“ಆಯ್ಕ್ ಹಾಂಗಾ, ಆಜ್ ಆಮ್ಚ್ಯಾ ದೇಸಾನ್ ಚರಿತ್ರಾ ರಚ್ಲಿ. ಏಕ್ ಬಿಲ್ಲಿಯನ್ ಕೊರೊನಾ ವೇಕ್ಸೀನ್ ಠಿಕಾ ಲಾಯ್ಲೆ. ಹೊ ದಾಕ್ಲೊ, 140 ಕರೋಡ್ ಭಾರತೀಯಾಂಕ್ ಹೆಮ್ಮ್ಯಾಚೊ ವಿಷಯ್. ನಹಿಂಗೀ, ಕಿತೆಂ ಮ್ಹಣ್ತಾಯ್ ತುಂ? ” ಹಾಂವೆಂ ಉಲವ್ಣ್ಯಾಕ್ ಬುನ್ಯಾದ್ ಘಾಲಿ.
ಹೊಲಾಂತ್ ಆಮ್ಚಿ ಸ್ಮಾರ್ಟ್ ಟಿವಿ ಸದಾಂಚ್ಯೆ ಪರಿಂ ಉಲಯ್ತೆಲಿ, ಕೋಣಾಚ್ಯೆಂ ಗಣ್ಣೆಂ ಕರಿನಾಸ್ತಾನಾಂ. ಮದಾಮ್, ಮ್ಹಕಾ ದಿಸ್ತಾ, ಐಪೇಡಾರ್ ಫೇಸ್-ಬೂಕ್ ನ್ಯೂಸ್ ಫೀಡ್ ವಾಚ್ತೆಲಿ. ಸಾಂಗಾತಚ್, ಘಡಿಯೆ ಘಡಿಯೆ ಐಫೊನಾರ್ ಆಪ್ಲಿ ದಿಷ್ಟ್ ಚರಯ್ತೆಲಿ. ಏಕಾಚ್ ವೇಳಾ, ಚ್ಯಾರ್ ಪಾಂಚ್ ಕಾಮಾಂ ಕರುಂಕ್ ಬಾಯ್ಲಾಂಕ್ ಶಿಕಯ್ಜೆ ಮ್ಹಣ್ ನಾಂ. ಮ್ಹಜ್ಯಾನ್ ಜಾಯ್ನಾ ಹಾಬಾ.
” ಆಜ್ ಜಾಣಾಂಯ್, ಹೀನಾ ಖಾನ್ ಬಿಗ್ ಬೋಸ್ ಘರಾಂತ್ ರಿಗ್ಲೆಂ. ತಾಕಾ ಪಳೆವ್ನ್ ಅಫ್ಸನಾ ಖಾನ್ ಕಿತೆಂ ಉದ್ಗಾರ್ಲೆಂ ಜಾಣಾಂಯ್? ತುಂ ಮೊಟೆಂ ಜಾಲಾಂಯ್ ತಶೆಂ ಮ್ಹಕಾ ದಿಸ್ತಾಯ್!”
ಅಯ್ಯೊ! ಹಾಂವ್ ಇತ್ಲಿ ಮಹತ್ವಾಚಿ ಗಜಾಲ್ ಉಲಯ್ತಾಂ. ಆನಿಂ ಹೆಂ ಮ್ಹಜೆಂ ಬಿಟ್ಟರ್ ಹಾಫ್ ಡಾರ್ಲಿಂಗ್ ಬಾಯ್ಲ್ ಕೋಣ್ ಖಾನ್ ಖಾನ್‍ದಾನಾ ವಿಷಿಂ ಚಡ್ಪಡ್ತಾ!” ಇಲ್ಲೆಂಶೆಂ ಚಿಡೊನ್, ಹಾಂವೆಂಚ್ ವಿಷಯ್ ಬದ್ಲಿಲೊ.
“ಕಾಲ್‍ಚ್ ರಿಲಾಯೆನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್ ಕಂಪ್ಣೆಚ್ಯೆಂ ಲೇಕ್ ಪಾಕ್ ಕಳ್ಳೆಂ. ಗೆಲೆತ್ಯಾ ತ್ರಿಮಾಸಾಂತ್, ರೆಕೊರ್ಡ್ ಮುನಾಫೊ ಜಾಲಾ, 46% ಪ್ಲಸ್! ಕೊರೊನಾ ಗೆಲೆಂ ಕಚ್ರ್ಯಾ ದಬ್ಬ್ಯಾಂತ್. ಆಮ್ಚಿ ಆರ್ಥಿಕ್ ಸ್ತಿತಿ ಬರಿಚ್ ಸುದ್ರಾಲ್ಯಾ.”
” ಪೋರ್, ಚಡ್ ದೀಸ್ ಜಾವ್ನಾಂತ್, ಹೇಮ ಮಾಲಿನಿಚೊ ಹೆಪ್ಪಿ ಬರ್ತ್‍ಡೇ. ಕೆಬಿಸಿರ್ ಅಮಿತಾಭ್ ಬಚ್ಚಾನಾನ್ ಹೆಪ್ಪಿ ಬರ್ಥ್‍ಡೆ ಗಾಯ್ಲೆಂ. ಹೇಮಾ ಆನಿಂ ರಮೆಶ್ ಸಿಪ್ಪಿಚೊ ಶೊಲೇ ರಿವಿಜಿಟೆಡ್ ಅವಸ್ವರ್ ಆಸ್ಲೊ. ತುಂವೆಂ ತೊ ಪಳೆಜೆಚ್!”
“ಜರ್ ತುವೆಂ ಹಿಶ್ಯಾ ಬಜಾರಾಚ್ಯೆರ್ ಇಲ್ಲೆಂ ಗುಮಾನ್ ಕೆಲ್ಲೆಂಯ್ ತುಂಯೀ ತ್ಯಾ ಕೆಬಿಸಿ ಹೊಟ್ ಸೀಟಿರ್ ವಚನಾಸ್ತಾಂ, ಕರೋಡ್‌ಪತಿ ಜಾತೆಂಯ್. ಹ್ಯಾ ಜನೆರಾಂತ್, ರಿಲಾಯೆನ್ಸ್ ಹಿಶೊ 1,840 ರುಪಿಯಾಂಕ್ ಘೆತ್ಲಲೊ ತರ್, ಆಜ್ ನೋವ್ ಮಹಿನ್ಯಾಂ ಉಪ್ರಾಂತ್ 2,722 ರುಪಿಯಾಂಕ್ ವಿಕ್ಯೆತೊ. ಫಾಯ್ದೊ‍ಚ್ ಫಾಯ್ದೊ!”
“ರೇಖಾ ಆನಿ ಅಮಿತಾಭ್ ಬಚ್ಚನ್ ಪಾಟಾಪಾಟ್, ಏಕ್ ದೀಸ್ ಸೊಡ್ನ್, ಜಲ್ಮಾಲ್ಲಿಂ. ಪೋರ್ ಒಕ್ತೊಬ್ರ್ ಇಕ್ರಾ ತಾರಿಕೆರ್ ಆಮಿತಾಬಾಚೊ ಹೆಪ್ಪಿ ಬರ್ತ್‍ಡೇ ಆನಿ ರೇಖಾಚೊ? ಏಕ್ ದೀಸ್ ಪಯ್ಲೆಂ, ಧಾ ತಾರಿಕೆರ್”.
