ವಿಶ್ವ ಕೊಂಕಣಿ ಕೇಂದ್ರ : ಶ್ರೀ ಟಿ. ವಿ. ರಮಣ ಪೈ ಆನಿ ಶ್ರೀಮತಿ ವಿಮಲಾ ವಿ. ಪೈ ವಸತೆ ಘರ ದಶಮಾನೋತ್ಸವ ಸಂಭ್ರಮ

ವಿಶ್ವ ಕೊಂಕಣಿ ಕೇಂದ್ರ ಥಾವನ ಶ್ರೀ ಟಿ. ವಿ. ರಮಣ ಪೈ ಆನಿ ಶ್ರೀಮತಿ ವಿಮಲಾ ವಿ. ಪೈ ವಸತೆ ಘರ ದಶಮಾನೋತ್ಸವ ಸಂಭ್ರಮ 11-11-2021 ತಾರ್ಕೆರ ವಿಶ್ವ ಕೊಂಕಣಿ ಕೇಂದ್ರಾಂತ ಉಗ್ತಾವಣ ಜಾಲೆಂ.

ಕಾರ್ಯಕ್ರಮಚೆ ಸುರವೇಕ ಗಣಹೋಮ ಆನಿ ಸರಸ್ವತಿ ಪೂಜಾ ಜಾಲೆಂ. ನಂತರ ವಿಶ್ವ ಕೊಂಕಣಿ ಕೇಂದ್ರ ಸ್ಥಾಪಕ ಅಧ್ಯಕ್ಷ ಬಸ್ತಿ ವಾಮನ ಶೆಣೈ ಹಾನ್ನಿ ದಿವೊ ಲಾವನ ಉಗ್ತಾವಣ ಕೆಲೆಂ.

ಹ್ಯಾ ಸಂಭ್ರಮಾರಿ ವಿಶ್ವ ಕೊಂಕಣಿ ಕೇಂದ್ರಾಚೆ ಆಂಗಣಾಂತ ವಿಶ್ವ ಕೊಂಕಣಿ ಕೇಂದ್ರ ವಿಶ್ವಸ್ಥ ಮಂಡಳಿಚೆ ಸದಸ್ಯಾಂನಿ ನಮೂನವಾರ ಝಾಡ-ಸಸಿ ವೊಂಯಚೆ ಕಾರ್ಯವಳ ಚಲ್ಲೆಂ. ಹ್ಯಾ ಕಾರ್ಯಾವಳಿಂತ ಶ್ರೀ ಬಸ್ತಿ ವಾಮನ ಶೆಣೈ, ಮುಂಬಯಿ ಜ್ಯೋತಿ ಲ್ಯಾಬೊರೆಟರೀಸ ಸಂಸ್ಥೆ ಮುಖೇಲ ಶ್ರೀ ಉಲ್ಲಾಸ ಕಾಮತ, ವಿಶ್ವ ಕೊಂಕಣಿ ಕೇಂದ್ರ ಉಪಾಧ್ಯಕ್ಷ ಶ್ರೀ ಕುಡ್ಪಿ ಜಗದೀಶ ಶೆಣೈ ಆನಿ ಶ್ರೀ ಗಿಲ್ಬರ್ಟ್ ಡಿಸೋಜಾ, ವಿಶ್ವ ಕೊಂಕಣಿ ವಿದ್ಯಾರ್ಥಿ ವೇತನ ನಿಧಿ ಅಧ್ಯಕ್ಷ ಶ್ರೀ ರಾಮದಾಸ ಕಾಮತ ಯು, ಕಾರ್ಯದರ್ಶಿ ಶ್ರೀ ಪ್ರದೀಪ ಜಿ. ಪೈ, ಶಾಳೆಂತ ಕೊಂಕಣಿ ಶಿಕ್ಷಣಾಚೆ ಮುಖೇಲ ಡಾ. ಕೆ. ಮೋಹನ ಪೈ, ಕುಡಾಳ ದೇಶಸ್ಥ ಆದ್ಯ ಗೌಡ ಬ್ರಾಹ್ಮಣ ಸಂಘಾಚೆ ಅಧ್ಯಕ್ಷ ಶ್ರೀ ಡಿ. ರಮೇಶ ನಾಯಕ, ಅಖಿಲ ಭಾರತ ಕೊಂಕಣಿ ಖಾರ್ವಿ ಮಹಾಜನ ಸಭಾ ಅಧ್ಯಕ್ಷ ಶ್ರೀ ಕೆ. ಬಿ. ಖಾರ್ವಿ, ಟ್ರಸ್ಟಿ ಶ್ರೀ ಉಳ್ಳಾಲ ರಾಘವೇಂದ್ರ ಕಿಣಿ, ಶ್ರೀಮತಿ ಶಕುಂತಲಾ ಆರ್. ಕಿಣಿ, ವಿಶ್ವ ಕೊಂಕಣಿ ಸ್ತ್ರೀ ಶಕ್ತಿ ಮಿಶನ್ ಸಂಚಾಲಕಿ ಶ್ರೀಮತಿ ಗೀತಾ ಸಿ. ಕಿಣಿ, ಕೊಂಕಣಿ ಭಾಷಾ ಮಂಡಳಾಚೆ ಸದಸ್ಯಾ ಶ್ರೀ ಎಮ್. ಆರ್. ಕಾಮತ, ಶ್ರೀಮತಿ ಮೀನಾಕ್ಷಿ ಎನ್. ಪೈ, ಕರ್ನಾಟಕ ಕುಡುಬಿ ಸಮಾಜೋದ್ದಾರಕ ಸಂಸ್ಥೆಚೆ ಶ್ರೀ ನಾರಾಯಣ ನಾಯ್ಕ, ಶ್ರೀ ಮೆಲ್ವಿನ್ ರೊಡ್ರಿಗಸ್ ಆನಿ ವಿಶ್ವ ಕೊಂಕಣಿ ಅಲ್ಯುಮಿನಿ ಛಾತ್ರಾಂ, ಉಪಸ್ಥಿತ ಆಶಿಲಿಂಚಿ.

