ನಮಾನ್ ಬಾಳೊಕ್ ಜೆಜು, ಕೊಂಕ್ಣಿ ಮಹಿನ್ಯಾಳೆಂ ಪತ್ರಾಚೊ 13ವೊ ವಾರ‍್ಶೀಕೋತ್ಸವ್ ಸಪ್ತೆಂಬರಾಚ್ಯಾ 15 ತಾರಿಕೆರ್, ಕಾರ್ಮೆಲ್ ಗುಡೊ ಬಿಕರ್ನಕಟ್ಟೆ ಹಾಂಗಾಸರ್ ಸಾಂಜೆರ್ 4 ವೊರಾಂಚೆರ್ ಸುರ‍್ವಾತ್ಲೊ. ಹ್ಯಾ ಕಾರ್ಯಾಕ್ ಮುಖೆಲ್ ಸಯ್ರೊ ಜಾವ್ನ್ ದಾಯ್ಜಿ ದುಬಾಯ್, ಬರಯ್ಣಾರಾಂಚೊ ಎಕ್ತಾರ್ ಅಧ್ಯಕ್ಷ್ ಮಾನೆಸ್ತ್ ನಾನು ಮರೋಲ್ ತೊಟ್ಟಾಮ್ ಹಾಜರ್ ಆಸ್‌ಲ್ಲೊ. ಕಾರ್ಯಾಚೆಂ ಅಧ್ಯಕ್ಶ್‌ಪಣ್ ಮಾ.ಬಾ. ಜೊರ್ಜ್ ಸಾಂತುಮಾಯೊರ್, ಸಹವ್ಹಡಿಲ್, ಕರ್ನಾಟಕ ಗೊಂಯ್ ಕಾರ್ಮೆಲಿತ್ ಪ್ರಾಂತ್ಯ್ ಹಾಣೆ ಘೆತ್‌ಲ್ಲೆಂ. ವೆದಿರ್ ನಮಾನ್ ಬಾಳೊಕ್ ಜೆಜು ಸಂಚಾಲಕ್ ಮಾ.ಬಾ. ಚಾರ್ಲ್ಸ್ ಸೆರಾವೊ, ಧ್ಯಾನವನ ಪ್ರಕಾಶನ್ ದಿರೆಕ್ತೊರ್ ಮಾ.ಬಾ. ಸ್ಟೀವನ್ ಪಿರೇರಾ, ಪತ್ರಾಚೊ ಸಂಪಾದಕ್ ಮಾ.ಬಾ. ಜೊ.ಸಿ. ಸಿದ್ದಕಟ್ಟೆ ಹಾಜರ್ ಆಸ್ಲೆ.
ಬಾ. ಜೊ.ಸಿ ಹಾಣಿಂ ಜಮ್ಲೆಲ್ಯಾಂಕ್ ಸ್ವಾಗತ್ ಕರ‍್ನ್ ನಮಾನ್ ಬಾಳೊಕ್ ಜೆಜು ಬಾಳ್ಪಣ್ ಉತ್ರೊನ್ ತರ್ನಾಟ್ಪಣಾಕ್ ಪಾಂಯ್ ತೆಂಕ್ತೇ ಆಸಾ ಮ್ಹಣ್ ಪತ್ರ್ ಚಲೊನ್ ಆಯಿಲ್ಲಿ ವಾಟ್ ವಿವರ‍್ಸಿಲಿ.
ಕಾರ್ಯಾಚೊ ಪಯ್ಲೊ ವಾಂಟೊ ಜಾವ್ನ್ ನಮಾನ್ ಬಾಳೊಕ್ ಜೆಜು ಪತ್ರಾರ್ ಸಬಾರ್ ತೇಂಪ್ ಪೊಲಿಟಿಕಲ್ ಮ್ಹಳ್ಳೆಂ ಅಂಕಣ್ ಚಲಯಿಲ್ಲೊ ಲೇಖಕ್ ತಶೆಂಚ್ ಕವಿ ರೋಶು, ಬಜ್ಪೆ ಹಾಚೊ 70 ಭುರ್ಗ್ಯಾಂಚ್ಯೊ ಕವಿತಾ ಆಟಾಪ್ಚೊ ಗಿರ್ಬುಜಿ ಪುಸ್ತಕ್ ಮೊಕ್ಳಿಕ್ ಕೆಲೊ.