“ಅಹೋ, ಒಕ್ಟೊಬ್ರ್ 8 ತಾರಿಕೆರ್ ಏರ್ ಇಂಡಿಯಾ ವಿಕ್ರಿ ಜಾಲೊ. ಟಾಟಾ ಸನ್ಸ್ ಹ್ಯಾ ಔಧ್ಯೊಗಿಕ್ ಘರಾಣ್ಯಾನ್ ಏಲಮಾರ್ ಮೋಲಾಕ್ ಘೆತ್ಲೆಂ. ಆಮ್ಚ್ಯಾ ಸರ್ಕಾರಾನ್ ಆಖ್ರೆಕ್ ಪುಣಿ ಏಕ್ ವ್ಹಡ್ ವಾಗ್ ಮಾರ‍್ಲೊ ಹಾಬಾ!” ಉದ್ಗಾರ್ಲೊಂ ಹಾಂವ್.
“ಒಹೋ, ಆಜ್ ತುಜ್ಯೆ ಕಾನ್ ನೀಟ್ ಜಾಲೆ. ಮ್ಹಜ್ಯಾ ವಾಟ್ಸಪ್ ಗ್ರುಪಾಂತ್ ಮಹಿನ್ಯಾ ಪಯ್ಲೆಂ ಹಿ ಖಬರ್ ವಾಯ್ರಲ್ ಜಾಲ್ಲಿ ತುಕಾ ಹಾಂವೆಂ ಫೊರ್ವರ್ಡ್ ಕೆಲ್ಲಿ. ತವಳ್ ತುಂವೆಂ ಕಿತೆಂ ಮ್ಹಳ್ಳೆಂಯ್? ಹಿ ಫೇಕ್ ನ್ಯುಸ್ ಮ್ಹಣ್!”
ಅಖ್ರೇಕ್ ಮದಾಮ್ ಮ್ಹಜ್ಯಾ ಸಂಸಾರಾಕ್ ಆಯ್ಲಿ ಮ್ಹಣ್ ಸಂತೊಸ್ಲೊಂ.
“ತವಳ್, ಸರ್ಕಾರಿ ನಿರ್ಣಯ್ ಜಾವ್ನಾತ್ಲೊ. ಟಾಟಾ ಸನ್ಸ್ ಹಾಣಿಂ ಗುಪ್ತಿಂ ಬೋಲಿ ಲಾಯ್ಲಿ ಮ್ಹಣ್ ಸೆಪ್ತೆಂಬ್ರ್ 15 ತಾರಿಕೆರ್ ವಾರ್ತಾ ಮಾಧ್ಯಮಾಂಕ್ ಸೂಚಿ ಕೆಲ್ಲಿ ವ್ಹಯ್. ಸ್ಪೈಸ್ ಜೆಟ್ ಘರಾಣ್ಯಾಚೊ ಅಜಯ್ ಸಿಂಗ್ ಲೆಗುನ್ ಬೋಲಿ ಕರ್ತಾ ಮ್ಹಳ್ಳಿ ಗೆ ಖಬೊರ್ ಆಸ್ಲಿ. ಕಿತೇಂಯೀ ಜಾಂವ್, ತುಜ್ಯಾ ವಾಟ್ಸಪ್ ಗ್ರೂಪಾಕ್ ‘ಕರೆಂಟ್ ಎಫೇರ್ಸ್’ ಮಾಹೆತ್ ಪೈಲೆಂಚ್ ಆಸ್ತಾ. ತುಮ್ಕಾಂ ಎವಾರ್ಡ್ ದೀಜೆ. ಶಾಬಾಸ್! ” ಪಡ್ಲ್ಯಾರ್‌ಯೀ, ನಾಕ್ ವಯ್ರ್ ಮ್ಹಣ್ತಾತ್ ತಶೆಂ ಹಾಂವ್ ನಾಖುಶೆನ್ ಒಪ್ಲೊಂ.
“ಏರ್ ಇಂಡಿಯಾಚ್ಯೆಂ ಖಾಸ್ಗಿಕರಣ್ ತುಕಾ ಆವ್ಡೊಂಕ್ ನಾಂ ಮ್ಹಣ್ ಮ್ಹಕಾ ಖಂಡಿತ್ ಕಳಿತ್ ಆಸಾ. ಸವಯೆಕ್ ಲಾಗೊನ್, ಮೋದಿಚ್ಯಾ ಹರ್ ಕಾಮಾಚೊ ವಿರೊದ್ ತುಂ ಕರ್ತಾಯ್. ಮೋದಿ ಆಮ್ಚೊ ಪೈಲೊ ಪ್ರಧಾನಿ ದೇಸಾಚ್ಯಾ ಬರೆಂಪಣಾ ಖಾತಿರ್ ದೀಸ್ ರಾತ್ ಘೊಳ್ತಾ. ದೀಸಾಂತ್ ಚವೀಸ್ ವ್ಹರಾಂ ಆಸಾತ್ ತಿಂ ತಾಕಾ ಪಾವಾನಾಂತ್!”
“ಗಾಡಾಂವ್ ಸಯ್ತ್ ದೀಸ್ ರಾತ್ ಘೊಳ್ತಾ, ಧನಿಯಾನ್ ಆಂಬುಡ್ಲ್ಯಾರ್. ಶಾಣೆಪಣಾನ್ ಕಾಮ್ ಕರ್ತೆಲ್ಯಾಕ್ ಆಟ್ ವ್ಹರಾಂಯೀ ನಾಕಾತ್ ಆಪ್ಲಿ ದಿಸಾಳಿ ಜವಾಬ್ದಾರಿ ಮುಗ್ದುಂಕ್. Work smarter, not harder ಮ್ಹಣ್ ಮುಖೆಲ್‌ಪಣಾಚ್ಯಾ ಗುರುಂನಿಂ ಸಾಂಗ್ಲಾಂ ನೆ?” ಮ್ಹಜೊ ತೀರ್ ಕೋಣಾಕ್ ಮ್ಹಣ್ ಸಮಜ್‍ದಾರ್ ಕೊ ಇಶಾರಾ ಕಾಫಿ ಹೆ ತಸ್ಲಿ ಜಾಪ್ ಮ್ಹಜಿ ಆಯ್ಕೊನ್ ಮದಾಮ್ ಖುಬಾಳ್ಳಿ.
“ಸಕ್ಕಡ್ ನೆಹ್ರುಚಿ ಚೂಕ್. ಅಚ್ಚಾ ಖಾಸಾ ಮ್ಹಣ್ತಾತ್ ತಶೆಂ ಆಪೂರ್ಬಾಯೆನ್ ಜೆ ಆರ್ ಡಿ ಟಾಟಾ ಆಪ್ಲಿ ಟಾಟಾ ಏವಿಏಶನ್ ಲಿಮಿಟೆಡ್ ಚಲವ್ನ್ ಆಸ್‍ಲ್ಲೊ. ಲ್ಹಾನ್‌ಶಿ ಪೂಣ್ ಸೊಭಿತ್. ಜಾಣಾರಿ ಸಾಂಗ್ತಾತ್, small but beautiful.”
