ದೆಂವೊನ್ ಆಸಾ. ಘಾಟಾಥಾವ್ನ್ ದೆಂವೊನ್ ದರ್ಯಾಕ್ ಪಾಂವ್ಚೊಚ್ ಹ್ಯೆ ಝರಿಚೊ ಉದ್ದೇಶ್. ಮ್ಹಜೊ ದುಕಿಚೊ ಮಿಸ್ತೆರ್ ಆಯ್ಕೊಂಚಿ ಪುರ್ಸತ್ ಹ್ಯೆ ಝರಿಕ್ ನಾ ಜಾಲ್ಯಾರ್‌ಯೀ ಹಾಂವ್ ಹಾಂಗಾಸರ್ ಯೇವ್ನ್ ಬಸ್ತಾಂ.
ಕಾಳ್ಯಾ ಕಾಳ್ಯಾ ಖಡ್ಪಾಂತ್ಲ್ಯಾ ಇಡ್ಯಾಂನಿ ಭರ್‌ಲ್ಲೆಂ ಉದಕ್ ನಿಶ್ಚಲ್ ಜಾಲ್ಲೆಬರಿ ದಿಸಾನಾ. ಲ್ಹಾರಾಂಚೆಂ ವಾದಾಳ್ ರಾವೊನ್ ಉದಕ್ ಸ್ತಬ್ಧ್ ಜಾಂವ್ಚೆಂ ಖಂಯ್ಚೆಂಯ್ ಲಕ್ಶಣ್ ನಾ.
ಪರ್ತೊನ್ ಪರ್ತೊನ್ ಯೆಂವ್ಚ್ಯಾ ತ್ಯಾ ಉದ್ಕಾಚ್ಯಾ ಲ್ಹಾರಾಂನಿ ಮ್ಹಜೆಂ ಪ್ರತಿಬಿಂಬ್ ಕೊಸ್ಳೊವ್ನ್, ವಿಂಗಡ್ ವಿಂಗಡ್ ಜಾವ್ನ್ ವೆತಾನಾ… ಆನಿ ತ್ಯಾ ಪ್ರತಿಬಿಂಬಾಚೆ ಕುಡ್ಕೆ ಮ್ಹಾಕಾ ಪಳೆವ್ನ್ ಹಾಸ್ತಾತ್; ಹಾಸೊಂದಿ… ಮನಿಸ್ ಜಾವ್ನ್ ಜಲ್ಮೊಂಚ್ಯಾಕ್‌ಯೀ ವ್ಹಾಳಾಚೆಂ ಉದಕ್ ಜಾವ್ನ್ ಯಾ ಉಬ್ಚೊ ದೋವ್ ಜಾವ್ನ್ ಯಾ ಅಖಂಡ್ ನೀದ್ ಮಾರ್ಚೆಂ ತೆಂ ಖಡಪ್ ಜಾವ್ನ್ ಜಲ್ಮಲ್ಲೊಂ ತರ್ ಮನ್ಶ್ಯಾಚೆಂ ಹಂಗ್ ಆಸಾನಾತ್‌ಲ್ಲೆಂ ಕೊಣ್ಣಾ.
ಖಡ್ಪಾಚೆರ್ ಬಸೊನ್ ವ್ಹಾಳೊನ್ ವೆಚ್ಯಾ ಉದ್ಕಾರ್ ಪಾಂಯ್ ಸೊಡ್ನ್ ವೇಳ್ ಕಿತ್ಲೊಗೀ ಜಾಲೊ. ಉದ್ಕಾಚ್ಯೆ ಆಪುರ್ಬಾಯೆಂತ್ ಉಲ್ಲಾಸಿತ್ ಜಾವ್ನ್ ಆಸ್ಚ್ಯೊ ಖೊರ್ವೊ ಥೊಡ್ಯೊ ಯೇವ್ನ್ ಮ್ಹಜ್ಯಾ ಪಾಂಯಾಕ್ ಉಮೊ ದಿತಾತ್.
ಸಾಂಕಳ್… ಸಾಂಕಾಳ್… ಮ್ಹಾಕಾಚ್ ಗೊತ್ತು ನಾಸ್ತಾನಾ ಹಾಂವೆಂ ಬೋಬ್ ಮಾರ್ಲಿ. ಖಡ್ಪಾಚ್ಯಾ ತಿಶೀನ್ ತ್ಯಾ ಉಬ್ರಾಂತ್ ಎಕ್‌ಚ್ ಪಾಂಯಾನ್ ಗೋಡ್ ತುಕುನ್ ಆಸ್‌ಲ್ಲ್ಯಾ ಎಕಾ ಡೊಂಕಾಕ್ ಧ್ಯಾನ್‌ಭಂಗ್ ಜಾಲ್ಲೆಬರಿ ಜಾವ್ನ್ ಎಕಾ ನಮೂನಾಚ್ಯಾ ರಾಗಾರ್ ಮ್ಹಳ್ಳೆಬರಿ ಪಾಕಾಟೆ ಸೊಡೊವ್ನ್ ಉಬೊನ್ ಗೆಲೆಂ.
ಸಕ್ಕಡ್ ವಚೊಂದಿ, ಮ್ಹಾಕಾ ಏಕ್ ಜೋಡ್ ಪಾಕಾಟೆ ಪುಣಿ ಆಸ್‌ಲ್ಲೆ ತರ್ ಹಾಂವ್ ಹಾಂಗಾಸರ್ ಆಸಾನಾತ್‌ಲ್ಲೊಂ. ಪಯ್ಸ್ ವೆತೊಂ ಆಸ್‌ಲ್ಲೊಂ. ಮ್ಹಜೆಂ ಕಾಳಿಜ್ ಚುರ್ಚುರ್ಲೆಂ.
ಉಹುಂ… ದೊಳ್ಯಾಂಕ್ ದಿಸ್ಚಿ ಸಾಂಕಳ್ ಆಸಾ ತರ್ ಸೊಡೊವ್ನ್ ಭಾಯ್ರ್ ಸರ್‍ಯೆತಾ, ದೊಳ್ಯಾಂಕ್ ದಿಸಾನಾತ್‌ಲ್ಲಿ ಸಾಂಕಳ್ ಆಸಾ ತರ್? ವರ್ಸಾ ಆದಿಂ ಸರೊನ್ ಗೆಲ್ಲ್ಯಾ ಮ್ಹಜ್ಯಾ ಪಪ್ಪಾಚೊ ಉಗ್ಡಾಸ್ ಯೇವ್ನ್ ಹಾಂವ್ ಹುಸ್ಕಾರುಂಕ್ ಲಾಗ್ಲೊಂ.
