ಲ್ಯಾನ್ಸಿ ನೊರೊನ್ಹಾಚಿ ನತಾಲಾಂ ಕಾಣಿಕ್ ‘ಮೋಗ್ ಆನಿ ಬಾಂದ್ಪಾಸ್’

ಸಂಗೀತ್ ರಸ್ ಬಿರುದಾನ್ ಕೊಂಕ್ಣಿ ಸಂಗೀತ್ ಪ್ರೆಮಿಂಕ್ ತಶೆಂ ಕಲಾರಸಿಕಾಂಕ್ ಮೊಗಾಚೊ ಲ್ಯಾನ್ಸಿ ನೊರೊನ್ಹಾ ಬೆಳ್ಳೂರ್, ಕೊಂಕ್ಣಿ ಕಲಾಪ್ರೇಮಿಂ ಖಾತಿರ್ ನತಾಲಾಂಚಿ ಕಾಣಿಕ್ ಜಾವ್ನ್ ಘೆವ್ನ್ ಯೆತಾ, ಶಯ್ಲ್ಯಾನ್ ದುಬಯ್, ನಿರ್ಮಾಣ್ ಸಂಸ್ಥ್ಯಾಚಿ, 2021 ವ್ಯಾ ವರ್ಸಾಚಿ ಮಹತ್ವಾಕಾಂಕ್ಷಿ ಯೆವ್ಜಣ್ ಮೋಗ್ ಆನಿ ಬಾಂದ್ಪಾಸ್. ಸುಕ್ರಾರಾ, ದಸೆಂಬರ್ 24 ತಾರಿಕೆರ್, ನತಾಲಾಂ ಫೆಸ್ತಾಚ್ಯಾ ಆದ್ಲ್ಯಾ ದಿಸಾ, ಗಲ್ಫಾಚೊ ವೇಳ್ ಜುಸ್ತ್ ಸಾಂಜೆಚ್ಯಾ 6 ವ್ಹರಾಂಚೆರ್ ಆನಿ ಭಾರತೀಯ್ ವೇಳ್ ಸಾಂಜೆಚ್ಯಾ 7.30 ವ್ಹರಾಂಚೆರ್ ಮೋಗ್ ಆನಿ ಬಾಂದ್ಪಾಸ್ ವಿಡಿಯೊ ಪದ್ ಜಾಳಿ ಆಕಾಸಾರ್ ಲೊಕಾರ್ಪಣ್ ಜಾತಾಲೆಂ.

ಪಾಟ್ಲ್ಯಾ ವರ್ಸಾಂನಿ ಸಂಗೀತ್ ವಿಡಿಯೊ, ಕೊವ್ಳ್ಯೊ, ಸಂಗೀತ್ ಕಾರ್ಯಾವಳಿ ಆನಿ ನಾಟಕಾಂ  ಮುಕಾಂತ್ರ್, ಕೊಂಕ್ಣಿ ಸಂಗೀತ್ ಆನಿ ಸಾಂಸ್ಕೃತಿಕ್ ಸಂಸಾರಾಂತ್ ಆಪ್ಲ್ಯಾ ವಿಶಿಷ್ಠ್ ಆನಿ ವಿಬಿನ್ನ್ ಶಯ್ಲೆನ್ ಲ್ಯಾನ್ಸಿನ್ ಆಪ್ಲಿ ಖಾಸ್ ಮ್ಹೊರ್ ಮಾರ್ಲ್ಯಾ ಆಸುನ್, ಪ್ರಸ್ತುತ್ ಮೋಗ್ ಆನಿ ಬಾಂದ್ಪಾಸ್ ಸಂಗೀತ್ ವಿಡಿಯೊ, ಲ್ಯಾನ್ಸಿನ್ 2017 ವ್ಯಾ ವರ್ಸಾ ಬರಯಿಲ್ಲ್ಯಾ ಸಗ್ಳೆಂ ಗೋಲ್ಮಾಲ್ ನಾಟಕಾಚೆಂ ಸಂಕ್ಶಿಪ್ತ್ ರೂಪ್ ಜಾವ್ನಾಸಾ.

