ಮಂಗಳೂರ ವಿಶ್ವ ಕೊಂಕಣಿ ಕೇಂದ್ರಾಚೆ ಪ್ರತಿಷ್ಠಿತ ‘ವಿಮಲಾ ವಿ. ಪೈ ವಿಶ್ವಕೊಂಕಣಿ ಸಾಹಿತ್ಯ ಪುರಸ್ಕಾರ’ ಪಾವಿಲೊ ಗೊಂಯಚೆ ಶ್ರೀ ದಾಮೋದರ ಮಾವಜೊ ಹಾಂಕಾ 57ವೇ ಜ್ಞಾನಪೀಠ ಪ್ರಶಸ್ತಿ ಪುರಸ್ಕಾರ ಲಾಭಲಾಂ.
ಹಾನ್ನಿ ಲ್ಹಾನ ಕಾಣಯೊ, ಕಾದಂಬರಿಕಾರ, ಅಂಕಣಕಾರ ಆನಿ ಚಿತ್ರಕಥಾ ಲೇಖಕ ಜಾವನು ತೀನಿ ಪರಂಪರಾ ಥಾವನ ಕೊಂಕಣಿಂತ ಬರಯತಾ ಆಸತಿ. ಹಾಂಕಾ ಗೊಂಯ ಕಲಾ ಅಕಾಡೆಮಿ ಪ್ರಶಸ್ತಿ ಆನಿ ಕೊಂಕಣಿ ಭಾಷಾ ಮಂಡಲ ಪ್ರಶಸ್ತಿಯ್ ಫಾವೊ ಜಾಲಾಂ. ಮೌಜೊ ಹಾಂಕಾ 2011-2012 ಇಸವಿ ಭಾರತ ಸರ್ಕಾರಾನ ಸಂಸ್ಕೃತಿ ಸಚಿವಾಲಯ ಮಾನಾಧಿಕ ಫೆಲೋಶಿಪ್ ದಿಲಾಂ. ಹಾನ್ನಿ 2019 ಇಸವಿಂತ ಮಂಗಳೂರ ವಿಶ್ವಕೊಂಕಣಿ ಕೇಂದ್ರ ಹಾಂಗಾ ಚಲ್ಲೆಲೆ ‘ಕಾಳಿಗಂಗಾ’ ಕನ್ನಡ ಅನುವಾದ ಕಾದಂಬರಿಚೆ ಲೋಕಾರ್ಪಣ ಕಾರ್ಯಾವಳಾಂತ ಮುಖೇಲ ಸೊಯರೆ ಜಾವನು ಉಪಸ್ಥಿತ ಆಶಿಲಿಂಚಿ. ಹಾಂಗೆಲೆ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಪುರಸ್ಕೃತ ಕಾದಂಬರಿ ‘ಕಾರ್ಮೇಲಿನ’ ಕನ್ನಡ ಆನಿ ಮಸ್ತ ಭಾಷೆಕ ಅನುವಾದ ಜಾಲಾಂ. ಬಹುವಚನ ಪ್ರಕಾಶನ ಸಂಸ್ಥೆನ ಹಾಂಗೆಲೆ ಆರತಾಚೆ ಕಾದಂಬರಿ ಕನ್ನಡ ಅನುವಾದ ಕರನ ಪ್ರಕಾಶನ ಕೆಲಾಂ. ಮಾವಜೊಲೆ ಕಾಣಿಯೊ ಇಂಗ್ಲಿಷ್, ಪೋರ್ಚುಗೀಸ್ ಆನಿ ಫ್ರೆಂಚ್ ಭಾಷೆಕ ಅನುವಾದ ಜಾಲಾಂ.
ಹಾಂಗೆಲೆ ‘ಸುನಾಮಿ ಸೈಮನ್’ ಕೊಂಕಣಿ ಕಾದಂಬರಿಕ 2011 ಇಸವಿಂತ ವಿಶ್ವ ಕೊಂಕಣಿ ಕೇಂದ್ರ ಥಾವನ ‘ವಿಮಲಾ ವಿ. ಪೈ ವಿಶ್ವ ಕೊಂಕಣಿ ಸಾಹಿತ್ಯ ಪುರಸ್ಕಾರ’ ಲಾಭಲಾಂ.
ಕೊಂಕಣಿ ಸಾಹಿತ್ಯಾಕ 2 ಚೆ ಜ್ಞಾನಪೀಠ ಪ್ರಶಸ್ತಿ ಹಾಡಚೆ ಮುಖಾಂತರ ಜಗಭರ ಕೊಂಕಣಿ ಜನಾನ ಅಭಿಮಾನ ಜಾವಚೆ ತಶಿಂ ಕೆಲೆಲೆ ಶ್ರೀ ದಾಮೋದರ ಮಾವಜೊ ಹಾಂಕಾ ವಿಶ್ವ ಕೊಂಕಣಿ ಕೇಂದ್ರ ಸ್ಥಾಪಕ ಅಧ್ಯಕ್ಷ ಶ್ರೀ ಬಸ್ತಿ ವಾಮನ ಶೆಣೈ ಆನಿ ವಿಶ್ವಸ್ಥ ಮಂಡಳಿಚೆ ಸರ್ವ ಪಧಾದಿಕಾರಿಂನಿ ಕಾಳಜಾ ಥಾವನ ಅಭಿನಂದನ ಭೆಟಯಲಾಂ.
