ಹೇಳುವುದು ಶಾಸ್ತ್ರ ಹಾಕುವುದು ಗಾಳ

ಹಾಂವ್ ಎಕಾ ಮೊರ್ನಾ-ವಿಧಿಕ್ ಹಾಜರ್ ಜಾಲ್ಲಲೊಂ. ಮೋರ್ನ್ ಪಾವ್ಲಲೊ ವ್ಯಕ್ತಿ ಎಕ್ ನಿವೃತ್ ಶಿಕ್ಶಕ್. ತೊ ಎಕ್ ಲೊಕಾಮೊಗಾಳ್ ಆಧುನಿಕ್ ಕೃಶಿಗಾರ್‌ಯಿ ಸಯ್.

ಆಪ್ಲಿಂ ಲಗ್ಬಗ್ ಸಾಟ್ ದಶಕಾಂ ಎಕಾ ಪ್ರಾಯ್ಮರಿ ಇಸ್ಕೊಲಾಂತ್ ಪಯ್ಲೆಂ ಎಕ್  ಮೆಸ್ತ್ರಿ ಜಾವ್ನ್, ಉಪರಾಂತ್ ಮುಖೆಲ್ ಮೆಸ್ತ್ರಿ ಜಾವ್ನ್,  ತಶೆಂ ಎಕ್ ಆದುನಿಕ್ ಕೃಶಿಗಾರ್ ಜಾವ್ನ್ ತಾಣೆಂ ಖರ್ಚಿಲ್ಲಿಂ ಆನಿ ಆಪ್ಲ್ಯಾ ಉತರ್ ಪ್ರಾಯೆರ್ ತೊ ದೆವಾ ಅದಿನ್ ಗೆಲ್ಲೊ.

ತಾಚ್ಯಾ ಮೊರ್ನಾ ವಿಧಿಕ್ ಜಾಯ್ತೆ ತಾಚೆ ವಿದ್ಯಾರ್ಥಿ, ಫಿರ್ಗಜೆಗಾರ್ ಆನಿ ವಾಡ್ಯಾಗಾರ್ ಹಾಜರ್ ಆಸ್ಲೆಲೆ. ಆಪ್ಲಿ ಜಿಣಿ ಎಕ್ ಖರೊ ಸಾದೊ ಅಧ್ಯಾಪಕ್ ಜಾವ್ನ್, ಆದರ್ಶ್ ವ್ಯಕ್ತಿಜಾವ್ನ್ ಎಕ್ ಸಮಾಜ್ ಸೆವಕ್ ಜಾವ್ನ್, ಸಾಂ ವಿಶೆಂತ್ ಪಾವ್ಲಾಚ್ಯಾ ಸೊಸಾಯ್ಟಿಚೊ ಅಧ್ಯಕ್ಶ್ ಜಾವ್ನ್ ತಾಣೆಂ ಖರ್ಚಿಲ್ಲಿಂ.

ಮಿಸಾವೆಳಿಂ ವಾಚಾಪ್ ಎಕಾ ಅಥ್ವ್ಯಾಚ್ ಜಿನ್ಸಾಚೆಂ. (ಮ್ಹಜ್ಯಾ ಕ್ರಿಸ್ತಾಂವ್ ಜಿಣೀಯೆಂತ್ ಹಾಂವೆಂ ಖುಧ್ ಮನನ್ ಕೆಲ್ಲ್ಯಾ ಪ್ರಮಾಣೆಂ ಸಬಾರ್ ಪಂಥಾ ಮೀಸಾಚೆಂ ವಾಚಾಪ್ ಸಂಧರ್ಬಾಕ್ ಸರಿ ಜಾಲ್ಲೆಂ ಆಸಾನಾ, ತೆಂ ವ್ಯತಿರಿಕ್ತ್ ಆಸ್ತಾ, ತೆಂ ತುಮೀಂಯ್ ಮನನ್ ಕೆಲಾಂ ಆಸ್ಯೆತ್.)