“ಹ್ಯಾ ಪದಾಂತ್ ತಶೆಂ ವಿಡಿಯೊಂತ್ ತರ್ನೊ ಮೋಗ್, ಮೊಗಾಚಿಂ ಸಿಂತೆಮೆಂತಾಂ, ಜಿವಿತಾಚೆ ಆಟೆವಿಟೆ, ಸಂತೊಸಾಚಿಂ ತಶೆಂ ದುಕಾಚಿಂ ಖಿಣಾಂ ಧರ್ನ್ ದವರ್ಚೆಂ ಪ್ರಾಮಾಣಿಕ್ ಪ್ರೇತನ್ ಕೆಲಾಂ” ಮ್ಹಣ್ತಾ ಮೊಗಾ ಸಾಗೊರ್ ಲ್ಯಾನ್ಸಿ ನೊರೊನ್ಹಾ. “ಸಾಂಗಾತಾ ಆಜ್ ಕಾಲ್  ಮನ್ಶ್ಯಾಸಂಬಂದಾಂನಿ ದಿಸೊನ್ ಯೆಂವ್ಚಿ ನಾಟಕೀಯತಾ ಆನಿ ಹಾಸ್ಯಸ್ಪದ್ ಸನ್ನಿವೇಶಾಂಯ್ ಪಿಂತ್ರಾಯ್ಲ್ಯಾತ್”

ಶಯ್ಲ್ಯಾನ್ ದುಬಯ್ ಹ್ಯಾ ನಿರ್ಮಾಣ್ ಸಂಸ್ಥ್ಯಾನ್ ಮೋಗ್ ಆನಿ ಬಾಂದ್ಪಾಸ್ ನಿರ್ಮಾಣ್ ಕೆಲಾಂ ಆಸುನ್, ಸಂಗೀತ್ ರಸ್ ಲ್ಯಾನ್ಸಿ ನೊರೊನ್ಹಾ, ಬೆಳ್ಳೂರ್ – ದುಬಯ್ ಹಾಣೆ ಕಾಣಿ ಗುಂತುನ್, ಪದಾಚಿಂ ಉತ್ರಾಂ ಬರವ್ನ್, ತಾಳೊ ಬಸಯ್ಲಾ. ಪಠ್ ಕಥಾ,  ಪರಿಕಲ್ಪನ್ ಆನಿ ನಿರ್ದೇಶನ್, ಲೈನಲ್ ಮಸ್ಕರೇನ್ಹಸ್ ಹಾಚೆಂ ತರ್, ಕುವೆಯ್ಟ್‌ಚ್ಯಾ ಎಎಲ್‌ಪಿ ಸಂಗೀತ್ ಪಂಗ್ಡಾನ್ ಸಂಗೀತ್ ದಿಲಾಂ. ಅನಿಲ್ ಆನಿ ಲವೀನಾ ಪ್ರಫುಲ್ಲಾ ಫಾಯ್ಸ್, ಕುವೆಯ್ಟ್ ಹಾಣಿ ಪದ್ ಗಾವ್ನ್ ವಿಡಿಯೊಂತ್ ನಟನ್ ಕೆಲಾಂ. ಎಲ್ಸ್ಟನ್ ಗೋಮ್ಸ್, ಕುವೆಯ್ಟ್ ಹಾಣೆ ಟ್ರಂಪೆಟ್ ಆನಿ ಸ್ಯಾಕ್ಸಪೋನ್ ವಾಜಯ್ಲಾಂ. ಪ್ರಶಾಂತ್ ಫೆರಾವೊ, ಐಡಾ ಲೋಬೊ, ಬ್ಲೆನ್ ಡಿ’ಸೊಜಾ, ವೃಂದಾ ಲೂವಿಸ್, ಸತೀಶ್ ಸಲ್ದಾನ್ಹಾ, ಲಿನೊನ್ ಪೆರಿಸ್ ಅನಿ ಜೊನ್ಸನ್ ದಲ್ಮೇದಾ ಹಾಣಿ ಸಹ ಕಲಾಕಾರ್ ಜಾವ್ನ್ ವಿಡಿಯೊಂತ್ ಸಾಂಗಾತ್ ದಿಲಾ.