ಹ್ಯಾಚಿ ಸಂಧರ್ಭಾರ ಮಣಿಪಾಲ ಗ್ಲೋಬಲ್ ಎಜುಕೇಶನ ಸಂಸ್ಥೆ ಚೆಯರ್‌ಮೆನ ಪದ್ಮಶ್ರೀ ಶ್ರೀ ಟಿ. ವಿ. ಮೋಹನದಾಸ ಪೈ ಹಾಂಗೆಲೆ ಪೋಟ್ರೆಟ್ (ಭಾವಚಿತ್ರ) ಮುಂಬಯಿ ಜ್ಯೋತಿ ಲ್ಯಾಬೊರೆಟರೀಸ ಸಂಸ್ಥೆ ಮುಖ್ಯ ಆಡಳಿತ ಅಧಿಕಾರಿ ಶ್ರೀ ಉಲ್ಲಾಸ ಕಾಮತ ಹಾನ್ನಿ ಅನಾವರಣ ಕೆಲೆಂ.

ತಶೀಂಚಿ ವಿಶ್ವ ಕೊಂಕಣಿ ಹಾಸ್ಟೆಲ್ ಬ್ಲಾಕಾಚೆ ಧಾ ವರಸಾಚೆ ಅಮೃತ ಕೊಂಕಣಿ (ಬ್ರೋಷರ್) ಮಾಹಿತಿ ಪತ್ರ ಮುಖೇಲ ಸೊಯರೆ ಶ್ರೀ ಉಲ್ಲಾಸ ಕಾಮತ ಹಾನ್ನಿ ಲೋಕಾರ್ಪಣ ಕೆಲೆಂ. ವಿಶ್ವ ಕೊಂಕಣಿ ಅಲ್ಯುಮ್ನಿ ಸಂಘಾಚೆ ಅಧ್ಯಕ್ಷಾ ಸ್ನೇಹಾ ವಿ. ಶೆಣೈ ಆನಿ ಕಾರ್ಯದರ್ಶಿ ವೆಂಕಟೇಶ ಪ್ರಭು ಹಾನ್ನಿ ಮಣಿಪಾಲ ಗ್ಲೋಬಲ್ ಎಜುಕೇಶನ ಸಂಸ್ಥೆ ಚೆಯರ್‌ಮೆನ ಪದ್ಮಶ್ರೀ, ಮಹಾ ಪೋಷಕು ಶ್ರೀ ಟಿ. ವಿ. ಮೋಹನದಾಸ ಪೈ ಹಾಂಕಾ ವರ್ಚುವಲ್ ಗೌರವ ಆನಿ ಸಮ್ಮಾನ ದಿವಚೆ ಕಾರ್ಯಾಂ ಚಲಾಯಸುನ್ ದಿಲ್ಲೆಂ.