“ನೆಹ್ರು ಲೋಕ್‍ಶಾಹಿ ಮುಖೆಲಿ. ಮೋದಿ ಭಾಶೆನ್ ತಾನಾ‍ಶಾಹಿ ನಹಿಂ. ತುಂ ನೆಣಾಂಯ್, ಜೆ ಆರ್ ಡಿ ಟಾಟಾನ್ ನೆಹ್ರುಕ್ ಚೀಟ್ ಬರವ್ನ್, ಭಾರತ್ ಸರ್ಕಾರಾನ್ ಏರ್ ಇಂಡಿಯಾ ಇಂಟರ್‌ನೇಶನಲ್ ಮ್ಹಳ್ಳಿ ತ್ರಿರಂಗ ಬಾವ್ಟೊ ಸಂಸಾರ್ ಭರ್ ವರ್ಚಿ ಏಕ್ ರಾಷ್ಟ್ರೀಯ್ ವಾರ‍್ಯಾ ಸೇವಾ ಪ್ರಾರಂಭ್ ಕರಿಜೆ ಮ್ಹಣ್ ಮಾಗ್ಲೆಲೆಂ. ತೆಂ ಮಾಗ್ಣೆಂ ಸ್ವಭಾವಿಕ್ ದೆಕುನ್ ನೆಹ್ರುನ್ 49% ಹಿಶೆ ಸರ್ಕಾರಾಚ್ಯಾ ಹಾತಿಂ ಘೆತ್ಲೆಲೆ. ಏರ್ ಇಂಡಿಯಾ ಏಕ್ ಪಬ್ಲಿಕ್ ಲಿಮಿಟೆಡ್ ಕಂಪ್ಣಿ ಕರ್ತಚ್, ಟಾಟಾನ್ 25% ಹಿಶೆ ದವರ್ನ್ ಉರ್ಲೆಲೆ ಸಾರ್ವಜನಿಕ್ ನಿವೇಷಿಂಕ್ ವಿಕ್ಲೆಲೆ. ಕೇವಲ್ 25% ಹಿಶೆ ಟಾಟಾಚ್ಯೆ ತರ್‌ಯೀ, ನೆಹ್ರುನ್ ಜೆ ಆರ್ ಡಿಕ್ ಕಂಪ್ಣೆಚೊ ಮುಖೆಲಿ ಕೆಲ್ಲೊ.”
“ಹಿ ಪರ್ನಿ ಚರಿತ್ರಾ. ತವಳ್, ಆಮ್ಚ್ಯಾ ಲೋಕಾಕ್ ಸಮಾಜ್‍ವಾದಾಚೊ ಭುತ್ ಲಾಗ್ಲಲೊ. ರಾಜಾಜಿ, ಪಿಲು ಮೋದಿ, ಮಿನು ಮಸಾನಿ, ಜೆ ಎಮ್ ಲೋಬೊ ಪ್ರಭು ತಸ್ಲ್ಯಾಂ ರಾಜಾಂವಿಕ್ ಮುಖೆಲ್ಯಾಂನಿಂ ಸ್ವತಂತ್ರ್ ಪಾಡ್ತಿಚ್ಯಾ ಬಾವ್ಟ್ಯಾ ಸಕಯ್ಲ್ ರಾಷ್ಟ್ರೀಕರಣಾಚೊ ವಿರೋದ್ ಕರುಂಕ್ ನಾಂಗೀ? ಕೆಲ್ಲೊ; ಪೂಣ್, ತೆ ಅಲ್ಫ್-ಸಂಖ್ಯಾತ್ ನೇ? ಲೋಕ್ ಶಾಹಿಂತ್ ಬಳ್ ಆಸ್ಲೆಲ್ಯಾಚ್ಯೆಂ ಬೊಳ್ಕೆಂ. ಅಂಗೂಟಾ ಛಾಪ್ ಬಹು-ಸಂಖ್ಯಾತ್ ಕೆನ್ನಂಯೀ ಸಾರ್ಕೆಂಚ್ ಮ್ಹಣೊಂಕ್ ಜಾಯ್ನಾ.”
ಮದಾಮೆನ್ ವಾಟ್ಸಪ್ ಆನಿ ಫೆಸ್‍ಬುಕ್ ನ್ಯುಸ್ ಫೀಡ್ ಮ್ಹಣ್ ಜಾಯಿತ್ತಿ ಚ್ಯಾರಿತ್ರಿಕ್ ಜಾಂಟಿಕಾಯ್ ಜಮಯ್ಲ್ಯಾ ಮ್ಹಣ್ ಏಕ್ಯೆ ವಾಟೆನ್ ತಿಚ್ಯೆರ್ ಮ್ಹಕಾ ಅಭಿಮಾನ್ ಭೊಗ್ಲೊ.
“ವಾರ‍್ಯಾ ಸೇವೆಚ್ಯೆಂ ರಾಷ್ಟ್ರೀಕರಣ್ ಕರ್ತನಾಂ, ಏರ್ ಇಂಡಿಯಾಚ್ಯಾ 25% ಹಿಶ್ಯಾಂಕ್ 2.80 ಕರೋಡ್ ರುಪೈ ಟಾಟಾ ಸನ್ಸ್ ಕಂಪ್ಣೆಕ್ ಸರ್ಕಾರಾನ್ ದಿಲೆ. ಖಾಸ್ಗಿ ಹಾತಾಂತ್ ಆಸ್ಲೆಲೆ ಹಿಶೆ ಪೈಶೆ ದೀವ್ನ್ ಮೋಲಾಕ್ ಘೆತ್ಲೆ. ಕೋಣಾಚಿ ಖಾಸ್ಗಿ ಆಸ್ತ್ ಲುಟುಂಕ್ ನಾಂ. 2-3 ವಿಮಾನಾಂ ಆಸ್ಲೆಲ್ಯಾ ಏರ್ ಇಂಡಿಯಾಕ್ ಸರ್ಕರಾನ್ ವಾಜ್ಬಿ ಮೋಲ್ ಯೆಟ್ಲಾಂ. ಅಶೆಂಯೀ ತೆದ್ನಾಂ ಏರ್ ಇಂಡಿಯಾ ಹಫ್ತ್ಯಾಕ್ ದೋನ್ ತೀನ್ ಅಂತರ್ ರಾಷ್ಟ್ರೀಯ್ ಉಭ್ಣಿ ಕರ್ತೆಲೆಂ. ಸರ್ಕಾರಾಚ್ಯಾ ದುಡ್ವಾನ್ ಮಾತ್ರ್ ವಿಸ್ತಾರಣ್ ಕರುಂಕ್ ಸಾಧ್ಯ್ ಜಾಲ್ಲೆಂ.” ನೆಹ್ರು ಸರ್ಕಾರಾಚಿ ನೀತ್ ಕಶಿ ಏರ್ ಇಂಡಿಯಾಕ್ ಫಾಯ್ದ್ಯಾವಂತ್ ಜಾಲ್ಲಿ ಮ್ಹಳ್ಳೆಂ ಚ್ಯಾರಿತ್ರಿಕ್ ಸತ್ ಆಜ್‍ಕಾಲ್ ವಿಸ್ರಲ್ಯಾತ್ ಮ್ಹಣ್ ಮ್ಹಜೊ ವಾದ್.
“ರಾಷ್ಟ್ರೀಕರಣ್ ಕೆಲ್ಯಾರ‍್ಯೀ, ಏರ್ ಇಂಡಿಯಾಚೊ ಚ್ಯೇರ್‌ಮೆನ್ ಜೆ ಆರ್ ಡಿ ಟಾಟಾ ಹಿ ಆಪ್ಲಿಚ್ ಖಾಸ್ಗಿ ಕಂಪ್ಣಿ ಮ್ಹಳ್ಳ್ಯಾ ಭಾಶೆನ್ ಖುದ್ದ್ ದಿಸಾಂ ದಿಸಾಚ್ಯಾ ಚಟುವಟಿಕೆಂ ವಯ್ರ್ ಸೂಕ್ಶ್ಮ್ ವ್ಯವಸ್ತಾಪನ್ ಚಲಯ್ತಲೊ. ಏಕ್ ರುಪೈ ಲೆಗುನ್ ಸಾಂಬಾಳ್ ಘೆವ್ನಾಂ. ಹೆಂ ಸತ್ ಮೂ? ಮ್ಹಜ್ಯಾ ವಾಟ್ಸಪ್ ಗ್ರೂಪಾಂತ್ ಹಿ ಚರ್ಚ್ಯಾ ಚಲ್ಲ್ಯಾ.” ಮ್ಹಣಾಲಿ ಯೆಜ್ಮಾನ್.