ಪಾಟ್ಲ್ಯಾ 36 ವರ್ಸಾಂ ಪಾಸುನ್ ಕೊಂಕ್ಣಿ ಸಂಗೀತ್ ಆನಿ ಕಲಾ ಶೆತಾಂತ್ ಖಳ್ಮಿತ್ ನಾಸ್ತಾಂ ವಾವುರ್ಚೊ ಲ್ಯಾನ್ಸಿ ನೊರೊನ್ಹಾ ಮುಳಾನ್ ಬೆಳ್ಳೂರ್ ಫಿರ್ಗಜೆಚೊ. ಪ್ರಸ್ತುತ್ ಕುಟ್ಮಾಸಾಂಗಾತಾ ದುಬಂಯ್ತ್ ವಸ್ತಿ ಕರುನ್ ಆಸಾ. ಜಿಣ್ಯೆ ಪಯ್ಣಾಂತ್ ಲ್ಯಾನ್ಸಿಕ್ ಸಾಂಗಾತ್ ದಿಂವ್ಚಿ ಪತಿಣ್ ಶಾಯ್ನಾ, ಸಂಗೀತ್ ಪಯ್ಣಾಂತೀ ತಾಕಾ ಮೊಟೊ ಸಾಂಗಾತ್ ದೀವ್ನ್ ಆಸಾ. ಕೊಂಕ್ಣಿ ಸಂಗೀತ್ ಶೆತಾಕ್ ಲ್ಯಾನ್ಸಿನ್ ದಿಲ್ಲಿ ದೆಣ್ಗಿ ಲೆಕಾಕ್ ಧರುನ್ ಕಲಾಪ್ರೇಮಿಂನಿ ತಾಕಾ ಮೊಗಾ ಮಾಯ್ಪಾಸಾನ್ ಸಂಗೀತ್ ರಸ್ ಮ್ಹಳ್ಳೆಂ ಬಿರುದ್ ದಿಲಾಂ.

ಆಜ್ ಮೆರೆನ್ ಲ್ಯಾನ್ಸಿ ನೊರೊನ್ಹಾನ್ ಕೊಂಕ್ಣಿ, ತುಳು ಆನಿ ಕನ್ನಡ ಭಾಸಾಂನಿ 223 ಪದಾಂ ಬರಯ್ಲ್ಯಾಂತ್, ಆನಿ 32 ಭಕ್ತಿಕ್ ಗಿತಾಂ ಘಡ್ಲ್ಯಾಂತ್. ‘ಸೈರಿಕೆಚೊ ಮಾಲೊ’ ಆನಿ ‘ಸಗ್ಳೆಂ ಗೋಲ್‌ಮಾಲ್’ ಅಶೆಂ ದೋನ್ ನಾಟಕ್ ಬರಯ್ಲ್ಯಾತ್. ಮೋಗ್ ಆನಿ ಬಾಂದ್ಪಾಸ್ ವಿಡಿಯೊ ಆನಿ ಪದ್ ‘ಸಗ್ಳೆಂ ಗೋಲ್‌ಮಾಲ್’ ನಾಟಕಾಚೆಂ ಸಂಕ್ಶಿಪ್ತ್ ರೂಪ್ ಕಶೆಂ ಆಸಾ ಮ್ಹಣ್ತಾ ಲ್ಯಾನ್ಸಿ ನೊರೊನ್ಹಾ.