ಶ್ರೀ ಟಿ. ವಿ. ಮೋಹನದಾಸ ಪೈ ಹಾನ್ನಿ ಸಮ್ಮಾನ ಸ್ವೀಕಾರ ಕರನು ಕೊಂಕಣಿ ಸಮಾಜ ಮುಖಾರ ಯೇವಕಾ ಜಾಲ್ಯಾರಿ ಯುವ ಜನಾಂನಿ ಮುಖಾರ ಯೇವಕಾ ಆನಿ ತಾಂಗೆಲೆ ಕ್ಷಮತಾ ವಾಡ್ಡೋವಕಾ, ಖಂಚೇಯ ದೇಶಾಕ ವಚ್ಚೂನು ವಾವರ ಕೊರುಂಕ ಆತ್ಮ ವಿಶ್ವಾಸಾನ ಮುಖಾರ ಯೇವಕಾ. ತಶೀಂಚಿ ಕೊಂಕಣೀ ಸಮುದಾಯ ಊಂಚ ಮಟ್ಟಾಕ ಪಾವೊವಚೆ ಉದ್ದೇಶ ವಿಶ್ವ ಕೊಂಕಣಿ ಕೇಂದ್ರಾಚೆ ಜಾವನ ಆಸಾ. ಅಶಿಂ ಛಾತ್ರಾಂಕ ಮಸ್ತ ಇತಲೆ ಶುಭ ಸಂದೇಶ ದಿಲೆಂ. ಹ್ಯಾಚ ಸಂಧರ್ಭಾರ ವಿಶ್ವ ಕೊಂಕಣಿ ಅಲ್ಯುಮ್ನಿ ವೆಬ್ ಸೈಟ್ (ourhome.konkanischolarship.com) ಶ್ರೀ ರಾಮದಾಸ ಕಾಮತ್ ಯು ಆನಿ ಶ್ರೀ ಪ್ರದೀಪ ಜಿ. ಪೈ ಹಾನ್ನಿ ಅನಾವರಣ ಕೆಲೆಂ.

ಕೊಂಕಣಿ ಕುಡುಬಿ, ಖಾರ್ವಿ ಆನಿ ಸಿದ್ದಿ ಸಮುದಾಯಾಚೆ 10 ಚೆರ್ಡುವಾಂಕ ದತ್ತು ಸ್ವೀಕಾರ ಘೆವನು ತಾಂಗೆಲೆ ಸಂಪೂರ್ಣ ಶಿಕವಣೆಚೆ ಜವಾಬ್ದಾರಿ ವಿಶ್ವ ಕೊಂಕಣಿ ಕೇಂದ್ರಾ ತರಪೇನ ಕರತಾಚಿ ಅಶಿಂ ಕ್ಷಮತಾ ಅಕಾಡೆಮಿ ಸಂಚಾಲಕ ಸಿ.ಎ. ಶ್ರೀ ಗಿರಿಧರ ಕಾಮತ ಹಾನ್ನಿ ಹಾಜ್ಜೆ ಬದ್ದಲ ವಿವರಣ ದಿಲೆಂ.

ವಿಶ್ವ ಕೊಂಕಣಿ ಪ್ರೇರಣಾ ಕಾರ್ಯಾವಳೀಚೆ ಮುಖೇಲ ಆನಿ ಆರ್ಥಿಕ ವಿಶ್ಲೇಷಕ ಮುಂಬಯಿಚೆ ಶ್ರೀ ಸಂದೀಪ ಶೆಣೈ ಹಾನ್ನಿ ಛಾತ್ರಾಂಕ ಉತ್ತಮ ವಿಚಾರ ಮಂಡನ ದಿಲೆಂ. ವಿಶ್ವ ಕೊಂಕಣಿ ಕೇಂದ್ರ ಖಜಾಂಚಿ ಶ್ರೀ ಬಿ. ಆರ್. ಭಟ್ ಹಾನ್ನಿ ದೇವು ಬರೆಂ ಕೊರೊ ಸಾಂಗಲೆಂ. ಆಕಾಶವಾಣಿ ಮಂಗಳೂರು ಆದಲೆ ಉದ್ಘೋಷಕಿ ಶ್ರೀಮತಿ ಶಕುಂತಲಾ ಆರ್. ಕಿಣಿ ಹಾನ್ನಿ ಕಾರ್ಯಕ್ರಮ ನಿರೂಪಣ ಕೆಲೆಂ.