ಹಾಂಗಾಸರ್‌ಯಿ ತಸಲೆಂ ಎಕ್ ದ್ರಶ್ಟಾಂತ್ – ಎಕ್ ಪಾವ್ಟಿಂ ಎಕ್ ತರ್ನಾಟೊ ಜೆಜುಲಾಗಿಂ ಯೆತಾ ಆನಿ ವಿಚಾರಿ –  ಸರ್ಗೀಂಚೆಂ ರಾಜ್ ಜೊಡಿಜೆ ತರ್ ಆಪ್ಣೆಂ ಕಿತೆಂ ಕರುಂಕ್ ಜಾಯ್. ಜೆಜು ತಾಕಾ ಸಾಂಗ್ತಾ – ಸಗ್ಳ್ಯಾ ತುಜ್ಯಾ ಕಾಳ್ಜಾನ್, ಸಗ್ಳ್ಯಾ ತುಜ್ಯಾ ಸಕ್ತೆನ್, ಸಗ್ಳ್ಯಾ ತುಜ್ಯಾ ಕಾಳ್ಜಾನ್ ದೆವಾಚೊ ಮೋಗ್ ಕರ್ ಆನಿ ತಾಚೊ ಕೆಲ್ಲ್ಯಾ ಪರಿಂ ತುಜ್ಯಾ ಸೆಜಾರ್ಯಾಚೊ ಮೋಗ್ ಕರ್.

ಹೆಂ ಆಪ್ಣೆಂ ಯೆದೊಳ್‌ಚ್ ಕರ್ನ್ ಜಾಲಾಂ,  ಮ್ಹಣ್ತಾ ತೊ.

ತರ್ ವಚ್, ತುಜೆಂ ಧನ್ ದಿರ್ವೆಂ ವೀಕ್ ಆನಿ ಮ್ಹಜೊ ಪಾಟ್ಲಾವ್ ಕರ್, ಸಾಂಗ್ತಾ ಜೆಜು ತಾಕಾ.

ಹೆಂ ಆಯ್ಕೊನ್ ತೊ ತರ್ನಾಟೊ ನಿರಾಶಿ ಜಾತಾ ಆನಿ ಆಪ್ಲ್ಯಾ ವಾಟೆನ್ ಪಾಟಿಂ ವೆತಾ.

ಆತಾಂ ಪ್ರಸಂಗ್ ದಿಲ್ಲ್ಯಾ   ಯಾಜಕಾಚೆಂ ವಿವರಣ್ ಆಶೆಂ – ಮ್ಹಾಕಾ ಭಗ್ತಾ  ತ್ಯಾ ತರ್ನಾಟ್ಯಾನ್ ಸೊಮಿಯಾ ಥಾವ್ನ್ ಹಿಂ ಉತ್ರಾಂ ನಿರೀಕ್ಶ್ಯಾ ಕರುಂಕ್ ನಾಂತ್  ಆಸ್ಲಿಂ ಜಾಯ್ಜಾಯ್, ಬಹುಶ ತಾಣೆಂ ಚಿಂತ್ಲೆಲೆಂ ಕೀ ಜೆಜು ಸಾಂಗ್ತೊಲೊ – ವಚ್ ತುಂ ಎಕ್ ವ್ಹಡ್ ಶೊಪಿಂಗ್ ಮೊಲ್ ಉಘಡ್, ಯಾ ಎಕ್ ಮರ್ಸಿಡಿಸ್ ಬೆನ್ಜ್ ಕಾರ್ ಘೆ ಯಾ ವಡ್ ಆಸ್ತ್ ಮೊಲಾಕ್ ಘೆ  – ಪುಣ್ ಸರ್ಗಿಂಚೆಂ ರಾಜ್ ಜೊಡುಂಕ್ ಹ್ಯಾ ಸರ್ವಾಚಿ ಗರ್ಜ್ ನಾ ತೆಂ ಜೆಜು ಜಾಣಾ ಆಸ್ಲೊ.

