“ಆಜ್ ಸಮಾಜೆಂತ್ ಪಾಸಾರುನ್ ಆಸ್ಚಿ ಬೆಪಾರ್ವ್ಯಾಚಿ ಸಂಸ್ಕೃತಿ ದ್ವೇಶಾ ಪ್ರಾಸ್ ಭಿರಾಂಕೂಳ್ ಜಾವ್ನಾಸಾ. ಪಳಯಾ, ಕೊಣಾಯ್ಚೊ ಮೋಗ್ ಕರ್ತಾಂವ್ , ತಾಂಕಾ ಕಾಳ್ಜಾಂತ್ ಜಾಗೊ ದಿತಾಂವ್, ಕೊಣಾಚೊ ದ್ವೇಶ್ ಕರ್ತಾಂವ್, ತಾಂಕಾ ಮನಾಂತ್ ಜಾಗೊ ದಿತಾಂವ್. ಪೂಣ್ ಕೊಣಾಯ್ಚೊ ಬೆಪಾರ್ವೊ ಕರ್ತಾಂವ್, ತಾಚೆವಿಶಿಂ ಆಮ್ಕಾಂ ಪಡೊನ್‌ಚ್ ಗೆಲ್ಲೆಂ ನಾ. ಬೆಪಾರ್ವ್ಯಾಕ್ ಒಳಗ್ ಜಾಂವ್ಚೊ ವೆಕ್ತಿ ಅಸ್ತಿತ್ವಾಂತ್ ನಾತ್‌ಲ್ಲೆಪರಿಂ. ತೋ ಜೀವ್ ಆಸ್ಲ್ಯಾರೀ, ಮೆಲ್ಯಾರೀ ಕೊಣಾಕ್ ಪಡೊನ್ ಗೆಲ್ಲೆಂ ನಾ. ದೆಕುನ್ ಆಯ್ಚ್ಯಾ ಸಮಾಜೆಂತ್ ಬೆಪಾರ್ವೊ ಕರ್ಚಿ ಸಂಸ್ಕೃತಿ ಜಿ ಪಾಲೆವ್ನ್, ವಾಡೊನ್ ಆಸಾ ತಿ ದ್ವೇಶಾಪ್ರಾಸ್ ಚಡ್ ಮಾರೆಕಾರ್” ಮ್ಹಣ್ ಮಂಗ್ಳುರ್ ದಿಯೆಸೆಜಿಚೊ ಧರ್ಮಾಧ್ಯಕ್ಷ್ ಅ|ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಣಿ ಆಕಾಂತ್ ಉಚಾರ‍್ಲೊ. ತೋ ಕೊಡಿಯಾಲ್‌ಬಯ್ಲ್ ಬಿಸ್ಪಾಚ್ಯಾ ನಿವಾಸಾಂತ್ ನತಾಲಾಂಚೊ ಸಂದೇಶ್ ಕಾರ್ಯಕ್ರಮಾಂತ್ ಮಾಧ್ಯಮ್ ಪ್ರತಿನಿಧಿಂಕ್ ಉದ್ದೇಸುನ್ ಉಲವ್ನ್ ಆಸ್ಲೊ.
ಮುಕಾರುನ್ ತಾಣೆ ಮ್ಹಳೆಂ ” ನತಾಲ್ ಮ್ಹಳ್ಯಾರ್ ಮರಿಯೆಚ್ಯಾ ಉದರಿಂ ದೇವ್ ಮನಿಸ್ ಜಾಲ್ಲಿ, ಕೆದಿಂಕ್‌ಚ್ ಪುನಾರವರ್ತಿತ್ ಜಾಂವ್ಕ್ ಸಕಾನಾತ್ಲಿ ಅಪೂರ್ವ್ ಗಜಾಲ್. ಜೆಜು ಮ್ಹಳ್ಯಾರ್ ರಕ್ಷಕ್! ಜೆಜು ಆಮ್ಕಾಂ ಪಾತ್ಕಾ ಆನಿ ಮರ್ಣಾಥಾವ್ನ್ ರಾಕ್ಚಿ. ದ್ವೇಶ್ ಆನಿ ಹಿಂಸಾತ್ಮಕ್ ಮನೋಭಾವಾಥಾವ್ನ್ ರಾಕ್ಚಿ ಆನಿ ಆಮ್ಚೆಥಂಯ್ ಸಾರ್ವತ್ರಿಕ್ ಮೋಗ್ ಆನಿ ಬಾಂದವ್ಪಣ್ ವಾಡಂವ್ಚಿ ಸಕತ್!”