12-11-2021 ತಾರ್ಕೆರಿ ಶ್ರೀ ಟಿ. ವಿ. ರಮಣ ಪೈ ಆನಿ ಶ್ರೀಮತಿ ವಿಮಲಾ ವಿ. ಪೈ ವಸತೆ ಘರ ದಶಮಾನೋತ್ಸವ ಸಂಭ್ರಮಾಚೆ ದುಸರೆ ದಿವಸಾಚೆ ಕಾರ್ಯಾವಳಯ ಸ್ಥಾಪಕ ಅಧ್ಯಕ್ಷ ಶ್ರೀ ಬಸ್ತಿ ವಾಮನ ಶೆಣೈ ಉಪಸ್ಥಿತಿರಿ ಚಲ್ಲೆಂ. ಚಲೆಲೆ ಸಮಾರೋಪ ಸಮಾರಂಭಾಂತ ವೆವೆಗಳೆ ವಿಷಯಾರ ಸಂಪನ್ಮೂಳ ವ್ಯಕ್ತಿಂನಿ ತಾಂಗೆಲೆ ವರದಿ ದಿಲೆಂ. ಚಲೆಲೆ ಮಹಿಳಾ ಸಮಾವೇಶಾಂತ (ಮೊಡರೇಟರ) ಸಂಪನ್ಮೂಳ ವ್ಯಕ್ತಿ ಜಾವನು ವಿಶ್ವ ಕೊಂಕಣಿ ಕೇಂದ್ರಾಚೆ ಸಂಘಟನಾ ಕಾರ್ಯದರ್ಶಿ ಸಿ. ಎ. ನಂದಗೋಪಾಲ ಶೆಣೈ ಹಾನ್ನಿ ಮಹಿಳಾ ಸಮಾವೇಶ ಕಾರ್ಯಕ್ರಮಾಚೆ ಮುಖೇಲಪಣ ಘೆತಲೆಂ. ಸಭೇಂತ ಮಹಿಳಾಂಕ ಸಶಕ್ತ ಜಾವನ, ಜಾವಕಾ ಜಾಲೆಲೆಂ ಕಾರ್ಯ ಬದ್ದಲ ಮಹಿಳಾ ಸ್ವ -ಉದ್ಯೋಗ, ಘರ ಆನಿ ಭಾಯಲೆ ಕಾಮಾ ಜವಾಬ್ದಾರಿ, ವ್ಯವಹಾರ ಕರಚೆ ತಶೀಂಚಿ ಮಹಿಳಂಕ ಶಿಕ್ಷಣಾಚೆ ಆನಿ ಆರ್ಥಿಕತೆ ಬದ್ದಲ ಅಶಿಂ ಖೂಬ ವಿಷಯಾರ ಭಾಸಾ ಭಾಸ ಚಲ್ಲೆಂ. ಚಲ್ಲೆಲೆ ಬಾಸಾ ಭಾಸ ಬದ್ದಲ ಸಂಪೂರ್ಣ ಮಾಹಿತಿ ತಾನ್ನಿ ದಿಲೆಂ. ವಾಟ್ಸ್‌ಪ್ ಸೆಲ್ಫ ಹೆಲ್ಫ ಗ್ರೂಪ್ ಕರನ ಸರ್ವ ಬಾಯಲ ಮನಶಾಂನಿ ಹರ ಏಕ ವಿಷಯಾರ ಮಾಹಿತಿ ಘೆವಕಾ ಆನಿ ಸಶಕ್ತ ಜಾವಕಾ, ತಶೀಂಚಿ ಹೆಂ ಸರ್ವ ವಾವರ ಮುಖಾರಸುನು ಕಾರ್ಯಗತ ಜಾವಚೆ ಬದ್ದಲಯ ತಾನ್ನಿ ವಿವರಣ ಸಾಂಗಲೆಂ. ಹೆಂ ಮಹಿಳಾ ಸಮಾವೇಶಾಂತ ಮಸ್ತ ಇತಲೆ ಮಹಿಳಾ ಅಭ್ಯರ್ಥಿಂ ಭಾಗಿ ಜಾಲಿಂಚಿ.