▓ ▓ ▓
ಪಪ್ಪಾ…! ವ್ಹಯ್ ಹ್ಯಾ ಸಂಸಾರಾಂತ್ ಎಕ್‌ಚ್ ಎಕ್ಲೊ ಧನಿ ಮ್ಹಜೊ ಪಪ್ಪಾ! ಸದಾಂಚ್ ಖೊಂಕ್ಲಿ ಕಾಡ್ನ್ ಆಸ್ಚೊ ಏಕ್ ಸೊರಾಂಡೊ, ಬೋವ್ ದಯಾಮಯಿ, ಕಠೀಣ್ ಪರಿಶ್ರಮಿ.
ಧನ್ಯಾಚೆಂ ಘರ್ ರಾಕ್ಚ್ಯಾ ತ್ಯಾ ಪೆಟ್ಯಾಸಾಂಗಾತಾ ಎಕಾ ನಮೂನ್ಯಾಚ್ಯಾ ಸ್ಪರ್ಧ್ಯಾಕ್ ರಾವ್‌ಲ್ಲೆಬರಿ ಘೊಳೊನ್ ಆಸ್‌ಲ್ಲೊ, ತಾಕಾ ಆಸ್ಚಿ ಎಕ್‌ಚ್ ಸಮ್ಜಣಿ ಮ್ಹಳ್ಯಾರ್ ಸ್ವಾಮಿನಿಶ್ಟಾ.
ಧನ್ಯಾನ್ ದಿಂವ್ಚ್ಯಾ ತೀನ್ ಕಾಸಾಚ್ಯಾ ಸಾಂಬಾಳಾಚ್ಯಾಕ್‌ಯೀ ತಾಣೆಂ ದಿಂವ್ಚ್ಯೆ ಬೊತ್ಲಿಚೆರ್ ಮೋಗ್ ಚಡ್ ಜಾವ್ನ್ ಗೆಲ್ಲೊ ಆನಿ ಹ್ಯಾ ನಿಮ್ತಿ ಮ್ಹಜೊ ಪಪ್ಪಾ ಶಿಮ್ಟಿ ನಾತ್‌ಲ್ಲೊ ಪೆಟೊ ಜಾವ್ನ್ ಗೆಲ್ಲೊ. ಕಿತ್ಯಾಕ್ ಮ್ಹಳ್ಯಾರ್ ಮ್ಹಜ್ಯಾ ಪಪ್ಪಾಕ್ ಧನಿ ಸರ್‍ವೆಸ್ಪರಾಚ್ಯಾಕ್‌ಯೀ ವಡ್ ಜಾವ್ನ್ ಗೆಲ್ಲೊ.
ಮ್ಹಜ್ಯೆ ಆವಯ್ಚೆಂ ತೋಂಡ್ ಪಳೆಯ್ನಾತ್‌ಲ್ಲೊ ನಿರ್ಭಾಗಿ ಹಾಂವ್, ಮ್ಹಜೊ ಬಾಪಯ್‌ಚ್ ಸರ್ವಸ್ವ್ ಮ್ಹಣ್ ಆಸ್‌ಲ್ಲೊಂ. ಮ್ಹಜ್ಯಾ ಪಪ್ಪಾಕ್‌ಯೀ ಮ್ಹಜೆರ್ ಬೋವ್ ಆಪುರ್ಬಾಯೆಚೊ ಮೋಗ್. ಜಾಲ್ಯಾರ್ ಕಿತೆಂ ಕರುಂ? ಮ್ಹಜೊ ಪಪ್ಪಾ ತಾಚ್ಯಾ ಮರ್‍ಣಾಪರ್ಯಾನ್ ಮ್ಹಜೆವಯ್ಲೊ ಮೋಗ್ ಆನಿ ಧನ್ಯಾನ್ ದಿಂವ್ಚ್ಯೆ ಬೊತ್ಲಿಕ್ ಆಪ್ಲ್ಯಾ ಹರ್ದ್ಯ್ಯಾರ್ ದವರುನ್ ತುಕ್ತಾಲೊ. ದೋನ್ ದೊಣಿಚೆರ್ ಪಾಂಯ್ ದವರ್‍ಲೆಲೆಬರಿ ಬುಡೊನ್ ಗೆಲೊ ಆನಿ ಮ್ಹಾಕಾಯ್ ಬುಡಯ್ಲೊ.