“ಆಮ್ಚ್ಯಾ ಮೊಗಾಚ್ಯಾಂಕ್ ಮೆಳ್ತಾನಾ ಹಾಂವ್ ತುಜೊ ಮೋಗ್ ಕರ್ತಾಂ ( I Love You ) ಮ್ಹಣ್ ಆಮಿ ಮ್ಹಣ್ಚೆಂ ಆಸಾ. ಹಾಚೊ ಅರ್ಥ್ ಹಾಂವ್ ತುವೆಂ ಜಿಯೆಂವ್ಚೆಂ ಆಶೆತಾಂ ಮ್ಹಣ್ ಅರ್ಥ್. ಪೂಣ್ ಆಜ್ ಆಮಿ ಆಮ್ಚೆ ಸಾಂಗಾತಾ ಜಿಯೆಂವ್ಚ್ಯಾ ಹರ್ಯೆಕ್ಲ್ಯಾಕ್ ಹಾಂವ್ ತುಜೊ ಮೋಗ್ ಕರ್ತಾಂ ಮ್ಹಣ್ ಧಯ್ರಾನ್ ಸಾಂಗ್ಚ್ಯಾ ಪರಿಸ್ಥಿತೆರ್ ಆಸಾಂವ್‌ಗೀ ? ” ಮ್ಹಣ್ ಧರ್ಮಾಧ್ಯಕ್ಷಾನ್ ದುಬಾವ್ ಉಚಾರ‍್ಲೊ.
ಮುಕಾರುನ್ ತಾಣೆ ಮ್ಹಳೆಂ “ಜೆಜುನ್ ಆಪ್ಲಿ ಜೀಣ್, ಹೆರಾಂಚಿಂ ಪರ್ವಾ ಕರುನ್, ವಾಂಟುನ್ ಜಿಯೆವ್ನ್, ದುಸ್ಮಾನಾಂಕೀ ಭೊಗ್ಸುನ್ ಆನಿ ಕೊಣಾಯ್ಚೊ ದ್ವೇಶ್ ಕರಿನಾಸ್ತಾನಾ ಮೊಗಾನ್ ಜಿಯೆಂವ್ಚೆ ಮಾರಿಫಾತ್ ಸಮಾಜೆಕ್ ದೇಖ್ ದಿಲಿ. ದ್ವೇಶ್ ಆನಿ ಬೆಪಾರ್ವೊ ಹೆರಾಂಕ್ ಜಳಂವ್ಚ್ಯಾ ಪಯ್ಲೆಂ ಆಮ್ಕಾಂಚ್ ಗೊಬೊರ್ ಕರ್ತಾ. ಆಮ್ಚೆಂ ಅಂತಸ್ಕರ್ನ್ ನಾಸ್ ಕರ್ತಾ. ಆಮ್ಚೆ ಭಿತರ್ಲೆಂ ಬರೆಂಪಣ್ ನಾಸ್ ಜಾಲ್ಲ್ಯಾನ್ ಆಮಿ ಫಕತ್ ಚಲ್ಚಿಂ ಮೊಡಿಂ ಜಾವ್ನ್ ಬದಲ್ತಾಂವ್”
“ಆಜ್ ಸ್ವಚ್ಛ್ ಭಾರತಾಖಾತಿರ್ ‘ಗೋ ಗ್ರೀನ್’ ಮ್ಹಣ್ ಆಮಿ ಸಗ್ಳಿಂ ಉಲಯ್ತಾಂವ್. ಪೂಣ್ ದ್ವೇಶ್ ಆನಿ ಬೆಪಾರ್ವೊ ನಾತ್‌ಲ್ಲೆಂ ನಿರ್ಮಳ್ ಮನ್ ಆನಿ ನಿತಳ್ ಕಾಳಿಜ್ ಕಿತ್ಯಾಕ್ ರುತಾ ಕರಿನಾಂವ್ ?” ಮ್ಹಣ್ ತಾಣೆ ಪ್ರಭುತ್ವಾಕ್ ಪರೋಕ್ಷ್ ಥರಾನ್ ಸವಾಲ್ ಕೆಲೆಂ.