ತಶೀಂಚಿ ಕೊಂಕಣಿ ಖಾರ್ವಿ ಸಮುದಾಯಾಚೆ ಬದ್ದಲ ಭಾಸಾ ಭಾಸ ಚಲ್ಲೆಂ. ಹ್ಯಾ ಸಭೆಚೆ ಮುಖೇಲಪಣ ಅಖಿಲ ಭಾರತ ಕೊಂಕಣಿ ಖಾರ್ವಿ ಮಹಾಜನ ಸಭಾಚೆ ಅಧ್ಯಕ್ಷ ಶ್ರೀ ಕೆ. ಬಿ. ಖಾರ್ವಿ ಹಾನ್ನಿ ಘೆತಲೆಂ. ಶ್ರೀ ಮೋಹನ ಬಾನಾವಳೀಕಾರ, ಶ್ರೀ ಅಶೋಕ ಕಾಸರಗೋಡು ಆನಿ ಹೆರೆ ಮಾನೆಸ್ತ ಸಾಂಗಾತಾಕ ಭಾಸಾ ಭಾಸ ಚಲ್ಲೆಲೆ ವಿಷಯ ಶ್ರೀ ಅಶೋಕ ಕಾಸರಕೋಡ ಹಾನ್ನಿ ವೇದಿರಿ ವರದಿ ದಿಲೆಂ. ತಶೀಂಚಿ ಖಾರ್ವಿ ಸಮುದಾಯಾಚೆ ಮುಖಾರಸುನು ಜಾವಕಾ ಜಾಲೆಲೆಂ ವಾವರ ಬದ್ದಲ ಆನಿ ಕೌಶಲಾಭಿವೃದ್ಧಿ ಕಾರ್ಯಾಗಾರ, ಆರೋಗ್ಯ ವಿಮಾ, ದಾಖಲೀಕರಣ, ಬ್ಯಾಂಕ ಸೌಕರ್ಯ, ಜಾನಪದ, ಗೀತಗಾಯನ ಅಶಿಂ ಕೊಂಕಣಿ ಕಲೆಕ ಸಹಕಾರ ದಿವಚೆ ಬದ್ದಲ ವಿಚಾರ ಮಂಡನಾಚೆ ಮಾಹಿತಿ ದಿಲೆಂ. ಹೆಂ ಸರ್ವ ಕಾರ್ಯಾಕ ವಿಶ್ವ ಕೊಂಕಣಿ ಕೇಂದ್ರಾಕ ತಾನ್ನಿ ಆಭಾರ ಮಾನಲೆಂ.

ಕೊಂಕಣಿ ಕುಡುಬಿ ಸಮಾಜಾಚೆ ಬದ್ದಲ ಭಾಸಾ ಭಾಸ ಚಲ್ಲೆಂ. ಕರ್ನಾಟಕ ಕುಡುಬಿ ಸಮಾಜೋದ್ದಾರಕ ಸೇವಾ ಸಂಘ ಸದಸ್ಯ ಶ್ರೀ ನಾರಾಯಣ ನಾಯ್ಕ ಹಾನ್ನಿ ಸಭೆಚೆ ಮುಖೇಲಪಣ ಘೆತಲೆಂ ಕರ್ನಾಟಕ ಕುಡುಬಿ ಸಮಾಜೋದ್ದಾರಕ ಸೇವಾ ಸಂಘ ಅಧ್ಯಕ್ಷ ಶ್ರೀ ಪ್ರಭಾಕರ ನಾಯ್ಕ ಆನಿ ಹೆರ ಮಾನೆಸ್ತಾಂನಿ ಮೇಳನು ವಿಚಾರ ಮಂಡನ ಕೆಲ್ಲೆಂ. ಚಲ್ಲೆಲೆ ಭಾಸಾ ಭಾಸ ಬದ್ದಲ ಸಂಪೂರ್ಣ ಮಾಹಿತಿ ವರದಿ ಶ್ರೀ ನಾರಾಯಣ ನಾಯ್ಕ ಹಾನ್ನಿ ದಿಲೆಂ. ಕುಡುಬಿ ಸಮುದಾಯಾಚೆ ಸರ್ವೆ, ಸಂಸ್ಕಾರ ಕಾರ್ಯವಳ, ಹೋಳಿ, ಕುಡುಬಿ ನಾಚ್, ಮಹಿಳಾ ಚಿಂತನ, ಕೌಶಲ್ಯ ಅಭಿವೃದ್ಧಿ, ಸಂಹವನ ಸಾಮರ್ಥ್ಯ ಶಿಬಿರ, ಕೂಡು ಕಟ್ಟು ಸ್ವಾತಂತ್ಯ, ಕುಲ ಕಸುಬು, ಯುವ ಸಾಮರ್ಥ್ಯ ಅಶಿಂ ಮಸ್ತ ವಿಷಯಾರ ವಿಚಾರ ಮಂಡನ ಕೆಲೆಲೆ ವಯರ ವರದಿ ದಿಲೆಂ. ಆನಿ ವಿಶ್ವ ಕೊಂಕಣಿ ಕೇಂದ್ರಾ ಥಾವನ ಕೊಂಕಣಿ ಕುಡುಬಿ ಸಮಾಜಾ ಬದ್ದಲ ಆಸುಚೆ ಕಾಳಿಜಕ ತಾನ್ನಿ ಅಭಿನಂದನ ವ್ಯಕ್ತ ಕೆಲೆಂ.