ಮ್ಹಜೊ ಪಪ್ಪಾ ಖೊಂಕ್ಲಿ ಕಾಡ್ನ್ ಕಾಡ್ನ್, ಆನ್ಕಿಟಿ ಹುಲ್ಪೊನ್ ಮರ್‍ತಾನಾ, ಹ್ಯಾ ಘಾಟಾರ್ ಪಿಸಾಂಟಾಚೊ ಪಾವ್ಸ್. ಚಾರ್ ಕುಲಿಚ್ಯಾಂಕ್ ಮೆಳವ್ನ್, ತಾಂಕಾಂ ಎಕೇಕ್ ಬೋತ್ಲ್ ದೀವ್ನ್ ಮ್ಹಜೊ ದನಿ ಮ್ಹಜ್ಯಾ ಪಪ್ಪಾಕ್ ಹ್ಯಾ ಸಂಸಾರಾಥಾವ್ನ್ ನಾಶೆಂ ಕರುಂಕ್ ಏಕ್ ಕ್ಯಾನ್ ಪೆಟ್ರೊಲ್ ದಿಂವ್ಚೆತಿತ್ಲೊ ಉದಾರಿ ಜಾಲ್ಲೊ! ಪುರ್ಸತ್ ನಾಸ್ತಾಂ ವೊತ್ಚ್ಯಾ ತ್ಯಾ ಪಾವ್ಸಾಚ್ಯಾ ದಿಸಾ, ಉಜ್ಯಾಚ್ಯಾ ಆಗ್ಟ್ಯಾರ್ ಮ್ಹಜೊ ಪಪ್ಪಾ ಹುಲ್ಪತಾನಾ ಹಾಂವ್ ತ್ಯಾ ಪಾವ್ಸಾಂತ್ ಎಕಾ ಖಡ್ಪಾಬರಿ ರಾವ್‌ಲ್ಲೊಂ. ಮ್ಹಜ್ಯಾ ಪಾಂಯಾಂಚೆರ್ ಚಡ್‌ಲ್ಲಿಂ ಕಾನೆಟಾಂ ಹ್ಯಾ ಸಂಸಾರಾಚ್ಯಾ ಕ್ರೌರ‍್ಯಾಕ್ ಆಮ್ಚೊಯ್ ಇಲ್ಲೊಸೊ ವಾಂಟೊ ಆಸೊಂದಿ ಮ್ಹಣೊನ್ ಪೋಟ್‌ಭರ್ ರಗತ್ ಪಿಯೆವ್ನ್ ಖಬರ್ ನಾಸ್ತಾಂ ನಿಸ್ರೊನ್ ಗೆಲಿಂ. ಮ್ಹಜ್ಯೆ ಕುಡಿಥಾವ್ನ್ ವ್ಹಾಳೊನ್ ವೆಚ್ಯಾ ಮ್ಹಜ್ಯಾ ರಗ್ತಾಕ್‌ಯೀ ಮ್ಹಜೊ ಹುಸ್ಕೊ ನಾತ್‌ಲ್ಲೊ.
ಮ್ಹಾಕಾ ಜಾಗ್ ಜಾತಾನಾ ಹಾಂವ್ ಮ್ಹಜ್ಯಾ ಲೈನ್ ಘರಾಂತ್ ಆಸ್‌ಲ್ಲೊಂ. ಮತ್ ಚುಕೊನ್ ಪಡ್ತಾನಾ ಮ್ಹಜೊ ಸೆಜಾರಿ ಕಾಪಳಂಚೊ ತಮ್ಮಣಿ ದಾಟ್ಟುನ್ ಮ್ಹಾಕಾ ಉಕಲ್ನ್ ಹಾಂಗಾ ಮ್ಹಾಕಾ ನಿದಾಯ್ಲೆಂ. ಮ್ಹಜ್ಯಾ ಪಪ್ಪಾಚೆಂ ಮೊಡೆಂ ನಿದಯಿಲ್ಲ್ಯೆ ತ್ಯೆ ಮಾಂದ್ರೆರ್‌ಚ್ ಹಾಂವ್ ಆತಾಂ ನಿದ್‌ಲ್ಲೊಂ. ಧರ್ಣಿರ್ ಪಡ್‌ಲ್ಲಿಂ ತಿಂ ಫುಲಾಂ, ಪೆಟೊನ್ ಉರ್‌ಲ್ಲ್ಯೊ ಅಗರಬತ್ತಿಚ್ಯೊ ಕಾಡಿಯೊ, ಮ್ಹಜ್ಯಾ ಪಪ್ಪಾನ್ ವೋಡ್ನ್ ಉಡಯಿಲ್ಲ್ಯಾ ಬಿಡಿಯೆಚೆ ಕುಡ್ಕೆ ಆನಿ ಎಕಾ ಮುಲ್ಯಾಂತ್ ಆಸ್‌ಲ್ಲಿ ಸೊರ್‍ಯಾಚಿ ಬೋತ್ಲ್ ಸಕ್ಕಡ್ ಸಾಂಗಾತಾ ಮ್ಹಾಕಾ ಪಳೆವ್ನ್ ಕಿಟ್‌ಕಿಟ್ಯೊ ಮಾರ್ನ್ ಹಾಸ್‌ಲ್ಲೆಬರಿ ಜಾಲೆಂ.
ಸಕ್ಕಡ್ ಸಮಾ ಜಾಂವ್ಕ್ ದೋನ್ ದೀಸ್ ಜಾಯ್ ಪಡ್ಲೆ. ಆಮ್ಕಾಂ ಕುಲಿಚ್ಯಾ ಮನ್ಶ್ಯಾಂಕ್ ಹರ್ದ್ಯಾಭಿತರ್ ಕಾಳಿಜ್ ಆಸ್ತಾಗೀ ಯಾ ಖಡಪ್ ಆಸ್ತಾಗೀ ಗೊತ್ತುನಾ ಯಾ ಆಮ್ಚ್ಯಾ ಧನಿಯಾಚೆಂ ಕಾಳಿಜ್‌ಗೀ ನ್ಹಯ್ ಕುಸ್‌ಲ್ಲೊ ಮುದೊಗೀ ಗೊತ್ತುನಾ. ಪಪ್ಪಾ ಸರೊನ್ ಎಕ್‌ಚ್ ದಿಸಾಕ್ ಘರಾ ಆಯ್ಲೊ. ವೆತಾನಾಂಚ್ ತಯಾರಾಯ್ ಕರ್ನ್ ಆಯಿಲ್ಲೊ ಮ್ಹಣ್ ದಿಸ್ತಾ. ಪಯ್ಲೆಂ ಸೆಜಾರಿ ತಮ್ಮಣಿ ದಾಟ್ಟುಕ್ ಗಾಳಿ ಸೊವ್ನ್ ಕಾಮಾಕ್ ಧಾಂವ್ಡಾಯ್ಲೊ. ಹಾಂವ್ ಎಕಾ ಪೊಂತಾರ್ ಬಸೊನ್ ಪೆಟೊನ್ ಆಸ್‌ಲ್ಲ್ಯಾ ತ್ಯಾ ದಿವ್ಯಾಂಚೆರ್ ದೀಶ್ಟ್ ಘಾಲ್ನ್ ಆಸ್‌ಲ್ಲೊಂ. ಪಪ್ಪಾ ಸರೊನ್ ಏಕ್ ದೀಸ್ ಜಾಲ್ಲೊ ಆನಿ ಪಪ್ಪಾ ನಾ, ಪಪ್ಪಾಚೆಂ ಪಿಂತುರ್‌ಯೀ ಮ್ಹಜೆಕಡೆ ನಾ. ಆಸ್ಚೊ ಮ್ಹಳ್ಯಾರ್ ಹೊ ದಿವೊ.