ಮ್ಹಾಕಾ ಹೆಂ ವಾಚಾಪ್ ಆನಿ ಪ್ರಸಂಗ್ ಆಯ್ಕೊನ್ ವರ್ತೆಂ ಕೌತುಕ್ ಭಗ್ಲೆಂ. ಜಶೆಂ ಮರಣ್ ಪಾವ್ಲೆಲ್ಯಾ ವ್ಯಕ್ತಿಕ್ ಆನಿ ಹ್ಯಾ ವಾಚ್ಪಾಕ್ ಕಶೆಂಯ್ ಸಂಬಂಧ್ ನಾ ಆಸ್ಲೊ  , ತಶೆಂಚ್ ಮರಣ್ ಪಾವ್ಲೆಲ್ಯಾ ವ್ಯಕ್ತಿಕ್ ಆನಿ ತ್ಯಾ ಯಾಜಕಾಚ್ಯಾ ಉತ್ರಾಂಕ್‌ಯಿ ಕಾಂಯ್ ಸಂಬಂದ್ ನಾ ಆಸ್ಲೊ.

ಮರಣ್ ಪಾವ್ಲಲೊ ವ್ಯಕ್ತಿ ಆಪ್ಲ್ಯಾ  ಜಿಣಿಯೆಂತ್ ಸರ್ಗೀಂಚ್ಯಾ  ರಾಜಾಕ್ ಕಿತೆಂ ಸರ್ವ್ ಗರ್ಜ್ ಆಸಾ, ತೆಂ ಸರ್ವ್ ಕರ್ನ್ 92  ವರ್ಸಾಂಚ್ಯಾ ಫಳಾದಿಕ್ ಪ್ರಾಯೆರ್ ಮರಣ್ ಪಾವ್ಲಲೊ. ಎಕ್ ಮೊಗಾಳ್ ಪುತ್ ಜಾವ್ನ್, ಭಾವ್ ಜಾವ್ನ್, ಬಾಪಯ್ ಜಾವ್ನ್, ಎಕ್ ಆದರ್ಶ್ ಪತಿ ಜಾವ್ನ್, ಮೆಸ್ತ್ರಿ ಜಾವ್ನ್, ಕೃಶಿಕ್ ಜಾವ್ನ್, ಸಾಂ ವಿಶೆಂತ್ ಪಾವ್ಲ್ ಸಮಿತೆಚೊ ವಡಿಲ್ ಜಾವ್ನ್, ಎಕ್ ಆದರ್ಶ್ ಫಿರ್ಗಜೆಗಾರ್ ಜಾವ್ನ್ ತೊ ಆಪ್ಲಿ ಜಿಣಿ ಸಾರ್ಥಕ್ ರಿತಿರ್ ಜಿಯೆಲ್ಲೊ. ತಾಚ್ಯಾ ಜಿಣಿಯೆಚೆಂ ಧರ್ಶನ್ಂಚ್ ಹೆರಾಂಕ್ ಎಕ್ ದೇಖ್ ಜಾಂವ್ಕ್  ಪಾವ್ತೆಂ. ಖಂಡಿತ್ ಜಾವ್ನ್ ತ್ಯಾ ಯಾಜಕಾಕ್ ಸಾಂಗ್ಯೆತೆಂ, ಆಮಿ ಸರ್ವ್ ಹ್ಯಾ ಭಾಗಿವಂತ್ ಮೆಸ್ತ್ರಿಚಿ ಜೀಣ್ ಆಮ್ಚಿ ಮೇಲ್ ಫಾಂಕ್ತ್ ಕರ್ನ್ ಘೆವ್ಯಾಂ, ತ್ಯಾ ಜಿಣಿಯೆಚೊ ಪಾಟ್ಲಾವ್ ಕರ್ಯಾಂ, ಆಮಿ ಖಂಡಿತ್ ಜಾವ್ನ್ ಸರ್ಗಾರ್ ವೆತೆಲ್ಯಾಂವ್. ಶೊಪಿಂಗ್ ಮೊಲಾಚಿ, ಮರ್ಸಿಡಿಸಾಚಿ ದ್ರಶ್ಟಾಂತ್ ಸಾಂಗ್ಚಿ ಹಾಂಗಾಸರ್ ಗರ್ಜ್ ಆಸ್ಲೆಲಿ ಗಾಯ್?