ಕೊಂಕಣಿ ಶಿಕ್ಷಣ ವಿಷಯಾ ವಯರ ಭಾಸಾ ಭಾಸ ಚಲ್ಲೆಂ ಹಾಜೆ ಮುಖೇಲಪಣ ಶಾಳೆಂತ ಕೊಂಕಣಿ ಶಿಕ್ಷಣಾಚೆ ಮುಖೇಲ ಡಾ. ಮೋಹನ ಕೆ. ಪೈ ಹಾನ್ನಿ ಘೆತಲೆಂ. ಅಶಿಂ ವೆವೆಗಳೆ ಖೂಬ ವಿಷಯಾರ ಭಾಸಾ ಭಾಸ ಚಲ್ಲೆಂ. ತಾನ್ನಿ ಕೊಂಕಣಿ ಶಿಕ್ಷಣ ವಿಷಯಾ ವಯರ ಚಲ್ಲೆಂಲೆ ಭಾಸಾ ಭಾಸ ಬದ್ದಲ ವರದಿ ದಿಲೆಂ. ವಿಶ್ವ ಕೊಂಕಣಿ ಕೇಂದ್ರ ಥಾವನ ಕೊಂಕಣಿ ಶಿಕ್ಷಣಾ, ಕೊಂಕಣಿ ಪ್ರಬಂಧ, ಭಾಷಣ, ಚಿತ್ರಕಲಾ, ಲೋಕವೇದ, ಸಾಹಿತ್ಯ, ಕೊಂಕಣಿ ಚರ್ಚಾ ಗೋಷ್ಠಿ, ಅಶಿಂ ವೆವೆಗಳೆ ವಿಷಯಾರ ಕಾಮ ಚಲತ ಆಸಾ ಆನಿಕಯ ಮಸ್ತ ಇತಲೆ ವಾವರ ಜಾವಕಾ ಅಶಿಂ ಖೂಬ ಮಾಹಿತಿ ದಿಲೆಂ.

ವಿಶ್ವ ಕೊಂಕಣಿ ಕೇಂದ್ರ ಭಾಷಾ ಸಂಸ್ಥಾನ ನಿರ್ದೇಶಕ ಶ್ರೀ ಗುರುದತ್ತ ಬಂಟ್ವಾಳಕಾರ ಹಾನ್ನಿ ಕಾರ್ಯಕ್ರಮ ನಿರೂಪಣ ಕರನ ದೆವು ಬರೆಂ ಕೊರೊ ಸಾಂಗಲೆಂ. ವಿಶ್ವ ಕೊಂಕಣಿ ವಿದ್ಯಾರ್ಥಿ ವೇತನ ಅಲ್ಯುಮಿನಿ ವಿದ್ಯಾರ್ಥಿಂನಿ ಕೊಂಕಣಿ ಅಭಿಮಾನ ಗೀತ ಗಾಯಲೆಂ. ಅಶಿಂ ದೋನ ದಿವಸ ಶ್ರೀ ಟಿ. ವಿ. ರಮಣ ಪೈ ಆನಿ ಶ್ರೀಮತಿ ವಿಮಲಾ ವಿ. ಪೈ ವಸತೆ ಘರ ದಶಮಾನೋತ್ಸವ ಸಮಾರಂಭ ಸಂಭ್ರಮಾನ, ವಿಜೃಂಭಣೇರಿ ಚಲ್ಲೆಂ.