“ಹೆಂ ನತಾಲ್ ಆಮಾಂ ಸರ್ವಾಂಕ್ ದ್ವೇಶ್ ಆನಿ ಬೆಪಾರ್ವೊ ನಾತ್‌ಲ್ಲೆಂ ನಿತಳ್ ಕಾಳಿಜ್ ಆನಿ ನಿರ್ಮಳ್ ಮನ್ ರುತಾ ಕರುಂಕ್ ಏಕ್ ಪಂಥಾಹ್ವಾನ್ ಜಾಂವ್ದೀ. ನತಾಲಾಂಚ್ಯಾ ನಿಬಾನ್ ತರೀ ಆಮ್ಚ್ಯಾ ಸೆಜಾರಾಂತ್ ಆನಿ ಪರಿಸರಾಂತ್ ಆಮಿ ದೆವಾಕ್ ದೆಕ್ಚೆಪರಿಂ ಜಾಂವ್ದೀ.” ಮ್ಹಳ್ಳ್ಯಾ ಆಶಯಾಸವೆಂ ಧರ್ಮಾಧ್ಯಕ್ಶ್ ಅ|ಮಾ|ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾನ್ ಸರ್ವಾಂಕ್ ನತಾಲಾಂ ಪರ‍್ಬೆಚೆ ಶುಭಾಶಯ್ ಪಾಟಯ್ಲೆ.
ಕಾರ್ಯಾಚ್ಯಾ ಸುರ್ವೆರ್ ಧರ್ಮಾಧ್ಯಕ್ಷ್ ಸಲ್ಡಾನ್ಹಾ ಹಾಣಿ ನತಾಲಾಂಚಿಂ ಕೇಕ್ ಕಾತರ್ಲಿ.
ಲಾಯಿಕ್ ಸರ್ವಜಣಿಕ್ ಸಂಪರ್ಕ್ ಅಧಿಕಾರಿ ರೊಯ್ ಕಾಸ್ತೆಲಿನೊನ್ ಯೆವ್ಕಾರ್ ಮಾಗೊನ್ ಕಾರ್ಯೆಂ ಚಲವ್ನ್ ವೆಲೆಂ. ಧಾರ್ಮಿಕ್ ಸರ್ವಜಣಿಕ್ ಸಂಪರ್ಕ್ ಅಧಿಕಾರಿ ಮಾ| ದೊ| ಜೆ.ಬಿ. ಸಲ್ಡಾನ್ಹಾ ಹಾಣಿ ದಿನ್ವಾಸ್ ಪಾಟಯ್ಲೆ.
ಹ್ಯಾ ಸಂದರ್ಭಾರ್ ದಿಯೆಸೆಜೆಚ್ಯಾ ಗೊವ್ಳಿಕ್ ಪರಿಷದೆಚೊ ಕಾರ್ಯದರ್ಶಿ ಜೊನ್ ಡಿ’ಸಿಲ್ವ, ದಿಯೆಸೆಜಿಚೊ ಚಾನ್ಸಲರ್ ಮಾ| ಬಾ|ವಿಕ್ಟರ್ ಜೋರ್ಜ್ ಡಿ’ಸೊಜಾ, ಪ್ರೊಕ್ಯುರೇಟರ್ ಮಾ| ಬಾ| ವಿಜಯ್ ವಿಕ್ಟರ್ ಲೋಬೊ, ಕೆನರಾ ಸಂಪರ್ಕ್ ಕೆಂದ್ರಾಚೊ ನಿರ್ದೇಶಕ್ ಮಾ| ಬಾ| ಅನಿಲ್ ಐವನ್ ಫೆರ್ನಾಂಡಿಸ್, ಎಸ್ಟೇಟ್ ಮ್ಯಾನೇಜರ್ ಮಾ| ಬಾ| ಮ್ಯಾಕ್ಸಿಮ್ ರೊಜೆರಿಯೊ, ರಾಕ್ಣೊ ಪತ್ರಾಚೊ ಸಂಪಾದಕ್ ಮಾ| ಬಾ| ವಲೇರಿಯನ್ ಫೆರ್ನಾಂಡಿಸ್, ನಿಯೋಜಿತ್ ಸಂಪಾದಕ್ ಮಾ| ಬಾ| ರೂಪೇಶ್ ಮಾಡ್ತಾ , ಹೆರ್ ಯಾಜಕ್ ಆನಿ ಮಾಧ್ಯಮ್ ಸಂಯೋಜಕ್ ಎಲಿಯಾಸ್ ಫೆರ್ನಾಂಡಿಸ್ ಹಾಜರ್ ಆಸ್ಲೆ.
ಫಕತ್ ಭಾಷಣಾಂನಿ, ಶೆರ್ಮಾಂವಾಂನಿ ಉತ್ತೀಮಯ್ ದಾಕೊಂವ್ಚಿ ತಾಂಕ್ ಎಕಾ ಕಾರ್ಯಾಳ್ ಸಮುದಾಯಾಕ್ ಮುಕೇಲ್ಪಣ್ ದೀಂವ್ಕ್ ಪಾವನಾಂ. ಪಂಥಾಹ್ವಾನಾಂ ಫುಡ್ ಕರ್ಚೆಂ ಧಯ್ರ್ ಜಾಯ್ಜೆ.