ಆತಾಂ ಆಮ್ಚ್ಯಾ ಇಗರ್ಜ್ ಮಾತೆಚ್ಯಾ ಮಣಿಯಾರ‍್ಯಾಂಚಾ ಜಿಣಿಯೆಚೆರ್ ಎಕ್ ದೀಶ್ಟ್ ಘಾಲ್ಯಾಂ. ಸೊಮಿಯಾನ್ ಸಾಂಗ್ಲೆಲ್ಯಾ  ಸರ್ಗಿಂಚೆಂ ರಾಜ್ ಜೊಡ್ಚ್ಯಾ ದಿಶೆನ್ ತೆ ಜಿಯೆವ್ನ್ ಆಸಾತ್ ಗಾಯ್?

ವ್ಹಡ್ ಶೊಪಿಂಗ್ ಮೊಲಾಂ ತೆ ಚಲಯ್ತಾತ್, ವ್ಹಡ್ ವ್ಹಡ್ ಎಸ್ಟೆಟಾಂ ತಾಣಿಂ ಮೊಲಾಕ್ ಘೆತ್ಲ್ಯಾಂತ್, ವ್ಹಡ್ ಮೊಲಾಚಿಂ ವಾಹನಾಂ ತಾಂಚ್ಯಾ ಆಧಿನ್ ಆಸಾತ್, ( ಹ್ಯಾ  ಸೆರ್ಮಾಂವ್ ಸಾಂಗ್ಲೊಲೊ ಯಾಜಕ್‌ಯಿ ಎಕ್  ಘನ್-ವಾಹನ್  ಚಲಯ್ತಾ) ವ್ಹಡ್ ವಡ್ ಪ್ರಮಾಣಾಚಿಂ ಬಾಂದ್ಪಾಂ ಉದ್ಯಮಾಂ ತಾಂಚೆ ಆಧೀನ್ ಆಸಾತ್. ತಿಂ ಸರ್ವ್ ವಿಕುನ್ ಸೊಮಿಯಾಚೊ ಪಾಟ್ಲಾವ್ ಕರುಂಕ್ ಕೋಣ್ ತಾಂಕಾ ಆಡಾಯ್ತಾ?

ಕಿತ್ಯಾಕ್ ಹಿ ವಿಲಾಶಿ ಜಿಣಿ? ಕಿತ್ಯಾಕ್ ಹಿ ಸ್ಕಾಂದಲಾನ್ ಭರ್ಲೆಲಿ ಜಿಣಿ? ಸೊಮಿಯಾಚಿಂ ಉತ್ರಾಂ ಕೊಣಾಕ್? ಫಕತ್ ಪ್ರಸಂಗಾಚೆರ್ ಸಾಂಗೊಂಕ್ ಸಹಜಲ್ಲಿಂ ಆತ್ವಾ  ಹರ್ಯೆಕಾ ವ್ಯಕ್ತಿನ್  ಆಪ್ಲ್ಯಾ  ಜಿಣಿಯೆಂತ್ ಸ್ವತ:  ಪಾಳುಂಕ್ ಸಹಜ್ ಜಾಲ್ಲಿಂ? ನಹಿಂ ಫಕತ್ ಲಾಯಿಕ್ ವ್ಯಕ್ತಿನ್, ಬಗಾರ್ ಎಕಾ ಕ್ರೀಸ್ತಾಚ್ಯಾ ಶೆತಾಂತ್ ವಾವ್ರುಂಕ್ ಆಂಗವ್ಣ್ ಕೆಲ್ಲ್ಯಾ   ಧರ್ಮ್ ಬಾವಾನ್ ಆನಿ ಭಯ್ಣಿನ್ ಪರಯಾಂತ್?