ಶಾಯ್ಲ್ಯಾನ್ ಮ್ಹಳ್ಳೆಂ ಸಂಗೀತ್ ಬ್ರ್ಯಾಂಡ್ ಆನಿ ನಿರ್ಮಾಣ್ ಸಂಸ್ಥೊ ರುತಾ ಕರುನ್ ಮೊಗಾ ಸಾಗೊರ್ (ಕೊಂಕ್ಣಿ ಪದಾಂ) ಆನಿ ಮರಿ ಮಾಯ್ (ಕೊಂಕ್ಣಿ ಭಕ್ತಿಕ್ ಗಿತಾಂ) ಅಶೆಂ ದೊನ್ ಕೊವ್ಳ್ಯೊ ತಾಣೆ ಫಾಯ್ಸ್  ಕೆಲ್ಯಾತ್. ದೆಶಾಂತ್ ಆನಿ ವಿದೇಶಾಂತ್ ಎಕುಣ್ 7 ಸಂಗೀತ್ ಕಾರ್ಯಾವಳಿ ಸ್ವಂತ್ ಖರ್ಚಾರ್ ಸಾದರ್ ಕೆಲ್ಯಾತ್. ಮಡೆಂಜಿ, ಅಮ್ಮ, ವಾಟೀಸ್ ವ್ಹಳಾದೆಗೆರಿ ಆನಿ ಮೊಗಾ ಉಲೊ ಅಶೆಂ 4 ವಿಡಿಯೊ ಕವರ್ ಪದಾಂ ನಿರ್ಮಾಣ್ ಕರುನ್ ಯೂ ಟ್ಯೂಬ್ ಚಾನೆಲಾಚೆರ್ ಫಾಯ್ಸ್ ಕೆಲ್ಯಾಂತ್.  ಹಿಂ ಪದಾಂ ತಾಚೆಂ ಯೂ ಟ್ಯೂಬ್ ಚ್ಯಾನೆಲ್ SHYLAN – You Tube  ಹಾಂಗಾಸರ್ ಪಳೆಂವ್ಕ್ ಮೆಳ್ತಾತ್. ಜಾಯ್ತ್ಯಾ ಸಂಘ್ ಸಂಸ್ಥ್ಯಾಂಚ್ಯಾಂ ಆಶಯ್ ಗೀತಾಂಕ್ ತಾಣೆಂ ತಾಳೊ ಬಸವ್ನ್ , ಸಂಗೀತಾನ್ ಸಜಯ್ಲಾಂ. ದುಬಂಯ್ತ್ 2009 ಪಾಸುನ್ ಶಾಯ್ಲ್ಯಾನ್ ಬ್ಯಾಂಡ್ ಆನಿ 2016 ವ್ಯಾ ಕೊಂಕಣ್ ತಾರಾಂ ದುಬಯ್ ಮ್ಹಳ್ಳೆಂ ಸಂಘಟನ್ ಬಾಂದುನ್ ಸುಸಜ್ಜಿತ್ ಕೊಂಕಣ್ ತಾರಾಂ ಬ್ರಾಸ್ ಬ್ಯಾಂಡ್ ತೋ ಚಲವ್ನ್ ಆಸಾ. ಪಾವ್ಟ್ ಮೆಳ್ತಾನಾ ನಾಟ್ಕುಳೆ, ಕವಿತಾ ಆನಿ ಚುಟುಕಾಂಯ್ ತೋ ಬರಯ್ತಾ.

ಎಕಾ ಬರ‍್ಯಾ ಸಂಗೀತ್ಗಾರಾ ಸಾಂಗಾತಾ ಲ್ಯಾನ್ಸಿ ಥಂಯ್, ಪರೋಪ್ಕಾರಿ ಮನಾಚೊ ಸಮಾಜ್ ಸೇವಕ್ ಜಿಯೆತಾ ದೆಕುನ್ ತಾಚ್ಯಾ ಚಡಾವತ್ ಸಂಗೀತ್ ಕಾರ್ಯಾವಳಿಂನಿ ಜಮೊ ಜಾಲ್ಲೊ ಆಯ್ವಜ್ ಸಮಾಜೆಂತ್ ಮೆರೆರ್ ಜಿಯೆಂವ್ಚ್ಯಾ ದುಬ್ಳ್ಯಾ ವರ್ಗಾಚ್ಯಾ ಲೊಕಾಚ್ಯಾ ಕುಮ್ಕೆಕ್ ಸದಾಂಚ್ ಆಮಾನತ್ ಆಸ್ತಾ. ಸಬಾರ್ ಭುರ್ಗ್ಯಾಂಚ್ಯಾ ಶಿಕ್ಪಾಕ್ ತೋ ಪೊರ್ದೊರ್ನ್ ಜಾವ್ನ್ ರಾವ್ಲಾ.