“ವ್ಹಯ್, ಹೆಂ ತುಂವೆಂ ಸಾರ್ಕೆಂ ಆಯ್ಕಲಾಂಯ್. ಜೆ ಆರ್ ಡಿಚ್ಯಾ ಕ್ರಿಯಾಶೀಲ್ ಮುಖೆಲ್‍ಪಣಾ ವೊರ್ವಿಂ, ಏರ್ ಇಂಡಿಯಾ ಏಶಿಯಾಚಿ Number 1 ಏರ್-ಲಾಯ್ನ್ಸ್ ಜಾಲಿ. ಸಿಂಗಾಪುರ್ ಏರ್-ಲಾಯ್ನ್ಸ್, ಕೆಥೆ ಫೆಸಿಫಿಕ್ ಆನಿಂ ಥಾಯ್ ಏರ್-ಲಾಯ್ನ್ಸ್ ಹಾಣಿಂ ಏರ್ ಇಂಡಿಯಾ ಥಾವ್ನ್ ಲಿಸಾಂವಾಂ ಶಿಕ್ಲಲೆ ದಾಕ್ಲೆ ಆಸಾತ್. ರಾಷ್ಟ್ರೀಕರಣ್ ಆನಿಂ ಸಮಾಜ್‍ವಾದ್ ನಾಂವಾ ತೆಕಿದ್; ಜರ್ ಮುಖೆಲ್ ತಕ್ಲಿ ಆಪ್ಲೆಂ 100% ಧ್ಯಾನ್ ಕಂಪ್ಣೆಕ್ ದಿತಾ ತರ್ ತ್ಯೆ ಕಂಪ್ಣೆಕ್ ಕಿತೆಂಚ್ ಅಸಾಧ್ಯ್ ನಹಿಂ. 1977 ಇಸ್ವೆ ಪರ‍್ಯಾಂತ್, ಪೈಲೆಂ ನೆಹ್ರುನ್, ಉಪ್ರಾಂತ್ ಶಾಸ್ತ್ರಿನ್ ಆನಿಂ ನಿಮಾಣೆಂ ಇಂದಿರಾ ಗಾಂಧಿನ್ ಜೆ ಆರ್ ಡಿಕ್ ಕಸ್ಸಲಿ ಸರ್ಕಾರಿ ಅಡ್ಕಳ್ ಯೇನಾತ್‍ಲ್ಲ್ಯಾ ಪರಿಂ ಸ್ವತಂತ್ರ್ (autonomy) ದಿಲ್ಲ್ಯಾನ್, ಏರ್ ಇಂಡಿಯಾ ಶಾಬಾಸ್ಗಿ ಜೊಡುಂಕ್ ಪಾವ್ಲೆಂ. Always aim at perfection for only then will you achieve excellence. ಮ್ಹಣ್ ಜೆ ಆರ್ ಡಿಚೊ ನಾರೊ ಆಸ್ಲೊ!”
“ಹೆಂ ಅಪೂಟ್ ಸತ್. ಹಾಕಾ ದೋನ್ ಉತ್ರಾಂ ನಾಂತ್. ಜೆ ಆರ್ ಡಿ ತಸ್ಲೆ hands on autonomous ಮುಖೆಲ್ ತಕ್ಲ್ಯೊ ಜರ್ ಏರ್ ಇಂಡಿಯಾಕ್ ಲಗಾತರ್ ಮೆಳ್‍ಲ್ಲ್ಯೊ ತರ್ ಏರ್ ಇಂಡಿಯಾ ಸರ್ಕಾರಾಕ್ ಏಕ್ ವೊಜೆಂ ಜಾತೆಂ ನಾಂ. ದಿಸಾಕ್ 20 ಕರೋಡ್ ಲುಕ್ಸಾಣ್ ಜಾತಾ ಆನಿಂ ಹೆಂ ಲುಕ್ಸಾಣ್ ದೇಸಾಚ್ಯಾ ಕರ‍್ದಾತಾಂನಿಂ (taxpayers) ಉಟಂವ್ಕ್ ನಜೊ ಮ್ಹಳ್ಳ್ಯಾ ನೇಕ್ ಇರಾದ್ಯಾನ್ ಮೋದಿನ್ ಖಾಸ್ಗಿಕರಣ್ ಕೆಲೆಂ” ಮದಾಮೆನ್ ಆಖ್ರೆಕ್ ಫೊಡ್ನ್ ಘಾಲೆಂ, “ಆತಾಂ ಮ್ಹಾಕಾ ಕುಜ್ನಾಂತ್ ಸ್ವತಂತ್ರ್ ಕಾಮ್ ಕರುಂಕ್ ಸೋಡ್. ಬೊಟಾಂ ಲೆಂವ್ಚ್ಯೆಂ ತಿತ್ಲೆಂ ರುಚಿಕ್ ರಾಂದಪ್ ಕರ್ತಾಂಗೀ ನಾಂ ಪಳೆ. ತುಂ ಮಾತ್ರ್ ಮಧೆಂ ಮಧೆಂ ಮೀಟ್ ಚಡ್ ಪಡ್ಲಾಂಗೀ, ಆಮ್ಸಾಣ್-ತಿಕ್ಸಾಣ್ ಸಾರ್ಕಿಗೀ ಮ್ಹಣ್ ಚಾಕೊಂಕ್ ಯೇವ್ನ್ ದಾಯ್ ಘಾಲಿನಾಕಾ!”