ಭಾಯ್ರ್ ರಾವೊನ್ ಮ್ಹಜ್ಯಾ ಧನ್ಯಾನ್ ಕರ್ಕಸ್ ತಾಳ್ಯಾನ್ ಆಪಯ್ಲೆಂ, ಬೊಳ್ಳು… ಏ ಬೊಳ್ಳು… ಮ್ಹಜಿ ಜಾಪ್ ನಾತ್‌ಲ್ಲ್ಯಾಕ್‌ಗೀ ಕಿತೆಂಗೀ ಹುಲ್ಪಾಯಿಲ್ಲೆಂ ತೋಂಡ್ ಇಲ್ಲೆಶೆಂ ಸಡಿಲ್ ಕರ್ನ್, ಬೊಳ್ಳು… ಮ್ಹಣ್ ಆಪಯ್ಲೆಂ. ತೆಂ ಆಪವ್ಣೆಂ ಮೊಗಾಚೊ ವೇಸ್ ಘಾಲ್ನ್ ಮ್ಹಜೆಮುಕಾರ್ ನಾಚ್‌ಲ್ಲೆಬರಿ ಜಾಲೆಂ. ಧನಿ ಕೆದಿಂಚ್ ವೇಸ್ ಘಾಲ್ನ್‌ಚ್ ಯಾರ್ ಕರ್ಚೊ ಮನಿಸ್ ಆನಿ ತೆಂ ತಾಚ್ಯಾ ವಾವ್ರಾಕ್ ಬೋವ್ ಗರ್ಜೆಚೆಂ.
ಖಬರ್ ನಾಸ್ತಾಂ ಭಿತರ್ ಯೇವ್ನ್ ಧನಿ ಇಲ್ಲೊ ವೇಳ್ ವೊಗೊಚ್ ರಾವ್ಲೊ. ಉಲಂವ್ಕ್ ಉತ್ರಾಂ ಮೆಳೊಂಕ್ ನಾಂತ್ ಕೊಣ್ಣಾ. ವಡ್ಲ್ಯಾನ್ ಏಕ್ ಉಸ್ವಾಸ್ ಸೊಡ್ಲೊ! ತೊ ವಡ್ ಉಸ್ವಾಸ್ ಮ್ಹಜ್ಯಾ ಘರಾಚ್ಯಾ ಮಾವ್ನ್‌ಪಣಾಕ್ ಆನಿ ನೀರವತಾಕ್ ಏಕ್ ಸವಾಲಾಬರಿ ಆಸ್‌ಲ್ಲೊ. ಥೊಡೊ ವೇಳ್ ಹಾಂವ್ ಚಿಂತಾಂ; ಘರಾಚ್ಯಾ ತ್ಯಾ ಮಾವ್ನ್‌ಪಣಾಕ್, ನೀರವತಾಕ್ ಮ್ಹಜೊ ಧನಿ ಭಿಯೆಲೊ ಕೊಣ್ಣಾ.
ಶಿಂಪಿ ಗಿಳುನ್ ಸಾಂಗಾಲಾಗ್ಲೊ: “ಎಂತ್‌ರಾ ಬೊಳ್ಳು? ಎಂತ್ ಆಚಿ?”
ಜಾಂವ್ಕ್ ಆಸ್ಚೆಂ ಕಾಂಯ್ ನಾತ್‌ಲ್ಲೆಂ, ಸಕ್ಕಡ್ ಜಾವ್ನ್ ಗೆಲ್ಲೆಂ. ವ್ಹಯ್, ಪಯ್ಲೆಂ ಮ್ಹಜಿ ಆವಯ್ ಗೆಲಿ, ಮ್ಹಜೆಂ ಭುರ್ಗೆಪಣ್ ಗೆಲೆಂ, ಮ್ಹಜೆಂ ಶಿಕಪ್ ಗೆಲೆಂ, ಮ್ಹಜೊ ಮೋಗ್ – ಭರ್ವಸೊ ಆನಿ ಫುಡಾರ್ ಸಕ್ಕಡ್ ಮ್ಹಜ್ಯಾ ಪಪ್ಪಾಸಾಂಗಾತಾ ಹುಲ್ಪೊನ್ ಗಲೆಂ. ವ್ಹಯ್, ಜಾಂವ್ಕ್ ಕಿತೆಂ ಉರ್ಲಾಂ?
ದಿವ್ಯಾಚೆರ್ ಲಾಗಯಿಲ್ಲಿ ದೀಶ್ಟ್ ಕಾಡಿನಾಸ್ತಾನಾ ಹಾಂವೆಂ ಸಾಂಗ್ಲೆಂ, “ಒಂತು ಇಲ್ಲೆ…”(ಕಾಂಯ್ ನಾ). ಧನ್ಯಾಕ್ ಕಿತೆಂ ಭೊಗ್ಲೆಂಗೀ, “ಅವ್ವಯ್ಯ ಕಾಕುವಾ, ಉಂಬಕ್ ಬಾ… “(ಆಜಿ ಆಪಯ್ತಾ, ಜೆವ್ಣಾಕ್ ಯೆ) ಮ್ಹಣ್ ಸಾಂಗಾಲಾಗ್ಲೊ.
ಮ್ಹಾಕಾ ಜೆವಣ್ ನಾಕಾ ಆಸ್‌ಲ್ಲೆಂ.