ನಾಂತ್ ಗಾಯ್ ಆಮ್ಚ್ಯಾ ದಿಯೆಸೆಜಿಂತ್ ಥೊಡೆ ಧಾರ್ಮಿಕ್ ಬಾವ್, ವಿಲಾಶಿ ಆನಿ ಸ್ಕಾಂದಲ್ ಭರಿತ್ ಜಿಣಿ ಜಿಯೆಂವ್ಚೆ? ತಾಂಕಾ ಕೊಣಾಚಿ ಶಿಕೊಣ್ ಲಾಗು ಜಾತಾ? ಜೆ ಶೆರಾಂತ್ ವಡ್ ಬಾಂದ್ಪಾಂನಿ ಆಪ್ಲ್ಯಾ ಬಾವಾಂಚ್ಯಾ, ಭಯ್ಣಿಂಚ್ಯಾ ನಾಂವಾರ್ ಪ್ಲೇಟಾಂ ಕಾಣ್ಘೆವ್ನ್ ದವರ್ತಾತ್, ತಾಂಕಾಂ ಕಿತ್ಯಾಕ್ ಸರ್ಗಾರಾಜಾಂತ್ ದಾಯ್ಜ್ ಕಮಂವ್ಚ್ಯಾವಿಶ್ಯಾಂತ್ ಕಾಂಯ್ ಖಬಾರ್ ನಾ. ನಾಂತ್ ಗಾಯ್ ಆಮ್ಚೆ ದಿಯೆಸೆಜಿಂತ್ ಥೊಡೆ ಯಾಜಕ್ ವಿವಿಧ್ ವಾಟಾಂನಿಂ ದುಡು ಕಮಾಯ್ತಾತ್, ಉಪ್ರಾಂತ್ ಶಿರ್ಕೊನ್ ಪಡ್ತಾತ್ ಆನಿ ತಾಂಚೆರ್ ತನ್ಕಿ ಜಾಂವ್ಚ್ಯಾ ಬದ್ಲಾಕ್ ಪಯ್ಶಿಲ್ಯಾ ಫಿರ್ಗಜೆಕ್ ತಾಂಚೊ ವರ್ಗ್ ಜಾತಾ. ಹೆಂಚ್‍ಗಾಯ್ ಕ್ರೀಸ್ತಾನ್ ಶಿಕಯಿಲ್ಲೆಂ ಮಿಸಾಂವ್? ನಾಂತ್ ಗಾಯ್ ಅಮ್ಚೆ ಮಧೆಂ ಥೊಡೆ ಧಾರ್ಮಿಕ್ ಬಾವ್ ಜೆ ಸ್ಕಾಂದಲ್’ಭರಿತ್ ಜಿಣಿ ಜಿಯೆತಾತ್. ತಾಂಕಾ ಆಸಾಗಾಯ್, ಜೆಜುಚ್ಯಾ ಶಿಕವ್ಣೆ ಚಿ ಫರ್ವಾ?

ಕೊಣಾಕ್ ಆಮಿ ದೇಖ್ ದಿಂವ್ಚಿ, , ಕೊಣಾ ಥಾವ್ನ್ ಶಿಕ್ಚೆಂ ಆನಿ ಕೊಣಾಕ್ ಶಿಕಂವ್ಚೆಂ?

ಕನ್ನಡಾಂತ್ ಎಕ್ ಸಾಂಗ್ಣಿ ಆಸಾ – ಹೇಳುವುದು ಶಾಸ್ತ್ರ ,ಹಾಕುವುದು  ಗಾಳ.

ತೆಂಚ್ ಕರ್ತೆ ಆಸಾಂವ್ ನಹಿಂವ್ಗೆ  ಆಮಿ  ಜೆಜು ಕ್ರೀಸ್ತಾಚೆ ಸಾಕ್ಶಿ ಜಾವ್ನ್?

► ಹೇಮಾಚಾರ್ಯ

ಕಿಟಾಳಾರ್ ಹೇಮಾಚಾರ್ಯ ಬರ್ಪಾಂ ►

• ಕಾಮಿನಿ – ಗಜಗಾಮಿನಿ
• ಕೌನ್ ಬನೇಗಾ (ಕ) ರೋಡ್ ಪತಿ
• ಅಮ್ಚ್ಯಾ ಆವಯ್ಚೆಂ ನಿರ್ಗಮನ್
• ರಶ್ಯಾಕ್ ಬಚಾವ್ ಕರ್, ಬಚಾವ್ ಕರ್
• ಶೆರೊಫಿನ್ – ಕೆರೊಪಿನ್
• ಗಲ್ಪಾಚೆಂ ಅಪವ್ಣೆಂ