“ಗೊಡ್ಶೆಂ, ಮಿರ್ಸಾಂಗ್ ಮಸಾಲೊ ನಾತ್ಲೆಲೆಂ ಜೆವಾಣ್ ರುಚಿಕ್ ಮ್ಹಣ್ತಾಯ್ ತರ್, ಹಾಂವ್ ಕಿತೆಂ ಮ್ಹಣೊಂ? ಮ್ಹಜ್ಯಾ ನಶಿಬಾನ್ ಆಂಬೊಟ್ ತೀಕ್ ಭೊಗೆಂವ್ಕ್‌ಚ್ ನಾಂ ಜಾಲ್ಯಾರ್!” ಬೋವ್ ಲ್ಹಾನ್ ತಾಳ್ಯಾನ್, ಹಾಂವ್ ಪುಸ್ಪುಸ್ಲೊಂ. ತಿಕಾ ಮ್ಹಜೆಯ್ ಪುರ್ಪುರೆ ಖಂಡಿತ್ ಆಯ್ಕೊಂಕ್ ನಾಂತ್
***
“ಹೆಂ ಪಳೆ. ಏಕ್ ನವಿ ವಾಟ್ಸಪ್ ಮೆಸೆಜ್ ಆಯ್ಲಿ, ಮ್ಹಜ್ಯಾ ಕ್ಲಾಸ್-1975 ಗ್ರುಪಾಂತ್. ಮೋಹನ್ ದಾಸ್ ಪೈ ಬರಯ್ತಾ: ‘ಮಹಾತ್ಮಾಗಾಂಧಿನ್ ಸಾಂಗ್ಲೆಲೆಂ ಆಸಾ, ಆಮಿಂ ಆಯ್ಕೊಂಕ್ ಜಾಯ್: जिस दॆश मे सर्कार व्यापारि हे, उस दॆश मे जन्ता भिकारि हे. ಜೆನ್ನಾಂ ಸರ್ಕಾರ್ ಬಿಜ್ನೆಸ್ ಚಲಯ್ತಾ, ತೆನ್ನಾಂ ನಾಗ್ರಿಕ್ ಸರ್ಕಾರಾ ವಿರುದ್ದ್ ಸ್ಪರ್ಧ್ಯಾಕ್ ರಾವೊಂಕ್ ಸಕಾನಾ’. ಹಾಂವ್ ಮ್ಹಣ್ತಾಂ ಬೋವ್ ಬೊರೆಂ ಆನಿಂ ಸಾರ್ಕೆಂ ಮ್ಹಣ್ತಾ ಪೈ. ಪೈ ಘರಾಣ್ಯಾಕ್ ವ್ಹಡ್ ಮುನಾಫೊ ಜೊಡ್ಚಿಂ ಖಾಸ್ಗಿ ಬಿಜ್ನೆಸಾಂ ಚಲವ್ನ್ ಮಾಹೆತ್ ಆಸಾ. ಹೊ ಪೈ ವಾರ‍್ಯಾರ್ ಉಲಯ್ನಾ, ಬಗಾರ್ ಆಪ್ಲ್ಯಾ ಅನ್ಭೋಗಾನ್ ಉಲಯ್ತಾ”.
ಸಾಂಜೆಚ್ಯಾ ಚ್ಯಾ-ಫಳಾರಾ ಖಾತಿರ್ ಸಾಲಾಂತ್ ಯೇವ್ನ್ ಬಸ್ಲೆಲ್ಯಾ ಮ್ಹಕಾ ಯೆಜ್ಮಾನಿನ್ ಲ್ಹಾನ್ಶೆಂ ಭಾಶಣ್ ದಿಲೆಂ.
“ಚ್ಯಾರ್ ಪಾಂಚ್ ದಾಕ್ಡ್ಯಾಂ ಪ್ರಾಸ್ ಚಡ್ ಕಾಳ್ ಸರ್ಕಾರಾನ್ ಏರ್ ಇಂಡಿಯಾ ಆನಿಂ ಇಂಡಿಯನ್ ಏರ್-ಲಾಯ್ನ್ಸ್ ಫಾಯ್ದ್ಯಾವಂತ್ ಬಿಜ್ನೆಸಾಂ ಜಾವ್ನ್ ಚಲಂವ್ಕ್ ನಾಂಗಿ? ಉಪ್ರಾಂತ್, ಆರ್ಥಿಕ್ ಸುದ್ರಾವಣ್ ಮ್ಹಣ್ ವಾರ‍್ಯಾ ಸೇವೆಚ್ಯೆಂ ಕ್ಶೇತ್ರ್ ಖಾಸ್ಗಿ ನಿವೇಷಿಂಕ್ ಉಗ್ತೆಂ ಕೆಲೆಂ. ಹ್ಯಾ ವೊರ್ವಿಂ ಸರ್ಕಾರಾನ್ ಆಪ್ಲ್ಯಾಂ ಪಾಂಯಾಂಚ್ಯೆರ್ ಖುದ್ದ್ ಕುರಾಡ್ ಮಾರ್ಲಿ ಮ್ಹಣ್ತಾ ಹಾಂವ್”
“ಉಗ್ತ್ಯಾ ಬಾಜಾರಾಂತ್ ಸ್ಪರ್ಧೊ ಆಸ್ಲ್ಯಾರ್ ಮಾತ್ರ್ ಗಿರಾಯ್ಕ್ ರಾಯ್ ಜಾತಾ. ಕುಡ್ಡ್ಯಾಂಚ್ಯಾ ಗಾಂವಾಂತ್ ಏಕಾ ದೊಳ್ಯಾಂಚೊ ಕಾಣೊ ರಾಯ್ ಖಂಯ್. ತಶೆಂ, ಗಜಾಲ್ ಸರ್ಕಾರಿ ಕಂಪ್ಣ್ಯಾಂಚಿ. ಇಂಡಿಗೊ, ಸ್ಪೈಸ್ ಜೆಟ್, ವಿಸ್ತಾರಾ ಅಸಲ್ಯೊ ವ್ಯವಸಾಯಿಕ್ ಕಂಫ್ಣ್ಯೊಆಯ್ಲ್ಯೊ ಆನಿಂ ಗಿರಾಯ್ಕ್ ಇಂಡಿಯನ್ ಏರ್-ಲಾಯ್ನ್ಸ್ ವಿಮಾನಾಂಚ್ಯೆರ್ ಪಯ್ಣ್ ಕರಿನಾ ಜಾಲೆ. ತಾಂಚ್ಯಾ ಶಿಬಂಧಿಚ್ಯೆ ನಕ್ರೆ ಕೊಣಾಕ್ ಜಾಯ್? ಲುಕ್ಸಾಣಾಂತ್ ಬುಡಾನಾಸ್ತನಾಂ ರಾವ್ತಾಯೇ?”
“ಜೆಟ್ ಏರ್, ಕಿಂಗ್-ಫಿಶರ್, ಏರ್ ಸಹಾರಾ, ಮೊಡಿ-ಲುಫ್ಟ್ ಹ್ಯೊಯೀ ಖಾಸ್ಗಿ ಕಂಪ್ಣ್ಯೊಂ. ಖಂಯ್ ಗೆಲ್ಯೊ ತ್ಯೊ? ಲುಕ್ಸಾಣ್ ಖಾಸ್ಗಿ ಕಂಪ್ಣೆಂಕ್‌ಯೀ ಜಾತಾ.”
“ವಾಜ್‍ಪೇಯಿ ಸರ್ಕಾರಾನ್ ಏರ್ ಇಂಡಿಯಾಚಿ ವಿಕ್ರಿ ಕರ್ಚಿ ಸಾರ್ಕಿ ಆಲೊಚನ್ ಕೆಲ್ಲಿ. ತಿ ಪೊಂತಾಕ್ ಪಾವ್‍ಲ್ಲಿ ತರ್, ಆಜ್ ಲಾಖಾಂಕ್ ಮಿಕ್ವೊನ್ ರೀಣ್ ಟ್ಯೇಕ್ಸ್ ದಿತೆಲ್ಯಾಂ ನಾಗ್ರಿಕಾಂಕ್ ಸೊಸುಂಕ್ ಪಡ್ತೆಂ ನಾಂ.”