“ಬೋಂಡ ಅನ್ನತ್ತೆ, ಅವ್ವಯ್ಯ ಕಾಕುವಾ… ನೀ ಬೆರಿಯ ಬಾ…” (ನಾಕಾ ಮ್ಹಣಾನಾಕಾ, ಆಜಿ ಆಪಯ್ತಾ… ತುಂ ವೆಗಿಂ ಯೆ) ಮ್ಹಣ್ ಸಾಂಗೊನ್ ಧನಿ ಭಾಯ್ರ್ ಸರ್ಲೊ. ಬೆರಿಯ ಬಾ ಮ್ಹಳ್ಯಾರ್ ಜಾಲೆಂ, ಜೀವ್ ವೆತಾ ತರ್‌ಯೀ ಧನ್ಯಾಚ್ಯಾ ‘ಬೆರಿಯ ಬಾ’ ಆಪವ್ಣ್ಯಾಕ್ ತಿರಸ್ಕಾರ್ ಕರ್ಚೆಬರಿ ನಾ. ವೆಗಿಂ ಯೇ ಮ್ಹಳ್ಳ್ಯಾ ತ್ಯಾ ಉತ್ರಾಕ್ ತಿತ್ಲೆಂ ಮೋಲ್ ಆಸಾ. ಧನ್ಯಾಚ್ಯಾ ಆವಯ್ಚೆರ್ ಆಸ್‌ಲ್ಲ್ಯಾ ಗವ್ರವಾಕ್ ಹಾಂವ್ ಭಾಯ್ರ್ ಸರ್ಲೊಂ. ಪಾಪಾಚಿ ಮ್ಹಾತಾರಿ ತಿ. ತಿಕಾ ಪುಣಿ ಮ್ಹಜೆರ್ ಹುಸ್ಕೊ ಆಸಾ ನ್ಹಯ್…
ಧನ್ಯಾಚ್ಯಾ ಘರಾಮುಕಾರ್ ರಾವ್‌ಲ್ಲ್ಯಾ ದೋನ್ ಕಾರಾಂಕ್ ಪಳಯ್ತಚ್ ಮ್ಹಾಕಾ ಸಮ್ಜಾಲೆಂ. ಧನಿ ಮ್ಹಜ್ಯಾ ಘರಾ ಆಯಿಲ್ಲೊ ಮೊಗಾನ್ ನ್ಹಯ್ ಮ್ಹಣ್. ‘ಹೋಂ ಸ್ಟೇ’ ಯೆಂವ್ಚ್ಯಾ ಗೆಸ್ಟಾಂಕ್ ಎಕಾ ಥರಾಚೆಂ ‘ಅಕ್ಷಯ ಪಾತ್ರೆ’ ಮ್ಹಳ್ಳೆಬರಿ ಆನಿ ಹಾಂಚಿ ಚಾಕ್ರಿ ಕರುಂಕ್ ಹಾಂವ್ ಭಾಂಗಾರಾಚೆಂ ತಾಂತಿ ದವರ್‍ಚ್ಯೆ ಕೊಂಬಿಯೆಬರಿ. ಪ್ರತಿಭಟನ್ ಕರ್ಚೆಬರಿ ನಾ. ಅವ್ವಯ್ಯಾನ್ ದಿಲ್ಲಿ ಸುಕಿ ಬಾಕ್ರಿ ಖಾವ್ನ್ ಕಾಪಿ ಪಿಯೆಲೊಂ.
“ಕಳ್ಳ್ ಬೊಂಡುರಾ?” ಧನಿ ಎಕಾ ನಮೂನ್ಯಾಚೆರ್ ಹಾಸೊನ್ ವಿಚಾರುಂಕ್ ಲಾಗ್ಲೊ. ಕಳ್ಳೆ (ಸೊರೊ) ಪಿಯೆವ್ನ್ ಜಾಲ್ಲೆಂ ಕಿತೆಂ ಮ್ಹಣ್ ಹಾಂವ್ ಜಾಣಾಸ್‌ಲ್ಲೊಂ.
“ಬೊಂಡ…” ಮ್ಹಣ್ ಸಾಂಗೊನ್ ಭಾಯ್ರ್ ಸರ್ಲೊಂ. ಆಮಿ ಕುಲಿಚಿಂ ಮನ್ಶ್ಯಾಂ, ಸುಖ್ ಜಾಂವ್ದಿ ದೂಕ್ ಜಾಂವ್ದಿ ಆಮ್ಚೆಯಿತ್ಲ್ಯಾಕ್ ಭೊಗುಂಕ್ ಜಾಯ್ನಾ. ಕರ್ಚೆಂ ಕಾಮ್ ಜಾಯ್‌ತಿತ್ಲೆಂ ಅಸ್‌ಲ್ಲೆಂ.
ಗೆಸ್ಟಾಂನಿ ದಿಂವ್ಚ್ಯಾ ಪಯ್ಶ್ಯಾಂಕ್ ಸಮಾನ್ ಜಾವ್ನ್ ಆಮಿ ಘೊಳಾಜೆ. ತಾಣಿಂ ವಿಚಾರ್‍ತಾನಾ ಜಾಯ್ ಜಾಲ್ಲೆಂ, ಜಾಯ್ ತಿತ್ಲೆಂ ತಯಾರ್ ಕರ್ನ್ ದೀಜೆ. ತಾಂಕಾಂ ನೀದ್ ಪಡ್ತಾಪರ್ಯಾಂತ್ ಜಾಗ್ ಆಸಾಜೆ, ಮಾಗಿರ್‌ಯೀ ಆಪವ್ಣೆಂ ಆಯ್ಲ್ಯಾರ್ ಧಾಂವಜೆ, ಪರತ್ ಸಕಾಳಿಂ ಚಾರ್ ವೊರಾಂಕ್ ಉಟಾಜೆ.
