ಸೈಂಟ್ ಜೋನ್ಸ್ ಹೈಸ್ಕೂಲ್, ಪಾಂಗ್ಳಾ ಶಂಕರಪುರ ಹಾಂಗಾಚ್ಯಾ ಭುರ್ಗ್ಯಾಂಚ್ಯಾ ಶಿಕ್ಪಾಕ್ ಕುಮಕ್ ಜಾಂವ್ಚ್ಯಾ ದಿಶೆನ್, ಪತ್ರ್ಕರ್ತ್ ತಶೆಂ ಸಮಾಜ್ ಸೇವಕ್ ಶ್ರೀ ಅಲ್ಫೋನ್ಸ್ ಮೆಂಡೋನ್ಸಾ ಹಾಂಚ್ಯಾ ಮುಕೆಲ್ಪಣಾರ್ ಹೈಸ್ಕೂಲಾಚೆ ಆದ್ಲೆ ವಿದ್ಯಾರ್ಥಿ ಆನಿ ಹಿತಯ್ಶಿಂ ಥಾವ್ನ್ ಸುಮಾರ್ ರುಪಯ್ ಚಾರ್ ಲಾಖ್ ಜಮವ್ನ್, ಆಟ್ ಕಂಪ್ಯೂಟರಾಂ, ಬ್ಯಾಟರಿ, ಇನ್ವರ್ಟರಾಂ ಆನಿ ಇಂಟರ್ನೆಟ್ಟಾಚಿ ವೆವಸ್ಥಾ ಹೈಸ್ಕೂಲಾಕ್ ಹಾತಾಂತಾರ್ ಕರ್ಚೆಂ ಕಾರ್ಯಕ್ರಮ್ ಬುದ್ವಾರಾ, ಅಕ್ತೋಬ್ರಾಚ್ಯಾ ಸತ್ತಾವೀಸ್ ತಾರಿಕೆರ್ ಹೈಸ್ಕೂಲಾಚ್ಯಾ ಸಮುದಾಯ್ ಸಾಲಾಂತ್ ಚಲ್ಲೆಂ.
ಮುಕೆಲ್ ಸಯ್ರೊ ಶ್ರೀ ಅಲ್ಫೋನ್ಸ್ ಮೆಂಡೋನ್ಸಾ ಹಾಣಿ ಆಪುಣ್ ಮುಂಬಂಯ್ತ್ ಕಾಮ್ ಕರುನ್ ಆಸ್ತಾನಾ, 1984 ವ್ಯಾ ವರ್ಸಾ ಕಂಪ್ಯೂಟರ್ ಶಿಕೊಂಕ್ ಕಾಡ್ಲ್ಲಿ ವಾಂವ್ಟ್ ಉಡಾಸ್ ಕರುನ್, ಉಪ್ರಾಂತ್ ಅಬುದಾಭಿಂತ್ ವಿದೇಶಿ ಕಂಪ್ಣೆಂತ್ ಕಾಮ್ ಕರ್ತಾನಾ, ಕಶೆಂ ಮುಂಬಂಯ್ತ್ ಜೊಡ್ಲ್ಲೆಂ ಕಂಪ್ಯೂಟರ್ ಶಿಕಪ್ ಆನಿ ಆಪ್ಣಾಯಿಲ್ಲಿ ಜಾಣ್ವಾಯ್ ವಾಪರ್ನ್ ಜಿಣ್ಯೆಂತ್ ಯಶಸ್ವೀ ಜಾಲೊಂ ಮ್ಹಳ್ಳೆವಿಶ್ಯಾಂತ್ ಆಪ್ಲೆ ರೋಚಕ್ ಅನ್ಭೊಗ್ ಭುರ್ಗ್ಯಾಂ ಸಾಂಗಾತಾ ವಾಂಟುನ್ ಘೆತ್ಲೆ. “ಕಂಪ್ಯೂಟರ್ ಶಿಕಪ್ ಆನಿ ಜಾಣ್ವಾಯ್ ಆಯ್ಚ್ಯಾ ಕಾಳಾರ್ ಹರ್ಯೆಕಾ ಶೆತಾಂತ್ ಬೋವ್ ಗರ್ಜೆಚಿ. ದೆಕುನ್ ಇಸ್ಕೊಲಾ ಹಂತಾರ್ಚ್ ಕಂಪ್ಯೂಟರ್ ಶಿಕ್ಪಾಂತ್ ವಿದ್ಯಾರ್ಥಿಂನಿ ವಿಶೇಸ್ ಆಸಕ್ತ್ ಘೆವ್ನ್ ಶಿಕ್ಚೆಂ ಬರೆಂ” ಮ್ಹಣ್ ಶ್ರೀ ಅಲ್ಪೋನ್ಸ್ ಮೆಂಡೋನ್ಸಾ ಹಾಣಿ ವಿದ್ಯಾರ್ಥಿಂಕ್ ಉಲೊ ದಿಲೊ.