ಯೆಜ್ಮಾನಿಕ್ ಹ್ಯಾ ವಿಷಯಾಚಿ ಇತ್ಲಿ ಮಾಹೆತ್ ವಾಟ್ಸಪ್ ಯುನಿವೆರ್ಸಿಟಿ ಆನಿಂ ಫೇಸ್-ಬುಕ್ ನ್ಯೂಸ್ ಫೀಡ್ ವಾಚುನ್ ಮೆಳ್ಳೆಲಿ ಪಳೆವ್ನ್ ಅಜ್ಯಾಪ್ಲೊ ಹಾಂವ್. ಉಪ್ರಾಂತ್ಲಿ ಭಾಸಾಭಾಸ್ ಅಶಿ:
ಹಾಂವ್: “ಏರ್ ಇಂಡಿಯಾಕ್ ಲುಕ್ಸಾಣ್ ಜಾಂವ್ಕ್ ಪ್ರಮುಖ್ ಕಾರಣ್ ಗಲ್ಫ್ ರಾಷ್ಟ್ರಾಂ. ಹಾಂಗಾಚ್ಯಾ ಸರ್ಕಾರಾಂನಿಂ ರಾಷ್ಟ್ರೀಯ್ ಏರ್-ಲಾಯ್ನ್ಸ್ ಸುರು ಕೆಲ್ಯೊ. ದೋಹಾ ಥಾವ್ನ್ ಖತಾರ್ ಏರ್-ವೆಯ್ಸ್, ದುಬೈ ಥಾವ್ನ್ ಎಮಿರೇಟ್ಸ್ ಆನಿಂ ಅಬುಧಾಬಿ ಥಾವ್ನ್ ಎಟಿಹಡ್. ಆರ್ಬಿ ಗಾಂವ್ಚ್ಯಾಂ ಹ್ಯಾಂ ಕಂಪ್ಣೆಂಕ್ ಪೆಟ್ರೊಲ್ ಫುಂಕ್ಯಾಕ್ ಮೆಳ್ತಾ, ತಾಂಚ್ಯಾ ಸರ್ಕಾರಾಂಚ್ಯಾ ಖುಸ್ತಾರ್. ದೆಕುನ್ ಟಿಕೆಟ್ ಝುಜಾಂತ್ ತ್ಯೊ ಜಿಕ್ಲ್ಯೊ ನೆ?”
ಯೆಜ್ಮಾನ್: “ತೆಂ ವ್ಹಯ್. ಕರೋಡಾಂನಿಂ ನಹಿಂ ತರ್, ಥೊಡ್ಯಾಂ ಲಾಖಾಂನಿಂ ಏರ್ ಇಂಡಿಯಾಚ್ಯೆ ಪಯ್ಣಾರಿ ತಾಂಕಾಂ ಲಾಬ್ಲೆ. Air India Expressನ್ ಮಾತ್ರ್ ಕೇರಳಾ ಆನಿಂ ಮಂಗ್ಳುರಾಕ್ ಡಿರೆಕ್ಟ್ ಫ್ಲಾಯ್ಟಾಂ ಘಾಲಿಂ ಆನಿಂ ಉಣಿ ಟಿಕೆಟ್ ದವರ್ಲಿ. ದೆಕುನ್, ಬಚಾವ್!”
ಹಾಂವ್: “ಗಲ್ಫಾಚ್ಯಾಂ ಸರ್ಕಾರಿ ಏರ್ ಲಾಯ್ನ್ಸ್ ಕಂಪ್ಣೆಂಚ್ಯಾಂ ಕಾಮೆಲ್ಯಾಂಕ್ ಸಾಂಬಾಳ್, ಭಾತೆಂ ಆನಿಂ ಸವ್ಲತ್ಯೊ ವಾಡಯ್ ಮ್ಹಣ್ ಮಾಗ್ಚಿಂ ಯೂನಿಯನಾಂ ನಾಂತ್. ಸ್ಟ್ರೈಕ್ ಕರುಂಕ್ ಹಕ್ಕ್ ನಾಂ. ದಿಲ್ಲೆಂ ಘೆಜೆ. ಏರ್ ಇಂಡಿಯಾನ್ ತರ್ಬೆತ್ ಕೆಲ್ಲ್ಯಾಂ ಪೈಲಟಾಂಕ್, ಇಂಜಿನಿಯಾರಾಂಕ್ ಆನಿಂ ಎರ್ ಹೊಸ್ಟೆಸಾಂಕ್ ಹ್ಯೊ ಕಂಪ್ಣ್ಯೊಂ ಗರಿ ಘಾಲ್ತಾತ್. ಸ್ವಂತ್ ಖರ್ಚಾನ್ ನವ್ಯಾಂಕ್ ತರ್ಬೆತಿ ದೀನಾಂತ್. ಏರ್ ಇಂಡಿಯಾಕ್ ಹ್ಯಾಂ ಕಂಪ್ಣೆಂ ಕಡೆಂ ಸ್ಪರ್ಧ್ಯಾಕ್ ದೆಂವೊಂಕ್ ಜಾಯ್ನಾ ಕಿತ್ಯಾಕ್ ಪೆಟ್ರೊಲ್ ಆನಿಂ ಕಾಮೆಲಿ ಮ್ಹಣ್ ಅರ್ವಾಸ್ ಜೋಡ್ ಖರ್ಚ್ ಜಾವ್ನ್ ವೆತಾ. ಗಲ್ಫ್ ಕಂಪ್ಣ್ಯಾಂಕ್ ಹೊ ಖರ್ಚ್ ಕೇವಲ್ 10%. ಏರ್ ಇಂಡಿಯಾ ಜರ್ ಖಾಸ್ಗಿ ಕಂಪ್ಣಿ ಜಾಲಿ ತರ್‌ಯೀ, ಮುನಾಫೊ ಜಾತೊನಾಂ.”
ಹೆಂ ಮ್ಹಜೆಂ ರಾಜಾಂವ್ ಕಶೆಂ ನಹಿಂ ಮ್ಹಣ್ಯೆತ್? ತರ್‌ಯೀ ಮದಾಮೆ ಕಡೆಂ ದುಸ್ರಿಚ್ ಉಳ್ಟಿ ಜಾಪ್ ಆಸ್ಲಿ:
ಯೆಜ್ಮಾನ್: “ತುಂ ಕಿತೆಂಯ್ ಮ್ಹಣ್. ಯುಪಿಏ ಸರ್ಕಾರಾನ್ ಏರ್ ಇಂಡಿಯಾಕ್ ವ್ಹಡ್ಲಿಂ ಸಪ್ಣಾಂ ದಾಕಯ್ಲಿಂ ಆನಿಂ ಬ್ರಹತ್ ವಿಸ್ತಾರಣ್ ಕೆಲೆಂ. 24 ವಿಮಾನಾಂ ಉಬಂವ್ಚಿ ಲ್ಹಾನ್ ಕಂಪ್ಣಿ ಆಸ್ಲಿ ಏರ್ ಇಂಡಿಯಾ. ತಿಂಚ್ ಪುರೊ ಆಸ್ಲಿಂ. ಅಮೆರಿಕಾಚಿಂ 111 ಬೋಯಿಂಗ್ ವಿಮನಾಂ ಕಿತ್ಯಾಕ್ ಒರ್ಡರ್ ಕೆಲಿಂ? ತ್ಯಾ ಖಾತಿರ್, ವಾಡಿರ್ ಅಮೆರಿಕನ್ ಡೊಲಾರಾಚ್ಯೆಂ ರೀಣ್ ಕಾಡ್ನ್ ವಾಟ್ ಲಾಯ್ಲಿ ನೇ? ಹಿ ಪೈಲಿ ಚೂಕ್. ವಯ್ಲ್ಯಾನ್, ಘರಾಳು ಉಬ್ಣೆಂನಿಂ ದಿಡೀರ್ ಸಕಯ್ಲ್ ಪಡ್ಲೆಲ್ಯಾ ಇಂಡಿಯನ್ ಏರ್-ಲಾಯ್ನ್ಸ್ ಕಂಪ್ಣೆಕ್ ಏರ್ ಇಂಡಿಯಾಂತ್ ವಿಲೀನ್ ಕೆಲ್ಲಿ ದುಸ್ರಿ ಚೂಕ್”.