ಆಯಿಲ್ಲಿಂ ಗೆಸ್ಟಾಂಗಿ, ಕೊಣಾಚೆಂಗೀ ರಗತ್ ಪಿಯೆವ್ನ್ ಜೊಡ್‌ಲ್ಲೆ ಪಯ್ಶೆಗೀ… ವಿಬಾಡ್ ಕರುಂಕ್‌ಚ್ ಜಲ್ಮಲ್ಲೆಬರಿ, ಸೊರೊ ಆನಿ ಮಾಸ್ ನಾಸ್ತಾಂ ಜಿಯೆಂವ್ಕ್‌ಚ್ ಸಾಧ್ಯ್ ನಾ ಮ್ಹಣ್ ಆಸ್ಚಿಂ ಮನ್ಶ್ಯಾಂ. ಥೊಡಿಂಗೀ ಚೆಡ್ವಾಂಸಾಂಗಾತಾ ಆಂಗ್ ಊಬ್ ಕರುಂಕ್ ಆಯ್ಲೆಲಿಂ, ಸಂಸ್ಕಾರ್, ಸಂಸ್ಕೃತಿ, ಸಂಬಂಧ್ ಸಕ್ಕಡ್ ಆಪ್ಲ್ಯಾ ಘರಾಚ್ ದವರ್ನ್ ಆಯ್ಲೆಲಿಂ, ತಾಂಚ್ಯಾ ಪಯ್ಶ್ಯಾಂಕ್ ವಾವ್ರ್ ಕಾಡುಂಕ್ ಹಾಂವ್… ಗೆಸ್ಟಾಂ ಯೆತಾನಾ ಮ್ಹಜೊ ಧನಿ ಬೋವ್ ಬರೊ ಮನಿಸ್ ಜಾವ್ನ್ ಯೆತಾ. ತಾಚೊ ವೇಸ್, ತಾಚೆಂ ಉತರ್ ಪಳೆವ್ನ್ ಗೆಸ್ಟಾಂ, ಕೊಡಗು, ಕಾಶ್ಮೀರ, ಸ್ವರ್ಗ-ಸ್ವರ್ಗ… ಬೋಬ್ ಮಾರ್ತಾತ್. ಮ್ಹಜ್ಯಾ ವಾಂಟ್ಯಾಚೊ, ಸಕಾಳಿಂ ಚಾರ್ ವೊರಾಥಾವ್ನ್ ರಾತ್‌ಭರ್ ಘೊಳ್‌ಲ್ಲ್ಯಾ ವಾವ್ರಾಚೊ ಪ್ರತಿಫಳ್ ಫಕತ್ ಎಕ್ಶೆಂ ವೀಸ್ ರುಪಯ್ ಮಾತ್ರ್!
ಪಾಂಚ್ ವರ್ಸಾ ಭರ್‌ಲ್ಲ್ಯಾ ಹರ್‍ಯೆಕ್ಲ್ಯಾಕಡೆ ಎಕಾ ದಿಸಾಕ್ ತೀನ್ ಹಜಾರಾಲೆಕಾರ್ ಪಯ್ಶೆ ಮೆಜ್ಚೊ ಧನಿ, ತಾಂಚ್ಯಾ ಸೊರೊ, ಮಾಸಾಕ್ ವಿಂಗಡ್ ಲೇಕ್ ದವರ್ತಾಲೊ. ಗರ್ಜ್ ಯೆತಾನಾ ಚೆಡ್ವಾಂಯ್ ಯೆತಾಲಿಂ. ಪಯ್ಶೆ ಖರ್ಚುಂಕ್‌ಚ್ ಮ್ಹಣ್ ಆಯಿಲ್ಲಿಂ, ಹ್ಯಾ ಘಟಾಚೆ ಗುಡೆ – ರಾನ್, ಝರ್ ಪಳೆವ್ನ್, ಪಾಚ್ವೆಂಪಣ್, ಥಂಡಾಯ್ ಪಳೆವ್ನ್ ದಿವ್ಯಾಭೊಂವ್ತಣಿ ಘುಂವ್ಚ್ಯಾ ಪತಂಗಾಬರಿ ಯೆತಾಲಿಂ. ನವ್ಯಾ ವರ್ಸಾಚ್ಯಾ ವೆಳಾರ್ ಆಸ್ಚಿಂ ಚಾರ್ ಕುಡಾಂ ಪಾವಾನಾಸ್ತಾಂ ಕಾಪಿಯೆಝಡಾಂಚೆಂ ಮೂಳ್ ಕಾಡ್ನ್, ಟೆಂಟ್ ಮಾರ್ನ್ ಸೊರೊ -ಮಾಸ್ ದವರ್ನ್ ಹಜಾರ್ – ಹಜಾರ್ ಲೂಟ್ ಮಾರ್ತಾಲೊ. ಜಾಲ್ಯಾರ್‌ಯೀ ಸದಾಂಚ್ ಮ್ಹಜೊ ವಾಂಟೊ ಮಾತ್ರ್ ಎಕ್ಶೆಂ ವೀಸ್ ರುಪಯ್.
ಧನ್ಯಾಚ್ಯಾ ಘರಾ ವರ್ಸ್‌ಭರ್ ನವೆ ನವೆ ವಸ್ತು, ಕಾರ್, ಜೀಪ್, ಸುಖ್, ಸುಖ್. ನತಾಲಾಂಚೆಂ ಫೆಸ್ತ್ ಜಾತಚ್ ಯುರೋಪಾಥಾವ್ನ್ ಗೊರೆ ಯೆತಾತ್. ತಾಂಕಾಂ ಸರ್ವಾಂಕ್ ಆಮ್ಚೊ ಗಾಂವ್ ಬೋವ್ ಆಪುರ್ಬಾಯೆಚೊ. ಆಮ್ಕಾಂ ಸ್ವಾತಂತ್ರ್ಯ್ ಮೆಳ್ಚ್ಯಾ ಆದಿಂ ಥಾವ್ನ್‌ಯೀ ಹಿ ರಿವಾಜ್ ಆಸಾ. ತಾಣಿಂ ಯೆತಾನಾ ಮ್ಹಜೊ ಧನಿ ಮ್ಹಾಕಾ ತಾಚ್ಯಾ ಸ್ವಂತ್ ಪುತಾಬರಿ ಆಪಯ್ತಾ. ತಿಂ ಮೊಗಾನ್, ಬೊಲ್ಲು… ಬೊಲ್ಲು… ಮ್ಹಣ್ ಆಪಯ್ತಾತ್. ಜಾಲ್ಯಾರ್‌ಯೀ ಹ್ಯಾ ಬೊಳ್ಳುಕ್ ಸ್ವಾತಂತ್ರ್ಯ್ ನಾ. ಬಾಪಾಯ್ನ್ ಕರ್ನ್ ದವರ್‌ಲ್ಲೆಂ ರೀಣ್ ಫಾರಿಕ್ ಕರ್ಚೆಖಾತಿರ್ ಗುಲಾಮ್ ಜಾವ್ನ್ ಹಾಂವ್ ಘೊಳ್ತಾಂ. ಹ್ಯಾ ಗುಲಾಮ್‌ಪಣಾಕ್ ಸಾಂಕಳ್ ನಾ… ರೀಣ್‌ಯೀ ಮುಗ್ದಾನಾ…