ಆಪ್ಣೆ ವಾಡ್ತಾನಾ ಹೆರಾಂನೀಯ್ ವಾಡಾಜೇ ಮ್ಹಳ್ಳ್ಯಾ ಸಮಾಜ್ ಬಾಂದ್ಚ್ಯಾ ಚಿಂತ್ಪಾನ್ ಶಾಯ್ಲ್ಯಾನ್ ನಿರ್ಮಾಣ್ ಸಂಸ್ಥ್ಯಾನ್ ಗಲ್ಫ್ ರಾಷ್ಟ್ರಾಂನಿ ಜಿಯೆಂವ್ಚ್ಯಾ ಜಾಯ್ತ್ಯಾ ಉದೆತ್ಯಾ ತಾಲೆಂತಾಂಕ್ ವೆದಿ ದಿಲ್ಯಾ ಮಾತ್ ನಯ್, ಫುಡಾರಾಂತ್ ಸಂಗೀತ್ ಶೆತಾಂತ್ ಉದೆವ್ನ್ ಯೆಂವ್ಚ್ಯಾ ಯುವ ತಾಲೆಂತಾಂಕ್ ಏಕ್ ವೆದಿ ಆಸಾ ಕರುಂಕ್ ಏಕ್ ಯೆವ್ಜಣ್ ಘಾಲ್ಯಾ. ಶಯ್ಲ್ಯಾನ್, ದುಬಯ್ – ಗಲ್ಫ್ ರಾಷ್ಟ್ರಾಂನಿ ಸಂಗೀತ್ ಶೆತಾಂತ್ ಪರ್ಜಳ್ಚೆಂ ನಾಂವ್ ಜಾವ್ನಾಸೊನ್, ಮೋಗ್ ಆನಿ ಬಾಂದ್ಪಾಸ್ ತಾಂಚ್ಯಾ ನಿರ್ಮಾಣಾಂತ್ ಜಾಂವ್ಚೆಂ 2021 ವ್ಯಾ ವರ್ಸಾಚೆಂ ಮಹತ್ವಾಕಾಂಕ್ಷಿ ಯೋಜನ್ ಜಾವ್ನಾಸಾ.

ಮೋಗ್ ಆನಿ ಬಾಂದ್ಪಾಸ್ ಟ್ರೇಯ್ಲರ್ ಹಾಂಗಾಸರ್ ಪಳೆವ್ಯೆತ್ :

SHYLAN – You Tube ಚ್ಯಾನೆಲಾಚೆರ್ ಸುಕ್ರಾರಾ. ಡಿಸೆಂಬರ್ 24 ತಾರಿಕೆರ್ ಮೋಗ್ ಆನಿ ಬಾಂದ್ಪಾಸ್ ವಿಡಿಯೊ ಲೊಕಾರ್ಪಣ್ ಜಾತಾಲೊ. ವೇಳ್ : ಸಾಂಜೆಚಿಂ 6 ವ್ಹರಾಂ ( ಗಲ್ಫಾಂತ್) 7.30 ವ್ಹರಾಂ ( ಭಾರತಾಂತ್ ). ಕೊಂಕ್ಣಿ ಸಂಗೀತ್ ಪ್ರೇಮಿ ಸದಾಂಚೆಪರಿಂ ಪಾಟಿಂಬೊ ದೀವ್ನ್  ಪಾಟ್ ಥಾಪುಡ್ತೆಲೆ ಮ್ಹಣ್ ಮೊಗಾಸಾಗೊರ್ ಲ್ಯಾನ್ಸಿ ನೊರೊನ್ಹಾ  ಆನಿ ಶಯ್ಲ್ಯಾನ್ ಸಂಸ್ಥ್ಯಾನ್ ವಿಶ್ವಾಸ್ ವೆಕ್ತ್ ಕೆಲಾ.