ಹಾಂವ್: “ಪಳೆ, ಅಂತರ್-ರಾಷ್ಟೀಯ್ ಸಂಬಂಧಾಂನಿಂ ಇತ್ಲ್ಯಾ ಸಸಾರ‍್ಗಾಯೆನ್ ಕಿತೆಂ ಚೂಕ್ ಮ್ಹಣ್ ಪಾತೊರ್ ಉಡಂವ್ಕ್ ಜಾಯ್ನಾ. ಮ್ಹಜ್ಯಾ ಉಡಾಸಾ ಪ್ರಮಾಣೆಂ, 2004-05 ವರ್ಸಾ, ಬೋಯಿಂಗ್ ಕಂಪ್ಣಿ ವ್ಹಡ್ ಲುಕ್ಸಾಣಾರ್ ಆಸ್ಲಿ. ತಿಯಿ ಖಾಸ್ಗಿ, ಸರ್ಕಾರಿ ನಹಿಂ. ಖಾಸ್ಗಿ ಕಂಪ್ಣ್ಯೊ ಲುಕ್ಸಾಣಾರ್ ಪಡಾನಾಂತ್ ಮ್ಹಣೊಂಕ್ ಜಾಯ್ನಾ. ತವಳ್, ಅಮೆರಿಕನ್ ಫಿರ್ಜೆಂತ್ ಜೋರ್ಜ್ ಡಬ್ಲ್ಯು ಬುಶ್ ಜೂನಿಯರ್ ಭಾರಾತಾಕ್ ಅಧಿಕ್ರತ್ ಸಯ್ರೊ ಜಾವ್ನ್ ಆಯ್ಲೊ. ತಾಚಿ ಪಾಟ್ ಕೊರ್ಪುಂಚಿ ಗರ್ಜ್ ಆಮ್ಚ್ಯಾ ಸರ್ಕಾರಾಕ್ ಆಸ್ಲಿ. ದೆಕುನ್, ತ್ಯಾ 111 ವಿಮಾನಾಂಚ್ಯೆಂ ಒರ್ಡರ್ ಬೋಯಿಂಗ್ ಕಂಪ್ಣೆಕ್ ದಿಲೆಂ.”
ಯೆಜ್ಮಾನ್: “ತಸಲಿ ಕಿತೆಂ ಘರ್ಜ್ ಆಸ್ಲಿ ಆಮ್ಚ್ಯಾ ಸರ್ಕಾರಾಕ್?”
ತಿಚ್ಯಾ ವಾಟ್ಸಪ್ ಗ್ರೂಪಾಂತ್ ಜಾಂವ್, ಫೆಸ್-ಬುಕ್ ನ್ಯುಸ್ ಫೀಡಾರ್ ಜಾಂವ್ ತಸಲಿ ಮಾಹೆತ್ ಕೊಣೆಂಯೀ ದಿಲ್ಲಿ ನಾಂ. ಹಾಂವೆಂ ಸಾಂಗ್ಲೆಂ ಮ್ಹಣ್ ತಿಣೆಂ ಕಿತ್ಯಾಕ್ ಪಾತಿಯೆಜೆ?
ಹಾಂವ್: “ತುಕಾ ಪಾತಿಯಂವ್ಕ್ ಕಷ್ಟ್ ಮ್ಹಣ್ ಮ್ಹಕಾ ಸಮ್ಜಾತಾ. ಪೂಣ್, ಭಾರತಾಚಿ ಪರಿಸ್ತಿತಿ ತಶಿ ಆಸ್ಲಿ. ಅಮ್ಕಾಂ ಅಣು-ಇಂಧನಾಚಿ ಗರ್ಜ್ ಆಸ್ಲಿ. ಪೂಣ್, ಅಮೆರಿಕಾಚ್ಯೆಂ Nuclear Regulatory Commission ಅಡ್ಕಳ್ ಘಾಲ್ನ್ ಆಸ್ಲೆಂ. ಅಮೆರಿಕಾ ಸಾಂಗತಾ civil nuclear deal (123 agreement) ಕೆಲ್ಯಾರ್ ಮಾತ್ರ್ ಹ್ಯೆ ಕಾನೂನಿ ಅಡ್ಕಳಿಚಿ ಸೊಡ್-ದೋಡ್ ಕರುಂಕ್ ಅಮೆರಿಕನ್ ಸರ್ಕಾರ್ ರಾಜಿ ಜಾಲ್ಲೊ. ತುಂ ಮ್ಹಜಿ ಪಾಟ್ ಖೊರ್ಪಿ; ಹಾಂವ್ ತುಜಿ ಖೊರ್ಪಿತಾಂ. ಅಸಲ್ಯಾ quid pro quo ಗುಪಿತ್ ಸೊಲ್ಲ್ಯಾಂಕ್ ಲಾಗುನ್ ಮನ್ ಮೊಹನ್ ಸಿಂಗಾಚ್ಯಾ ಸರ್ಕಾರಾನ್ 111 ವಿಮಾನಾಂಚ್ಯೆಂ ಒರ್ಡರ್ ದಿಲೆಂ. ಏರ್ ಇಂಡಿಯಾ ಆನಿಂ ಇಂಡಿಯನ್ ಏರ್-ಲಾಯ್ನ್ಸ್ ವಿಲೀನ್ ಕರ್ನ್ ಏಕ್ ವಿಶಾಲ್ ಕಂಪ್ಣಿಂ ಘಡ್ಲಿ. ಏರ್ ಇಂಡಿಯಾ ಸರ್ಕಾರಿ ಕಂಪ್ಣಿಂ ನಹಿಂ ಆಸ್ಲಿ ತರ್ ಹೆಂ ಒರ್ಡರ್ ಖಂಡಿತ್ ಬೋಯಿಂಗ್ ಕಂಪ್ಣೆಕ್ ಮೆಳ್ತೆಂ ನಾಂ. ಭಿತರ್ಲಿ ಖಬೊರ್ ಕಿ ಕೇವಲ್ 10 Air Bus 330 ವಿಮಾನಾಂ ಒರ್ಡರ್ ಕೆಲ್ಯಾರ್ ಪುರೊ ಮ್ಹಣ್ ಏರ್ ಇಂಡಿಯಾಚ್ಯಾ ಬೋರ್ಡಾನ್ ಸರ್ಕಾರಾಕ್ ಮನವಿ ಕೆಲ್ಲಿ!”
ಯೆಜ್ಮಾನ್: “ದೆಕುನ್ ಮ್ಹಣ್ಚ್ಯೆಂ ಸರ್ಕಾರಾನ್ ಬಿಜ್ನೆಸ್ ಚಲಂವ್ಕ್ ನಜೊ. ಮಂತ್ರಿ, ರಾಜ್‍ಕಾರಣಿ ಆನಿಂ ಸರ್ಕಾರಿ ಅಧಿಕಾರಿ ಆಪ್ಲಿ ದಾಳ್ ಶಿಜಂವ್ಕ್ ಪಬ್ಲಿಕ್ ಕಂಪ್ಣ್ಯಾಂಚೊ ದುರುಪಯೋಗ್ ಕರ್ತಾತ್”.