ಬಾಪಾಯ್ನ್ ಮರ್‍ತಾನಾ ಸಾಂಗ್‌ಲ್ಲೆಂ, “ಒಡೆಯ ನಂಗಡ ದೇವ… ಬೊಳ್ಳು ವಂಗಡ ಋಣ ನಂಗಡ ಉಂಡು… “(ಧನಿ ಆಮ್ಚೊ ದೇವ್. ತಾಚೆಂ ರೂಣ್ ಆಮ್ಚೆವಯ್ರ್ ಆಸಾ). ವ್ಹಯ್ ಧನ್ಯಾಚೆಂ ರೂಣ್ ಕಸಲೆಂ ಮ್ಹಳ್ಳಿ ಸಮ್ಜಣಿ ಆಸ್‌ಲ್ಲಿ ಜಾಲ್ಯಾರ್ ಪಪ್ಪಾ ಹಾಂಗಾಸರ್ ಕಾಡ್ಚಿ ‘ಕಳ್ಳಭಟ್ಟಿ’ ಪಿಯೆತೊ ನಾತ್‌ಲ್ಲೊ, ರೀಣ್ ಕಾಡ್ತೊ ನಾತ್‌ಲ್ಲೊ ಆನಿ ಹ್ಯಾ ಯೆಮ್ಕೊಡಾಂತ್ ಖರ್ಗೊಂಚಿ ಗರ್ಜ್‌ಯೀ ನಾತ್‌ಲ್ಲಿ. ಅಬಕಾರಿ ಇಲಾಖ್ಯಾಚೆ ಅಧಿಕಾರಿ ಜಿಪಾರ್ ಹಾಂಗಾಸರ್ ಪಂದ್ರಾ ದಿಸಾಂಕ್ ಏಕ್ ಪಾವ್ಟಿಂ ಯೆತಾತ್, ಹಾಂಗಾಸರ್ ಎಕಾ ದಫ್ತರಾಂತ್ ಪಾಂಯಿಟ್ ಬೂಕ್ ದವರ್‍ಲಾ. ಬುಕಾಂತ್ ಎಂಟ್ರಿ ಜಾತಾ- ‘ಹಾಂಗಾಸರ್ ಕಾಂಯ್‌ಚ್ ಆಪ್ರಾದ್ ನಾ, ಸಕ್ಕಡ್ ಸಮಾ ಆಸಾ’. ತ್ಯಾ ದಿಸಾಮಾತ್ರ್ ಸಕ್ಕಡ್ ಸಮಾ ಆಸ್ತಾ!
ಧನ್ಯಾಚೊ ಸೊರೊ ಆನಿ ತಾಚ್ಯಾ ಚಾಲಾಕೀ ಉತ್ರಾಂನಿ ಮ್ಹಜ್ಯಾ ಕುಟ್ಮಾಕ್ ಯೆಮ್ಕೊಡಾಂತ್ ಲೊಟುನ್ ಘಾಲೆಂ. ಮ್ಹಜ್ಯಾ ಪಪ್ಪಾಕ್ ತಾಣೆಂ ಕಾಣ್ಘೆಲ್ಲೆಂ ವೀಸ್ ಹಜಾರಾನ್ ತಾಚೆಂ ತೋಂಡ್ ದಾಂಪಯ್ಲೆಂ. ಜಿಣ್ಯೆಚಿಂ ಸಪ್ಣಾಂ ಮ್ಹಾಕಾಯ್ ಯೆತಾತ್, ಕಾಟೇಜಿಚ್ಯಾ ಸೊಪ್ಯಾರ್ ಮಾಂದ್ರಿ ಹಾಂತುಳ್ನ್ ನಿದ್ತಾನಾ, ಮದೆಂ ರಾತ್‌ಭರ್ ಕಾಟೇಜಿಚ್ಯಾ ಭಿತರ್ ಥಾವ್ನ್ ಆಯ್ಕೊಂವ್ಚೊ ಖಾಟ್ಲ್ಯಾಚೊ ಆವಾಜ್, ಫಿಂರ್ಗೊಣ್ ಮ್ಹಜಿ ನೀದ್ ವಿಬಾಡ್ ಕರ್‍ತಾತ್. ತಾಣಿಂ ಪಿಯೆಂವ್ಚ್ಯಾ ಮೊಲಾಧಿಕ್ ಸೊರ್‍ಯಾಚೊ ಫರ್ಮಳ್ ಮ್ಹಾಕಾಯ್ ಆಪುರ್ಬಾಯೆನ್ ಆಪಯ್ತಾ. ಕಾಟೇಜಿಕ್ ಯೆಂವ್ಚ್ಯಾ ಸೊಭಾಯೆಚ್ಯಾ ಚೆಡ್ವಾಂಕ್ ಪಳೆಯ್ತಾನಾ ಮ್ಹಜಿ ಪ್ರಾಯ್ ಚುರ್ಚುರ್ತಾ. ಮ್ಹಾಕಾಯ್ ಬಾಯ್ಕ್, ಮೊಬಾಯ್ಲ್, ಕಾರ್ ಜಾಯ್ಜೆ ಮ್ಹಳ್ಳಿ ಆಶಾ ಕಿರ್ಲಾತಾ. ಜಾಲ್ಯಾರ್, ಹಾಂವ್ ಗುಲಾಮ್. ಹಾಂಗಾಸರ್ ಗುಲಾಮ್‌ಪಣಾಥಾವ್ನ್ ಭಾಯ್ರ್ ಸರ್ಚೊ ಮನಿಸ್ ಜಿವಂತ್ ಉರ್‍ಚೊನಾ. ಖಬ್ರೊ ಮ್ಹಾಕಾ ಭೆಶ್ಟಾಯ್ತಾತ್ ಜಾಲ್ಯಾರ್‌ಯೀ ಹೆಂ ಸಕ್ಕಡ್ ಸೊಡ್ನ್ ಹಾಂವ್ ಪಯ್ಸ್… ಮಸ್ತು ಪಯ್ಸ್ ವಚಾಜೆ ಮ್ಹಣ್ ಮ್ಹಜೆಂ ಕಾಳಿಜ್ ಬೋಬ್ ಘಾಲ್ತಾ.