ಹೈಸ್ಕೂಲಾಚೊ ಸಂಚಾಲಕ್ ಮಾ| ಬಾ| ಫರ್ಡಿನಾಂಡ್ ಗೊನ್ಸಾಲ್ವಿಸ್ ಹಾಣಿ ಕಾರ್ಯಾಚೆಂ ಅಧ್ಯಕ್ಷ್ಪಣ್ ಘೆತ್ಲ್ಲೆಂ. ವಿದ್ಯಾರ್ಥಿಂಚ್ಯಾ ಶಿಕ್ಪಾಕ್ ಕಂಪ್ಯೂಟರಾಂ ಅನಿ ಹೆರ್ ಸಾಹೆತ್ ದಾನ್ ದಿಲ್ಲ್ಯಾ ದಾನಿಂಚೊ ಹುಸ್ಕೊ ಆನಿ ತಾಣಿ ಶಿಕಪ್ ಜೊಡ್ಲ್ಲ್ಯಾ ಸಂಸ್ಥಾಚೆರ್ ಆಸ್ಚೊ ಮೋಗ್ ವಾಖಾಣುನ್ ತಾಣಿ ತಾಂಕಾ ಬರೆಂ ಮಾಗ್ಲೆಂ.
ಹ್ಯಾ ಯೆವ್ಜಣೆಕ್ Kuwait pangalites (Kuwait), Emirates Pangalites(Dubai), Konkan Ghar (Saudi Arabia), Harry/Leena Lobo (Qatar), Irene Noronha(rtd. teacher), Joel Quadras (Dubai), Sumalata (Dubai) Andrew Noronha(Dubai), Cyril Martis (Canada), Melwin Dsouza (Dubai), Arun Noronha (Kuwait), Naveen Monis (Kuwait), Vivian Rodrigues(Kuwait), Veronica Mathias,(Canada) Meena Menezes(Qatar), Mala Menezes(Kuwait) ಆನಿ Alphonse Mendonsa ಹಾಣಿ ಆರ್ಥಿಕ್ ಮಜತ್ ದಿಲ್ಯಾ.
ಮುಕೆಲ್ ಶಿಕ್ಷಕ್ ಶ್ರೀ ಅಶ್ವಿನ್ ರೊಡ್ರಿಗಸ್ ಹಾಣಿ ಯೆವ್ಕಾರ್ ಮಾಗ್ಲೊ. ಶಿಕ್ಷಕ್ ವಿಜಯ್ ನಾಯ್ಕ್ ಹಾಣಿ ದಿನ್ವಾಸ್ ಪಾಟಯ್ಲೆ. ಶಿಕ್ಷಕಿ ಸುನೀತಾ ಲೀನಾ ಹಾಣಿ ಕಾರ್ಯೆಂ ಚಲವ್ನ್ ವ್ಹೆಲೆಂ.
ಫಿರ್ಗಜ್ ಗೊವ್ಳಿಕ್ ಮಂಡಳೆಚೊ ಉಪಾಧ್ಯಕ್ಷ್ ಜೋನ್ ರೊಡ್ರಿಗಸ್, ಕಾರ್ಯದರ್ಶಿ ಅನಿತಾ ಡಿಸೋಜ , ಆಡಳ್ತ್ಯಾ ಮಂಡಳೆಚೆ ಸಾಂದೆ , ದಾನಿ ಆನಿ ತಾಂಚೆ ಪ್ರತಿನಿಧಿ, ಆದ್ಲ್ಯಾ ವಿದ್ಯಾರ್ಥಿ ಸಂಘಾಚೊ ಅಧ್ಯಕ್ಶ್ ರಾಯನ್, ಸೀಮಾ ಮಾರ್ಗರೇಟ್, ನಿವೃತ್ತ್ ಮುಕೆಲ್ ಶಿಕ್ಷಕಿ ಕ್ಲಾರಾ ಮೆಂಡೋನ್ಸಾ ಹ್ಯಾ ಸುವಾಳ್ಯಾರ್ ಹಾಜರ್ ಆಸ್ಲಿಂ.