ಆದ್ಲ್ಯಾ ವರ್ಸಾ ಕೊರೋನಾವರ್ವಿಂ ಘರಾಚ್ ಬಂಧಿ ಜಾಲ್ಲ್ಯಾ ತವಳ್ ಬಾ. ಜೊ.ಸಿ. ಹಾಣಿಂ ಕವಿತಾ ಮಾಟ್ವಾಂತ್ ಕವಿತಾ ಚಾಲೆಂಜ್ ಸುರು ಕೆಲ್ಲೆಂ. ಆನಿ ಹೆಂ ಕವಿತಾ ಚಾಲೆಂಜ್ ಯಶಸ್ವಿ ಜಾವ್ನ್ ಉಪ್ರಾಂತ್ ಹ್ಯಾ ಚಾಲೆಂಜಾಂತ್ ಭುರ್ಗ್ಯಾನಿಂಯೀ ಭಾಗ್ ಘೆತ್ಲೊ. ಹ್ಯಾ ವಗ್ತಾ ಕೊಂಕ್ಣೆಂತ್ ಭುರ್ಗ್ಯಾಂಚ್ಯಾ ಕವಿತೆಂಚೆಂ ಉಣೆಂಪಣ್ ದಿಸೊನ್ ಆಯ್ಲೆಂ. ತವಳ್ ಬಾ. ಜೊಸಿ ಹಾಣಿಂ ಪೊಯೆಟಿಕ್ಸ್ ಪಂಗ್ಡಾಂತ್ಲ್ಯಾ ಥೊಡ್ಯಾ ಕವಿಂಕ್ ಸಾಂಗಾತಾ ಘೆವ್ನ್ ಭುರ್ಗ್ಯಾಂಚ್ಯೊ ಕವಿತಾ ಬರಂವ್ಚ್ಯಾ ಯೋಜನಾಂಕ್ ಬುನ್ಯಾದ್ ಘಾಲಿ. ಅಶೆಂ ಹ್ಯಾ ಆವ್ದೆಂತ್ ರೋಶು ಬಜ್ಪೆನ್ ಬರಯಿಲ್ಲ್ಯಾ ಸಬಾರ್ ಕವಿತಾಂ ಪಾಯ್ಕಿ ಮೆಜುನ್ ಸತ್ತರ್ ಕವಿತಾ ಗಾಳ್ನ್ ‘ಗಿರ್ಬುಜಿ’ ಪುಸ್ತಕ್ ತಯಾರ್ ಜಾಲಾ.
ಭುರ್ಗ್ಯಾಂಚ್ಯಾ ಸಂಸರಾಂತ್ಲ್ಯೊ, ಲ್ಹಾನಾಂಚ್ಯಾ ಜಿಬೆರ್ ಘೊಳಾಜಯ್ ಜಾಯ್ ತಸಲ್ಯೊ ಕವಿತಾ ಹ್ಯಾ ಪುಸ್ತಕಾಂತ್ ಆಟಾಪ್ಲ್ಯಾತ್. ಹೊ ಪುಸ್ತಕ್ ಬಾ. ಸ್ಟೀವನ್ ಪಿರೇರಾ, ದಿರೆಕ್ತೊರ್ ಧ್ಯಾನವನ ಪಬ್ಲಿಕೇಶನ್ಸ್ ಹಾಚೆ ದಿರೆಕ್ತೊರ್ ಹಾಣಿಂ ಬರ‍್ಯಾ ರಿತಿನ್ ಛಾಪುನ್ ಉಗ್ತಡಾಕ್ ಹಾಡ್ಲಾ. ಹ್ಯಾ ಪುಸ್ತಕಾಂತ್ ಲ್ಹಾನಾ ಭುರ್ಗ್ಯಾಂಚಿಂ ಮನಾ ಪಿಸ್ವೊಂಚಿಂ, ಕವಿತಾಕ್ ಲಗ್ತಿ ಜಾಲ್ಲಿಂ ಪಿಂತುರಾಂ ತಶೆಂಚ್ ಸೊಭಿತ್ ಸುಂದರ್ ಮುಖ್‌ಪಾನ್ ಮಾನೆಸ್ತ್ ರೊನಾಲ್ಡ್ ಮೆಂಡೊನ್ಸಾ, ಮುಂಬಯ್ ಹಾಣಿಂ ಸೊಡೊವ್ನ್ ದಿಲಾಂ. ಹ್ಯಾ ಪುಸ್ತಕಾಂತ್ ಕೊಂಕ್ಣಿ ಕವಿ ತಶೆಂಚ್ ವಿಮರ್ಶಕ್, ಕಿಟಾಳ್ ಜಾಳಿಜಾಗೊ ಸಂಪಾದಕ್ ಎಚ್ಚೆಮ್ ಪೆರ್ನಾಲ್ ಹಾಣಿಂ ಸುರ‍್ವಿಲಿಂ ಉತ್ರಾಂ ಬರಯ್ಲ್ಯಾಂತ್. ಹ್ಯಾ ಪುಸ್ತಕಾಚೆಂ ವಿನ್ಯಾಸ್ ಕೆಲಾಂ ಮಾನೆಸ್ತ್ ಲಾರೆನ್ಸ್ ಮಿರಾಂದಾ, ಬೆಂಗ್ಳುರ್ ಹಾಣೆ.
ಹ್ಯಾ ಪುಸ್ತಕಾಚೆಂ ಮೋಲ್ ರು. 150/-. ಪ್ರತಿಯೊ ಜಾಯ್ ಆಸ್‌ಲ್ಲ್ಯಾನಿಂ ರೋಶು, ಬಜ್ಪೆ ಹಾಚ್ಯಾ ನಂಬ್ರಾಕ್ 9880119515 ಗೂಗಲ್ ಪೇ ಕರ‍್ನ್ ವಿಳಾಸ್ ಇನ್‌ಬಾಕ್ಸ್ ಕರ‍್ಚೊ ವಾ ನಮಾನ್ ಬಾಳೊಕ್ ಜೆಜು ದಫ್ತರಾಕ್ ಸಂಪರ್ಕ್ ಕರ‍್ಚೊ.