▓ ▓ ▓
ಖಡ್ಪಾಚ್ಯಾ ದೆಗೆಥಾವ್ನ್ ಏಕ್ ಕಾನೆಟ್ ರಗ್ತಾಚೊ ಆನಿ ಘಾಮಾಚೊ ಪರ್ಮಳ್ ಘೆವ್ನ್ ನಾಚೊನ್ ಯೆತಾನಾ… ಝರಿಚ್ಯಾ ವ್ಹಡ್ ಖಡ್ಪಾಚ್ಯಾ ಭೊಂವ್ತಣಿ ರೆಂವೊಡ್ ಮಾರ್ನ್ ಸೊಭಾಯೆನ್ ವಾಡ್‌ಲ್ಲ್ಯಾ ವಾಶ್ಯಾಂನಿ ಸುಕ್ಣಿಂ ಆಪುರ್ಬಾಯೆನ್ ಉಲಯ್ತ್ ಆಸಾತ್. ಸಾಂಜೆಚ್ಯಾ ಉಪ್ರಾಂತ್ಲೊ ಕಾಳೊಕ್ ಖಡ್ಪಾಂಚೆರ್ ಪಡೊನ್ ತೆ ಆನಿಕಿ… ಆನಿಕಿ ಕಾಳೆ ಜಾತೇ ಆಸಾತ್. ವಾಶ್ಯಾಂತ್ಲ್ಯಾ ಎಕಾ ಘುಡಾಥಾವ್ನ್ ಸುಕ್ಣ್ಯಾಚೆಂ ಪೀಲ್ ಭಾಯ್ರ್ ಸಕ್ಲಾ ಉಡೊನ್, ಆಡ್‌ತೀಡ್ ಪಾಕಾಟೆ ಮಾರ್ನ್ ಉಬ್ಲೆಂಚ್… ಸಂತೊಸಾನ್, ಉಲ್ಲಾಸಾನ್ ಇಡ್ಯಾಂತ್ಲ್ಯಾನ್ ಉಬೊನ್ ರಾನಾಭಿತರ್ ಏಕ್ ಜಾವ್ನ್ ಗೆಲೆಂ. ಮೊಳ್ಬಾವಯ್ರ್ ಡೊಂಕಾಂ ಆನಿ ಪಾಕೆ ಖಂಯ್ಚಿಯ್ ಖಂತ್ ನಾಸ್ತಾಂ ಪಾಕಾಟೆ ಸೊಡವ್ನ್ ಉಬೊನ್ ವೆತೇ ಆಸಾತ್. ಉದ್ಕಾಭಿತರ್ ಸೊಡ್‌ಲ್ಲ್ಯಾ ಮ್ಹಜ್ಯಾ ಪಾಂಯಾಂಕ್ ಉಮೊ ದಿಂವ್ಚ್ಯೊ ತ್ಯೊ ಖೊರ್ವೊ ಉಲ್ಲಾಸಾನ್ ಉಪ್ಯೆತೇ ಆಸಾತ್.
ತ್ಯಾಚ್ ಘಡಿತಾಂತ್ ಮ್ಹಜ್ಯಾ ಬೊಲ್ಸಾಂತ್ಲೆಂ ಮೊಬಾಯ್ಲ್ ಬೋಬ್ ಮಾರುಂಕ್ ಲಾಗ್ಲೆಂ. ಮ್ಹಾಕಾ ಸಮ್ಜಾಲೆಂ, ತೆಂ ಮ್ಹಜ್ಯಾ ಧನ್ಯಾಚೆಂ ಶಿವಾಯ್ ದುಸ್ರೆಂ ಕೊಣಾಯ್ಚೆಂ ಜಾಂವ್ಕ್ ಸಾಧ್ಯ್‌ಚ್ ನಾ. ಧನಿ ಸಾಂಗ್ತಾಲೊ “ಎಲ್ಲಿ ಉಳ್ಳೊರಾ! ಬೆರಿಯೆ ಬಾ…” (ಖಂಯ್ ಆಸಾಯ್, ವೆಗಿಂ ಯೇ) ಮ್ಹಳ್ಳ್ಯಾ ತ್ಯಾ ಉತ್ರಾಕ್ ಪಾಟ್ ಘಾಲುಂಕ್ ಹಾಂವೆಂ ಮೊಬಾಯ್ಲ್ ಕಾಡ್ನ್ ಪಯ್ಸ್ ಉಡಯ್ಲೆಂ. ತೆಂ ವಚೊನ್ ತ್ಯಾ ಉಬಿರಾಂತ್ ಬೋಬ್ ಘಾಲಿತ್ ಪಡ್ಲೆಂ. ಖಂಯ್ ಥಾವ್ನ್‌ಗೀ ಏಕ್ ಕಾನೆಟ್ ಮನ್ಶ್ಯಾಚ್ಯಾ ಘಾಮಾಚ್ಯಾ ಪರ್ಮಳಾಕ್ ತ್ಯಾ ಮೊಬಾಯ್ಲಾಕ್ ಹುಂಗೊಂವ್ಕ್ ಲಾಗ್ಲೆಂ. ಮನ್ಶ್ಯಾಂಕ್ ಪಳೆಯ್ಲ್ಯಾರ್ ಭಿಯೆಂವ್ಚಾ ಮ್ಹಾಕಾ ಹ್ಯಾ ರಗ್ತಾಪಿಪಾಸ್ ಸಂಸಾರಾಥಾವ್ನ್ ಪಯ್ಸ್… ಪಯ್ಸ್ ವೆಚಿ ಆಶಾ ಜಾವ್ನ್, ಸೊಭಾಯೆಚೆಂ ಸಪಣ್ ಜಾವ್ನ್ ದಿಸ್ಲೆಂ. ಹಾಂವ್ ತ್ಯಾ ಸಾಂಜೆಚ್ಯಾ ಕಾಳೊಕಾಂತ್ ಧಾಂವೊಂಕ್ ಲಾಗ್ಲೊಂ… ಆನಿ ಝರ್‌ಯೀ ಉಲ್ಲಾಸಾನ್ ವ್ಹಾಳ್ತಾಲಿ…