ಹಾಂವ್: “ಆತಾಂ ಏರ್ ಇಂಡಿಯಾ ಟಾಟಾ ಸನ್ಸ್ ವಾಲ್ಯಾಂಕ್ ವಿಕ್ರಿ ಕರ್ತಾನಾಂ, ತ್ಯಾಚ್ ಕಸ್ತಾಚ್ಯಾ ಮಂತ್ರಿಂನಿಂ, ರಾಜ್‍ಕಾರಾಣಿಂನಿಂ ಆನಿಂ ಅಧಿಕಾರಿಂನಿಂ ನಹಿಂವೇ ಸಗ್ಳಿ ಕಾಣಿ ಮೋದಿಕ್ ರುಚ್ತಾ ತಶಿ ಗುಂತ್ಲ್ಯಾ? 2004-2011 ಮ್ಹಣಾಸರ್, ಸಿವಿಲ್ ಏವಿಯೇಶನ್ ಮಂತ್ರಿಚ್ಯಿ ಪದ್ವಿ ವಾಪ್ರುನ್ ಶ್ರೀ ಪ್ರಫುಲ್ ಪಟೆಲಾನ್ ಏರ್ ಇಂಡಿಯಾಕ್ ರೀಣಾಂತ್ ಬುಡಯ್ಲೆಂ ಮ್ಹಣ್ ವಾದ್ ನೆ? ತ್ಯಾ ದುಡ್ವಾನ್ ಹಾಡಯಿಲ್ಲಿಂ ವಿಮಾನಾಂ ಅಜೂನ್ ಏರ್ ಇಂಡಿಯಾ ಕಡೆಂ ನಾಂತ್‌ಗೀ? ತಾಂಚ್ಯೆಂ ವಾಜ್ಬಿ ಮೋಲ್ 40-50 ಹಜಾರ್ ಕರೋಡ್ ಆಸಾ. ಕೇವಲ್ 18 ಹಜಾರ್ ರುಪ್ಯಾಂಕ್ ಹಿಂ ವಿಮಾನಾಂ ಆನಿಂ ಹೆರ್ ಮೂಳ್ ಆಸ್ತಿ ಟಾಟಾಕ್ ದಿವಾಳಿ ಗಿಫ್ಟ್ ದಿಲೆಂ ನಹಿಂ?”
“ಹಿ ವಾಟ್ ಸೊಡ್ಲ್ಯಾರ್, ಕಂಪ್ಣಿ ಬಂಧ್ ಕರಿಜೆ ಪಡ್ತೆಂ ನೇ?” ಯೆಜ್ಮಾನ್ ಸರ್ಕಾರಿ ವಕೀಲಾ ಪರಿಂ ಉದ್ಗಾರ್ಲಿ.
ಹಾಂವ್: “ಅಶೆಂ ಕೋಣ್ ಮ್ಹಣ್ತಾ? ಆತಾಂಚೊ ಸರ್ಕಾರ್ ನೆ? 2013 ಇಸ್ವೆಂತ್, ಪ್ರಫುಲ್ ಪಟೆಲಾ ಉಪ್ರಾಂತ್ ಆಯಿಲ್ಲ್ಯಾಯುಪಿಏ ಮಂತ್ರಿನ್ ಸಯ್ತ್ ಹಿಚ್ ಗಾಬ್ ಘಾಲ್ಲಿ. ವಿಕಿನಾ ಜಾಲ್ಯಾರ್ ಬಂಧ್ ಕರಿಜೆ! ದುಸ್ರಿ ವಾಟ್ ನಾಂ. ತವಳ್ ಮಾತ್ರ್ ಬಿಜೆಪಿ ಪ್ರತಿಪಕ್ಶ್ ಆಸ್ಲಿ. ಅಧಿಕಾರಾರ್ ನಾತ್ಲಿ. ದೆಕುನ್ ಏರ್ ಇಂಡಿಯಾ ವಿಕ್ರಿಚ್ಯಾ ವಿರುದ್ಧ್ ರಾವ್ಲಿ. ತವಳ್ ಮೋದಿ ಬಿಜೆಪಿಚೊ ಪ್ರಧಾನ್ ಮಂತ್ರಿ ಉಮೇದ್ವಾರ್! ಲೋಂಚ್‍ಕೋರಾಂ ವೊರ್ವಿಂ ಲುಕ್ಸಾಣ್ ಜಾಲಾಂ. ಸಾರ್ವಜನಿಕ್ ಆಸ್ತಿ ವಿಕ್ಚ್ಯೆಂ ದೇಶ್‍ದ್ರೋಹ್ ಮ್ಹಣ್ ಬಿಜೆಪಿನ್ ಅಧಿಕ್ರತ್ ಬಯಾನ್ ದಿಲೆಂ. ಕಿತೆಂ ಬದ್ಲಲೆಂ, ಆತಾಂ? ಸಾತ್ ವ್ಹರ್ಸಾಂ ना खाऊंगा, ना खने दूंगा ಸರ್ಕಾರ್ ಕಿತ್ಯಾಕ್ ಏರ್ ಇಂಡಿಯಾಂತ್ ವ್ಯವಸ್ತಾಪಿಕ್ ಮುಖೆಲ್‍ಪಣ್ ದೀಂವ್ಕ್ ಸಕ್ಲೊ ನಾಂ? ಕಿತ್ಯಾಕ್ ಆತಾಂ ಸುಣ್ಯಾ ಸವಾಯ್ ವಿಕಿಜೆ ಪಡ್ಲೆಂ?”
“ತುಜೆಂಯೀ ಏಕ್ ರಾಜಾಂವ್. ಸಂಕ್ಶಿಪ್ತ್ ಬರಯ್ ಆನಿಂ ಮ್ಹಕಾ ವಾಟ್ಸಪ್ ಕರ್. ಮ್ಹಜ್ಯಾ ಕ್ಲಾಸ್-75 ಗ್ರುಪಾಕ್ ಫೊರ್ವರ್ಡ್ ಕರ್ತಾಂ. ಕಶೆಂ ತುಕಾ ಸೊಲ್ತಾತ್ ಪಳೆ. ಮ್ಹಕಾ ಬರಿ ಮಜಾ ಜಾತೆಲಿ”. ಅಶೆಂ ತರ್ಕಾಕ್ ಫುಲ್ ಸ್ಟೊಪ್ ಘಾಲ್ನ್, ಮದಾಮ್ ಪರತ್ ಆಪ್ಲ್ಯಾ ಐಫೊನಾರ್ ವಾಳ್ಚ್ಯಾ ಕಾಣಿಯೆಂಚ್ಯೆರ್ ಮಗ್ನ್ ಜಾಲಿ.
► ಫಿಲಿಪ್ ಮುದಾರ್ತ್
Very nice and interesting article. You have clearly demonstrated the history & facts of Air india flight .As Air india has been taken over by Tata groupI I hope Tata will take the name of Air india into new height
Nicely written article with some facts and figure between Air India and Government of India. In the context of the fuel prices, policies around climate change and the competition from the flights operating from the middle east, It is interesting to see how the new owner will make this company a profitable business.
ಅಪೂರ್ವ್ ಮಾಹೆತಿ ಸಂಗಿ ಮಝೆದಾರ್ ಸಂವಾದ್. ಇಂಗ್ಲಿಷಾಂತ್ ಲಿಖ್‌ಲ್ಲೆಂ ತರ್ ನಿರ್ಮಲಾ ಸೀತಾರಾಮನಾಚಾ ಜಾಗ್ಯಾಕ್ ಮದಾಮೆಕ್ ವಿಂಚ್ಲ್ಯಾರೀ ವಿಂಚ್ಲೆಂ!